(ထောင်ဟာ ထောင်ပဲတဲ့)

(ထောင်ဟာ ထောင်ပဲတဲ့)
ဟိုတလောလေးက နှင်း မည်ကာမတ္တကျတယ်။ ယတြာချေတာကျနေတာပဲ ပြောမိလို့ ယတြာချေတယ်ဆိုတာဘာမှန်း ဇနီးကို စီကာပတ်ကုံးရှင်းပြရသေးတယ်။ သူတို့ဓလေ့မှာ ယတြာချေတယ်ဆိုတာ မရှိလို့ ဒါမှရှိတယ် သူမသိလို့နေမှာလို့ဘဲ တွေးမိတာပါပဲ။

ဒီနေ့တော့ နှင်းက ၂ လက်မကနေ ၄ လက်မအထိကျမတဲ့။ လွန်ခဲ့တဲ့ ၃ ရက်လောက်ကတည်းက မိုးလေဝသကပြောနေတာ။ ကျရင် မနက် ၁၁ နာရီကနေ စကျမတဲ့။ တနေကုန်တဲ့။ ခတ်ပါးပါးဖွဲဖွဲနဲ့ ဖြည်းဖြည်းချင်းကျမှာမို့ သိတ်တော့ မပူရပေမယ့် လမ်းတွေတော့ချော်မတဲ့။ ပြောတဲ့အတိုင်းပဲ ၁၁ နာရီထိုးပြီး မိနစ်ကလေးပဲစွန်းတယ် နှင်းဦးက စကျတော့တာပါ။ ခုလည်း တဖွဲဖွဲကျနေတာပါ။

နှင်းကျတာကြည့်ရင်း ကချင်ပြည်နယ် စစ်ပြေးဒုက္ခသည်စခန်းကလူတွေနဲ့ ဗမာပြည်အရပ်ရပ်က ကျောမွဲတွေဘဝကိုတွေးမိပြီး သက်ပြင်းလည်းချမိတယ်။ ဒီမှာလည်း လူဆင်းရဲတွေ အိုးမဲ့အိမ်မဲ့တွေရှိတယ်ဆိုပေမယ့် ရာသီသိတ်ဆိုးလာရင် ညရေးညတာ လုံလုံခြုံခြံုခိုလှူံစရာ၊ ပူပူလောလောအစားအသောက်၊ နွေးနွေးထွေးထွေး အဝတ်အထည်တွေ အခမဲ့ဝေငှတဲ့နေရာတွေတော့ ထိုက်သလောက်ရှိနေတာပါ။ ဒီ့ထက်မက ရာသီဆိုးလာရင်တော့ အသင်းအပင်းအဖွဲ့အစည်းတွေနဲ့ သက်ဆိုင်ရာမြိ့ုအစိုးရအာဏာပိုင်တွေနဲ့ အလှူရှင်တွေနဲ့ တပွဲတိုးသက်သာရာ စီစဉ်ပေးတာတွေလည်း ရှိပါတယ်။ ဒါပေမယ့် မလုံလောက်ပါ။ ဒီတော့ ပန်းခြံတွေ၊ မြေအေက်ဘူတာရုံတွေ၊ လူသူအရောက်အပေါက်မရှိတဲ့ ချောင်ကြိုချောင်ကြားတွေမှာ လူမသိသူမသိ အာဟာရပြတ်ပြီး အအေးလောင်ပြီး သေတဲ့လူတွေလည်း တနှစ်တနှစ်မနည်းပါ။

ဒီမှာက ဒီရာသီဆို ထောင်တွေလူစည်ပါတယ်။ အိုးမဲ့အိမ်မဲ့ အခြေအနေမဲ့တွေဟာ ဒီရာသီဆိုရင် Misdemeanors ခေါ်တဲ့ အမှူ အသေးအဖွဲလေးကို တမင်တကာကျူးလွန်ပြီး ထောင်ထဲ တန်းစီဝင်ကြတာပါ။ တခါတလေ အမှူကသေးလွန်းလို့ ထောင်လည်းချမရ၊ ချုပ်ထားဖို့ကလည်း မဖြစ်၊ Community Services ခေါ်တဲ့ အမှိူက်ကောက်တာ တံမျက်စည်းလှဲတာတွေကလည်း (ရာသီကြောင့်)ခိုင်းမရဆို ရုံးတင်ပြီးတာနဲ့ မြန်မြန် ပြန်ပြန်လွှတ်ရပါတယ်။ ဒီလူတွေကလည်း ပြန်အဖမ်း မခံရခံရအောင် အလားတူအမှူကိုပဲ နောက်ထပ်တကြိမ်နှစ်ကြိမ်ထပ် ကျူးလွန်ရပါတယ်။ ဒါမှ ထောင်ကျမှာကိုး။ ဒါမှ ၄ လလောက် ထောင်ကျမှာကိုး။ ထောင်ကျမှ အစားအသောက်လည်း နပ်မှန်၊ ကျန်းမာရေးစောင့်ရှောက်မှူလည်း အခမဲ့ရ၊ နွေးနွေးထွေးထွေးနဲ့ စိတ်ချလက်ချလည်း အိပ်ရမှာမဟုတ်လား။ တချိူ့ အမျိုးသမီးအိုးအိမ်မဲ့တွေဆို အချိန်ရာသီနဲ့ ကိုယ်ဝန်ဆောင်ရမယ့်ကာလ မီးဖွားရမယ့်ကာလကို ကျကျနနတွက်ချက်ပြီး အမှူလုပ် အဖမ်းခံ ထောင်ထဲလာ ခလေးမွေးကြတာလည်း ရှိပါတယ်။ မျက်နှာတော့ အတော်ငယ်ကြရှာတာပါ။

