(ထောက်တော့ ထောက်ခံတယ်ဆိုပါတယ်)

(ထောက်တော့ ထောက်ခံတယ်ဆိုပါတယ်)
နိုင်ငံခြားရေးဝန်ကြီးဌာန(ဒေါ်အောင်ဆန်းစုကြည်)ထုတ်ပြန်ကြေညာချက်ကိုသေချာ စေ့စေ့ငုငုဖတ်ကြည့်ပါ။ စာချုပ်ပါအတိုင်း လိုက်နာဆောင်ရွက်ပါမယ်လို့ ပြောပါတယ်။ သဘောက ဥပဒေနှင့်အညီ လုပ်ကိုင်ဆောင်ရွက်ပါ့မယ်ပြောတာပါ။ နိုင်ငံရေးစကား မပြောပါ။ ဥပဒေစကားပြောထားပါတယ်။ ဒီရာဇဝတ်မှူကြီးကို မကျူးလွန်ဘူးလို့ ဘူးခံငြင်းမယ်လို့အဓိပ္ပါယ်မထွက်ပါ။ ကျူးလွန်တာမှန်ကြောင်း သက်သေသွားခံမယ်လို့လည်း မဆိုလိုပါ။ စွဲချက်မတင်သင့်ဘူးဆိုတဲ့အကြောင်း သွားလျှောက်လဲရမှာပါ။ အဲ့သလို စွဲချက်မတင်သင့်ကြောင်းပြောတဲ့အခါမှာလည်း ဘယ်လူမျိုး ဘယ်ဘာသာ ဘယ်အစုအဖွဲ့ကိုမှ တိုက်ရိုက်ဖြစ်စေ သွယ်ဝိုက်ဖြစ်စေ ထိခိုက်နာစေခြင်း တိုက်ခိုက်ခြင်းမလုပ်ဖူး ပကတိအရှိတရားနဲ့သံန္နိဌာန်ကို ကမ္ဘာသိအောင်လုပ်မယ်လို့ပြောထားတာပါ။ ဒါက ကြေညာချက်ကိစ္စပါ။

ထောက်ခံတဲ့ကိစ္စကျ ရှူပ်ထွေးမှူတွေများလာပါတယ်။ ပါမောက္ခတို့ ထေရဝါဒအစွန်းရောက်ဘုန်းကြီးဂိုဏ်းနဲ့ သူ့နောက်လိုက်တွေက ပုံစံတမျိုးနဲ့ထွက်လာတာပါ။ သူတို့ ရပ်ခံချက်က ရိုဟင်ဂျာတွေကိုသတ်တာ တိုင်းပြည်ကနေထွက်ပြေးအောင်လုပ်တာ မမှားဘူး။ OIC က မွတ်စလင်မ်နိုင်ငံတွေဖြစ်လို့ ရိုဟင်ဂျာတွေဘက်က လိုက်နေတာ။ ဂမ်ဘီယာက OIC ကိုယ်စား တရားစွဲတာ။ ဒါ့ကြောင့် တရားစွဲဆိုမှူကို ဆန့်ကျင်တယ်။ ချုပ်ရရင် သူတို့က ဂမ်ဘီယာနိုင်ငံကနေ OIC နိုင်ငံတွေကို ကိုယ်စားပြုတရားလိုလုပ်ပြီး တရားစွဲတာကို ဆန့်ကျင်တယ်။ ဘာသာရေး လူမျိုးရေးအခြေခံတယ်။

နောက်တပုံမှာတွေ့ရတဲ့ မေမေ့သားနီပေါတွေကလည်း ဂမ်ဘီယာ နိုး Gambia No လုပ်နေတယ်။ ဒီတော့ ဘုန်းကြီးဆိုးဂိုဏ်းနဲ့ မေမေ့သားနီပေါတချို့နဲ့က ဂမ်ဘီယာကိုဆန့်ကျင်တယ်။ ဂမ်ဘီယာကိုဆန့်ကျင်တယ်ဆိုတာ တရားစွဲတာကိုဆန့်ကျင်တယ်ဆိုတဲ့သဘော။ ဒီတော့ ဒီ အကြမ်းဖက်ဘုန်းကြီးဂိုဏ်းနဲ့ မေမေ့သားနီပေါတချို့က ရည်ရွယ်ချက်တူနေတယ်။ ဘုန်းကြီးဖြစ်ဖြစ် မေမေ့သားနီပေါဖြစ်ဖြစ်က လုပ်ရတာ ဘာမှမခက်ဘူး။ ဂတုံးတုံးပြီး သင်္ကန်းကောက်ပတ်လိုက်ရင်၊ ပင်နီဝတ်ပြီး ရင်ထိုးထိုးလိုက်ရင် ပွဲတက်ချိန် လက်သီးလက်မောင်းတန်းချိန် ကြွေးကြာ်သံတိုင်ချိန်မှာ ဘုန်းကြီးပဲ မေမေ့သားနီပေါပဲ။ သေချာစစ်ဆေးရင်ပေါ်ပေမယ့် လတ်တလော ရုပ်အထွက်မှာတော့ မဘသ နဲ့ မေမေ့သားနီပေါလို့ပဲ လူတွေကမြင်မှာပါ။ တကယ့်မေမေ့သား နီပေါအစစ်တွေလည်း အဲ့ဒီလိုင်းမှာရှိနေတာလည်း ဖြစ်နိုင်တယ်။

