ငြင်းပယ်ခြင်း၏အလှ(ဖြစ်တည်မှုဒဿနနိဒန်း) မောင်ကြည်သစ် (အပိုင်း၁၅-)

ငြင်းပယ်ခြင်း၏အလှ(ဖြစ်တည်မှုဒဿနနိဒန်း)မောင်ကြည်သစ် (အပိုင်း၁၅-) (စာပြင်နိုင်သမျှ ပြီးသမျှတင်ပေးမယ်တွေးပါတယ်-မျိုးမြင့်ချို) ဘဝ၏ဖြစ်နိုင်ခြေကိုငြင်းပယ်ခြင်း

ယန်းပေါဆာ့တ်၏အလိုအရ လူသားတဦးတွင်အတ္တတခု (ဝါ) အတ္တကောင်တကောင်ရှိနေသည်ဟု ပြောဆို၍ မရပေ။ အကြောင်းမှာ လူတယောက်အတွက် သူပိုင်ဆိုင်သမျှအားလုံးမှာ သူ၏ပြုမူလုပ်ဆောင်ချက်များသာဖြစ်သောကြောင့်ပင်။ သို့ဖြစ်၍ ကိုယ့်အတွက်ကိုယ်ရှိခြင်း (Being­ for­ itself)ဟူသည့် 'သိစိတ်'ကိုအခြေခံဝတ္ထုသဘောတရပ်အနေဖြင့် သတ်မှတ်၍ မရနိုင်ခြင်းဖြစ်ပေသည်။ လူဟူသည် ရုပ်ဝတ္ထုပစ္စည်းမဟုတ်။ အပြုခံအရာဝတ္ထုတခုလည်းမဟုတ်။ သိစိတ်ဖြစ်စဉ်တရပ်သာဖြစ်သည်။ ယင်းသိစိတ်ဟူသည်မှာလည်း အဟုတ်တကယ်ရှိပြီး မြင်တွေ့နိုင်သည့်ဂုဏ်ရည်များနှင့် အဓိပ္ပါယ်သတ်မှတ်ဖော်ဆောင်၍ရနိုင်ကောင်းသည့်အရာမဟုတ်ပေ။ သိစိတ်တွင် လက်ဆုပ်လက်ကိုင်ပြစရာအကောင်အထည်ပစ္စည်းဟူ၍ ဘာမှမရှိ။ အာကာသ(Space)တည်းဟူသော နေရာဒေသ အဝှမ်းတရပ်အတွင်း နေရာချထားသတ်မှတ်၍ရနိုင်ကောင်းသည်လည်း မဟုတ်ပေ။ သိစိတ်ကို အရေအတွက်အားဖြင့် ရေတွက်သတ်မှတ်နိုင်သည်မဟုတ်။ အမှန်စင်စစ် သိစိတ်ဟူသည် ထိတွေ့သိမြင်၍ရနိုင်သောအရာ မဟုတ်ပေ။ ဤသို့ဆိုပါလျှင် သိစိတ်၏နောက်ဆုံးလားရာပန်းတိုင်ကားအဘယ်နည်းဟု မေးစရာရှိလာသည်။ ယန်းပေါဆာ့တ်၏အဖြေကား သိစိတ်တည်းဟူသောလူသား၏နောက်ဆုံးပန်းတိုင်မှာ လုံးဝငြင်းပယ်ခြင်းသဘောသာလျှင်ဖြစ်၏။

လူသားတဦး၏ဖြစ်တည်မှုဘဝအတွင်း ဗဟိုအချက်အခြာတွင်မတည်မြဲမှု၊ အစိုးမရမှုသဘောတို့သည် အမြဲတမ်း မသိမသာမထင်မရှားရှိနေကြ၏။ လူ့လောကတွင် လူတို့သည် တစုံတခုကိုရယူပိုင်ဆိုင်လိုမှုအတွက် အလုပ်အကိုင် အပြုအမူများကိုကြိုးစားလုပ်ကိုင် ဆောင်ရွက်ကြသည်။ သို့ရာတွင် နောက်ဆုံး၌ လူတို့သည် သူ့ဘဝတွင် ဘာမှ ရရှိမသွားကြပေ။ ကိုယ်အပိုင်ဆိုင်ဆုံးဟူသည့် မိမိခန္ဓာကိုယ်ကိုပင် မရနိုင်၊ မပိုင်ဆိုင်နိုင်ကြပေ။ လူ့ဘဝကို အပေါ်ယံကြောအားဖြင့်ကြည့်လျှင် စစ်မှန်။ တည်မြဲ၏။ ပြည့်စုံ၏ဟုထင်စရာဖြစ်ပေသည်။ သို့သော် လူသားတိုင်း၏ဘဝတိုင်းသည် လုံးဝအဓိပ္ပါယ်မဲ့သောအဖြစ်၊ ယုတ္တိကင်းသောအဖြစ်၊ ဘာမဆိုပြောဆိုသတ်မှတ်၍မရသည့်အဖြစ်သို့ ဦးတည်နေသည်သာဖြစ်သည်။ မည်သို့သောလူသားဖြစ်ဖြစ် နောက်ဆုံးတွင် ဘာမှအဓိပ္ပါယ်မရှိသောနတ္တိဘဝအဖြစ် အဆုံးသတ်သွားရသည်သာဖြစ်၏။

ဆာ့တ်သည် သူ၏အသံတိတ်သမ္မတနိုင်ငံတော်တွင် သေခြင်းတရားကိုထည့်သွင်း သရုပ်ဖော်ခဲ့သည်။ ဤစာအုပ်တွင်ပြင်သစ်တို့၏ ဖက်ဆစ်ဂျာမန်တော်လှန်ရေးကာလအတွင်း သေခြင်းတရားသည် လူတို့အတွက် အထူးအဆန်းမဟုတ်တော့သည့်ကိစ္စ၊ ကြုံလေ့ကြုံထရှိသောကိစ္စဖြစ်လာကြောင်းကို ထင်မြင်လာစေရန်တင်ပြ၏။ သေခြင်းတရားကို ထိတ်လန့်ကြောက်မက်စရာ ဒုက္ခဘေးဆိုးကြီးအဖြစ် မစဉ်းစားကြနှင့်။ မခံယူကြနှင့်။ သေခြင်းတရားဟူသည် လူသားတဦး၏ဘဝတွင် မုချမသွေဆိုက်ရောက်သွားမည့်ခရီးပန်းတိုင်ဖြစ်၏။ လူတိုင်းလူတိုင်း မွေးဖွားကတည်းကပိုင်ဆိုင်လာရသည့် ကိုယ်ပိုင်ဝေစုဖြစ်သည်။ လူသားတို့အတွက် အမှန်တကယ်အခြေခံလှသည့်အစစ်အမှန်အရှိတရားကြီးသာဖြစ်သည်ဟု စဉ်းစားခံယူကြရန် ဆာ့တ်က ပြောကြားသည်။

ဂျာမန်ဖြစ်တည်မှုဝါဒီ ဟိုင်ဒေဂါးက လူတို့သည် သေခြင်းတရားနှင့် တချိန်ချိန်တွင်နဖူးတွေ့ဒူးတွေ့ ရင်ဆိုင်ကြရမည်သာဖြစ်၏။ ဤသဘောကို အစဉ်သဖြင့်တွေးသိထိုက်သည်။ လူ့ဘဝဟူသည် သေခြင်းတရားဖြင့် အချည်နှီးဖြစ်သွားရမည့်သဘောပါတကားဟု တိတိပပခံယူထားဖို့လိုသည်။ သေခြင်းတည်းဟူသောအချည်းနှီးသဘောအဖြစ် အမှန်တကယ်သိမြင်နားလည်ထားပါက ဤလောက၌ အဘယ်သို့သောဒုက္ခမျိုးကိုမျှ အရေးကြီးသောအရာဟု ထင်မြင်ကြတော့မည်မဟုတ်။ သေခြင်းတရားသည် ဘဝ၏အမှန်တရားဖြစ်၏။ ဘာမျှ တွေဝေနေစရာ မလို။ ကြောက်ရွံ့နေစရာလည်း မလို။ ကြောက်ရွံ့နောက်တွန့်၍ လွဲဖယ်သွားမည့်အရာလည်း မဟုတ်။ ကြုံရမည့်အရာကို ရင်ဆိုင်ရန်သာရှိသည်ဟု ခံယူထားရမည်။ ဤသို့ခံယူထားခြင်းဖြင့် မိမိရောက်ရှိဖြစ်တည်လာသည့်လောက၌ လုပ်ဆောင်အပ်သည်များကို လုပ်ဆောင်နိုင်သူအဖြစ်သို့ ရောက်ရှိလာမည်ဟုဆိုခဲ့သည်။

