(ေလာမိတဲ့အခါ)

(ေလာမိတဲ့အခါ)
NLD ဟာ ၂ဝ၂ဝ မှာ ခုလောက် လွတ်လွတ်ကျွတ်ကျွတ်နိုင်နိုင်ခြေမရှိဘူးလို့တွက်မိ ခုလောက်လုပ်ခွင့်ရှိနေတုန်းလေးမှာ အီးဂါးဗမင့်နဲ့ဖြစ်ရေးကို လောဆော်ပုံပေါ်တယ်။ တွန်းတွန်းထိုးထိုး လှုံ့လှုံ့ဆော်ဆော်လည်း အတော်လုပ်တယ်။ ဘယ်လောက်အထိလုပ်လဲဆို ယူနီကုဒ်သုံးရေး ဒေါ်စုကိုယ်တိုင်ထွက်ပြီး ပရိုမိုးရှင်န်းလုပ်တဲ့အထိပဲ။

အီးဂါးဗမင်န့်ဖြစ်ရေးအတွက် တခုတည်းသောစံနဲ့ ဗမာဖောင့်အသုံးပြုရေးဟာ မဖြစ်မနေလိုအပ်မှန်း လူတိုင်းသိကြပါတယ်။ အီးဂါးဗမင်န့်ဖြစ်မှ အစိုးရလုပ်ငန်းတွေ ဌာနဆိုင်ရာလုပ်ငန်းနဲ့ပုဂ္ဂလိကလုပ်ငန်းတွေမှာပါ အဆင်ပြေချောမွေ့မယ် နိုင်ငံတကာနဲ့ဆက်ဆံရေးမှာလည်း လွယ်ကူသက်သာအဆင်ပြေမယ်ဆိုတာလည်း လူတွေနားလည်သိမြင်ကြပါတယ်။

တွေးစရာက အားလုံး ယူနီကုဒ်ဖောင့်သုံးလိုက်ရုံနဲ့ အီးဂါးဗမင်န့်ဖြစ်သွားဖို့ဆိုတာ မလွယ်လှသေးဘူးဆိုတာပါ။ ဒါကတချက်ပါ။ နောက်တချက်က မြန်မြန်ဆန်ဆန် တွန်းတွန်းထိုးထိုးလုပ်တာဟာ နေရတိုင်းကောင်းတဲ့ကိစ္စမဟုတ်ဘူးဆိုတာပါ။ နိုင်ငံတကာမှာ အီးဂါးဗမင်န့်တွေဖြစ်လာဖို့ ဘယ်လောက်အချိန်ယူပြင်ဆင်ခဲ့ကြသလဲ အမြဲတမ်းလည်း စစ္စတမ်တွေ Update and Upgrade ဖြစ်အောင်လုပ်နေကြလဲ အဲ့ဒါတွေလည်းရှိပါသေးတယ်။ ကိစ္စတခုကို မြန်မြန်ဆန်ဆန် မှန်မှန်ကန်ကန်ပြီးပြတ်သွားဖို့ဆို ဘယ်လောက် ဖိဖိစီးစီးလုပ်နိုင်သလဲ ဘယ်လောက်စနစ်တကျရှိလဲ ဘယ်လောက် ကြိုတင်ပြင်ဆင်မှုရှိလဲ၊ ဘယ်လောက် အချိန်ယူပြီးလုံလောက်အောင်ပြင်ဆင်ထားသလဲက အလွန်အရေးကြီးပါတယ်။

ဒီနေရာမှာပြောစရာက တခုခုကို စနစ်တကျနဲ့မှန်မှန်ကန်ကန် မြန်ဆန်ဆန် အောင်အောင်မြင်မြင်ပြီးမြောက်သွားဖို့ဆို ကြိုတင်ပြင်ဆင်ဖို့ လုံလောက်တဲ့အချိန်ယူကိုယူရပါတယ်။ လုံလောက်တဲ့အချိန်ယူတာနဲ့ နှောင့်နှေးဖင့်လွှဲအောင် အချိန်ဆွဲတာကမတူပါ။ စိတ်မရှည်တတ်သူတချို့အဖို့တော့ အချိန်ယူပြင်ဆင်တာကို အချိန်ဆွဲတယ်လို့ကောက်ပြီး အတင်းလောဆော်တွန်းထိုးလုပ်တတ်ကြပါတယ်။

