၂ဝ၁၃ ဒီဇင်ဘာဒုတိယပတ်ထဲမှာရေးဖြစ်တဲ့ တိုနန့်နန့်လေးတွေ (မျိုးမြင့်ချို)

၂ဝ၁၃ ဒီဇင်ဘာဒုတိယပတ်ထဲမှာရေးဖြစ်တဲ့ တိုနန့်နန့်လေးတွေ (မျိုးမြင့်ချို)

"ဘာသာတရားတွေမရှိရင် ကမ္ဘာကြီးဘာဖြစ်မလဲ လို့မေးတာကို ကျနော်က ရှိလို့ဖြစ်နေရတဲ့ စစ်၊ ပဋိပက္ခ၊ အကြမ်းဖက်လူသတ်ပွဲတွေနဲ့ အမုန်းတရား အာဃာတတွေ ပျောက်သွားမှာသေချာကြောင်း နဲ့၊ ပြဿနာပေါင်းသောင်းခြောက်ထောင်နဲ့ ချာချာလည်ဖွတ်ဖွတ်ညက်ညက်ကြေနေတဲ့ ကမ္ဘာကြီးအဖို့ ပြဿနာတစ်ခုလျော့သွားလည်း မနည်းပါလား၊ မသက်သာပါ့လား" လို့ ပြန်ပြောဖြစ်ပါတယ်။ ခေါင်းထဲရှိနေတာက ဘာသာတရားမရှိခင်တုန်းကရော ဘာတွေဖြစ်ခဲ့သလဲ။ ရှိပြီးနောက်နဲ့ အခုရောဘာတွေဖြစ်နေလဲ။ ဘာ့ကြောင့်ရော ဘာသာတရားတွေက ရှိလာပေါ်လာ တီထွင်လာကြရသလဲ။ ဉာဏ်လည်း(အများသူငှာနှယ်)ပေမီဒေါက်မီမဟုတ်ဘူး။ အချက်အလက်လည်း မပြည့်စုံဘူး (ပြည့်စုံဖို့လည်းမဖြစ်နိုင်)။ ဆင်ခြင်တုံတရားနဲ့ တွေးခေါ်မြော်မြင်မှုမှာလည်း ဘက်ရှိသူ/လိုက်သူ ဆိုတော့ ဘက်မတူသူတွေနဲ့ အကောက်အယူ တူတာလည်းဆန်းတဲ့ကိစ္စမဟုတ်ပြန်ဘူး။ ကဲဗျာ အဲ့ဒီ မဆန်းတဲ့ကိစ္စကိုပဲ စကားလုပ်ပြောကြည့်ကြရင် ဘယ့်နှယ်နေမလဲ။ (ဘာသာတရားရှိတော့ဘာဖြစ်သလဲ)

ကိုကိုကြီးနဲ့မင်းဇေယျတို့ပြောစကားပေါ်က ကျနော့်အကောက်အယူ
အသက်အရွယ်အရဖြစ်ဖြစ် နိုင်ငံရေးဘဝအရဖြစ်ဖြစ် ဒေါ်အောင်ဆန်းစုကြည်အလွန် မှတ်ပုံတင်ပါတီထောင် ၂ဝဝ၈ စစ်လွှတ်တော်/ဗ မာ့နိုင်ငံရေးအခင်းအကျင်းမှာ ရှစ်ပူး-ငြိမ်း/ပွင့်တွေကို ကျနော်(တို့)အနေနဲ့ တစုံတရာမျှော်လင့် ပုံဖော်ထားခဲ့ဖူးတယ်။ ခေတ်ကို အပြိုင်ဖြတ်ခဲ့ကြဖူးတဲ့ ခံဖော်ခံဘက်တွေကနေ ကိုယ့်ခေါင်းဆောင်/တိုင်းပြည်ခေါင်းဆောင်တွေအဖြစ် မြင်ချင်တဲ့အာလျ ရှိကြောင်းလည်းပြောခဲ့ရေးခဲ့ဖူးတယ်။ ခု ဒီနေရာမှာ ကျနော်(တို့) မျှော်လင့်ပုံဖော်ထားသလို စစ်အုပ်မှာလည်း ဒီလူတွေအပေါ် ရည်မှန်းပုံသွင်းချက်တွေရှိတာခြင်းမှာတူကြပါတယ်။ မတူတာက ကျနော်တို့က ဒေါ်စုအလွန် ၂ဝဝ၈ လွှတ်တော်နိုင်ငံရေးအခင်းအကျင်းမှာ ဒီလူတွေကို ပုံဖော်တာဖြစ်ပြီး စစ်အုပ်စုကတော့ အင်န်အယ်လ်ဒီကို “ကိုင်”ဖို့နဲ့ လူထုကိုလှည့်ဖျားဖို့ ဒီလူတွေကို (ဒေါ်စုမလွန်ခင်)ဒေါ်စု မျက်မှောက်မှာတင် ပုံသွင်းယူတာပါပဲ။
