မျိုးမြင့်ချို: (ခုန်ချမယ်ဆို စဉ်းစားပါ)

(ခုန်ချမယ်ဆို စဉ်းစားပါ)
ဗမာပြည်ကနေ အမေရိကန်ကို ဗီဇာတခုခုနဲ့လာပြီး မပြန်ချင်တော့လို့ ချန်နေခဲ့သူတွေကို ခုန်ချသူတွေလိုခေါ်တာက ယေဘုယျသဘောပါ။ တချို့က ခုန်ချဖို့ရည်ရွယ်ချက်နဲ့ကိုလာကြတာဖြစ်ပြီး တချို့ကတော့ ဒီရောက်ပြီးမှ အကြောင်းအမျိုးမျိုးနဲ့ ခုန်ချလိုက်ကြသူတွေပါ။ ဘယ်လိုပဲဖြစ်ဖြစ် ခုန်ချလိုက်ပြီဆိုကတည်းက သူဟာ ဒီမှာ အထောက်အထားနဲ့ရောက်လာသူမှန်ပေမယ့် တရားမဝင်နေထိုင်သူ ဖြစ်သွားပါတယ်။

အရင့်အရင် ကာလတွေတုန်းဆီကတော့ အဲ့သလိုခုန်ချပြီးနေသူတွေဟာ ရာဇဝတ်တခုခု မကျူးလွန်သရွေ့၊ ဥပဒေတခုခုမချိုးဖေါက်သရွေ့ အေးဆေးနေလို့ရပါတယ်။ မသင်္ကာလို့ လမ်းမှာတားပြီး အိုင်ဒီပြပါတို့ ပါ့စ်ပို့တ်ပြပါတို့မခိုင်းသလို ညကြီးမင်းကြီးလည်း သန်းကောင်စာရင်း လာမစစ်ပါဘူး။ ခုန်ချမှန်းသိလို့လည်း ဘယ်သူ့ ဘယ်သူကမှ တိုင်နေတောနေတာလည်း မရှိပါဘူး။ သူလည်းသူ့ဘာသာနေ ကိုယ်လည်းကိုယ့်ဘာသာနေ နေနေကြတာပါ။ လွတ်လပ်ပါသေးတယ်။

ခုန်ချနေသူတွေက တရားဝင်မဟုတ်တော့ အခွန်ဆောင်ရတဲ့အလုပ်မျိုးတွေ အလုပ်ပါမစ်ပြရတဲ့အလုပ်မျိုးတွေတော့ လုပ်လို့မရပါ။ ဝင်ငွေရဖို့အတွက် ဆူရှီးဆိုင်တွေ စားသောက်ဆိုင်တွေ ကုန်စုံဆိုင်လိုဆိုင်တွေမှာ လုပ်လို့တော့ရပါတယ်။ တခါ အိမ်ဝယ်နေဖို့ခနထား အိမ်ခန်းငှားဖို့တောင် မလွယ်ပါဘူး။ ဒါပေမယ့်လည်း ခုန်ချနေခဲ့သူ အများတကာ့အများစုကြီးက ဒီကိုမလာခင်ကတည်းက ဒီကလူခံနဲ့ သေသေချာချာတိုင်ပင် ကျကျနနစီစဉ်ပြီးမှ စိတ်ချလက်ချ ခုန်ချလိုက်ကြတာဖြစ်တော့ နေရေးထိုင်ရေးအတွက်က သိတ်ပူစရာတော့မဟုတ်ပါ။ ကျနော်တို့ကသာ ဘေးကကြည့်ပြီး စိတ်ပူပေမယ့် သူတို့ကတော့ အပြုံးမပျက် စိတ်လက်အေးအေးရှိကြတာ များပါတယ်။ ဒီက နိုင်ငံသားဖြစ်ပြီးသူတွေနဲ့လက်ထပ်ပြီး ချစ်ချစ်ခင်ခင် ပေါင်းသင်းဆက်ဆံပြီး နေလိုက်ကြသူတွေလည်း ရှိပါတယ်။

