လုပ်စေ့ချင်တာ(မျိုးမြင့်ချို)

(လုပ်စေ့ချင်တာ)

ABSDF ဖွဲ့တည်ခဲ့ခြင်း နှစ် ၃၀ ပြည့်ကို အထိမ်းအမှတ်ပြုကြမယ်ကြားတယ်။ အလွန်ကောင်းပါတယ်။ လက်လှမ်းမီသမျှလူတွေ ထိတွေ့နိုင်မယ့်နေရာတွေမှာ ဆုံကြလိမ့်မယ်လို့ ထင်ပါတယ်။ ပြည်တွင်းလည်းပြည်တွင်းအလျှောက်၊ နယ်စပ်လည်း နယ်စပ်အလျှောက်၊ ပြည်ပလည်း ပြည်ပအလျှောက်၊ လူမျိုးစုဒေသနေတွေလည်း အဲ့ဒီဒေသတွေအလျှောက် စုကြဆုံကြမယ်ထင်ပါတယ်။ လူတွေစုံတုန်း ဆုံတုန်း စကားတွေပြောဖြစ်ကြမှာလည်း သေချာပါတယ်။ အထိမ်းအမှတ်ပြုတာတွေလည်း လုပ်ကြခင်းကျင်းကြမယ်လို့ မှန်းဆရပါတယ်။

ကျနော့်အနေနဲ့ ခုလို ဆုံခိုက် စုံခိုက်လေးမှာ ကျောင်းသားတပ်မတော် သမိုင်းကြောင်း ထုတ်ထုတ်ပိုးပိုးလေးတခု ထွက်လာဖို့ တိုင်ပင်ဆွေးနွေးကြလိမ့်မယ်လို့ မျှော်လင့်မိပါတယ်။ ခုထိဖတ်နေရတာက ဟိုတစ ဒီတစ၊ ဟိုတပုဒ် ဒီတပုဒ်၊ ဟိုလူပြော ဒီလူပြောတွေကို လိုက်စုဆက်ကြည့်နေရတာမို့ ရုပ်လုံးက ထင်သလောက်ကြွတက်မလာတာ တွေ့ရပါတယ်။

ရန်သူကရော ရန်သူ့မိတ်ဆွေတွေကရော အေဘီကို တလျှောက်လုံး ထိုးနှက်တိုက်ခိုက်နေတာကတော့ မပြတ်တမ်းရှိနေပါတယ်။ ခုလည်း ဂွင်ဝင် ဝင်သလို လုပ်နေကြဆဲပါပဲ။ ဒီအထဲမှာ မြောက်ပိုင်းက ပါဂျောင်ကိစ္စကြီးနဲ့ ဝိုင်းသရုပ်ဖျက်တဲ့ဒဏ်ကို အလူးအလိမ့်ခံခဲ့ရတဲ့အဖြစ်က ABSDF ရဲ့ တော်လှန်ရေးအရှိူက်ကို အပြင်းထန်ဆုံး ထိုးနှက်ချက်ဖြစ်သွားပါတယ်။ ကာလပေါ် ဗကပနဲ့သခင်သန်းထွန်းနောက်ဆုံးနေ့များလိုဖြစ်ခဲ့ပါတယ်။

ရန်သူနဲ့ရန်သူ့လက်ပါးစေတွေ ပူးပေါင်းကြံစည်ကြတာတူပေမယ့် မတူတဲ့အချက်တခုက ဗကပနဲ့သခင်သန်းထွန်းနောက်ဆုံးနေ့များကြောင့်

ဗကပဖြစ်ခဲ့သူတွေရှိသလို၊ ဖြစ်ပြီးသားပေမယ့် အခြေအနေအရ ရိုးမကိုလက်လှမ်းမမီတဲ့လူတွေအဖို့ ဗကပရဲ့ ၆၄ လမ်းစဉ်ကို လေ့လာခွင့်ရသွားကြတာ ဖြစ်ပါတယ်။ ရန်သူနဲ့ရန်သူလက်ပါးစေတွေက ABSDF အကြောင်း အကြေးလှန်ပြီး ပြန်ပြောကြရေးကြတာတွေ ဖတ်ပြီး လူတွေအဖို့ စိတ်စနိုးစနောင့် ဖြစ်ရတာများပါတယ်။ (ဒီနေရာမှာ ကျနော်က ရန်သူနဲ့ရန်သူ့လူလို့ သုံးတာကို ABSDF တချို့ နှစ်မြို့ချင်မှ နှစ်မြို့ကြတော့မှာပါ။ မနှစ်မြို့သူတွေအနေနဲ့လည်း ပြစရာဆင်ခြေတွေရှိမှာပါ)

တူတဲ့အချက်က အမှားအယွင်းတွေ လက်လွန်ခြေလွန်တွေလုပ်ခဲ့ကြ ဖြစ်ခဲ့ကြတာတူတယ်၊ လုပ်မိတာတွေကလည်း ပါတီတွင်း အဖွဲ့အစည်းအတွင်း လုပ်မိကြတာဖြစ်ပါတယ်။ ပြည်သူအပေါ် တိုင်းပြည်အပေါ် ကျူးလွန်ခဲ့ကြတာမဟုတ်ပါဘူး။ ဒီနေရာမှာ နောက်ပိုင်းတာဝန်ယူလာတဲ့ခေါင်းဆောင်တွေက အဲ့အချိန်က ခံခဲ့ရသူတွေရဲ့မိသားစုတွေအပေါ် စာနာစိတ်အပြည့်ထားကြတာလည်း တူပါတယ်။ အလွန်အကျွံအမှားအယွင်းဖြစ်ခဲ့ကြတာကို ကိုယ်စားပြု တာဝန်ခံမှုလုပ်တာတွေမှာလည်း တူပါတယ်။

