၂၀၁၄ခုနှစ်ရဲ့ပွဲကြီးပွဲကောင်း (ရဲဘော်ဖိုးသံချောင်း)

၂၀၁၄ခုနှစ်ရဲ့ပွဲကြီးပွဲကောင်း (ရဲဘော်ဖိုးသံချောင်း)

ဒီနေ့ဗမာပြည်ရဲ့နိုင်ငံရေးမှာ“ဖွဲ့စည်းပုံအခြေခံဥပဒေ အကြပ်အတည်းဆိုက်နေတယ်”ဆိုတဲ့ အသုံး အနှုန်းခေတ်စားနေပါတယ်။ ဖွဲ့စည်းပုံအခြေခံ ဥပဒေက သူ့ဖာသာသူ တည်ရှိနေတာပါ။ အကြပ်အတည်းဆိုက်ရအောင် သူက လှုပ်ရရှားရတဲ့ သက်ရှိအရာဝတ္ထုမဟုတ်ပါဘူး။ အကြပ်အတည်းဆိုက်နေတာက ဒီ၂၀၀၈ဖွဲ့စည်းပုံ အခြေခံဥပဒေနဲ့ပတ်သက်ပြီး ပြောဆို ငြင်းခုံ၊ နိုင်ငံရေးလုပ်နေကြသူတွေနဲ့ နိုင်ငံရေးပါတီတွေဖြစ်တယ်လို့ဆိုမှ ပိုမှန်ပါလိမ့်မယ်။ ဘာကြောင့် ဒီလိုအကြပ်အတည်းဆိုက်နေတာလဲ။

အဓိကအကျဆုံးအကြောင်းရင်းကတော့ ၂၀၀၈ဖွဲ့စည်းပုံအခြေခံဥပဒေနဲ့ပတ်သက်တဲ့ ကိုယ့်ရပ်တည်ချက်ကို တိတိပပ၊ ပြောင်ပြောင် တင်းတင်းပြောရတော့မယ့်အချိန်ကိုရောက်လာလို့ ဖြစ်ပါတယ်။ ဒါဟာ လပိုင်းပဲလိုပါတော့တယ်။

ဒီနေ့ဗမာပြည်နိုင်ငံရေးမှာ သိသာတဲ့ ထူးထူးခြားခြားလက္ခဏာနှစ်ခုရှိပါတယ်။ နံပတ်တစ်ကတော့ လက်ရှိနိုင်ငံရေး  ပြဿနာအ၀၀ရဲ့ဆုံချက်ဟာ ၂၀၀၈ဖွဲ့စည်းပုံအခြေခံဥပဒေပြဿနာဖြစ်နေတာပါ။ ပြည်တွင်းငြိမ်းချမ်းရေးကိစ္စပဲဖြစ်ဖြစ်၊ အမျိုးသား ပြန်လည်သင့်မြတ်ရေးပဲဖြစ်ဖြစ် ဒီ၂၀၀၈ဖွဲ့စည်းပုံအခြေခံ ဥပဒေရဲ့ မတော်မလျော်အချက်တွေကိုမဖယ်ရှားပဲ ဘယ်လိုမှ ထိရောက်အောင် မဖြေရှင်းနိုင်ပါဘူး။ ဒီမိုကရေစီရေး၊ ၂၀၁၅ရွေးကောက်ပွဲ၊ တရားဥပဒေစိုးမိုးရေး စတဲ့ကိစ္စတွေကတော့ ပြောနေဖို့တောင် မလိုပါဘူး။ ဒီတော့ ဒီနေ့နိုင်ငံရေးသမားတွေနဲ့ နိုင်ငံရေးအင်အားစုတွေကို အဓိကစမ်းသပ်တော့မှာကတော့ ဒီ၂၀၀၈ဖွဲ့စည်းပုံအခြေခံဥပဒေအပေါ် ဘယ်လို သဘောထားသလဲဆိုတာပါပဲ။ ဒါကိုနည်းနည်း ပိုပြီး အသေးစိပ်ပြောရရင် ဒီ၂၀၀၈ဖွဲ့စည်းပုံအခြေခံဥပဒေအထဲက ဘယ်အချက်တွေအပေါ်မှာ ဘယ်လိုသဘောထားသလဲဆိုတာပဲ ဖြစ်ပါတယ်။

