ဗိုလ်ချုပ်နှင့်ကျွန်တော်(ညိုမြ)

ဗိုလ်ချုပ်နှင့်ကျွန်တော် (ညိုမြ)
အမျိုးသားခေါင်းဆောင်ကြီးဦးအောင်ဆန်း၏ အိုးဝေမဂ္ဂဇင်းအယ်ဒီတာဘဝကို ထိုစဉ်က သူနှင့်အတူလုပ်ကိုင်ခဲ့ပြီး ငရဲခွေးကြီးလွတ်နေသည် ဟူသောဆောင်းပါးကိုရေးသားခဲ့သူ အိုးဝေဦးညိုမြ ခံစားရေးဖွဲ့ထားသော ဆောင်းပါးကောင်း တစ်ပုဒ်ပါ။ မြန်မာ့သမိုင်း၏ထင်ရှားသော သမိုင်းဝင် အဖြစ်အပျက်တစ်ခုကို ကာယကံရှင်တစ်ဦးဖြစ်သူ ဦးညိုမြက ပြန်လည်ရေးသားခဲ့သောကြောင့် အဖိုးမဖြတ်နိုင်သော အချက်အလက်မှန်များကို ရရှိပါသည်။ အခု သူတို့နှစ်ယောက်စလုံး မရှိကြတော့ပါဘူး။ သို့ပေမယ့် ဒေါင်းအိုးဝေကတော့ တွန်နေဆဲ၊ ကနေဆဲပါ။ သည်ဆောင်းပါးကိုဖတ်ရုံမက၊ သိမ်းဆည်းထားသင့်ကြောင်း အလေးအနက်ဆိုပါရစေ။

ဗိုလ်ချုပ်နှင့်ကျွန်တော်(ညိုမြ)
ဗိုလ်ချုပ်အောင်ဆန်းနှင့် မောင်သုမနတို့မှာ ကျောင်းနေဘက်သူငယ်ချင်းအရင်းအချာများ ဖြစ်ကြပေသည်။ ကျောင်းနေဘက်ဟုဆိုရာ၌ ပုဆိုးကွင်းသိုင်းလျက် ဖင်မလုံ၊ ခေါင်းမလုံ ဘုန်းကြီးကျောင်းတွင် ခုံညင်းထိုးခဲ့ကြခြင်း မဟုတ်ပေ။ မြန်မာပြည်၌အကြီးကျယ်ဆုံးဖြစ်သော အဓိပတိထိပ်သီးဧရာမ ရန်ကုန်တက္ကသိုလ်ကြီး၌ စာပေအတူသင်ကြားနေထိုင်ခဲ့ကြရာမှ သူနှင့်ကျွန်တော်ပူးပေါင်း၍ ထိုကျောင်းတော်ကြီးကို မီးရှိူ့ကာ (၁၉၃၆)ခုသပိတ်ကြီးအား လှုံဆော်ပေါ်ပေါက်စေခဲ့သူများဖြစ်ကြပေသည်။

ကိုအောင်ဆန်းနှင့်ကျွန်တော် စတင်တွေ့ဆုံပုံကို ယနေ့တိုင်မှတ်မိပါသေးသည်။ ပဲခူးကျောင်းဆောင်အပေါ်ဆုံးထပ်ရှိ ကျွန်တော်၏ ဝမ်းကွဲအစ်ကို ကိုတင်ထွတ်၏နေထိုင်ရာ လက်ထောက်အဆောင်မှူး အခန်းရှည်ကလေးအတွင်း တစ်ညသ၌ စကားပြောနေကြစဉ် ကိုအောင်ဆန်း ရုတ်တရက်ဝင်လာလေသည်။ ယောင်လည်လည် မချိုမချဉ်မျက်နှာထားဖြင့် ကျွန်တော့်အား သူက အတန်ကြာ ကြည့်နေပြီးနောက် “ဒီနှစ်အတွင်း ကိုယ့်လူကို တက္ကသိုလ်သမဂ္ဂမှာ အယ်ဒီတာအဖြစ်နဲ့ခန့်ထားချင်တယ်” ဟု ပြောလေတော့သည်။

ထိုနေ့မတိုင်မီက သူနှင့်ကျွန်တော် ကောင်းစွာသိကျွမ်းခြင်း မရှိခဲ့ပေ။ ထိုသို့ ရင်းနှီးခြင်းမရှိပါဘဲလျက် ယခုလို အရေးကြီးသောအလုပ်တစ်ခုကို ကျွန်တော့်အား ယုံကြည်စွာလာရောက်ပုံအပ်ခြင်းကြောင့် အတော်ပင်အံ့သြသွားမိလေသည်။

