(စိတ်နေစိတ်ထား)

(စိတ်နေစိတ်ထား)
ဖရင်န်းဒ်ရီကွပ်စ်ပို့ထားတာလည်းကြာပြီ၊ မက်ဆေ့ဂျ်ဘောက်စ်ကနေလည်း မိတ်ဆွေအဖြစ်လက်ခံဖို့ပြောတာနဲ့ သူ့ပေ့ဂျ်ထဲဝင်မကြည့်မိဘဲ မနက်ကမှ လက်ခံလိုက်ပါတယ်။ ခု ညနေပိုင်းရောက်တော့ သူ့ဆီကတက်လာတဲ့ပို့စ်ကိုကြည့်တော့ အတော်အံ့အားသင့်မိတယ်။ ငါ တချက်ကလေး သတိလွတ်သွားတာနဲ့ ဖြစ်ရတာပါလားလို့လည်း ကိုယ့်ကိုယ်ကိုယ် အပြစ်တင်မိပါတယ်။

သူတင်ထားတာက တရုတ်တွေဟာ ကိုရိုနာဗိုင်းရပ်စ်ပိုးကို ကမ္ဘာအနှံ့ကလူတွေ တိုင်းပြည်တွေအကုန် ကူးစက်အောင် တမင့်ကိုရည်ရွယ်ချက်ရှိရှိနဲ့ အသေခံပြီးကိုလိုက်ဖြန့်နေတယ်လို့ ေရးထားတယ်။ ဒါက တချက်။

နောက်တချက်က ဒီရောဂါပိုးဟာ တရုတ်တွေအစားအသောက် သောင်းကျန်းရာကနေ ကူးစက်ပြန့်ပွားလာတာဆိုလည်း အစားအသောက်သောင်းကျန်းပြီး သတ္တဝါလေးတွေအပေါ် အညှာအတာကင်းမဲ့တဲ့တရုတ်လူမျိုးတွေ တယောက်မကျန်သေကြပါစေတဲ့။ ဒါကတချက်။

နောက်တချက်က ဒီရောဂါပိုးကို အမေရိကန်ကနေ ခိုးသွင်းလာပြီး ဇီဝလက်နက်ထုတ်ဖို့ ခိုးကြောင်ခိုးဝှက်ကြံစည်ရာကနေ နည်းပညာမနိုင်လို့ ရောဂါပိုးတွေ ဓာတ်ခွဲခန်းအပြင် ပေါက်ထွက်ပြီး လူတွေဆီကူးကုန်တာဆိုလည်း မသမာတဲ့တရုတ်တွေအကုန် သေခြင်းဆိုးနဲ့သေကြပါစေတဲ့။

အတော် လူစိတ်မရှိ လူမဆန်တဲ့စိတ်အနေ စိတ်အထားမို့ စက်ဆုပ်မိတာအမှန်ပါ။ လူတချို့ဟာ စိတ်အနေလေးကောင်းပေမယ့် စိတ်အထားမတတ်လို့ လူ့အဖယ်အကျဉ်ခံရတယ်။ ဒီလူကတော့ စိတ်အနေရော စိတ်အထားပါ မကောင်းသူ ယုတ်သူလို့ပေါ်လွင်ပါတယ်။

ဒါနဲ့ မနက်က လက်ခံထားတာကို Unfriend အရင်ပြန်လုပ်(မလုပ်ခင် သူ့ဆီ မက်ဆေ့ဂျ်ပို့ပါတယ်)။ သူ့ဆီကနေ ခင်ဗျားဘာသာ ကြိုက်သလိုလုပ် Block လိုက်လည်း စောက်ဂရုမစိုက်ဘူးဆိုတာနဲ့ Block လိုက်ဖြစ်ပါတယ်။
မျိုးမြင့်ချို
ဖေဖော်ဝါရီ ၄၊ ၂ဝ၂ဝ