(သတင်းနဲ့ မှတ်ချက်)၂၈-၁၂- ၂ဝ၁၆) ဘတ်စ်ကားများမှ ရမ်းကားတဲ့ယာဉ်မောင်း ယာဉ်လိုက်ဆိုးများကို ဆုံးမနှိပ်ကွပ်ရေးလူထုအဖွဲ့အစည်းများ ဖွဲ့နေကြပြီ။
ဒီကိစ္စဟာ အလုပ်သမားနဲ့ဝန်ထမ်းတွေအပါအဝင် သိန်းသန်းချီရှိတဲ့ ရန်ကုန်ပြည်သူလူထုရဲ့ နေ့စဉ်အကျိုးစီးပွားတွေနဲ့ဆက်စပ်နေတာမို့ လျစ်လျူရှုလို့ မရဘူး။
မထသ ယာဉ်လိုင်းမှ တချို့သောယာဉ်မောင်း၊ ယာဉ်လိုက်ဆိုးများ သောင်းကျန်းနေခဲ့တာတော့ ကြာပါပြီ။ ကားပေါ်မှာ တုတ်တွေ၊ သံတုတ်တွေနဲ့ လက်နက်တွေဆောင်လာတယ်။ သူတို့ စိတ်မထင်ရင် မထင်သလို ကားစီးခရီးသည်တွေပဲဖြစ်ဖြစ် တခြားယာဉ်လိုင်း၊ အိမ်စီးကားတို့ကပါလာတဲ့လူတွေကိုဖြစ်ဖြစ် လက်နက်တွေနဲ့ ရက်ရက်စက်စက် သေလုမျောပါးရိုက်နှက်တယ်။ အဖိုးအိုတောင် မငဲ့မညှာ ထိုးကြိတ်ရိုက်ပုတ်တာတွေလုပ်တယ်၊ တခြားကိစ္စတွေ ဘယ်သူ့တိုင်တိုင် ဘာမှ အရေးမယူဘူး။ အဖိုးအိုကို ထိုးကြိတ်သူကို လူအများ မကျေမနပ်ဆူပွက်လာတာတောင် ၈ ရက်ပဲဖမ်းချုပ်ပြီး ပြန်လွှတ်ပေးတယ်။
တကယ်ကတော့ ယဉ်မောင်းနဲ့ယာဉ်လိုက်အများစုဟာ မြို့နေဆင်းရဲသား လူတန်းစားတွေပါ။ သူတို့ထဲကလူနည်းစုကို မွေးထားပြီး မြှောက်ပင့်ပေးကာ ကိစ္စပေါ်ရင်အကာအကွယ်ပေးမယ်ဆိုတဲ့ နောက်ကွယ်ကလူတွေ ရှိနေပါတယ်။ သူတို့နဲ့အုပ်ချုပ်ရေးအာဏာပိုင်တွေက အလိုတူအလိုပါတွေဖြစ်နေပြီး ဥပဒေအတိုင်း တရားနည်းလမ်းကျစွာ အပြစ်ပေးအရေးယူရေးကိုဟန့်တားနေလို့ ဒီလို လူထုဆန့်ကျင်ရေး ကိစ္စတွေ ဆက်လက်ပေါ်ပေါက်နေရတာပါ။
ရန်ကုန်မှာ မထသ က ကိုင်ထားတဲ့ ဘတ်စ်ကားအရေအတွက် ၁ သောင်းကျော်ရှိတယ်။ ကားသမားတွေက နေ့စဉ် မထသကို တရားဝင် ငွေ ၆ဝဝဝ ကျပ် ပေးရတယ်။ တရားမဝင်က ၅ဝဝဝ ကျော် ပေးရတယ်။ ကားတစီး နေ့စဉ် တသောင်းကျော်။ ကားအစီးတသောင်းကျော်ဆိုတော့ မထသရဲ့ဝင်ငွေက တရက်တည်းကို သိန်းထောင်နဲ့ချီရှိနေတယ်။ ဒီလိုအကျိုးအမြတ်ကြောင့် သူတို့ ကားသမားတွေရမ်းကားနေတာကို လျစ်လျူရှုခဲ့ကြတယ်။
အခုတော့ သူတို့ မထိန်းနိုင်တော့ပါဘူးလို့ မထသက ဝန်ခံလိုက်ရပြီ။
