၂ဝ၁၄ မတ်ခ်ျ တတိယပတ်မှာရေးဖြစ်တဲ့ တိုနန့်နန့်လေးတွေ (မျိုးမြင့်ချို)

၂ဝ၁၄ မတ်ခ်ျ တတိယပတ်မှာရေးဖြစ်တဲ့ တိုနန့်နန့်လေးတွေ (မျိုးမြင့်ချို)

ဖေ့စ်ဘွတ်ခ်ပေါ်ကနေ
မျိုးစောင့်ဥပဒေကိုပြတ်ပြတ်သားထောက်ခံရင်း
(မနှစ်သက်သူတွေကို)ပယ်ပယ်နယ်နယ်
ဆဲဆိုနေကြသူတွေကြည့်တော့ ၉၉ ရာခိုင်နှုန်းလောက်က အမျိုးကောင်းသားကြီးတွေ ချည်း ဖြစ်နေတာတွေ့တယ်။
အမျိုးကောင်းသမီးများ မတွေ့ရသလောက် နည်းတယ်။
အပြင်ထွက်ကြည့်တော့လည်း ဒီနည်းနှင်နှင်ပဲ။
အမျိုးသမီးတွေကိုအဓိကရည်ရွယ်တဲ့ဥပဒေကို
အမျိုးသားတွေက ဘာ့ကြောင့် ဒီလောက်များသဲသဲလှုပ်ထောက်ခံရသလဲ။
ကျား/မ အချိုးအစားအရလည်း ဗမာပြည်မှာ
အမျိုးသမီးကပိုနေရက်သားနဲ့ တကယ်ဆို
အမျိုးသမီးထောက်ခံသူပဲ ပိုရမှာမဟုတ်လား။
သူတို့အကျိုးအတွက်လုပ်တာမှန်ရိုးဆို
အမျိုးသမီးတွေက ပိုတောင်မထောက်ခံသင့်ဘူးလား။
နောက်တချက် စိတ်ဝင်စားစရာကောင်းတာက
မျိုးစောင့်ဖို့ ဘုန်းကြီးတွေတက်ကြွသလောက်
မယ်သီလရှင်ဆရာလေးဆရာကြီးတွေဆို
ဘာမှကို မပြောသလောက်ပါလား။
မျိုးစောင့်ဥပဒေဖိုးတက်ကြွယောက်ကျားသားကြီးတွေ
ဦးဗိုလ်သိန်းစိန်ကအစ လမ်းဘေးစားလမ်းဘေးအိပ်ကလေကဝအထိ၊

စာတတ်ပေတတ်ဘုန်းတော်ကြီးတွေကနေ
ထမင်းငတ်လို့သင်္ကန်းခြုံအကြမ်းဖက်နေတဲ့မောင်တွေအထိ
ဧကန္တတော့.........အင်း ဧကန္တပဲ...။ (မောင်မျိုးစောင့်ကြီးများကိစ္စ)

ဒီမိုကရက်တစ်ပါတီကြိုက်ပေမယ့် အိုဘားမားအစိုးရရဲ့ အရှေ့အလယ်ပိုင်းနဲ့ အာရှပစိဖိတ်ဒေသပေါ်လစီတွေကို ခါးခါးသီးသီးဖြစ်ပြီး ပြစ်ပြစ်ခါခါပြောတဲ့မိတ်ဆွေ ၂ ယောက်နဲ့ မနေ့က မထင်မှတ်ပဲ ခနတဖြုတ်စကားလက်ဆုံတယ်။ တရုတ်ပြည်ကိစ္စအထိအကောင်း။ ပြောနေကြတဲ့စကားဝိုင်းက စိုစိုပြေပြေ။ ကျနော်က တရားထောက်လောက် စကားကောက်လောက်ပါ။ ကရိုင်းမီးကိစ္စ ရုရှားကိစ္စလည်းရောက်ရော နှစ်ယောက်သား နည်းနည်းတင်းလာကြတယ်။ တစ်ယောက်က အိုဘားမားအစိုးရကို နိုင်ငံတကာတွေ၊ ကုလသမဂ္ဂတွေ၊ ဥရောပသမဂ္ဂတွေ၊ နေတိုးတွေဘာတွေ အကုန်ဘေးချပြီး ကိုယ့်တပ်နဲ့ကိုယ့်လက်ကိုယ့်ခြေကိုယ်လက် ယူကရိန်းကိုဝင်၊ ကရိုင်းမီးယားကြီးကိုသိမ်း၊ ပြီးရင် ယူကရိန်းအစိုးရလက်ထဲပြန်အပ်လိုက်။ ခတ်ကြမ်းကြမ်းလေးလုပ်ပြီး ရုရှားတွေကို ချောက်မှန်းကမ်းမှန်းသိအောင် ဝင်လုပ်ပစ်လိုက်စေချင်တယ်။
