Friday, December 16, 2016

နသားပါးယားဗမာမှု(မျိုးမြင့်ချို)

0 comments
ကျနော့်သဘောကတော့ နည်းပညာနဲ့ဆိုင်တဲ့ဝေါဟာရတွေ၊
လျှပ်စစ်ပစ္စည်းတွေ၊ ယဉ်တွေထဲကတချို့ကို ဇွတ်အတင်းကာရော ဗမာမှုပြုတာ ပြန်တာကိုမကြိုက်ပါ။ ပြုလို့ပြန်လို့ တွင်သွားရင်တော်သေးရဲ့၊ မတွင်တော့ အချိန်ကုန်လူပမ်း သဲထဲရေသွန်ဖြစ်တာပဲ အဖတ်တင်ပါတယ်။

ခေတ်က နည်းပညာနဲ့ပတ်သက်လို့ နည်းတွေရောပစ္စည်းတွေပါ တနေ့တမျိုးဆိုတာထက် တနေ့တနေ့အမျိုးပေါင်းများစွာ ဆန်းသစ်ဖြစ်ပေါ်နေတာ မဟုတ်လား။ ကိုယ်က နောက်ကလိုက်ပြီး အတင်းဗမာမှုပြုလိုက်ပြန်လိုက်လုပ်နေလည်း ပြုပြု ပြန်ပြန်ပဲရှိတာပါ။ အများတကာအများစုကြီးက မသုံးကြပါဘူး။

ဟိုးအရင်ခေတ်တွေကလို တခုခုတီထွင်ပြီး သုံးသက်ကြာကြာခံတာမျိုးက ဒီဘက်ခေတ်မှာ အတော်နည်းသွားပါပြီ။ တခုနောက်တခု တန်းစီပြီးထွက်နေသလို လူတွေကလည်း အသစ်အသစ်တွေနောက် ကောက်ကောက်ပါအောင်လိုက်ကြတာ မဟုတ်လား။ ဒီတော့ ဒီတခုအတွက် ကိုယ်ကဗမာမှုပြုလိုက်ပြန်လိုက်တယ်၊ ဟော ခနပဲကြာတယ် နောက်တခုထပ်ထွက်လာတော့ ဒီဗမာမှုပြုတာပြန်တာကြီးက ဘယ်နားသွားသုံးရမှန်းမသိတော့ဘူး ဖြစ်ကုန်တတ်ပါတယ်။

အရင်ခေတ်တွေကလို တခုခုတီထွင်ပြီးသုံးစွဲချိန်ကြာကြာခံတာမျိုးကတော့ ဗမာမှုပြုတာပြန်တာကောင်းသလို လုပ်လည်းလုပ်ရမယ်လို့မြင်ပါတယ်။ ဥပမာ လေယဉ်ပျံ၊ မီးရထား၊ ဓာတ်လှေကား စတာမျိုးတွေက ခုထိလည်း တွင်တွင်ကျယ်ကျယ်သုံးနေကြတော့ ဝေါဟာရကလည်း တိမ်ကော မသွားဘူးပေါ့လေ။ ဒါတောင် ဘူးလက်ထရိန်းဆိုပြီးပေါ်လာတော့ ကျည်ဆန်ရထားဆိုပြီး ပြန်ကြသေးတာ ဘယ်မှာကြာကြာခံလဲ။ လူတိုင်းက ဘူးလက်ထရိန်းလို့ပဲခေါ်ကြတာပါ။ ဒရုမ်းတွေပေါ်လာတော့လည်း
မောင်းသူမဲ့လေယဉ်ဆိုပြီး ပြန်ကြပြုကြပါသေးတယ်။ ခု ဘယ်သူမှ အဲ့လိုမခေါ်ကြပါဘူး။ ဒရုမ်းကို ဒရုမ်းလို့ပဲခေါ်ပါတယ်။

နောက်ပြီး ရုပ်မြင်သံကြားဆိုပါတော့ အလွန်လှပကျစ်လစ်တဲ့ ဗမာမှုဗမာပြန်ပါ။ အချိန်အတန်ကြာ ခံခဲ့ပါသေးတယ်။ ဒါပေမဲ့ အခုများတော့ အစိုးရသတင်းစာတွေ ရုပ်သံလွှင့်ဌာနတွေကလွဲလို့ အပြင်မှာ ဘယ်သူမှ ရုပ်မြင်သံကြားလို့ မခေါ်ကြတော့ပါဘူး။ တီဗီဆို အင်္ဂလိပ်စာတတ်တတ် မတတ်တတ် သိကြပါတယ်။

ကွန်ပြူတာနဲ့ပတ်သက်ရင်လည်း အလားတူပါပဲ။ အပျော့ထည်တို့ အမာထည်တို့ဆိုပြီး လုပ်ကြသေးတာပဲ။ ဆော့ဖ်ဝဲတို့ ဟာ့ဒ်ဝဲတို့ဆို လူတိုင်းနားယဉ်ကြသလို လက်တွေ့မှာလည်း ဒီအတိုင်းပဲသုံးကြပါတယ်။ အသံထွက်မပီဦးတောင် လူတိုင်းနားလည်ပါတယ်။ တက်ဘလက်ကို သင်ပုန်းလို့ ဘယ်ကလေးကမှမခေါ်သလို ကွန်ပြူတာကိုလည်း စက်ဦးနှောက်လို့ ဘယ်လူကြီးမှ မပြောပါ။ ပြောရရင် ပြောစရာတွေများမှာပါ။ ဒါနည်းပညာနဲ့ လျှပ်စစ်ပစ္စည်းတွေ ယဉ်တွေလောက်ပဲကွက်ပြောကြည့်တာပါ။ အခြား အတွေးအခေါ်နယ်ပယ် စာပေနယ်ပယ် ယဉ်ကျေးမှုနယ်ပယ် နိုင်ငံရေးနယ်ပယ်တွေမှာလည်း အလားတူကိစ္စတွေရှိပါတယ်။

ကျနော့်သဘောကတော့ မလိုအပ်တဲ့ကိစ္စတွေမှာ မြန်မာ(ဗမာ) အတင်းဆန်ပြတာမျိုး၊ ဇွတ်အတင်း နသားပါးယားလုပ်ပြီး ဗမာမှုတွေ မြန်မာမှုတွေပြုနေတာမျိုးကိုရော မနှစ်မြို့ပါ။
ဒီဇင်ဘာ ၁၆၊ ၂ဝ၁၆

0 comments:

Post a Comment