(မြေနှင့်ဝေးသည့်နိုင်ငံရေး)

(မြေနှင့်ဝေးသည့်နိုင်ငံရေး)
စစ်တပ်ကသိမ်းထားမြေများပြန်ရရေး တောင်းဆိုနေကြသည့်တောင်သူများအကြောင်း ဗီဒီယိုလေးကြည့်နေခိုက် ဇနီးက အခန်းထဲဝင်လာရင်း ဟဲ့ဗမာစစ်ဗိုလ်ချုပ်ကြီးတချို့ကို အစိုးရက ဒဏ်ခတ်အရေးယူတာ ကြားပြီးပြီလားဟုမေး၏။ အေး ဟိုတနေ့ကတည်းက ငါသိတယ်ဆိုတော့ ငါက မနက်ကမှ အစိုးရဝဘ်ဆိုက်မှာတွေ့တာဟုပြောရင်း ဘာကြည့်နေတာလဲဟုမေး၏။

စစ်တပ်ကသိမ်းသွားတဲ့မြေတွေပြန်ရဖို့ ဆန္ဒပြတောင်းဆိုနေကြတာဆိုတော့ အဲ့ဒီမြေတွေက ဘယ်သူတွေပိုင်တာလဲဟုမေး၏။ လူတွေပိုင်တာပေါ့၊ အရပ်သားတွေပိုင်တာလေဟုပြန်ဖြေတော့ သူ ဇဝေဇဝါဖြစ်သွားဟန်ပေါ်၏။ မဟုတ်ဘူးလေ ငါပြောတာက၊ သိမ်းပြီဆိုကတည်းက တယောက်ယောက်ပိုင်တာမှန်းတော့သိတာပေါ့၊ ပိုင်တာက ဘယ်သူတွေလဲ၊ ဗမာနိုင်ငံသားတွေလား၊ တခြားနိုင်ငံကလူတွေ လာပိုင်ထားတဲ့မြေတွေလားဟု မေး၏။ မဟုတ်ပါဘူး၊ ဗမာနိုင်ငံသားတွေပိုင်တာ၊ နိုင်ငံခြားသား ဒါမှမဟုတ် နိုင်ငံခြားတိုင်းပြည်က ပိုင်တာတွေမဟုတ်ပါဘူးဟုဖြေတော့ သူ ပို စိတ်ရှုပ်သွားပုံပေါ်၏။ ဟင်...ဒါဆို ဘာလို့ သိမ်းရတာလဲ၊ ကိုယ့်တိုင်းပြည်ကမြေလေ၊ ကိုယ့်ပြည်သူပြည်သားပိုင်တဲ့မြေလေ၊ စစ်တပ်ဆိုတာ သူများနိုင်ငံတွေသွား စစ်တိုက် မြေသိမ်းပြီး ကိုယ့်နိုင်ငံသားတွေကို ဝေခြမ်းပေးရမှာတောင်မဟုတ်လား၊ ကိုယ့်နိုင်ငံသားကို အဲ့ဒီမြေတွေ ဝေခြမ်းမပေးနိုင်ရင်တောင် အဲ့ဒီတိုင်းပြည်တွေကမြေတွေမှာ ကိုယ့်တိုင်းသူပြည်သားတွေ စီးပွားရေးသွားလုပ်လို့ရအောင် မြေတွေသိမ်းထားပေးရတာလေ၊ ဗမာပြည်က တမျိုးဘဲ၊ ကိုယ့်တိုင်းပြည်ထဲက ကိုယ့်လူမျိုးတွေပိုင်တဲ့မြေကို စစ်တပ်ကပြန်သိမ်းရတယ်လို့၊ နောက်ပြီး နေဦး သူတို့က အဲ့ဒီမြေတွေသိမ်းပြီး ဘာလုပ်မလို့လဲ၊ စစ်သားနဲ့မြေကြီး ဘာဆိုင်လို့လဲဟု မေးတာလိုလို ပြောတာလိုလိုတွေလုပ်ကာ ပခုန်းနှစ်ဘက်တွန့်ပြပြီး ပြန်ထွက်သွား၏။

ကျနော် သူနှင့် ဗမာ့နိုင်ငံရေးကိစ္စတွေ ပြောပြောနေဖူး၏။ သူလည်း ဗမာ့နိုင်ငံရေးနှင့် တစိမ်းပြင်ပြင်တော့မဟုတ်။ ထိုက်သလောက် တီးမိခေါက်မိရှိ၏။ သို့သော် ကျနော်ပြောသည့် သို့မဟုတ် ကျနော်တို့ပြောကြသည့်နိုင်ငံရေးသည် မြိ့ုပေါ်နိုင်ငံရေးများအကြောင်းသာဖြစ်၏။ မြေနှင့်ဝေး၏။ ထိုသို့ ဝေးမှန်းလည်း ခု သူ့အမေးတွေ သူ့ရှုပ်ထွေးသွားမှုတွေမြင်မှ ကျနော်လည်း သိရ၏။ ကိုယ့်ကိုယ်ကိုယ်လည်း အလန့်တကြားဖြစ်မိ၏။ ငါ ဘာ့ကြောင့် သူ့ကို ဒီအကြောင်းတွေမပြောမိပါလိမ့်၊ ငါတို့ဘာလို့ ဒီအကြောင်းတွေ မပြောမိခဲ့ကြပါလိမ့်ဟု အတွေးကို တိတ်ခွေလိုပြန်ရစ်မိ၏။ အဖြေတွေအများကြီးထွက်လာ၏။ အားလုံးကို တချက်တည်းချုပ်ရလျှင် ကျနော်လုပ်ခဲ့သောနိုင်ငံရေးသည် မြေနှင့်ဝေးသည့်နိုင်ငံရေးဖြစ်ခြင်းကြောင့်ပင်။ ဤအဖြေရသွားတော့မှ လူလည်းနေသာထိုင်သာရှိသွား၏။ သူနှင့် နောက်ကို ဗမာပြည်အကြောင်းပြောသည့်အခါ မြေသိမ်းယာသိမ်းကိစ္စတွေ တတ်နိုင်သမျှထည့်ပြောရန်လည်း တေးထားလိုက်၏။

