Tuesday, December 20, 2016

ရုရှားသံအမတ်အလုပ်ကြံခံရရုံနဲ့....(မျိုးမြင့်ချို)

0 comments
(ရုရှားသံအမတ်အလုပ်ကြံခံရရုံနဲ့....)
တူရကီ၊ အီရန်နဲ့ရုရှားတို့ ဆီးရီးယားအရေး ဝိုင်းဖြေရှင်းကြဖို့ ကြိုးပမ်းနေချိန်မှာ တူရကီဆိုင်ရာ ရုရှားသံအမတ် အလုပ်ကြံခံလိုက်ရတယ်။ ရုရှားလေယဉ်တစီးကို တူရကီဘက်က ပစ်ချလိုက်ပြီးနောက် လေကြောင်းမပျံသန်းရဇုံကိစ္စနဲ့ တူရကီကို ရုရှားကသတိပေးခဲ့တာ သိတ်မကြာသေးဘူး။ တူရကီဘက်က ဖြေဖြေလျှော့လျှော့လုပ်ပေးလို့ ပြန်ပြေလည်သယောင်ဖြစ်သွားတယ်။

ဒါကို မရှုစိမ့်ဖြစ်တဲ့ ဒေသတွင်းနဲ့အဝေးနိုင်ငံတွေရှိတယ်။ ရုရှားနဲ့ တူရကီ ငြိကြစေချင်တယ်။ ယာလည်းညက် ကြက်လည်းမောမှ ဆီးရီးယားကိစ္စကို စိတ်ကြိုက်ကိုင်တွယ်နိုင်ဖို့အကြံနဲ့သဘောထားတွေ အစ္စရေးလ်ဘက်ကအပြောတွေမှာ ဗူးပေါ်သလိုပေါ်လာတယ်။

ပူတင်ကပါးတယ် ကေဂျီဘီဟောင်း နိုင်ငံရေးသမားဖြစ်တယ်။ အာဏာကိုဘယ်လိုထိန်းထားရင်ရမယ်မှန်းကို နောကြေအောင်သိတယ်။ လုပ်စရာရှိရင် လက်ရဲဇက်ရဲလုပ်တတ်တယ်။ ဒါကို ဗမာစစ်အုပ်စုကလည်း တွက်လို့ရတယ်။ ဒါ့ကြောင့် သန်းရွှေတို့ခေတ်စစ်အုပ်စုကနေ ခု မင်းအောင်လှိုင်ဇာတ်စီးတဲ့အုပ်စုအထိ ရုရှားကို ကာမပြန်ဝံ့ရုံမက အမေရိကန်နဲ့ကစားဖို့ ဆရာမွေးထားတာကို ကြည့်ကြစေချင်ပါတယ်။

တကယ်တမ်းတွေးရင် အမေရိကန်နဲ့ကစားဖို့ တရုတ်ဟာ စိတ်ချရတဲ့အနေအထားမဟုတ်သလို အားလည်းမရှိသေးဘူး။ သူ့စီးပွားရေးကို နည်းနည်းမှအထိအပါးမခံနိုင်တဲ့တရုတ်ဟာ စစ်တိုက်ပြီး ကိုယ့်စီးပွားကိုယ်ပြန်ဖျက်တဲ့အလုပ် ဘယ်တော့မှလုပ်မှာမဟုတ်ကြောင်း ဗမာစစ်အုပ်စုက ကောင်းကောင်းသိတယ်။ ဒါဟာ တရုတ်အမျိုးသား တယောက်ခြင်းဆီမှာရော၊ တရုတ်ကွန်မြူနတီ တနည်းပြောရရင် ချိုင်းနားတောင်းနဲ့ဘုံကျောင်း (ကြီးကြီး/သေးသေး) တည်ရှိရာဒေသတိုင်းမှာရော၊ တရုတ်ပင်မလူ့အဖွဲ့အစည်းကြီးတည်ရှိရာမှာရော လက်တွေ့ကျင့်သုံးတဲ့ ကွန်ဖြူးရှပ်လမ်းညွှန် စီးပွားရေး၊ နိုင်ငံရေး၊ မိသားစုနဲ့လူ့အဖွဲ့အစည်းဆိုင်ရာ သွန်သင်ချက်ပဲ။ တရုတ်တိုင်းလိုက်နာတယ်။

