ကညွှတ်ကွင်းအိမ်ပြေး ၅

(ကညွှတ်ကွင်းအိမ်ပြေး ၅)

အမေ ဦးဖိုးထောင်ဆီသွားပြီး အိပ်တော့မလား ကဖိုးထောင်ဟု နှိုးပြီးမေးပါသည်။ အေးအေး ငါအိပ်တော့မယ် အိပ်ယာထဲ လိုက်ပို့ဦးဟု ဗလုံးဗထွေးပြောပါသည်။ သား အဲ့ဘက်က နည်းနည်းတွဲပေး သူ့ကို အိပ်ယာထဲ ပို့ရအောင်ဟုပြောသဖြင့် ကျွန်တော့် အဖေ့လက်ကိုဆွဲယူကာ သူ့ချိုင်းအောက်တွင် ကျွန်တော့်ပခုံးကိုထည့်ပြီး နှစ်ယောက်သား မနိုင့်တနိုင်နှင့် အိပ်ယာထဲပို့ကြပါသည်။

 

အဖေတို့အိပ်ယာဆိုသည်မှာ နွားချေးကျံထားသည့်ကြမ်းပြင်မှ အထက် ၂ ပေခန့်တွင် ဝါးကြမ်းခင်းနှင့် ကွပ်ပျစ်လို စင်အကြီးကြီး ထိုးထားခြင်း ဖြစ်ပါသည်။ ထိုဝါးကြမ်းခင်းပေါ်တွင် တမိုက်သာသာမျှ ကောက်ရိုးများခင်းထားပြီး ကောက်ရိုးအပေါ်ကနေ ဂုံနီအိတ်တွေဖြန့်ခင်းကာ အနားများအား ကြမ်းဖြင့်ဖိသတ်ထားပါသည်။ လူ လေးငါးယောက် လောက် အိပ်လို့ရအောင်ကျယ်ပါသည်။ စောင်နှင့်ခေါင်းအုံးများလည်းရှိပြီး ခြင်ထောင် ထောင်ထားတာမတွေ့ပါ။ စောင်နှင့်ခေါင်းအုံးများမှာ မီးခိုးစော်လိုလို ဘာလိုလိုတွေ နံနေပါသည်။ စောင်တွေမှာ အညာစောင်ကြမ်းကြီးတွေ ဖြစ်ပါသည်။ နည်းနည်းညစ်ပတ်သည်ဟု ကျွန်တော်ထင်ပါသည်။

 

အဖေ့ကိုနေရာချပြီးမှ အမေက တဲတနေရာသွားကာ အချောသပ်ထားသည့် ဝါးခြမ်းပြားလေးတွေ ယူလာပြီး ကြမ်းပေါ်ချက သူလည်း ဖင်ချထိုင်ပါသည်။ အမေ ဘာလုပ်မလို့လဲဟု ကျွန်တော်က ဘေးမှ ဝင်ထိုင်ရင်းမေးတော့ လယ်ညှပ်လုပ်မယ့်ဟာတွေ သားရဲဟုပြောပါ။  လက်ပွတ်စူးနဲ့ အပေါက်လေးတွေဖောက်ထားပေးမလို့ နင့်အဖေ မနက်ကျရင် ဆင်လိမ့်မယ်ဟုပြောပါသည်။ လယ်ညှပ်ဆိုတာ ဘာမှန်းမသိသလို လက်ပွတ်စူးဆိုတာလည်း ဘာမှန်း ကျွန်တော်မသိပါ။ ကျွန်တော်မသိမှန်း အမေသိတော့ လယ်ညှပ်ဆိုတာ ကြွက်ထောင်တဲ့ဟာကိုပြောတာသားရဲ့၊ ဒီဟာကိုခေါ်တာဟု အနားက လယ်ညှပ်တခုကိုယူပြပါသည်။ 

 