အရင်တုန်းကတော့ ခုန်ချလိုက်သူတွေအတွက် နိုင်ငံရေးခိုလှုံခွင့်ရဖို့က သိတ်ခက်လှတာ မဟုတ်ပါဘူး။ ဒီရောက်ပြီးနောက် ဘယ်နေ့ ဘယ်မှာ ဘာအကြောင်းနဲ့ ဆန္ဒပြပွဲရှိတယ်ဆိုကိုစုံစမ်းပြီး ဆန္ဒဝင်ပြ၊ ထင်ရှားသူ၊ လူသိများသူတွေနဲ့ ဓာတ်ပုံဝင်ရိုက်၊ ပြီးတော့ လူဝင်မှုရှေ့နေတို့ဘာတို့နဲ့ တိုင်ပင်ပြီး ဓာတ်ပုံသက်သေ လူသက်သေတွေတင်ပြီး နိုင်ငံရေးခိုလှုံခွင့်လျှောက်ကြတာပါ။ အကြောင်းပြချက်က သူ ဒီမှာ စစ်အစိုးရ ဆန့်ကျင်ရေးတွေ ဒီမိုကရေစီရေးတွေလုပ်နေပြီ၊ ဒါ့ကြောင့် သူဗမာပြည်ပြန်ရင် အဖမ်းခံရနိုင်တယ် အန္တရာယ်ရှိတယ်ဆိုတဲ့သဘောတင်ပြပြီး အမေရိကန်အစိုးရရဲ့အကာအကွယ် တောင်းခံတာပါ။ အဲ့သလိုနည်းတဲ့ တင်တဲ့လူတွေများပါတယ်။ တင်တိုင်းလိုလိုလည်း ရကြတယ် ဆိုပါတယ်။ ဘယ်လောက်များများ ရကြတယ်ဆိုတာမသိပေမယ့် အတော်တော့ များမယ်ထင်ပါတယ်။ တခြားနည်းတွေ(ဘာသာရေးအရ၊ စီးပွားရေးအရ၊ လူမျိုးရေးအရအဖိနှိပ်ခံရလို့ စတဲ့အကြောင်းပြချက်တွေနဲ့လည်း ခိုလှုံခွင့်ရသူတွေရှိပါတယ်)။ ဒီလူတွေအားလုံး စစ်မှန်တယ် မမှန်ဘူး၊ လီဆယ်လုပ်ကြံတယ် မကြံဘူးတွေတော့ မပြောလိုပါ။ သူတို့အခြေအနေတွေ၊ သူတို့အခက်အခဲတွေ၊ သူတို့ဘဝတွေ၊ သူတို့ အကြောင်းပြချက်တွေနဲ့သူတို့ ရှိကြသလို သူတို့စိတ်လုံတာမလုံတာ သူတို့လိပ်ပြာသန့်တာ မသန့်တာလည်း ကျနော့်ကိစ္စမဟုတ်ဘူးလို့ သဘောပိုက်ပါတယ်။

ခုတော အိုဘားမားလက်ထက်ကစပြီး ဗမာပြည်ပေါ်ထားတဲ့သဘောထား တဆစ်ချိုးပြောင်းသွားတာ၊ ဗမာပြည်မှာလည်း နိုင်ငံရေး အလှည့်အပြောင်းက ရှိလာတာတွေကြောင့် ပြည်ဝင်ခွင့်အကန့်သတ်ခံထားရသူတွေကလွဲလို့ အများစုကြီးအနေနဲ့ ဗမာပြည်ကို အိမ်ဦးနဲ့ကြမ်းပြင် သွားလိုက်ပြန်လိုက် ဥဒဟိုလုပ်လို့ ရနေတာပါ။ ဒီအခြေအနေတွေကြောင့်ပဲ ခုန်ချသူတွေအတွက် နိုင်ငံရေး ခိုလှုံခွင့်ကိစ္စတွေက အရင်ကလောက်ရော အရင်ကလိုရော မလွယ်တော့ပါ။ ဗမာပြည်ဖွား တက်ကြွလှုပ်ရှားသူတွေအနေနဲ့လည်း အရင်ကလို ဆန္ဒပြပွဲတွေ တခြိမ်းခြိမ်းလုပ်စရာမရှိတော့ပါ။ ဒီတော့ ခုန်ချနေသူတွေအနေနဲ့ တနည်းနည်းနဲ့ တရားဝင်နေထိုင်သူဖြစ်လာရေးတွေ ကြံရစည်ရပါတယ်။ အဲ့ဒီအထဲမှာ နိုင်ငံရေးခိုလှုခွင့်ကတော့ ပါနေမြဲပါနေတယ်လို့ ထင်ပါတယ်။ လူ့အခွင့်အရေးရှေ့နေတွေ၊ လူဝင်မှု ရှေ့နေတွေနဲ့တိုင်ပင်ပြီး လုပ်ကြကိုင်ကြတယ်လို့သိရပါတယ်။ ရတော့ရကြတယ် ဒါပေမယ့် အကုန်အကျတော့ အလွန်များတယ်လို့ဆိုပါတယ်။ ဘယ်လိုများလဲ ဘယ်လောက်များလဲတော့ မပြောတတ်ပါ။