တခြားမကြည့်နဲ့ ထိုင်ဝမ်ကိစ္စကိုကြည့်။ ဟောင်ကောင်ကိစ္စကိုကြည့်။ ဒီလောက် တဇောင်းစေးနဲ့မျက်ချေးလိုဖြစ်နေပေမယ့် ကြားလူ ဘယ်လောက်ရန်ဝင်တိုက်တိုက် ကွန်မြူနစ်တရုတ်နဲ့အရင်းရှင်တရုတ် တရုတ်အချင်းချင်း စစ်ထမတိုက်ဘူး။ “သဟဇာတဖြစ်တဲ့မိသားစုသာ ကြီးပွားချမ်းသာတယ်“ဆိုတဲ့ ကွန်ဖြူးရှပ်ဒေသနာမှာ တရုတ်တိုင်း “တည်“ ကြတယ်။

ဗမာပြည်လောက် စီးပွားရေးမက်လုံးလေး လက်လွှတ်မစိုးလို့ တရုတ်ဟာ မိုက်မိုက်ကန်းကန်း ဘယ်နိုင်ငံနဲ့မှ စစ်ထမတိုက်ဘူး။ တရုတ်ခေါင်းဆောင်တွေ အဲ့သလောက်အမြော်အမြင်မနည်းဘူး။ ဥရောပတို့ အမေရိကတို့အပါအဝင် အခြားဒေကြီးတွေ တိုက်ကြီးတွေက တရုတ်အရင်းအနှီးနဲ့စီးပွားရေးဟာ အာရှ၊ တောင်အာရှ၊ အရှေ့တောင်အာရှနဲ့ယှဉ်တော့ ဇီးစေ့သာသာလောက်ပဲရှိတာမှန်ပေမယ့် ဒီအာရှဒေသကြီးအပေါ်မှာ နိုင်ငံရေးအရသြဇာညောင်းလိုတာ စီးပွားရေးအရမိတ်ဘက်ပြုလိုတာ လုံခြုံရေးအရ စစ်ရေးပူးပေါင်းဆောင်ရွက်လိုတာတော့ အထင်အရှားရှိတယ်။ လုပ်လည်းလုပ်နေတယ်။ ဒါပေမယ့် သိတ်ပါးနပ် သိတ်ကျင်လည်တယ်။ ဘယ်နိုင်ငံကြီးတွေနဲ့မှ အငြိကြီး အငြိမခံဘူး။

ဆိုဗီယက်-အမေရိကန် စစ်အေးခေါင်းစဉ်နဲ့ကစားတော့ အမေရိကန်ကပေးတဲ့အထူးကုန်သွယ်ဘက်နိုင်ငံ အဆင့်အတန်းကို မရအရယူပြီး ခုလောက်ကြီးပွားအောင် တစတစ အမြတ်ထုတ်လာခဲ့တာကိုကြည့်ရင် စီးပွားရေးမှာ တရုတ်တွေ ဘယ်လောက်အကွက်မြင်ကြောင်း ထင်ရှားမှာပါဘဲ။ စစ်အေးခေတ်နောက်ပိုင်း အကြမ်းဖက်မှုဆန့်ကျင်ရေးဆိုပြီး အမေရိကန်နဲ့ဥရောပက ကမ္ဘာလှည့်စစ်တိုက်နေချိန်မှာ တရုတ်က ကမ္ဘာပတ်ပြီး စီးပွားရှာနေတာ။ နောက်ဆုံး အမေရိကန်က စစ်နွံမှာနစ် စစ်ကြွေးတွေပိပြီး တရုတ်ဆီ ငွေချေးစာချုပ်တွေထုတ်ရောင်း သူ့ဘတ်ဂျက်ကိစ္စရှင်းရင်း တရုတ်ရဲ့မြီစားဘဝ ရောက်သွားရတာဘဲမဟုတ်လား။