တစ်ယောက်က ကိုယ်နဲ့မဆိုင်ဘူး ကရိုင်းမီးယားပြည်သူတွေ သူ့ကြမ္မာသူတို့ဆုံးဖြတ်ခွင့်ရှိတယ်။ လူထုသဘောထားစစ်တမ်းအဖြေကို အသိအမှတ်ပြုကိုပြုရမယ်။ ဘာ စစ်ရေး သံတမန်ရေး နိုင်ငံရေးနည်းတွေမှ သုံးစရာမလိုဘူး။ ကိုယ်နဲ့မဆိုင်ဘူး။ ဥရောပသမဂ္ဂက ဆွေ့ဆွေ့ခုန်နေတာ သူတို့အမျိုးသားအကျိုးစီးပွားမို့ လုပ်ချင်ရင်သူတို့ဘာသာသူတို့ လုပ်ပေ့စေ ကိုယ်တွေလက်ရှောင်နေရမယ် ဆိုတယ်။ လေသံတွေနည်းနည်းတမ်ပိုမြင့်လာတာနဲ့ ဖြေလျှော့တဲ့သဘော ကျနော်ကဝင်ပြီး ”ငါတို့တိုင်းပြည်ကျတော့ရော မင်းတို့ စစ်ရေးအရအရေးယူဖို့ပြောသံ တစ်ခါမှမကြားမိခဲ့ဖူးဘူး။ တို့ပြည်ထဲမှာ စစ်တပ်ကနှိပ်စက်တော့ စစ်တပ်ကိုလက်နက်ကိုင်ဆန့်ကျင်တိုက်ခိုက်နေတဲ့ ဒီမိုကရက်တစ်အင်အားစု အဟောင်းအသစ်တွေကို ငွေ လက်နက်တွေကူ သိတ်လိုအပ်ရင် တပ်ကြီးနဲ့ပါဝင်ချလာပြီး တိုက်ထုတ်ပေးလိမ့်မယ်လို့ယုံခဲ့သူတွေ ယုံဖူးသူတွေ ယုံသူတွေရှိတယ်။ လက်တွေ့မှာ နောက်ဆုံးကျတော့ အဲ့ဒီစစ်တပ်ကိုပဲ မင်းတို့မျက်နှာသာပေးဆက်ဆံဖို့ပေါ်လစီပြောင်းချလိုက်တာကြောင့်
တောတွင်းလက်နက်ကိုင်တွေရော မြေပေါ်အဖွဲ့အစည်းတွေပါ အကုန်ဂျွမ်းထိုးမှောက်ခုံဖြစ်ပြီး စစ်တပ်က ခုဆို အရပ်ဝတ်ဝတ်ပြီ ဥပဒေအရတရားဝင်မှုနဲ့ နှိပ်စက်ခွင့်ရသွားစေတယ်လို့ မထင်ဘူးလား”လို့ဆိုတော့ နှစ်ယောက်လုံး ခနလေး တိတ်သွားတယ်။
နောက်တော့ အပြိုင်နီးနီး အမြင်အရအတူတူနီးနီးအသံ ထွက်လာတယ်။
ချုံ့ပြောရရင် ”အဲ့လိုတော့ ပြောလို့မရဘူးကွ။ မင်းတို့ကိုနှစ်အစိတ်လောက် နိုင်ငံရေး သံတမန်ရေးအရထောက်ခံရုံတင်မက စီးပွားရေးအရပါ ဒဏ်ခတ်ပေးခဲ့တာပဲ။ မင်းတို့ဘာသာမင်းတို့ အာဏာရအောင် မယူရဲတာလည်းပါပါတယ်”တဲ့။ ပြောရရင်အများကြီးပါ။ သူတို့အမြင်နဲ့မှတ်ချက်မှာ ပြောစရာအများအပြား ဝေဘန်စရာအများအပြား ငြင်းချင်ခုန်ချင်စရာ အစအနတွေအများအပြားနဲ့ နည်းနည်းပါးပါးမှန်တဲ့အမှန်လို့တော့ မြင်ကြည့်မိပါကြောင်း။ ခုချိန်ထိ လွတ်လပ်အချုပ်အခြာပိုင်နိုင်ငံငယ်လေးတွေမှာ