သုမန။ ။ “ထိုင်ပါဦးဗျာ၊ အခုလို ကျွန်တော့်ကို ရွေးချယ်ချီးမြှင့်တာကတော့ ဟုတ်ပါပြီ။ ဝမ်းသာပါတယ်။ ဒါပေမယ့် ကျွန်တော်က အိုင်အေတောင် မအောင်သေးဘူးဗျ။ အယ်ဒီတာဆိုတာ ဘီအေအထက်တန်းကျောင်းသားကြီးတွေဘာတွေသာ လုပ်ဖို့ကောင်းတယ်”

ကိုအောင်ဆန်း။ ။ “စာပေဘက်မှာဝါသနာပါပြီးရေးတတ်ဖတ်တတ်တဲ့လူကိုခန့်ရင် အကောင်းဆုံးပဲ။ ခင်ဗျားက (ညိုမြ)ကလောင်အမည်နဲ့ ဂန္ထလောကမဂ္ဂဇင်းမှာရေးတဲ့စာတွေကို ကျွန်တော်ကြိုက်တယ်”

သုမန။ ။ “ကျေးဇူးပါပဲဗျာ။ နို့ပေမယ့် အိုင်အေမအောင်သေးတဲ့ချာတိတ်ကိုခန့်ရင် တက္ကသိုလ်သမဂ္ဂကြီးတစ်ခုလုံး ဂုဏ်ငယ်သွားလိမ့်မယ်”

ထိုအချိန်က တက္ကသိုလ်မှထုတ်ဝေသောကောလိပ်မဂ္ဂဇင်းနှင့် သမဂ္ဂမှထုတ်ဝေသောမဂ္ဂဇင်းတို့မှာ အပြိုင်အဆိုင်ဖြစ်လေသည်။ ကောလိပ်မဂ္ဂဇင်းအယ်ဒီတာကို ကျောင်းအုပ်ကြီးမစ္စတာစလော့ကိုယ်တိုင် ရွေးချယ်ခန့်ထားလေ့ရှိသဖြင့် အလိုတော်ရိသံ ပါလေသည်။ သမဂ္ဂမှာကား လူဆူလူပူတို့၏စုဝေးရာအရပ်ဖြစ်၍ တော်လှန်ရေးစာပေများမွေးထုတ်ရာဌာနဖြစ်၏။ ထိုနှစ်အဖို့ သမဂ္ဂဥက္ကဋ္ဌမှာ သခင်နု ဖြစ်လေသည်။

ကိုအောင်ဆန်းမှာ ကျွန်တော်နှင့်ရွယ်တူဖြစ်သော်လည်း သူက ကျွန်တော့်ထက် တစ်တန်းပို၍မြင့်၏။ ထို့ကြောင့် သူပင် အယ်ဒီတာလုပ်ရန် ကျွန်တော်ကတိုက်တွန်းလေသည်။ နောက်ဆုံး၌ သူက အယ်ဒီတာလုပ်၍ ကျွန်တော်က မဂ္ဂဇင်းမန်နေဂျာလုပ်ရန် သဘောတူညီကြ၏။ သမဂ္ဂမဂ္ဂဇင်းဟုခေါ်တွင်ခြင်းကို သူက မကြိုက်သဖြင့် နာမည်အသစ်ရွေးချယ်ကြရာ၌လည်း ကျွန်တော်က အကြံပေးသည့်အတိုင်း ‘အိုးဝေ မဂ္ဂဇင်း’ ဟူသောအမည်ဖြင့် ထိုနှစ်မှစ၍ ထုတ်ဝေခဲ့ကြလေသည်။

အိုးဝေမဂ္ဂဇင်း
ကိုအောင်ဆန်းကား စာပေဝါသနာပါ၏။ သူများလို ဝတ္ထုများ၊ ကဗျာများ ရေးချင်ကြောင်း ကျွန်တော့်အားပြောဖူးပါ၏။ သို့သော် ကျွန်ဘဝမှ လွတ်မြောက်ရေးစိတ်ဓာတ်များနှင့် အထူးလွှမ်းမိုးနေသူဖြစ်ရကား ဆန်းသစ်နုယဉ်စာပေများကိုရေးသားလေ့ကျင့်ရန်အချိန်မရဘဲ သမဂ္ဂ၏ဝါဒ ထုတ်ပြန်ချက် ကြေငြာစာတမ်းများကိုရေးရခြင်းဖြင့်အချိန်ကုန်သူ ဖြစ်သည်။ အိုးဝေမဂ္ဂဇင်းကိုအတူလုပ်ကြရာတွင် အမြဲနီးကပ်စွာတိုင်ပင်နိုင် ကြရန် ကိုအောင်ဆန်းသည် ကျွန်တော်၏ထမင်းစားပွဲသို့ ပြောင်းရွှေ့လာကာ ထိုအချိန်မှစ၍ ထမင်းအတူတူစားသောက်ခဲ့ကြလေသည်။

