(မီးခြစ်ရှာတော်ပုံ)

(မီးခြစ်ရှာတော်ပုံ)
မနေ့က ဇနီးသည်အလုပ်က အေးလို့ဆိုပြီး ၂ နာရီလားပဲဖွင့်ပြီး အလုပ်ပိတ်လိုက်တယ်။ အိမ်ပြန်ရောက်လာတော့ မုန့်လေးတချပ်နှစ်ချပ်ဝါးပြီး ပျင်းတယ်ဟယ် အပြင်ထွက်ရအောင်တဲ့။ ဒါ့လောက် အအေးကြီးထဲ ဘယ်သွားပြီး ဘာလုပ်မှာလဲဆိုတော့ ကုန်စုံဆိုင်သွားပြီး သစ်သားမီးခြစ်ဝယ်ရမယ်လေ၊ ပြီးတော့ Costco ဘက်သွားရအောင်၊ Salad အတွက် Dressing ဝယ်မယ်၊ တခြားလည်း စားစရာအပြင် ကြိုက်တာလေးတွေ့ ဝယ်ရတာပေါ့၊ အမြည်းလည်း လိုက်စားစို့ဆိုပြီး နှင်းတောကြီးထဲမှာပဲ အပြင်ထွက်ကြတပါတယ်။ Costco မှာက အစားအသောက်အမယ်သစ်တွေကို အမြည်းကျွေးတာကိုး။

သစ်သားမီးခြစ်ဝယ်ရတာက အိမ်သာတက်ပြီး ခြစ်ဖို့ပါ။ ဒီက အိမ်သာတွေက အပူ အအေးထိန်းဖို့အပြင် တကိုယ်ရည်လုံလုံခြုံခြံု စိတ်ချလက်ချသွားနိုင်အောင် စရွေးကိုက် ပိတ်ထားတာမဟုတ်လား။ ဒီဘက်ခေတ်ဆောက်တဲ့အိမ်တွေနဲ့ အများသုံးနေရာတွေက အိမ်သာတွေမှာက အနံ့ဆိုးအပြင်ထုတ်တဲ့စနစ်က ပါပြီးသားပေမယ့် ကျနော်တို့အိမ်လို ၅ ဆယ်ခုနှစ်တွေကဆောက်ခဲ့တဲ့ သစ်သားအိမ်တွေမှာကျ အဲ့စနစ်က မပါတတ်ကြပါဘူး။ ဒီတော့ တယောက်ယောက် ရှေ့ကသွားနှင့်ပြီးရင် အိမ်သာက နံကျန်နေတတ်တာပါ။ အနံ့ကတော်တော်နဲ့ မပြယ်နိုင်ပါဘူး။ မြန်မြန်ပြယ်အောင်ဆိုပြီး တံခါးဖွင့်ထားဖို့ဆိုတာကျတော့လည်း ဒီကယဉ်ကျေးမှုနဲ့မကိုက်ပြန်ဘူး။

ဒီတော့ ရှေ့ကလူက အိမ်သာသွားပြီးရင် နောက်လူအတွက် အထဲမှာ အနံ့ဆိုးမကျန်အောင် ကြံစည်ရပါတယ်။ အဲ့ဒီအခါမှာ ယမ်းမီးခြစ်ဆန်နဲ့မီးခြစ်က အဖိုးအနဂ္ဃထိုက်တဲ့ပစ္စည်း ဖြစ်တော့တာပါပဲ။ အိမ်သာသွား၊ ကိုယ့်အညစ်အကြေး သုတ်သင်၊ ပြီးရင် ရေဆွဲချ၊ ပြီးတာနဲ့ မီးခြစ်ဆန်တဆန်ကိုထုတ်ပြီး မီးခြစ်ဗူးဘေးက ယမ်းပြားပေါ်ခြစ်ချ၊ ရှဲကနဲမြည်ပြီး မီးလေးတောက်လာတာနဲ့ နတ်ကတော်များ နတ်ရုပ်ရှေ့မှာ အမွှေးတိုင် ဝှေ့ရမ်းသလို ကိုယ့်ပတ်ပတ်လည်ကို ခတ်သာသာလေး ဝှေ့ရမ်းပေးလိုက်ရင် မီးခြစ်ဆန်လည်းကုန် အနံ့လည်း တပါတည်းပျောက်သွားပါတယ်။ အဲ့လိုလုပ်တာကို ကျနော်က ပြောင်ပြီး Ritual လို့ပြောတော့ ဇနီးက နင်မို့ပေါက်ပေါက်ရှာရှာဆိုတဲ့သဘောပြောပြီး ရယ်ဖူးတယ်။ ဒါက ထိပ်တန်းလျှို့ဝှက်ချက်မဟုတ်ပေမယ့် သိသူတော့ သိတ်မများလှပါ။ ငွေကုန်ကြေးကျလည်းသက်သာ ဘယ်သူ့ဘယ်သူမှလည်း သူ့အနံ့ကိုယ့်အနံ့ကြောင့် စိတ်မသက်မသာ မဖြစ်ရတော့ဘူးပေါ့ဗျာ။ ငွေကုန်ကြေးကျ သက်သာတယ်လို့ပြောရတာက မီးခြစ်ဆန်အချောင်း ၃ ရာပါတဲ့ မီးခြစ်ဗူး ၃ ဗူးမှ ၂ ဒေါ်လာသာသာလေးပေးရလို့ပါ။