ခု တချို့ ဒေါ်အောင်ဆန်းစုကြည်သွားပြီး စွဲချက်မတင်သင့်ကြောင်း လျှောက်လဲချက်ပေးမှာကို ထောက်ခံပွဲတွေလုပ်နေကြတယ်။ တယောက်တပေါက်ပဲ။ အပေါ်မှာပြောခဲ့တဲ့ ဘုန်းကြီးဆိုးတွေနဲ့ မေမေ့သားနီပေါတွေလည်းတွေ့ရတယ်။ နောက်ပိုင်း(ဒေါ်စုထွက်ခွားသွားချိန်)ကျမှလုပ်ကြမယ်ဆိုတဲ့သူတွေလည်း ထောက်ခံတယ်သာပြောတာ ဘာထောက်ခံမှန်း နိုင်ငံရေးအရ တိတိပပပြောနိုင်တာ မတွေ့ရသေးဘူး။ အမျိုးသားအကျိုးစီးပွားကာကွယ်ဖို့ဆိုတဲ့ မရေမရာနိုင်တဲ့ ဝါဒဖြန့်စကားလုံးအောက်ကနေ တောင်တောင်အီအီတွေ ပြောနေတာပဲတွေ့ရတယ်။ ဘာကိုထောက်ခံမှာလဲ ယတိပြတ်မပြောနိုင်ဘူး။ ထောက်ခံရင်းနဲ့ ဆန့်ကျင်မိရက်သားဖြစ်နေမယ့်ကိန်းမျိုး မဆိုက်ဘူးလည်း မပြောနိုင်ဘူး။ တခါ ဆန့်ကျင်တယ်ဆိုတော့ရော နီပေါအတုတွေနဲ့ဘုန်းကြီးဆိုးတွေလို ဗြောင်ပြောပြီးဆန့်ကျင်မျာလားဆိုတော့လည်း ဟုတ်မယ်မထင်ဘူး။

နောက်တချက် အရေးကြီးတာက အဲ့ဒီကိုသွားဖို့ ဒေါ်စုဦးဆောင်တာကတော့ ဟုတ်ပြီ။ စစ်အုပ်စုက ဘယ်သူလိုက်မလဲ။ ဘယ်စစ်ဗိုလ်ကြီးကြီးတွေကို ထည့်ပေးမှာလဲ။ ဒါလည်း ခုထိ စစ်အုပ်စုက တရားဝင်မပြောသေးဘူး။ ပုံကြည့်ရတာ စစ်တပ်နဲ့ဒေါ်စု(အစိုးရ)ကြားမှာ အပြန်အလှန်သံသယတွေနဲ့ ခံစစ်ပြင်နေကြတဲ့သဘောများလားလို့တွေးမိပါတယ်။ ဒါ့ကြောင့် ဒီသံသယကိုလည်း ဖြည်ထုတ်ဖို့ တယောက်တပေါက်ဆန္ဒပြနေတာတွေကိုလည်း ကြွေးကြော်သံတခုတည်းအောက်မှာစုဖို့ ဒီကြေညာချက်ကိုထုတ်ပုံပေါ်တယ်။ ခက်နေတာက ကြေညာချက်ကိုယ်တိုင်က “အရေးကြီးပြီ သွေးစည်းကြစို့“ဆိုတာကလွဲလို့ ဘာမှမပြောနိုင်ဘူး။ ဘယ်ကြွေးကြော်သံအောက်မှာ အားလုံးတစုတည်း စုကြပါလို့ အပြီးအပြတ်မပြောနိုင်ဘူး။ အဲ့ဒါကိုက ရှူပ်ထွေးမှူတွေဖြစ်လာစေမယ့် ရေခံမြေခံလိုဖြစ်နေတယ်။

ဒီတော့ ဖြစ်လာနိုင်စရာက ၂ ခုတွေးမိတယ်။ တခုက အရေးကြီးပြီ ညီနောင်အပေါင်းတို့ဆိုတဲ့ ကိုမွန်းအောင်သီချင်းနဲ့ ကွေးနေအောင်ကကြခုန်ကြတဲ့ နီပေါအုပ်ကြီးတွေ ထွက်လာမယ်။ ဘုန်းကြီးဆိုးတွေနဲ့နောက်လိုက်နောက်ပါတွေကလည်း OIC ဆန့်ကျင်ရေးကိုင်ပြီး မိုက်မိုက်ရိုင်းရိုင်းတွေပြောပြီး ထွက်လာလိမ့်မယ်။ တုတ်တွေ ဓားတွေပါ ဆောင်လာနိုင်တယ်။ အရေးကြီးပြီညီနောင်အပေါင်းနဲ့ ကခုန်နေတဲ့လူတွေနဲ့ ငြိနိုင်တယ်။ ဘယ်အစဆွဲထုတ်ပြီး ငြိမလဲကတော့ မပြောတတ်သေးဘူး။ စစ်အုပ်စုကတော့ အခြေအနေကြည့်ပြီး အရေးကြီးပြီညီနောင်အပေါင်းတို့ကို ငွေစကြေးစပေးတန်ပေးလိမ့်မယ်။ ဟန်ပုံမပေါ်ရင် မဘသတွေနဲ့ ဓားကြိမ်းကြိမ်းပြီး ဘီလူးဆိုင်းနဲ့ထွက်လာလိမ့်မယ်။ ဒါပေမယ့် လူမျိုးရေး ဘာသာရေးအဓိကရုဏ်း ဖြစ်မလာအောင်တော့ သတိကြီးကြီးထားလိမ့်မယ်။ ဒီအချိန် ထပ်ဖန်တီးပြီး ထပ်ဖြစ်လိုက်လို့ကတော့ မိုးမီးလောင်လိမ့်မယ်။

ကြည့်တော့ကြည့်ရမှာပါ။ မြင်လည်း မြင်ရမှာပါပဲ။ မကြာပါဘူး။
မျိုးမြင့်ချို
နိုဝင္ဘာ ၂၈၊ ၂ဝ၁၉