(ကာလုံနဲ့ ကဘောက်တိကဘောက်ချာများ)

(ကာလုံနဲ့ ကဘောက်တိကဘောက်ချာများ)
၂ဝ၁၆ လောက်ကတည်းက နိုင်ငံတော်ကာကွယ်ရေးနဲ့လုံခြုံရေး(ကာလုံ)ထဲမှာ သမ္မတ မဲပေးခွင့်မရှိစေရေးဥပဒေတခု စစ်တပ်ကအဆိုတင်သွင်းလိမ့်မယ်ဆိုတဲ့သတင်း သိုးသိုးသန့်သန့်ထွက်ခဲ့ဖူးပါတယ်။ မှတ်မိသူတွေ မှတ်မိကြလိမ့်ဦးမယ်ထင်ပါတယ်။ အဲ့ဒီတုန်းက စစ်အုပ်စုစဉ်းစားချက်က စစ်တပ်ကတင်တဲ့လူ သမ္မတမဖြစ်ခဲ့ရင်ဆိုတဲ့အခြေခံကနေ ဖြစ်ပါတယ်။

ခုလည်း ဦးသိန်းစိန်နောက်ဖြစ်လာတဲ့သမ္မတ ၂ ယောက်လုံးဟာ စစ်တပ်တင်သမ္မတတွေ မဟုတ်ကြပါဘူး။ တဆက်တည်းမှာပဲ ဒီ သမ္မတ ၂ ယောက်လက်ထက်မှာလည်း (ခုထိ)ကာလုံမခေါ်သေးပါဘူး။ အရပ်သားသမ္မတတွေ (အင်န်အယ်လ်ဒီတင်သမ္မတတွေ)ဖြစ်နေလို့ ကာလုံမခေါ်တာတော့လည်း ဟုတ်ဟန်မတူပါဘူး။ ကာလုံကလည်း သမ္မတက ကိုယ့်သဘောနဲ့ကိုယ် (ကိုယ့်လက်ကိုယ့်ခြေ) အပိုင်ခေါ်လို့ ရမရကလည်း ရေရေရာရာတော့မရှိပါဘူး။ ၂ဝဝ၈ ဖွဲ့စည်းပုံမှာ ကာလုံအစည်းအဝေးတွေကို ဘယ်လိုခေါ်ယူကျင်းပရမယ်၊ အစည်းအဝေးဆုံးဖြတ်ချက်တွေကို ဘယ်လိုချမှတ်ရမယ်ဆိုတာမျိုး တိတိကျကျပြဌာန်းထားတာမျိုးမရှိပါဘူး။

ဦးသိန်းစိန်လက်ထက်တုန်းကတော့ ကာလုံအစည်းအဝေးတွေခေါ်တာရှိတယ်လို့ ဆိုပါတယ်။ အဲ့ဒီ ကာလုံအစည်းအဝေးကပဲ လက်ရှိကာချုပ် မင်းအောင်လှိုင်ကို ကာချုပ်တာဝန်ခန့်အပ်ခဲ့တာပါ။ ကာချုပ်ကို ကာလုံရဲ့ထောက်ခံချက်နဲ့ သမတက အတည်ပြုပေးရတာပါ။ ခု နောက်ပိုင်း အင်န်အယ်လ်ဒီခေတ်မှာ ကာလုံ တခါမှခေါ်တာမရှိသေးပါဘူး။ ဒါ့ကြောင့် ကြံ့ဖွံ့အစိုးရကနေ အင်န်အယ်လ်ဒီအစိုးရသာပြောင်းသွားတယ် ကာချုပ်ခန့်အပ်ခြင်းကတော့ မရှိပါဘူး။ အစိုးရသစ်ပြောင်းသွားရင် အစိုးရသစ်ပြန်ဖွဲ့စည်းရသလို တပ်မတော်ကာကွယ်ရေးဦးစီးချုပ်လည်း ခန့်အပ်တာဝန်ပေးရပါတယ်။ ခု ဗိုလ်မင်းအောင်လှိုင်ကိုက အဲ့သလို ခန့် အပ်တာဝန်ပေးထားတာမဟုတ်လို့ တရားမဝင်ကာချုပ်ဆိုပြီး ရိသဲ့သဲ့တွေ ပြောနေရေးနေကြတာပါ။