ဒါနဲ့ မီးခြစ်ဝယ်နေကျ Menards လို့ခေါ်တဲ့ အိမ်ဆောက်ပစ္စည်းတွေ လျှပ်စစ်နဲ့ လက်သမားသုံးပစ္စည်းတွေရောင်းတဲ့ ဆိုင်ရောက်ရော ဆိုပါတော့။ မီးခြစ်တွေက ခါတိုင်း ထားနေကြနေရာမှာ မတွေ့ဘူး။ ခါတိုင်းဆို အသားကင်စက် Grills တွေ မီးသွေးတွေ မီးမွှေးဆီတွေ ဂက်စ်မီးခြစ်လည်တံရှည်တွေထားတဲ့စင်တွေထဲ တနေရာရာမှာ တွဲထားတာ။ ခု မတွေ့ဘူး။ ၂ ယောက်သား ဟိုရှာဒီရှာနဲ့ ကြာတော့ စိတ်ကညစ်လာတယ်။ မရှာချင်တော့ဘူး။ ဆိုင်အရောင်းသမား တယောက်ယောက်မေးမှဆိုပြီး လှည့်ပတ်ကြည့်တော့ ဆိုင်ဝတ်စုံနဲ့ ၂ ယောက်တွေ့တယ်။ တယောက်က လူငယ် အသက် ၂ ဆယ်လောက်။ တယောက်က လူကြီး အသက် ၆ ဆယ်လောက်။

လူငယ်ဆို သိချင်မှသိမယ် လူကြီးမေးမှသိမှာပါဆိုပြီး လူကြီးဆီသွားတယ်။ ဒီက လူငယ်တွေမှာ ဟိုတုန်းက နံပတ်လေးတွေ တကွက်ခြင်းတကွက်ချင်း လက်နဲ့ထောက်လှည့်ပြီးဆက်ရတဲ့တယ်လီဖုန်း မသိကြတာက များနေပြီ။ တချို့ဆို လက်နဲ့ဂီယာပြောင်းပြောင်းပြီး မောင်းရတဲ့ကားတွေရှိတာတောင် မသိတော့ဘူး။ ကျနော်တို့အိမ်ဝယ်တော့ အိမ်မှာ အဲ့သလို ဟိုတုန်းက လက်နဲ့ Dial လုပ်ရတဲ့ဆင်စွယ်ရာင်ဖုန်းလေး ပါလာတယ်။ လိုင်းကတော့ မယူလို့ပြတ်နေပေမယ့် ဖုန်းက အကောင်းလေး အသစ်လေးအတိုင်းပဲ။ ဒါနဲ့ ဇနီးက အဲ့ဒါလေးဖြုတ်ရင်း ငါ့မြေးတွေပြဖို့ဆိုပြီး မြေအောက်ခန်းမှာ သွားသိမ်းထားတယ်။ ထားပါတော့လေ။

ဒါနဲ့ ကျနော်လည်း ခုန လူကြီးဆီသွားပြီး Strike on Box Matches တွေရှိလားလို့မေးတယ်။ သူက နားမလည်သလို ကြည့်နေတယ်၊ ကျနော်ထပ်ပြောတော့ ဘာလဲတဲ့ ဘာကိုပြောတာလဲတဲ့။ ဒီတော့ ကျနော်က လက်နဲ့ သစ်သားမီးခြစ် ခြစ်သလိုလုပ်ပြတယ်။ ဖယောင်းတိုင်မီးလေးတွေ လိုက်မီးညှိပြသလိုပါ လုပ်ပြတာ။ လက်လောင်တောာ့မယ့် မီးခြစ်ဆန်ချောင်းကမီးကို ပါးစပ်နဲ့ ဝှူးကနဲပါ မှုတ်ပြလိုက်သေးတာ။ လက်က တဘက်တည်းရှိတဲ့အပြင် ရှိတဲ့ဘက်ကလည်း လက်ချောင်းတွေ မစုံတော့ သစ်သားမီးခြစ် ခြစ်တာကို သရုပ်ပေါ်အောင်လုပ်ပြလို့ မပီပြင်ဘူး။ ဖယောင်းတိုင်မီးညှိသလိုပါ လုပ်ပြတော့ သူ ပိုရှုပ်ရှုပ်ကုန်ပုံရတယ်။ ခေါင်းတခါခါနဲ့ I don't know what you mean တွေချည်းလုပ်တော့တာပဲ။