ဤတွင် ကျနော့်ကိစ္စပြီး၏။ မပြီးတာက သူ့ကိစ္စ။ သူ့အတွေးက ကျနော်ဆက်တွေးဖို့ကျန်နေ၏။ သူသည် ဘိုးစဉ်ဘောင်ဆက် အမေရိကန်မွေး အမေရိကန်ကြီး အမေရိကန်ပညာရေးနှင့်လူလားမြောက်သူ။ ဘာတွေးတွေး အမေရိကန်လိုတွေး၏ မြင်၏။ စစ်တပ်နှင့်ဆိုင်သည့် အမေရိကန်အတွေးမှာ နယ်ချဲ့သမားတို့တွေးစေ့ချင်သည့်၊ မတွေး တွေးအောင်လည်းလုပ်ထားသည့် ပုံစံကျအတွေးဖြစ်၏။ အထူးသဖြင့် စစ်တပ်နှင့် စစ်နှင့်ဆိုင်ရာများတွင်ဖြစ်၏။ နယ်ချဲ့သမားနေရာကနေ စစ်တပ်၏ကဏ္ဍကို ရှူမြင်သည့်အထိုင်ပေါ်မှ၊ ကြည့်မြင်သည့်အခြေခံပေါ်မှဖြစ်၏။

စစ်တပ်သည် Professional ဖြစ်၏။ စစ်တပ်သည် လူထုကရွေးတင်ထားသောအစိုးရ၏အမိန့်ကို နာခံရ၏။ စစ်တိုက်ဆို တိုက်ရ၏။ ပြည်သိမ်းဆို သိမ်းရ၏။ တိုက်ပွဲကြီးငယ်တွေ၊ စစ်ရေးစစ်ရာတွေ၊ စစ်ဗျူဟာတွေစသည့်ကိစ္စများကို စစ်ဗိုလ်ကြီးများကကိုင်ပြီး နိုင်ငံရေးကို အစိုးရကကိုင်၏။ ရောက်လွယ်အောင်ပြောရလျှင် တိုက်ပွဲကိုစစ်တပ်ကတိုက်ပြီး စစ်ပွဲကို အစိုးရ(နိုင်ငံရေးသမား)ကတိုက်၏။ ဤအတွက် စစ်ဗိုလ်စစ်သားကို တခြားဘာမှလုပ်စရာမလိုအောင် လောက်လောက်လောက်ငှငှ တိုင်းပြည်ကပေးထားပြီးဖြစ်၏။ စစ်ဗိုလ်စစ်သားတိုင်းအတွက် အိုးအိမ် ရိက္ခာ လစာ ဆေးဝါး ပင်စင်သည်တို့ဖြည့်ဆည်းပေးထား၏။ ထို့ကြောင့် စစ်တပ်သည် မြေသိမ်းစရာမလို၊ မြေပိုင်စရာ အကြောင်းမရှိ၊ သိမ်းခြင်းသိမ်းလျှင် သူများပြည်က သူများမြေကိုသာသိမ်းမည်။ ဒါလည်း စစ်တပ်အတွက်မဟုတ်။ စစ်တပ်ပိုင်မဟုတ်။ တနည်းပြောရလျှင် တပ်ပိုင်မြေဟုတ်။ သည်လို ဆန်းစစ်ကြည့်တော့မှ သူက ဤအမေရိကန်တွေးနည်းကားအတိုင်းတွေးပြီး ပြောတာပါလားဟု သဘောပေါက်မိ၏။

ကျနော် နောက်ဆို သူ့ကို ဗမာပြည်အကြောင်းပြောသည့်အခါ၊ သူနှင့်ကျနော် ဗမာပြည်အကြောင်းပြောသည့်အခါ မြေနှင့်နီးသည့်နိုင်ငံရေး၊ မြေကြီးပေါ်ကနိုင်ငံရေး၊ မြေကြီးအတွက်နိုင်ငံရေးတွေ ဖြည်းဖြည်းပြောရဦးမည်။

ထိုအခါ ကျနော့်ခေါင်းထဲ ဓားမဦးချကို၊ လယ်တီသည်ကို၊ လက်ငုတ်ဆိုသည်ကို၊ ထွန်တုံးတိုက်ပွဲဆိုသည်ကို၊ သီးစားခမပေးရေးဆိုသည်ကို စသည့်မြေနှင့်ဆိုင်သည့် ဗမာဝေါဟာရများအား အင်္ဂလိပ်လို ဘယ်လိုခေါ်မှန်းသိအောင်လုပ်ရဦးမည်။ ဝေါဟာရတွေ ရှာဖွေရဦးမည်။ အနိမ့်ဆုံးအဆင့် ထိုဝေါဟာတွေကို အင်္ဂလိပ်လို မသိတောင် ရှာဖွေနိုင်အားမရှိတောင် အခြားစကားလုံးများသုံးကာ ဖြည်ဖြည်ဖြန့်ဖြန့်နှင့် ပြောပြနိုင်အောင်တော့ လုပ်ရပါမည်။
မျိုးမြင့်ချို
ဂျူလိုင် ၂၂၊ ၂ဝ၁၉