ကိုယ့်ကြမ္မာကိုယ်ဖန်တီးခွင့်ရှိတယ်လို့ ဘယ်လိုဆိုဆို နိုင်ငံကြီးတွေဝင်ဖန်တီးလို့ ကြမ္မာပြောင်းကုန်ကြတာ
ကြမ္မာငင်ကုန်ကြတွေလည်း လက်တွေ့မှာရှိနေဆဲပဲမဟုတ်လား။ အကောင်းအဆိုးကတော့သတ်သတ်ပြောရပါမယ်။ ဘာပဲဖြစ်ဖြစ် (စီးပွားရေး၊စစ်ရေး)အင်အားကြီးသူတို့လက်မှာဖန်တီးပိုင်ခွင့်နဲ့ အာဏာဟာသေနတ်ပြောင်းဝထွက်တယ်ဆိုတဲ့တရား
မှားမှမမှားသေးပဲကိုး။ (စစ်မက်တဲ့ဒီမိုကရက်ကိစ္စ)

အမျိုးသမီးတွေကိုကာကွယ်ဖို့အကြောင်းပြချက်နဲ့ ယောက်ျားနဲ့ဘုန်းကြီးတွေ ကြီးစိုးပြဌာန်းဆွဲတဲ့မျိုးစောင့်ဥပဒေကို အမျိုးကောင်းသမီးတွေကဆန့်ကျင်တယ်ဆိုတော့ တစ်ခုထက်မကတဲ့အမှားကြီး မှားနေပြီ။ ဘုန်းကြီးနဲ့အဲ့ဒီယောက်ျားကြီးတွေရဲ့
ဥပဒေအကာအကွယ်ထဲကနေ မသင်္ကာစရာအနံ့ရလို့ဖြစ်မယ်။ ဒါမှမဟုတ် မဟာဖိုဝါဒကြီးစိုးရေးကို တဘက်လှည့်နဲ့တင်သွင်းလာတာကြောင့်လည်းဖြစ်မယ်။
ဘာပဲဖြစ်ဖြစ် လူသားရဲ့တန်ဖိုး အရည်အချင်း ကျင့်ဝတ်ဆိုင်ရာနဲ့ စွမ်းဆောင်နိုင်ရည်မှာ ကျား-မတန်းတူရှိကြရသလို အိမ်ထောင်ဘက် ဒါမှမဟုတ် ချစ်သူရွေးချယ်ရာမှာလည်း တန်းတူရှိရမှာဖြစ်ပြီး မိမိဘဝကို မိမိစိတ်တိုင်းကျတည်ဆောက်နိုင်ဖို့ လူမိန်းမမှာ လူယောက်ျားနည်းတူ လွတ်လပ်ခွင့်ရှိကိုရှိတယ်။ အိမ်ထောင်တစ်ခု တည်ဆောက်တယ်ဆိုတာ ယောက်ျားမိန်းမ စီးပွားရေးဘဝအရ၊ လိင်မှုဘဝအရ၊ လူသားမျိုးဆက်ထိန်းသိမ်းပြန့်ပွားမှုဘဝအရပေါင်းစည်းကြတာပဲ။ လူတိုင်းမှာ လူတန်းစားအရဖိနှိပ်မှု၊ သဘာဝတရားကြီးရဲ့ဖိနှိပ်မှု၊ စနစ်ရဲ့ဖိနှိပ်မှုတွေကိုခံရတာချင်းအတူတူ လူမိန်းမဟာ ဘယ်အကြောင်းကြောင့်နဲ့မှ လူယောက်ျားရဲ့ဖိနှိပ်မှု ဖိစီးမှုကိုမခံထိုက်ဘူး။ ပဒေသရာဇ်အတွေးအခေါ်ဇန်းတင်ပြီး လူမိန်းမအပေါ်ဖိစီးဖို့ကြိုးစားအားထုတ်မှု လုပ်ကိုင်ဆောင်ရွက်မှု ကြံစည်မှုအားလုံးအပြင် အဲ့ဒါတွေရဲ့ရေသောက်မြစ်ဖြစ်တဲ့
မဟာဖိုဝါဒကိုပါ အပြီးအပြတ်ဆန့်ကျင်တယ်။ (မျိုးစောင့်မောင်ကြီးများကိစ္စ)

