(မွေးရာပါနိုင်ငံသားဖြစ်ခွင့်မသာပြီ)

(မွေးရာပါနိုင်ငံသားဖြစ်ခွင့်မသာပြီ)
မနက်က ခုန်ချမယ်ဆို စဉ်းစားကြဖို့ ရေးခဲ့ပါတယ်။ ခုက မီးဖွားဖို့နီးနေတဲ့ ကိုယ်ဝန်အရင့်အမာနဲ့အမျိုးသမီးတွေကို ပြည်ဝင်ခွင့် ကန့်သတ်မယ့်အကြောင်းပါ။ ဘယ်နိုင်ငံကနေ ဘာဗီဇာအမျိုးအစားနဲ့ပဲဖြစ်ဖြစ် ကိုယ်ဝန်ဆောင်လျှက် အမေရိကန်ကိုရောက်လာပြီး ဒီကျမှမီးဖွားတယ်ဆို အဲ့ဒီကလေးဟာ မွေးရာအမေရိကန်နိုင်ငံသား ဖြစ်သွားပါတယ်။ ဒါက ရှိနေဆဲ တည်နေဆဲဥပဒေပါ။

ရုရှက ကိုယ်ဝန်ဆောင်သည်တွေ ကလေးမွေးဖို့ လပိုင်းလောက်အလိုမှာ အမေရိကန်ကိုအလည်လာပြီး ဒီကျ မီးဖွားကြတဲ့ဇာတ်လမ်းတွေ မနှစ်တနှစ်တွေတုန်းက ပလူပျံအောင်ထွက်ခဲ့သလို အီနေအောင်လည်း ဖတ်ရပါတယ်။ အဲ့ဒီတုန်းက ရုရှကို မဲနေချိန်ဆိုတော့ ရုရှပဲတည်တိုက်တာပါ။ ဒါပေမယ့် အလားတူဖြစ်ရပ်တွေ ဖစ်ကြတာ ရုရှတနိုင်ငံတည်းတော့ မဟုတ်ပါဘူး။ 

ကလေးမွေးပြီးတော့ မူလနိုင်ငံကိုပြန်ကြ အဲ့ဒီကလေး အရွယ်မရောက်တရောက်မှာ အမေရိကန်ကိုပြန်ပို့ပြီး သတ်မှတ်နှစ်ကာလစေ့တဲ့အခါ မိဘ ညီအကိုမောင်နှမများကို အမေရိကန်ကိုခေါ်ယူပြီး မိသားစုအတူနေထိုင်ကြတာတွေလည်း အနမတဂ္ဂရှိပါတယ်။ တချို့မိဘတွေကတော့ ကလေးကို ဒီမှာပဲ တယောက်ယောက်လက် အပ်သွားပြီး ကလေးအရွယ်ရောက်မှ မိသားစုပြန်လည်ပေါင်းစည်းရေး လုပ်ကြတာမျိုးပါ။ သူ့ဥပဒေပါပြဌာန်းချက်အရ ရပိုင်ခွင့်ဖြစ်လေတော့ ဘာနဲ့မှလည်း ငြင်းမရပါ။

ခု ထရမ့်လက်ထက်မှာ ရွှေ့ပြောင်းအခြေချလာသူတွေကို ပစ်မှတ်ထားအရေးယူဆောင်ရွက်တာတွေ တနေ့တခြားများများလာပါတယ်။ Executive Order ခေါ်တဲ့ သမ္မတအမိန့်နဲ့ကျပ်လို့ရတာမှန်သမျှ အကုန်ကျပ်တဲ့အပြင် တချို့လူဝင်နမှုဥပဒေတွေကို ပြင်နိုင်သမျှပြင်ဖို့လည်း ကျားကုပ်ကျားခဲလုပ်နေတာပါ။ ခု ကိုယ်ဝန်ဆောင်(မီးဖွားခါနီး) အမျိုးသမီးတွေဘက် တလှည့် လှည့်ကိုင်လာပါတယ်။ သိတ်တိတိကျကျကြီး ထွက်မလာသေးပေမယ့် ဃဂနဏတော့ ထွက်ကိုလာဦးမှာပါ။ 

ဝင်ခွင့်မပေးပဲနေလို့ရတဲ့ ကိုယ်ဝန်ဆောင်အမျိုးသမီးတွေကို မပေးဘဲ မီးဖွားဖို့နီးနေပြီဆိုပေမယ့် မဖြစ်မနေလာကိုလာရမယ့် အမျိုးသမီးတွေကိုတော့ ဝင်ခွင့်ပေးပြီး မွေးလာမယ့်ကလေးကို မွေးရာပါနိုင်ငံသား မပေးမှာတွေလည်း ပါလာမှာပါ။ ကျနော်လည်း သိတ်သေသေချာချာတော့ မဖတ်ရမပြုရသေးသလို စည်းမျဉ်းစည်းကမ်း အသေးစိတ်တွေလည်း မမြင်ရသေးပါ။ သိရကြားရသလောက်ကိုပဲ မိတ်ဆွေတွေသိထားရအောင် လက်တို့ထားတဲ့သဘောပါ။ အသေးစိတ်တွေကို တိတိကျကျသိရတဲ့အခါကျ အသေးစိတ်ပြန်ပြောပြပါ့မယ်ခင်ဗျား။
မျိုးမြင့်ချို
ဇန္နဝါရီ ၂၃၊ ၂ဝ၂ဝ