ကတ္တီပါ ကန့်လန့်ကာ (အောင်ဖြိုးကျော်၊ ပခုက္ကူ)

ပွဲဦးကရန် ခုနစ်သံချီကိုဆွယ်... ဆိုတဲ့သီချင်းကို အမယ်ကြီး  ကောင်းကောင်း ကြားခဲ့ဖူးတယ်။

အသက် ၇ဝ မကျော်ခင် အပျိုပေါက်ဘဝကတည်းက ကြားခဲ့ဖူးတာ။ ရှေးတုန်းကတော့ အဲဒီသီချင်းကို ပွဲမထွက်ခင် ည ၉ နာရီထိုးခါနီးမှာ ဇာတ်စင်က လော်စပီကာကြီးတွေဆီကနေ ကြားရတာရယ်။ ခေတ်နဲ့တွက်ရင် လှည်းခေတ်ပေါ့။ ခုလို တရုတ်ဆိုင်ကယ်ခေတ်၊ ဂွင်ဒေါင်း ထော်လာဂျီခေတ် မဟုတ်ဘူး။ သူ့ရွာကိုယ့်ရွာ ဘုရားပွဲတွေမှာထည့်တဲ့ဇာတ်တွေကို လှည်းတန်းကြီးတွေနဲ့သွားကြည့်ကြရတာ။ ရွာအနီးအဝေး ဇာတ်အကောင်းအညံ့ချိန်ပြီး နေမဝင်ခင်ကသွားကြသလို နေဝင်ပြီးမှသွားကြရတာလည်းရှိတယ်။ လည်ပင်းသိမ် ဖင်ပိုင်းကြီး မြေအိုး ရေဘူးကြီးတွေထဲ သောက်ရေထည့်၊ ထမင်းဟင်းတွေ ဒန်အိုးကြီးတွေထဲ ခူးခပ်ထည့်ပြီးတော့ကို သွားကြည့်ခဲ့ကြရတာ။
လှည်းဝိုင်းကြီးတွေက အကြီးကြီးတွေ၊ စောစောရောက်မှ လှည်းထိုးရတာဇာတ်ခုံနဲ့နီးတယ်။ ဇာတ်စင်ရှေ့တည့်တည့်မြေကြီးမှာ ဖျာစုတ်၊ ပုတ်စုတ်တွေခင်းထားတဲ့မြေဝိုင်း၊ ပြီးမှ တစ်ထွာလောက်မြင့်တဲ့ ဝါးကွပ်ပျစ်ဝိုင်း၊ အဲဒီနောက်ကမှ အနိမ့်အမြင့်အလိုက် ခုတင်တွေ၊ အဲဒီ ခုတင်တွေနောက်ကမှ လှည်းဝိုင်းက ကပ်ထိုးရတာ။ နောက်များကျလို့ကတော့ ဇာတ်ခုံပေါ်က မင်းသမီးမင်းသားတွေကို မှုန်မှုန်ပဲမြင်ကြ ရတယ်။
အဲဒီတုန်းကတော့ ပခုက္ကူမြို့ခံဇာတ်တွေထဲက  ရွှေမန်းအောင်ဝင်းပဲ ခဏခဏကြည့်ရတာ။ တခြားရွာကြီးတွေကထည့်တဲ့ ရွှေနန်းတင်တို့လို မုံရွာဇာတ်၊ မန္တလေးဇာတ်ကြီးတွေကိုတော့ ကြိုးကြားကြိုးကြားမှ ကြည့်ကြရတာပေါ့။ ဇာတ်ကြီးတွေဆိုတော့ အိမ်ခြေများတဲ့ရွာကြီးတွေမှ ထည့်နိုင်တာကလား၊ အဲဒီဇာတ်တွေများပါလို့ကတော့ နေမဝင်ခင် ရောက်အောင်သွားနိုင်ရင် သွား၊ မသွားနိုင်လို့ကတော့ လှည်းဝိုင်း နောက်မြီးကနေ ဇာတ်သမီးဇာတ်သားကို ရုပ်သေးရုပ်လောက်ပဲမြင်ရတယ်။

တချို့လည်း လှည်းပေါ်က ဆင်း၊ ရွာခံလူတွေခင်းထားတဲ့မြေဝိုင်းထဲဝင် ရွာခံအသိတွေနဲ့တိုးဝှေ့ကြည့်ရတယ်။ အသိမရှိရင်တော့ လက်လှုပ် ခြေလှုပ်ကိုပဲအားပြု၊ ရသေ့စိတ်ဖြေပွဲဆိုတာကိုကျေနပ်လိုက်ရတယ်။ ပွဲဟေ့ဆိုရင် မက်ရေစက်ရေ ရွာတိုင်းရှိတယ်။ ရှိဆို ခုခေတ်လို ဗီဒီယို ဆိုတာ ဝေး၊ တီဗွီလည်း မပေါ်သေး။ ရေဒီယိုတောင် အိမ်တိုင်းမရှိသေးတဲ့ခေတ်ကိုး။ ဒီတော့ ဇာတ်ဆိုမှဇာတ်၊ ပွဲဆိုမှ ပွဲပေါ့။
ဆိုတော့ကာ ဘုရားပွဲရဲ့အသက်က ဇာတ်ပဲ။ ဘုရားပွဲ လူစည်မစည် ထည့်တဲ့ဇာတ်ပေါ်မှာ တည်တယ်။ မုံရွာဇာတ်ဟေ့ မန္တလေးဇာတ်ဟေ့လို့ အသံကြားတာနဲ့ မရောက်ခင် တစ်လကိုးသီတင်းက အားခဲထားကြတာဆိုတော့ အဲဒီခေတ် ဇာတ်ပွဲအခင်းအကျင်းက ခုခေတ် ပွဲခင်းဆိုတာ တွေနဲ့ ဆီနဲ့ရေလိုကွာတယ်။
တစ်နှစ်တစ်ခါလုပ်တဲ့ မြို့ပေါ်က သီဟိုဠ်ရှင်ဘုရားပွဲရောက်ရင်တော့ ရုံလာသွင်းတဲ့ ထိတ်ထိတ်ကြဲဇာတ်တွေကို တစ်နှစ်တစ်မျိုး မရိုးရလေအောင် အမယ်ကြီး ကြည့်ဖြစ်တယ်။ ရွှေမန်းသဘင်ဆိုရင် တင်မောင် ကနေ သားစဉ်မြေးဆက်၊ ပန်တျာကြည်လင်၊ စိန်မာဒင်၊ ပုလင်းစိန်၊ ဖန်ခွက်စိန်၊ မြို့တော်သိန်းအောင်၊ မောင်ယဉ်အောင်ကနေ ဘီအီးဒီအောင်သိုက်... တော်တော်များတယ်။ ဆိုတော့ကာ အမယ်ကြီး ပွဲကြည့်သက်က သက်တမ်းရဲ့တစ်ဝက်ကို တော်တော်ကြီးကျော်တယ်။ တော်ရုံတန်ရုံဇာတ်တော့ ဇာတ်လို့ ဘယ်ထင်မတုံး။ ပွဲရည်က တော်တော်ကြီးကို ဝနေတာ။ ဒါပေမယ့် အဲဒီတုန်းက အမယ်ကြီးတို့ရွာလေးက မြို့နဲ့ ၅ မိုင်လောက်ဝေးပြီး ပေတစ်ရာလမ်းဘေးကပ်နေတာမို့ တောမခေါင်ပေမယ့် အိမ်ခြေ ၅ဝ လောက်ရှိတဲ့ရွာပိန်၊ ရွာသိမ်လေးဆိုတော့ မြို့ဇာတ်တောင် တစ်ခါတလေမှ အနိုင်နိုင် ကပ်နိုင်တာရယ်။
မိုးခေါင် လေခေါင် နှစ်ဝါများထပ်ပြီဆိုရင်တော့ မြို့က မင်းသမီးနှစ်လက် ငှား၊ ရွာခံ တစ်ခြမ်းပဲ့ စိန်ကျားပျံဆိုင်းလေး၊ ရွာလူရွှင်တော်လေးနဲ့ ဖျစ်ဖျစ်ညှစ်ညှစ် ရယ်ရတဲ့နှစ်တွေလည်းရှိတယ်။ ဇာတ်ကြီးတွေကိုတော့ အိမ်ခြေ သုံးလေးရာရှိတဲ့ရွာတွေမှ ထည့်နိုင်တာကလား။ ထမင်း ထုပ်နဲ့ လှည်းအုပ်နဲ့ အိမ်ပစ်ယာပစ် ရွာလုံးကျွတ်ကြည့်တာ။ လှည်းဝိုင်းရောက်လို့ ဗွေဆိုးဆိုး နွားစိမ်းချင်းတွေ့ ဝုန်းခနဲ ထခွေ့ရင် သူ့နွား ကိုယ့်နွား ဆွဲ၊ လှည်းပြို ရေဘူးကွဲတော့တာ။
ဆိုတော့ကာ ပွဲဦးကရန် ခုနစ်သံချီကိုဆွယ်...ဆိုတာ  အမယ်ကြီးနဲ့မစိမ်းတဲ့အပြင် သူ့ခေတ်နဲ့သူ့အခါ တရင်းတနှီးကြီးကို ရှိခဲ့တာ။ ဒါပေမယ့် ဘယ်ဇာတ်လာလာ အဲဒီအသံက ပွဲထွက်ခါနီး ၉ နာရီတီးလောက်မှ ကြားရတာ။ တချို့ပွဲက ၉ နာရီကျော်မှထွက်တာလည်းရှိတယ်။ ဇာတ်ကြောဆွဲတာပေါ့။ အဲ မဟုတ်သေးဘူး၊  အဲဒီလိုပြောရင် ရောကုန်မယ်။ ခေတ်လူတွေနားလည်အောင် ပွဲကြောဆွဲတယ်လို့ပြောရမယ်။
အမယ်ကြီး အသက် ၇ဝ ကျော်တော့ အဲဒီ ခုနစ်သံချီက နေမဝင်ခင်က ဆွယ်တယ်။
ဇာတ်ကောင်းလို့လား၊ ပွဲခင်းလူစည်လို့လားဆိုတော့ ခုကာလ ခေတ်ပွဲခင်းဆိုတာကို အမယ်ကြီးက ရယ်ချင်တယ်။ တကယ်။ ရှေးခေတ်က အိမ်ခြေ ၅ဝ လောက်ရှိတဲ့ အမယ်ကြီးတို့ရွာလေးက အိမ်ခြေ ၃ဝဝ နားကပ်လာသလို ရွာဘေးက ပေတစ်ရာလမ်းကလည်း ရေစကြိုအနီးဆုံး မန္တလေးတင် မဆုံးတော့ဘူး။ ဆားလင်းကြီးဘက်က ပတ် ဂန့်ဂေါကနေ ချင်းပြည်ထိပေါက်တယ်။