ဒီနေရာမှာ ဘာလို့ ၂ဝဝ၈ စစ်လွှတ်တော်ဗမာ့နိုင်ငံရေးအခင်းအကျင်းထဲမှာမှ မျှော်လင့်ချက်သွားထားရ သလဲဆိုတော့ ဒီလူတွေအနေနဲ့ စစ်အာဏာရှင်ဆန့်ကျင်ရေးမှာ ဒိတ်ဒိတ်ကြဲတွေမှန်ပေမယ့် စစ်အာဏာရှင်စနစ်ဖျက်သိမ်းရေးကိုဆုံးခန်းတိုင်ဆောင်ရွက်နိုင်မယ်မဟုတ်လို့ ယုံကြည်ယူဆလို့ပါပဲ။ အဲ့သလိုယုံကြည်ရတာမှာလည်း အကြောင်း(၂)ခု ရှိပါတယ်။
တကြောင်းက လစ်ဘရယ်ဒီမိုကရေစီလို့ကြွေးကြော်ပြီး ရက်ဒီကယ်လ်အယူအဆတွေကိုလက်မခံလို့ပြော ပလားဆို တိုက်ပွဲတဝက်တပျက်မှာရန်သူနဲ့စေ့စပ်ပြီး ကိုယ်ကျိုးထွက်ပေါက်ဘက် တိမ်းညွှတ်သွားကြသူတွေ ချည်းလိုလို အတွေ့များတာကြောင့်ပါ။ လူထုနဲ့နောက်လိုက်တွေကိုချန်ကာ တိုက်ပွဲထဲကနေကိုယ်လွတ်ရုန်း ထွက်ပြီး ငွေကြေး ရာထူး စည်းစိမ်တွေနောက် ကောက်ကောက်ပါသွားတာတွေ ကမ္ဘာ့သမိုင်း-ဗမာ့သမိုင်းမှာ အထင်အရှားရှိပါတယ်။
နောက်တကြောင်းက အသက်အရွယ်တွေပါ။ ရာစုနစ်ထက်ဝက်လောက် စစ်အာဏာနဲ့ ဘာသာ/လူမျိုးရေး အခြေပြုအစွန်းရောက် အမျိုးသားရေးဝါဒအမြစ်တွယ်နေတဲ့လူ့အဖွဲ့အစည်းထဲမှာ ထုနဲ့ထည်နဲ့ အခြေတည်မိနေပြီဖြစ်တဲ့စစ်အာဏာအကျိုးစီးပွားကြီးနဲ့ အစွဲအလမ်းကြီး/အညှာလွယ်မှုတွေကို ကာလတိုတခုအတွင်း အပြီးအပြတ်ပယ်ရှင်းဖို့ဆိုတာ သူတို့အဖို့ခဲယဉ်းဝန်တာကြီးလှသလို
အချိန်လည်းယူရ/ပေးရမယ့်ကိစ္စပါ။ ဒီလူတွေ အခု အသက်က ၅ဝ တန်းတွေ။ နေရလှ နောက် နှစ်အစိတ် သုံးဆယ်ပဲ။ ပိုတောင် နည်းနည်းပဲ။ ဆိုတော့ သူတို့ လူ့အသက်နဲ့နိုင်ငံရေးဘဝ အိုမင်းတွင်းဆုံးကျချိန် ထိတောင် အပေါ်မှာပြောခဲ့တဲ့(စစ်အာဏာ/အကျိုးစီးပွားနဲ့ ဘာသာလူမျိုး အခြေပြု အစွန်းရောက်အမျိုး သားရေးဝါဒ) ၂ ခုကို ကုန်စင်ပပျောက်အောင်လုပ်ဖို့ဆိုတာ လွယ်ကူတဲ့ကိစ္စမဖြစ်နိုင်လို့ပါပဲ။ ဒါပေမယ့် (သူတို့မသေခင်) ဒေါ်စုအလွန် ၂ဝဝ၈ စစ်လွှတ်တော်အခင်းအကျင်းထဲမှာ ဝင်ပလေးကြလိမ့်မယ်၊ နိုင်သလောက်ဝင်ထမ်းရင်း သမိုင်းကြောင်းလှလှနဲ့ နိုင်ငံရေးဘဝကို ကပြသွားကြတန်ကောင်းရဲ့ လို့ မျှော်လင့်မိပါတယ်။ အသက်အရွယ်ကို ထည့်ပြောနေရတာက လူ(နိုင်ငံရေးသမား)တချို့အတွက် "နိုင်ငံရေးရပ်ခံချက်"နဲ့ "ဘက်"ပြောင်းပလားဆို ပြဖို့လွယ်တတ်လွန်းတဲ့ ဆင်ခြေဆင်လက်ဖြစ်နေလို့ပါ။ အချက်(၂)ချက်မှာ နံပတ်တစ်အချက်က နိုင်ငံရေးဖြစ်ပြီး၊ ဒုတိယအချက် အကြောင်းပြချက်မျှဖြစ်ပါတယ်။ ဒီအချက်က ဒုတိယဖြစ်သလို အရေးလည်းသိတ်တော့မပါလှပါ။ မိမိရပ်ခံချက်မှာခိုင်ကြည်စွဲမြဲသူတွေ အဖို့တော့ ဒီ အသက်အရွယ်ဆိုတဲ့ဆင်ခြေဟာ ဘက်ပြောင်းရာမှာ ပြဖို့မလိုတဲ့အကြောင်းကိစ္စဖြစ်ပါတယ်။
ဒီ လစ်ဘရယ်ဆန်ရပ်ခံချက်နဲ့အသက်အရွယ်တွေကြောင့် တိုက်ပွဲတဝက်တပျက်ကနေ ဖဲ့ထွက်ပြီး စေ့စပ်ရေးလမ်းကြောင်း(၂ဝဝ၈ အောက် ခေါင်းလျှို၊ ပါတီထောင်၊ ရွေးကောက်ပွဲဝင် (တသီးပုဂ္ဂလည်းလုပ်နိုင်) လမ်းကြောင်းပဲရွေးချယ်သွားကြဖို့ရှိတယ်လို့မြင်ပြီး ဒေါ်စုအလွန် ၂ဝဝ၈ ဗမာ့နိုင်ငံရေးအခင်းအကျင်းမှာ ဒီလူတွေကို သူတို့သီးခြားသဏ္ဍန်တွေနဲ့ ထုနဲ့ထည်နဲ့မြင်ရမယ်လို့ ပုံဖော်ကြည့်ခဲ့တာပါ။ ခု ထွက်လာတဲ့အာဘော်တွေကြည့်ရတာ ကျနော်(တို့)မျှော်လင့်ပုံဖော်သလိုမဟုတ်ပဲ စစ်အုပ်စုပုံသွင်းယူသလိုဖြစ်တယ်လို့ပြောရမှာ မစောတော့ဘူးထင်တာပါပဲ။ ဒီလူတချို့ဟာ ဒေါ်စုအလွန် ၂ဝဝ၈ ဖွဲ့စည်းပုံနဲ့စစ်လွှတ်တော်အထိတောင် မစောင့်နိုင်ကြတော့ဘူးလို့ ယူဆရမလိုဖြစ်လာ ပါတယ်။ လောကြီးပြီး လွှတ်ကနဲထွက်သွားတာမဟုတ်မှန်းလည်း တွေးမိပါတယ်။ စစ်ဗိုလ်(ဟောင်း/သစ်တွေ)၊ ကြံ့ဖွံ့တွေနဲ့ စစ်အလိုတော်ရိတွေအသံကို စကားလုံးပြောင်းပြီးပြောကြတဲ့ သဘောဖြစ်ပါတယ်။ သူတို့ (ကိုကိုကြီးနဲ့ မင်းဇေယျ)ဗြောင်ထွက်ပြောလာတဲ့ စကားတွေကိုထောက်ချင့်ပြီး လူအများနားလည်အောင် တစ်ခွန်းထဲ ရှင်းရှင်းပြတ်ပြတ်ပြောရရင် “၂ဝဝ၈ ဖွဲ့စည်းပုံပြင်ဖို့မလို” ”ပုဒ်မ(၅၉/စ) ဒီအတိုင်းထား” ပါပဲ။ အဲ့ဒါကို စကားလုံးမျက်လှည့်နဲ့ နိုင်ငံရေးကုလားဖန်ထိုးတာလို့ယူဆပါတယ်။ ရှစ်ပူး-ငြိမ်း/ပွင့်အုပ်ထဲက ခေါင်သူကြီး တက်မကိုင်နေရာထိုင်နေသူတချို့ နိုင်ငံရေးခြေပုန်းခုတ်နေမှန်း လူတိုင်းသိနေကြပေမယ့် ခုမှ ပွင့်ကျသွားတယ်လို့ ရှင်းရှင်းမြင်ပါတယ်။
