Thursday, December 13, 2012

ငြိမ်းချမ်းရေးပဲ့တင်သံ-အပိုင်း ၃၂ (မျိုးမြင့်ချို)

0 comments


ဒီဇင်ဘာ ၁၃ ရက် ၂ဝ၁၂ နေ့က အာရ်အက်ဖ်အေမှထုတ်လွှင့်ပြီး
သောတရှင်များခင်ဗျား…စစ်အစိုးရနဲ့ (၁၃)ဖွဲ့မြောက်အပစ်အခတ်ရပ်ခဲ့တာကတော့ ကရင်နီအမျိုးသားတိုးတက်ရေးပါတီလို့ဆိုတဲ့ KNPP ပဲဖြစ်ပါတယ်။ KNPP ရဲ့အရှည်က Karenni National Progressive Party ဖြစ်ပါတယ်။ ပရိုဂရက်ဆစ်ဗ်ဆိုတဲ့ အင်္ဂလိပ်ဝေါဟာရကို တိုးတက်သောဆိုတဲ့အဓိပ္ပါယ်နဲ့ မြန်မာလို ဘာသာပြန်ကြပါတယ်။ အဲ့ဒီပြန်ဆိုချက်ဟာ တခြားနယ်ပယ်တွေမှာ ဒီ့ပြင်အဓိပ္ပာယ်ကိုဆောင်ပေမဲ့ နိုင်ငံရေးနယ်ပယ်မှာတော့ လက်ဝဲဆန်သော၊ ကွန်မြူနစ်အတွေးအခေါ်ရှိသောဆိုတဲ့သဘောမျိုး ကောက်ယူကြပါတယ်။ လူတယောက်ကို (တိုးတက်တဲ့အမြင်ရှိသူလို့) ပြောလိုက်တယ်ဆိုရင် တခြားသူတွေစိတ်ထဲမှာ ဒီလူဟာလက်ဝဲသမား၊ ကွန်မြူနစ်၊ အနီလို့နားလည်သွားစေပါတယ်။ ခု ဒီအဖွဲ့အမည်မှာ ကရင်လို့ရိုးရိုးမဟုတ်ပဲ ကရင်နီဆိုပြီးဖြစ်နေတာကို သတိထားမိကြမယ်လို့ထင်ပါတယ်။ အဖွဲ့အမည်မှာလည်း တိုးတက်သောဆိုတဲ့ လက်ဝဲဆန်ဆန်အသုံးအနှုန်းအပြင်၊ လူမျိုးအမည်မှာလည်း အနီဆိုတာနဲ့တွဲနေလေတော့ ကြားရသူ့စိတ်ထဲမှာ ဒီအဖွဲ့ဟာ ကွန်မြူနစ်အဖွဲ့၊ လက်ဝဲဆန်တဲ့အဖွဲ့လို့တန်းပြီး ကောက်ချက်ဆွဲကြမှာသေချာပါတယ်။

