(ထောင်မှာစိန်ဌေး...တဲ့)

(ထောင်မှာစိန်ဌေး...တဲ့)
ကျနော်တို့အမှုတွဲထဲမှာ ဦးသိန်းဌေးဆိုတာပါတယ်။ ကျနော်တို့အမှုတွဲဆိုတာက ဗကပ 4828 UG ကိုသက်ခိုင်အမှုတွဲကို ဆိုလိုတာပါ။ ဦးသိန်းဌေးဟာ အလွန်အေးဆေးပြီး သဘောမနောကောင်းတဲ့ လူကြီးလူကောင်းတယောက်ပါ။ ပြုံးပြံုးရွှင်ရွှင်နေတတ်ပြီး စကားနည်းပါတယ်။ ပြောတဲ့အခါမှာတော့ ချိုချိုသာသာ ယဉ်ယဉ်ကျေးကျေးပြောတတ်ပါတယ်။ နှိမ့်နှိမ့်ချချလည်းနေတတ်သူမို့ လူအချစ်အခင်များပါတယ်၊ အင်းစိန်ထောင် ၄ရှည်မှနေတော့ ကိုဌေးသိန်း Naung Kyaw၊ ကိုတင်အေး၊ ကိုစိုးမြင့်၊၊ ကိုဝင်းထိန်တို့နဲ့ တခန်းတည်းနေကြတာပါ။ အဖမ်းခံရပြီး စက်လှေနဲ့တင်ခေါ်လာချိန် လမ်းလည်ကောင်ကြီးကျမှ လူဝင်မှုကြီးကြပ်ရေး မြိ့ုနယ်ဦးစီးမှူးအဆင့် ရာထူးတိုးတဲ့စာကို ဖတ်ရတာလို့ဆိုပါတယ်။ အဖမ်းခံရချိန်နဲ့ရာထူးတိုးချိန်ဟာ တိုက်တိုက်ဆိုင်ဆိုင်တပြိုင်တည်းဖြစ်နေတာပါ။

အဖမ်းခံရတာကလည်း သူ့အိမ်နီးချင်းနေခဲ့သူ ကွန်မြူနစ်ပါတီ ယူဂျီခေါင်းဆောင်တွေထဲကတဦးဖြစ်တဲ့ အန်ကယ်လ်ကြီးခေါ် ဦးတင်အောင်ကို မှတ်ပုံတင်လုပ်ပေးလို့ဖြစ်ပါတယ်။ ဦးတင်အောင် နိုင်ငံရေးသမားမှန်း ကျွန်းပြန်မှန်းလည်း သူသိထားတာမဟုတ်ပါ။ လုပ်ပေးတာကလည်း လာဘ်စားငွေကြေးယူပြီး မှတ်ပုံတင်အတုလုပ်ပေးတာမဟုတ်ပါ။ ဦးတင်အောင် မှတ်ပုံတင်ပျောက်သွားလို့ အသစ်ပြန်ထုတ်ပေးတာဖြစ်တဲ့အပြင် ၁၉၈၈ မတိုင်မီ အချိန်အတော်ကြာကြာကတည်းက ဖြစ်ပါတယ်။ အဲ့ဒါကို ဗကပ ယူဂျီအတွက် မှတ်ပုံတင်လုပ်ပေးရကောင်းလားရန်ငြှိုးနဲ့ ထောင် ၃ နှစ်ချလိုက်တာပါ။ တကယ်တမ်းပြန်တွက်ကြည့်ရင် သူဟာ နိုင်ငံရေးနဲ့ ဘာမှမပတ်သက်တဲ့အပြင် ဗမာပြည်ကွန်မြူနစ်ပါတီရဲ့ ယူဂျီလုပ်ငန်းတွေနဲ့ ဘာဆိုဘာမှကို ပသတ်သက်ခဲ့သူမဟုတ်ခဲ့ပါ။ ဒီလို မပတ်မသက် အချောင်သက်သက် ထောင် ၃ နှစ်လည်း အချခံရ ရာထူးလည်းပြုတ်ခဲ့ရပေမယ့် ကွန်မြူနစ်ပါတီကလူတွေအပေါ် နာကျည်း အပြစ်တင်စကား ဆိုဖို့နေနေသာသာ ငြိုငြင် ငြူစူတာမျိုးတောင်မရှိခဲ့သူပါ။ သူ ခုလို မတရားခံရတာအတွက် တကယ့်လက်သည်ရင်းဟာ ဘယ်သူဘယ်ဝါဆိုတာ နိုင်ငံရေးအရကို သိမြင်နားလည်တယ်လို့ဆိုရမှာဖြစ်ပါတယ်။ နောက်တချက်က ဦးစိန်ဌေးမှာ နီလာဌေးဆိုတဲ့သမီးတယောက်ရှိပြီး အဲ့ဒီသမီးက အင်းစိန်ထောင်မှာပဲ ထောင်မှူးပြန်လုပ်နေတာပါ။ ဦးသိန်းဌေးတို့ကျနော်တို့ ထောင်ထဲရှိစသ်က နီလာဌေးက သူ့ဦးလေးလိုတာရှိ ကူညီဖို့ပြောပေမယ့် သူက ဘာအကူအညီမှ ယူခဲ့တောင်းခဲ့တာမရှိပါ။