လက်နက်ကိုင်တော်လှန်ရေးသမားတွေနဲ့ စစ်အုပ်စု ဘာထူးလို့လဲကွာဆိုတဲ့ ဖိနှိပ်သူနဲ့တော်လှန်သူကို ကြေးတန်းတိုက်တဲ့ မိုက်မိုက်မဲမဲစကားသံတွေတောင် ဒီမိုကရက်ဆိုသူတွေပါးစပ်က ထွက်ကျလာတာကြားရပါတယ်။ ရန်သူဖြစ်စေ့ချင်တဲ့ ဝါဒဖြန့်မှုထိရောက်ချက်ရဲ့အနိမ့်ဆုံးအဆင့်က အဲဒါဖြစ်ပါတယ်။ အမြင့်ဆုံးအဆင့်က ဘုံရန်သူအဖြစ်မှတ် အပြတ်ချေမှုန်းရေးအထိဖြစ်ပါတယ်။

ကျနော်တို့အနေနဲ့က သူ့ဝါဒဖြန့်ချက်ကို ကိုယ့်ဘက်က အချက်အလက်မှန်မှန်ကန်ကန် တရားမှန်မှန်ကန်ကန်နဲ့ တင်ပြပြုစုပြီး လူထုအကြား၊ ဒီမိုကရက်တစ်ဆိုသူတွေအကြား ဝေဝေဝါးဝါးဖြစ်နေတာတွေကို ချေဖျက်ဖို့ဖြစ်ပါတယ်။ အလွန်အကျွံဖြစ်ခဲ့တာ မှားယွင်းအရေးယူခဲ့တာတွေကိုလည်း တိတိလင်းလင်း ချပြရမှာဖြစ်ပါတယ်။ ရည်ရွယ်ချက်ရှိရှိ ပုံဖျက်ခဲ့တာတွေ လုပ်ကြံခဲ့တာတွေကိုလည်း ပုံဖျက်တာဖြစ်ကြောင်း လုပ်ကြံတာဖြစ်ကြောင်း တိတိကျကျ ဖွင့်ချရမှာဖြစ်ပါတယ်။

ကျနော် နယ်စပ်နဲ့ ဒီဘက်မှာ တွေ့ရဆုံရတဲ့ ABSDF တွေဆီကတော့ သူတိုပါဝင်ခဲ့တဲ့ကဏ္ဍတွေ အဖြစ်အပျက်တွေ တိုက်ပွဲကြီးငယ်တွေအကြောင်း ပြန်ပြန်တော့ကြားရပါတယ်။ ဒါပေမဲ့ သူတို့ပြောတာတွေမှာ သမိုင်းရေးနောက်ခံအမြင် အားနည်းတာတွေ့ရပါတယ်။ အစွဲလေးတွေ အခုအခံလေးတွေကြားရသလို ကိုယ်ရည်များများသွေးတဲ့လူတွေလည်း တွေ့ရပါတယ်။ အဲ့လိုဖြစ်ရတာကလည်း လူတွေမဆုံမိကြလို့ လူတွေမစုံကြလို့ဖြစ်ပါတယ်။ ဒါ့ကြောင့် သူတို့ဆီက ကြားရသမျှသိရသမျှကို အပြည့်အဝအတည်ပြုလို့ရတဲ့ သမိုင်းဆိုင်ရာအချက်အလက်တွေအဖြစ် သဘောထားဖို့ အတော်ခက်ပါတယ်။

ထပ်ပြီး အလေးအနက်ပြုပြောချင်တာကတော့ ခုလိုလူတွေဆုံကြတုန်း လူတွေစုံကြတုန်းမှာ ABSDF အတတ်နိုင်ဆုံးပြည့်စုံမယ့် သမိုင်းဆိုင်ရာကိုးကားလို့ရမယ့် ထုတ်ထုတ်ပိုးပိုး စာတအုပ်ဖြစ်လာဖို့ ကြိုးပမ်းကြစေချင်ပါ့တယ်။ ကြိုးပမ်းကြလိမ့်မယ်လို့လည်း ထင်ပါတယ်။ ဆန္ဒတွေလည်း ရှိကြမယ်ဆိုတာ ယုံကြည်ပါတယ်။

ခုလို အဘိယာစကပြုရတာကလည်း ကျနော်တို့ဟာ ABSDF နဲ့ သမိုင်းခေတ်တခေတ်တည်း မွေးဖွားကြီးပြင်းခဲ့ကြတာ၊ စစ်အာဏာရှင်စနစ်ကို၊ စစ်အစိုးရကို၊ စစ်ဗျူရိုကရေစီယန္တရားကို၊ စစ်လက်ဝါးကြီးအုပ် ဓနရှင်စနစ်ကို နိုင်ရာအခန်း သန်ရာကဏ္ဍတွေကနေ ရုန်းကန်တွန်းလှန်ခဲ့သူတွေဖြစ်ကြလို့ပါပဲ။ ကျနော်တို့မှာ လျှောက်ရဦးမယ့် ခရီးမိုင်တိုင်တွေရှိနေသေးလို့ပါပဲ။ ကျနော်တို့မှာ မပြီးပြတ်သေးတဲ့ ဝတ္တရားတွေရှိနေသေးလို့ပါပဲ။ ကျနော်တို့တတွေကို ဘုံရန်သူအဖြစ် သတ်မှတ်ချေမှုန်းနေတဲ့ ကျနော်တို့ရဲ့ “ဘုံရန်သူ“ ရှိနေသေးလို့ပါပဲ။

မျိုးမြင့်ချို(အောက်တိုဘာ ၁၃၊ ၂ဝ၁၈)