၂ဝ၁၄ မတ်ခ်ျ အကုန်ပိုင်းမှာရေးဖြစ်တဲ့ တိုနန့်နန့်လေးတွေ-၁-(မျိုးမြင့်ချို)

"သမ္မတကြီးကိုယုံသူတွေကို ကျနော်မယုံဘူး၊ သမ္မတကြီးကိုလည်းမယုံဘူး"ဘူးလို့ ပြောတုန်းက ရစရာမရှိအောင်ပြစ်ပြစ်နှစ်နှစ်ပြောခဲ့သူတွေထဲက
မိတ်ဆွေတစ်ယောက် ချက်ခြင်းကြီးလေသံပြောင်းပုံများ သြချချင်စရာ။ ဟိုတလောက ဦးဗိုလ်သိန်းစိန်ဒေါ်စုကို

ခေါ်တွေ့ပြီးနောက် အာရ်အက်ဖ်အေမှာ ဒေါ်စုက "ထွေထွေထူးထူးမဟုတ်လို့ ထူးထူးထွေထွေမထုတ်ပြန်တာပါ" ဆိုပြီးလည်းပြောရော ခေါ်တွေ့ပြီးဘာပြောလိုက်မှန်း သူလည်းသေချာမသိ ဘယ်သူမှလည်းဘာမှမသိရသေးပဲ "ဒါ ဒေါ်စုကိုစော်ကားတာ နိုင်ငံကတာသိခေါင်းဆောင်ကို လူမလေးခွေးမခန်ဖြစ်အောင်လုပ်ပြတာ သိန်းစိန်ကိုဆန့်ကျင် ရမယ်"ဘာညာနဲ့ အကြီးအကျယ်ပေါက်ကွဲပြီးဗိုလ်သိန်းစိန်ကို တစ်တစ်ခွခွနှက်တော့တာပါပဲ။ သူ့သမ္မတကြီးက သူ့ကို လှည့်စားလိုက်သလို ခံပြင်းဒေါ်သလည်းပါတယ်။ ပြီးတော့ အပျော်ကြံခံလိုက်ရရှာတဲ့ကွမ်းတောင်ကိုင်လို အရှက်သည်းပြီး အနာကျည်းကြီး နာကျည်းသွားပုံလည်းပေါ်တယ်။ စိတ်တော့မကောင်းစရာပါ။