သခင်သန်းထွန်း
ထမင်းအတူစားကြရာတွင် ကိုအောင်ဆန်းမှာ ကျွေးသမျှဟင်းနှင့် တင်းတိမ်ရောင့်ရဲတတ်သည်။ အခြားသူများအတွက် ဘာမှ မကျန်အောင် အစားကြီးသူ မဟုတ်ပေ။ ထိုအခါက သခင်သန်းထွန်းသည် ကုလားကျောင်းတစ်ခု၌ ကျောင်းဆရာလုပ်လျက်ရှိရာမှ ထမင်းဝဝ မစားရ၍လား မသိ၊ ကျွန်တော်တို့၏ထမင်းစားပွဲသို့ မကြာခဏလာ၍ စားတော်ခေါ်တတ်ပေသည်။ ထိုသို့ ဧည့်သည်များလာသောအခါ တရုတ်ဆိုင်မှ ဟင်းများ အပိုမှာယူကာ ကျွန်တော်နှင့် ကိုအောင်ဆန်းတို့က ဝေခွဲ၍ ဒကာခံရ စမြဲပင်။
(ဘုရားလည်းပြီးပြည်ကြီးလည်းပျက်)ဆိုသော စကားပုံကဲ့သို့ ကျွန်တော်တို့နှစ်ဦး တကုပ်ကုပ်လုပ်ကိုင်ခဲ့ကြသော အိုးဝေမဂ္ဂဇင်း ထွက်လာသောအခါ တစ်ကျောင်းလုံးပွက်လောရိုက်လျက် ရာဇဝင်တွင်သော (၁၉၃၆) ခု၊ ကျောင်းသားသပိတ်ကြီးမှောက်သွားတော့၏။

ကျောင်းသားအုံကြွမှု
ထိုနှစ်က သမဂ္ဂဥက္ကဋ္ဌရာထူးကို သခင်နု ရရှိချိန်မှစ၍ (ဒီနှစ်တော့ သပိတ်မှောက်ကြလိမ့်မယ်)ဟု ကျောင်းသားအများပင် ထင်ကြေးပေးခဲ့ ကြ၏။ ကျွန်ပညာနှင့်မျက်နှာဖြူဆရာများကိုလည်း အနှစ်နှစ်အလလကမုန်းတီးခဲ့ကြရာမှ ထိုနှစ်တွင် ကျောင်းသားအများ အုံပွင့်ကာ ရဲရဲဝံ့ဝံ့ အတိုက်အခံပြုလုပ်ကြချိန် ဖြစ်ပေသည်။ နယ်ချဲ့တိုက်ဖျက်ရေးမှာ နိုင်ငံရေးနယ်ပယ်မှ ကျောင်းသားလောကသို့ကူးစက်လာ၏။ တက္ကသိုလ်၌ အလိုတော်ရိကျောင်းသားများကို အထူးအခွင့်အရေးများပေး၍ မျိုးချစ်စိတ်ရှိသောကျောင်းသားများကို အထူးဖိနှိပ်သောစနစ်မှာလည်း တစ်နေ့တစ်ခြား ဇက်ရဲလာချိန်ဖြစ်ပေသည်။ တက္ကသိုလ်ပညာကို မရမကဆည်းပူးလို၍ မိဘများက အထူးခြိုးခြံထောက်ပံ့ခဲ့သော ကျောင်းသားအချို့တို့မှာ လူဖြူဆရာအား (ဆာ)ဟု မထူး၍သော်လည်းကောင်း၊ ကျောင်းတက်ရက်မမှန်ဟု ဆို၍သော်လည်းကောင်း ဘာမဟုတ်သောပြစ်ချက်တို့ဖြင့် မတရားအပြစ်ရှာကာ တစ်ချက်လွှတ်ကျောင်းထုတ်ခံကြရချိန်ဖြစ်ပေသည်။ နောက်ဆုံး၌ ကျောင်းအုပ်ကြီး ဒီဂျေစလော့အထူးမျက်မုန်းကျိုးသူသခင်နုကိုလည်း ဆရာများကိုပုတ်ခတ်သောမိန့်ခွန်းများပြောသည်ဟုဆိုကာ ကျောင်းထုတ်လိုက်ပြန် လေသည်။ ထို့ကြောင့် ကျောင်းသားများ တလှုပ်လှုပ်တရွရွဖြစ်နေချိန်၌ အိုးဝေမဂ္ဂဇင်းပေါ်ထွက်လာကာ ဒီဂျေစလော့တို့လူစုအား အပြင်းအထန်ဆော်ထည့်လိုက်ရာ တစ်ကျောင်းလုံး ဇောက်ထိုးမိုးမျှော်ဖြစ်သွားခြင်း ဖြစ်လေသည်။