ဒါတွေကို ဗမာစစ်အုပ်စုက ကျနော်တို့ထက်သိတယ် အကွက်လည်းမြင်တယ်။ ဒါ့ကြောင့် အမေရိကန်ခေါင်းဆောင်တဲ့အုပ်နဲ့ တခုခုငြိတော့မယ်ဆိုရင် ကစားတော့မယ်ဆိုရင် အရေးဟယ်အကြောင်းရယ်ဆို တရုတ်ကို အားကိုးလို့မဖြစ်မှန်း မရမှန်းသိတော့ ရုရှားကို လူမိုက်မွေးထားတာပဲ။ ရုရှားကလည်း အထည်ကြီးပျက်ဆိုပေမယ့် အားကမသေးလှဘူး။ မိုက်ဂုဏ်လည်းကြီးတယ်။ မိုက်သတင်းလည်းမွှေးတယ်။ ဂျော်ဂျီယာကိစ္စ၊ ချေချင်းညှာကိစ္စ၊ ယူကရိန်းကိစ္စ(ကရျိုင်းမီးယားကိစ္စတွေ)ကြည့်ပါ။ ပူတင်ဟာ ယစ်ထုတ်ကြီးဘောရစ်ယာဆင်နောက် တိုက်စားဖြိုချခံရတဲ့ ရုရှားကို ပြန်“မ“တင်တဲ့နေရာမှာ အန်ကယ်လ်ဆမ့်ဂိုဏ်းသားတွေနဲ့ အဲ့ဒီဂိုဏ်းယိမ်းသူတွေထဲကတချို့ကိုနှိပ်ကွပ်ပြီး တချို့ကိုသူကောင်းပြုတယ်။ အဲ့ဒီအထဲမှာ နိုင်ငံရေးသမား၊ သံတမန်၊ စီးပွားရေးသမား အကုန်ပါတယ်။ ခု ဖေဖေဒေါ် နိုင်ငံခြားရေးဝန်ခန့်မလို့ လျာထားခံရတဲ့ငတိဆို ပူတင်က ဆုတောင်ချထားလိုက်သေးတာ။

ဆီးယီးယားအရေးမှာလည့် ရုရှား(ပူတင်)ရဲ့ကစားကွက်ကိုကြည့်ပါ။ အမေရိကန်က ဆီးရီးယားအစိုးရကိုဖြုတ်ချပြီး သူဘက်ယိမ်းတဲ့လူကို အစိုးရတင်ဖို့လုပ်တယ်။ ဆီးရီးယားအစိုးရကို ဆန့်ကျင်တိုက်ခိုက်သူမှန်သမျှကို လက်နက်၊ ငွေကြေး၊ သတင်း၊ နည်းပညာ အကုန်ပေးတယ်။ အိုင်စစ် ISIS တွေရော အယ်ကိုင်းဒါးအစုတွေကိုပေးတယ်။ ဘာရက်အယ်အာဆာ့ဒ်ကို တိုက်ပေးရင်ပြီးရောဆိုပြီး။ ရုရှားက ပထမတော့ အသာကြည့်နေတယ် နောက်တော့ ကိစ္စကတဖြည်းဖြည်းနဲ့ အကြီးကြီးဖြစ်လာပြီး ဒေသတွင်းသာမက အပြင်ဘက်ပါ ပြန့်ထွက်လာနိုင်ခြေမြင်တော့မှ
ဆီးရီးယားပြသနာထဲ ဝင်ချလာတယ်။