ဒီလူနှစ်ယောက် ခုလိုထွက်ပြောလာတာဟာ ရှစ်ပူး-ငြိမ်း/ပွင့်တအုပ်လုံးရဲ့သဘောထားလား ဒါမှမဟုတ် တစ်ယောက်ချင်း (နှစ်ယောက်ပေါင်း အမြင်တစ်ခု)အမြင်လားဆိုတာ ခုချိန်ထိ မရှင်းလင်းပါ။ ရှင်းလင်းချက် ထွက်လာမယ်လို့မျှော်လင့်သလို ထွက်လာတဲ့အခါမယ် ရပ်ခံချက်တွေပါရှင်းပြတ်သွားကြမယ်လို့လည်း ယူဆမိပါတယ်။ (ရှစ်ပူးတွေအာဘော်ဖန်တီးမှု)

မန်းငြိမ်းတို့ ဒီမိုကရေစီ ကားဘယ်နှစီးတိုက်စာပဲရလို့လဲမသိဘူး။ သိတ်တော့ တင်းတိမ်ပုံမပေါ်ဘူး။ ဒီဇင်ဘာ ၂ဝ ရက် ဘီဘီစီသတင်းမှာ ခုလိုပြောတယ် “ကားပါမစ်တွေကို မစို့မပို့လေးပေးလို့ အခွင့်ထူးခံ၍မရပါ”တဲ့။ ဖြစ်မှဖြစ်ရလေ။ ကားပါမစ်အနည်းအများ/အရက်ခွဲတမ်း အနည်းအများက အခွင့်ထူးဘယ်လောက်ခံမခံ ချိန်ထိုးကြည့်ရမယ့်စံပါ့လား သူတို့လိုလူတွေအတွက်။ (မန်းငြိမ်းစကား)

ရှစ်ပူးငြိမ်း/ပွင့်ခေါင်သူကြီးတစ်ယောက်ဖြစ်တဲ့ကိုကိုကြီးပြောတဲ့ ဖွဲ့စည်းပုံပြင်ရေးထက် ယုံကြည်မှုတည်ဆောက်ရေးက ပိုအရေးကြီးတယ်ဆိုတာဟာ ကိုကိုကြီးတစ်ယောက်တည်းရဲ့သဘောထားလား ရှစ်ပူးငြိမ်း/ပွင့်တအုပ်လုံးရဲ့အာဘော်လားဆိုတာ ခုချိန်ထိမရှင်းလင်းသေးလို့ အတွေးရောနှလုံးပါနောက်နေချိန်မှာ ခု မင်းဇေယျကလည်း အသံထုတ်လာပါပြီ။ မင်းဇေယျဘာပြောမှန်း သဘောပေါက်လောက်အောင် ဥပဒေဆိုတဲ့အရာမှာ ကျနော် မကျင်လည်တာမှန်ပေမယ့် စကားလုံးတွေ ရှုပ်ထွေးအောင်လုပ်ပြီး စကားလုံးမျက်လှည့်ပြဖို့ကြိုးစားတယ်လို့ ထင်ပါတယ်။ ဖွဲ့စည်းပုံပြင်ဖို့ မလိုဘူး/လိုတယ်ဆိုတာကို တင်းတင်းရင်းရင်းပြောဝံ့ဖို့လိုသလို ပြင်မယ်ဆိုဘာပြင်မှာလဲ ဘာမပြင်ဘူးလဲဆိုတာကို တိတိလင်းလင်းပြောရမှာဖြစ်ပါတယ်။ ရှစ်ပူးငြိမ်း/ပွင့်တွေ အန်ဂျီအိုဆိုလည်း အင်န်ဂျီအို၊ ပရော်လ်ဖက်ရှင်နယ်နိုင်ငံရေးဆိုလည်းနိုင်ငံရေး ကွဲပြားဖို့ပိုပိုလိုလာပါပြီ။ (မင်းဇေယျပြောစကား)