အင်း ခုနင်က ခုနစ်သံ ချီ ဘယ်ရောက် သွားပတုံး။
အဲ ဟုတ်ပြီ နေမဝင်ခင်က ဆွယ်တယ်။
အမယ်ကြီးတို့အိမ်က ဘုန်းကြီးကျောင်းနဲ့ ဝင်းနံရံပဲခြားတယ်။ ဇာတ်ခုံဆိုတာကလည်း ရှေးခေတ်တုန်းကလို ဝါးနဲ့ တစ်နှစ်တစ်ခါ မဆောက် ကြတော့ဘူး။ လူတစ်ရပ်လောက်မြင့်တဲ့ အုတ်ခုံနဲ့ သွပ်တွေ အကျအနမိုးထားတဲ့ ခေတ်ကာလ ဇာတ်ခုံကြီးက အမယ်ကြီးတို့အိမ်နဲ့ တည့်တည့်ကြီး၊ ဟည်းနေတယ်။ နောက်ဖေးဝင်းနံရံကို ခြေဖျားထောက်တာနဲ့ ဇာတ်စင်နဲ့ပွဲခင်းကို အကုန်မြင်ရတယ်။ မလွယ်ပေါက်ကနေ ခြေလေး ငါးလှမ်း လှမ်းလိုက်တာနဲ့ ပွဲခင်းထဲ ဗျင်းခနဲရောက်အောင်ကို နီးတယ်။ ဆိုတော့ကာ နေမဝင်ခင်က ခုနစ်သံချီဆွယ်နေတာကို အမယ်ကြီး ကြားနေရရုံတင်မဟုတ်ဘူး၊ မြင်ကို မြင်နေရတာ။
+++++++++++++++++++++++++++++++++++++++
“ထမင်းစားတော့မယ်”
စကားအဆုံးမှာ အဘိုးကြီးက ထန်းပက်လက်ကုလားထိုင်ပေါ်ကနေ ထတဲ့ပြီး မီးဖိုချောင်ဘက် သုတ်ခနဲထွက်တယ်။ ဟိုတုန်းက အဲဒီလိုပြောသံကြားတာနဲ့ အမယ်ကြီးက အဘိုးကြီးအရင် ရောက်နှင့်ပြီးသား။ အခုတော့ အတွေးလွန်နေတာရော ရောင်ပြီး တဆစ်ဆစ် ကိုက်နေတဲ့ဒူးနှစ်လုံးကြောင့်ရော အမယ်ကြီး မီးဖိုချောင်ထဲ အရင်မရောက်နိုင်တော့ဘူး။ ငုတ်တုတ်ကုလားထိုင်ပေါ်ကနေ ဒူးနှစ်လုံး လက်နဲ့ဖိ၊ ကျွတ်ကျွတ် စုတ်သံပေး၊ ခပ်ကုန်းကုန်းထပြီးမှ လိုက်ဝင်ရတယ်။ ထင်တဲ့အတိုင်းပဲ။ စားပွဲပေါ်က ဧည့်ကြွင်းဧည့်ကျန်တွေနဲ့ စားနှင့်နေပြီ။ ဟိုတုန်းကအတိုင်း အဘိုးကြီးက ဘာမှမပြောင်းလဲဘူး။ ဗီရိုပုလေးထဲက ဦးချဖယ်ထားတဲ့ဟင်းခွက်တွေ စားပွဲပေါ်ချပေးရင်း “အဘိုးကြီးနှယ် တော့်မလဲ ငယ်ကျင့်က မပျောက်ပါလား၊ စားမယ်ဆိုရင် တစ်ပန်းကန်လောက်က ကုန်နေပြီ၊ ဗီရိုလေးဘာလေး  ဖွင့်ပြုကြည့်ပါဦးတော့လား။ မရှိတဲ့သွားနဲ့ အရိုးအရင်းတွေ တော် ဘယ့်နှယ်ဝါးမတုံး”လို့ မြည်တယ်၊ တွန်တယ်။
အမယ်ကြီး ဖျစ်ဖျစ်မြည်သံကို အဘိုးကြီးက မတုံ့ပြန်ဘူး။ ပါးစောင်ထဲက ဟင်းတုံးကို သွားဖုံးနဲ့ ဖိဝါးနေရလို့လည်းဖြစ်နိုင်တယ်။
“ဘွားနုရေ...ခရုမ ရေ ...”
အိမ်ရှေ့က ခေါ်သံပေါ်လာတော့ အမယ်ကြီး၊ အဘိုးကြီးကို တဖျစ်တောက်တောက် မလုပ်နိုင်တော့ဘူး။ မီးဖိုထဲကနေ အိမ်ရှေ့ပြန်ထွက်ရ ပြန်တယ်။ ရွာပိုင်မီးစက်ကပေးထားတဲ့ အိမ်ထဲက  နှစ်ပေချောင်းနဲ့ လမ်းမီးနှစ်ပေချောင်းက ထင်းထင်းကြီးဝင်းနေပေမယ့် ညရောက်တာနဲ့ အမယ်ကြီး လူလုံးမကွဲတာ ကြာပြီ။
“ဟဲ့ ဘယ်သူ တွေတုံး”လို့ အမယ်ကြီး အသံပေးတော့ “ကျွန်တော်တို့ပါ ဘွားနု၊ ရွှေစင်ဝင်းနဲ့ ဇာနည်ပါ”လို့ ဖြေသံကြားမှ နောက်တိုးသမီးနဲ့ ဇီးကွက်သမီးလို့ စိတ်ကသိတယ်။ မျက်လုံးက မသိလိုက်ဘူး။
“ထွက်သွားပါပကော ဟဲ့။ G.T.C က ဆရာမတွေရော၊ တစ်အုပ်ကြီး မီးလှည့် ကြည့်ကြမတဲ့”
စကားဆုံးတော့ ကလေးမတွေက အိမ်ထဲမဝင်ဘဲ လှည့်ထွက်တယ်။ အလိုတော် ဘောင်းဘီရှည်တွေနဲ့ပါလား။ သူတို့မြင်မှ အိမ်က မြေးမ ဘာဝတ်သွားပါလိမ့်လို့ အမယ်ကြီး ပူပူပင်ပင်တွေးမိပြန်တယ်။
+++++++++++++++++++++++++++++++++++++++++++++++

