ခုတလော စစ်တပ်ရယ် စစ်တပ်ကိုတလက်ကိုင်လုပ်အသုံးချနေတဲ့
စစ်အုပ်စုရယ်ကို ခွဲခြမ်းစိတ်ဖြာပြီး အောက်ခြေထုတပ်မှူးတပ်သားတွေကို လူထုဘက်သားဖြစ်အောင် စည်းရုံးသိမ်းသွင်းရေးကိစ္စ သဏ္ဍန်ပေါင်းစုံနဲ့ အလွှာပေါင်းစုံ အတန်းအစားပေါင်းစုံက ပြောသံဆိုသံ ကျယ်ကျယ်လောင်လောင် ကြားလာရပါတယ်။ ကောင်းတဲ့ကိစ္စမို့ ကြိုဆိုအပ်သလို တနိုင်လည်း ဝင်ထမ်းကြရမှာပါ။ ကိစ္စတခုလုံးကို ချုံ့ပြောရရင် Army Reform လို့ဆိုတဲ့ တပ်ပြုပြင်ရေးလို့ ဆိုရမယ်ထင်ပါတယ်။
“ပြည်သူသာအမိ ပြည်သူသာအဖ“တို့၊ “တပ်မတော်ကို တကယ့်ကျေးဇူးရှင်ဟာ ပြည်သူ“တို့၊ “တပ်မတော်သားတွေဟာ ကိုယ့်ကိုအသုံးချ ကိုယ်ကျိုးရှာနေတဲ့စစ်ခေါင်းဆောင်တွေကို နာခံစရာမလို၊ ပြည်သူနဲ့ ပြည်သူကရွေးချယ် တင်မြှောက်ထားတဲ့အစိုးရကိုသာ နာခံအပ်တယ်“တို့ စသည်ဖြင့်ပေါ့လေ တပ်ပြုပြင်ရေးလုပ်တဲ့နေရာမှာ ရေလဲသုံးတဲ့ ဝေါဟာရတွေလည်းများပါတယ်။ တကယ်လည်း အဲ့ဒီအတိုင်းဖြစ်ရမှာပါ။
တကယ်လည်း လူမျိုးစုအားလုံးလက်ခံနိုင်စွမ်းနဲ့ တာဝန်ယူနိုင်စွမ်းအပြည့်ရှိတဲ့ ပြည်ထောင်စုတပ်မတော်ဖြစ်လာအောင် နိုင်ငံရေးအရ မဖြစ်မနေပြောင်းလဲယူရမှာပါ။ ဒါတွေကလည်း ပြည်တွင်းစစ်ရပ်စဲနိုင်မှ ပြည်တွင်းငြိမ်းချမ်းရေးကို မှန်မှန်ကန်ကန်နဲ့ ရေရှည်တည်တန့်အောင်လုပ်နိုင်မှဖြစ်မယ့်ကိစ္စပါ။ ခု ကျနော်က နိုင်ငံရေးသိတ်ကျလွန်းတာတွေ ခနထားပြီး စစ်သားစိတ် စစ်သားအတွေးနဲ့ ခံစားမှုဘက်ကနေ ဇောင်းပေးတင်ပြချင်တာပါ။
တဖက်ကနေလည်း တပ်ကို တပ်နဲ့တူတူတန်တန်ဖြစ်အောင် တပ်မှူးတပ်သားတွေရဲ့အဆင့်အလိုက် စားဝတ်နေရေး ပြေလည်သောင်သာအောင်၊ စစ်လက်နက်၊ နည်းပညာတွေ အဆင့်မီမီဖြစ်အောင် လုပ်ပေးရမှာတွေလည်းရှိပါတယ်။ ခြေညှပ်ဖိနပ်၊ သေနတ်မီးကျိုးမောင်းပျက်၊ ယူနီဖောင်း စုတ်စုတ်ပြတ်ပြတ်နဲ့ စစ်သားတွေမြင်ရတာ ကျက်သရေမရှိသလို သူတို့ကိုယ်တိုင်လည်း လူမလေးခွေးမခန့်လိုခံစားမှုတွေဖြစ်ကြပါတယ်။ လက်ထဲသေနတ်ကိုင်ထားပြီး ဖြဲသာခြောက်နေရပေမယ့် လူတွေရဲ့အမြင်မှာ အထင်ကြီးအားကျချင်စရာ ဘာမှကို မရှိမှန်း သူတို့ဘာသာလည်းသိနေပါတယ်။ ရှက်လည်းရှက် သိမ်လည်းသိမ်ငယ်နေကြသလို ကိုယ့်ကိုယ်ကိုတောင် မလေးစားနိုင် မကြည်ညိုနိုင်တွေအထိဖြစ်ကြပါတယ်။