သမ္မတဖြစ်ချင်တယ် တနည်းပြောရရင် အာဏာလိုချင်တယ်ဆိုတဲ့စကားကို နှစ် ၂ဝ လောက်စောပြီး မပြောခဲ့တာအတွက် ဘယ်သူမှ အပြစ်မတင်ပါ။ သမ္မတကြီးကိုယုံတယ်ပြောပြီး ဖွဲ့စည်းပုံပြင်မလို့ဆိုကာ လွှတ်တော်ထဲဝင်သွားတာလည်း သဲထဲရေသွန်မဖြစ်လောက်သေးဘူးတွက်ပြီး လူတိုင်းက သတိလေးနဲ့ အားပေးနေကြတာပါ။ သမ္မတဖြစ်ချင်ခြင်းဆိုတဲ့မိမိအကျိုးစီးပွားနဲ့ ဖွဲ့စည်းပုံပြင်နိုင်ခြင်းဟာ တိုက်ရိုက် အဆက်အစပ်မှန်း ဒေါ်အောင်ဆန်းစုကြည်နဲ့အင်န်အယ်လ်ဒီနည်းတူ လူထုအားလုံး(ကမ္ဘာကပါ) သိထားပြီးသား။ ဆိုတော့ ဖွဲ့စည်းပုံပြင်ရေးဟာ မိမိအကျိုးစီးပွားကိစ္စပါ။ မိမိအကျိုးစီးပွားပါ မနေရင် ပြင်မယ်လို့ပြောစရာဘာအကြောင်းမှမရှိတာလည်း သိတ်နက်နက်တွေးစရာမလိုပဲ သိနိုင်တဲ့ကိစ္စပါ။ မိမိအကျိုးစီးပွားနဲ့တိုက်ရိုက်အချိုးကျနေလို့သာ ပြင်မယ်ဆိုတဲ့သဘောထားနဲ့လှုပ်ရှားမှုဖြစ်လာမှန်း စစ်အုပ်စုရော၊ မိတ်ဆွေရော၊ ကြားလူရောအကုန် အကင်းပါးပါးသိနားလည်ကြပါတယ်။ ဖွဲ့စည်းပုံပြင်ရေးဟာ ပြည်တွင်းစစ်ရပ်စဲရေး ပြည်တွင်းငြိမ်းချမ်းရေး ဖက်ဒရယ်လ်ပြည်ထောင်စု စတဲ့ပြဿနာတွေဖြေရှင်းဖို့အစပျိုးချက်မှန်း လူမျိုးစုလက်နက်ကိုင်တော်လှန်ရေးအဖွဲ့အစည်းတွေကလည်း သိပါတယ်။ ဒါပေမယ့် ဒီပြဿနာတွေကို အရင်လို ဒေါ်စုဗဟိုပြု ဒေါ်စုဆုံချက်ထား စဉ်းစားမှုမျိုးတော့လျော့ပါးသွားကြတယ်။ ပုံမအပ်တော့ဘူး ဝိုင်းလုပ်ကြမယ်ဆိုတဲ့သဘောနဲ့ ဝန်းရံပေးနေကြတာလည်း ပေါ်လွင်လာတယ်။ လူထုက စစ်အုပ်စုပေါ်မုန်းတဲ့အမုန်း နာတဲ့အနာနဲ့ဒဏ်ရာ အကင်းမသေသေးချိန် အနာမကျက်သေးချိန်ဆိုတာ သတိပြုစရာလို့မြင်မှာပါ။ အနာကျက်ဖို့အကင်းသေဖို့ ဆိုတာ ရက်လနှစ်စတာနဲ့မတိုင်းပဲ စစ်အုပ်စုဘက်က ခုထက်ပိုပြီး လူမှုရေး စီးပွားရေး နိုင်ငံရေးတွေမှာ ပိုဖွင့်ပေးလာရင်၊ လူမျိုးစုလက်နက်ကိုင်ပြဿနာတွေကို ခုထက်ပို အာမခံချက်ရှိရှိ ရှင်းပေးနိုင်ရင် ဆိုတာနဲ့တိုင်းရမှာပါ။ စစ်အုပ်စုကလည်း အဲ့သလိုလုပ်ဖို့ ကြပ်တည်းနေချိန်ပါ။ အကြပ်အတည်းက သူ့ဘက်တင် မဟုတ်ပါ ကိုယ့်ဘက်မှာလည်းရှိပါတယ်။ သူ့ဘက်အကြပ်အတည်းက ပြဿနာတွေကို မှန်မှန်ကန်ကန်မရှင်းတာနဲ့ စီးပွားရေး/နိုင်ငံရေးဒီမိုကရေစီအာမခံချက်တွေ မြန်မြန်ထက်ထက် လုပ်လို့မရသေးတာ။ ကိုယ့်ဘက် ခုရှိနေတဲ့အကြပ်အတည်းက အဲ့ဒါတွေ သူမြန်မြန်ထက်ထက် လုပ်သွားချိန်ကျ အမြင့်ဆုံးကိုရောက်လာမှာပါ။ အဲ့အချိန်က ကိုယ်ကလုပ်စရာဘာမှမရှိတော့ပဲ/လုပ်စရာမလိုတော့တဲ့အနေအထားဖြစ်သွားမှာပါ။ သူ့ဘက်က များများဖွင့် မှန်မှန်နဲ့မြန်မြန်လုပ်လေ ကိုယ့်ဘက်က လုပ်ကွက်နဲ့လုပ်ချိန် ပါးပါးလိုက်လာမှာပါ။ အဲ့သလိုအခြေအနေဆို လူထုအနေနဲ့ ကိုယ့်ကိုလိုချင်မှု လိုအပ်မှုကလည်းလျော့လျော့လိုက်လာမှာပါ။ နောက်ဆုံး ကိုယ့်ကို လိုမှလိုပါ့တော့မလားမေးနေစရာမလိုတော့မယ့်အချိန်မဆိုက်ခင်မှာ လုပ်စရာရှိတာလုပ်ရမှာပါ။ နိုင်ငံရေးသဘောမှာ အတိုက်အခံအစစ်ဟာ အနည်းဆုံး ကိုယ်ကဘာမှမလုပ်နိုင်ရင်တောင် သူ့ကိုအလုပ်ပေးထားနိုင်မှဖြစ်မှာပါ။ ခု ဖွဲ့စည်းပုံပြင်မယ်ဆိုတဲ့ကိစ္စဟာ ကိုယ်ကသူ့ကို အလုပ်ပေးထားတဲ့သဘောထက် အများကြီပို နက်ရှိူင်းတာသွားတယ်လို့ထင်ပါတယ်။ (ဒီနေရာမှာ မိမိလို့ဆိုတာဟာ ဒေါ်အောင်ဆန်းစုကြည် တစ်ယောက်တည်းကိုသာပြောခြင်းမဟုတ်ပဲ လူမျိုးစုံပြည်သူတရပ်လုံးအကျိုးစီးပွား/တတိုင်းပြည်လုံးအကျိုးစီးပွားကိုပါဆိုလိုပါတယ်) (ဖွဲ့စည်းပုံနဲ့အကျိုးစီးပွား)

ရွှေပြည်ကြီးမှာ
အသွားနှစ်ဖက်နဲ့အမျိုးသားရေးဓါးဟာ
လူသတ်လိုင်စင်ဖြစ်လို့
အကြမ်းဖက်လက်မှတ်ဖြစ်လို့
လူ့အခွင့်အရေးအတွက်
သားဖျက်လက်သည်ဖြစ်လို့။

ရွှေပြည်ကြီးမှာ
ပြုပြင်ပြောင်းလဲရေးဟာ
"ဘော"မရင်း၊
"ဘော"ကန်ရင်း၊
"ဘော"ကြည့်ရင်း၊
"ဘော"နဲ့ ကိုယ်လက်နှီးနှောမိတယ်
"ဘော"နဲ့ကိုယ်လေးလက်ဝန်ရသွားတယ်

ဒီတင်
ဖအေမပေါ်တဲ့သားဟာ
မျိုးချစ်ဓါးတရမ်းရမ်းနဲ့
မိခင်ဝမ်းကြာတိုက်ကို
မြွေပွေးပေါက်တွေလို
ဖေါက်ထွက်။ (မောင်မျိုးချစ်နဲ့မယ်သာကီများ)