ခုနစ် သံချီက အဲဒီလို အဲဒီလိုဆွယ်တယ်။
ညနေ သုံးနာရီလောက်ကတည်းက ဘုရားကြီးအာရုံခံတန်ဆောင်းထိပ် ဂေါပကအသံချဲ့စက်က “ဂွီဂွီ ဂစ်တစ် ဂစ်တစ် အလှူခံဌာန စတင်ဖွင့်လှစ်ပါပြီ”ဆိုပြီး တစ်သံချီ စဆွယ်တယ်။ သိပ်မကြာဘူး။ ဘုန်းကြီးကျောင်းအသံချဲ့စက်ကနေ “မီးစက်မောင်းတဲ့ ကိုအောင်မြင့်သန်း၊ ဘုရားနဲ့ကျောင်းက အသစ်ထွန်းမယ့်မီးတွေစမ်းရအောင် စက်ခန်းသော့ယူပြီး အမြန်ပြန်လာခဲ့ပါ”ဆိုပြီး နှစ်သံချီ ဆွယ်တယ်။
ခဏနေတော့ ဇာတ်စင်က “ပွဲငှားကော်မတီလူကြီးမင်းများ ခင်ဗျာ ဇာတ်စင်မှာသုံးဖို့ ဖျာနဲ့ကုလားထိုင်များလိုအပ်နေပါတယ်”ဆိုပြီး သုံးသံချီ ဆွယ်တယ်။ အဲဒီဟာ မဆုံးသေးခင် ဓမ္မာရုံအသံချဲ့စက်က “ဓမ္မစကြာဝတ်အသင်းသူအားလုံး ဓမ္မာရုံထဲကို အမြန်ဆုံးလာခဲ့ကြပါရှင်”ဆိုပြီး လေးသံချီ ဆွယ်တယ်။ အသံမဆုံးတဆုံးမှာ ဥက္ကဋ္ဌအိမ်ကနေ “ဒီနေ့ည ကင်းတွဲများကိုကြေညာပါမယ်။ မောင်ဘယ်သူနဲ့ မောင်ဘယ်ဝါ၊ ဘယ်နှနာရီ”ဆိုပြီး ငါးသံချီဆွယ်ပြန်တယ်။ ငါးသံချီမဆုံးခင် ဒိုးပတ်အဖွဲ့က ပတုံ ပတုံဆိုတဲ့ဒိုးသံနဲ့ “ဦးရွှေရိုး ဒေါ်မိုးကမယ့် ကျွဲကြီးနဲ့သခွားသီး၊ ဒိုးပတ်အဖွဲ့တွေစုံနေပြီ အမြန်ဆုံးလာခဲ့ပါ”ဆိုပြီး ခြောက်သံချီဆွယ်တယ်။
ဆိုတော့ကာ နေမဝင်ခင်ကတည်းက ရွာထဲမှာရော ပွဲခင်းမှာပါ ခုနစ်သံချီရုံတင်မကတော့ဘူး။ ပွဲဦးကရန်က ဆယ့်လေးငါးသံချီကို ချီမယ် ဆွယ်မယ်လို့ အမယ်ကြီးထင်တယ်။
စိတ်က တောရောက်တောင်ရောက်နဲ့ မီးဖိုထဲကအဘိုးကြီးကို အမယ်ကြီး ခဏမေ့သွားတယ်။ သတိရတော့ အဘိုးကြီးက သွားကြားထိုး တံကိုင် ထွက်လာပြီ။ ဒီနှစ် အဘိုးကြီးခမျာ တော်တော်ကျသွားရှာတယ်။ သေလုမျောပါးတစ်ခါဖြစ်တော့ ပစ်လိုက်ရပြီကို အောက်မေ့တာ။ ပွဲနားနီးတော့ ထူထူထောင်ထောင် ပြန်ဖြစ်လာတယ်။ သားတွေ ပြန်လာတတ်တာတွေးပြီး စိတ်ဆောင်သွားတာဖြစ်မယ်လို့ အမယ်ကြီး ထင်မိပြန်တယ်။
ကျောင်းဆရာအဘိုးအိုနဲ့ လယ်သူမအမေအို သင်ပေးလိုက်တဲ့အတန်းပညာတွေနဲ့ သားခြောက်ယောက်လုံး မြို့ပြဘဝမှာ လက်ပစ်ကူးလိုက်၊ ပိုးလိုးပက်လက်မျောလိုက် နေနေကြလေရဲ့။ ရွာမှာကျန်ခဲ့တဲ့သားကြီးက သမီးတစ်ယောက်မွေးပြီး တစ်နှစ်သမီးကတည်းက အမယ်ကြီးတို့လက်အပ်ထားခဲ့တာ ခု လမ်းဗိုလ်ကျောင်းတက်တဲ့ အချိန်ထိပဲ။
ကိုယ်နဲ့ ရွယ်တူတန်းတူတွေလည်း ရွာထဲမှာ သိပ်မကျန်တော့ဘူး။ ဘေးရွာတွေမှာလည်း အမှည့်တဝင်းဝင်း အကင်းတဖြုတ်ဖြုတ်ဆိုတာလို မှည့်ရုံတင်မကတော့ဘူး။ ဝင်းအိနေကြပြီ။ ဆိုတော့ အမယ်ကြီးတို့အိမ်မှာ ဧည့်က ပါးတယ်။
“အဘိုး ကြီး ဆေးသောက်ဖို့ မေ့နေဦးမယ်”
“အင်းပါ အမယ်ကြီးရဲ့ ကျုပ်ချည်းပြောမနေနဲ့။ အမယ်ကြီးလည်း ဒူးနာပျောက်ဆေးသောက်ရဦးမယ်လေ”လို့ပြန်ပြောမှ ဟုတ်ပါကလားလို့ ဆေးကို ပြန်အမှတ်ရတယ်။ ရေနှစ်ခွက်ကို သောက်ရေအိုးထဲက ခပ်၊ အဖုံးပန်းကန်ပြားပေါ်တင်ပေးတော့ အဘိုးကြီးက တစ်ခွက်ယူပြီး အင်္ကျီဘေးအိတ်ထောင်ထဲက ဆေးတစ်တွဲထုတ် ပါးစပ်ထဲပစ်ထည့် ရေနဲ့မော့လိုက်တာ ကွတ်ခနဲ။
အမယ်ကြီးကတော့ အဲလိုမသောက်နိုင်ဘူး။ ခပ်နီနီအလုံး နှစ်လုံးနဲ့ ခပ်ဝါဝါအပြား နှစ်ပြားကို တစ်တောင့်ချင်း တစ်လုံးချင်း ရေနဲ့ရောမျို ရတယ်။ စိတ်ကတော့ မီးလှည့်တန်းဆီ ရောက်နေပြီ။ ပွဲခင်းထဲက လူသံ၊ ဆိုင်ကယ်သံ၊ ကားသံတွေကလည်း ကြွက်ကြွက်ညံနေပြီ။ အဘိုးကြီးကတော့ ထိုင်မိတာနဲ့ ကုလားထိုင်ကျောမှီတော့တာပဲ။
“တော့်မြေးနောက် ကျုပ်လိုက်ဦးမယ်”လို့ပြောတော့ “သူတို့ဆရာမတွေပါနေတာပဲ အမယ်ကြီးရယ်၊ အေးအေးနေစမ်းပါ”လို့ တားပေသိ အမယ်ကြီးကိုက သွားချင်နေတာ။
“ခဏပါတော်၊ ဓမ္မာရုံနားတင်ပါ”လို့ပြောရင်း စကားပြန်တောင်မစောင့်တော့ဘဲ အမယ်ကြီး အိမ်ထဲက ထွက်တယ်။ ပွဲဆီ စိတ်ရောက်တာနဲ့ ဒူးနာကလည်း ပျောက်ချင်ချင်ရယ်၊ နတ်တော်လပြည့်ည လ က ထိန်ထိန်သာနေသလို မီးရောင်တွေနဲ့လမ်းဝါဝါကြီးက အမယ်ကြီးရှေ့မှာ တန်းတန်းကြီး။
ကျောင်းဆီ ပရမ်းပတာမောင်းလာတဲ့ဆိုင်ကယ်တွေကို ဝန်းထရံနားကပ်ကပ်ပြီး ရှောင်ပေးရသေးတာ၊ ဓမ္မာရုံနားရောက်တော့ “ဘွားရော ပွဲလာကြည့်တာလား၊ ခရုမ က ဟိုမှာ”လို့ အိမ်လာတဲ့ဆရာမလေးက နှုတ်ဆက်ရင်းပြတယ်။
ဘုရား ဘုရား မရွှေချောက ဘောင်းဘီရှည်နဲ့ပါလား။ ဆရာမနှစ်ယောက်ကြားထဲဝင်ပြီး ခါးဖက် ရပ်နေတာများ သူငယ်ချင်းတွေကျလို့၊ အိမ်က ကျောင်းဆရာအိုကြီးကို မြင်စမ်းစေချင်တယ်။ မီးလှည့် ရှေ့ပြေးဒိုးပတ်အဖွဲ့ဆီက ဒိုးသံ ပုလွေသံထက် တဒုန်းဒုန်းထော်လာဂျီသံက ရှေ့က ဦးအောင် ရောက်လာတယ်။ ဒီလောက်အသံကျယ်ရင် ကံကြီးမောင် ထော်လာဂျီဖြစ်ရမယ်။ လူတန်းက တရွေ့ရွေ့နဲ့ အမယ်ကြီးတို့နား နီးလာတယ်။ ဒိုးပတ်အဖွဲ့က ကားပေါ် အခံ့သား ထိုင်တီးနေတာပါကလား။ ဦးရွှေရိုးနဲ့ ဒေါ်မိုးအက ကလည်း အဟုတ်သားပါလား။ ဆရာမလေးတွေဆီက ခစ်ခနဲရယ်သံကြားတော့ အမယ်ကြီးပါ ရောယောင်ပြုံးဖြစ်တယ်။
မီးလှည့်လူတန်းကလည်း များလှပါလား။ မှန်း ဒါ ဘယ်သူ့သမီးလဲ။ ဓမ္မာရုံထောင့်ကထွန်းထားတဲ့ နှစ်ပေဖန်ချောင်းနဲ့ မီးခြာထဲက ဖယောင်းတိုင်မီးဝါဝါကို လက်နဲ့ကာပြီး အမယ်ကြီး ကြည့်တယ်။ အလိုတော် ဘောင်းဘီရှည်တွေနဲ့ပါလား။ ဟင် နောက်ကဟာတွေကလည်း စကတ်တွေနဲ့၊ ဒါ ဒါ ရွာဘုရားပွဲ မီးလှည့်တဲ့လား၊ ဘုရား ဘုရား။
အမယ်ကြီး အမြင်မှားသလားလို့ တွေးမိသေးတယ်။  အသက် ၇ဝ ကျော် မှုန်တိမှုန်ဝါးဆိုပေမယ့် ထဘီနဲ့စကတ်၊ စကတ်နဲ့ဘောင်းဘီကိုတော့ မမြင်သာအောင် မျက်လုံးကမမွဲသေးပါဘူး။ ဒိုးပတ်အဖွဲ့က ကျောင်းမုခ်ဝ ရောက်နေပြီ။ နောက်ကကျန်ခဲ့တဲ့ အက ကားကို စောင့်ရဦးမတဲ့။ မှန်မှန်သွားနေတဲ့လူတန်းက ရပ်သွားပြန်ရော။
လောကမှန်ကင်းဘုရားကြီးကတော့ သူ့ဆီ မီးလာလှူတဲ့ ဘောင်းဘီတလွှားလွှား၊ စကတ်တကားကားနဲ့ ခေတ်ကာလသားသမီးတွေကို ကရုဏာတော်ရှေ့ထား ပြုံးကြည့်နေမလားလို့ အမယ်ကြီးတွေးမိတော့ ဘုရားရှင်ကို သည်းခံတော် မူပါဘုရား၊ ခွင့်လွှတ်တော်မူပါဘုရားလို့ စိတ်ထဲက အကြိမ်ကြိမ်လက်အုပ်ချီမိတယ်။
ခုနစ် သံချီက အဲဒီလို အဲဒီလိုဆွယ်တယ်။ ပွဲဦး ကရန် ပေါ့။
+++++++++++++++++++++++++++++++++++++++++++++++
ရွာတောင်ဖျား ကျန်နေခဲ့တဲ့ အကကား ရောက်တဲ့အထိစောင့်နေမှာဆိုတော့ ရွာပတ်လာတဲ့ မရွှေချောတွေ ညောင်းလို့ထင်ရဲ့၊ မီးခြာတွေကိုင် ငုတ်တုတ်လေးတွေ ထိုင်ကြတယ်။ လက်က မေ့ပြီး စောင်းမိရင် ပူနေတဲ့မှိုင်းခံစက္ကူက ဟုန်းခနဲ မီးထတောက်တာဆိုတော့ မီးတောက် တဲ့နေရာက လန့်အော်သံ၊ ရယ်သံတွေကြားထဲ အမယ်ကြီးစိတ်တွေ ပြန်ပြီးနုပျိုလာပြန်ရော။
ထိုင်နေလိုက်ကြတာများ ဒူးလေးတွေကျုံ့လို့၊ မီးရောင်အောက်မှာ ခြေသလုံးသားဖွေးဖွေးက အထင်းသား၊ စကတ်တိုနံ့နံ့ကို ဆွဲဆွဲဖုံးနေ ကြပေမယ့် အမယ်ကြီး ကြက်သီးတွေတဖြန်းဖြန်း ထသွားတယ်။ ရာသီကလည်း အေးတဲ့ရာသီကိုး။ ဒီထဲမှာ ကိုယ့်သွေးကိုယ့်သားက ဘယ်နှယောက်ပါမတုံးလို့တွေးမိတော့ အတွေးက မလုံမခြုံဖြစ်နေပြန်ရော။
“ဘွားနု အလှည့်လာကြည့်တာလား”ဆိုတဲ့အသံနဲ့ အနားလာရပ်တဲ့တစ်ယောက်ကို မီးရောင် လက်နဲ့ကာပြီး  မနည်းကြည့်ယူရတယ်။ ဆံပင်တွေဖြောင့်ထားလိုက်တာများ စင်းလို့။ တော်ပါသေးရဲ့ ထဘီတွေပြန်တွေ့လို့။ “အေးဟဲ့ ညည်းကဘယ်သူတုံး”လို့ မေးယူရတယ်။ “ဘွားနုကလည်း ကိုရွှေမောင်းသမီး ဆွေကြည်မလေ။ ကိုယ့်မြေးကို မမှတ်မိဘူးလား”တဲ့။
“ဟဲ့ နင်က ဆံပင်တွေ ပြောင်းဖူးမွေးရောင်ဆိုးထားတာကိုး”လို့ပြောတော့ ကလေးမတွေရယ်သံက အုန်းအုန်းထလို့။ ကိုယ့်သွေးသားတွေ ထဘီနဲ့ ပြန်တွေ့ရတော့ အမယ်ကြီး စိတ်တစ်ခြမ်းလောက် သက်သာသွားတယ်။
“ခရုမ ငါ့မီးခြာ ကိုင်ပေးစမ်း၊ ထဘီပြင်ဝတ်မလို့”ဆိုတော့ အမယ်ကြီးရှေ့နားက ဆရာမလေးကပြုံးရင်း လှမ်းကူယူတယ်။ ဟင်း ထဘီကလည်း ကွင်းကျဉ်းကျဉ်းနဲ့။ “ဟဲ့ အင်္ဂလိပ်မရဲ့ နင့်ထဘီက အထက်ဆင့်လည်း မပါပါလား”လို့ အမယ်ကြီးစပ်စုတော့ “ဘွားနုကလည်း ဒါက ထဘီစကတ်” တဲ့။ ခြေသလုံးနားကအကွဲကြီးက ဒူးနားထိရောက်နေတာဆိုတော့ အမယ်ကြီး ဘုရား တစ်ခါတမိပြန်တယ်။
အကကား ရှေ့ရောက်လာတော့ မီးတန်းက ကျောင်းထဲ တရွေ့ရွေ့ဝင်သွားကြပြီ။ အက ကား နောက်မြှီးဖျားက ဆောင်းဘောက်စ်ဆိုတာကြီးနဲ့ အမယ်ကြီးရပ်နေတဲ့နေရာက တန်းတန်းကြီး၊ ကြည့်ရတော့မယ်၊ တစ်ပင်တိုင်လား၊ ယိမ်းလားလို့တွေးနေတုန်း (မင်္ဂလာပါ)ဆိုတဲ့ နက်ကြောကြော စူးရှရှအော်သံကြီးက  အမယ်ကြီးရဲ့ပိန်ပါးပါးကိုယ်လုံးလေးကို ပစ်ဆောင့်လိုက်တာ နောက်လန်ကျသွားမတတ်ဘဲ။