ဒီကထောင်တွေဆိုတာကလည်း ဗမာပြည်မှာလို ရဲဘက်ထုတ် ကျောက်ထုခိုင်း အလုပ်ကြမ်းလုပ်ခိုင်းလို့မှ မရတာဆိုတော့ ထောင်ကြီး Prisons တွေမှာလူပြည့်နေသလို ထောင်သေး Jails တွေမှာလည်း ရုံလျှံနေတာပါ။ ဆောင်းရာသီဆို လူလေလူလွင့်တွေအတွက် ထောင်ထဲမှာ အနေအစားချောင်တာမို့ ထောင်ဟာ သူတို့အတွက်တော့ ဂေဟာပါ။ တချို့ကတော့ လွန်လွန်ကျူးကျူး ဟော်တယ်လ်လို့တောင် ပြောကြပါတယ်။ ဒါကလည်း ထောင်ကို တကယ်မရောက်ဖူးသေးလို့နေမယ် ထင်ပါတယ်။ ကျနော်က ထောင်စကားပြန်ပါ လုပ်ခဲ့သူဆိုတော့ ဘယ်လောက်ကောင်းကောင်း ထောင်ဟာ ထောင်ပါ။ ပုံစံပေးပါတယ်။ ဦးချိုးပါတယ်။ နံနှိမ်ပါတယ်။ ပြစ်ဒဏ်ရှိပါတယ်။ တိုက်ရှိပါတယ်။ ခြေကျဉ်း ဒေါက်ရှိပါတယ်။ သံမဏိ ကိုယ်ကျပ်ဝတ်စုံရှိပါတယ်။ လျှပ်စစ် နံပတ်တုတ်ရှိပါတယ်။ ဒါပေမယ့် ဗမာပြည်က ကျနော်နေခဲ့ရတဲ့ထောင်တွေနဲ့ နှိူင်းစရာမရှိအောင် ကောင်းပါတယ်။ ကျနော့်ရုပ်ရှင်ကိစ္စအပြီး အခွင့်ကြုံလို့ ထောင်ကြီး Prison တထောင်ကို ဝင်ကြည့်ခွင့်ရပါတယ်။ သူတို့ထောင်တွေမှာ နိုင်ငံရေးအကျဉ်းသားမရှိပါ။ မရှိရတာက နိုင်ငံရေးပုဒ်မရယ်လို့ ရှိကိုရှိမထားလို့ပါ။

ထောင်ကပြန်အထွက်မှာ ထောင်ပိုင်ကြီးရုံးခန်း ခနဝင်ပြီး ကျေးဇူးတင်ကြောင်းပြော နှူတ်ဆက်စကားဆိုတော့ သူက တို့ဆီကထောင်တွေ ဘယ့်နှယ်လဲလို့ မေးရိုးမေးစဉ်သဘောမေးပါတယ်။ ကျနော့်အတွက်တော့ ရတောင့်ရခဲအခွင့်အရေးမို့ လက်လွတ်မခံပဲ တလေးတနက်ပြန်ဖြေပါတယ်။ အဖြေအားလုံးရဲ့အဆုံးသတ်မှာ ကျနော်က “ဒီက ရာဇဝတ်သားတွေရနေတဲ့ အခြအနေတွေ အခွင့်အလမ်းတွေသာ ဗမာပြည်မှာ ငါထောင်ကျနေတုန်းက ရမယ်ဆိုရင် ထောင်ထဲမှာ ဒီ့ထက်မကကြာအောင်ထားလည်း ငါနေနိုင်မှာပါ။ ဒီထောင်ထဲက ရာဇဝတ်သားတွေရနေတဲ့ အခွင့်အရေးတွေ အခြေအနေတွေဟာ ငါတို့တိုင်းပြည်က သာမန်ပြည်သူတွေ လူကောင်းသူကောင်းတွေတောင် ထောင်အပြင်မှာ မရကြရှာတာပါ။ တကယ့်ကို အများတကာ့အများစု ပြည်သူလူထုကြီးရဲ့ အပြင်ကဘဝတွေဟာ မင်းတို့ထောင်ထဲက ရာဇဝတ်သားတွေလောက်တောင် မပြည့်စုံမှတော့ ထောင်ထဲက တို့ဘဝတွေ တွေးကြည့်ပေါ့ကွာ“ဆိုတော့ သူ တချက် ငိုင်သွားတယ်။ နောက်တော့ ငါစိတ်မကောင်းဘူးကွာ အဲ့လိုကြားရတာပြောပြီး အသံတိတ်သွားတယ်။ ကျနော်လည်း သူ့ကို နှူတ်ဆက်ရင်း အသင့်ပါသွားတဲ့ AAPP ကထုတ်ခဲ့တဲ့ Torture Report; The Darkness We See ကို အချိန်ရတဲ့အခါဖတ်ကြည့်ပါပြောပြီး ပေးခဲ့ပါတယ်။

ထောင်ဟာထောင်ပဲ ဘယ်ထောင်မှ မကောင်းဘူးဆိုပေမယ့် လူကိုလူလို ဆက်ဆံခံရတဲ့ လူ့အခွင့်အရေး အကျဉ်းသားအခွင့်အရေးတွေ အာမခံချက်ရှိတဲ့ထောင်ဟာ မကောင်းတာတွေမှာတော့ အကောင်းလို့ပြောရမယ်ထင်ပါတယ်။

ခုလည်း ဆောင်း ပီပီမည်ပါပြီ။ နှင်းဖွေးဖွေးကျပါပြီ။ မစည်ကားအပ်တဲ့အရပ်မှာ လူတရုန်းရုန်း နေပါဦးမည်။
မျိုးမြင့်ချို
နိုဝင္ဘာ ၁၁၊ ၂ဝ၁၉