(မီတူးလည်း မီတူးနဲ့ပါ)

(မီတူးလည်း မီတူးနဲ့ပါ)
လုပ်ငန်းခွင်တွေမှာ လိင်မှုဆိုင်ရာ ထိပါးနှောင့်ယှက်မှုဖြစ်တာတွေကို အကြောင်းပြုပြီး မီတူးလှုပ်ရှားမှု ပေါ်လာတယ်။ တကယ်လည်း လုပ်ငန်းခွင်တွေမှာ လိင်မှုဆိုင်ရာ ထိကပါးရိကပါးတွေရှိနေတာ အမှန်ပဲ။ တချို့ဆို ကိုယ်ထိလက်ရောက်တွေပါ ပါတယ်။ ဘလက်ကာယပြုတာ ဆွဲလားရမ်းလားလုပ်တာ ဘာတာလောက်အထိတော့လည်း မဟုတ်ဘူးပေါ့။ ကာယိန္ဒြေပျက်လောက်အောင်ထိလုပ်တာ ကျနော့်ရှေ့တင်ဖြစ်ဖူးပါတယ်။ ဒီတုန်းက Me Too လှုပ်ရှားမှုကလည်း မပေါ်လာသေး အမေရိကန်စီးပွား ဆုတ်ဆိုင်းကနေလည်း နာလန်ပြန်မထူသေး(၂ဝ၁ဝ လောက်က)ဆိုတော့ ကိုယ့်အထက်ကလူက သရော်မော်ကားလာလုပ်လို့ သွားတိုင်မိရင် အလုပ်ပြုတ်မှာကြောက်ပြီး ကြိတ်မှိတ်အောင့်အည်း ခံလိုက်ရတဲ့သဘောနဲ့ ပြီးသွားတာတွေ့ခဲ့ဖူးပါတယ်။

ခုတော့ အမေရိကန်မှာ အလုပ်အကိုင်အခွင့်အလမ်းတွေလည်း ပေါလာ(တကယ်က အိုဘားမား လက်ထက် သူ့ သမ္မတဒုတိယသက်တမ်း နောက်ဆုံး ၂ နှစ်မှာ စပြီး အလုပ်လက်မဲ့နှုန်းကျလာ၊ အလုပ်အကိုင်အခွင့်အလမ်း ပြန်ပေါ၊ အမေရိကန်စီးပွားရေး ပြန်နလန်ထူလာတာပါ)၊ လူတွေမှာ အလုပ်ရွေးချယ်စရာလည်း များလာ၊ Me Too အရှိန်နဲ့ဂယက်ကလည်း ကြီးလာဆိုတော့ ကာယကံ ဝစီကံတွေနဲ့ မဖွယ်မရာလုပ်လိုက်ရင်တော့ Sexual Harassment နဲ့ညိပြီး အလုပ်ပြုတ်သူတွေ လျော်ကြေးပေးရသူတွေ တရားစွဲထောင်ချခံရသူတွေ တပုံတခေါင်းရှိနေပါပြီ။ မိန်းမသားတွေဘက်ကလည်း ကိုယ့်အထက်ကလူက မထိမထိလာပြောလို့ နှုတ်လာသရမ်းလို့ အရင်လို ငုံ့ခံမနေတော့ပဲ သက်ဆိုင်ရာဌာနတွင်း/အလုပ်တွင်းမှာ တိုင်ကြားအရေးယူခိုင်းနေတာတွေ လုပ်နေပါပြီ။ ကောင်းတဲ့ဘက်ကို ရွေ့သွားတာလို့ လူအများက သဘောတူကြပါတယ်။ အလုပ်နဲ့လုပ်ငန်းခွင်တွေမှာ အမျိုးသမီးတွေ စိတ်လုံလုံခြုံခြံု ဘဝလုံလုံခြံုခြံုနဲ့ လုပ်လို့ကိုင်လို့ ပိုရသွားတာပါ။

တဘက်က အဲ့သလိုတွေးရင်း တဘက်ကနေလည်း သတင်းတွေကို အလျဉ်းသင့်သလို ကြည့်ဖြစ်ပါတယ်။ ဒီ လိင်ပိုင်းဆိုင်ရာ သရော်မော်ကားမှု ထိပါးမှုတွေဆို မီဒီယာတချို့ကလည်း တစ်တစ်ခွခွ အလုအယက် သူ့ထက်ငါ ဖော်ပြကြတာလည်းရှိပါတယ်။ အထူးသဖြင့် ဆယ်လီဘရစ်တီးစ်တွေနဲ့ပတ်သက်တဲ့ အမှုတွေဆို ပိုတောင်ဆိုးပါတယ်။ အညှီအဟောက်ကင်းပါတယ်ဆိုတဲ့ မီဒီယာကြီးတချို့တောင် နံမည်ကြီးတွေဖြစ်တဲ့အမှုဆို သတင်းထူးဖြစ်လို့ တင်ကြပါတယ်။ အဝါရောင် စာနယ်ဇင်းတွေကတော့ စည်းစောင့်တာ သိတ်မရှိလှပေမယ့် သတင်းသိက္ခာရှိတဲ့ မီဒီယာကြီးတွေကတော့ ထိန်းထိန်းသိမ်းသိမ်းတော့ ရှိပါတယ်။

မနက်က ဒေသအခြေခံရေဒီယိုသတင်းတခုမှာ Me Too လှုပ်ရှားမှုအကြောင်းတင်ဆက်ရင်း ပြောသွားတာမှာ ဘာပါလာသလဲဆိုတော့ ကုမ္ပဏီကြီးတွေ လုပ်ငန်းကြီးတွေနဲ့အေဂျင်စီကြီးတွေမှာ လူကြီး(အမျိုးသားတွေ)ရဲ့ အတွင်းရေးမှူးနေရာတွေမှာ အမျိုးသမီးငယ်တွေကို ခေါ်ယူခန့်ထားတာ လျော့ကျလာတဲ့အကြောင်း၊ အမျိုးသားတွေကို ခေါ်ယူခန့်ထားမှု တိုးလာတဲ့အကြောင်း၊ အရည်အချင်းအရ သိတ်လိုအပ်လို့ ဒီမိန်းကလေးကိုပဲ ခေါ်ရမယ်ဆိုလည်း တယောက်အစား ၂ ယောက် ခေါ်ယူတတ်ကြောင်း၊ တချို့နေရာတွေမှာဆို အတွေ့အကြုံလည်းရှိတဲ့ အသက်အရွယ်ကြီးရင့်သူ အမျိုးသမီးတွေကိုသာ ခန့်တော့ကြောင်း၊ စက်ရုံအလုပ်ရုံတွေမှာ အလုပ်လုပ်ကြတဲ့မိန်းမသား အရေအတွက်ဟာ ကျမသွားပေမယ့် လက်ရှိအလုပ်လက်မဲ့နှုန်းမှာတော့ အမျိုးသမီးဦးရေက အမျိုးသားဦးရေထက် ရာခိုင်နှုန်းအားဖြင် ပိုနေတာတွေ့ရကြောင်း စတာတွေကို ဝေဝေဆာဆာ တင်ပြသွားပါတယ်။

ကျနော်လည်း သတင်းနားထောင်ရင်း စဉ်းစားစရာတွေ ပေါ်ပါတယ်။ မိတ်ဆွေတို့လည်း စဉ်းစားစရာရနိုင်မလားတွေးမိပြီး ပြန်ပြောပြတာပါ။
မျိုးမြင့်ချို
ဇန္နဝါရီ ၁၇၊ ၂ဝ၂ဝ