ဒီလို့နဲ့နေရင်း ဟိုနေ့ကသတင်းစာရှင်းပွဲမှာ ဒေါ်စုက "သမ္မတ(အစိုးရ)နဲ့လွှတ်တော်ကြားကွဲလွဲမှုအချို့ရှိတယ်၊ သူကတော့ လွှတ်တော်ဘက်ကပဲ ပြတ်ပြတ်သားသားရပ်မယ်၊ ဦးဗိုလ်ရွှေမန်းကဖြောင့်ဖြောင့်မတ်မတ်ကြီး ပါ" တို့လည်း လုပ်ချလိုက်ရော ဗိုလ်သိန်းစိန်ဆန့်ကျင်ရေးအတိအလင်းလုပ်ပြီး ဗိုလ်ရွှေမန်းထောက်ခံရေး ဗြောင်ကိုထွက်ရပ်ပြပါတယ်။ အားရဝမ်းသာနဲ့အကြေနပ်ကြီးကြေနပ်နေဟန်ပါ။ စာရိုက်ပြောတဲ့စကားလုံးတွေမှာတောင် လက်ခမောင်းခတ်သံတဖြောင်းဖြောင်း ပါနေသလိုပါ။ "တွေ့လားဗျ၊ အဲ့ဒါ ဒေါ်စုပဲ။ နိုင်ငံရေးဆိုတာ အဲ့လိုအကင်းပါးမှ၊ ကျင်လည်မှဗျ၊၊ ဗိုလ်နှစ်ဗိုလ်ကြား
အဲ့သလို လှလှပပ ပလေးတတ်တာကြောင့် ကမ္ဘာ့အဆင့်မီခေါင်းဆောင်ဖြစ်တာဗျ၊၊
ခု အဲ့နှစ်ယောက်လုံး ဒေါ်စုဝင်ပလေး (PLAY) လိုက်တာမှာ ပြာကုန်ကြပြီ၊ ဒီကောင်တွေပါတီထဲမှာပါ ဒီတစ်ချက်နဲ့တင် ကွဲထွက်ကုန်ကြမှာ............" ဘာညာတွေနဲ့အများကြီးပဲဗျာ သူ့စကားတွေကပြောရရင်။
ဒါနဲ့ ကျနော်က စကားနက်စေချင်ပြီး "အဲ့ ဗိုလ်နှစ်ဗိုလ်က ကြံ့ဖွံ့ပါတီရဲ့ထိပ်သီးတွေဗျ၊ နဝတ/နအဖ ယူနီဖေါင်းဝတ် သေနတ်ခါးကြားထိုးတွေရဲ့ ကောင်းမွေဆိုးမွေခံတွေပဲ၊ အာဏာခွဲဝေရေးကို စနစ်တကျလုပ်ပြီး ရုံးတစ်ရုံးဓါးတစ်စင်းလုပ်နေကြပေမယ့် တူတဲ့အကျိုးစီးပွားတွေကို နည်းနာခွဲပြီးကာကွယ်နေကြတာတော့ပေါ်နေတာပဲ၊ ကာ/လုံထဲမှာလည်း ပါဝါကြီးသူတွေပဲ၊
ကာ/လုံအစည်းအဝေးတိုင်းမှာတွေ့နေကျ၊ပဲ၊
ကာ/လုံမူအရ ဒေါ်စုကို အလှည့်ကျခွဲကိုင်ဖို့ခြေလှမ်းလည်း
အစကတည်းကမရှိဘူးလို့ပြောမရဘူးနော်၊
အပြောတော့ သိတ်မလောပါနဲ့ဦး၊
တော်ကြာနေ နောက်မှ ဗိုလ်ရွှေမန်းလည်း
ခင်ဗျားအဆဲခံထိနေပါဦးမယ်"
လို့ပြောဖြစ်တယ်။
အဖြေကလာလဲဆိုတော့ ကျနော့်ကို ငယ်စာရင်းကနေ ပယ်ပါလေရော။ (သူ့မယုံ ကိုယ့်မယုံကိစ္စ)

