(ကြည့်တဲ့အတိုင်း မြင်ပါတယ်)

(ကြည့်တဲ့အတိုင်း မြင်ပါတယ်)
၂ဝဝ၈ ဖွဲ့စည်းပုံဟာ ဥပဒေကြောင်းအရကြည့်ရင် တရားဝင်ပါတယ်။ ဘယ်သူတွေဆွဲ ဘယ်အချိန်မှာဆွဲ ဘယ်ပုံဘယ်နည်းဆွဲ ဘာ့ကြောင့်ဆွဲ ဘယ်လို လူထုဆန္ဒခံယူပွဲလုပ်ခဲ့ စတာတွေက လူတိုင်းသိပြီးသားပါ။ နိုင်ငံရေးထောင့်ကကြည့်ရင်တော့ တရားဝင်ခြင်းမဝင်ခြင်းဆိုတဲ့အထိတောင် ပြောနေစရာမလိုပါ။

၂ဝ၁၀ ရွေးကောက်ပွဲလုပ်ချိန်အထိ အဲ့ဒီဖွဲ့စည်းပုံဟာ တရားဝင်မှူမရှိသေးပါ။ ရွေးကောက်ပွဲနည်းနဲ့တက်လာတဲ့ လွှတ်တော်အမတ်တွေက တခဲနက်အတည်ပြုလိုက်ပြီး သမတဗိုလ်သိန်းစိန် လက်မှတ်ထိုးအတည်ပြုလိုက်တော့မှ တရားဝင်ဖြစ်သွားတာပါ။ ဒီနေရာမှာလည်း ၂ဝ၁ဝ ရွေးကောက်ပွဲ ဘယ်လိုလုပ်ခြ့သလဲက လူတိုင်းသိပြီးသားပါ။

အဲ့သလိုတရားဝင်သွားတဲ့ ဖွဲ့စည်းပုံအရပဲ အုပ်ချုပ်ရေး၊ ဥပဒေပြုရေး တရားစီရင်ရေးယန္တယားတွေ ဖွဲ့စည်းပေါ်ပေါက်လာတာပါ။ ၂ဝ၁ဝ ရွေးကောက်ပွဲ အင်န်အယ်လ်ဒီ မဝင်ရတာက ဖွဲ့စည်းပုံတရားဝင်မှူ မရှိသေးလို့ပါဆိုပြီး ထင်ကြေးပေးသူတွေ ရှိပါတယ်။ ၂ဝ၁၂ အင်န်အယ်လ်ဒီ ရွေးကောက်ပွဲ ဝင်တာကြတော့လည်း ဖွဲ့စည်းပုံကတရားဝင်ဖြစ်သွားပြီမို့လို့ မဖြစ်မနေဝင်ရတာပါလို့ အကြောင်းပြသူတွေရှိပါတယ်။ အင်န်အယ်လ်ဒီ ကိုယ်တိုင်ကလည်း ဝင်ပြင်ဆိုတဲ့ ရပ်ခံချက်နဲ့ ဖွဲ့စည်းပုံရဲ့တရားဝင်မှူကို အသိအမှတ်ပြုလက်ခံပြီးမှ ရွေးကောက်ပွဲဝင်ခဲ့တာပါ။

ဦးဝင်းတင်လို နိုင်ငံရေးအကြောမာတယ်ဆိုတဲ့လူတောင် ပြင်ဝင်ဆိုတဲ့နည်းနဲ့ ဖွဲ့စည်းပုံရဲ့တရားဝင်မှူကို လက်ခံခဲ့ပါတယ်။ ဖွဲ့စည်းပုံရဲ့ တရားဝင်နေမှူကို သွယ်ဝိုက်တဲ့နည်း အသိအမှတ်ပြုခဲ့ရတာပါ။ ပြင်ဝင်ဖြစ်ဖြစ် ဝင်ပြင်ဖြစ်ဖြစ်ဟာ ဖွဲ့စည်းပုံရဲ့တရားဝင်မှူကို တနည်းနည်းနဲ့ အသိအမှတ်ပြုတာဖြစ်တယ်လို့ နိုင်ငံရေးအရပြောရမှာပါ။ ပြင်ဝင်ကတော့ ခေါင်းမာမာနဲ့ ရလိုရငြား စျေးဆစ်ကြည့်တဲ့သဘောပါ။ ဘာလို့အဲ့လိုပြောရလဲဆိုတော့ မပြင်ရင်မဝင်တာတော့ ဟုတ်တယ် မဝင်ရင်ဘာလုပ်မလဲက မရှိထားလို့ပါ။ အကြမ်းမဖက်တဲ့ လူထုနည်း လူထုတိုက်ပွဲလမ်းစဉ် ချပြတာမရှိလို့ပါ။ စစ်အုပ်စုကတော့ ရှင်းတယ်။ ပါတီ မှတ်ပုံအသစ်ပြန်တင်ပါ၊ ရွေးကောက်ပွဲ ဝင်ပါ။ မဝင်ရင် ပါတီဖျက်ပစ်မယ်အတိအလင်း ပြောပြီးသားပါ။ သူ့ဘက်မှာ မဝင်ရင် ဘာလုပ်မလဲရှိပေမယ့် ကိုယ့်ဘက်မှာမရှိပါ။ ဦးဝင်းတင်မှာ စိတ်ဓာတ်ရှိပါတယ်၊ ရပ်တည်ချက်ကောင်းပါတယ်၊ မိမိအမြင်အပေါ် ရပ်ခံချက်ကောင်းပါတယ်။ ဒါပေမယ့် “အား“ မရှိပါ။ ပါတီတွင်းမှာ နောက်လိုက်တွေ နောက်က မလိုက်ဝံ့ပါ။ ဒေါ်စုကို လွန်ဆန်ပြီး သူ့နောက်လိုက်ရင် ဘာဖြစ်မယ်ဆိုတာ သူတို့သိကြပါတယ်။ ထောင်စကားနဲ့ပြောရရင် “ကိုယ့်ဘဝ ကိုယ်တွေးမိထားနှင့်သူတွေ“ ပါ။