သူနဲ့ တအူထုံ့ဆင်း ညီတော်မောင် သို့မဟုတ် အကိုရင်းက ဦးစိန်ဌေးပါ။ ဦးသိန်းဌေးကြည့်ရတာ သူ့ညီ/အကို ဦးစိန်ဌေးအကြောင်း စိတ်လိုလက်ရပြောတာတော့ တခါမှမကြားမိဖူးပါ။ ပြောချင်ပုံလည်း မပေါ်ပါ။ ခု သူတို့ ညီအကိုတော်တယ်ဆိုတာလည်း သူပြောပြလို့ သိရတာမဟုတ်ပဲ ဘယ်လိုအဆက်အစပ်ကနေတဆင့် ကျနော်သိရတာလဲတော့ မမှတ်မိတော့ပါ။ ကိုအောင်ခင်(စာရေးဆရာ အောင်မြိုင်)ကျနော့်ကိုပြောပြတာတော့ မှတ်မိနေပါတယ်။ အဲ့ဒီဦးသိန်းဌေးအကို ဦးစိန်ဌေးဆိုတာက ဗမာပြည်ထောင်သမိုင်းမှာ နံမည်ဆိုးနဲ့ အလွန်ကျော်ကြားသူပါ။ နိုင်ငံရေးသမားတွေကိုနှိပ်ကွပ်တဲ့နေရာမှာနဲ့ လူဆိုးလူမိုက်တွေကိုင်ပြီး ထောင်ကျင့်ထောင်ကြံ အုပ်ချုပ်တဲ့နေရာတွေမှာ အလွန်လက်သံပြောင်ပါတယ်။ သူ့အကြောင်းက မကြားချင်မှအဆုံးပါ။ ကုန်းမှာမြွေပွေး၊ ရေမှာငါးရွေး၊ ထောင်မှာစိန်ဌေးဆိုပြီးကို နံမည်ကြီးတာပါ။

ကိုးကိုးကျွန်းမှာ နိုင်ငံရေးသမားတွေနဲ့ အခြား အစိုးရနဲ့မသင့်မြတ်သူတွေကို တကျွန်းပို့ပြီး နှိပ်ကွပ်ခဲ့ချိန်က ကျွန်းထောင်ပိုင်ကြီးက ဦးထွန်းခင်လို့ဆိုပါတယ်။ နိုင်ငံရေးသမားတွေကို ထောင်ပိုင်ဦးထွန်းခင် ကိုင်တွယ်တာပြော့ညံ့တယ်လို့ အကျဉ်းထောင်အထူးအရာရှိ ဗိုလ်မှူးမြင့်သိန်းကမြင်ပါတယ်။ ဒီလူက စစ်ထောက်လှမ်းရေးကလာတဲ့လူလို့ ဆိုပါတယ်။

ဗမာပြည်ကွန်မြူနစ်ပါတီက ဦးစိန်ဌေးရေးခဲ့တဲ့ ကိုးကိုးကျွန်းရဲ့သွေးစွန်းမှတ်တမ်းဆိုတဲ့ စာအုပ်အကြောင်းကို ပြည်သူ့အာဏာဂျာနယ် အမှတ် ၄၁ မှာ စာတအုပ်ကိုဖတ်မိခြင်းဆိုပြီး ရီဗျူးသဘောရေးပါတယ်။ နိုင်ငံရေးအရ ပြောတာဆိုတာပါ။ အချက်အလက် အမှားအယွင်းတွေ ရှေ့နောက်မညီတာတွေ ကျိုးကြောင်းမဆီလျော်တာတွေကို ထောက်ပြဝေဘန်ရှူံ့ချသလို အချက်အလက်မှန်တွေ တန်ဖိုးရှိတဲ့မှတ်တမ်းမှတ်ရာတွေ ဖော်ပြတဲ့အတွက်လည်း ကျေးဇူးပြုရာရောက်ကြောင်း ပြောထားတာတွေ့ရပါတယ်။