လက်ရှိဗမာပြည်နိုင်ငံရေးရဲ့ ဒုတိယထူးခြားချက်က ဗိုလ်ချုပ်ကြီးသိန်းစိန်အရပ်သားအစိုးရရဲ့ “ဒီမိုကရေစီ”ကြောင့် ဗမာပြည်နိုင်ငံရေးသမားလောကမှာ ပြောဆိုတာမှန်သမျှဟာ တ၀က်ချန်ပြောတာချည့်လိုဖြစ်နေပါတယ်။ အစားအကုန် စား၊ စကားအကုန်မပြောနဲ့ဆိုသလို ပြတ်ပြတ်သားသားပြောတာကြားရခဲလှပြီး “ဒါပေမယ့်”တလုံးခံတဲ့ သံတမန်ဆံဆံ ဝေ့လည်လည် စကားမျိုးတွေပဲ ကြားနေရလေ့ရှိပါတယ်။ ပြတ်ပြတ်သားသား အများဆုံးပြောကြတာဆိုလို့ အာဏာရနေတဲ့ဗိုလ်မင်းအောင်လှိုင်လိုလူနဲ့ ကြံ့ဖွတ်ပါတီက လူတွေလောက်ပဲရှိတာကို သတိထားမိပါတယ်။ သူတို့များကတော့ ‘ပြောလိုက်ရင်အပြတ်ချည့်ပဲ’လို့တောင် ပြောရမလိုဖြစ်ပါတယ်။

သမ္မတကို စစ်ဗိုလ်မှတပါး ဘယ်သူမှမဖြစ်နိုင်အောင်လုပ်ထားတာ၊ လွှတ်တော်ထဲကို စစ်ဗိုလ်တမတ်သားက သာလာယံဇရပ်ပမာ ၀င်ချင်တိုင်းဝင် ထွက်ချင်တိုင်းထွက်လို့ရအောင်လုပ်ထားတာ၊ စစ်တပ်ကအချိန်မရွေး“အာဏာသိမ်း”လို့ရအောင်လုပ်ထားတာ၊ ဖွဲ့စည်းပုံ အခြေခံဥပဒေရဲ့အရေးပါတဲ့အချက်တွေကို စစ်တပ်ကသဘောမတူပဲ ပြင်လို့ဖျက်လို့မရအောင်လုပ်ထားတာ စတဲ့အချက်တွေကို အထင်အရှားသိရက်နဲ့ စစ်အစိုးရလို့မပြောနိုင်ပဲ၊ ဒီမိုကရေစီလမ်းကို တက်လှမ်းနေတာဖြစ်ပါတယ်လို့ နှစ်ပေါင်းများစွာ မျက်စိမှိတ်ပြောနေကြရတဲ့ဝဋ်က မကျွတ်ချင်ကြသေးဘူးလား။  

အခုတော့ ဆင်ဝှေ့ရန်ရှောင်တွေလုပ်လို့ မရတော့ဘူး။ ဘူးဆိုဘူး၊ ဖရုံဆိုဖရုံ ရှင်းရှင်းပြတ်ပြတ် ပြောကြရပါတော့မယ်။ ဒီတော့ အကြပ်အတည်းတွေ့တော့တာပေါ့။

ဦးစွာအားဖြင့် ဗိုလ်သိန်းစိန်တို့အနေနဲ့ သူတို့တောင်းဆိုလို့ပေါ်လာတဲ့ “အကြံပြုချက်”သုံးသိန်းကျော် (သူတို့အဆို)ကို တုန့်ပြန်ရ၊ အဖြေပေးရတော့မယ်။ ရှင်းရှင်းပြတ်ပြတ်ပြောရတော့မယ်။ ဒေါ်စုကိုသမ္မတမဖြစ်နိုင်အောင် တမင်လုပ်ထားတာဖြစ်ကြောင်း အတည်ပြုဝန်ခံရတော့မယ်။ အနည်းဆုံးတော့ “ဟုတ်တယ်ကွာ၊ ဘာဖြစ်သေးလဲ”ဆိုတာမျိုးပြောရပါတော့မယ်။ သူတို့ကတော့ ပြောဝံ့မှာပါ၊ သံသယ ရှိစရာမလိုပါဘူး။ သူတို့ပြောသမျှကို တံဆိပ်တုံးရိုက်အတည်ပြုပေးမယ့် “လွှတ်တော်ကြီး”ကလည်း အသင့်ရှိနေသကိုး။  

ဒီအခါမှာ သူတို့တုန့်ပြန်ချက်တွေကို တခြားလူတွေ-အဖွဲ့အစည်းတွေက ဘယ်လိုတုန့်ပြန်မှာလဲ။ စစ်ဗိုလ်ချုပ်တွေရဲ့တုန့်ပြန်ချက်ဆိုတာက ကိုယ့်“အကြံပြုချက်”နဲ့ ဖြောင့်ဖြောင့်ကြီးဆန့်ကျင်နေရင် ဘာဆက်လုပ်မှာလဲ။ “ဒါဖြင့်လည်းပြီးတာပဲဗျာ”လို့ဆိုပြီး ပြုသမျှနု၊ ပုသွားမှာလား။