ရုရှားက အမေရိကန်နဲ့ ပြောင်းပြန်ရပ်တယ်။ လက်ရှိဆီးရီးယားအစိုးကို ဆန့်ကျင်တိုက်ခိုက်နေတဲ့ အစ္စလာမ်မစ်နိုင်ငံတော်(အိုင်စစ်)တွေတင်မက အခြားအစွန်းရောက်လက်နက်ကိုင်မှန်သမျှကို ဆီးရီးယားအစိုးဘက်နေ ကူတိုက်ပေးတယ်။ ဆီးရီးယားအစိုးပြုတ်မကျအောင် ဆီးရီးယားနိုင်ငံမပြိုကွဲအောင် ပြသနာတွေဒေသအပြင်ထွက်ပြီး ပြန့်မသွားအောင်လည်း တဘက်ကနေလုပ်တယ်။ တဘက်ကနေလည်း သဘောထားပျော့ပျောင်းတဲ့ လက်နက်ကိုင်အင်အားစုတွေနဲ့ဆွေးနွေးဖို့၊ အစိုးရဘက်ကနေ လိုက်လျောသင့်တာလိုက်လျောဖို့ နိုင်ငံရေးအရဖြေရှင်းဖို့လည်း နားချတယ်။

ဒါတွေက နိုင်ငံရေးအရ နိုင်ငံရေးသြဇာထူထောင်လိုမှုဆိုတဲ့ဘက်ကနေ မြင်ကြည့်တာပါ။ တကယ့်လက်တွေကနေ အရင်းစစ်ကြည့်ရင်တော့ အမေရိကန်ရော ရုရှားပါ စစ်ပစ္စည်းတွေဈေးကွက်တင်ဖို့ လက်နက်အသစ်အဆန်းတွေ စမ်းသပ်ပစ်ခတ်ပြပြီးကြော်ငြာဖို့ လုပ်ကြတာကိုမြင်ရမှာပါ။

တရုတ်က သူ့စစ်ပစ္စည်းစစ်လက်နက်ကိုရောင်းပေမယ့် အမေရိကန်တို့ရုရှားတို့လို
စစ်နဲ့ဖြုန်းပြီးရောင်းတဲ့နည်းကိုရှောင်တယ်။ အမေရိကန် ရုရှားတို့က တိုင်းပြည်နဲ့ လူထုကို အကြွေးတင်ခံခိုင်းပြီး စစ်လက်နက်ပစ္စည်းကုမ္ဗဏီပိုင်ရှင်သူဌေးကြီးတွေနဲ့ အဲ့ဒီလုပ်ငန်းကြီးတွေမှာ အစုရှယ်ယာဝင်ထား ဝယ်ထားသူတွေကောင်းစားဖို့ ကြီးပွားဖို့လုပ်တဲ့သဘောဖြစ်တယ်။ တရုတ်က စစ်ကြွေးဘယ်သူ့ဆီမှအတင်မခံ၊ တိုင်းပြည်နဲ့လူထုလည်း စစ်နွံမနစ်၊ စစ်ကြွေးမပိစေတဲ့နည်းနဲ့ လက်နက်ရောင်းတယ်။ ရေရှည်မှာ တရုတ်နဲ့ အမေရိကန်တို့ ရုရှားတို့ဟာ အပုံကြီးကွာကုန်ကြတယ်။ ဒါကိုပဲ တရုတ်ပုံစံဆိုရှယ်လစ်စနစ်ချီတက်နေတာလို့ ဆိုသူတွေဆိုတယ်။ ကြည့်ရမှာပါပဲ။ ဘာမှတော့ ယတိပြတ်ပြောမရသေးပါ။ သူအောင်မြင်ရင် ကိုယ်တွေ နမူနာရမှာဖြစ်ပြီး သူကျဆုံးရင်တော့ သင်္ခန်းစာယူရမယ်ထင်ပါတယ်။

