ခရစ္စမတ်စ်လိုအချိန်မျိုးဆို မျက်နှာမွဲပေါပေါပဲပဲ အဖိုးနည်းဝန်ပါ လက်ဆောင်လေးတွေပေးဖို့ တွေးကြတယ်ဆို အဲ့ဒါလေးတွေကိုပဲ မျက်စေ့ကျကြတာများပါတယ်။ အဲ့သလိုရာသီမျိုးဆို ဆိုင်တွေမှာလည်း တွိုင်းလက်ထရီးစ်တွေ လက်မလည်အောင် ရောင်းရတာကလား။ နောက်ပြီး အဲ့ဒါတွေက အထဲကပစ္စည်းအရည်အသွေးသာ မကောင်းရှိရင်ရှိရမယ် အပြင်ပန်းအလှနဲ့ ထုပ်ပိုးထားပုံတွေ ဒီဇိုင်းတွေကတော့ သွားရည်ကျချင်စရာများတယ် မဟုတ်လား။ သူဌေးသုံး နံမည်ကြီး အကောင်းစားဘရန်းဒ်တွေလည်း ရှိတာပေါ့ဗျာ။
အေဂျင်စီတွေ အဖွဲ့အစည်းတွေ ဌာနဆိုင်ရာတွ ကုပ္မဏီတွေက လုပ်သားတွေ ဝန်ထမ်းတွေ အမှုထမ်းတွေကိုလည်း ဆိုင်ရာအလိုက် လက်ဆောင်ပေးကြတယ်ဆို အဲ့ဒါတွေပဲ များပါတယ်။ လူအများကြီးကို ပေးရတာဆိုတော့ ဒါနဲ့မှကိုက်တာကိုး။ ခရစ္စမတ်စ်နား နီးပလားဆို ဖေါက်သည် Clients တွေနဲ့ တိုက်ရိုက်ဆက်ဆံရတဲ့အဖွဲ့အစည်းတွေ အေဂျင်စီတွေ ဆေးရုံတွေလိုဟာတွေက လူမှုလုပ်သားတွေ လူမှုဆက်ဆံရေးဌာနက လူတွေက ဘယ်ဖေါက်သည်တွေကိုတော့ ဘာလက်ဆောင်တွေပေးကြမယ်ဆိုကာ လူစာရင်း ပစ္စည်းစာရင်းတွေ ပြုစုရပါတယ်။ အဲ့သလိုပြုစုတဲ့အခါ ဖေါက်သည်တွေ လိုမယ်ထင်တာတွေ သတ်သတ်ပါရသလို တွိုင်းလက်ထရီးစ်တွေကတော့ လူတိုင်းအတွက် မပါမဖြစ်သဘော ပါကိုပါရပါတယ်။
ဖို့တ်ဝိန်းက ဗမာပြည်သားတချို့ Social Workers တွေအဖြစ် အလုပ်လုပ်ကြတဲ့ အေဂျင်စီတခုကလည်း ခရစ္စမတ်စ်နီးတော့ လက်ဆောင်ပေးရမယ့်လူနဲ့ ပစ္စည်းစာရင်းတွေ ပြုစုကြပါတယ်။ ပြုစုတဲ့အထဲမယ် ဗမာပြည်သားတယောက်လည်း ပါပါတယ်။ စာရင်းလုပ်နည်းက ပေးမယ့်ပစ္စည်းတွေကို အမယ်တူရာခေါင်းစဉ်အောက်မှာ ဘယ်ရွေ့ဘယ်မျှရှိကြောင်း မိုက်ခရိုဆော့အိပ်ဇဲလ်ကိုသုံးပြီး ကွန်ပြူတာပေါ်မှာလုပ်ပြီး အဝယ်တော်ဆီပို့ရတာပါ။ အဝယ်တော်က စာရင်းအတိုင်းဝယ်ပြီးမှ ခွဲတမ်းချကြတာပါ။
တနေ့တော့ ကျနော်လည်း ကိစ္စတခုရှိတာနဲ့ အဲ့ဒီဌာနရောက်သွားတယ် ကျနော် စကားပြောရမယ့်အမျိုးသမီးက ကွန်ပြူတာထဲ စူးစိုက်ပြီးအလုပ်ရှုပ်နေတာနဲ့ ကျနော်လည်း မလှမ်းမကမ်းကခုံမှာ ထိုင်နေတယ်။ ထိုင်နေတုန်း အမျိုးသမီးဆီက တသိမ့်သိမ့်ရယ်သံ ထွက်လာတယ်။ ကျနော်လည်း ဘာများပါလိမ့် ကွန်ပြူတာထဲ ဘာသဘောကျစရာ တွေ့သွားပါလိမ့်လို့ ဖြစ်သွားတယ်။ ချောင်းသံပေးလိုက်တော့မှ ကျနော်ရှိနေမှန်းသိသွားပြီး အရယ်ရပ်သွားတယ်။ ဒါပေယ့် ကျနော့်ဘက်လှည့်လိုက်တဲ့ သူ့မျက်နှာကြီးတခုလုံးကတော့ အပြုံးနဲ့အပြည့်ပဲ။ သူ့ အရီရောအပြုံးမှာပါ လှောင်သံလှောင်ဟန် တစက်မှမပါမှန်းတော့ သိသာပါတယ်။ ကျနော့်ကိုလည်း “မျိုး ဒီမှာ လာကြည့်စမ်းပါဦး”ဆိုပြီး ရယ်သံစွက် အပြုံးမျက်နှာနဲ့ သူ့ကွန်ပြူတာကို မေးထိုးပြတယ်။ ကြည့်တော့လည်း ကွန်ပြူတာမှာက အိပ်ဇဲလ်နဲ့စီထားတဲ့ ခရစ္စမတ်စ်လက်ဆောင်စာရင်းပဲ။ ရီစရာဆိုလို့ ဘာဆိုဘာမှကို မတွေ့တာ။