သေခြင်းတရားနှင့်စပ်လျှဉ်း၍ ယန်းပေါဆာ့တ်က ဤသို့ဖွင့်ဆိုခဲ့၏။ ကျွန်ုပ်တို့သည်သေခြင်းတရား၏ယုတ္တိမတန်မှု(ဝါ)အဓိပ္ပါယ်မဲ့မှုကို ဦးစွာအသိအမှတ်ပြုရမည်။ လူသားတိုင်းသည် မည်သည့်အချိန်ဟူ၍တိတိကျကျသတ်မှတ်မထားသည့် သေဒဏ်ချမှတ်ခံရသူချည်းဖြစ်၏။ လူတဦးစီသည် ယင်းနောက်ဆုံးပြစ်ဒဏ်အတွက် ကိုယ့်နည်းကိုယ့်ဟန်ဖြင့် ပြင်ဆင်နေသူဖြစ်၏။ စက်တိုင်ပေါ်တွင်အကောင်းဆုံး သရုပ်ဆောင်ပြနိုင်ရန်အတွက် ဖြစ်နိုင်သမျှအရာအားလုံးကို အစွမ်းကုန်အားထုတ် ပြုလုပ်ဆောင်ရွက်နေသူဖြစ်သည်။ ထို့ပြင် ကျွန်ုပ်သည် သေခြင်းတရားကို မျှော်လင့်စောင့်စား၍မရနိုင်။ မည်သည့်အချိန်အခါတွင်ဖြစ်ပေါ်မည်ဟူ၍ သတ်သတ်မှတ်မှတ်ဆုံးဖြတ်ပြီးသားအဖြစ်အပျက်ကိုသာ မျှော်လင့်စောင့်စား၍ရနိုင်ကောင်း၏။ သေခြင်းတရားကား မည်သည့်အချိန်တွင်ဖြစ်ပေါ်လာမည်ကို တိတိကျကျသိသောအရာမဟုတ်။ ထို့ကြောင့်သေခြင်းတရားကိုသတ်မှတ်ထားသည့်အချိန်ဇယားအတိုင်းဆိုက်ရောက်မည့်ရထားတစင်းပမာ သဘောမထား အပ်ပေ။ သေခြင်းတရားသည် အချိန်မမှန်သည့်ရထားပမာ ရောက်လာမည့်အချိန်ကိုမသိနိုင်ပေ။ အချိန်စော၍ရောက်လာမည်လား၊ နောက်ကျ၍ ရောက်လာမည်လား၊ သို့တည်းမဟုတ် ပုံမှန်ရောက်လာမည်လား တိတိကျကျမသိနိုင်ပေ။ သို့ဖြစ်၍ သေခြင်းတရားကို အစွဲကြီးတရပ်အနေဖြင့် မျှော်လင့်စောင့်စား မထားအပ်ပေ။ ထို့ပြင် သေခြင်းတရားသည် ဘဝ၏ဖြစ်နိုင်ချေအလားအလာတရပ် မဟုတ်ပေ။ ဘဝ၏ဖြစ်နိုင်ချေအလား အလာအားလုံးကို ငြင်းဆန်ပယ်ဖျက်လိုက်ခြင်းသဘော ဖြစ်၏။ အကယ်၍ ပြင်သစ်စာရေးဆရာကြီး ဘားလ်ဇတ်သည် သူ၏ Les Chouns ဟူသော (ဘဝသရုပ်ဖော်)ဝတ္ထုကို မရေးသားခင်သေဆုံးသွားပါက သူသည် ကာမရာဂနှိုးဆွသည့် ပေါ်ပင် ဆူလွယ်နပ်လွယ်ဝတ္ထုများကိုသာရေးသားသည့် အပေါစားစာရေးဆရာတစ်ဦးသာဖြစ်သည်ဟု မှတ်ယူကြပေလိမ့်မည်။ ယခုကဲ့သို့ ပြင်သစ်စာပေသမ်ိုင်းဝင်ပုဂ္ဂိုလ် ဖြစ်လာမည်မဟုတ်ပေ။ သေခြင်းတရားသည် ဘားလ်ဇတ်၏ ဘဝဖြစ်နိုင်ခြေအလားအလာကို လုံးဝငြင်းဆန်ပယ်ဖျက်လိုက်ပေသည်။

