အူပေါက်ချည်ခင်(မျိုးမြင့်ချို)

(အူပေါက်ချည်ခင်)မြစ်ဆုံကိစ္စကို ဘယ်အထိ ရွှေ့ဆိုင်းထားနိုင်မလဲ။ တရုတ်ကရော ဘယ်အထိ စောင့်နေနိုင်မလဲ။ လက်ပန်းတောင်းတောင်တုန်းကလို နှုတ်သီးကောင်းလျှာပါး လုပ်လို့မရဘူး၊ ရိုဟင်ဂျာအရေးလိုလည်း ငါ့စကားနွားရလုပ်မရဘူး။ ငါပြီး ပြီးပါတယ်ခေတ်ကြီး ရှိနေဦးတောင် ငါတကော ကောမရဘူး။ ခုအဲ့ခေတ်ကြီးလည်း နိုင်ငံတော်နဲ့အတူ အကြည်ညိုပျက်နေပြီ။ တိုင်းပြည်ကြီး ဘာမှမဖြစ်စေ့ချင်ဘူး။ ဒါပေမယ့် တိုင်းပြည်ကြီးက တခုခုဖြစ်လိုက်မှ ပြီးမှာ။

လူမျိုးစုပြဿနာ၊ ပြည်တွင်းစစ်ပြဿနာ၊ ဖက်ဒရယ်လ်မူပြဿနာ၊ စီးပွားရေးပြဿနာ၊ သဗ္ဗနနမ်ပေါင်း သောင်းခြောက်ထောင်နဲ့ အမယ်ဘုတ်ကယ် သူ့ချည်ခင်။ ချည်ခင်က ရှူပ်ရုံတင်မက အူပါပေါက်နေတာ။ ဗြမ္မာ့ဥက္ခောင်းပေါင်းများစွာ။ ပြဿနာတိုင်းရဲ့ ဇစ်မြစ်အထိလိုက်ပြီး ရှင်းမှပြီးပြတ်မှာ။ ပြဿနာတိုင်းကိုရှင်းဖို့ လူတိုင်းလူတိုင်း လူမျိုးစုတိုင်းလူမျိုးစုတိုင်းရဲ့ အရင်းမူလအခွင့်အရေးနဲ့ ရပိုင်ခွင့် လုပ်ပိုင်ခွင့် ပြဌာန်းပိုင်ခွင့်အခြေခံတွေ ပြည့်စုံမှဖြစ်မှာ။

ပြဿနာတိုင်းဟာ လွတ်လပ်ရေးခေတ် နိုင်ငံရေးအစိုးရကနေ စစ်အစိုးရအဆက်ဆက်တွေ စခဲ့ မွှေးခဲ့ကြတဲ့မီးတွေပဲ။ မရှင်းခဲ့တဲ့အပြင် ပိုကြီးအောင်မွေးထားခဲ့ကြတာ။ လက်ရှိစစ်တပိုင်းအစိုးရအနေနဲ့ ဒီပြဿနာတွေ လူထုအားနဲ့ မလုပ်ဝံ့မရှင်းဝံ့တာကို ထားတော့။ ၂ဝဝ၈ အောက်ပေးထားတဲ့ ဘောင်ကျဉ်းလေးထဲကနေ လုပ်မယ်ဆို လုပ်လို့ရနိုင်တာလေးတွေရှိတယ်။ လုပ်မယ်ဆို တွန်းမိတိုက်မိတာတွေ ရှိမှာပဲ။ ပွန်းတာရှတာလည်းရှိမှာပဲ။ ပွန်းပွန်းရှရှ တွန်းတိုက်ပြီးလုပ်ရမှာတော့ ရှိတာပဲ။ ဒါနိုင်ငံရေးပဲ။ ကိုယ်တိုင်က အဲ့သလိုမလုပ်ဘဲ စစ်အုပ်စု စိတ်ကောင်း ဝင်လာတန်ကောင်းရဲ့လို့ မျက်ရည်ခံထိုးနေတာဆိုတော့ ခရီးက ပေါက်ရမယ့်ဟာလေးတောင် မပေါက်ဘူး။ သူ့ဘက်ကတော့ ဘာမှလုပ်မရအောင် နေရာတိုင်းမှာ အခုအခံလုပ်မှာပဲ။

ပကတိအနေအထားအရတော့ စစ်အုပ်စုက ခုဖြစ်နေတဲ့အခင်းအကျင်းကို ကြိုက်မှာပဲ။ ၂ဝဝ၈ အောက် အားလုံးကို ဆွဲသွင်းထားဖို့ တရံမလပ် လုပ်မှာပဲ။ အင်န်အယ်လ်ဒီရှိနေတာကို သဘောကျမှာပဲ။ ဒါပေမယ့် အင်န်အယ်လ်ဒီ ဒီ့ထက်ပို ကြီးထွားမလာအောင်တော့ ကန့်ထားမှာပဲ။