သစ်သားမီးခြစ်က ဂက်စ်မီးခြစ်တွေလို လက်တဘက်တည်းနဲ့ ခြစ်လို့မှမရတာကိုး။ ဒီလောက် လုပ်ပြနေလည်း သူနားမလည်ဘူးဖြစ်နေတယ်။ ငါ့ အင်္ဂလိပ်အသံထွက် မပီလို့နေမှာပါထင်ပြီး တလုံးချင်း ပီပီသသ Strike On Box Matches ဆိုပြီးပြောလည်း သူမသိဘူး။ ဒါနဲ့ မင်း Gas Lighter သိလားဆိုတော့ သူ့အိပ်ထဲက မီးခြစ်ထုတ်ပြတယ်။ အေး..အဲ့ဒါမျိုးပဲ ဒါပေမယ့် အဲ့ဒါမျိုးတော့မဟုတ်ဘူးဆိုပြီး သစ်သားမိးခြစ်ကွာ သစ်သားမီးခြစ်လေ ဒါလေးတောင်မသိဘူးလားဆိုပြီး ပါးစပ်က ဗမာလိုတွေ ထွက်သွားတယ်။ သူ ပိုပြီး အူကြောင်ကြောင်ဖြစ်သွားတယ်။ ဘာစကားတွေနဲ့ လာပြောနေပါလိမ့်လိုလဲတွေးမိပုံပဲ။

ဒါပေမယ့် ကျနော် စိတ်တိုနေပြီဆိုတာတော့ Sir, i am sorry, i don't understand what you're saying. ဆိုပြီး ပြာပြာသလဲဖြစ်သွားတယ်။ ကျနော့်ပုံက လူကလည်း ခြေပြတ်လက်ပြတ်ပေမယ့် တောင့်တောင့်တင်းတင်း၊ ကျန်းမာရေးကလည်း ကောင်းတဲ့ပုံ၊ ပါးသိုင်းမွှေး မုတ်ဆိတ်မွှေးနှုပ်ခမ်းမွှေးကလည်း ခတ်ပါးပါး၊ ဝတ်ထားတဲ့ အပေါ်ဝတ်ကလည်း စစ်သုံးနှင်းကာ ဂျက်ကက်၊ ရက်ကလည်း စစ်မှုထမ်းဟောင်းများနေ့နောက် ၂ ရက်ကြာဆိုတော့ သူ့စိတ်ထဲ အမေရိကန်စစ်ပြန်ထင်ပြီး သတိဆွဲသလိုလို Salute ရိုက်သလိုလိုဖြစ်ကုန်ပြီး Thanks for your service တွေဘာတွေပါ လုပ်ကုန်ရော။ ကျနော်လည်း စိတ်ဆိုးတာတွေပျောက်ပြီး စောက်ကျိုးနည်း ဖြစ်ရလေဆိုပြီး ရယ်ချင်သွားတယ်။ အသံလည်း ထွက်သွားတယ်။ ဒါနဲ့ သူ့ကိုနေပေ့စေတော့ ငါ့ဟာငါပဲရှာတော့မယ် မတွေ့လည်း တခြားလူမေးမယ်၊ မရှိလည်း တခြားဆိုင်သွားမယ် ကျေးဇူးတင်ပါတယ်လို့ ချိုချိုသာသာ ပျော့ပျော့ပြောင်းပြောင်းပြန်ပြောပြီး လှည့်ထွက်တော့ သူက Yes, Sir ဆိုပြီးကျန်ခဲ့တယ်။

နောက်ကအသံကြားလို့ လှည့်ကြည့်တော့ ဇနီး။ ကျနော့်မျက်နှာကြည့်ပြီး ပြုံးစေ့စေ့နဲ့ ဘာဖြစ်ရပြန်သတုန်းတဲ့။ ကျနော်က အဖြစ်အပျက်အစအဆုံးပြောပြတော့ သူပါ သဘောတွေကျပြီး တဟားဟား ရယ်တော့တာပဲ။ အဲ့ဒါကို ဟိုလူကြီးက မလှမ်းမကမ်းကကြည့်ရင်း ဘာမသိညာမသိ ဘာမကြား ညာမကြားပေမယ့် လှမ်းပြီးပြံုးပြရှာတယ်။ ကျနော်လည်း ရှိတဲ့ ဘယ်လက်နဲ့ သူ့ကို အဝေးကနေလှမ်းအလေးပြုရင်း Bye လုပ်လိုက်တယ်။
မျိုးမြင့်ချို
ႏိုဝင္ဘာ ၁၃၊ ၂ဝ၁၉