အဲသလိုကောက်ချက်ဆွဲတာကိုလည်း လုံးလုံးမှားတယ်လို့ပြောလို့မဖြစ်ပါဘူး။ ဘာလို့လည်းဆိုတော့ အဖွဲ့ရဲ့နောက်ခံသမိုင်းအရ အဖွဲ့ခေါင်းဆောင်တချို့ဟာ လက်ဝဲသမားတွေဖြစ်တဲ့အပြင် ကွန်မြူနစ်ပါတီနဲ့အတွေးအခေါ်အရ၊ ရုပ်ဝတ္ထုပစ္စည်းအကူအညီတွေအရ အဆက်အစပ်ရှိခဲ့တာလည်းအသေအချာပါပဲ။ ဒါပေမဲ့ ဒီနေရာမှာ ကရင်နီလို့လူမျိုးအမည်ကိုဆိုလိုက်ရုံနဲ့ အနီတွေ၊ လက်ဝဲသမားတွေလို့ကောက်ချက်ဆွဲရင်တော့ မှန်ဖို့ဝေးမယ်ထင်ပါတယ်။ ဘာလို့လဲဆိုတော့ KNPP ရယ်လို့မပေါ်ခင်ကတည်းက ကရင်နီလူမျိုး၊ ကရင်နီနယ်ရယ်လို့ ရှိနှင့်ပြီးသားဖြစ်နေလို့ပါပဲ။ (၁၉၅၁) ခုနှစ် ဖွဲ့စည်းပုံအခြေခံဥပဒေပြင်ဆင်ချက်လုပ်ပြီးတဲ့အခါကျမှ အဲ့ဒီဒေသကို  ကယားပြည်နယ်၊ လူမျိုးကိုတော့ ကယားလူမျိုးလို့ပြောင်းခေါ်တာဖြစ်ပါတယ်။ (၁၉၈၃) ခုနှစ် သန်းကောင်စာရင်းကောက်တော့ ကယားထဲမှာပဲမျိုးကွဲပေါင်း(၁၄)ခုလောက် ရှိတယ်လို့ဆိုပါတယ်။ စာပေအနေနဲ့ကျပြန်တော့လည်း ဆရာကြီး ထဲဖူးဘဲ တီထွင်ခဲ့တဲ့ ကရင်နီ“ကြက်ယက်”စာနဲ့ တခြားစာတွေရှိပါတယ်။ ကရင်နီပြည်နယ်လို့ခေါ်ခေါ် ကယားပြည်နယ်လို့ဆိုဆို အဲ့ဒီပြည်နယ်ဟာ မြန်မာပြည်မှာအသေးဆုံးပြည်နယ်တခုဖြစ်ပေမဲ့ သူလည်း အာဏာရအစိုးရအဆက်ဆက်ရဲ့ လူမျိုးကြီးဝါဒဖိစီးမှုဒဏ်ကို ခါးစည်းခံရတာပါပဲ။

ဒါ့ကြောင့်မို့လို့(၁၉၄၈)ထဲမှာ ကရင်နီအမျိုးသားတိုးတက်ရေးပါတီကိုဖွဲ့စည်းပြီး ဗမာ့နိုင်ငံရေးစီးကြောင်းထဲကို ဝင်ချလာပါတယ်။ ဒါပေမဲ့ တရားဝင်နိုင်ငံရေးပါတီအဖြစ်ကိုတော့ (၁၉၅၈)ခုနှစ်ထဲရောက်မှရခဲ့တာပါ။ လူမျိုးစုတွေရဲ့တန်းတူခွင့်၊ ပြဋ္ဌာန်းခွင့်တွေအတွက်လက်နက်ကိုင် တိုက်နေခဲ့ရာကနေ(၉၃)ခုနှစ် နှစ်ကုန်ပိုင်းတွေမှာ ထိုင်းနိုင်ငံဆိုင်ရာမြန်မာစစ်သံမှူး ဗိုလ်မှူးကြီးသိန်းဆွေနဲ့ KNPP ဥက္ကဋ္ဌမန်းအောင်သန်းလေးတို့ ထိုင်းမှာတွေ့ဆုံပြီး အပစ်အခတ်ရပ်စဲရေးအတွက် စဆွေးနွေးခဲ့ကြပါတယ်။ (၉၄)ခုနှစ်ကုန်ပိုင်းရောက်တော့ KNPP ကိုယ်စားလှယ်အဖွဲ့နဲ့ နဝတစစ်အစိုးရကိုယ်စားလှယ်တွေ လွိုင်ကော်မှာထပ်တွေ့ဖြစ်ကြပါတယ်။ နောက်ဆုံး (၉၅)ခုနှစ် မတ်လရောက်တော့မှ နဝတဘက်က ဗိုလ်မှူးချုပ်မောင်ကြည်နဲ့ ဒုတိယစစ်ထောက်လှမ်းရေးချုပ် ဗိုလ်မှူးကြီးကျော်ဝင်းတို့နဲ့အပြီးသတ်တွေ့ကြတာဖြစ်ပါတယ်။ အဲ့ဒီပွဲမှာ ကေအင်န်ပီပီဘက်က ဒုတိယဥက္ကဋ္ဌခူးထဲဘူးဘဲ၊ အတွင်းရေးမှူးရီမန်ထူးတို့ကဦးဆောင်ခဲ့ပြီး စစ်အစိုးရနဲ့အပစ်ရပ်ခဲ့တာဖြစ်ပါတယ်။

