(ကြောင်လိန်လှေကားပေမယ့် ပတ်တော့တက်ရပါတယ်)

(ကြောင်လိန်လှေကားပေမယ့် ပတ်တော့တက်ရပါတယ်)
နယ်ချဲ့သမားချင်းအတူတူမှာ ဖက်ဆစ်နယ်ချဲ့ထက် အရှင်းရှင်ဒီမိုကရေစီနယ်ချဲ့သမားက ပိုလက်ခံနိုင်စရာရှိ၏။ ထို့ကြောင့် အင်းစိန်စစ်တမ်း မြင်းခြံစစ်တမ်းများ ထွက်ခဲ့၏။ နယ်ချဲသမားကိုမုန်းတည်းမှုအစွန်းရောက်ပြီး အတွေးအခေါ်ရေး သဘောတရားရေး သတိလက်လွတ်ဖြစ်ကာ ဖက်ဆစ်ကိုသွားပေါင်းခဲ့ကြသည်မှာ ဗမာပြည်က ဗိုလ်အောင်ဆန်းတို့တစုတည်း မဟုတ် ဆူဘာ့စ်ချန်ဒရာဘို့စ်တို့လို လူတွေပင်ပါသည်ကို သတိချပ်ရာ၏။ ဒုတိယကမ္ဘာစစ်ကြီးသည့် ကမ္ဘာ့မြေပုံတွေကိုသာ ပြင်ဆွဲခဲ့သည်မဟုတ်သေး လွတ်လပ်သော အချုပ်အခြာအာဏာပိုင်သည့် အမျိုးသားနိုင်ငံတော်များစွာကိုလည်း ပေါ်ထွန်းလာစေခဲ့သည်မှာ ငြင်းမရပါ။

ယခု အမေရိကန်တွင် လွှတ်တော်နှင့် အိမ်ဖြူတော် ထိလိုက်ခတ်လိုက်ဖြစ်နေသည်ကိုကြည့်ကာ ဒုတိယကမ္ဘာစစ်အပြီးကာလ အရင်းရှင်နိုင်ငံကြီးများအကြားတွင်ရော တနိုင်ငံချင်းစီ၏နိုင်ငံရေးတွင်ရော အယူအဆရေးရာ ထွေပြားခဲ့ကြသည့် အလားသဏ္ဍန်လို ခိုင်းနှိုင်းပြောသံများလည်း ကြားရ၏။ ထိုစဉ်က ထွေပြားခဲ့ကြသည့်အခြေခံမှာ ကိုလိုနီပြုခဲ့သည့်နိုင်ငံများ၏ အနာဂတ်အရေးအတွက်ဖြစ်၏။ တဘက်ကလည်း စစ်ကြီးအပြီး ကိုလိုနီထမ်းပိုးအောက်မှ ကိုယ့်ခြေကိုယ့်လက်ရုန်းထရန် ရရင်ရ မရရင်ချတွေ သောသောညံနေချိန်ကြီးဖြစ်၏။ ထို့ကြောင့် ကိုလိုနီနိုင်ငံဟောင်းများအရေး ခေါင်းထဲထည့်တွေးရခြင်းပင်။ စေတနာရှိလှလို့တော့မဟုတ်။ သည်လို ရေရေရာရာပြောနိုင်ရသည်မှာ လွတ်လပ်ရေးကို စာချုပ်စာတမ်းတွေနှင့်ပေးပြီး မစားရတော့သည့်အမဲ သဲနှင့်ပက်သွားသည်မှာ အထင်အရှား လက်ဆုပ်လက်ကိုင်ပြနိုင်၍ဖြစ်၏။

အဲ့သလို ခနခန မထိခလုပ်ထိခလုပ်တွေဖြစ်နေကြတာကြည့်ပြီး တချို့ကလည်း ဒီမိုကရေစီ၏အနှစ်သာရ Check and Balance ကိုဖော်ဆောင်ပြသနေတာဖြစ်လို့ သာဓုအနုမောဒနာ ခေါ်သူခေါ် ကောင်းချီးပေးသူပေးကြ၏။ တချို့ကတော့ လွှတ်တော်နှင့်သမ္မတ နောင်ဂျိန်ချကြပြီကွဆိုကာ ဘာမှ မရနိုင်မှန်းသိသိနှင့် အားရဝမ်းသာ လက်ခုပ်လက်ဝါးတီးကြ၏။ အမှန်က အမေရိကန်နိုင်ငံရေးသမားတို့ သူတို့အလုပ် သူတို့လုပ်နေကြခြင်းပင်။ သူတို့ကိစ္စ သူတို့ရှင်းနေကြခြင်းဖြစ်၏။