နားတစ် ဖက်ဖောက်၊ နားဆွဲတန်းလန်းနဲ့ ဘုမသားက ကုန်းကုန်းကြီးအော်နေတာ။ နောက်က ငါးယောက်တန်းရပ်နေတဲ့ မရွှေချောတွေက ပေါင်လယ်လောက်စကတ်တွေနဲ့။ အောက်က ပရိသတ်ကမော့ကြည့်နေရတာဆိုတော့ ဘယ်နှကြိမ်မြောက်မှန်းမသိတဲ့ဘုရားကို အမယ်ကြီး တမိပြန်တယ်။
အနားကလှည့်ထွက်တော့ “ဘွား ပြန်တော့မလား၊ သမီးတို့ လိုက်ပို့ပေးမယ်”လို့ပြောတဲ့ ဆရာမလေးတွေကို “ရပါတယ်မြေးတို့ရဲ့၊ ကြည့်ကြ ကြည့်ကြ”လို့ပြောပြီး ခြေလှမ်းစရုံရှိသေးတယ်။ ပွစိပွစိ ဗျစ်တောက်ဗျစ်တောက် ရန်ဖြစ်သလိုထွက်လာတဲ့သီချင်းသံကို အမယ်ကြီး ဒူးနာနေတဲ့ ခြေလှမ်းတွေနဲ့လွတ်အောင်မပြေးနိုင် မရှောင်နိုင်တော့ဘူး။
တည့်တည့်ကြီးလာမှန်တာဆိုတော့ အမယ်ကြီး ကတုန်ကယင်တွေကိုဖြစ်ရော။
ပွဲဦး ကရန် ခုနစ် သံချီက အဲဒီလို...အဲဒီလို...ဆွယ် တယ်။
++++++++++++++++++++++++++++++++++++++++++++++
အိမ်ထဲဝင်တော့ အဘိုးကြီးက ပက်လက်ကုလားထိုင်မှာ ငုတ်တုတ်ပဲ။ ရင်တုန်ပြေအောင် ရေတစ်ခွက်ကို အမယ်ကြီး အမြန်ခပ်သောက လိုက် ရတယ်။
“မီးလှည့်က စည်ရဲ့လားအမယ်ကြီးရဲ့”တဲ့။
“စည်ပါ့တော် စည်ပါ့၊ ဒူးအောက် စကတ်တွေရော၊ ဘောင်းဘီတိုရှည်တွေရော၊ ထဘီ မမြင်ရအောင်ကို စည်တယ်”လို့ဖြေတော့ အဘိုးကြီး ဆီကရယ်သံထွက်လာတယ်။
“ရယ်မနေနဲ့၊ တော့်မြေးတွေလည်းပါတယ်။ တော့်တပည့်တွေမွေးထားတဲ့ဟာတွေချည်းပဲ”လို့ အငေါ်တူးသံနဲ့ပြောတော့ ၈ဝ နားနီး ကျောင်းဆရာအိုကြီးဆီက“ဟေ” ခနဲ ထွက်လာတဲ့အသံကအကျယ်ကြီး၊ ဒီတစ်ခါတော့ အမယ်ကြီးမလန့်တော့ဘူး။
အဘိုးကြီးခမျာ ဘာသံမှ ဆက်မထွက်နိုင်ဘဲ ငူငူကြီးငေးနေတယ်။ အမယ်ကြီးစကားနဲ့မြင်ကွင်းကို တိုတိုလေးတွေးနေတာဖြစ်နိုင်သလို ရန်ကုန်၊ မန္တလေးက မြေးတွေအတွက် ပူပူပင်ပင်အတွေးတွေ ရှည်ထွက်နေတာလည်းဖြစ်နိုင်တယ်။
အဘိုးကြီးက အဲဒီလို တနုံ့နုံ့တွေးပူတတ်တယ်။ ပညာတတ်တွေဆိုတော့ ခေါင်းတင် မဟုတ်ဘူး၊ တစ်ကိုယ်လုံးပါပူတတ်တာ အမယ်ကြီးက သိနေတယ်။ ပြောပြီးမှ မှားပြန်ပကောရယ်လို့ နောင်တ ရမလိုရှိသေး “ဒီနှစ် နင့်သားနင့်မြေးတွေ တစ်ယောက်မှပေါ်မလာဘူးနော် အမယ်ကြီး”တဲ့။
စလာပြီ၊ စလာပြီ။ သူနဲ့မဆိုင်သလိုဘဲ။ နင့်သားနင့်မြေးတဲ့။ ခါတိုင်းလို သားတွေတစ်ယောက်မှပေါ်မလာတာကို အဘိုးကြီး စကားဦး သန်းတော့ အမယ်ကြီးပါငြိမ်ကျသွားတယ်။
ပွဲခင်းထဲကအသံမျိုးစုံကိုကျော်ပြီး အမယ်ကြီး အတွေးတွေက အတိတ်ငယ်ဘဝတွေဆီ ရိပ်ရိပ်လေးပြန်ပြေးတယ်။ အဲဒီတုန်းက...
++++++++++++++++++++++++++++++++++++++++++++++