သောတရှင်များခင်ဗျား.. ကေအင်န်ပီပီဟာလည်း သူ့ရှေ့ကအဖွဲ့တချို့လို အပစ်ရပ်စဉ်မှာ စာချုပ်စာတမ်းနဲ့လုပ်ခဲ့တာမဟုတ်ပါဘူး။
နောက်အစိုးရလက်ထက်ကျမှ နိုင်ငံရေးစကားပြောပေါ့ဆိုတဲ့ နှုတ်ကတိတွေနဲ့လက်မှတ်ထိုးခဲ့တာပဲဖြစ်ပါတယ်။ အပစ်ရပ်လိုက်တယ်ဆိုတာနဲ့ စစ်အစိုးရဘက်ကလည်း ထုံးစံအတိုင်းသူလုပ်စရာရှိတာတွေကိုလုပ်လာပါတယ်။ စီးပွားရေးလုပ်ငန်းတွေချပေးပြီး ဒေသဖွံ့ဖြိုးရေးဆိုတဲ့ခေါင်းစဉ်အောက်မှာ အဖွဲ့အစည်းရဲ့တပ်နေရာချထားမှု၊ အင်အားစုဆောင်းမှု၊ စုဖွဲ့မှုစတာတွေအပေါ်အကျပ်ကိုင်လာပါတော့တယ်။ ကေအင်န်ပီပီနဲ့စစ်အစိုးရအပစ်အခတ်ရပ်တာဟာ စလယ်ဝငတောင်ဖင်မမည်းလိုက်ဘူးလို့ ဆိုရမလိုပါပဲ။ (၁၉၉၅)ခု မတ်လ (၁)ရက် နေ့မှာရပ်ခဲ့တဲ့အပစ်အခတ်ဟာ အဲ့ဒီနှစ် ဇွန်လ(၁၅)ရက်မှာကျိုးပေါက်သွားခဲ့ပြီး သေနတ်သံတွေပြန်ထွက်လာပါတယ်။ (၃)လခံအပစ်ရပ်ရယ်လို့ အမည်တောင် တွင်ခဲ့ပါတယ်။ အပစ်ရပ်ခဲ့စဉ်ကရော ခုချိန်ထိတိုင်အောင်ပါ အဲ့ဒီအဖွဲ့ကိုလည်း မတရားသင်းကနေပယ်ဖျက်ပေးတာ မကြားခဲ့ရသေးပါဘူး။

