(လိမ္မော်သီးဟာ မီးလောင်မလွယ်ဘူးဆိုပေမယ့်)

(လိမ္မော်သီးဟာ မီးလောင်မလွယ်ဘူးဆိုပေမယ့်)
လမ်းဘေးဈေးသည် နိုင်ငံတိုင်းမှာရှိပါတယ်။ Street Food ဆိုပြီးကို သတ်သတ် သွားစားသူတွေရှိပါတယ်။ ကျနော်လည်း ဖို့ဝိန်းက ပွဲတော်ကြီးငယ်တွေရှိတိုင်း ရာသီစာရော ပွဲတော်စာရော သွားစားပါတယ်။ ဒါတင်မက လမ်းဘေးမှာ Food Truck တွေနဲ့ရောင်းတာရော ယဉ်နောက်ဆွဲတွဲလေးတွေနဲ့ရောင်းတာရော လက်တွန်းလှည်းလိုဟာနဲ့ရောင်းတာရော ကြိုက်တာရှိဝယ်စားပါတယ်။ ဝေါ်ရှင်တန်ဒီစီက အိမ်ဖြူတော်နဲ့ မလှမ်းမကမ်းမှာ၊ လွှတ်တော်အဆောက်အဦးတွေနဲ့ မလှမ်းမကမ်းတွေမှာတောင် လမ်းဘေးဈေးသည်တွေရှိပါတယ်။ လမ်းဘေးမှာ သန့်သန့်ရှင်းရှင်းနဲ့ စနစ်တကျရောင်းနိုင် ဝယ်စားနိုင်အောင်လုပ်ထားတာ ဖြစ်ပါတယ်။

ဘုရားပရဝုဏ်မှာ ဘယာကြော်လာရောင်းတဲ့ အစ္စလာမ်ဘာသာဝင် အဖိုးကြီးတယောက်ကို မဘသဘုန်းကြီးဆိုးတွေ ရိုက်နှက်ကြိမ်းမောင်းပြီး သူ့အသက်မွေးရာမီးဖိုလေး အကြော်အိုးလေးတွေကို ဖျက်ဆီးခဲ့တုန်းကလည်း ဒါဟာ မတရားမှု နိုင့်ထက်စီးနင်းမှု ဥပဒေမဲ့လုပ်ရပ်အဖြစ် ကျနော်တို့ နာကျင်ခဲ့ရပါတယ်။ ဒါပေမယ့် အဲ့ဒီတုန်းက အဓမ္မမှုကျူးလွန်ခဲ့သူတွေဟာ ဘုန်းကြီးတွေဖြစ်ပြီး စည်ပင်ဝန်ထမ်းလို လုပ်ပိုင်ခွင့်အာဏာ(တရားဝင်)ရှိမထားသူတွေပါ။ ခံစားချက်တမျိုးနဲ့ ပိုကြေကွဲကြပါတယ်။

ခုလည်း လိမ္မော်သီးသည်ကြီးကို အဓမ္မမှု ကျူးလွန်ပြန်ပါပြီ။ ကျူးလွန်သူက အစိုးရဝန်ထမ်းလို့ဆိုနိုင်တဲ့ စည်ပင်သာယာကအမှုထမ်းတွေပါ။ ကျူးလွန်ပုံက ကာယကံရှင်ကို ရည်ရွယ်ချက်ပါပါ သိက္ခာချပြီး ရှက်ရွံ့သိမ်ငယ်စိတ်ဝင်အောင် နှိပ်ကွပ်တာပါ။ အရှက်ခွဲတာပါ။ လူ့စိတ်ကို နာကျင်အောင် တမင်လုပ်တာပါ။ သတ်မှတ်နေရာမဟုတ်ပဲ သတ်မှတ်ချက်တွေမပြည့်စုံပဲ စည်းမဲ့ကမ်းမဲ့ လာရောင်းလို့ အရေးယူရတယ်ဆိုရင်တောင် ခုလို လူသားတယောက် အရှက်တကွဲအကျိုးနည်းဖြစ်ရအောင် စော်ကားမော်ကားမလုပ်ထိုက်ပါ။

ပြဿနာက လမ်းဘေးဈေးရောင်းတဲ့ပြဿနာမဟုတ်ပါ။ လမ်းဘေးမှာ ဈေးဘယ်လိုရောင်းရမယ်ဆိုတဲ့ စည်းစနစ်ကျမှုမရှိတာလို့မြင်ပါတယ်။ လမ်းဘေးဈေးရောင်းသူတွေ အမှန်တကယ် ဈေးရောင်းနိုင်အောင် စီစဉ်ဆောင်ရွက်ထားမှုတွေ ရှိမယ်လို့ထင်ပါတယ်။ ဒါပေမယ့် လိုအပ်ချက်တွေရှိနေလို့သာ ခုလို စိတ်မကောင်းစရာအဖြစ်မျိုး နိုင်လိုမင်းထက်မှုမျိုးတွေဖြစ်ရတာပါ။

ချုပ်ကြည့်ရင် လက်ရှိအနေအထား လူမှုစီးပွားဘဝ အလွန်နိမ့်ပါးကြရရှာတဲ့ လမ်းဘေးဈေးသည်တွေကို အကြောင်းပြချက်တခုခုနဲ့ ဘုန်းကြီး(သင်္ကန်းဝတ်)တွေကဖြစ်စေ အစိုးရအမှုထမ်းခေါ်တဲ့ နိုင်ငံဝန်ထမ်းကဖြစ်တွေ လူပုံအလယ်မှာ အရှက်တကွဲအကျိုးနည်းဖြစ်အောင် ရှက်ရွံ့သိမ်ငယ်သွားအောင်လုပ်တဲ့ လုပ်ရပ်တွေကို အစိုးရအနေနဲ့ ခွင့်ပြုမထားဘူးဆိုဦးတောင် လျှစ်လျှုမရှုဘူးဆိုဦးအောင် အဲ့ဒါမျိုးတွေမဖြစ်ဖို့ ကြပ်ကြပ်မတ်မတ် မလုပ်ဘူးဆိုတာတော့ ပေါ်လွင်ပါတယ်။

သက်ဆိုင်ရာ ဒေသအာဏာပိုင်တွေအနေနဲ့ ဒီလိုကိစ္စမျိုးတွေကို အသေးအမွှားလေးတွေပါဆိုပြီး မျက်နှာလွှဲခဲပစ်မထားကောင်းပါ။ အမှိုက်တိုင်းကစပြီး ပြသဒ်မီးလောင်တာမဟုတ်ပေမယ့် မီးလောင်ဖို့ရေခံမြေခံပြည့်စုံနေရင်တော့ အမှိုက်တိုင်းဟာ မီးလောင်လွယ်ပါတယ်။
မျိုးမြင့်ချို
ဇန္နဝါရီ ၂၂၊ ၂ဝ၂ဝ