အမယ်ကြီတို့မျိုးရိုးက သီပေါမင်းနဲ့တိုက်ရိုက်မပတ်သက်ပေမယ့် အဲဒီခေတ်က မှူးကြီးမတ်ကြီးတစ်ဦးရဲ့ အနွယ်တော်တွေဆိုတာ လောက်တော့ ငယ်ဘဝက ဘကြီးပြောသံကြားဖူးတယ်။ အမယ်ကြီးတို့ဘကြီးက အင်္ဂလိပ်လက်ထက်က ဆိုးပေ့ဆိုတဲ့ရွာ ခုနစ်ရွာကိုအုပ်ချုပ်ရတဲ့ နှစ်လုံးပြူးဆုရသူကြီး ဦးဘအေးဆိုတာလည်း ကောင်းကောင်းမှတ်မိတယ်။ အဲဒီအကြောင်း မြေးတွေရှေ့မပြောရဲဘူး။ ရှက်သတဲ့။
ဘကြီးကို မြင်လည်းမြင်ဖူးလိုက်တယ်။ သျှောင်တစောင်းနဲ့၊ ပေါင်မှာလည်း ထိုးကွင်းမင်ကြောင်တွေ မည်းခဲနေတယ်။ ပဒိုင်းခြုံရွာကနေ မြင်းညိုကြီးစီးစီးပြီး သူ့သမီးရှိရာ အမယ်ကြီးတို့ရွာကို လာတတ်တယ်။
အမယ်ကြီးတို့အဖေက ပေါင်လောင်ကန်ဆိုတဲ့ ဒီဘက်ရွာက မြေယာတွေ လက်ညှိုးထိုးမလွဲတဲ့မြေပိုင်ရှင်သား၊ ခုနစ်ရွာပိုင် နှစ်လုံးပြူးကိုင်သူကြီးသမီးနဲ့ ဒီဘက်ရွာက ဘန်ကောက်လုံချည်တလွှားလွှား အမယ်ကြီးတို့အဖေနဲ့ညားပြီး အမယ်ကြီးကိုမွေးခဲ့တာ။
တောသူဌေးတွေပေါ့။ သူ့ခေတ်နဲ့သူ့အခါ မင်းပေါက်စိုးပေါက်လို့လည်း ပြောလို့ရတယ်။ အမယ်ကြီးတို့က ရွာနေရပ်ထိုင်ကွမ်းတောင်ကိုင်၊ အဘိုးကြီးဇာတိက အောက်ပြည်အောက်ရွာက တော်တော်ကြီးဝေးတာ။ ခုနစ်တန်းအောင်ရင် ကျောင်းဆရာဖြစ်တဲ့ခေတ်မှာ လခ ၁ဝဝ မကျော်တဲ့ကျောင်းဆရာပေါက်စနဘဝနဲ့ ရွာကျောင်းရောက်လာရာကနေ အမယ်ကြီးနဲ့ နဖူးစာကျောင်းလည်ခဲ့တာ။
အမယ်ကြီးက တောသူ အညာသူဆိုပေမယ့် အသားက ဖြူနုနေတာ။ အရပ်ကလည်း ခုခေတ် မော်ဒယ်လ်တွေဆိုတာလောက်တော့ ပျင်းတယ်။ ခေတ်ပညာမတတ် ဘုန်းကြီးကျောင်းထွက်ဆိုပေမယ့် အမယ်ကြီးစတိုင်လ်က ကျောင်းဆရာလေးအသည်းကို သင်ပုန်းကြီးမှာ မြေဖြူနဲ့ထင်အောင်ခြစ်သလို ချစ်နိုင်တယ်။
အဘိုးကြီးခမျာ အစက ရွံ့တွန့်တွန့်ရယ်၊ တစ်ရာမကျော်တဲ့သူ့လစာက တောသူဌေးအိမ်က စာရင်းငှားလစာလောက်ရှိတာဆိုတော့ အမယ်ကြီးနား တော်တော်နဲ့မကပ်ရဲရှာဘူး။ တံကောက်အောက်ရောက်နေတဲ့ ဆံပင်အရှည်ကြီးနဲ့အမယ်ကြီးကို ဘေးရွာက သူကြီးသားတွေ ဝိုင်းနေတာလည်း သီဟတင်စိုး တော်လှန်ရေးကားထဲက အတိုင်းပေါ့။
အမြော်အမြင်ကြီးတဲ့ အမယ်ကြီးတို့အဖေက သူ့မြေးမြစ်တွေ ပညာတတ်တွေဖြစ်၊ လယ်တောယာတောပစ်အောင် အဘိုးကြီးကို ဆွဲထား လိုက်တာ။ မင်္ဂလာဆောင်တဲ့နေ့က အဖေကြီးက ပြောင်ပြောင်ပဲ။
“ကျောင်းဆရာပေါက်စရဲ့၊ မင်းလခက မက်လောက်စက်လောက်တော့ မရှိပေဘူး။ ဒါပေသိ ငါ့မျိုးဆက်ကို ပြောင်းပစ်ချင်လို့ ငါ့သမီးကို မင်းလက်အပ်သယ်။ ငါ့မြေးတွေကို ပညာတတ်တွေဖြစ်အောင်လုပ်ပေတော့” လို့ပြောတော့ အဲဒီတုန်းက အဘိုးကြီးခမျာ ခေါင်းကြီးတွင်တွင် ငုံ့ပြီး မျက်နှာကြီး ရဲပတောင်းခတ်နေတာပေါ့။
တွေးရင်းနဲ့ အမယ်ကြီး ရင်တွေခုန်ပြီး အဘိုးကြီးကို မလုံမလဲမော့ကြည့်တယ်။ ဇာတ်ကတော့ ဘုရားကန်တော့ခန်းနဲ့ စထွက်နေပြီ။
“အမယ်ကြီး”
တစ်ချိန်လုံးငြိမ်နေတဲ့အဘိုးကြီးခေါ်သံကြားမှ အမယ်ကြီးအတွေးတွေ ရပ်သွားတယ်။ မီးရောင်က ဝါ နေပေမယ့် အဘိုးကြီးမျက်ဝန်းတွေ ဝေ့သီကြည်နေတယ်လို့လည်း ထင်လိုက်မိတယ်။
“အမယ်ကြီး၊ ဒီညရော ပွဲကြည့်ဦးမှာလား”
အလိုတော်၊ အထူးအဆန်းပါကလား၊ တစ်သက်နဲ့တစ်ကိုယ် မကြားဖူးခဲ့တဲ့စကား။
“ကြည့်လည်း ရတယ်။ မကြည့်လည်း ရတာပေါ့တော်။ အိမ်ကထွက် ဇာတ်စင်ရောက်တဲ့ဟာ” လို့ပြောတော့ “ကျုပ်လည်း ကြည့်ချင်တယ် အမယ်ကြီးရယ်”တဲ့။ ကျားသားမိုးကြိုး နားရှိလို့သာကြားရတယ်။ တစ်သက်လုံး အိမ်စောင့်ကြက်နှင်နေခဲ့သူက အခုမှ ပွဲကြည့်ချင်ပြန်သတဲ့။ တစ်သက်တစ်ကိုယ် မကြားဖူးတဲ့စကားကို ဆိုပါရောလား။
“အခု မဟုတ်ပါဘူးအမယ်ကြီးရဲ့ နှစ်ပါးသွားနဲ့ နောက်ပိုင်းမှပါ။ အမယ်ကြီးနဲ့ တစ်ခါမှပွဲမကြည့်ဖူးတော့ ကြည့်ဖူးတယ်ရှိအောင်လို့”
စကားဆုံးတော့ ပက်လက်ကုလားထိုင်ပေါ် ကျောပြန်မှီတယ်။ တစ်ဘဝစာ နားခိုခဲ့တဲ့ရင်ခွင်ရိုးရိုးကြီး၊ ကွမ်းဆေးအရက် လောင်းကစား မဖက်ဘဲ ရေနွေးတောင် ဖျားမှနာမှ သောက်တယ်။ ရမယ့်ရတော့ အဆုတ်ရောဂါတဲ့။ ဆရာဝန်တောင် မျက်စိလည်တယ်။ “ဘာအလုပ် လုပ်သလဲ”လို့ ဆရာဝန်မေးတော့ “ကျောင်းဆရာ”လို့ ဝင့်ဝင့်ကြွားကြွားဖြေရှာတယ်။ တစ်ဘဝစာ ရေးခဲ့ဖျက်ခဲ့တဲ့မြေဖြူမှုန့်တွေလေ။   ကြောက်သလားဆိုတော့ ဆောင်းတွင်းရောက်မှာ အမယ်ကြီးကြောက်တယ်။ အဘိုးကြီးကို မကြည့်ရက်လို့။
ပွဲကြည့်ချင်ပြန် သတဲ့။ “ပွဲက ခုမှ စထွက်တာပါတော် နှစ်ပါးသွားနောက်ပိုင်းဆိုတာ မိုးလင်းပိုင်းမှ။ အိပ်ချင် အိပ်လိုက်ဦး၊ ပြဇာတ်ပြီးမှ နှိုးမယ်” ဆိုတော့ ယဲ့ယဲ့လေးပြုံးတယ်။
+++++++++++++++++++++++++++++++++++++++++++
ဇာတ်က ချောက်ဇာတ်၊ မြို့ခံမဟုတ်ဘဲ ဇာတ်စိမ်းဆိုတော့ ဘေးရွာတွေနဲ့ စက်မှုဇုန်ပရိသတ်က ပြုံကျလာတယ်။ အမယ်ကြီးခမျာ လူကြားသူကြား နင်းကန်တိုးနေတာတောင် အလှူခံရှိတဲ့ ဘုရားတန်ဆောင်းထဲ တော်တော်နဲ့မရောက်နိုင်ဘူး။
ပွဲခင်းတစ်ခုလုံးလည်း ရွစိရွစိ အသက်ဝင်နေပြီ။ အကြော်ဆိုင်ကညှော်နံ့တွေကလည်း အမယ်ကြီးကိုဆီးတယ်၊ ကြိုတယ်။ (စကတ်လေးတွေ ဘောင်းဘီလေးတွေအတွက်) ခွင့်လွှတ်တော်မူပါလို့ အကြိမ်ကြိမ်တောင်းပန်ပြီးမှ ဦးချတယ်။
စိတ်က အဘိုးကြီးဆီ ရောက်သွားပြန်ရော။
ချွေးခံအင်္ကျီအနားစထဲက ကုတ်ကတ်ချန်ထားတဲ့ ၅ဝဝဝ တန်တစ်ရွက်ကိုထုတ် ဖြတ်ပိုင်းရေးတဲ့စားပွဲပေါ် ချပေးတော့ တစ်ဝမ်းကွဲမြေးက ရေးရင်းနဲ့ “အဘမြ နေကောင်းပလား ဘွားနု”တဲ့။ မေးဖော်ရသေးတယ်။
“အေး...ကောင်းပ ဟဲ့”လို့ဖြေရင်း ဘုရားထဲကထွက်တော့ ပိန်ပါးပါးအမယ်ကြီးကိုယ်လုံးလေး လူတွေကြား ပြားချပ်သွားပြန်ရော။ မြေးတွေထိုင်တဲ့ခုတင်နားရောက်တော့ “ဘွား”ဆိုပြီး ခရုမက အသံပေးတယ်။ “ဘွား လာလာထိုင်”ဆိုပြီး ဆရာမလေးတွေက ခရီးဦးကြိုတော့ စိတ်နှယ် ဘယ်နေလိမ့်မတုံး။ အဘိုးကြီးဆီ နောက်ဆံတငင်ငင်နဲ့ အဘိုးကြီးနဲ့ပွဲ မဲခွဲနေတုန်း “ယခုတစ်ဖန် လာရောက်လှူဒါန်းသွားတဲ့ ကုသိုလ်ရှင်ကြီးများကတော့ ကျောင်းအုပ်ဆရာဟောင်းကြီးဦးမြချစ်နဲ့ ဘွားလေးတင်နုမိသားစုမှလာရောက်ပြီးသကာလ အလှူတော်ငွေ ၅ဝဝဝ ကျပ်ပါဘုရား”ဆိုတဲ့အော်သံဆုံးတော့ ဘေးက မြေးမက ဖျတ်ခနဲ အမယ်ကြီးကိုလှည့်ကြည့်တယ်။
မုန့်ဖိုးပေးဆိုတဲ့မျက်နှာနဲ့။ ဇာတ်စင်ပေါ်မှာတော့ မြန်မာသံစတိတ်ခ်ျရှိုး စထွက်နေပြီ။
ဒီလောက်ဆို မဆိုးသေးဘူး။ မြန်မာဝတ်စုံနဲ့။ သီချင်းတွေက အမယ်ကြီးနဲ့မရင်းနှီးပေမယ့် မြန်မာသီချင်းမှန်းကောင်းကောင်းသိတယ်။ နားထောင်ရတာ လိပ်ပတ်လည်သေးတယ်။ တစ်ခုကောင်းတာက လူနံ့တွေ ထောင်းထောင်းထမနေပြန်ဘူး။ ဗလာဇာတ်မို့ ဘုရားပွဲအနံ့အသက်က တစ်ခါတည်း နတ်ပြည်များ တက်လေရော့လားလို့ အမယ်ကြီး ဉာဏ်မိသလိုတွေးသေးတယ်။
အောင်မယ်...ဒီတစ်ခါ ပြဇာတ်မင်းသမီး အလှည့်တဲ့။ အမယ်ကြီးအကြည့်တွေ ဇာတ်စင်က မခွာတော့ဘူး။ လူမမြင်ရသေးဘူး။ အသံက အရင် ကြားနေရတာ။ ဘာတဲ့...။
xxx ညိုပြာပြာxxx လတာပြင်ခြေရင်းxxx လှိုင်းတက်ရာ ဗေဒါတက်xxx လှိုင်း သက်ရာဆင်းxxxတဲ့။ အမယ်ကြီး လည်ပင်း လက်တဆစ်လောက် ရှည်သွားတယ်။ ဒါ အဘိုးကြီးကြိုက်တဲ့ သီချင်းပါလား။
မင်းသမီးအသံကကြည်မြနေသလို အောက်ကပရိသတ်လည်း ငြိမ်ကြသွားတယ်။ မြန်မာသံကို ဘာခံနိုင်လိမ့်မတုံး။ တုတ်တုတ်တောင် မလှုပ်ကြဘူး။ စင်း လို့၊ ဘယ်သူမှမလှုပ်ပေမယ့် အမယ်ကြီးလှုပ်လာတယ်။  အစက ရောက်သခိုက် အော်ပရာလေးပြီးမှပြန်မဟဲ့ စိတ်ကူးတာ။ အဘိုးကြီးကြိုက်တဲ့သီချင်းသံကြားတော့ အမယ်ကြီးလည်း မခံနိုင်ဘူး။ အိမ်ဘက် ပြန်ကူးလိုက်ရတယ်။
အဘိုးကြီးကတော့ ကုလားထိုင်မှာပက်လက်ပါပဲ။ ဆေးရှိန်နဲ့ မှိန်းနေသလား။ စောင်တစ်ထည်ယူပြီးခြုံပေးတော့ ခြေတွေလက်တွေက အပြင်ထွက်နေပြန်ရော။ တစ်သက်စာမြေဖြူကိုင်ခဲ့တဲ့လက်တွေက ခုတော့ အရိုးပြိုင်းပြိုင်းထပြီး လက်ခုံမှာသွေးကြောဖုဖုတွေ ထင်းနေတယ်။ လက်နှစ်ဖက်ကို စောင်ထဲ အသာသွင်းပေးပြီးတော့ အဘိုးကြီးကို အမယ်ကြီး တစိမ့်စိမ့်ငေးနေမိပြန်ရော။

