Thursday, April 11, 2013

မိထ္ထီလာမြို့က ရိုင်းစိုင်းရမ်းကားမှုကြီး (တူမောင်ညို)

0 comments
မိထ္ထီလာမြို့က ရိုင်းစိုင်းရမ်းကားမှုကြီး (တူမောင်ညို)၂၀၁၃ ခုနှစ်၊ မတ်လ ၂၄ ရက်
မိထ္ထီလာမြို့ပေါ်တွင် မတ်လ ၂၀ ရက်နေ့မှ စတင်ဖြစ်ပွားခဲ့သောဖြစ်ရပ်သည် လူမဆန်မှုကို ရိုင်းစိုင်းယုတ်မာမှု၊ ရက်စက်ရမ်းကားမှု၊ အကြမ်းဖက်မိုက်မဲမှုသရဖူဆောင်းပေးလိုက်သည့် အကျည်းတန်အရုပ်ဆိုးမှုကြီးဖြစ်ပါသည်။ သိမ်မွေ့ပါသည်၊ ယဉ်ကျေးပါသည်ဟုဆိုသော မြန်မာ့လူ့အဖွဲ့အစည်းအတွက် ရှက်ဖွယ်လိလိ အမည်းစက်ကြီးလည်းဖြစ်သည်။“တရားဥပဒေစိုးမိုးရေး”ဟု အာဘောင်အာရင်းသန်သန်ပြောဆို လုပ်ကိုင်နေကြသူများကို လှောင်ပြောင်ပျက်ရယ်ပြုလိုက်သောဖစ်ရပ်လည်း ဖြစ်ပါသည်။
ဤကဲ့သို့သော အပြုအမူရိုင်းနှင့်လုပ်ရပ်ဆိုးကို ယဉ်ကျေးသောလူမှန်သမျှ တစ်စိတ်တစ်ဝမ်းတည်းသောစိတ်ထားဖြင့် ပြတ်ပြတ်သားသားဆန့်ကျင်ရမည်၊ ကန့်ကွက်ရမည်။ တားဆီးကာကွယ်ကြရမည်။
(ဗိုလ်)ဦးသိန်းစိန်အစိုးရသည် ပြဿနာကြီးထွားကျယ်ပြန့်ပွားသွားပြီးမှ ဝင်ရောက်ကိုင်တွယ်လေ့ရှိသည်၊ မလောင်ခင်/မဖြစ်ခင်က ကြိုတင်တားဆီးကာကွယ်မည့်အစီအမံနှင့် စိတ်ကူးစိတ်သန်းပင်ရှိပုံမရချေ။ ဤသို့သောပြဿနာများကို အစိုးရကပင် တစ်ဖက်လှည့်နှင့်လုပ်ကြံဖန်တီးနေသည်ဟုယူဆသည်။ ရွှေအရောင်းအဝယ်ပြုကြရာမှဖြစ်ပွားခဲ့သော သာမန်အချင်းများမှုနှင့်လက်ရောက်မှုသည် အကွက်ချောင်း အကောက်ကြံလိုသူများအတွက် “စနက်တံ”သဖွယ် ဖြစ်ခဲ့ရခြင်းဖြစ်သည်။ အချင်းများမှုနှင့်လက်ရောက်မှုဆိုသည်မှာ ရာဝတ်ဇဝတ်မှုခင်း အသေးအမွှားမျှသာဖြစ်သည်။
ယင်းသို့သော အမှုသေးအမှုမွှားသည် မိထ္ထီလာမြို့ရှိပြည်သူများ၏ အသက်အိုးအိမ်စည်းစိမ်များကိုဆုံးရှုံးစေခဲ့ရပြီ၊ ပျက်စီးစေခဲ့ရပြီ။ ပို၍ ဆိုးဝါးသည်မှာ နှစ်ပေါင်းများစွာအတူယှဉ်တွဲနေထိုင်ခဲ့ကြသော မိထ္ထီလာမြို့ရှိပြည်သူများအကြားက ယုံကြည်မှုထိခိုက်ပျက်ပားစေခဲ့ရခြင်း ဖြစ်သည်။
