(ဘာလို့ ဒါကိုဖျောက်တာလဲ)

(ဘာလို့ ဒါကိုဖျောက်တာလဲ)
ဒုတိယကမ္ဘာစစ်ကြီးကို အကြောင်းပြုပြီး အင်္ဂလိပ်အခက် ဗမာအချက်ဆိုတဲ့စကား အရင်ဆုံးစပြောတာ နန်းရင်ဝန်ဟောင်း ဒေါက်တာဘမော်ဖြစ်တယ်လို့ မှတ်သားဖူးပါတယ်။ ဂဠုန်စောလည်း သံယောင်လိုက်ပေမယ့် ဒေါက်တာဘမော်လောက်တော့ ကြိတ်ကြံတာမျိုးမရှိပါ။

အဲ့အချိန်မှာ တို့ဗမာသခင်တွေဆီက နယ်ချဲ့စစ်ကို ပြည်တွင်းစစ်အဖြစ်ပြောင်းပစ်ဆိုတဲ့ ကြွေးကြော်သံထွက်နေတာဖြစ်ပါတယ်။ သဘောက ကိုယ့်ကို ကျွန်လုပ်ထားတဲ့ ဗြိတိသျှက နယ်ချဲ့အရင်းရှင်၊ ဂျာမဏီ၊ ဂျပန်စတာတွေက ဖက်ဆစ်နယ်ချဲ့။

နယ်ချဲ့နယ်ချဲ့ချင်းကြတဲ့အခါ ဗမာပြည်က ဘယ်နယ်ချဲ့ဘက်ကမှမပါပဲ နယ်ချဲ့စစ်ကြီးဖြစ်ပဟေ့ဆိုတာနဲ့ ရရာလက်နက်စွဲကိုင်ပြီး ဗြိတိသျှနယ်ချဲ့ကိုပြည်တွင်းကနေ ချကြဖို့ပါ။

အဲ့အချိန်က ဗမာပြည်ဟာ ကိုလိုနီနိုင်ငံဆိုတော့ ကိုယ့်မှာ စစ်တိုက်ဖို့ရော စစ်ကနေရှောင်နေဖို့ရော ဘာမှဆုံးဖြတ်ခွင့်မရှိသလို ဘာတာဝန်မှလည်းမရှိပါ။ အင်္ဂလိပ်နဲ့ဖြစ်တဲ့စစ်ဆိုတော့ သူပါရင်ကိုယ်လည်းပါရမှာပါ။

ဒါကို တို့ဗမာသခင်တွေက ငြင်းဆန်တာပါ။ သူပါတိုင်း ကိုယ်မပါနိုင်ဘူး။ မပါတဲ့အပြင် သူ့ကိုပါ ပြည်တွင်းကနေပြန်တိုက်မယ်။ သူနဲ့ပြည်တွင်းစစ်ဖြစ်မယ်လို့ ကြုံးဝါးတာပါ။ နယ်ချဲ့သမားကို ပြည်တွင်းကနေပြန်ခံတိုက်မယ့် ပြည်တွင်းကစစ်နဲ့ ပြန်တိုက်ရေးပါ။

ဒီနေရာမှာ ပြည်တွင်းစစ်ဆိုလို ခု နှစ် ၇ ဆယ်ကျော်ဖြစ်နေတဲ့ ဗမာပြည် ပြည်တွင်းစစ်နဲ့ မထွေးသွားဖို့တော့ လိုပါလိမ့်မယ်။ တို့ဗမာသခင်တွေ အဲ့အချိန်က ကြွေးကြော်ခဲ့တဲ့ပြည်တွင်းစစ်ဆိုတာက နယ်ချဲ့သမားဖန်တီးတဲ့စစ်နောက်ကိုပါမသွားတဲ့အပြင် ပြည်တွင်းကနေပါ နယ်ချဲ့ဆန့်ကျင်တဲ့စစ် တနည်းပြောရရင် ပြည်တွင်းစစ်အဖြစ်ပြောင်းလဲပစ်ဖို့ပါ။

ဒါပေမယ့် ဒေါက်တာဗမော်နဲ့ သခင်လူငယ်တွေပေါင်းမိပြီး ဗမာ့ထွက်ရပ်ဂိုဏ်းဖြစ်လာတော့ နယ်ချဲ့စစ်ကို ပြည်တွင်းစစ်အဖြစ်ပြောင်းပစ်ကြ ဆိုတဲ့ကြွေးကြော်သံ လုံးဝနီးနီးပျောက်သွားပြီး အင်္ဂလိပ်အခက် ဗမာအချက်ကြွေးကြော်သံ ရှေ့တန်းရောက်လာတာပါ။

တချို့ဆိုရင် နယ်ချဲ့စစ်ကို ပြည်တွင်းစစ်အဖြစ်ပြောင်းပစ်ကြဆိုတာ ကြားတောင်မကြားဖူးပါဘူး။ မကြားဖူးလို့ အပြစ်ပြောစရာမရှိပါဘူး။ မရှိရတာက သမိုင်းသင်ရိုးညွှန်းတမ်းတွေနဲ့ သမိုင်းစာအုပ်တွေမှာ ဒီအကြောင်းကို ဖြစ်နိုင်သမျှမဖော်ပြရေး ဖြစ်နိုင်ရင် လုံးဝဖယ်ထားရေးရှိခဲ့လို့ပါ။

ဒါကိုဖော်ထုတ်လိုက်ရင် နောက်ကလိုက်လာမယ့် အင်းစိန်စစ်တမ်း မြင်းခြံစစ်တမ်းတွေပါ မခြွင်းမချန်ပြောရဆိုရ ဆွေးနွေးရ သင်ကြားရ ပြဌာန်းရတော့မှာမို့လိုပါ။

ကျနော်တို့ သမိုင်းကို လေ့လာကြပါတယ်။ ဆရာသန်းထွန်းပြောသလို မ အ အောင်လို့ပါ။ ကျနော်တို့ အ ရင် ကျနော်တို့နောက်ကမျိုးဆက် န သွားမှာပါ။ အဲ့ဒီနောက်ကမျိုးဆက် နုံသွားမှာပါ။ ကျနော်တို့ မ အကြ မနကြ မနုံကြဖို့ပါ။
(မျိုးမြင့်ချို)
ဖေဖော်ဝါရီ ၃၊ ၂ဝ၂ဝ