ဤသို့ အခိုင်အမာ ဘာ့ကြောင့်ပြောရသလဲဆိုလျှင် လတ်တလောကိစ္စတခုကို ထုတ်ပြလို၏။ အီရန်ကိစ္စ။ သမ္မတက စီအိုင်အေတွေ စစ်တပ်တွေနှင့်ပေါင်းပြီး လွှတ်တော်ကိုချောင်ထိုးကာ အီရန်စစ်ဘက်ခေါင်းဆောင်တယောက်ကို လုပ်ကြံသတ်ဖြတ်လိုက်၏။ လွှတ်တော်ကို အသိပေးဖို့ဝေးစွ ဖုတ်လေသည့်ငါးပိလို လုပ်ခဲ့၏။ ဤနေရာတွင် လွှတ်တော်ဆိုသည်မှာ လွှတ်တော်ကြီးတခုလုံး အသိပေးရမည်ဟု မဆိုလို။ လွှတ်တော်တွင် ထိပ်တန်းကျသည့် ရေးရာကော်မတီများရှိ၏။ ထိုကော်မတီများနှင့်တိုင်ပင်ရန် သဘောထားယူရန်လိုခြင်းကိုဆိုလို၏။ လွှတ်တော်ကြီးတခုလုံးကိုချပြပြီးမှ လုပ်ကြံသတ်ဖြတ်ရေးကိစ္စလုပ်ဖို့ဆိုတာက ဘယ်လိုမှမဖြစ်နိုင်။ ဒါက စစ်ရေးအရထိပ်တန်းလျှို့ဝှက်။ ဘာမှမလုပ်ခင် ထောက်လှမ်းရေးသတင်းများ ပေါက်ကြားနေလို့မရ။ သည်လောက်တော့ နိုင်ငံရေးသမားမှမဟုတ် အရပ်ထဲက လူသာမန်ပင်သိနိုင်၏။

ခုလွှတ်တော်က သမ္မတကို အီရန်ကိစ္စ စစ်ရေးအရ တခုခုဆောင်ရွက်မည်ဆိုလျှင် လွှတ်တော်၏သဘောတူညီချက်မပါပဲ လုပ်လို့မရအောင် မဲခွဲဆုံးဖြတ်အတည်ပြုလိုက်၏။ ထို့အတွက် စစ်တစစ်ကိုရှောင်ရှားလိုက်နိုင်တာတော့ မဟုတ်။ စစ်က နဂိုကတည်းက ဖြစ်ဖို့သဘောထား သမ္မတမှာ ရှိထားပုံမပေါ်။ အကယ်၍ ရှိခဲ့မည်ဆိုပါက သမ္မတအနေနှင့် လွှတ်တော်တွေသဘောထားကို ယူပြီးမှ လုပ်ကြံမှုကိုစီစဉ်ရလိမ့်မည်။ ခုဖြစ်ကြတာက ဒရုန်းလေယဉ်ဖြင့်တိုက်ခိုက် သတ်ဖြတ်မှုကို အောက်လွှတ်တော် (ဒီမိုကရက်တွေ)က မကြိုက်လို့မဟုတ်။ လုပ်ကြံသတ်ဖြတ်လို့ ပြစ်တင်ရှုတ်ချနေတာမဟုတ်။ ကြိတ်တောင် ဝမ်းသာနေကြမည်မှာ မုချ။

တကယ်ဖြစ်ကြတာက အကယ်၍ အီရန်ကို စစ်လုပ်မည်ဆိုပါက ငါတို့လည်း အသိပေးပါ၊ ငါတို့ကို ချောင်ထိုးမထားပါနဲ့၊ ဖွဲ့စည်းပုံကလည်း အဲ့လိုလုပ်ဖို့ပြောထားပါတယ်၊ ငါတို့သာ အသိပေး ငါတို့အတည်ပြုပေးပါ့မယ်ဟု သတင်းစကား ပါးရုံသက်သက်မျှပင်ဖြစ်၏။ ဒီမိုကရက်များ သမ္မတ၏အကျောကို ခံလိုက်ရသလို အောင့်သီးအောင့်သက် ဖြစ်သွားခြင်းကြောင့် ခုလို ဘုဘောက်ကျကြတာဖြစ်၏။