ဒီတော့ကာ ဒီနှစ်အတွင်း လွယ်လွယ်ပြောရင်ပဲ နိုင်ငံရေးအင်အားစုတွေကိုစမ်းသပ်မှာ အဆင့်နှစ်ဆင့်ရှိနေတယ်လို့ ဆိုနိုင်ပါတယ်။ ပထမအဆင့်က ဘယ်အချက်တွေကို ဘယ်လိုတောင်းဆိုမှာလဲ ဆိုတာ။ နောက်တဆင့်က ကိုယ်တောင်းဆိုတာတွေကို ဗိုလ်ချုပ်တွေက ငြင်းပယ်လိုက်ရင် ဘာဆက်လုပ်မှာလဲဆိုတာဖြစ်ပါတယ်။ ဖွဲ့စည်းပုံအခြေခံဥပဒေကို ပင်ဖို့တင်ပြတယ်ဆိုတာဟာ ကံစမ်းမဲနှိုက်သလို ကိုယ့်အဆိုအောင်မြင်ရင်အမြတ်၊ မအောင်မြင်လည်းအရေးမကြီးဘူးလို့ လုပ်မရဘူးဆိုတာ သတိပြုသင့်ပါတယ်။

ပြင်ဆင်ဖို့တင်ပြတယ်ဆိုရင် စစ်ဗိုလ်တွေနဲ့ကဏ္ဋကောစဖြစ်မယ့်အချက်တွေ တင်ပြ၀ံ့ပါ့မလား။ ဒါမှမဟုတ် ပြင်ဆင်ဖို့တင်တယ်ဆိုတဲ့ နာမည်လေးရရုံ အပေါ်ယံအချက်တွေပဲတင်မှာလား။ အခုအခါမှာ စစ်အစိုးရနဲ့ကြံ့ဖွတ်ပါတီတို့ကလည်း ဒီဖွဲ့စည်းပုံအခြေခံဥပဒေမှာ ပြင်သင့်တာတွေရှိတယ်၊ ပြင်ရမယ်လို့ ပြောနေတာမဟုတ်ပါလား။ ဒါပေမယ့် သူတို့ပြင်မယ်ဆိုတာတွေက တိုင်းပြည်ကို စစ်အုပ်စုက ဆွေစဉ်မျိုးဆက် ချုပ်ကိုင်နိုင်အောင်ပြဋ္ဌာန်းထားတဲ့အချက်တွေကို ပြင်မှာမဟုတ်ပါဘူး။

ဒီ၂၀၀၈ဖွဲ့စည်းပုံအခြေခံဥပဒေကို လက်ခံထားရတယ်ဆိုတာမှာ သာမန်အရပ်သားနဲ့ နိုင်ငံရေးသမား မတူပါဘူး။ သာမန်အရပ်သားကတော့ မတတ်သာလို့ဆိုပြီး သူနဲ့မဆိုင်သလိုနေလို့ရပါတယ်။ ဒါပေမယ့် နိုင်ငံရေးသမားဆိုသူကတော့ တာဝန်ရှိပါတယ်။ အရှုံးပေးပြီး ဒါကြီးနဲ့ ဆက် နှစ်ပါးသွားနေရင် အဓိပ္ပာယ်က တော်တော်ဆိုးပါတယ်။

ပြောရရင် ဇာတ်လမ်းတွဲက ရှည်မယ့်သဘောပါ။ နိုင်ငံရေးသမားတွေဘက်က ဘာလုပ်မလဲ။ အဲဒီလိုလုပ်လာရင် အရပ်ဝတ်စစ်အစိုးရက ဘာလုပ်မလဲ။ ဗိုလ်ဌေးဦးပြောခဲ့တဲ့စကားအတိုင်း ကာလုံက အာဏာသိမ်းဖို့လိုတယ်ဆိုပြီး သိမ်းမှာလား။ သိမ်းရင် ဘယ်လိုတုန့်ပြန်မှာလဲ။

ဆရာဗန်းမော်တင်အောင်ပြောတဲ့ သမိုင်းကပေးလာတဲ့တာဝန်ကြီးကတော့ နိုင်ငံရေးလောကသားအားလုံးရဲ့ပုခုံးပေါ်မှာ ရောက်နေပါပြီ။ ဦးသိန်းစိန်စစ်အစိုးရကတော့ စစ်အုပ်စုအဆက်ဆက်ကပေးထားတဲ့တာဝန်ကို ကျေကျေပွန်ပွန်ထမ်းဆောင်ပါလိမ့်မယ်။ ကျန်နိုင်ငံရေးလောကသားတွေကရော- ဘယ်သူပေးတဲ့တာဝန်ကိုထမ်းမှာလဲ။ ဒါမှမဟုတ် ခေါင်းရှောင်မှာလား။

ရဲဘော်ဖိုးသံချောင်း