ဝါးများကိုအချောသပ် ဝါးချမ်းလေးတွေစိတ်ကာ မောင်းတံလိုဆင်ထားခြင်းဖြစ်ပါသည်။ အောက်ဆုံးတနေရာတွင် ကြိုးဖြင့်သီထားသော ၂ လက်မခန့်ရှိသည့်ဝါးအတံလေးက တွဲလောင်းကျနေပါသည်။ အခြေတွင် ကန့်လန့်ဖြတ် ထည့်ထားသည့်  ၈ လက်မခန့်ရှိသည့် ဝါးအတံလေးတတံလည်း တွေ့ပါသည်။ ဒီလိုထောင်ရတာသားရဲ့ဟုပြောကြာ ထောင်ပြပါသည်။ ခုနကတွဲလောင်းကျနေသည့် ဝါးအတံလေးမှာ ခလုပ်လိုဖြစ်ပါသည်။ ကြွက်တွင်းဝမှာ ဒါမှမဟုတ် ကြွက်လျှောက်လမ်းမှာ လယ်ညှပ်ကိုဆင်ပြီး ထောင်ထားရတယ်။ ကြွက်က လည်ညှပ်ကိုဖြတ်ပြေးရင်း အောက်က ဝါးတံကိုနင့်းမိတော့ ဒီဝါးခလုပ်လေးကပြုတ်ကြပြီး ကြွက်လည်ပင်းကိုညှပ်မိပြီး သေတာပေါ့။ ဒါ့ကြောင့်လည်ညှပ်လို့ ခေါ်တာ။ 

 

နင့်အဖေက လယ်ညှပ်ထည်းထောင် ကြွက်လည်းထိုးတတ်တယ်ဟုပြောပြန်ပါသည်။ ကြွက်ထိုးတာ ဘာလဲဟု ကျွန်တော်မေးချင်သော်လည်း မမေးဖြစ်လိုက်ပါ။ လက်ပွတ်စူးဆိုသည်ကို စိတ်ကရောက်နေသောကြောင့်ဖြစ်ပါသည်။

လက်ပွတ်စူးဆိုမှာ စက်ဘီး စပုတ်တံကို ၆ လက်မခန့်ဖြတ်။ အဖျားပိုင်းကို မီးပေးပြီး ပြားအောင် ညီအောင်ထုကာ မြနေအောင်သွေးထားသည့် သံစူးလေးဖြစ်ပါသည်။ ထိုသံစူးလေးကို အရင်းပိုင်းမှ ၃ လက်မခန့်မြုတ်အောင် လက်ကိုင်ရိုးတွင်ထည့်ထားပါသည်။ လက်ကိုင်ရိုးမှာ ရှည်မျောမျောလေးဖြစ်ပြီး အလျား ၄ လက်မခန့်ရှိပါသည်။ ထိုလက်ပွတ်စူးလေးကို အပေါက်ဖောက်မည့် ဝါးခြမ်းပြားပေါ်တင်ပြီး လက်ကိုင်ရိုးအား လက်ဖဝါးနှစ်ဘက်ဖြင့် ဖိ၍ဖောက်ကာ လှည့်လှည့်ပေးရပါသည်။ ထိုအခါ သတ်မှတ်ထားသည့်နေရာတွင် ထုတ်ချင်းပေါက် အပေါက် ကလေးများဖြစ်လာပါသည်။ လွန်ဖြင့်ဖောက်သလိုဖြစ်ပါသည်။ ထိုအပေါက်ကလေးမှနေ၍ ဝိုင်ယာကြိုး(နန်းကြိုး)ဖြင့် သီ၍ချည်ကာ လယ်ညှပ်လုပ်ရပါသည်။ တနည်းပြောရလျှင် လယ်ညှပ်လုပ်ရာတွင် လက်ပွတ်စူးမှာ မရှိမဖြစ်ကိရိယာ ဖြစ်ပါသည်။ ဝါးခြမ်းပြားကို လက်ပွတ်စူးနှင့်မှ အပေါက်ဖောက်၍ရပါသည်။

(ဆက်ပါမည်)