အပေါ်မှာပြောခဲ့သလိုပင် ဒါကိုကြည့်ပြီး Check and Balance တို့ ဒီမိုကရေစီ့အောင်ပွဲတို့ဆိုပြီး ကလောင်အရသာ ပါးစပ်အရသာခံမိလျှင် တက်တက်စင်လွဲရုံမက လူရယ်စရာပါဖြစ်လိမ့်မည်။ ထို့အတူ အမေရိကန်မှာတော့ ကွဲကုန်ပြဲကုန်ကြပြီဟု တက်ထောင်မောင်းနင်းတွေေ ပြောမိတွေးမိပါကလည်း ဒီကောင့်နှယ် အ ရန်ကောဟုအကြည့်ခံရမည့်အပြင် အလှောင်ပါခံရမည့်ကိန်းရှိ၏။

တကယ် ဒီမိုကရက်ရော ရီပတ်ဘလီကင်န်ပါ အမေရိကန်တွေဖြစ်ကြ၏။ စစ်အတူတိုက်ခဲ့ကြ၏။ နိုင်ငံတွေကို အတူ ကျူးကျော်ခဲ့ကြ၏။ အမေရိကန်တိုက်ခဲ့သမျှစစ်တိုင်းသည် အမေရိကန့်အကျိုးစီးပွားချည်းဖြစ်သဖြင့် ဒီမိုကရက်အကျိုးစီးပွား ရီပတ်ဘလီကင်န်အကျိုးစီးပွားဟူ၍ သတ်သတ်မရှိ။ ဘုံ အကျိုးစီးပွားဖြစ်၏။ တဘက်ဘက်ကဖျက်လျှင် နှစ်ဘက်လုံးပျက်မည်ကို သူတို့သိ၏။ ထို့ကြောင့် ဘာမတရားတာလုပ်လုပ် တရားတာလုပ်လုပ် အများအမြင်(ကမ္ဘာ့အမြင်)တွင် အမြင်ကောင်းဖို့လို၏။ အပြလှဖို့လို၏။ ထို့ကြောင့် သူတို့ ရုပ်အထွက်ကောင်းရေးအတွက် ကိုယ့်ကိစ္စကိုယ်ရှင်းကြခြင်း ကိုယ့်အလုပ်ကိုယ်လုပ်ကြခြင်းသာဖြစ်၏။

ကျနော်တို့ တွေးဖို့ ပူဖို့မှာ အမေရိကန်သည် အရင်းရှင်ဒီမိုကရေစီနယ်ချဲ့သမားအဖြစ်မှ ဖက်ဆစ်နယ်ချဲ့သမား ဖြစ်သွားနိုင် မသွားနိုင်ပင်ဖြစ်လိမ့်မည်ထင်၏။ ဖက်ဆစ်နယ်ချဲ့ဖြစ်သွားလိမ့်မည်ဟု မည်သူမျှ ယတိပြတ်ပြောမရသလို မဖြစ်နိုင်ပါဘူးဟုလည်း မည်သူမျှကံသေကံမ အာမဘန္တေမခံနိုင်။ ဖြစ်လာခဲ့လျှင် နောက်ထပ် ရဲဘော် ဘယ်နှကျိပ်တွေ နောက်ထပ် ဆူဘာ့စ်ချန်ဒရာဘို့စ်တွေပေါ်လာဦးမလဲက မပြောတတ်။ ခုတောင် ကျီလာပြီး မိးရှိူ့စေချင်သူတွေ ရှိနေသည်မဟုတ်လား။

သမိုင်းဆိုတာကလည်း ကြောင်လိန်လှေကားလို အပေါ်ကိုတက်သွားသည်ဆိုပေမယ့် တပတ်တပတ်စီတော့ ပတ်ပတ်ပြီးမှ တက်ရသည်မဟုတ်လား။ ထို့ကြောင့် သမိုင်းတပတ်မလည်ဟု မပြောနိုင်။ ဖက်ဆစ်ကိုတိုက်ခဲ့သူက ဖက်ဆစ်ပြန်မဖြစ်နိုင်ဟု ကျိန်းသေပြောမရ။
မျိုးမြင့်ချို
ဇန္နဝါရီ ၁ဝ၊ ၂ဝ၁၉