မှတ်မိသေးသည်။ အိုးဝေမဂ္ဂဇင်းမထွက်ခင်တစ်ရက်က ကိုအောင်ဆန်းနှင့်ကျွန်တော်တို့သည် စာပုံနှိပ်တိုက်သို့သွားကာ စာအုပ်များ အချိန်မီ ချုပ်လုပ်ပြီးစေရန် ကုလားများကို ချော့မော့လျက် ကူညီလုပ်ကိုင်ပေးကြ၏။ ညနေ (၆)နာရီလောက်တွင် အားလုံးပြီးစီး၏။ ထို့ကြောင့် ကျွန်တော်တို့နှစ်ယောက်မှာ ဝမ်းသာအားရနှင့် မကြုံစဖူးအထူးဇိမ်ခံကာ တက္ကစီကားတစ်စီးငှား၍ စာအုပ်ထုတ်များ တင်ဆောင်ပြီး လေညှင်းခံလျက် ကျောင်းသို့ပြန်ခဲ့ကြလေသည်။ သမဂ္ဂတိုက်သို့မဝင်မီ ကျွန်တော်တို့နှင့်အလွန်ရင်းနှီးခင်မင်သော အင်္ဂလိပ်စာပါမောက္ခ မစ္စတာရုတ်စ် အိမ်သို့ဝင်ကာ အိုးဝေတစ်အုပ်ကို ဦးဦးဖျားဖျားလက်ဆောင်ပေးကာ သူ့ထံမှ ဘိလပ်ရည်များ တောင်းသောက်ခဲ့ကြသေး၏။
ထိုကားပေါ်တွင် မဂ္ဂဇင်းစာအုပ်များတင်လျက် လေညှင်းခံကာလိုက်ပါလာခဲ့သော ကိုအောင်ဆန်းနှင့်ကျွန်တော်ကား နက်ဖြန်မဂ္ဂဇင်းထွက်လျှင် ဗုံးပေါက်ကွဲသလို တစ်ကျောင်းလုံး တစ်ပြည်လုံးဂယက်ရိုက်သွားမည်ကို လားလားမျှ မမျှော်လင့်ခဲ့ကြပေ။ ထိုမဂ္ဂဇင်းစာအုပ်များ တင်ဆောင်လာခြင်းမှာ အမှန်အားဖြင့် လုံးဝပေါက်ကွဲစေတတ်သောလက်နက်ပုန်းများကို ခိုးယူတင်ဆောင်လာသကဲ့သို့ပင် ဖြစ်လေသည်။ သို့သော် ကလောင်တည်းဟူသောလက်နက်ဖြင့် ထိုသို့ပေါက်ကွဲစေမည့်ဆောင်းပါးကို စီစဉ်ရေးသားလိုက်သော တရားခံဖြစ်သူ ကျွန်တော်ပင်လျှင် မိမိ၏လက်နက်ကြောင့် ဤမျှ ပြင်းထန်စွာပေါက်ကွဲလိမ့်မည်ဟု မထင်မိခဲ့ပေ။

ထိုဆောင်းပါးမှာ အင်္ဂလိပ်ဘာသာဖြင့် တိုတိုတုတ်တုတ်နှင့် နာမည်ဝှက်ကာရေးလိုက်သောဆောင်းပါး ဖြစ်၏။ ထိုအချိန်က ကျောင်းအုပ် စလော့နှင့်ကပ်ကာ မျိုးချစ်ကျောင်းသားများကို အထူးချောက်တွန်းနေသောဆရာတစ်ဦးအား ကျွန်တော်က ငရဲခွေးနှင့်နှိုင်းယှဉ်ကာ ပက်ပက်စက်စက်ဆော်ထည့်လိုက်ခြင်း ဖြစ်ပေသည်။

ပေါက်ကွဲလေပြီ
ထိုဆောင်းပါးကိုရေးရာ၌ ကျွန်တော်သည် တက္ကသိုလ်တွင်ရှုပ်ထွေးနေပုံတို့ကို အတွင်းသိတစ်ဦးဖြစ်သည့်အလျောက် ကလောင်ရှင်တို့၏ ဝတ္တရားအတိုင်း ဆော်သင့်သောသူကို ထုတ်ဖော်ဆုံးမလိုက်ခြင်းဖြစ်ပေသည်။ မည်သူမျှ ကျွန်တော့်အား မြှောက်ပေးခြင်း မရှိပေ။ ကျောင်းသားနှင့်ဆရာတိုက်ပွဲတွင် သခင်နုနှင့်တကွ အများအပြားမျိုးချစ်ကျောင်းသား (၁၁)ဦးတို့မှာ ကျောင်းအုပ်ကြီး၏ အာဏာပြင်းထန် မှုကြောင့် ကျောင်းထွက်ရခြင်းတည်းဟူသောဒဏ်ရာများ ရရှိလျက်နေလေပြီ။ အခြားကျောင်းသားများလည်း တစ်ဗိုလ်ကျရင်တစ်ဗိုလ်တက် လမ်းစဉ်အတိုင်းစစ်ကြေညာလျက် အလှည့်ကျချီတက်တိုက်ခိုက်ကြရန်သာရှိတော့၏။ ထိုသို့ အိုးဝေမဂ္ဂဇင်းမှ တင်သွင်းလိုက်သော ထိုဆောင်းပါးမှာ ကျောင်းအုပ်ကြီးရုံးခန်းတွင် နောက်တစ်နေ့ သိုက်မြိုက်စွာပေါက်ကွဲလေသည်။