++++++++++++++++++++++++++++++++++++++++++++++++++++++
ရွာသမိုင်းတလျှောက် ဆရာမြ၊ ဆရာချစ်နဲ့ပီတိကိုသာ စားခဲ့ရှာတဲ့အဘိုးကြီး၊ အလံနီ၊ အလံဖြူခေတ်တွေကိုဖြတ်၊ အုပ်စုဥက္ကဋ္ဌ၊ သမဥက္ကဋ္ဌ တာဝန်တွေနဲ့ ရပ်ရွာအကျိုးသယ်ပိုးခဲ့ရှာသူကြီးခမျာ ခုတော့ ကုလားထိုင်မှာပက်လက်။
ပါတီမှာလည်း တင်းပြည့်ပြန်သတဲ့။ အဲဒီနေ့က“အဘိုးကြီးနှယ် နွားကြိုးမကိုင်တတ်၊ ထယ်မထိုး တတ်၊ ထွန်မလှည့်တတ်တဲ့ တော်က ဘယ့်နှယ် တင်းပြည့်သတုံး။ ကျုပ်သာဆို ပုတ်ပါပြည့်မယ်ထင်တယ်”လို့ အမယ်ကြီးပြောတော့ အဘိုးကြီးရယ်တာ မျက်ရည်များတောင် ထွက်ကရော။
“ဟုတ်တာပေါ့၊ အမယ်ကြီးရဲ့ ခေါင်းဆောင်ကြီးတွေ အဲသဟာမျိုးစဉ်းစားမိဖို့ ကောင်းတာပေါ့”ဆိုပြီး ထပ်ရယ်တာ တော်တော်နဲ့မရပ်ဘူး။ အဘိုးကြီးနှယ် ဘယ့်နှယ် ရယ်နေသတုံးလို့ အမယ်ကြီးတွေးတယ်။ ဉာဏ်က မမီပြန်ဘူး။ အရေးမကြီးတဲ့ဟာ နေပစီဆိုပြီး အသာထားလိုက်ရ တာပေါ့။
စာရေးလောက်တောင် အိမ်တစ်ဆောင်မီးတစ်ပြောင်ဖြစ်တဲ့ခေတ်မှာ ဆိုရှယ်လစ်ခေတ်ကြီးကို တာဝန်ကျေတဲ့တင်းပြည့်ကြီးခမျာ သစ်သားရေဒီယိုတစ်လုံးပဲ စီးပွားဖြစ်တယ်။ အဲသဟာမျိုးဆိုတော့ ရွာရပ်က ငုံထားမတတ်ချစ်တယ်။ တုန်နေအောင် ရိုသေတယ်။
“ရွှေနန်းတော်ရဲ့ မြူးကြွကြွစတိတ်ခ်ျရှိုးအစီအစဉ် စတင်ပါပြီ”ဆိုတဲ့အသံအဆုံး တအုန်းအုန်းအသံကြီးတွေက လေးထောင့်ဗီရိုလောက် ဟာကြီးတွေထဲကနေ ကဆုန်စိုင်းပြီး အမယ်ကြီး အတွေးတွေကို တက်နင်းလေမှ ဖုတ်ဖက်ခါပြန်ထရတယ်။ အော်ဟံ ဟစ်သံ (ပရိသတ်ကြီး ...မင်္ဂလာပါ)ဆိုတဲ့ အသံထိတ်တုံးက  အမယ်ကြီးအတွေးတွေကို သော့ခတ်ပစ်တယ်။ ခုတော့ ခုနစ်သံချီတောင် ဘယ်ရောက်ကုန်မှန်း မသိတော့ဘူး။
“ပွက် ပွက်ညံနေပါပကော အမယ်ကြီးရဲ့”
အဘိုးကြီးဆီက အသံထွက်လာမှ သူ့ခမျာလန့်နိုးပါပကောရယ်လို့ သတိထားဖြစ်တယ်။
“အဲသဟာကြောင့်ပြောတာပေါ့ အဘိုးကြီးရဲ့။ ခုနေသွားရင် လူနင်းခံရမှာကျိန်းသေတယ်။ နှစ်ပါးသွား စမှ သွားရအောင်”ဆိုတော့ “အေး အေး”ဆိုပြီး ကျောပြန်မှီပြန်ရော။
စောင်ထဲကထွက်နေတဲ့ခြေထောက်ကို အမယ်ကြီးက ခြေအိတ်စွပ်ပေးတော့ အဘိုးကြီးက မြိန့်မြိန့်ကြီးပြုံးတယ်။ မျက်နှာတင် မဟုတ်ဘူး၊ ရင်ဘတ်ကြီးပါ နိမ့်လိုက်မြင့်လိုက် ပြုံးတယ်။ အမယ်ကြီးအတွေးတွေက သားခုနစ်ယောက်ဆီ ခုနစ်သံချီပြီးပြေးပြန်ရော။ အတွေးတွေက မွားတားတားကနေ ရိုးရိုးအေးအေး ကျောင်းဆရာကြီး အသက်ကြီးမှ အမှုတွေကြီးရတဲ့နေရာမှာရပ်တော့ စိတ်ထဲမှာဖျဉ်းခနဲ။
(အရုဏ်ဦးက ကြယ်နီပြာကဗျာ သင်လို့တဲ့)
တစ်ပတ် ၁ဝ ရက် လောက် စစ်လားဆေးလား အလုပ်ခံရသေးတယ်။ တချို့က ပြေပြေလည်လည်၊ တချို့က ငေါက်လားငမ်းလားကို မေးကြတာ။ ဘယ်လိုမေးမေး အဘိုးကြီးက တစ်ခုတည်း ထပ်ကာထပ်ကာဖြေတယ်။ “ဒီကဗျာကို ငါ ကျောင်းဆရာပေါက်စန ဘဝကတည်းက သင်ခဲ့တာ။ ဒီ ကဗျာသင်ပြီး အရာရှိကြီးတွေဖြစ်ကုန်တဲ့ငါ့တပည့်တွေ အများကြီးရှိတယ်”တဲ့။
နေ့လား၊ ညလား၊ ၉ နှစ်လား၊ ၁ဝ နှစ်လားတွေတောင် ဖြစ်လာတယ်။
ဘုရားမ သလား၊ သား မသလား မသိဘူး။ အလတ်ကောင် အိမ်ဝင်လာတုန်း စစ်လားဆေးလားတွေနဲ့ တွေ့ဖြစ်ကြတော့ “ဒါ ကျွန်တော့် အဖေလေ၊ ခင်ဗျားတို့ မသိဘူးလား”ဆိုတာလေးနဲ့တင် ၉ နှစ် ၁ဝ နှစ် ရောဂါတွေက  အုံဖွဆိုမန်းလိုက်သလို ပျောက်ကုန်တယ်။
တစ်ပူအေးလို့ ပြီးပလားမှတ်တယ်။ မပြီးသေးဘူး။ သားကြီးအိမ်လာတော့ အလတ်ကောင်က “အစ်ကို မင်းအရင်အလုပ်တွေ လုပ်တုန်းလား” တဲ့။ အကြီးလူက ခပ်အေးအေးဖြေတယ်။ “အေး”တစ်လုံးတည်း။ “မင်း မိန်းမနဲ့ကလေးတွေ မသနားဘူးလား”တဲ့။ “ငါ လူတွေအကုန်လုံးကို သနားတယ်”လို့ အကြီးလူကပြန်ပြောတော့ အမယ်ကြီးနားမလည်တဲ့စကားတွေပြောပြီး ညီအစ်ကိုနှစ်ယောက်စကားတွေများ နပန်း ထလုံးတယ်။ နှစ်လုံးပြူးဆုရ သူကြီးဘအေးရဲ့မြေးမပဲ။ ဘယ်နေ မတုံး။ အမယ်ကြီး ငယ်ဇတွေ ပြတဲ့ပြီး လေးဆယ်ကျော် ၅ဝ နားနီး သားတွေကို ထတဲ့တီးလိုက်တာ ဝါးခြမ်းပြားကျိုးမှ ရပ်တယ်။ ဘာပြောတယ်မှတ်တုံး၊ “အရသာရှိလိုက်တာ အစ်မရာ၊ အစ်မရိုက်တာမခံရတာ ကြာပြီဗျ”တဲ့။
ကလေးဘဝတုန်းက ကျောင်းဘောလုံးပွဲမှာအဲဒီလိုဖြစ်လို့ နွားကန်ကျိုးအောင် တစ်ခါရိုက်ဖူးတယ်။ ညီအစ်ကိုနှစ်ယောက် တစ်သင်းတည်း မကျဘူး။ တစ်ယောက်က အစိမ်းအသင်း ခေါင်းဆောင်၊ တစ်ယောက်က အနီအသင်း ခေါင်းဆောင်။ ဘောလုံးကွင်းထဲတင် သတ်ကုန်ကြတော့ ဖအေကျောင်းဆရာက ပြုံးပြုံးကြီး။ အမယ်ကြီးက နှစ်ကောင်လုံးဆွဲခေါ်ပြီး အိမ်ကျမှ စိတ်ကြိုက်တွယ်တာ။
“မှတ်ပလား၊ ငါ့ရှေ့မှာ  ဟိုဟာတွေဒီဟာတွေ လာမလုပ်နဲ့။ အစိမ်းတွေ၊ အနီတွေ လာမလုပ်နဲ့။ ဒီမြေဒီရေမှာ ဒီဗိုက်ကမွေးမှတော့ သွေးပေါ့ သားပေါ့။ အဲသဟာထက်အရေးကြီးတာ ဘာရှိသတုံး။ ပညာတွေတတ်ပါရက်နဲ့ ဒီလောက်တောင် မတွက်တတ်မချက်တတ်ဘူးလား။ ဦးသောဘိတကျောင်းထွက် အေဘီစီဒီမတတ်တဲ့ ငါအမေအိုတောင် တွက်တတ်ချက်တတ်တယ်”ဆိုပြီးတော့ တွယ်တာ။ အလတ်ကောင်က “အဖေကမှာထားလို့ပါ အစ်မရဲ့။ ကိုယ့်အသင်းကို နိုင်အောင်ကန်ရ မတဲ့ဗျ”ဆိုပြီး ငိုရင်း ဆင်ခြေလဲသေးတာ။ အမယ်ကြီးဒေါသက အဘိုးကြီးဘက် လှည့်ကန်တယ်။
“နင်တို့ ဖအေပညာရှိကြီးက နိုင်အောင်ကန်ဖို့ပဲ သင်တာ။ ညီအစ်ကိုဆိုတာ မသင်ဘူးမို့လား။ ဟဲ့ အကောင်တွေရဲ့၊ ဒါ နင့်အဖေကျောင်း မဟုတ်ဘူး။ ငါ့ကျောင်း၊ ဆရာမြကျောင်းရောက်ရင် ဆရာမြ စာအံ၊ မယ်နုကျောင်းရောက်ရင် မယ်နုစာအံ”ဆိုပြီး အော်လိုက်တာ...။
အဲဒီစကားက ခုချိန်ထိ ရွာမှာ (ဆရာမြကျောင်းရောက်ရင် ဆရာမြ စာအံ၊ မယ်နုကျောင်းရောက်ရင် မယ်နု စာအံ)ဆိုပြီး ရွာလက်သုံးစကား အဖြစ်ကို တွင်ကျန်ရစ်တာ။ အမယ်ကြီးက အဲဒီလို ခုနစ်သံချီတတ်တယ်။