ခု ဒေါ်နယ်လ်ထရမ့်လက်ထက်မှာ လူဝင်မှုဥပဒေတွေ အလွန်တင်းကျပ်လာနေတာ လူတိုင်းအသိပါ။ တရားဝင်ရောက်လာ နေထိုင်သူတွေတောင် ဘယ်လူဝင်မှုအဆင့်အတန်းရှိသူဟာ ဘယ်ဥပဒေမျိုးချိုးဖေါက်ရင် ဘယ်ရာဇဝတ်မှုမျိုးကျူးလွန်ရင် လာရင်းနိုင်ငံပြန်ပို့တာတွေ ကြေညာပြီးတော့ကို လုပ်ပြနေတာပါ။ မနှစ်ကဆို မြိ့ုကြီးတွေမှာ ရဲတွေ၊ လူဝင်မှုကြီးကြပ်ရေးအဖွဲ့တွေ၊ ဥပဒေစိုးမိုးရေးတပ်ဖွဲ့တွေပေါင်းပြီး စီမံချက်ကြီးတွေနဲ့ ဖမ်းတာဆီးတာ စစ်တာဆေးတာ အရေးယူတာပြန်ပို့တာတွေ လုပ်ပါတယ်။ ပြဿနာတွေလည်း တပုံတမကြီးတက်ပါတယ်။ နိုင်ငံရေးသမားတွေ၊ လူ့အခွင့်အရေးအဖွဲ့အစည်းတွေ၊ ဘုရားကျောင်းတွေ၊ လူမှုအဖွဲ့အစည်းတွေဆီက ကန့်ကွက်သံတွေ ဘဝဂ်ညံနေပေမယ့် အစိုးရကတော့ သူ့အလုပ်အပျက်မခံဘဲ လုပ်သွားပါတယ်။ ခုလည်း လုပ်နေဆဲပါပဲ။ မီဒီယာတွေမှာ သိတ်တက်မလာအောင် သိုသိုသိပ်သိပ်လုပ်နေတာမျိုးပါ။ ပြောချင်တာက ခုန်ချနေသူတွေအဖို့ အရင်ကလို မချောင်တော့ဘူးဆိုတဲ့သဘောပါ။ သိတ်ကြီး ကျီးလန့်စာစားတော့မဟုတ်ပေမယ့် ကိုယ့်စိတ်မလုံရင်တော့ ကျီးကန်းတောင်းမှောက်ဖြစ်ရမယ့် အနေအထားပါ။

မနေ့တနေ့ကပဲ ဗမာပြည်အပါအဝင် နိုင်ငံတချို့ကလူတွေအပေါ် ပြည်ဝင်ခွင့် တင်းကြပ်မယ်ဆိုတဲ့သတင်းလည်း ဖတ်မိကြမှာပါ။ လုပ်လည်း တကယ်လုပ်လိမ့်မယ်လို့ ထင်ပါတယ်။ အကြောင်းပြချက်က ရောက်လာပြီး တရားမဝင်နေနေတဲ့လူတယောက်ကို ပြန်နှင်ထုတ်ဖို့က အလွန်ခက်ပေမယ့် ရောက်ကိုမလာအောင်လုပ်ထားတာက ပိုလွယ်ကူမယ်ဆိုတဲ့တွက်ချက်မှုနဲ့ဖြစ်ပါတယ်။

ဒီကိုလည်းလာမယ် ခုန်လည်းခုန်ချမယ်ဆိုရင်တော့ ဒီကနေ စပွန်ဆာပေးမယ့်သူရော လာပြီးခုန်ချမယ့်သူပါ သေသေချာချာချိန်ဆပြီးမှ လုပ်ကြစေချင်ပါတယ်။ အဲ့သလိုမဟုတ်လို့ကတော့ ခုန်ချတဲ့လူလည်း ဒုက္ခရောက်(ဒုက္ခရောက်က ပြန်အပို့ခံရတာအထိပါပါတယ်)မှာဖြစ်သလို စပွန်ဆာပေးတဲ့လူလည်း နံမည်ပျက်စာရင်းအသွင်းခံရမှာပါ။ နံမည်ပျက်စာရင်းအသွင်းခံရပြီး နောင်ကို ဘယ်သူ့ကိုမှဘယ်တော့မှ စပွန်ဆာ မပေးရလောက်နဲ့ပြီးရင် တော်ပါသေးတယ်။ ဒီ့ထက်ပိုတဲ့အရေးယူမှုတွေခံရရင် မကောင်းပါဘူး။ စပွန်ဆာပေးတဲ့သူဟာ တာဝန် အလွန်ကြီးတာကိုလည်း ပေါ့ပေါ့မတွေးစေလိုပါ။

ဟိုမှာမနေချင်လို့ ဒီလာနေချင်တာကို ဘယ်သူ့ဘယ်သူမှ ဘာအပြစ်မှမပြောအပ်ပါ။ လာမယ်နေမယ်ဆိုလည်း တရားဝင်ဖြစ်အောင်လုပ်ပြီး လာနေရင်ပိုကောင်းပေမယ့် ခုန်ချပြီးနေတဲ့သူတွေကိုလည်း အပြစ်မပြောထိုက်ပါ။ သူတို့တွေ ခုန်ချလို့ ငါတို့တွေပါ အမေရိကန်ကို သွားရကျပ်ကုန်ပြီလို့လည်း မတွေးထင်ကြစေလိုပါ။ အမေရိကန်လုပ်မယ့် ဗီဇာတင်းကျပ်မှုဟာ လူတိုင်းအပေါ် ဗီဇာအမျိုးအစားတိုင်းအပေါ် သက်ရောက်မှာလည်း မဟုတ်ပါ။
မျိုးမြင့်ချို
ဇန္နဝါရီ ၂၃၊ ၂ဝ၂ဝ