ဤသို့ဖြင့် ယန်းပေါဆာ့တ်သည် သေခြင်းတရားကို လူ့ဘဝ၏ယေဘုယျငြင်းပယ်မှုတရား (Universal negation) အဖြစ် ရှူမြင်ခဲ့သည်။ ဤသို့ ရှူမြင်သုံးသပ်ရင်း ဆာ့တ်သည်ငြင်းပယ်ဆန့်ကျင်အရှိတရား(ဝါ)မရှိသောအရှိတရားများကို ရှာဖွေတွေ့ရှိခဲ့သည်။ ယနေ့ ရူပဗေဒဘာသာတွင်ရုပ်အဖြစ်တည်ရှိမနေသောရုပ်(ဝါ)ဆန့်ကျင်ရုပ်ကိုတွေ့ရှိလာပြီး စူးစူးစိုကစိုက်လေ့လာနေကြ၏။ ယနေ့ကမ္ဘာ့စာပေလောကတွင်လည်း ဇာတ်လိုက်မဆန်သောဇာတ်လိုက်(ဝါ) ပတိဇာတ်လိုက်များဖြင့်ရေးဖွဲ့သည့်ဝတ္တုများသည် နေရာယူခဲ့ပြီးဖြစ်ပေသည်။ မျက်မှောက်ခေတ်လူသားတို့သည် လူ့ဘဝ၏အဓိပ္ပါယ်ကင်းမဲ့မှုများ၊ လောက၏အနှစ်သာရမဲ့မှုများ၊ ဗလာချည်းသက်သက်ဖြစ်မှုများကို တွေ့ကြုံခံစားကြရ၏။ မိမိဘဝ၏ မလုံခြုံမတည်မြဲမှုကိုလည်း ကိုယ်တွေ့ကြုံကြရသည် ။ထို့ကြောင့် လုသားသည် ဤလောကရှိ မိမိအပါအဝင်အရာရာတိုင်းအပေါ် ယုံကြည်မှုကင်းလာ၏။ သံသယပွားလာကြ၏။ မိမိဘဝအပေါ် အမြဲတမ်းစိုးရိမ်ပူပန်နေရသည့် အဖြစ်သို့ရောက်ကြရသည်။ ထို့ကြောင့် မျက်မှောက်ခေတ်လူသားတို့သည် စိုးရိမ်ပူပန်သောခေတ်ထဲတွင် နေထိုင်ကြရသည်ဟုဆိုရပေမည်။ ဤသို့သော လူ့ဘဝ၏အဓိပ္ပါယ်မဲ့မှုသဘောနှင့် မရှိသောတရားအယူအဆများကို သိရှိနားလည်ထားခြင်းမရှိပါက မျက်မှောက်ခေတ်စာပေ၊ ကဗျာများကို နားလည်နိုင်မည်မဟုတ်ပေ။ ဤလောကကြီးထဲတွင် ယခု ရှိမနေဖြစ်မနေသောအရာများ (Things that are not there)(ဝါ) မရှိသောအရှိတရားများဖြင့် ပြည့်လွှမ်းနေသည်ကိုတွေ့ရ၏။ ယင်း မရှိသောအရှိတရားများသည် လူ့ဘဝအပေါ် အင်အားကြီးမားစွာဖြင့်လွှမ်းမိုးနေပေသည်။ ယခု ရှိနေသောအရာများထက် လူ့ဘဝအပေါ် ပိုမိုစိုးမိုးထားသည်ကိုလည်း တွေ့နိုင်သည်။ ဥပမာအားဖြင့် အလွန်ချစ်မြတ်နိုးကြသည့်ချစ်သူနှစ်ဦးအကြောင်း စဉ်းစားကြည့်ပါ။ တဦးကသူ့ချစ်သူထံမှတယ်လီဖုန်းခေါ်သံကို စောင်မှေျ့ာ်နေ၏။ တယ်လီဖုန်းသည် နှစ်ဦးသား ချိန်းဆိုသတ်မှတ်ထားသည့်အချိန်တွင် ခေါ်သံမြည်မလာ။ ဤအချိန်တွင် တယ်လီဖုန်းခေါ်မြည်သံနှင့် တယ်လီဖုန်းမခေါ်မြည်သံ နှစ်မျိုးအနက် မည်သည်က စောင့်မျှော်နေသည့်ချစ်သူအပေါ် သြဇာပြုလွှမ်းမိုးထားပါသနည်း။ တယ်လီဖုန်းကလည်း ခုထိမလာဘူးဟူသောအတွေးက