နိုင်ငံရေးအရရော၊ လူမှုစီးပွားရေးအရရော၊တပ်ကို တူတူတန်တန်တပ်ဖြစ်ရေးတွေရဲ့အခြေခံက “တပ်ဟာ လူထုတပ်၊ လူထုကရွေးကောက်ထားတဲ့အစိုးရကို နာခံတဲ့တပ်“ ဖြစ်လာဖို့ပါ။ ဒီလို ခြေဆင်းခံနေတာများလို့ လိုရင်းပြန်ကောက်ပြီး ချုံပြောပါရစေ။
တပ်ကို အဲ့ဒါတွေလည်း လုပ်ပေးပါ၊ သိမြင်နားလည်လာအောင်လည်း သင်ပြပေးပါ။ တပြိုင်နက်တည်းမှာ “စစ်သားဆိုတာ ယူနီဖောင်းဝတ်ထားတဲ့နိုင်ငံသားဖြစ်တယ်“ဆိုတဲ့ အယူအဆကို စွဲမြဲသိမြင်ကျင့်သုံးအောင် လုပ်ပေးပါ။
ဒီလိုလုပ်ပေးရာမှာ အခြေခံအကျဆုံးနဲ့ အခရာအကျဆုံးကိစ္စက “စစ်စည်းကမ်း စစ်ဥပဒေချိုးဖေါက်မှုမှတပါး နယ်ဘက်ဆိုင်ရာ ရာဇဝတ်မှုဆိုင်ရာပြစ်မှုတွေ ချိုးဖေါက်ကျူးလွန်သည့် မည်သည့် တပ်မှူးတပ်သားကိုဖြစ်စေ အခြား(အရပ်သား) နိုင်ငံသားများနည်းတူ အရပ်ဘက်တရားရုံးများက တရားစီရင်ပိုင်ခွင့်ရှိကြောင်း“ကို သိမြင်နားလည်လက်ခံလာအောင် လုပ်ပေးရမှာဖြစ်ပါတယ်။
သဘောက “ပြည်သူဟာ ထမင်းရှင်၊ ပြည်သူဟာအမိအဖဆိုတာတင် မက ပြည်သူအပေါ်ကျူးလွန်တဲ့အမှုကို ပြည်သူကရွေးချယ်ခန့်အပ်ထားတဲ့တရားရုံးများက တရားစီရင်ခြင်းကိုပါခံယူရမယ်“ ဆိုတာပါပဲ။
စစ်တပ်ဟာ ပြည်သူ့ကျေးဇူးကိုသိရုံ၊ ပြည်သူကိုချစ်ရုံနဲ့တင် မလုံလောက်ပါ။ ပြည်သူ့ဥပဒေတွေနဲ့ ပြည်သူ့တရားစီရင်ရေးစနစ်ကိုပါ ကြောက်ရွံ့ရိုသေ ရပါလိမ့်မယ်။ ပြည်သူကို ကြောက်နေရပါလိမ့်မယ်။ ဒီနေရာမှာ ကျနော်ပြောတဲ့ “ကြောက်“က မဟုတ်မမှန်တာလုပ်သူတွေ “အမှန်နဲ့တရားတဲ့ဥပဒေ“ ကို ကြောက်နည်း ကြောက်ဖို့ပါ။
ခု အောက်ခြေတပ်မှူးတပ်သားတွေ စစ်အုပ်စုကိုကြောက်နေကြရတာရဲ့ အရင်းခံအကြောင်းဟာ “စစ်တပ်ကကျူးလွန်သမျှ စစ်တပ်ကပဲစီရင်မယ်“ ဆိုတဲ့လုပ်ပိုင်ခွင့်ကြောင့်ပါ။ ဒီအကြောက်တရားနဲ့ အောက်ခြေထုကို “ကိုင်“ထားတာပါ။ တပ်ထဲမှာ တိုင်းပြည်နဲ့ဆိုင်တဲ့ ပြည်သူနဲ့ဆိုင်တဲ့အမှုအခင်းတွေ လဘ်ပေးလဘ်ယူတွေ တကယ်ကျူးလွန်နေဦးအောင် တရားသဖြင့်စီရင်မှု တရားခံဘက်ကရပိုင်ခွင့် အများပြည်သူမျက်မှောက်မှာ တရားစီရင်မှုစတာတွေ ဘာတခုမှမရှိပါ။ အုပ်စုဂိုဏ်းဂဏဖွဲ့ လက်ဦးမှုယူပြီး အရင်းလဲအဖျားထင်းဖြစ် လျှင်သူစား ဖြုတ်ထုတ်သတ်လုပ်နေတာကို