ပူတင်နဲ့အပေါင်းပါ ၂၀ ကို အမေရိကန်ကဒဏ်ခတ်ပိတ်ဆို့တော့ ဂျွန်မက်ကိန်းနဲ့အပေါင်းအပါ ၉ ဦးကို ရုရှားကလည်း တန်ပြန်ဒဏ်ခတ်ပိတ်ဆို့တယ်။ ဆင် ဆင်ခြင်းမို့ သူနင်းကိုယ်နင်း နင်းနိုင်တဲ့သဘောပြတာပဲ။ ကျနော့်အမြင်မှာတော့ ဘယ်သူကဘယ်သူ့နင်းနင်း အမေရိကန်-ရုရှားနဲ့ဥရောပသမဂ္ဂဝင်နိုင်ငံတချို့တင်မက ကမ္ဘာ့ဒေသတချို့က အရင်းရှင်ကြီးတချို့နဲ့ ခရိုနီတချို့ရဲ့စီးပွားရေးတော့ ကျွဲကူးရေးပါထိမှာပဲ။ ဆင်ဆင်ခြင်းနင်းတော့ ပြားမှာက ကမ္ဘာပဲ။ ဖျာဖြစ်မှာက လူထုပဲ။ ဆင်ကတော့ ပိန်ဦးတောင် ကျွဲပဲ။ ဒါပေမယ့် နိုင်ငံရေးကျင့်ဝတ်အရ ပဲဖြစ်ဖြစ် ကျင့်ဝတ်နိုင်ငံရေးအရပဲဖြစ်ဖြစ် ရွှေပြည်ကြီးက စစ်ဗိုလ်ဆိုးတွေအပေါ် ဒဏ်ခတ်ပိတ်ဆို့မှုလုပ်တာကတော့ လုပ်ကိုလုပ်ရမယ့်ကိစ္စလို့ ခုချိန်ထိလက်ခံတုန်း။ ဘယ့်လောက်ထိရောက်/မရောက်ကတော့ အဲ့ဒါကိုစစ်ဗိုလ်ဆိုးတွေ ဘယ်လိုတုန့်ပြန်မပြန်နဲ့ ချိန်ထိုးကြည့် သိတ်သိသာတယ်။ ရွှေပြည်ကြီးက ဗိုလ်သန်းရွှေနဲ့အပေါင်းအပါတစုကို ဆင်နင်းတုန်းက”ဆင်ဆိုသည်မှာ ဤနှယ်ဖြစ်”ပြောခဲ့တဲ့ ဆင်စမ်းပုဏ္ဏားတွေကိုယ်တိုင် ခုတော့ ဆင်ပြန်ဖြစ်သူဖြစ်၊ ဆင်ဖမ်းမုဆိုးဖြစ်လိုဖြစ် ဖြစ်ကုန်ကြပြီ။ ဆင်တဖြစ်လဲတွေက မုန်တယိုယိုနဲ့ မဲမဲမြင်အကုန်နင်း အကုန်ထိုးနေတာ အထင်အရှား။ ဆင်ဖမ်းမုဆိုးခေတ်သစ်သောနုတ္ထိုရ်တွေ ကလည်း လေးတပြင်အပြင် မြားတရမ်းရမ်း ဖမ်းမယ်ဆီးမယ်တကဲကဲ။ (ပူတင်နဲ့ပိတ်ဆို့ကိစ္စ)

လာတော့မယ်..နောက်ထပ် ကြားဖြတ်ရွေးကောက်ပွဲတစ်ခု။ ဒီတကြိမ် ကြားဖြတ်တာက အရင် တကြိမ်လို (တင်အေးစကားအငှားသုံးရရင်) ”အလွတ်လပ်လွန်”လိမ့်မယ် မျှော်လင့်လို့မရဘူး။ ဟိုတကြိမ်က ဒေါ်စုနဲ့အင်န်အယ်လ်ဒီကို ၂၀၀၈ အောက် မောင်းသွင်းဖို့နဲ့ အပြင်ကမ္ဘာကို အပြလှဖို့ အဓိကထားရတာကိုး။ ဖြစ်နိုင်ရင် ဒီ့ထက်တောင်လွတ်လပ်ပြလိုက်ချင်သေးတာပါ။ ဖယောင်းလေးနည်းနည်းသုတ်မိတာက မွေးသန္ဓေမို့ မသေသရွေ့မပျောက်တာမျိုး၊ မလုပ်ရမနေနိုင်-မခိုးရမနေနိုင်စိတ်ဝေဒနာမျိုးကြောင့်ပဲထားပါ။ ဒီတကြိမ်တော့ လက်သစ်စွမ်းအားရှင်ဘုန်းကြီးဆိုးတွေအားကိုပါယူထားပြီးသား။ ဖွဲ့စည်းပုံပြင်ဖို့ ဖွဲ့စည်းပုံအောက်ဝင်တာပါဆိုတဲ့အင်န်အယ်လ်ဒီကလည်း