ဖွဲ့စည်းပုံကိစ္စကို တရားဝင်မှူ မဝင်မှူတွေဆိုတဲ့ထောင့်ကနေပြောရင် ဥပဒေကိစ္စပါ။ ဥပဒေစကားပဲပြောရပါတယ်။ နိုင်ငံရေးစကား မပြောရပါ။ စစ်အုပ်စုက ဥပဒေစကားပြောတာပဲကြိုက်ပါတယ်။ “လွှတ်တော်ထဲလာ နိုင်ငံရေးစကားမပြောနဲ့“ လို့ကို ဗိုလ်ရွှေမန်းပြောတာ သတိရပါ။ အဲ့သလိုပြောနေတဲ့ကြားက ရှေ့နေကြီး ဦးကိုနီက ဖွဲ့စည်းပုံနဲ့စပ်ပြီး နိုင်ငံရေးစကားတွေပဲ တောက်လျှောက်ပြောပါတယ်။ ဒီဘိတ်တွေ စကားဝိုင်းတွေမှာ အင်န်အယ်လ်ဒီအမတ်တွေ ပါတီလိုင်းကလူတွေက (နိုင်ငံရေးသမားဆိုသူတွေက) ဥပဒေစကားပဲပြောနေချိန်မှာ ဥပဒေသမားက နိုင်ငံရေးစကားပြောပါတယ်။ ဒီတော့ စစ်အုပ်စုက သတ်ပြလိုက်ပါတယ်။ နဂိုကမှ ဖွဲ့စည်းပုံနဲ့စပ်လို့ နိုင်ငံရေးစကားမပြောဝံ့သူတွေ မီးကိုရေနဲ့ငြှိမ်းလိုက်သလို ငြိမ်ကျသွားပါတယ်။

ဖွဲ့စည်းပုံအခြေခံဥပဒေကိစ္စဟာ နိုင်ငံရေးဖြစ်တယ် နိုင်ငံရေးကိစ္စဖြစ်တယ် နိုင်ငံရေးလိုပြောရမယ်လို့ ပြောသူတွေ နောက်ပိုင်းမှာ ထွက်လာပါတယ်။ သိတ် ကျယ်ကျယ်လောင်လောင်တော့ မဟုတ်ပေမယ့် (ကို) ကိုကိုကြီးနဲ့ ကိုမြအေးပါ။ သူတို့ နိုင်ငံရေးသမားပီသပါတယ်။ နိုင်ငံရေးစကားပြောပါတယ်။ ဒါတောင် တချက်တချက် “ပြင်မယ်ဆင်မယ် လက်သီးလက်မောင်းတန်းနေတဲ့ ဟောပြောရေးသမားတွေ၊ ပြင်ရေးထောက်ခံဆန္ဒပြခေါင်းဆောင်တွေလို“ ဥပဒေစကားတွေပြောပြီး ဖွဲ့စည်းပုံရဲ့တရားဝင်မှူကို ပြောင်းပြန်အကျိုးဆက်ထွက်စေတဲ့နည်းနဲ့ အသိအမှတ်ပြုလက်ခံတဲ့ ပွဲတွေမှာ သူတို့ကို ကြိုကြားကြိုကြားတွေ့နေရပါတယ်။

ပြန်ချုပ်ရရင် ၂ဝဝ၈ ဖွဲ့စည်းပုံကို ဘယ်ရှူထောင့်ကကြည့်သလဲ။ ကြည့်တဲ့ထောင့်အတိုင်း မြင်ပါတယ်။ မြင်တဲ့ထောင့်အတိုင်းပြောရပါတယ်။ အဲ့ဒီမှာ ဥပဒေစကားနဲ့ နိုင်ငံရေးစကား ကွဲသွားပါတယ်။ ဥပဒေသမားက “ပုဒ်ထီးပုဒ်မတွေ“ ပြောပြီး နိုင်ငံရေးသမားက “တရား“ ကိုပြောပါတယ်။

ဦးကိုနီက ၂ ခုလုံးကိုပြောပါတယ်။ ဒါ့ကြောင့် နိုင်ငံရေးအရ လုပ်ကြံသတ်ဖြတ်ခြင်းခံရပါတယ်။
မျိုးမြင့်ချို
နိုဝင္ဘာ ၁၆၊ ၂ဝ၁၉
(စာကြွင်း။ ပြင်ရေးထောက်ခံပွဲတွေမှာ တက်တက်ကြွကြွပါခဲ့တဲ့ လက်မှတ်တွေ အားတက်သရောထိုးပေးခဲ့ကြတဲ့ ရိုးရိုးသားသား ပြည်သူတွေကို ကျနော် ထောက်ခံအားပေးပါတယ်။ အဲ့ဒီလို လူထုဘက်က ကျနော်ရပ်ပါတယ်)