(ချစ်သူ့မြေဇာ)

(ချစ်သူ့မြေဇာ)
လူသေတွေကို မြေလည်း မမြှုပ် မီးလည်းမသဂြိုပဲ စနစ်တကျ စီရင်သတ်မှတ်ထားတဲ့ Composite တခုခုမှာ မြေဆွေးဖြစ်တဲ့အထိထားပြီး မြေသြဇာအဖြစ် ပြန်လည်အသုံးပြုရေးကိစ္စဟာ မကြာတော့မယ့်အနာဂတ်မှာ ဥပဒေအဖြစ်နဲ့ထွက်လာစရာရှိပါတယ်။ ဥပဒေဖြစ်လာတဲ့အခါ နည်းဥပဒေတွေ လုပ်ထုံးလုပ်နည်းအသေးစိတ်တွေ ပါလာမှာပါ။ ဥရောပနဲ့အနောက်ဘက်မှာ သင်္ဂျိုင်းမြေတွေ လူသေပြည့်လို့ထပ်မြှုပ်စရာမရှိတော့ရင် မမြှုပ်တော့ပေမယ့် သင်္ဂျိုင်းဟောင်းအဖြစ် ထိန်းသိမ်းရပါတယ်။ မဖျက်ရပါဘူး။ ဒါ့ကြောင့် တချိန်တုန်းက မြိ့ုတမြိ့ုတည်စက မြိ့ုစွန်ဖြစ်ဟန်ရှိခဲ့ပေမယ့် ခု မြိ့ုလယ်ကောင်ဖြစ်တဲ့နေရာတွေမှာ သင်္ဂျိုင်းဟောင်းတွေ မြင်နေရတာပါ။ လူသေတော့ထပ်မမြှုပ်တော့ပါဘူး။

လူတွေက အချိန်တိုင်း မွေးနေ သေနေတာဆိုတော့ သင်္ဂျိုင်းသစ်တွေလည်း အချိန်နဲ့အမျှ အသစ်တည်နေရတာပါ။ သင်္ဂျိုင်းဟောင်းလည်း မဖျက်၊ အသစ်ကလည်းတည်ဆိုတော့ ဒီအတိုင်း တသမတ် ဆက်သွားရင် နောင် ဘယနှနှစ်လောက်ကြာတဲ့အခါ ကမ္ဘာပေါ်မှာ သင်္ဂျိုင်းမြေတွေ ဘယ်လောက်များနေမလဲ၊ မြိ့ုပြတွေမှာ သင်္ဂျိုင်းမြေက ဘယ်လောက်ဖုံးလွှမ်းနေမလဲက မပြောတတ်ပေမယ့် နေရာတကာ သင်္ဂျိုင်းဟောင်းမြေတွေတော့ ရှိနေမှာသေချာပါတယ်။ သင်္ဂျိုင်းဟောင်းမြေဆိုတော့ လူနေဖို့ စက်ရုံအလုပ်တွေ ဟိုတယ်လ်တွေဘာတွေဆောက်ဖို့မပြောနဲ့ ဖျက်တောင်မဖျက်ဆိုတော့ မြေတွေ အလဟသသဘောဖြစ်နေမှာ မနည်းပါဘူး။

ခု အမေရိကန်မှာ(အထူးသဖြင့် လူနေအလွန်ထူထပ်တဲ့ ကလ်ဖိုးနီးယားတို့လို)ဒေသတွေမှာ အပေါ်က ကျနော်ပြောခဲ့တဲ့ လူမြေဆွေးလုပ်မယ့်ကိစ္စကို အလေးပေးစဉ်းစားနေကြပါပြီ။ ပြည်နယ်အဆင့် လွှတ်တော်တွေမှာ ဆွေးနွေးနေကြကြပါပြီ။ သိတ် အကြိတ်အနယ်မဟုတ်သေးတာနဲ့ ကျယ်ကျယ်ပြန့်ပြန့်ဖြစ်မလာသေးလို့ လူအသိနည်းနေသေးတာပါ။ ဒါကို လူတွေ ပိုသတိပြုမိလာအောင် အာရုံစိုက်လာအောင် ပညာပေးမှူတွေ အသိဝေမျှတာတွေ ဆွေးနွေးတာတွေတော့ လုပ်နေပါတယ်။ ပိုလည်း များလာစိတ်လာပါတယ်။

ပညာပေးစာစောင်တခုမှာဆိုရင် ကိုယ့်ချစ်သူရဲ့အသွေးအသား ဇီဝမြေသြဇာနဲ့ ချစ်သူ့ဥယျဉ်လေးလုပ် ချစ်သူ့အချစ်ပြေ အလွမ်းပြေ ပန်းပင်လေးတွေစိုက်ဖို့၊ အဲ့ဒီ ချစ်သူ့ဥယျဉ်နဲ့ ချစ်သူ့မာလာလေးကထွက်မယ့်ရနံ့မှာ ချစ်သူ့အငွေ့အသက်လေးတွေ ကိုယ်သင်းနံ့လေးတွေပါ ရနေမှာပါလို့ဆိုထားပါတယ်။ (မျိုးမြင့်ချို) ဖေဖော်ဝါရီ ၂၊ ၂ဝ၂ဝ