ပြဿနာတွေဟာ နေ့ရွှေ့ညရွှေ့ ရွှေ့ဖို့သိတ်မလွယ်တော့ဘူး။ မြစ်ဆုံလိုအရေးမျိုး၊ ရိုဟင်ဂျာအရေးမျိုးတွေက အပစ်အခတ်ရပ်စဲရေးလို အချိန်ဆွဲ တဘက်လူအားချည့်နဲ့သွားတဲ့အထိ စောင့်ပြီးလုပ်နေလို့မရဘူး။ ပြဿနာတွေများတာမှန်ပေမယ့် အခြေခံချင်းမတူကြဘူး။ အချိန်ပေးနိုင်ပုံ ပေးနိုင်နည်းခြင်း မတူဘူး။ အချိန်ဆက်ဆွဲလို့ရတာရှိသလို အမြန်ဆုံးရှင်းမှ ရမှာတွေလည်းရှိတယ်။ မြန်ပြန်ပဲရှင်းရှင်း နှေးနှေးပဲရှင်းရှင်း အရင်းခံကစ မရှင်းရင် ဘယ်တော့မှ ပြေလည်သွားမှာ မဟုတ်ဘူး။

ဖိနှိပ်မှုတွေကို အရင်ဖယ်ရှားရမယ်။ ဖိနှိပ်မှုတွေကို မဖယ်ရှားပဲနဲ့ ဘာယုံကြည်မှုမှ တည်ဆောက်မရဘူး။ ဖိနှိပ်မှုရှိနေသမျှ တွန်းလှန်မှုကလည်း ရှိနေမှာပဲ။ ခုတော်လှန်ရေးတွေ အနိမ့်ပိုင်းရောက်နေလို့၊ ဖိနှိပ်မှုအားကြီးနေလို့ကျုံ့သွားလည်း ပြန်ကြီးထွားလာမှာပဲ။ တော်လှန်ရေးသစ်တွေ၊ ခေါင်းဆောင်သစ်တွေ၊ တွန်းလှန်မှုသစ်တွေ ပေါ်လာကြဦးမှာပဲ။ ဖိနှိပ်မှုမသေမချင်း တော်လှန်ရေးတွေက သဏ္ဍန်စုံနဲ့ အသွင်စုံနဲ့ရှင်သန်ပြီး လုပ်ဟန်နည်းနာသစ်တွေနဲ့ ခေတ်နဲ့လိုက်လျောညီထွေစွာနဲ့ ဖြစ်နေကြမှာပါပဲ။

စစ်တပိုင်းအစိုးရက နေတတ်ဖို့တော့ လိုတာပါပဲ။ ဗမာပြည်ရဲ့ တကယ့်အဓိကပဋိပက္ခက စစ်အုပ်စုနဲ့ အများတကာအများစု ပြည်သူလူထုကြီးနဲ့ဖြစ်နေတာပဲ။ ကျန်တာတွေက လက်အောက်ခံကိစ္စတွေပါပဲ။ အရင်းခံပြဿနာ အဓ်ိကပဋိပက္ခကို မှန်မှန်ကန်ကန်ရှင်းနိုင်ရင် လက်အောက်ခံပဋိပက္ခတွေဟာ ရှင်းရလွယ်သွားတတ်တာ သမိုင်းတိုင်းမှာ အထင်အရှားရှိတာပါပဲ။ ဒါကို စစ်တပိုင်းအစိုးရအနေနဲ့ မြင်အောင်ကြည့်ပြီး ကြားမညပ်အောင် နေဖို့ပါပဲ။ လက်ရှောင်ရမယ့်နေရာ ရှောင်ဖို့လိုတာပါပဲ။

ဘယ်နေရာ ဘာပြောမယ်ဆိုတာသိဖို့ထက် ဘယ်နေရာ ဘာမပြောဘူးဆိုတာသိဖို့က နိုင်ငံရေးမှာ ပိုအရေးကြီးတတ်ပါတယ်။ နိုင်ငံရေးသဘောမှာ ဘာမှမလုပ်ပဲ နေတာကိုက တခါတလေမှာ အလုပ်လုပ်တာဖြစ်နေတာကို သတိပြုဖို့လိုမှာပါပဲ။ အလုပ် လုပ်တယ်ထင်ပြီး လက်ဝင်လျှိုမိတာ၊ ဝါးကူထိုးမိတာမဖြစ်အောင် သတိကြပ်ကြပ်ထားဖို့လိုမှာပဲ။ ခုတောင် တချို့နေရာတွေမှာ ကျွံဝင်ပြီး လူထုနဲ့အဆက်အစပ် အဟကျယ်လာတာတွေ တွေ့နေရပြီပဲ။

မြစ်ဆုံကိစ္စလာတော့မယ်။ ဇော်ဌေးထွက်ပြီး (လက်ပန်းတောင်းတောင် ကြေးနီစီမံကိန်းတုန်းကလည်း နိုင်ငံတော်အတိုင်ပင်ခံပုဂ္ဂိုလ် ဝင်ရှင်းပေးလို့ ပြေလည်သွားတာရှိပါတယ်)လို့ပြောတာ အလကားမဟုတ်ဘူး။ (လက်တွေ့မှာ လက်ပန်းတောင်းတောင်ကိစ္စကလည်း သူပြောသလို ပြေလည်နေတာမဟုတ်ပါဘူး။ ဖွဲမီးလိုလှိုက်လောင်နေတာပါ။ ကြိမ်မီးအုံးဖြစ်နေတာပါ) ဇော်ဌေးရှေ့ထွက်ပြီး စကားဦးသန်းနေမှန်း သိတ်သိသာတယ်။ အာဘော်ဖန်တီးကြည့်နေမှန်း သိတ်မြင်သာတယ်။ လူထုကို တောက်ကြည့်နေမှန်း သိတ်ပေါ်လွင်ပါတယ်။ ကျနော်တို့ သတိရှိကြဖို့ပါပဲ။
မျိုးမြင့်ချို(အောက်တိုဘာ ၉၊ ၂ဝ၁၈)