အယ်ဒီတာဖြစ်သူ ကိုအောင်ဆန်းအား မစ္စတာစလော့က ဆင့်ခေါ်စစ်ဆေးတော့၏။ ထိုဆောင်းပါးရေးသားသူကို အပြင်းအထန်အရေးယူရ မည်ဖြစ်၍ ၎င်း၏အမည်ကို ထုတ်ဖော်ပြောရမည်။ မပြောလျှင် ကိုအောင်ဆန်းကို ကျောင်းမှထုတ်ပစ်လိမ့်မည်ဟု စလော့ကဆို၏။ စာနယ်ဇင်း ထုံးတမ်းအရ အယ်ဒီတာလုပ်သူက ထုတ်ဖော်ပြောခွင့်မရှိသဖြင့် ထုတ်ဖော်မပြောနိုင်။ လုပ်ချင်ရာလုပ်ပါဟု ကိုအောင်ဆန်းက ဘုပြောခဲ့ လေသည်။

ခေါင်ကမိုးမလုံဆိုသကဲ့သို့ ကျောင်းဆရာလုပ်သူများက မတရားလုပ်ခဲ့ကြသဖြင့် ထိုမတရားမှုများကိုပြုပြင်စေရန် ကလောင်ဖြင့် လူထုအား ရေးသားတိုင်တန်းခဲ့ရာတွင် မတရားမှုဖန်တီးသူများကိုအရေးမယူဘဲ တိုင်တန်းသူကိုသာအပြစ်ရှာတတ်ခြင်းမှာ အာဏာပိုင်တို့၏ထုံးဓလေ့ပင် ဖြစ်ပေသည်။ ကိုအောင်ဆန်းကို ကျောင်းထုတ်လိုက်သောအခါ၌ကား ကျောင်းသားများသည် ထိုဓလေ့ဆိုးကို ကွက်ကွက်ကွင်းကွင်းကြီး သဘောပေါက်ကာ အထူးလှုပ်လှုပ်ရွရွ မခံမရပ်နိုင်ဖြစ်ကုန်ကြတော့၏။ နောက်တစ်နေ့၌ သမဂ္ဂခန်းမကြီးတွင် မစ္စတာရာရှစ်၊ ကိုထွန်းအုံနှင့် ကိုအုံး အစရှိသော ကျောင်းသားခေါင်းဆောင်များက မည်သို့အရေးယူသင့်ပုံကိုစည်းဝေးဟောပြောကြသောအခါ ကျောင်းလုံးကျွတ် ပရိသတ်များက (သပိတ် သပိတ် မှောက်မှောက်)ဟု သံပြိုင်အော်ကြလျက် အားလုံးပင် တက္ကသိုလ်ကြီးကိုစွန့်ပစ်ကာ ရွှေတိဂုံကုန်းတော် ပေါ်သို့ ပြောင်းရွှေ့သပိတ်မှောက်ခဲ့ကြသည်မှာ ရာဇဝင်၌စာတင်ပြီးဖြစ်၍ အထူးရေးရန်မလိုတော့ပေ။

အပြောနှင့်အရေး
ထိုအချိန်၌ သခင်နု၊ ရာရှစ်၊ ကိုအောင်ဆန်း စသော ကျောင်းသားခေါင်းဆောင်များက သပိတ်မှောက်ရန် ကျိတ်၍ ကြိုးဆွဲ၊ ခြေထိုးစီမံခဲ့ ကြသည်ဟုစွပ်စွဲခြင်းခံရ၏။ သို့သော် အမှန်အားဖြင့် ကျွန်တော်တို့အချင်းချင်း ဘာမျှတိုင်ပင်ခြင်း မရှိခဲ့ပေ။ ကျောင်းသားခေါင်းဆောင်တိုင်း မိမိတို့၏တာဝန်များကို ခပ်အေးအေးနှင့် မကြောက်မရွံ့ရွက်ဆောင်ကြရာတွင် အခြေအနေမှာလည်း အလိုလိုပင်တစ်ဆင့်ပြီးတစ်ဆင့် ကျွန်ုပ်တို့ဘက်မှ အရေးသာစေဖွယ်ဖြစ်ပေါ်လာခဲ့ရလေသည်။ ရာရှစ်စသော ကျန်သမဂ္ဂခေါင်းဆောင်များကလည်း တာဝန်အတိုင်း ကျောင်းသားထုကြီးထံသို့ ထိုပြဿနာကိုဆုံးဖြတ်ကြရန် ရှင်းလင်းစွာတင်ပြခဲ့၏။ ကျောင်းသားထုကြီးကလည်း အထိရောက်ဆုံးဖြစ်သော သပိတ်လမ်းစဉ်ကိုချက်ချင်းစွန့်စားဆုံးဖြတ်ကာ တက္ကသိုလ်မှ ထွက်ခွာခဲ့ကြ၏။