အောက်ခြေထုက ကြောက်နေကြတာပါ။
ဒါပေမယ့် ဒီ “အကြောက်“ဟာ ကျနော် အပေါ်မှာပြောတဲ့ “အမှန်နဲ့တရားတဲ့ဥပဒေ“ကို ကြောက်နည်းကား ကြောက်နေကြတာမဟုတ်ပါ။ မှန်မှန်မှားမှား ခံစရာရှိကိုယ်ပဲခံရမှာဆိုပြီး ထိတ်လန့်ကြောက်ရွံ့နေရတဲ့ အဖြစ်မျိုးပါ။ လူဟာ တခုခုကိုနာခံဖို့ အကြောက်တရား လိုတဲ့အခါလိုတယ်ဆိုပေမယ့် သိစိတ်ရှိရှိနဲ့ ကြောက်ရွံ့လေးစားပါမှဖြစ်မှာပါ။
ကျနော်တို့ဟာ “စစ်စည်းကမ်းနဲ့ စစ်ဥဒေ”ချိုးဖေါက်ကျူးလွန်တာကို စစ်တပ်ကစီရင်ဖို့ကိုသာ စစ်တပ်လက်ထဲထားပြီ၊ ပြည်သူအပေါ်၊ တိုင်းပြည်အပေါ်ကျူးလွန်တဲ့ အမှုအခင်းမှန်သမျှကို ပြည်သူက(နယ်ဘက်တရားရုံးတွေက) တရားစီရင်တာဟာ မှန်ကန်ကြောင်း၊ စစ်ခေါင်းဆောင်တွေမှာ စိတ်ထင်ရာ တရားစီရင်ခွင့်မရှိကြောင်း၊ စစ်ဘက်ကနေ တရားလက်လွတ် ထင်ရာစိုင်းလုပ်နေတာတွေဟာ မှားယွင်းကြောင်း၊ မှားယွင်းစီရင်ခံရသူတွေမှာ နစ်နာကြောင်း၊ စစ်သားဟာ ယူနီဖောင်းဝတ်နိုင်ငံသားဖြစ်လို့ နိုင်ငံသားအခွင့်အရေး အပြည့်အဝရထိုက်သူဖြစ်ကြောင်း၊ နိုင်ငံသားပီပီ နိုင်ငံတော်ရဲ့ဥပဒေတွေနဲ့ တရားစီရင်ရေးကိုသာ လေးစားကြောက်ရွံ့ နာခံဖို့လိုကြောင်း၊ တကယ့်တရားစီရင်ခွင့်ဆိုတာ ပြည်သူတွေရဲ့လက်ဝယ်မှာပဲ ရှိကြောင်း၊ သူတို့လက်ခံနားလည်တဲ့အထိ ဆွေးနွေးပြောဆိုဖို့လိုပါမယ်။
စစ်သားဟာ မှန်ကန်ပြီးတရားတဲ့ဥဒေကိုပဲ ကြောက်ရွံ့လေးစားရမှာဖြစ်သလို မျှတပြီး နိုင်ငံသားအခွင့်အရေးအပြည့်အဝရှိတဲ့တရားစီရင်ရေးကို နာခံရမှာပါ။
အောက်ခြေထုတပ်မှူးတပ်သားတွေဟာ စစ်အုပ်စုထိပ်သီး စစ်အာဏာရှင်တွေကို “ကြောက်“မနေစေချင်ပါ။ ပြည်သူကို၊ တိုင်းပြည်ကို၊ မှန်ကန်ပြီး မျှတတဲ့ဥပဒေနဲ့ တရားစီရင်ရေးကိုပဲ “ကြောက်ရွံ့”ကြပါ။
ကျနော်က ကိုယ်တိုင်လည်းတပ်ထဲနေခဲ့သူပါ။ ကျနော်လည်း “ကြောက်“ခဲ့ဖူးပါတယ်။
ဧပြီ ၃၊ ၂ဝ၁၆
0 comments:
Post a Comment