ဒါတင်မက ကားခ ငွေ ပိုတောင်းတယ်။ မိန်းမသားတွေကို မဖွယ်မရာလုပ်တယ်။ သာမာန်လူတွေကို ရိုင်းပြစွာဆဲရေးစော်ကားတယ်။ ကားချင်း အလုအယက် ပြိုင်မောင်းတယ်။ ကားပေါ်က မြန်မြန်ဆင်းအောင် ခရီးသည်တွေကိုတွန်းချတာ လုပ်တတ်ကြတယ်။ ဒီလို တွန်းချလို့ အမျိုးသမီးတယောက် ခြေထောက်ကားကြိတ်ခံလိုက်ရတာ ဓာတ်ပုံသက်သေရှိတယ်။ ဒီလို စော်ကားတာတွေ ကြာလာတော့ ရန်ကုန်လူထု မခံနိုင်တော့ဘူး။ ဘယ်သူ့တိုင်တိုင် မထူးဘူး။ ဘယ်ထူးမလဲ။ အစိုးရကိုလည်း ငွေပေးထားရတာတဲ့။ ရဲတွေကိုဆို ပြောမနေနဲ့တော့။ ရန်ကုန်တိုင်းအာဏာပိုင်တွေက မသထဖျက်သိမ်းမယ်လို့ အစက ကြွေးကြော်ခဲ့တယ်။ လက်တွေ့မှာ မဖျက်တော့။ ဘာကြောင့်လဲ။ လူထုကတော့ ဆက်လက်သည်းမခံလိုတော့ပြီ။
ယာဉ်မောင်းဆိုး စပယ်ယာဆိုးတွေကို တပွဲတလမ်းဆုံးမလိုက်ပြီးပြီ။ ဒါသာမက- လူထုက ဘတ်စ်ကား ယဉ်မောင်း၊ ယဉ်လိုက်ဆိုးတွေကို ဆုံးမဖို့ လူထုအဖွဲ့အစည်းတွေ သက်ဆိုင်ရာနယ်မြေအလိုက် စဖွဲ့လာပြီ။ ဒီနေ့(၂၇ - ၁၂- ၂ဝ၁၆) မှာပဲ လူ ၄၄ ယောက်နဲ့ မင်္ဂလာတောင်ညွန့်မှာ ဖွဲ့လိုက်ပြီ။ တခြားမှာလည်း ဖွဲ့စည်းရေး စနေတာ ပြင်ဆင်နေတာတွေကြားနေရတယ်။ Facebook ပေါ်မှာတောင် (လူပါးဝ bus များ ရပ်) ဆိုတဲ့ အဖွဲ့ ဖွဲ့ထားပြီ။ မနထ အဖွဲ့စသဖြင့် အဖွဲ့တွေကို နာမည်အမျိုးမျိုးပေးလာကြတယ်။
ဒါပေမဲ့ ခု ဖြစ်နေတာတွေအားလုံးဟာ ခေတ်စနစ်ကြောင့် ဖြစ်ပေါ်လာရတယ်ဆိုတာလည်း မြင်ဖို့လိုပါတယ်။ အုပ်ချုပ်ရေးအာဏာပိုင်တွေက သူတို့အကျိုးစီးပွားတွေရရှိနေတဲ့အပေါ်မှာ ဥပဒေနည်းလမ်းနဲ့အညီ မှန်မှန်ကန်ကန် အပြစ်ပေးအရေးယူတာတွေမလုပ်လို့ ဖြစ်ပေါ်လာရ တာတွေပါ။ အပြစ်ရှိသူတွေအပေါ် အုပ်ချုပ်ရေးအာဏာပိုင်တွေက အကာအကွယ်ပေးပြီး အလိုတူအလိုပါဖြစ်နေလို့ ဒီကိစ္စတွေ ဆက်လက် ဖြစ်ပေါ်နေရတာပါ။ တရားဥပဒေစိုးမိုးရေး၊ ရပ်ရွာတည်ငြိမ်အေးချမ်းရေးဆိုတာတွေကို သူတို့ပဲကြွေးကြော်ပြီး သူတို့ပဲ ဖျက်ဆီးနေတာပါ။ အများပြည်သူ့တွေရဲ့ ခရီးသွားလာရေးအတွက် သက်သာချောင်ချိအောင် ဘတ်စ်ကားများ၊ ယာဉ်များကို စနစ်တကျစီမံဖွဲ့စည်း ဆောင်ရွက်မပေးနိုင်လို့ ဒါတွေ ဖြစ်နေရတာပါ။ ဒါကြောင့် ဒီလို ရမ်းကားမှုတွေ နောင်မှာ ဆက်လက်မဖြစ်ပွားအောင် အုပ်ချုပ်ရေး အာဏာပိုင်တွေနဲ့ တာဝန်ရှိသူတွေက ထိထိရောက်ရောက် အပြည့်အဝတာဝန်ယူဖို့တောင်းဆိုတာတွေ လုပ်ဖို့လိုပါတယ်။
မတရားမှုတွေကို ဘယ်သူ့တိုင်တိုင် ဘာမှ အရေးမယူဘူး-ဆိုတာရဲ့ဇာစ်မြစ်ဖြစ်တဲ့ စနစ်ဆိုး၊ အုပ်ချုပ်ရေးယန္တရားဆိုးကြီးကို ပြည်သူတွေ ဆန့်ကျင်တိုက်ပွဲဝင်နိုင်မှ၊ ပြည်သူ့အားနဲ့တွန်းလှန်နိုင်မှ ဒီကိစ္စတွေ လုံးဝချုပ်ငြိမ်းသွားမှာပါ။
(အရေးတော်ပုံဂျာနယ်မှကူးယူဖော်ပြတာဖြစ်ပါတယ်)
0 comments:
Post a Comment