သေတရှင်များခင်ဗျား.. စစ်အစိုးရနဲ့(၁၅)ဖွဲ့မြောက်အပစ်ရပ်ခဲ့တာကတော့ New Mon State Party(MNSP)လို့ဆိုတဲ့ မွန်ပြည်သစ်ပါတီဖြစ်ပါ တယ်။ မွန်ပြည်သစ်ပါတီဟာ (MPF)လို့ဆိုတဲ့ မွန်ပြည်သူ့တပ်ဦးကနေ ခွဲထွက်ပြီးပေါ်ပေါက်ခဲ့တာပါ။ (၁၉၅၈)ခုနှစ်ထဲမှာ နိုင်ရွှေကျင် (ခေါ်) နိုင်ဘလွင်ဦးဆောင်တဲ့အစုအဖွဲ့ကခေါင်းဆောင်တွေဟာ မွန်ပြည်သစ်ပါတီနဲ့တကွ (MNLA) လို့ဆိုတဲ့ မွန်အမျိုးသားလွတ်မြောက်ရေးတပ်မတော်ကိုပါ တပါတည်းထူထောင်ခဲ့ကြပါတယ်။ (၁၉၉၃)ခု စက်တင်ဘာလထဲမှာ ထိုင်းနိုင်ငံဆိုင်ရာမြန်မာစစ်သံမှူး ဗိုလ်မှူးကြီးသိန်းဆွေနဲ့တွေ့ဆုံပြီး အပစ်အခတ်ရပ်စဲရေးကိစ္စ စတင်ဆွေးနွေးခဲ့ပါတယ်။ အဲ့ဒီနှစ် အောက်တိုဘာထဲမှာ စစ်ထောက်လှမ်းရေးကိုယ်စားလှယ်တွေနဲ့ မွန်ပြည်သစ်ကိုယ်စားလှယ်တွေ ထပ်တွေ့ကြပြန်ပါတယ်။ မွန်ပြည်သစ်ဘက်က သူတို့ပါဝင်တဲ့တပ်ပေါင်းစုအနေနဲ့တွေ့ဖို့တောင်းဆိုခဲ့ပေမဲ့ စစ်အစိုးရက ဘယ်လိုမှ မလိုက်လျောတဲ့အဆုံး တစ်ဖွဲ့ခြင်းအနေနဲ့တွေ့တာကိုပဲလက်ခံပြီး ဆွေးနွေးလိုက်ရပါတယ်။ အဲ့ဒီတွေ့ဆုံပွဲတွေဟာ (၅)ကြိမ်တိတိဖြစ်ခဲ့ပါတယ်။ ပဉ္စမအကြိမ်မြောက်တွေ့ဆုံခဲ့တဲ့ (၁၉၉၅)ခု (၆)လပိုင်းထဲရောက်တော့မှ အပစ်အခတ်ရပ်စဲရေးဖြစ်ခဲ့တာပါ။ မွန်ပြည်သစ်ပါတီလည်း အပစ်ရပ်စဉ်မှာ စာချုပ်စာတမ်းနဲ့လုပ်ခဲ့တာမဟုတ်သလို၊  အပစ်ရပ်စဉ်ကရော ခုချိန်ထိပါ မွန်ပြည်သစ်ပါတီကို မတရားသင်းအဖြစ်ကနေ တရားဝင်ပယ်ဖျက်ပေးတာမတွေ့ရသေးပါဘူး။ မွန်ပြည်သစ်ပါတီနည်းတူ အင်အား၊ လူထုထောက်ခံမှု၊ သမိုင်းအစဉ်အလာ၊ နိုင်ငံရေးနောက်ခံတင်းရင်းခိုင်မာတဲ့ အဖွဲ့စည်းကြီးတွေ၊ ပါတီကြီးတွေဟာ စစ်အစိုးရတွေရဲ့နှုတ်ကတ်ိတွေအပေါ်အခြေတည်ပြီး ဘာ့ကြောင့်များ အပစ်ရပ်ခဲ့ကြသလဲ၊ အပစ်ရပ်ပြီးနောက်မှာတောင် သူတို့တွေကို ဘာ့ကြောင့် မတရားသင်းကနေဖျက်မပေးပဲထားခဲ့သလဲဆိုတာတွေကတော့ စဉ်းစားစရာတွေဖြစ်နေပါတယ်။

သောတရှင်များခင်ဗျား.. အပစ်ရပ်(၁၇)ဖွဲ့အနက်တင်ပြဖို့ကျန်နေသေးတဲ့ နောက် (၂)ဖွဲ့အကြောင်းကို နောက်အပတ်မှာ အပြီးသတ်တင်ပြပြီး အပစ်ရပ်ပြီးတဲ့နောက် စစ်အစိုးရရဲ့တင်းကျပ်ကိုင်တွယ်ပုံတွေကို ဆက်လက်တင်ပြပါ့မယ်။
ကျနော်မျိုးမြင့်ပါခင်ဗျား။


0 comments:

Post a Comment