ငယ်ငယ်တုန်းက ရပ်ထဲရွာထဲမှာ ဓါးပြခေါင်းဆောင်တွေကို ဗိုလ်ကြီး ဗိုလ်ကြီးနဲ့ခေါ်တာ သဘောလည်း မပေါက်သလို စိတ်ထဲလည်းနည်းနည်းခံပြင်းမိတယ်။ အခုကြီးလာတော့ တတိုင်းပြည်လုံးက ဓါးမြဂိုဏ်းခေါင်းဆောင်ကြီးကို ဗိုလ်ချုပ်မှူးကြီးလို့ ဘာ့ကြောင့်ခေါ်သလဲဆိုတာ နားလည်းလည်လာသလို အံမယ်...သူ့ဟာနဲ့တော့ အဟုတ်သားဟလို့ တွေးမိပြန်တယ်။ တချို့ကဆို နိုင်ငံတော်အကြီးအကဲ..တဲ့။ အဲ့စစ်ဗိုလ် ဘဏ်ဓါးမြတိုက်တာ ပိုက်ဆံလိုချင်လို့မဟုတ်ဘူး..တဲ့။ မြန်မာအသင်းရှူံးသွားတာကို ခံပြင်းစိတ်နဲ့ကြိတ်မနိုင်ခဲမရဖြစ်သွားပြီး ထင်ရာမြင်ရာတွေလုပ်မိသွားတာ..တဲ့။ မျိုးချစ်စိတ်ကြီးမားလွန်းလို့ စိတ်မထိမ်းနိုင်ဖြစ်ရတာ..တဲ့။ (အဲ့စစ်ဗိုလ်ဘဏ်ဓါးမြတိုက်တာ ဟုတ်လား/မဟုတ်လားလည်း ကျနော်သေချာတပ်အပ် မပြောချင်သေးဘူး။ ဒါပေမယ့် သူ့လူ မောင်မျိုးချစ်နဲ့ မယ်သာကီတွေကတော့ သူတို့ဗိုလ် ဓါးမြတိုက်တာတောင် မျိုးချစ်လို့တိုက်မိတာဆိုပါ့လား)

(စစ်ဗိုလ်ဓါးမြ စစ်ဓါးမြ)

ဟုတ်ဟုတ် မဟုတ်ဟုတ် နိုင်ငံကြီးတွေက လူ့အခွင့်အရေးတို့ အာဏာရှင် ဖယ်ရှားရေးတို့ခေါင်းစဉ်တပ်ကာ နိုင်ငံအချို့ကအစိုးရတွေကို စစ်တပ်နဲ့ဝင်ဖယ်ပလားဆို နိုင်ငံပြန်တည်ဆောက်ရေး Country Rebuilding တို့ အစိုးရနဲ့အဆင့်ဆင့်အုပ်ချုပ်ရေး ယန္တယားပြန်လည် တည်ဆောက်ရေး Nation Rebuilding ဆိုတဲ့ Plan တွေကို ဝင်မတိုက်ခင်ကတည်းက ဆွဲပြီးသား။ ခုများတော့(အီရတ်က ဆက်ဒမ်ကြီးကို ဝင်တွယ်ပြီးနောက်) ဝင်သာတီးတယ် ဖြုတ်လည်းချတယ် (တခါတလေ ကိုယ်ထိလက်ရောက် တခါတလေ အတွင်းကလူကို လိုတာပေးပြီး) ဒါပေမယ့် ဘာ နိုင်ငံပြန်တည်ဆောက်ရေးတို့ ဘာအစိုးရပြန်တည်ဆောက်ရေးတို့မှ မယ်မယ်ရရမပါတော့ဘူး။ စူပါ ပါဝါကြီးတွေ အထည်ကြီး ပျက်ချိန်ဆိုတော့ လက်ဖြန့်ခံစားမယ့်သူတွေလည်း အရိုးအရင်းလေးတောင် ကောင်းကောင်းမကိုက်ရကြရှာ။ ဗမာစစ်အုပ်စုလည်း စူပါပါဝါ ကြီးတွေ ဖေါဖေါသီသီပေးနိုင်ကမ်းနိုင်တုန်းကသာ ခုလိုလေး လေလည်လည်ပြရင် ဘယ့်လောက်များ ထောင်မလဲသဲကော်ဒေါ်လာတွေ ဝင်လာမစဲတသဲသဲနေလိမ့်မလဲ။ ခုက ဒေါ်လာတန်ဖိုးလည်းကျချိန် ပါဝါကြီးလည်း အဆိပ်သိတ်မပြင်းချိန်မို့လား။ (ထောင်မလဲသဲကော်)