သမိုင်းကို ဖျောက်ဖျက်လို့မရပါ
၂၀၁၄
ဇန်နဝါရီ (၁)ရက်နေ့မှာထွက်လာတဲ့ အရေးတော်ပုံဂျာနယ် အတွဲ(၁)၊ အမှတ်(၁၂) ရဲ့ ခေါင်းကြီးဆောင်းပါးဖြစ်ပါတယ်။
‘ကြ’ နဲ့ ‘ရ’
ဗမာပြည်ပြည်တွင်းစစ်က မျိုးဆက် ၃ ဆက်တောင်ကျော်ခဲ့ပြီ။ ပြေငြိမ်းမယ့်အလားအလာ
မမြင်သေး။
ဖဆပလ ဆိုရှယ်လစ်ဦးကျော်ငြိမ်းတို့က ‘တိုင်းတပါး၏ ညွှန်ကြားချက်ဖြင့်
ကွန်မြူနစ်များကတောခိုပြီး ဆူပူသောင်းကျန်း (ကြ)သည်’ ဟု ပြောင်းပြန်လုပ်ပြောခဲ့ကြတယ်။
ကွန်မြူနစ်ပါတီကမူ ‘ဖဆပလအစိုးရက တပြည်လုံးရှိ ကွန်မြူနစ်များကို
စတင်ဖမ်းဆီးခဲ့ခြင်းကြောင့် မလွှဲမရှောင်သာတောခို၍ တော်လှန်တိုက်ခိုက်ခဲ့(ရ)ခြင်းဖြစ်တယ်’ဟု
ဆိုခဲ့တယ်။
ဖြစ်စဉ်
၁၉၄၈ ခုနှစ်တုန်းက ဗမာပြည်ကွန်မြူနစ်ပါတီရဲ့ ပါတီဝင်ဦးရေဟာ ၂ဝဝဝ
ကျော်ကျော်ရှိခဲ့တယ်၊ ဥပဒေတွင်းပါတီဖြစ်လို့ လျှို့ဝှက်ထားစရာ မလို။ မြို့နယ်၊ ခရိုင်လိုက်
ပါတီဝင်အစည်းအဝေးတွေ ဗြောင်ကျင်းပနေတာဖြစ်တယ်။ ပုလိပ် (CID)က ရုံးနားထိုင်စောင့်ကြည့်နေရုံနဲ့
ပါတီဝင်စာရင်းလွယ်လွယ်နဲ့ရနိုင်တဲ့ခေတ်။
ကွန်မြူနစ်ပါတီရဲ့ စည်းရုံးရေးကောင်းမွန်မှုကြောင့် ပါတီဝင်တွေတရိပ်ရိပ်တက်နေတာ
ပြည်ထဲရေးဝန်ကြီးဦးကျော်ငြိမ်း မသိချင်မှအဆုံး။
ဒါကြောင့် ပုခက်တွင်းမှာ လည်ပင်းညှစ်သတ်ဖို့ ဝန်ကြီးချုပ်ဦးနုကိုသွေးဆောင်တာဖြစ်တယ်၊
ပထမ ငြင်းပယ်တယ်။ အကြိမ်ကြိမ်လိမ်ညာ နားပူနားဆာတိုက်တော့မှ သဘောတူလိုက်တာဖြစ်တယ်။ ဒီဖြစ်စဉ်ကို
ဦးနုရော၊ ဦးကျော်ငြိမ်းပါ ဝန်ခံထားကြပြီးဖြစ်တယ်။
၁၉၄၈ ခု မတ်လ ၂၈ ရက်နေ့မှာ တပြည်လုံးအနှံ့ ပိုက်စိတ်တိုက်ဖမ်းလိုက်တာ
ပါတီဝင်တဝက်ကျော် အဖမ်းခံထိကုန်တယ်။
မုန်တိုင်းကို ခြေရာခံခြင်း
တလောကတော့ မျိုးဆက်ဟောင်း သခင်အုန်းမြင့်ကျေးဇူးကြောင့် ဦးကျော်ငြိမ်းရဲ့အကြံအစည်ကို
ပါတီဌာနချုပ်ဆီ အချိန်မီသတင်းပေးခဲ့တဲ့ ဗိုလ်သက်ထွန်းရဲ့ရေးသားချက်ပေါ်လာတယ်။ •ဖဆပလ
အစိုးရက စတင်ဖမ်းဆီးသတ်ဖြတ်သဖြင့် ပြည်တွင်းစစ်ဖြစ်ခဲ့ရသလော၊
• ကွန်မြူနစ်များက ၎င်းတို့၏ လက်နက်ကိုင်တော်လှန်ရေးလမ်းစဉ်ကြောင့် ပြည်တွင်းစစ်ဖြစ်ခဲ့ရသလော၊
- လို့ မေးခွန်းထုတ်ပြီး ပြည်တွင်းစစ်မုန်တိုင်းကို ခြေရာခံသူက ခံလာတယ်။
• တခွန်းတည်းပဲ ဖြေပါမယ်။ ဦးကျော်ငြိမ်းပြောသလို တောခိုဖို့ပြင်နေကြတယ်ဆိုရင်
လာဖမ်းတာနဲ့သေနတ်သံထွက်မှာပေါ့။ အနည်းဆုံး သတိနဲ့နေကြမှာပါ။ ဒီလောက် အဖမ်းခံရဖို့ အကြောင်းမရှိ။