တူရကီဆိုင်ရာ ရုရှားသံအမတ်လုပ်ကြံခံရတဲ့ကိစ္စကို ပူတင်(ရုရှား)ဘက်က တုန့်ပြန်တာ အတော်ပိရိသေသပ်ပြီး ပါးနပ်တယ်လို့ဆိုရမယ်ထင်တယ်။ ထပြီး ဝုန်းဒိုင်းကြဲသောင်းကြမ်းတော့မယ် စစ်ကြေညာတော့မယ်ထင်တားသူတွေ မင်သက်မိကုန်တယ်။

အဲ့သလိုဖြစ်စေ့ချင်သူတွေ(ဗမာပြည်သားတွေအပါအဝင်)နိုင်ငံတကာမှာ သိတ်မနည်းလှဘူး။ တူရကီဟာ အစ္စလာမ်ဘာသာဝင်အများစုနိုင်ငံဆိုပေမယ့် တူရကီဟာ ဘယ်လိုနိုင်ငံ၊ ကမဲလ်အတာတာ့ခ်လက်ထက် ဘာသာရေးနိုင်ငံရေးပြုပြင်ပြောင်းလဲမှုဘာဆိုတာဘာ၊ ဘာဆိုဘာမှမသိကြတဲ့ ဗမာပြည်တွင်းပြည်က အမျိုးဘာသာသာသနာအသံကောင်းဟစ်နေတဲ့လူတွေ ဒီကိစ္စအကြောင်းပြုပြီး တူကီကို ရုရှားကဆော်စေ့ချင်မှန်း မထိန်းနိုင်မသိမ်းနိုင်တွေ ပွင့်ထွက်လာကြတယ်။

သူ့သံအမတ်အသတ်ခံရရုံလောက်နဲ့ တူရကီနဲ့သူနဲ့ကြား။ ရုရှား၊ တူရကီ၊ အီရန် ၃ ဦး ၃ ဖလှယ်ကြားက ဆီးရီးယားဆိုင်ရာအကျိုးစီးပွားကြီးကို ပူတင့်အနေနဲ့ အထိခိုက်မခံလောက်ဘူးလို့ ယူဆရပါတယ်။

မိုက်တယ်ဆိုပေမယ့် ပူတင်ဟာ မိုက်လုံးမကြီး၊
မိုက်တွင်းမနက်သလို သေတွင်းလည်းမတူးပါဘူး။ ဒါလေးအကြောင်းပြပြီး ဘာစစ်မှ ထမဖြစ်အောင် ဘာပြသနာမှ အစထွက်မလာအောင် ပူတင်ရပ်တည်ပုံ ပြောပုံဆိုပုံက အတော်ပိရိသေသပ်လို့ ပြသနာဖြစ်စေ့ချင်သူတွေ သြချကုန်ကြတယ်လို့
ထင်ပါတယ်။

ချုပ်ရရင် ပူတင်ဟာ မိုက်ပါတယ်။ မိုက်မိုက်ကန်းကန်းလည်း လုပ်တတ်ပါတယ်။ ဒါပေမယ့် မိုက်မဲသူမဟုတ်သလို မိုက်မိုက်မဲမဲလည်း မဟုတ်ပါ။ ကျနော်တို့ကို သူနဲ့ ဆန့်ကျင်ဘက်သမားတွေရဲ့မီဒီယာတွေကနေ သူ့ကိုမြင်စေချင်လို့ ပုံဖော်ပေးနှပ်ကြောင်းပေးတဲ့အတိုင်း သက်သက်လောက်ပဲ သူ့နဲ့ရုရှားကိုကြည့်ရင် ကျနော်တို့ သူ့ကို သူ့ရုရှားကို မမြင်နိုင်ပါဘူး။ ကျနော်တို့ဟာ အခြားဘက်တွေကနေလည်း ရှာတတ်ကြည့်တတ် မြင်တတ်ဖို့လိုပါတယ်။

ကျနော်တို့ ကြည့်ကြရမှာပါ။ ကျနော်တို့ မြင်ကြရဦးမှာပါ။
ဒီဇင်ဘာ ၂ဝ၊ ၂ဝ၁၆

0 comments:

Post a Comment