ညရောက်တော့ “စာမတတ်ပေမတတ်လူတွေများ တယ်လဲပြောရဆိုရ လက်ပေါက်ကတ်တတ်တယ်”ဆိုပြီး အဘိုးကြီးက ပြုံးပြုံး ပြုံးပြုံးနဲ့ စတယ်။ အမယ်ကြီးကလည်း ကြိုက်တာပြော၊ စာမတတ်ပေမတတ်လို့ပြောရင် ဆတ်ဆတ်တုန်တတ်မှန်းသိရက်နဲ့ကို မခံချင်အောင် တမင်ပြောတာ။ ဒါပေမယ့် ခပ်ဖျင်းဖျင်းမိန်းမတွေလို (နင့်လစာလေး ဘယ်လောက်၊ ငါ့မြေတွေယာတွေကြောင့်)ဆိုပြီး ဂုဏ်မမောက်ဘူး။ အဘိုးကြီးကို ငွေဂုဏ်နဲ့ တစ်ခါမှ အနိုင်မယူဘူး။ “ကျုပ်လည်း ဦးသောဘိတကျောင်းထွက်ပါ ကျောင်းဆရာရယ်။ တော့်လို ခုနစ်တန်း မအောင်သာဘဲရှိတယ်။ ကျောင်းဆရာမို့သာပေါ့။ မြို့အုပ်တို့၊ အရေးပိုင်တို့သာဆို မခက်လား။ တော့်ကျောင်းလောက်တော့ ဆရာမ လုပ်နိုင်သေးတယ်”လို့ နှုတ်လှန်ထိုးတယ်။ ငိုသံကတော့ ပါနေပြီ။
အဘိုးကြီးက မရပ်ဘူး။  “လာချေသေး မယ်နုရယ်၊ ငါ့ကျောင်းများ ဆရာမ လုပ်ဦးမတဲ့။ ဆရာမအသာထား (မယ်နုစိတ်တိုနေသည်)လို့ တစ်ကြောင်းဖြောင့်အောင်ရေးခဲ့”ဆိုပြီး စာရွက်နဲ့ ခဲတံချပေးတော့ အမယ်ကြီးက ဆတ်ခနဲထယူတဲ့ပြီး ရေနံဆီမီးခွက်နဲ့ စာကျက်နေတဲ့ အရိုက်ခံထားရတဲ့ကောင်တွေနား သွားထိုင်တယ်။ ဘုန်းကြီးအသံဝါဝါကြီးသာ ပြန်ကြားနေရတယ်။ စာတွေကပေါ်မလာပြန်ဘူး။ ခဲတံကို တံတွေး ဆွတ်ဆွတ်နေတာနဲ့တင် ကွမ်းတစ်ယာညက်လောက်ကြာတယ်။ စိတ်ကြိုက်ရေးပြီးတော့မှ “ဟဲ့ နှစ်ကောင် ကြည့်ကြစမ်း”လို့ တိုးတိုးပြပေသိ နွားကန်ကျိုးအောင်အရိုက်ခံထားရတော့ မလှုပ်ကြဘူး။
နေဟာ...ဆိုပြီး စာရွက်နဲ့ခဲတံ အဘိုးကြီးပြန်ပေးတော့ စာရွက်ကိုကြည့်ပြီး အဘိုးကြီးပြုံးနေတာများ ဝင်းလို့မွတ်လို့။ “ဟေ့ကောင်တွေ မင်းတို့အစ်မရေးထားတာ လာဖတ်ပြစမ်း”လို့ အဘိုးကြီးခေါ်တော့ ဆတ်ခနဲထပြီး စာရွက်ကိုင် ပြူးပြဲကြည့်နေတဲ့ သားနှစ်ယောက်ဆီက တော်တော်ကြာမှ အသံထွက်လာ တယ်။ (မဲနု ဆိတ် တိုးနေ သီ) တဲ့။ အဘိုးကြီးရယ်သံနဲ့ သားနှစ်ကောင်ရယ်သံ အုန်းအုန်းထသွားတာ မီးခွက်တောင် လန့်ပြီး ငြိမ်းမတတ်ရယ်။ အမယ်ကြီးက အဘိုးကြီးကို ဥပုသ်နှစ်ခါစောင့်လောက် စကားမပြောဘူး။ ရှက်လို့။
အတွေးတွေနဲ့တင် အတိတ်ရှေးဟောင်းနှောင်းဖြစ်တွေက အမယ်ကြီးစိတ်ထဲ စွတ်စွတ်စိုလာသလို ပါးပေါ်မှာပါ ရွှဲရွှဲတောက်လာတော့တာ။ ဒီနှစ် တစ်ယောက်မှ ပေါ်မလာကြဘူးတော်...လို့ အသံထွက်မတတ်ဖြစ်သွားရာက အဘိုးကြီးကိုသတိရပြီး ပါးစပ်ကိုလက်ဝါးဘရိတ်နဲ့ ဒုံးပိတ် ပစ်ရတယ်။
“ပွဲခင်းမှာ လုံခြုံရေးတာဝန်ကျသူများအားလုံး မင်းခုတင်မှာ စုရုံးကြဖို့ အုပ်ချုပ်ရေးမှူးမှခေါ်နေပါတယ်” လော်စပီကာကအသံအဆုံးမှာ ဝရုန်းသုန်းကား အော်သံဟစ်သံတွေထွက်လာသလို တီးမှုတ်ကခုန်တွေ တိခနဲရပ်ပြီး လူသံ သြသြတွေက စည်းရိုးသာခြားတဲ့အိမ်ဘက် လွင့်တက်လာတော့ အရွယ်နဲ့မလိုက် အမယ်ကြီး ဆတ်ခနဲထတယ်။ ပွဲကြည့်သက်က ဆိတ်မရအောင် ရင့်ထော်နေတာဆိုတော့။
သေချာပြီ။ ဒါ ပွဲလန့်တာ၊ ရန်ဖြစ်ကုန်ကြပြီ။ တုတ်နဲ့ရိုက်သလား၊ ဓားနဲ့ထိုးသလား။ သူ့လူ ခံရသလား၊ ကိုယ့်ရွာ ခံရတာလား။ ထင်းပုံထဲက ထင်းတစ်ချောင်းဆွဲပြီး ပွဲခင်းထဲ အမယ်ကြီးလှစ်ခနဲ ပြေးတယ်။
ဇာတ်ခုံထောင့်မှာ ဖုန်တွေအလိပ်လိုက်ထနေသလို ထိတ်တုံးထားတဲ့နေရာမှာ လူတွေက အုံလို့၊ ဝိုင်းနေတဲ့လူတွေကို ဦးဇင်းလေးတွေနဲ့ ရွာကာလသားတွေက တုတ်တယမ်းယမ်းနဲ့ လူစုခွဲပစ်နေတယ်။ အရက်စော်က ဟိုကနံဒီကနံဆိုတော့ ဖြစ်တော့မပေါ့။ အမယ်ကြီး လူအုပ်ကို တိုးမရဘူး။ သတင်းတော့ နီးရာကရတယ်။
ဇာတ်ခုံထောင့်မှာ မူးကြကကြရင်းရန်ဖြစ်ကြတော့  နှစ်ယောက်လုံး ဓားဆွဲအထုတ်မှာ အရိပ်အခြည်ကြည့်နေတဲ့လုံခြုံရေးက တုတ်နဲ့ရိုက်တော့ လက်ကျိုးသွားလို့ ဆေးရုံပို့ရမတဲ့။ ရွာက ညီလို့သာပေါ့။ စတိတ်ခ်ျရှိုးတော့ ပြန်မထွက်ရတော့ဘူး။ ဆရာတော်လည်း ဓာတ်မီးတဝင်းဝင်းနဲ့ ကျောင်းပေါ်က ဆင်းချလာတယ်။
အမယ်ကြီးမြေးတွေရှိရာ ခုတင်နားရောက်တော့ “အယ်...ဘွား တုတ်ကြီးနဲ့”ဆိုပြီး ဆရာမလေးတွေခမျာ အမယ်ကြီးသတ္တိကို မျက်လုံးလေးတွေပြူးလို့။ အဘိုးကြီးကိုအမှတ်ရနေပေမယ့် အမယ်ကြီးမြေးတွေကို စိတ်မချနိုင်တော့ တုတ်ကို ခုတင်တိုင်ထောင်ပြီး စွေ့ခနဲ ဝင်ထိုင်တော့ ပြဇာတ်ပထမဆုံးအခန်းက သေနတ်သံတွေနဲ့စတယ်။
“ခုခေတ် ဇာတ်ပွဲသေနတ်သံကလည်း ဝါးခြမ်းပြားကျိုးသလောက် မြည်သကိုး”လို့ အမယ်ကြီးပြောတော့ ဆရာမလေးတွေဆီက ရယ်သံတွေ ထွက်လာတယ်။ “အေးပေါ့အေ...ခေတ်ကလည်း ယမ်းမီးခြစ်ခေတ် မဟုတ်တော့ဘူး။ ဂတ်ဆီမီးခြစ်ခေတ်ကိုး”လို့ထပ်ပြောတော့ ဘေးခုတင်က ရယ်သံတွေအုန်းအုန်းထလို့။
သေနတ်ကြီးတကားကားနဲ့ ဟန်ပါပါထွက်လာတဲ့လူကြမ်းခမျာ ရန်ဖြစ်ထားတဲ့အရှိန်နဲ့လန့်ပြီး သူ့ဇာတ်ကွက်တွေမေ့၊ အမယ်ကြီးတို့ ခုတင်ဆီ ပြူးပြဲကြည့်နေတော့ တစ်ခါရယ်ကြပြန်တယ်။
နတ်တော်လပြည့်ညဆိုတော့ နှင်းတွေက မီးချောင်းတွေဆီမှာ အုံကျင်းဖွဲ့ချင်နေကြပြီ။
ပြဇာတ်မပြီးခင် နှစ်ခေါက်လောက် အဘိုးကြီးဆီပြန်ဖို့ အမယ်ကြီးစိတ်ကူးရှိသေးတယ်။ ပြဇာတ်လည်းထွက်ရော မပြန်နိုင်တော့ဘူး။ ဇာတ်က တော်တော်ကောင်းလာတယ်။ ပြဇာတ်မင်းသမီးနဲ့ မင်းသမီးကြီးက အပြင်မှာ သားအမိတဲ့။ ရွှေတံဆိပ်ကလည်း လေးငါးခုရထားတာဆိုတော့ ဇာတ်သိမ်းပိုင်းမှာ ပရိသတ်ခမျာ မျက်ရည်လေးတွေစမ်းစမ်းစမ်းစမ်း နဲ့။ အမယ်ကြီးခမျာလည်း ရွှေတံဆိပ်ဆုရှင်မင်းသမီးနှစ်လက် ကျပြတဲ့မျက်ရည်ထဲ ပိုးလိုးပက်လက်မျောသွားလိုက်တာ။ ကတ္တီပါကန့်လန့်ကာအနီကြီးကျလာမှ အိမ်ဘက် မနည်းပြန်ကူးရတယ်။