ဒါမြင်ပြီး ဆရာစံဘုရင်ရူး ရူးတာပါကွာလို့ နယ်ချဲ့တို့ဝါဒဖြန့်လေသံနဲ့ နင်းပြားလယ်သမားထု အုံကြွမှုကို သေးသိမ်အောင်ပြုကြသူများလည်းရှိဦးမှာပါ။ လယ်သမားမှာ လယ်ယာမြေဟာ ဘဝပဲ အသက်ပဲ ရှင်သန်မှုပဲ။ သူ့အသက် သူ့ဘဝ သူ့ရှင်မှုထိပါးလာရင် ဆတူပေးဆပ်စွန့်လွှတ်ဖို့ရဲရင့်သွားကြောင်း သုပဏ္ဏကဂဠုနရာဇာနဲ့ သူ့အရေးတော်ပုံတပ်သားတွေကိုကြည့် သိမှာပဲ။ လယ်သမားသဘာဝမှာ ပဒေသရာဇ်အနံ့အသက်မကင်းနိုင်သေးတာကိုက လက်တွေ့ကျတဲ့သူတို့ဘဝရဲ့ပြဌာန်းချက်အဖြစ် ရှိနေသေးတာပဲ။ ဓါးပီး တုတ်ပီး အင်းအိုင်ခလှဲ့လက်ဖွဲ့များဟာ ရဲဆေးတင်ဖို့ယုံကြည်မှုအဖြစ် တစိတ်တပိုင်းမျှသာပဲ။ တကယ့်ရဲဝံ့စွန့်စားမှုက ဘဝကိုအထိပါးခံရမှုကနေ တိုက်ရိုက်ပေါက်ဖွားတာပဲ။ ဟိုတုန်းက လယ်သမားတွေ တောင်သူယာလုပ်ဓါးမခုတ်တွေမပြောနဲ့ ခုခေတ် လယ်သိမ်းမြေသိမ်း ဘဝသိမ်းလုယက်ခံနေရရှာတဲ့လယ်သမားတွေကြည့် လက်နက်နဲ့ဗိုလ်ကျအနိုင်ကျင့်သူကို အန်တုရင်ဆိုင်တဲ့နေရာမယ် တောစောင့် တောင်စောင့် လောကစောင့်နတ်တွေ အစောင်အမရဖို့ စနစ်ဆိုးကိုယ်စားပြုမကောင်းဆိုးရွားတွေကိုတန်ပြန်ဖို့ရာ ကျိန်စာတိုက်တန်တိုက် နတ်မင်းများ အမအစ တောင်းတန်တောင်းကြရတာပဲ။ ကျိန်စာဘယ်လောက်ထိ နတ်မင်းများဘယ်လောက်မကတော့ ဆုပ်ဆုပ်ကိုင်ကိုင်ပြနိုင်ဖို့ မဖြစ်နိုင်ပေမယ့် အားကိုးရှာတဲ့သဘောတော့ ခံစားနားလည်နိုင် တာပဲ။ ရေနစ်သူ မြက်တပင်လှမ်းဆွဲတဲ့သဘောပဲ။ ပြောရရင် ဒီ့လောက် မတရားမှုတွေ ဒင်းကြမ်းပြည့်မျက်မှောက်မှာမြင်ရရက်နဲ့တောင် လူထုအတွက် သူတို့အတွက် သူတို့ဘက်က ရပ်တည်ပြောဆိုတိုက်ပွဲဝင်ပေးမယ့်သူတွေ ရှားပါးနေတာမဟုတ်လား။ အဲ့သလိုလူတွေဟာ ဝင်မတိုက်ပေးတဲ့အပြင် ကျိန်စာတိုက်နေတဲ့ လယ်သမားတောင်သူယာလုပ်ဓါးမခုတ်တွေကို ကွယ်ရာမှာ ဉာဏ်နည်းလှချည်ရဲ့ ခေတ်နောက်ပြန်ဆွဲလှချည်ရဲ့ အဓိပ္ပါယ်မဲ့ကိစ္စတွေမှာ အယူသီးအစွဲကြီးလှချည်ရဲ့ဆိုကာ ရယ်ပွဲဖွဲ့နေကြလေတယ်။ တကယ်က စစ်အာဏာရှင်တွေနဲ့အတူ ဒီလိုလူစားတွေဟာ ကျိန်စာဝလေမောင်လှလေဆိုတဲ့ အမျိုးအစားတွေသာပဲ။ လယ်သမားတွေရဲ့ကျိန်စာဟာ စနစ်ကျစွာသင့်ဖို့ရာပဲ။ (ကျိန်စာဝလေမောင်လှလေကိစ္စ)

လက်နက်ပြပြီး
လူသိမ်းတော့
အကိုကြီးကချစ်လို့ပါ

လက်နက်ပြပြီး
ငွေသိမ်းတော့
အမျိုးချစ်လို့ပါ

လက်နက်ပြပြီး
မြေသိမ်းတော့
အက်ဖ်ဒီအိုင်ရဖို့ပါ

လက်နက်ပြပြီး
အာဏာသိမ်းတော့
ဂျောက်ထဲ မကျဖို့ပါ

လက်နက်ပြပြီး
နိုင်ငံသိမ်းတော့
ပြည်ထောင်စုမပြိုကွဲဖို့ပါ

လက်နက်ပြပြီး
လက်နက်သိမ်းတော့
ငြိမ်းချမ်းရေးရဖို့ပါ

လက်နက်ပြပြီး
အလံသိမ်းတော့
ကားစီးစေချင်လို့ပါ

လက်နက်ပြပြီး
နိုင်ငံရေးသိမ်းတော့
အမျိုးသားရေးဦးဆောင်ဖို့ပါ

လက်နက်ပြပြီး
ဘာသာသိမ်းတော့
သာသနာပြုဖို့ပါ

လက်နက်ပြပြီး
ဘဝတွေသိမ်းတော့
ဘဝကူးကောင်းဖို့ပါ

(လက်နက်ပြပြပြီးသိမ်းယူနေတဲ့ကိစ္စများ)