အဲ့ဒီအချိန်က ထောင်မှူးကြီးအဆင့်သာရှိသေးတဲ့ဦးစိန်ဌေးကို ကျွန်းကိုတာဝန်ချတော့ ဗိုလ်မှူးမြင့်သိန်းက “ကျွန်းမှာအုပ်ချုပ်ရေးပျက်နေပြီ၊ ဒါကို ခင်ဗျားလုပ်နိုင်မှသွား မလုပ်နိုင်မသွားနဲ့“ လို့အမိန့်ပေးခဲ့တယ်ဆိုပါတယ်။ ပြီးတော့ “ထောင်ပိုင်ကြီးဦးထွန်းခင် သွားတုန်းက မြွေဟောက်လိုသွားတယ်၊ ကျနော်တို့က တကယ်ထင်ပြီး စောင့်ကြည့်နေတာ၊ ဟိုရောက်တော့ သတ္တိရှိရှိ မလုပ်ရဲဘူး၊ မြက်လျှောဖြစ်သွားတယ်၊ ခင်ဗျားလည်း ခု ကျနော်ပြောတာတွေကို ခေါင်းညိတ်နေတာပဲ၊ ဟိုရောက်တော့မှသာ မြက်လျှောမဖြစ်စေနဲ့“လို့ မောင်းမဲလွှတ်လိုက်တာလို့ ဆိုပါတယ်။ ထောင်ပိုင်ကြီးဦးထွန်းခင်နဲ့ လက်မရွံ့စိန်ဌေးကို ရန်လည်းတိုက်ပေး ဆွလည်းဆွပေးလိုက်တဲ့သဘောလို့ စာရေးသူက ဆိုထားပါတယ်။

အတိုချုပ်ရင် ဦးစိန်ဌေး ကျွန်းရောက်သွားတယ်။ နိုင်ငံရေးအကျဉ်းသားတွေကို ပယ်ပယ်နယ်နယ်နှိပ်ကွပ်ရာမှာ တက်တက်ကြွကြွ စိတ်လိုလက်ရလုပ်ခဲ့တယ်ပေါ့ဗျာ။ ဒါကလည်း ကျွန်းအကြောင်း ကွန်းတိုက်ပွဲတွေအကြောင်းနဲ့ နိုင်ငံရေးသမားတွေကို တကျွန်းပို့တဲ့စနစ် အပြီးတိုင်ဖျက်သိမ်းရေး အစာအငတ်ခံတိုက်ပွဲအကြောင်း ဖတ်ဖူးသူတိုင်းသိပြီးသားမို့ ဒီနေရာမှာ ကျနော့်အနေနဲ့ ပြောဖို့မရှိပါ။

ကျနော် ပထမအကြိမ်ကအဖမ်းခံရတာက ၁၉၈၉ ဆဲဗင်န်းဂျူလိုင်ပါ။ ဒုတိအကြိမ် ပြန်အဖမ်းခံရတာက သြဂုတ် ၈ ရက်ပါ။ တတိယအကြိမ် ထပ်အဖမ်းခံရတာက ၁၉၉၇ မတ်လထဲမှာပါ။ ၁၉၈၉ ခု ဂျူလိုင်ကနေ ၁၉၉၁ နိုဝင်ဘာအထိ အင်းစိန်ထောင်မှာ ကျနော်ရှိနေခဲ့ပါတယ်။ အဲ့ဒီအချိန်တွေမှာ ထောင်ပိုင်ကြီးက ဦးအန်းဖေ၊ အထူးအရာရှိကဦးဘိုကြည်လို့မှတ်မိနေပါတယ်။ ဦးစိန်ဌေးကို ကျနော် မမှီလိုက်တာလား မမှတ်မိတာလားကတော့ မသဲကွဲတော့ပါ။

ပြန်ကောက်ရရင် ဦးစိန်ဌေးနဲ့ဦးသိန်းဌေးဟာ ညီအကိုပါ။ ကျနော် ဦးစိန်ဌေးလက်စာ မမိခဲ့ပေမယ့် ဦးသိန်းဌေးရဲ့ နုညံ့သိမ်မေ့မှု ပျူငှာဖော်ရွှေမှု ပညာတ် လူကြီးလူကောင်းဆန်မှုတွေကို သတိရသလို သူ ရှိမှရှိသေးရဲ့လားလို့လည်း တွေးနေမိပါတယ်။ ရှိနေသေးတယ်ဆိုလည်း အသက်ကြီးလှပြီမို့ ကျန်းမာရေးမှကောင်းရဲ့လားလည်း တွေးမိပါတယ်။ ရှိနေသေးတယ်ဆိုရင်တော့ အသက်ရှည်သမျှ ကျန်းမာစေဖို့ ဆန္ဒပြုပါတယ် ဦးရေ။
(စာကြွင်း။ ကိုတင်အေး ထောင်ကလွတ်တဲ့အချိန်မှာ ဦးသိန်းဌေးကို အဆက်အသွယ်ရဖို့ ပြန်ကြိုးစားခဲ့ပေမယ့် မရခဲ့ပါ။ နောက်တော့မှ သူ ကွယ်လွန်သွားပြီလို့ သိရတယ်လို့ဆိုပါတယ်)
မျိုးမြင့်ချို
နိုဝင္ဘာ ၂၆၊ ၂ဝ၁၉