တကယ်က ဖမ်းမယ်ဆီးမယ်လို့ လှန့်သံပေးပြီး တောထဲခြောက်ထုတ်နေတာ ဦးကျော်ငြိမ်းတို့ကိုယ်တိုင်ပဲဖြစ်တယ်။
ဒီသတင်းထွက်လာတိုင်း ကွန်မြူနစ်တွေရှောင်ကြတိမ်းကြရတာလည်း များပြီ။ မယုံကြတော့ဘူး။
ဒါ့ကြောင့်လည်း တကယ်ဖမ်းတဲ့အခါ ဘာမှမတတ်နိုင်ဘဲ အဖမ်း ခံလိုက်ကြရတာပါ။ ဘယ်မှာလဲ မိတဲ့လက်နက်
- ဘယ်သူကမှ ‘လက်နက်ကိုင်တိုက်ဖို့ ကျုပ်တို့ပြင်ပါတယ်’လို့ ဖြေသူမရှိ။
ဌာနချုပ် PB တွေ လွတ်သွားတာက ဖမ်းမယ့်တပ်ထဲကသတင်းပေါက်သွားလို့ လွတ်ကုန်ကြတာဖြစ်တယ်။
ဝဋ်လည်ခြင်း
ဖမ်းမိတဲ့ကွန်မြူနစ်တွေ ရက်ရက်စက်စက် အနှိပ်စက်ခံကြရတယ်။ “သာယာဝတီထောင်မှ
ငရဲခန်းများ”ဆိုတာ ပေါ်လာတယ်။ ဦးကျော်ငြိမ်းကိုယ်တိုင်ကွပ်ကဲပြီး အမိန့်ပေးစေခိုင်းတာပါ။
သမိုင်းကာလတခု ဖြတ်သန်းပြီးတဲ့နောက် ကာလဝိပါက်နောက်ပိုးတက်ပြီး သူကိုယ်တိုင်
ငရဲခန်းမှာဒုက္ခခံခဲ့ရတယ်။ ကိုယ့်ကိုယ်ကိုယ်
ကြိုးဆွဲချသေဖို့လုပ်ခဲ့တဲ့အထိပဲ။
ဒီလုပ်ဟန်ကို ဗိုလ်နေဝင်းနဲ့မျက်မှန်ကြီးတင်ဦးတို့က အမွေဆက်ခံခဲ့တယ်။
သူတို့လည်း ဇာတ်သိမ်းမကောင်း၊ တယောက်က အိမ်ချုပ်၊ တယောက်က ရေကြည်အိုင်မှာဇာတ်သိမ်းခဲ့ကြရတယ်။
ငရဲနဲ့ခြောက် ဘုံနဲ့မြှောက်
အခု လက်နက်ကိုင်တိုက်နေရဆဲဖြစ်တဲ့တိုင်းရင်းသား များနဲ့ ABSDF ကျောင်းသားတပ်မတော်ကရော
(ကြ) နဲ့ (ရ) ဘယ်အထဲမှာပါသလဲ။ ပြန်မတိုက်မဖြစ်လို့ တိုက်ကြရသူချည်းလို့ မပြောနိုင်ဘူးလား။
ဗိုလ်သိန်းစိန်အစိုးရကတော့ ခုပဲ ပြည်တွင်းစစ်ချုပ်ငြိမ်းတော့မလိုလို
လေသံတွေပစ်နေကြတယ်။ သူမနာကိုယ်မနာ ကျေကျေလည်လည်နဲ့ ပြည်တွင်းစစ်ရပ်နိုင်ကြရင် ဗကပ က
ဝမ်းသာပါမယ်။ အပစ်အခတ်ရပ်စဲရေးလက်မှတ်ထိုးလိုက်ကြရင်ရပါပြီဆိုတဲ့အပြောမျိုးနဲ့တင် ရပ်စဲထား
လို့မရ။
အုပ်စိုးသူအဆက်ဆက်ကိုင်စွဲထားခဲ့ကြတဲ့ ‘လက်နက်အရင်ချပါ’ ဆိုတဲ့ပေါ်လစီကို
အနှစ်သာရမပြောင်း ဝေါဟာရသာပြောင်းနေလို့ကတော့ အလုပ်ဖြစ်မှာမဟုတ်။
တဖက်က စကားပြော - တဖက်က တပ်တွေတိုးချပြီး ခြောက်လှန့်ထား၊ တချိန်တည်း
စီးပွားရေးအခွင့်အလမ်းတွေ သာသာထိုးထိုးပေး၊ ငွေတွေပုံပေး၊ စည်းစိမ်ခံစားခွင့်တွေပေး၊
ကား၊ အိမ်၊ လစာနဲ့ တချို့ဆို ပြောရေးဆိုခွင့်တွေတောင်ပေးထားပြီး ဘုံမြှောက်ထားလိုက်သေးတယ်။
ငရဲနဲ့ခြောက် ဘုံနဲ့မြှောက်ဆိုတာ ဒီနေ့ခေတ် စစ်တပိုင်းအစိုးရရဲ့လုပ်နည်းလုပ်ဟန်ပါကလား။
(၂၈၊ ၁၂၊ ၂ဝ၁၃)
0 comments:
Post a Comment