နည်းပညာကိစ္စတွေဟာ တိုးတက်ပါတယ်ဆိုတဲ့ပြည်ကြီးတွေမှာတောင် အချိန်နဲ့အမျှ ခေတ်မီနေအောင် လိုက်လျောညီထွေဖြစ်နေအောင် Update တွေ Upgrade တွေလုပ်နေကြရတာမဟုတ်လား။ ဗမာပြည်လို နည်းပညာပိုင်းနောက်ကျကျန်နေသေးတဲ့ပြည်ဆို ပိုတောင် အားထုတ်ရမှာပါ။ အားထုတ်တာမှာ ကျန်တာတွေအကုန်ပြည့်စုံစေဦး လုံလောက်တဲ့အချိန်ယူ ကြိုတင်ပြင်ဆင်ပြီး တကယ့်ကိုဖိဖိစီးစီးလုပ်ရမှာပါ။ ငါ့လက်ထက် ဒါတွေလုပ်ခဲ့တယ်ဆိုပြီး နံမည်ကောင်းယူချင်ဇောကြီးပြီး လောလော လောလောလုပ်ရင် ခုလိုပဲ အမြဲဖြစ်နေဦးမှာပါ။ နံမည်ကောင်းရတယ်ဆိုတာ အလုပ်က ပြည့်စုံကောင်းမွန်မှရတာပါ။

ခုက ဖေါင့်ကိစ္စလေးမို့သိတ်အရေးမကြီးဘူးထင်ရပေမယ့် သုံးစွဲသူတွေမှာ စိတ်ကသိကအောက်အတော်ဖြစ်ရပါတယ်။ တိုင်းပြည်နဲ့ချီတဲ့ နိုင်ငံရေးကိစ္စကြီးတွေမှာလည်း အလားတူလောမိတဲ့အခါ တိုင်းပြည်လူထု နစ်နာပါတယ်။ ခေါင်းဆောင်ကိုယ်တိုင် နမော်နမဲ့နဲ့ လောလော လောလော လုပ်ခဲ့လို့ လေးစားလိုက်နာနဲ့ ကာကွယ်စောင့်ရှောက်မှာလည်း နဖူးကျည်ပွေ့တွေ့ခဲ့ဖူးပါပြီ။ ဒါကိုထောက်ပြရတာက ၂ဝဝ၈ ဖွဲ့စည်းပုံလက်ခံတဲ့အမြင်ကနေထောက်ပြတာမဟုတ်ပါ။ လက်ခံနေကြသူတွေကြားမှာတောင် ပြောစရာဖြစ်ခဲ့တယ်ဆိုတာ သိသာရုံတင်ပြတာပါ။

ဒါတွေ ပြန်တွေးပြီးသင်္ခန်းစာယူဖို့ပါ။ ခု ကျနော်တို့ သုံးစွဲသူတွေမှာ အခက်အခဲတွေတွေ့ရပါတယ်။ တဖြည်းဖြည်းချင်းတော့ ကောင်းမွန်လာ ပြည့်စုံလာလိမ့်မယ်လို့ မျှော်လင့်ပေမယ့် ဖိဖိစီးစီး အချိန်ယူကြိုတင်ပြင်ဆင်ပြီးမလုပ်ခဲ့တဲ့ဒဏ်ကို ကြိတ်မှိတ်ခံနေရဦးမှာကတော့သေချာပါတယ်။ အာဏာသဘောမို့ သာမန်လူတွေမှာ အခုအခံတွေရှိနေစေဦး မလွဲမကင်းသာ လိုက်တော့လိုက်ပါရမယ်ဆိုတာကတော့ သဘာဝပါ။
မျိုးမြင့်ချို
အောက်တိုဘာ ၂၊ ၂ဝ၁၉