သူ့အပေါ်စိုးမိုးထားသည်သာဖြစ်၏။ တနည်းအားဖြင့် ငြင်းဆန်အရှိတရား(ဝါ)မရှိသောအရှိတရားက သူ့ တကိုယ်လုံးအပေါ်ဖိစီးလွှမ်းခြုံထားပေသည်။ လူသားတို့သည် ၂ဝ ရာစုခေတ်ကို မိမိတို့၏လှပသောအနာဂတ်အဖြစ် အလွန်မျှော်လင့်ခဲ့ကြသည်။ တည်ငြိမ်ကောင်းမွန်လှသော အဆင့်မြင့်လူ့ယဉ်ကျေးမှုအဖွဲ့အစည်းတရပ် ဖြစ်တည်ပေါ်ထွန်းလာလိမ့်မည်ဟုလည်း မှန်းဆငံ့လင့်ခဲ့ကြသည်။ သို့သော် ၂ဝရာစုတွင် အမှန်တကယ်ဖြစ်ပေါ်လာသည်များကား မျှော်လင့်ချက်တို့နှင့်ဆန့်ကျင်ဘက်များသာဖြစ်၏။ အကန့်သတ်မဲ့အနိုင်ကျင့်ကျွန်ပြုမှုများ၊ ရက်စက်ကြမ်းကြုတ်လှသောအရိုင်းအစိုင်းဝါဒများ၊ လူရိုင်းထက် ထူးကဲဆန်းပြားသည့် သတ်ဖြတ်ညှဉ်းဆဲမှုများက်ို လူသားတို့သည် ပိုမိုတွေ့ကြုံလာရသည်။ ထို့ကြောင့်လည်း ဤရာစုခေတ်တွင် လူ့ဘဝနှင့်ပတ်သက်၍ ငြင်းပယ်ဆန့်ကျင်ခြင်းသဘောကို အလေးနက်ပြုထားသည့် အတွေးအခေါ်များ၊ အဆိုးမြင်ဒဿနများပေါ်ထွန်းခဲ့သည်မှာ မဆန်းလှပေ။ ယန်းပေါဆာ့တ်၏ဒဿနမှာလည်း ငြင်းပယ်ဆန့်ကျင်ခြင်းသဘောကို အလေးနက်ထားသည့်ဒဿနတရပ်ဖြစ်သည်။ သို့သော် ယင်းဆန့်ကျင်ငြင်းပယ်ခြင်း၏ရည်ရွယ်ချက်မှာ လူ့ဘဝ၏အစစ်အမှန်ဖြစ်တည်မှုအတွက် အားမာန်အပြည့်အဝဖြင့်ရင်ဆိုင်တည်ဆောက်နိုင်ရန် ဖြစ်ပေသည်။ ထို့ကြောင့်လည်း ယန်းပေါဆာ့တ်သည် လွတ်လပ်မှုသဘောကို ငြင်းပယ်ဆန့်ကျင်ခြင်းသဘောဖြင့်စဉ်းစားတင်ပြခြင်းမှာ လူသား၏ကြီးကျယ် ခမ်းနားလှသည့်ဖန်တီးစွမ်းဆောင်နိုင်မှုအားမာန်သဘောကို မီးမောင်းထိုးပြခြင်းဖြစ်ပေသည်။

"ဖက်ဆစ်ဂျာမန်တွေရဲ့အုပ်စိုးမှုလက်အောက် ကျရောက်ခဲ့တဲ့အချိန်ကလောက် ဘယ်တုန်းကမှ ကျုပ်တို့လွတ်လပ်မှုရှိခဲ့ဘူး။ အဲဒီအချိန်ဟာ လွတ်လပ်မှုကို ကျုပ်တို့နားအလည်ဆုံး၊ အခံစားရဆုံးအချိန် ဖြစ်တယ်။ ကျုပ်တို့ဟာ ဂျာမန်တွေရဲ့လက်အောက်မှာ အခွင့်အရေးအားလုံး ဆုံးရှူံးခဲ့ရတယ်။ စကားပြောဆိုပိုင်ခွင့်အခွင့်အရေးက စလို့ပေါ့။ ကျုပ်တို့ပါးစပ်တွေပိတ်ထားပြီး ဘာသံမှထွက်မလာရအောင် နေ့တိုင်း စော်ကားခံခဲ့ရတယ်။ လှည့်စားချက် တခုပြီးတခုအောက်မှာ ကျုပ်တို့အားလုံးဟာ လူရုပ်ပျောက်ခဲ့ရတယ်။ ဒီလိုဖိနှိပ်မှုတွေကြောင့် ကျုပ်တို့လွတ်လပ်ခဲ့တာဖြစ်တယ်။ ဂျာမန်ဖက်ဆစ်တွေကို သွေးသားထဲက ရွံရှာမုန်းတီးတဲ့စိတ်ကြောင့် ကျုပ်တို့ရဲ့ပြတ်သားတဲ့အတွေးအခေါ် ခံယူချက်တွေဟာအောင်မြင်ခဲ့တယ်။ လွတ်မြောက်ခဲ့တယ်။ ကျုပ်တို့ရဲ့လျှာတွေကို သူတို့ကအတင်းအဓမ္မ ထိန်းချုပ်ထားခဲ့တဲ့အတွက် စွမ်းအားရှိတဲ့စကားလုံးတွေ ပေါ်ထွက်လာတာဖြစ်တယ်။ ဘက်ပေါင်းစုံခြိမ်းခြောက်ခံခဲ့ရတဲ့အတွက်ကြောင့်လည်း ကျုပ်တို့အားလုံးဟာ ဂျာမန်ဆန့်ကျင်ရေး အရေးတော်ပုံကြီးမှာ ခြေစုံပစ်ပါဝင်ခဲ့ကြတာဖြစ်တယ်။ 'ဂျာမန်ဖက်ဆစ်တွေရဲ့အောက်မှာ လူဟာသေမျိုးဖြစ်တယ်'

ဆိုတဲ့အဖြစ်ကို အချိန်တိုင်းပြည့်ပြည့်ဝဝ တွေ့ကြုံနားလည်ခဲ့ကြတယ်။ သေခြင်းတရားနဲ့ အမြဲတမ်း မျက်နှာချင်းဆိုင်ခဲ့ရတဲ့အတွက်ကြောင့် ကျုပ်တို့ရဲ့ရွေးချယ်မှုတွေဟာ ပြတ်သားပြီးစစ်မှန်တဲ့ဘဝကို တည်ဆောက်နိုင်ခဲ့ကြတယ်လို့လည်း ဆိုနိုင်တယ်။ 'ကျုပ်တို့ရဲ့ဘဝဟာ သေတာကမှပိုကောင်းသေးတယ်'ဆိုတဲ့အဖြစ်ကြောင့်လည်း ပိုပြီးစစ်မှန်လာခဲ့တယ်။ ဒီနေရာမှာ ကျွန်တော်ရည်ညွှန်းတာဟာ ဂျာမန်ဆန့်ကျင်ရေးတိုက်ပွဲမှာ လက်နက်စွဲကိုင်ပြီး ကိုယ်တိုင်ကိုယ်ကျ တိုက်ပွဲဝင်ခဲ့သူတွေကိုသာ မဟုတ်ဘူး၊ ဂျာမန်ဖက်ဆစ်တွေရဲ့လက်အောက်မှာ လေးနှစ်တာ (၁၉၄ဝ­၄၄)ကာလအတွင်း အချိန်တိုင်း ဂျာမန်ဖက်ဆစ်တွေက်ို(No)လို့ ငြင်းဆိုကြတဲ့ ကျုပ်တို့ပြင်သစ်လူမျိုးအားလုံးကိုညွှန်းဆိုတာ ဖြစ်တယ်"ဟူ၍ သူ၏ 'အသံတိတ်နိုင်ငံတော်'တွင် ငြင်းပယ်ဆန့်ကျင်ခြင်းစွမ်းအားသတ္တိ၏လွတ်လပ်မှုကို ယန်းပေါဆာ့တ်က ဖွင့်ဆိုပြပေးခဲ့သည်။ အမှန်စင်စစ် လွတ်လပ်မှုဟူသည် တောင်းခံအပ်၍ ရရှိလာသောအရာမဟုတ်။ လွတ်လပ်မှုကို ဒါကို..ဟိုးအဝေးကြီးမှာ ကျွန်တော် သွားရှာခဲ့တယ်။ တကယ်တော့ ဒါဟာ ကျွန်တော်နဲ့ သိပ်ကိုနီးကပ်လွန်းတဲ့အတွက် ထိလို့တောင်မရနိုင်ဘူး။ ဟုတ်တယ်၊ လွတ်လပ်မှုဟာ ကျွန်တော် ထိလို့မရလောက်အောင်ကို ကျွန်တော်နဲ့နီးကပ်လွန်းပါတယ်။ တကယ်တော့ လွတ်လပ်မှုဆိုတာ ကျွန်တော်ကိုယ်တိုင်ပါဘဲ။ မိမိပါဘဲ။ ကျွန်တော်ဟာ ကျွန်တောရဲ့လွတ်လပ်မှုဖြစ်တယ်။