ရခိုင်ကိစ္စ ICJ ရောက်ကာခါနီးအချိန်(တကယ်ကရောက်တော့မယ်ဆိုတာ သူတို့သိပြီးသားပါ။ ဘာမှ လျှို့ဝှက်လုပ်နေကြတာမှမရှိပါ)ကျမှ စစ်အမတ်တွေကရော တပ်မတော် သတင်းမှန်ပြန်ကြားရေးကရော အစိုးရကို ကာလုံခေါ်ဖို့ တကျီကျီလုပ်တာပါ။ အစိုးရက မခေါ်ပါဘူး။ မခေါ်ရတာမှာလည်း အတွင်းကျတဲ့အကြောင်းတွေ ထိပ်သီးတွေသာ သိနိုင်မယ့်အကြောင်းတွေရှိနိုင်ပေမယ့် အပြင်ကို ပေါက်ထွက်လာတဲ့ အရပ်သတင်းတခုမှာတော့ ဒေါ်အောင်ဆန်းစုကြည်က ကာလုံခေါ်ယူကျင်းပရေးကို သဘောမတူလို့ မီးစိမ်းမပြလို့ သမ္မတက မခေါ်ဝံ့တာလို့ဆိုပါတယ်။ ဒီသတင်း ဟုတ်နိုင်ခြေရှိမရှိကို ဘာခိုင်လုံတဲ့အထောက်အထား သက်သေသက္ကာယနဲ့မှတော့ မပြနိုင်ကြပါ။ ကာလုံမခေါ်တော့ ကာချုပ်လည်း တရားဝင်ခန့်အပ်တာဝန်မပေးနိုင်သလို တိုင်းပြည်ရဲ့ တကဲ့ မီးရဲရဲကျောက်ရဲရဲကိစ္စတွေကိုလည်း စစ်အုပ်စုနဲ့တွဲပြီးကိုင်တွယ်ဖို့ မလွယ်ကူဘူးထင်ပါတယ်။ အန်အယ်လ်ဒီအစိုးရအနေနဲ့ ဖြစ်နေတဲ့ကိစ္စတွေဟာ ကာလုံတင်ပြီး မဲခွဲဆုံးဖြတ်ယူရလောက်တဲ့ကိစ္စတွေမဟုတ်ဘဲ သူတို့ဘာသာ လက်နိုင်ခြေနိုင်ရှိတယ်လို့ တွက်ဆနေတာမျိုးလည်း ဖြစ်နိုင်ပါတယ်။

ပြန်ကောက်ရရင် ၂ဝ၁၆ လောက်တုန်းက စစ်အုပ်စုဟာ ကာလုံထဲမှာ သမ္မတမဲပေးခွင့်မရှိစေရဥပဒေ အဆိုပြုဖို့ကြိုးပမ်းတဲ့အသံ ထွက်ဖူးတယ်။ အဆိုပြုဖြစ်တယ်တော့ မကြားမိပါ။ ဦးသိန်းစိန်လက်ထက်မှာ ကာလုံတွေခေါ်ဖူးကြောင်းကြားရပြီး အင်န်အယ်လ်ဒီခေတ်မှာ ကာလုံတခါမှမခေါ်ဖူးပါ။ ၂ဝဝ၈ ဖွဲ့စည်းပုံမှာ ကာလုံကို ဘယ်လိုခေါ်ရမယ်ဆိုပြီး တိတိကျကျပြဌာန်းထားတာမရှိတော့ စစ်တပ်ကဘယ်လောက်ပဲ ကာလုံခေါ်ချင်နေခေါ်ချင်နေ အစိုးရကမခေါ်တော့ ဘာမှလုပ်မရပါ။ မခေါ်လို့လည်း သူတို့သစ္စာခံထားတဲ့ဖွဲ့စည်းပုံကို သစ္စာစောင့်သိရိုသေရာ မကျဘူးလို့ ဘယ်သူကမှ မပြောသာပါ။ စစ်အုပ်စုက ပိုတောင်မပြောပါ။ ကာလုံရဲ့ ခန့်အပ်တာဝန်ပေးခြင်းမရှိပဲ ဗိုလ်မင်းအောင်လှိုင်က ကာချုပ်တက်လုပ်နေတာပါ။ ဒါကို တရားဝင်တယ်မဝင်ဘူး ငြင်းခုန်နေရတာပါ။ မဝင်လို့လည်း ဘာမှမဖြစ်သလို၊ ဝင်လို့လည်း ဘာမှတော့ဖြစ်မှာမဟုတ်ပါ။

ဒါဆောင်းပါးမဟုတ်ပါခင်ဗျား။ စိတ်ထဲပေါ်လာတာတွေ နောင်တချိန်ပြန်ရေးဖြစ်တဲ့အခါ မှတ်မိအောင် ကိုယ့်ဘာသာ တေးထားတာလေးတွေပါ
မျိုးမြင့်ချို
ဇန္နဝါရီ ၂ဝ၊ ၂ဝ၂ဝ