ကျွန်တော်မှတ်မိသလောက်တွင် ထိုမျှအပူတပြင်းအရေးကြီးလှသော ရက်အနည်းငယ်အတွင်း၌ ကိုအောင်ဆန်းသည် ကျွန်တော်အား ထိုအရေးတော်ပုံနှင့်ပတ်သက်၍ (အေးဆေးနေပါ)ဟူသော စကားတစ်ခွန်းသာပြောဖူးလေသည်။ ကျွန်တော်တို့အချင်းချင်း ထို့ထက် နှိုက်နဲရှုပ်ထွေးသော စည်းလားရိုက်မှု၊ စက်ပုန်းခုတ်မှုများ ဘာမျှ မရှိခဲ့ချေ။ ဤမျှ ရှင်းလင်းပြတ်သားစွာ ခပ်အေးအေးနှင့် တစ်ခုပြီးတစ်ခု အလိုကျဖြစ်မြောက်သွားသောကိစ္စမျိုးကို ယခုတိုင် တစ်ခါမျှ မတွေ့ကြုံဖူးပေ။
တက္ကသိုလ်၌ အတူစား၊ အတူသွား၊ အတူတူ တိုက်ပွဲဆင်လျက် လေးနှစ်ကြာမျှ ကိုအောင်ဆန်းနှင့်ပေါင်းသင်းနေထိုင်ရာတွင် ကျွန်တော်သည် အောက်ပါအဖြစ်အပျက်ကလေးများကို သတိရမိ၏။

ကိုအောင်ဆန်း၏စိတ်ဓာတ်
ကိုအောင်ဆန်းကား စိတ်တိုတတ်၏။ အပြောအဆိုမလိမ္မာသဖြင့် ဓာတ်သိသော သမဂ္ဂရဲဘော်များမှအပ သူ့အဖို့ မိတ်ဆွေများများ မရှိပေ။ သမဂ္ဂ၌လည်း သူနှင့် ဘုမကျသူဟူ၍ မရှိချေ။ တစ်ခါက ရွှေတိဂုံသပိတ်စခန်းမှအပြန်တွင် ထိုနှစ်အတွက် သူ့မှာတစ်ခြားအလုပ်ကိစ္စရှိသဖြင့် သူလုပ်ရန်ရှိသောအလုပ်များကို ကျွန်တော်က လုံးဝတာဝန်ယူရန်လွှဲအပ်လေသည်။ ကျွန်တော်ကလည်း ထိုနှစ်အဖို့ အိုးဝေအယ်ဒီတာအဖြစ် တာဝန်ယူပြီးဖြစ်၍ နောက်ထပ်လက်မခံနိုင်ကြောင်း ပြောသောအခါ ရှူးရှူးရှဲရှဲလုပ်သဖြင့် ထ သတ်ကြရန် ဟန်ပြင်လေသည်။ အခြား အမှုဆောင်များက ဝိုင်းဝန်းဖြန်ဖြေသဖြင့်ပြီးသွား၏။ ထိုနေ့ညနေ၌ ကျွန်တော့်အခန်းသို့ သူရောက်လာကာ သူက စိတ်မကောင်းဖြစ်နေသဖြင့် လွန်ကျူးမိကြောင်းကိုဝန်ချတောင်းပန်လေသည်။ သူက မတောင်းပန်လျှင်လည်း ကျွန်တော်က အကြောင်းသိချင်းဖြစ်၍ ကျေနပ်ပြီး ဖြစ်လေသည်။ သို့သော် သူက ကလေးသဖွယ် ဖြူစင်သောစိတ်ဓာတ်နှင့် မိမိမှားသည်ကို သိရှိချိန်၌ အကြွေးမထားဘဲ မာန်မာနများကို လုံးဝပယ်ဖျောက်ကာ ချက်ချင်းဖွင့်ဟပြောဆိုသည်ကို ကျွန်တော် ဝမ်းမြောက်စွာနှင့်မှတ်သားမိ၏။ ဤကား ကိုအောင်ဆန်း၏ ချီးကျူးဖွယ် အချက်ကြီးတစ်ရပ်ပေတည်း။

