(ဘယ်အထဲမှာ ဘယ်သူရှိနေလဲ)

(ဘယ်အထဲမှာ ဘယ်သူရှိနေလဲ)
စစ်အုပ်စုဟာ သူ့အောက် ခေါင်းလျှိုပြီးဝင်လာတဲ့သူတွေကို ၂ စား ခွဲပြီး ပစားပေးပုံပေါ်ပါတယ်။ တစားက ခေါင်းလျှိုတော့ဝင်လာတယ် ကိုယ့်ဆန္ဒအလျှောက် စိတ်ပါလက်ပါ စစ်အုပ်စုကို အလုပ်အကြွေးမပြုဘူး။ ခိုင်းရင်တောင် ဝတ်ကြေတမ်းကြေလောက်လုပ်တဲ့အစားပါ။ ဒီအစားဟာ အခြေအနေ အလှည့်အပြောင်း ကြီးကြီးမားမားနဲ့ တိုးမိတိုက်မိရင် လူထုဘက်စိတ်ပြန်လည်ပြီး စစ်အုပ်စုနဲ့ ခတ်ခွာခွာဖြစ်သွားပါတယ်။ အပြီးအပြတ်လမ်းခွဲသွားတာမျိုးမဟုတ်ပဲ သံယောဇဉ်တငွေ့ငွေ့နဲ့ ငယ်ကြောက်သဘောနဲ့ လှဲ့ကြည့်လှဲ့ကြည့် ဖြစ်နေတာမျိုးပါ။ ဒုတိယတစားကတော့ ခေါင်းလျှိုဝင်လာပြီးတဲ့နောက် စစ်အုပ်စုက ခိုင်းခိုင်း မခိုင်းခိုင်း ကိုယ်တိုင်ကိုယ်ကျ စိတ်ပါလက်ပါကို အသုံးတော်ခံတာမျိုးပါ။ အခွင့်သင့်တိုင်း မိမိဦးလည်မသုန် အသုံးတော်ခံနေကြောင်း အလုပ်အကြွေးပြုနေကြောင်းကို သဏ္ဍန်မျိုးစုံနဲ့ဖော်ပြကြပါတယ်။ သူတို့ကျတော့ ဘယ်လို အခြေအနေအလှည့်အပြောင်းကြီးတွေနဲ့ တွေ့တွေ့ကြုံကြံု လူထုဘက်တိုင်းပြည်ဘက် ဦးပြန်မလည်စတမ်းကို ဖြစ်သွားတာပါ။ လူထု၊ တိုင်းပြည် နဲ့ မိမိပါတီအဖွဲ့အစည်းအပေါ် ပြတ်ပါတယ်။

ဒါကိုပဲ ကျနော်တို့က နိုင်ငံရေးစကားနဲ့ တခွန်းတည်းချုပ်ပြောတော့ အခြေအနေအရ လက်နက်ချသူနဲ့၊ အတွေးအခေါ်အရ လက်နက်ချသူဆိုပြီး ပြောကြတာပါ။

အခြေအနေအရ လက်နက်ချသူဟာ အခြေအနေ အလှည့်ပြောင်းပေါ်မူတည်ပြီး ရပ်တည်ချက်ပြောင်းတာ တိုင်းပြည်နဲ့လူထုအပေါ် မိမိအဖွဲ့အစည်းအပေါ် ဒါမှမဟုတ် ပါတီအပေါ် အတွေးအခေါ်အရ စိတ်ပြန်လည်တတ်ပါတယ်။ အဲ့သလို စိတ်ပြန်လည်တဲ့အခါ(အမှားမှန်းသိပြီး ပြင်လာတဲ့အခါ) လူထုက တိုင်းပြည်က မူလအဖွဲ့အစည်း(ပါတီ)က ပြန်လက်ခံသိမှတ်ပြီး မူလတူရှူချက်ဆီ ပြန်ရောက်သွားပါတယ်။ တနည်းပြောရရင် ပြန် တည့်မတ်သွားပါတယ်။

အတွေးအခေါ်အရလက်နက်ချသူကျတော့ ဘယ်လိုအခြေအနေမျိုး ဘယ်လိုအလှည့်ပြောင်းမျိုးမှာမဆို သူဟာ လူထုဘက် တိုင်းပြည်ဘက် မိမိအဖွဲ့အစည်းဘက် မိမိပါတီဘက် ပြန်မလှည့်စတမ်း ဖြစ်သွားတာပါ။ အဲ့သလိုလူတွေထဲမှာမှ တခါ ၂ စားလောက် ထပ်ရှိပါတယ်။ တစားက အတွေးအခေါ်အရ လက်နက်တော့ချသွားတယ် ဒါပေမယ့် လူထုအပေါ် တိုင်းပြည်အပေါ် မိမိအဖွဲ့အစည်းနဲ့ပါတီအပေါ် သစ္စာမဖေါက်တဲ့အစားပါ။ ဒုတိယအစားကတော့ အားလုံအပေါ် သစ္စာဖေါက်တတ်သူဖြစ်ပါတယ်။ လက်နက်ချသစ္စာဖေါက်ဖြစ်သွားတာပါ။

ပြန်ချုပ်ရရင် စစ်အုပ်စုအောက် ခေါင်းလျှိုဝင်သူ ၂ စားရှိပြီး၊ တစားက မလွဲသာလို့အသုံးချခံတယ်၊ နောက်တစားက စိတ်လိုလက်ရ အသုံးချခံတယ်။ စစ်အုပ်စုက အဲ့ ၂ စားကို မတူတဲ့အတိုင်းအတာအလျှောက် ပစားပေးတယ်။ အဲ့ ၂ စားကို ယေဘုယျသဘောအရ အခြေအနေအရလက်နက်ချနဲ့ အတွေးအခေါ်အရ လက်နက်ချအဖြစ် ပြောဆိုသုံးစွဲကြတယ်။ အခြေအနေအရလက်နက်ချဟာ အကြောင်းတခုခုကြောင့် တိုင်းပြည်လူထု မိမိပါတီအဖွဲ့အစည်း မိမိယုံကြည်ခဲ့ရာဘက်တွေကို ပြန်ဦးလှည့်တတ်ပြီး အတွေးအခေါ်အရလက်နက်ချဟာ သစ္စာဖေါက်အထိဖြစ်သွားတတ်တယ်ဆိုတာပါ။

စစ်အုပ်စုဘက်ကတော့ ရှင်းပါတယ်။ တခါလက်နက်ချရင် မသေမချင်းချမှ ရပါတယ်။
မျိုးမြင့်ချို
ဇန္နဝါရီ ၂၉၊ ၂ဝ၂ဝ

21