စနစ်တကျလေ့ကျင့်ထားသူ တုတ်ဓါးကိုင်လူရိုင်းအုပ်သည် ပြည်သူများ၏အသက်အိုးအိမ်နှင့် ယုံကြည်ကိုးကွယ်ရာဘာသာရေးအဆောက်အအုံများကို နာရီပိုင်းမျှအချိန်ကာလအတွင်း မယုံကြည်နိုင်လောက်အောင် ဖျက်ဆီးနိုင်ခဲ့ကြသည်။ သတ်ဖြတ်ခဲ့ကြသည်၊ မီးတင်ရှို့ခဲ့ကြသည်။
မိထ္ထီလာမြို့သည် စစ်တပ်မြို့တစ်မြို့ဖြစ်သည်။ သို့သော်လည်း  ရဲနှင့်စစ်တပ်အပါအဝင်အုပ်ချုပ်ရေးပိုင်းသည် ယင်းသို့ ဒုတ်ဓါးကိုင်လူရိုင်းအုပ်များ၏ သတ်ဖြတ်မှု၊လုယက်ဖျက်ဆီးမှု၊ မီးတင်ရှို့နေမှုများကိုအချိန်မီ တားဆီးခြင်းမပြုခဲ့၊ လက်ပိုက်ကြည့်နေခဲ့ကြသည်။
ဤလုပ်ရပ်သည် စီမံချက်တစ်ရပ်အဖြစ်အကွက်ချလုပ်ဆောင်နေသောအကြံကြီးမှုထဲမှ အစိတ်အပိုင်းတစ်ခုဟုယူဆပါသည်။ သို့အတွက် မြန်မာနိုင်ငံအခြားသောအရပ်ဒေသများတွင်လည်း ယင်းကဲ့သောသောလုပ်ရပ်ဆိုးများ ဖြစ်ပွားပေါ်ပေါက်နိုင်ဖွယ်ရာအလားအလာများရှိပါသဖြင့်
မြန်မာနိုင်ငံအရပ်ရပ်ရှိလူမျိုးပေါင်းစုံ၊ ဘာသာပေါင်းစုံပြည်သူများ သတိရှိကြဖို့လိုပါသည်။
ဘာသာရေး/လူမျိုးရေးဗန်းပြလှုံ့ဆော်ရန် စအကြမ်းဖက်ဖျက်ဆီးသူ လူရမ်းကားအုပ်များ၏ဘေးအန္တရာယ်မှ ထိရောက်စွာဟန့်တားကာကွယ်နိုင်ရန် လူမျိုးပေါင်းစုံပြည်သူများ၊ ဘာသာပေါင်းစုံပြည်သူများ တစ်စိတ်တစ်ဝမ်းတည်းသောစိတ်ဖြင့် ကျောချင်းကပ်ရင်ချင်းကပ်ကာ ဆောင်ရွက်ကြရပါလိမ့်မည်။
(ဗိုလ်) ဦးသိန်းစိန်အစိုးရကို အားကိုးယုံကြည်နေ၍မဖြစ်ပါ။ “ရခိုင်ပြည်နယ်ပဋိပက္ခ”တွင်လည်းကောင်း၊ ယခု“မိထ္ထီလာဖြစ်ရပ်”တွင်လည်းကောင်း (ဗိုလ်)ဦးသိန်းစိန်အစိုးရ၏ လက်ပိုက်ကြည့်နေသော၊ တစ်ဖက်သို့ပင်းသောသဘောထားနှင့်အပြုအမူကို မြင်တွေ့ခဲ့ကြရပြီ ဖြစ်သည်။ သို့အတွက် လူမျိုးစုံပြည်သူများ/ဘာသာပေါင်းစုံပြည်သူများအချင်းချင်း ဥစ္စာရင်လိုဥစ္စာရင်ခဲကြရလိမ့်မည်။