ထိုနှစ်က မစ္စတာရာရှစ်သည် သမဂ္ဂဥက္ကဋ္ဌအဖြစ်နှင့်ဆောင်ရွက်ရာတွင် ၎င်းကို ကုလားဖြစ်၍ မလိုမုန်းထားအပြစ်ရှာသူများ ပေါများ ခဲ့လေသည်။ တစ်ခါက စည်းဝေးပွဲတစ်ခုတွင် ရာရှစ်အား အယုံအကြည်မရှိအဆိုသွင်းရန်စီစဉ်ကြသည်ကို ကျွန်တော်က ကြိုတင်ကြားသိ လေသည်။ ထိုအချိန်၌ အခြားသော သပိတ်ရဲဘော်ကျောင်းသားခေါင်းဆောင်တို့မှာလည်း နယ်ထွက်နေကြ၏။ ကိုအောင်ဆန်းမှာလည်း ဖျားနေ၍ဆေးရုံတက်နေ၏။ ကျွန်တော်ကလည်း အရေးသမားဖြစ်ပြီး စကားမပြောတတ်၍ ထိုစည်းဝေးပွဲတွင်ဝင်ရောက်ပြောဆိုရန် မဖြစ်နိုင်ချေ။ ထို့ကြောင့် နောက်ဆုံး၌ ဆေးရုံတွင်ငှက်ဖျားတိုးနေသော ကိုအောင်ဆန်းထံသို့ပင်သွားရောက်ကာ (ကိုယ့်လူ ထပါဦး၊ ခင်ဗျား မရှိရင် မဖြစ်ဘူး)ဟု ဆိုကာ သူ့ကိုဆေးရုံမှ သမဂ္ဂအထိဖက်တွဲခေါ်ဆောင်ခဲ့ရလေသည်။ သမဂ္ဂလက်ဖက်ရည်ဆိုင်ခန်းသို့ရောက်မှ ကွီနိုင်နှင့် လက်ဖက်ရည် အနည်းငယ်တိုက်ကာ စည်းဝေးရာခန်းမကြီးသို့ တွဲတက်ခဲ့ရလေသည်။ ထိုနေ့အဖို့ ကိုအောင်ဆန်းမှာ နေမကောင်းသော်လည်း ရာရှစ်၏ ကောင်းသောအချက်များကိုဖော်ထုတ်၍ အထူးလေးနက်စွာပြောဆိုရာတွင် အတိုက်အခံလူစုက ၎င်းတို့အဆိုကို ရုတ်သိမ်းသွားကြ လေသည်။ ကိုအောင်ဆန်းသည် ရဲဘော်လူကောင်းများအတွက် မယိုင်းမယိုင်ထောက်ခံကူညီတတ်ခြင်း၊ မိမိကျန်းမာရေးကိုဂရုမစိုက်ဘဲ တာဝန်ဆောင်ရွက်ခြင်းတို့မှာ ကျောင်းသားဘဝ၌ပင် ထင်ရှားခဲ့လေသည်။

ထောင့်မကျိုးလို့
ရာရှစ်၏ ဥက္ကဋ္ဌသက်တမ်းကုန်ဆုံးခဲ့ပြီးနောက် ဥက္ကဋ္ဌသစ်ရွေးချယ်ရန် အချိန်ကျရောက်ခဲ့ရာတွင် ဒုတိယဥက္ကဋ္ဌဖြစ်သူ ကိုအောင်ဆန်းကို ထုံးစံအတိုင်း တင်မြှောက်ကြရန်ပင်ဖြစ်လေသည်။ သို့သော် ထိုအချိန်၌ သူ့အား အမှုဆောင်အဖွဲ့၌ထောက်ခံသူမှာ ကျွန်တော်တစ်ယောက်သာ ရှိလေတော့၏။ အဘယ်ကြောင့်ဆိုသော် သူ့အား ထောင့်မကျိုးသူဖြစ်၍ သူရသင့်ရထိုက်သောနေရာတွင် ကိုဘဂျမ်း(ယခု ဝန်ကြီး)အား ရွေးချယ်တင်မြှောက်လိုက်ကြလေသည်။ ဦးထွန်းအုံ၊ ကိုလှရွှေ၊ ကိုသိန်းအောင်၊ ကိုဗဟိန်းစသည်တို့က သူ့အား တစ်နှစ်လောက်စောင့်ဆိုင်း၍ ပေါင်းသင်းဆက်ဆံရေးလေ့လာရန် ပြောဆိုခဲ့ကြလေသည်။ ကိုအောင်ဆန်းသည် သူငယ်ချင်းများ၏ဆုံးမချက်ကို ဘာမျှပြန်မပြောဘဲ စည်းကမ်းသေဝပ်စွာ ကြိုးစားလိုက်နာခဲ့ပေသည်။ နောင်တစ်နှစ်တွင် ထိုသို့အများ၏ဆန္ဒကို မသွေမဖည်လိုက်နာတတ်သော အရည်အချင်းကိုပင် အထူးထုတ်ဖော်ချီးကျူးကာ ကိုအောင်ဆန်းကို အားလုံးက ဥက္ကဋ္ဌအဖြစ်ရွေးချယ်လိုက်ကြလေသည်။