ပြင်ပြင်/မပြင်ပြင်ဝင်မှာပဲလို့ ပြတ်ပြတ်သားသားကြွေးကြော်ထားပြီးသား။ ဒေါ်စုမလည်း ”သမ္မတကြီးကိုယုံတယ်” "ဗိုလ်ချုပ်ကြီးတွေကိုသဘောကျတယ်" ”လွှတ်တော်ကြီးက ထင်တာထက်တောင် ဒီမိုကရေစီကျသေးေ"တွေဖြစ်။ ခုတော့ ”ထွေထွေထူးထူးမဟုတ်လို့ ထူးထူးထွေထွေမထုတ်ပြန်”အထိရွေ့လာပြီ။ ကိုကိုကြီးကလည်း လွှတ်တော်နိုင်ငံရေးလုပ်မယ်လို့သစ္စာနှံပြီးသား။ ရှစ်ပူးငြိမ်း/ပွင့်တွေ ကြားဖြတ်ကို ဘာလုပ်မလဲ။ ကြားဖြတ်မှာဘာလုပ်မလဲ။ ရွေးကောက်ပွဲစောင့်ကြည့်သူများကတော့
တော်လောက်ပြီထင်တာပဲ။ လိုတာထက်တောင်များနေပြီ မှတ်တယ်။ ကားတဝီဝီနဲ့အပစ်ရပ်ခေါင်းဆောင်တချို့ နေရာယူမှုအသစ်တွေစကြပြီ။
ခြေလှမ်းပြင်ကြပြီ။ လူငယ်တွေ တက်လူတွေနေရာပေးဖို့ဆိုကာ ”ဂွင်”ပြောင်းကြပြီ။ ”ငွေမရှိရင်နိုင်ငံရေးလုပ်မရ” ခေါင်းစဉ်အောက်ကနေ ”စီးပွားရေးသည်နိုင်ငံရေး” လို့ ကြွေးကြော်သံမပြောင်းရုံတမယ်ပဲကျန်တော့တယ်။ အသစ်ဖွဲ့မှတ်ပုံတင်နေကြတဲ့ လူ့ဘောင်သစ်ပါတီတွေကရော ပါတီတည်ရှိခွင့်အတွက် ကော်မရှင်အဆုံးအဖြတ် ခံယူဖို့စောင့်နေရတုန်း။ (မင်းလှ ၅ လောင်းပြိုင်တို့လို) နိုင်ငံရေးလုပ်ကြံသတ်ဖြတ်မှုကြီးတွေ၊ ရာဇဝတ်မှုကြီးတွေ၊ (သခင်တင်မီးခွက်မှုတ်)လို နိုင်ငံရေးအဖတ်ဆယ်မရအောင် ထိုးနှက်မှုမျိုးတွေ၊ အမျိုး ဘာသာ သာသနာတွေ၊ ၉၆၉တွေနဲ့ ဘာတွေဖြစ်လာလေမလဲ။ အကောင်းကိုရှာကြံကြည့်တော့လည်း ”အကောင်းမကုန်” ။ မေဝတ္ထုအဆုံးသတ်လို ”အကောင်းကိုရှာ၏၊ အကောင်းကားမရှိတော့”လို့လည်း မပြောချင်။ ကြည့်ပြီး မမှန်တာ မတရားတာ မဟုတ်တာတွေ့ရင် ပြောမယ်ဆိုမယ် ဆန့်ကျင်မယ် ရှူတ်ချမယ်။ မှန်သူကိုထောက်ခံမယ်။ အားနည်းသူဘက်က ဖေးမစာနာရပ်တည်ပေးမယ်။ ဒီလောက်ပဲ။ (ကြားဖြတ် ဖြတ်မယ့်ကိစ္စ)

ခုတလော ဒီ ဆိုရိုးတယ်လူပြောများတယ်။ (လူတွေကို ကြောက်အောင်လုပ်ထားရင် အနှစ် ၂ဝ လောက်အသာလေးအုပ်ချုပ်လို့ရတယ်။
စာမတတ်အောင်လုပ်ထားရင် အနှစ် ၄ဝ လောက်အေးအေးဆေးဆေးအုပ်ချုပ်နိုင်တယ်။ တစ်သက်လုံးအုပ်ချုပ်ချင်ရင်တော့ အကျင့်စာရိတ္တကို ဖျက်ဆီးလိုက်ပါတဲ့) ခက်တာက နောက်ဘဝထိတေင်မက တသံသရာလုံးအုပ်ချုပ်ချင်ရင် ဘယ့်နှယ်လုပ်ရတယ်ဆိုတာ စစ်အစိုးရအဆက်ဆက်က လက်တွေ့နဲ့ပြထားတာကြ ဘာမှမပြောကြဘူး။ ဘက်လိုက်ပုံများ။ (တရုတ်ထက်စွမ်းပုံများ)