ဘာသာတရားတိုင်းသည် အများသူငါအပေါ်မတ္တာထားကြရန်၊ သည်းခံစိတ်မွေးမြူကြရန်  အခြေခံအားဖြင့် ဟောပြောသင်ကြမြဲဖြစ်သည်။ ဗုဒ္ဓဘာသာကလည်း ဝေနေယျသတ္တဝါများအပေါ် မေတ္တာထားရန်၊ သည်းခံခြင်းတရားကိုလက်ကိုင်ထားရန်၊ မေတ္တာတရားနှင့်သည်းခံခြင်း တရားကို သူတော်ကောင်းတရားအဖြစ်ကျင့်ကြံအားထုတ်ရန် ဟောပြောမြဲပါသည်။
သို့သော်လည်း “အိမ်ရှင်ဘာသာ” ၊ “ဧည့်သည်ဘာသာ”အဖြစ် ခွဲခြားပြောဆိုနေမှုသည် ဘာသာရေးရှော်ဗင်ဝါဒဆန်လွန်းပြီး၊ ပြည်သူများကို “ဘာသာရေးလူများစုနှင့်ဘာသာနေရေးလူနဲစု”အဖြစ် ခွဲခြားချိုးနှိမ်သည့်သဘောသက်ရောက်ပါသည်။ ဖြူဖြူမည်းမည်း ဝေနေယျများသတ္တဝါများအပေါ် ရင်ဝယ်သားပမာမတ္တာထားရမည်ဟု ရှေ့ဆောင်ညွန်ပြဆုံးမနေသူများအနေဖြင့်၊ သူတော်ကောင်းတရားလက်ကိုင်ထားသူများအနေဖြင့် စကားနှင့်တရားကိုလက်လွတ်စပယ်မပြောသင့် မဟောသင့်ပါ။
ဤသို့ပြောဆိုမှုသည် ဘာသာရေးအရေခြုံ၊“ဘာသာရေးဖက်ဆစ်”များအတွက် လှုံ့ဆော်သွေးထိုးပေးသလို ဖြစ်နေပါသည်။ မြန်မာနိုင်ငံသည် လူမျိုးပေါင်းစုံ/ဘာသာပေါင်းစုံပြည်သူများ အတူယှဉ်တွဲနေထိုင်လာခဲ့သောတိုင်းပြည်ဖြစ်ပါသည်။ ယင်းသို့ လူမျိုးပေါင်းစုံ/ဘာသာပေါင်းစုံ အတူယှဉ်တွဲနေထိုင်လာခဲ့ကြသည့် “ဟာမိုနီ”ကို ထိခိုက်မပျက်ပြားစေသင့်ပါ။
ယင်းသို့ အတူယှဉ်တွဲနေထိုင်လာခဲ့သည့် “ဟာမိုနီ”ကို ထိခိုက်ပျက်ပြားစေမည့် ရေးသားဟောပြောနေမှုမှန်သမျှကို တားမြစ်ဆန့်ကျင်ကြရမည်။ ယင်းသို့ အတူယှဉ်တွဲနေထိုင်လာခဲ့သည့် လူမျိုးပေါင်းစုံ၊ ဘာသာပေါင်းစုံပြည်သူများအကြား လူမျိုးရေးဘာသာရေးသွးကွဲစေမှုသည် အုပ်စိုးသူများအကြိုက်ပင်ဖြစ်သည်။ စစ်မှန်သောဒီမိုကရေစီအရေးနှင့် စစ်မှန်သည့်ပြည်ထောင်စုပေါ်ထွန်းရေးအတွက် အနှောင့်အယှက်အတားအဆီးဖြစ်ပါသည်။ လူမျိုးပေါင်းစုံပြည်သူများ အထူးသတိရှိကြပါရန်မတ္တာရပ်ခံအပ်ပါသည်။(တူမောင်ညို) ၂၀၁၃ ခုနှစ်၊ မတ်လ ၂၄ ရက်

0 comments:

Post a Comment