Tuesday, April 12, 2016

ဘာမှမလုပ်ရသေးပါ(မျိုးမြင့်ချို)

0 comments
ဦးထင်ကျော်ဦးဆောင်တဲ့အရပ်တပိုင်းအစိုးရ ဘာမှ မလုပ်ရသေးပါ။

လုပ်ဖို့ ပြင်ဆင်နေတာ အားထုတ်နေတာတွေ ရှိမှာသေချာပါတယ်။ လုပ်လိုစိတ်ရှိတာလည်း သိသာမြင်သာပါတယ်။ ဘယ်လောက် လုပ်နိုင်မလုပ်နိုင်ကတော့ အခြေအနေ ဘယ်လောက်ပေးမပေးပေါ် မူတည်မှာပါ။ ဖန်တီးယူလို့ရတဲ့ အခြေအနေတွေလည်း ရှိပါတယ်။

နိုင်ကျဉ်းတွေလွှတ်တာက လွှတ်ရမယ့်ကိစ္စပါ။ အလုပ်မဟုတ်ပါ။ အစိုးရသစ်အတွက် နိုင်ငံရေးတွက်ခြေကိုက်သလို လွတ်သူတွေအတွက်လည်း ဝမ်းမြောက်စရာပါ။ အဆောတလျင်ဆောင်ရွက်တဲ့အတွက် လှိုက်လှိုက်လှဲလှဲ အသိအမှတ်ပြုရမှာပါ။

ဘာမှမလုပ်ရသေးဆိုတာက လယ်သမားကိစ္စ၊ အလုပ်သမားကိစ္စ၊ မြေယာပြဿနာ၊ ပြည်တွင်းစစ်၊ ဖက်ဒရယ်လ်ပြည်ထောင်စု၊ ဖွဲ့စည်းပုံပြင်ရေးစတဲ့ ကိစ္စကြီးမျိုးတွေကို ဆိုလိုတာပါ။
စစ်အစိုးရအဆက်ဆက် တိုင်းပြည်နဲ့လူထုအတွက် ချန်ထားခဲ့တဲ့ဆိုးမွေမှန်သမျှ အမှောင့်မှန်သမျှကို ဖြည်ရရှင်းရ ဖြန်ရဖြေရ ဖာရထေးရတွေလည်းလုပ်ရမယ့်အထဲ ဝင်ရှုပ်လာမှာပါ။

ခု ဘာမှတောင်မလုပ်ရသေးဘူး နိုင်ကျဉ်းလွှတ်ရုံလေးရှိသေးတယ် အရပ်တပိုင်းအစိုးရ အစမ်းသပ်စခံရပါတယ်။ ခုချိန်ထိ အင်န်အယ်လ်ဒီက (တာဝန်ရှိသူက)တရားဝင် အဆိုးအကောင်း ဘာမှပြောသံမကြားသေးပါ။ ဆွပေးတဲ့သဘော မသင်္ကာစရာပေါ်လို့ “ပြစ်ထားလိုက်ပါ၊ ပြောစရာမလို”ဆိုပြီး ထားလိုက်တာဆို အလွန်ကောင်းပါတယ်။

ဒေါ်စုအမှူးပြု ဦးထင်ကျော်ဦးဆောင်တဲ့အရပ်တပိုင်းအစိုးရမှာ လုပ်စရာတွေ အများကြီးပါ။ ကျနော်တို့အားလုံး လုပ်စေချင်ဖြစ်စေချင်တာတွေချည်းပါ။ အဲ့ဒါတွေအားလုံးကို လုပ်မရဖြစ်မရအောင် အတားအဆီးပြုနေတာက စစ်အုပ်စုနဲ့သူ့အလိုတော်ရိတွေ အမြီးစားဘက် ခေါင်းစားဘက်တွေပါ။ သူတို့အားလုံးဟာ ၂ဝဝ၈ "ဖွဲ့စည်းပုံ"ကို “ဥပဒေ“လုပ်ပြီး ကာ တက် တက်နေတာပါ။
လွှတ်တော်ထဲကတမတ်သား၊ အစိုးရထဲက ဝန်သုံးပါး၊ ကာလုံထဲက စစ်လူ ၆ ယောက် အဲ့ဒါတွေအပြင် “အချိန်မရွေးအာဏာသိမ်းခွင့်”တွေဟာ သူ့ဖွဲ့စည်းပုံ တည်ရှိမှုနဲ့အတူ ဖြစ်ထွန်းနေတာပါ။

ချုပ်ရရင် ၂ဝဝ၈ ဖွဲ့စည်းပုံ ခြေရာလက်ရာမပျက်ရှိနေသမျှ ဒီမိုကရေစီကျတဲ့အုပ်ချုပ်ရေးနဲ့အစိုးရအပြည့် ဘယ်တော့မှမရပါ။ ၂ဝဝ၈ အောက်ကနေ ကျနော်တို့လုပ်စေ့ချင် ဖြစ်စေ့ချင်တာတွေကို အရပ်တပိုင်းအစိုးရမပြောနဲ့ သိကြားမင်းတောင် ဆင်းလာပြီးလုပ်ပေးလို့မရပါ။

၂ဝဝ၈ ကို ဒီမိုကရေစီကျဖွဲ့စည်းပုံဖြစ်အောင်လုပ်ရမှာက ကိစ္စအကြီးကြီးတွေထဲက အကြီးဆုံးနဲ့ အခရာအကျဆုံးကိစ္စပါ။ သူ့ကို ပြီးအောင်လုပ်နိုင်ရင် ကျန်တာတွေပြီးအောင်လုပ်ဖို့ လမ်းပွင့်ပြီးသားဖြစ်ပါပြီ။

ဒီကိစ္စကြီးဟာ အရပ်တပိုင်းအစိုးရတခုတည်း တတ်နိုင်တဲ့ကိစ္စလုပ်နိုင်တဲ့ကိစ္စ မဟုတ်ပါ။ ကျနော်တို့အားလုံး လွှတ်တော်တွင်း လွှတ်တော်ပ အစိုးရတွင်း အစိုးရပ မြေပေါ်မြေအောက် လူထုပါနိုင်သမျှပါမယ့် ဒီမိုကရက်တစ်လှုပ်ရှားမှုတွေ လိုအပ်ပါတယ်။

ကျနော်တို့ ဒီမိုကရေစီကျကျ လှုပ်ရှားနေမှရမှာပါ။ အပြန်အလှန် ဒီမိုကရေစီပိုင်ခွင့်တွေ သတိပြုလေးနက်ကြပါမှ တန်ကာကျမှာပါခင်ဗျား။
ကပ်ပါးတွေတော့ ထားခဲ့ပါ။

0 comments:

Post a Comment