ဘာများလဲလို့ သူ့ကို ထပ်မေးတော့မှ ဒီမှာလေဆိုပြီး ပစ္စည်းအမယ်ခေါင်းစဉ်တခုကို လက်နဲ့ထောက်ပြတယ်။ ရေးထားတာက Toilet Trees တဲ့။ ဒီတော့မှ သြော်..ဒါ့ကြောင့်ကိုး လို့ ကျနော်ပါ ရောပြုံးမိတာပါပဲ။
“တို့က တခါတလေမှာ တချို့အင်္ဂလိပ်အသံထွက်တွေကို နားထဲကြား ကြားသလို လက်က ချရေးလိုက်မိတတ်တာမျိုးလည်းရှိသလို စကားလုံးဇစ်မြစ် မသိတာလည်းပါပါတယ်။ နောက်ပြီး တချို့မင်းတို့အသုံးတွေ စကားလုံးတွေကလည်း နားထွေးချင်စရာတွေရှိတယ် မဟုတ်လား။ ထွေးသွားတဲ့အခါ ပြန်မေးရမှာအားနာတာ ရှက်တာမျိုးတွေရှိတာကိုတော့ ဝန်ခံရမှာပါ”လို့ ကျနော်ဆိုတော့ သူက “စကားလုံးထွေးတယ်ဆိုတာ ဘာကိုပြောတာလဲ” လို့မေးတယ်။ “ဥပမာ မင်းတို့က Family Tree လို့ပြောတယ်ဆိုပါတော့ တို့က ဒါဟာ ဆွေစဉ်မျိုးဆက်ပြဇယားကိုပြောမှန်း တန်းသိတယ်။ အဲ့သလိုပဲ တွိုင်းလက်ထရီးစ်ကိုလည်း တို့နားလည်ပြီးသားလို့ထင်ပြီး မင်းတို့ကတော့ ပြောရိုးပြောစဉ်ပြောလိုက်တာပဲ။ ဒါပေမယ့် တို့နားထဲမှာက တွိုင်းလက်နဲ့ထရီးစ်က တလုံးခြင်းစီကွဲပြီး ဝင်သွားတာ။ အဲ့သလို ဝင်ပြီးရုံတင် ရပ်သွားတာမဟုတ်ဘူး။ ဆက်တွေးတာ။ တွိုင်းလက်ကိုလည်းသိတယ်၊ ထရီးစ်ကိုလည်း သိတယ်။ တပြိုင်တည်း စိတ်မျက်စေ့ထဲ Family Tree က ဆက်စပ်ပြီး ဝင်ချလာတာ။ ဟိုကလည်း ဆွေစဉ်မျိုးဆက် အဆက်လိုက်အတွဲကြီးမဟုတ်လား။ ဆိုတော့ ဒီ တွိုင်းလက်ထရီးစ်လည်း အဲ့သလိုပဲ ဆပ်ပြာ၊ သွားတိုက်ဆေး၊ သွားပွတ်တံ၊ ခေါင်းလျှော်ရည်၊ လက်ဆေးရည် စသည်ဖြင့်အတွဲသုံးပစ္စည်းတွေအဖြစ် တတွဲကြီးဝင်ချလာတာ။ ဒီတင် Toiletries ကို Toilet Trees လို့ စကားလုံးပုံက ခေါင်းထဲဝင်လာပြီး မေးရမှာအားလည်းနာ ရှက်လည်းရှက်တာနဲ့ ခေါင်းထဲပေါ်လာတဲ့အတိုင်း လက်က ချရေးမိတာဖြစ်မှာပဲ”လို့ တနံတလျားကြီး ရှင်းပြကာကွယ်မိတာပါပဲ။
ကျနော့်စကားဆုံးတော့ သူ့မျက်နှာမှာ သဘောပေါက်နားလည်သွားတဲ့အရိပ် လက်ကနဲပေါ်လာတယ်။ အပြုံးတွေလည်း မျက်နှာပြင်မှာ တွဲရရွဲခိုလို့။ ၂ ယောက်လုံးရဲ့ ကိုယ်စီအပြုံးတွေမှာ အလှောင်တွေစိုးစဉ်းမှမပါကြောင်း သိနေကြတာမို့ စိတ်ဟာ ကြည်သန့်နေသလို ခံစားမိတာပါပဲ။
0 comments:
Post a Comment