++++++++++++++++++++++++++++++++++++++++++++++++++++++++++++++++++++

ပွဲ ခင်းထဲမှာ လူငွေ့နဲ့နွေးနေပေမယ့် အပြင်မှာ လပြည့်ညက နှင်းမှုန်တွေနဲ့စိမ့်စိမ့်တုန်နေပြီ။ အိမ်ထဲဝင်တော့ နှစ်ပေမီးချောင်း ရောင်အောက်မှာ အဘိုးကြီးက ပက်လက်ကုလားထိုင် ကျောမှီလျက်ပဲ။
ခြုံပေးထားတဲ့စောင်က အောက်ရောက်နေတယ်။ ဘယ့်နှာတုံးလို့ အမယ်ကြီးတွေးရင်း စူးစမ်းကြည့်တော့ အဘိုးကြီးပေါင်ပေါ်မှာ ဓာတ်ပုံတွေ ထည့်ထားတဲ့ဘုတ်အုပ်ကြီးက ပွင့်လို့ လန်လို့။ အဲသဟာကြီးထယူရင်း စောင်မခြုံမိဘဲအိပ်ပျော်သွားတာဖြစ်မယ်။
တစ်သက်နဲ့တစ်ကိုယ် မဆိုဖူးတဲ့စကား၊ အမယ်ကြီးနဲ့များ ပွဲတောင်ကြည့်ဦးမတဲ့။ ကြည့်ရချေသေးလို့ စိတ်ထဲကပြောပြီး ဘုတ်အုပ်ကြီးကို အမယ်ကြီးကောက်သိမ်းတယ်။
ဒီဘုတ်အုပ်ကြီးထဲမှာ သားတွေမြေးတွေ လှူတုန်းကရိုက်ထားတဲ့ အဖြူအမည်းဓာတ်ပုံတွေရှိတယ်။ မင်္ဂလာဆောင်ပုံတွေ၊ ဘွဲ့ယူတုန်းကပုံတွေ ရှိတယ်။ ဆုရတဲ့တပည့်တွေကို ဆုပေးနေတဲ့ပုံတွေရှိတယ်။ အဘိုးကြီးက သူ့သားမြေးတွေ၊ တပည့်တွေကိုအမှတ်ရတိုင်း ဘုတ်အုပ်ကြီးနဲ့ တိုင်တည်တတ်တယ်။ လွမ်းတိုင်း လှန်တယ်။
“အဘိုးကြီး ထ၊ ပြဇာတ် ပြီးပြီ။ နှစ်ပါးသွားနဲ့ နောက်ပိုင်း စ တော့မယ်”လို့ နှိုးလိုက်တယ်။ အဘိုးကြီးက မလှုပ်ဘူးရယ်။ သြော်...ခက်ပြန် ပကော ဒီအဘိုးကြီးနှယ်လို့ စိတ်ထဲကညည်းတယ်။
“တော့် ကျောင်းဆရာ ထ၊ တစ်သက်နဲ့တစ်ကိုယ် ဒီတစ်ခါတော့ တော်နဲ့ကျုပ် စုံတွဲ ပွဲကြည့်ဖြစ်တော့မယ်။ တော်ကြည့်ချင်လို့သာရယ်၊ ဒီအရွယ်ကြီးရောက်မှ မြေးတွေကြား ကျုပ်ကတော့ ရှက်တတ်တတ်ပဲ”လို့ အမယ်ကြီး ရယ်မြူးသံနဲ့ပြောတာကို အဘိုးကြီးကမကြားဘူး။ အိပ်ပျော်နေတုန်းပဲ။
အမယ်ကြီး စိတ်မရှည်သလို အဘိုးကြီးခေါင်းကို မ နှိုးတော့ အဘိုးကြီးက တောင့်တောင့်ကြီးပါလာတယ်။ ဟင်...၊ ဘုရား... ဘုရား...။ အဘိုးကြီး... အဘိုးကြီးလို့ အသံမထွက်ဘဲရေရွတ်ရင်း ကုလားထိုင်ပေါ် ပြန်ချတယ်။ အမယ်ကြီး အသက်ရှူရပ်မတတ်မွန်းကျပ်ပြီး မျက်လုံးတွေပြာလာတယ်။
တွေတွေကြီး ရပ်ငေးကြည့်နေရင်း ကုလားထိုင်ရှေ့မှာ အမယ်ကြီး ဒူးတွေညွှတ်ခွေကျသွားတယ်။ အဘိုးကြီးရင်ခွင်ထဲ ခေါင်းထိုးအပ်တော့ ခါတိုင်းကြားနေကျ ရင်ခုန်သံက တိတ်လို့ဆိတ်လို့။ တဖြည်းဖြည်းကျလာတဲ့ကတ္တီပါကန့်လန့်ကာကြီးကို မျက်စိထဲပြန်မြင်တော့ အဘိုးကြီးရင်ခွင်ထဲက အမယ်ကြီးပိန်ပိန်ပါးပါးကိုယ်လုံးလေးက ဆတ်ခနဲ စ တုန်သွားတယ်။

++++++++++++++++++++++++++++++++++++++++++++++++++++
ပွဲခင်းထဲမှာ ပြဇာတ်ပြီး နောက်ပိုင်းကဖို့ မင်းသားမင်းသမီးတွေ အဝတ်လဲနေသလို၊ ပရိသတ်ကလည်း အကြော်ဆိုင်တွေထဲ ဝင်ကြထွက်ကြ နဲ့။ ဇာတ်ပွဲထုံးစံအတိုင်း ခဏနားသခိုက်မှာ ဇာတ်စင်က သီချင်းတွေ စဖွင့်ပေးတယ်။ ပွဲဦးတုန်းက ပြဇာတ်မင်းသမီး ဆိုခဲ့တဲ့သီချင်းက အုံ့ဖွဲ့ဖွဲ့နှင်းထုကိုဖြတ် အမယ်ကြီးတို့ကိုပွတ်သပ်ပြီးမှ ရွာဘက်ကိုထွက်သွားတယ်။

xxxညိုပြာပြာxxx လ တာပြင်ခြေရင်းxxx လှိုင်းတက်ရာ ဗေဒါတက်xxx လှိုင်း သက်ရာ ဆင်းxxx တဲ့။
အမယ်ကြီးဆီက အင့်ခနဲရှိုက်သံတစ်ချက် စ ထွက်လာတယ်။ သီချင်းက ပြန်ကျော့လာပြန်ပြီ။
xxxညိုပြာပြာxxx လ တာပြင်ခြေရင်းxxx လှိုင်းတက်ရာ ဗေဒါတက်xxx လှိုင်း သက်ရာ ဆင်းxxx တဲ့။
အမယ်ကြီးရှိုက်သံနဲ့ တဆတ်ဆတ်တုန်နေတဲ့ကိုယ်လုံးက စည်းချက်မှန်လာတယ်။
xxx နောက်တစ်ချီ xxx ဒီတစ်လုံးကxxx ဖုံးလိုက်ပြန်ရာxxx မြုပ်လေ ပေါ့xxx ပေါ်မလာxxx
မဖြစ်ဘူးလို့ စိတ်ကသိနေပေမယ့် တစ်နှစ်တခါ ရွာဘုရားပွဲကို စည်စည်ကားကားပြီးစေဆုံးစေရမယ်လို့ အမယ်ကြီး သည်းအူပြတ်မတတ် ဆုံးဖြတ်ချက်ချတယ်။ သီချင်းသံက အေးစိမ့်စိမ့်နှင်းထုထဲ လွင့်နေတုန်းပဲ။
xxxချောင်းအဆွယ် xxx မြောင်းသွယ်ထဲကxxx ဘဲထွက်လို့လာxxx ဘဲအုပ်က တစ်ရာနှစ်ရာxxx မဗေဒါက တစ်ပင်တည်းxxx
လယ်သူမအိုကြီးရဲ့ရှိုက်ငိုသံက ကျောင်းဆရာအိုကြီးရဲ့ ရင်ဘတ်ထဲကနေ ကွဲအက်အက်ကြီးထွက်လာသလို အားကိုးရာမဲ့ ဆုပ်ကိုင်ဖျစ်ညှစ်နေတဲ့အမယ်ကြီးလက်က အဘိုးကြီးလက်ထဲက စာရွက်တစ်ပိုင်းတစ်စကို စမ်းမိတယ်။
စာရွက်ကိုဆွဲထုတ်ပြီး အဘိုးကြီးရင်ခွင်ထဲမှာပဲ ဖြန့်တယ်။ ဝါကြင်ကြင်စာရွက်ဟောင်းထဲက ခဲတံရာတွေ အိုဟောင်းနေပေမယ့် အမယ်ကြီး မှတ်မိတယ်။ ကိုယ်တိုင်ရေးခဲ့တဲ့ စာ။ (မဲနု ဆိတ်တိုး နေသီ) တဲ့။
အမယ်ကြီးတစ်ကိုယ်လုံး အဘိုးကြီးရင်ခွင်ထဲ ပုံကျသွားတယ်။ ဒီတစ်ခါ တော့ ရှိုက်ငိုသံတောင် ထွက်မလာတော့ဘူး။ တဆတ်ဆတ်တုန်နေတဲ့ အမယ်ကြီးကိုယ်လုံးလေးလည်း ငြိမ်ကျသွားတယ်။
မြူးကြွတဲ့ ရှေ့ပိုင်းနဲ့ ငိုချင်းချတဲ့နောက်ပိုင်းကိုခွဲခြားထားတဲ့ ကတ္တီပါကားလိပ်ကြီးကတော့ ဇာတ်စင်ပေါ်က မီးရောင်အောက်မှာ ဖိတ်ဖိတ်လက်လို့။
အရုဏ်ဦး တုံးမောင်းခေါက်သံက နှင်းတွေကို လှုပ်ခါချနေသလိုပဲ။ ဖွေးဖွေးလှုပ်အောင် ကြွေကျလာတယ်။

အောင်ဖြိုးကျော်၊ ပခုက္ကူ၊

(ရွှေအမြုတေ မဂ္ဂဇင်း မေလ ၂ဝ၁၃)

ယူတာက ဒီနေရာကပါခင်ဗျား။ http://phopa-dwm.blogspot.com/2013/05/blog-post.html#more