နိုင်ငံရေးသို့
ထိုနှစ်အတွင်း တစ်ညနေတွင် ကိုအောင်ဆန်းနှင့်ကျွန်တော်သည် သထုံကျောင်းဆောင်ရှေ့၌ လမ်းလျှောက်လျက်ရှိကြစဉ် သူက ရုတ်တရက် “ကိုယ့်လူ၊ ကိုယ်တော့သွားတော့မယ်၊ ကျောင်းထွက်ပြီးနိုင်ငံရေးထဲကို ခြေစုံပစ်ဝင်တော့မယ်”ဟုပြော၍ သခင်ပါတီသို့ဝင်ကာ တကယ့်တိုက်ပွဲ များတွင် ဝင်နွှဲတော့မည်ဖြစ်ကြောင်းကိုပြောလေသည်။ သူက ထိုသို့ပြောနေစဉ် ကျွန်တော်သည် အထူးဝမ်းနည်းလာ၏။ ကျွန်တော်တို့ သူငယ်ချင်းများ လေးနှစ်ကြာမျှ ဥမကွဲသိုက်မပျက် နေထိုင်အလုပ်လုပ်ခဲ့ကြသည်မှာ ကမ္ဘာကလေးတစ်ခုကဲ့သို့ပင်မှတ်ထင်ကာ ထိုကမ္ဘာသည် မည်သည့်အခါမျှ ပျက်မည်မဟုတ်ဟူ၍မှတ်ထင်နေခဲ့ကြ၏။ သို့သော် အချိန်သည် ကုန်မှန်းမသိကုန်ဆုံးခဲ့၍ ကိုအောင်ဆန်းကား ဘီအေအောင်ပြီးဖြစ်လျက် ကျွန်တော့်အဖို့လည်း ထိုနှစ်မှာ နောက်ဆုံးနှစ်ပင်ဖြစ်ကြောင်းကို သတိရလေသည်။

ကျွန်တော်တို့နှစ်ဦး ရင်းနှီးခင်မင်စွာ သွားအတူ၊ လာအတူနေထိုင်ခဲ့ကြသော လေးနှစ်ရာသီခေတ်ကလေးကား ကုန်ဆုံးလေပြီ။ လောကတွင် အပျော်ဆုံး၊ အရွှင်ဆုံး၊ အရူးဆုံး၊ အမိုက်ဆုံးဖြစ်သောကျောင်းသားဘဝကား ဆုံးခန်းတိုင်လေပြီ။

ကျွန်တော်က စိတ်ဓာတ်မွန်မြတ်စွာ တိုင်းပြည်အတွက်စွန့်စားရန်အဓိဋ္ဌာန်ကို ချီးကျူးမိသော်လည်း သူ့အတွက် စိုးရိမ်မကင်းရှိမိပုံကိုပြောပြ၏။ “နိုင်ငံရေးလောကဟာ သိပ်ပြီးရှုပ်တယ်၊ ဆိုးတယ်။ ဒီမှာဆိုယင် ကျွန်တော်တို့အချင်းချင်း ခင်ဗျားကိုနားလည်တယ်၊ အစစအရာရာမှာ သူငယ်ချင်းတွေမို့ ခင်မင်ယုယရှိကြတယ်။ နိုင်ငံရေးထဲကိုခြေစုံပစ်ဝင်ရန် ခြေထိုးတာတွေ၊ ကြမ်းတမ်းယုတ်မာတာတွေနဲ့တွေ့ပြီး နေရာတကာ ခင်ဗျားပဲ ဒုက္ခရောက်စရာတွေများတယ်ဗျ။ ခင်ဗျားကလည်း ငယ်သေးတယ်”ဟု ကျွန်တော်က ပြောမိလေသည်။ ဗိုလ်ချုပ်ကား ဆည်းဆာချိန် ကောင်းကင်သို့မော့ကြည့်လျက် “အမေ့အတွက်လည်း ဘာမျှ ကျေးဇူးမဆပ်ရသေးဘူး၊ လခစားလုပ်ဖို့လည်း စိတ်မရှိတော့ဘူး။ ဘာပဲဖြစ်ဖြစ်လေ သွားမယ့်လမ်းကိုသွားရမှာပဲ”ဟု လွမ်းစိတ်နှင့်အဓိဋ္ဌာန်စိတ်များရောပြွမ်းကာ အသံမာမာနှင့်ပင်ပြောလေသည်။

“သွားတော့မယ်”ဟု သူက ပြောလိုက်သဖြင့် ကျွန်တော့်အဖို့ ထိုသမဂ္ဂကမ္ဘာကလေးနှင့်တကွ တိုတောင်းလှသော တက္ကသိုလ် ကျောင်းသားခေတ်ကလေးကို ကားလိပ်ချလိုက်သလိုဖြစ်သွားတော့၏။ အမိမြေအလွမ်းပြေဘလော့ဂ်မှ ကူးယူဖော်ပြထားသည်

ယူတာက ဒီနေရာကဖြစ်ပါတယ် http://kammasanpya.blogspot.co.uk/2011/05/blog-post_27.html