Sunday, April 10, 2016

အာဏာသုံးဖို့ပါ(မျိုးမြင့်ချို)

0 comments
(အာဏာသုံးဖို့ပါ)
စစ်အစိုးရအဆက်ဆက် ဝန်ကြီးတွေနဲ့ ဌာနဆိုင်ရာတွေမှာ စစ်ဗိုလ်တွေပဲ တွင်ကျယ်ခဲ့တာပါ။ အသစ်ရောက်လာတဲ့လူကြီးအောက် ပြားပြားမှောက်ခဲ့ရတာက အရပ်သားပညာရှင်တွေ အမှုထမ်းအရာထမ်း စာရေးစာချီတွေပါ။

လူကြီးဆိုတဲ့လူ ဘာပြောပြော ဟုတ်ဟုတ် မဟုတ်ဟုတ် ဟုတ်ကဲ့လုပ်ခဲ့ရာတာချည်းပါ။
လူကြီးဆိုသူကလည်း ဝင်လာကတည်းက ဘီလူးဆိုင်းနဲ့ ဗိန်းမောင်းတိုက် ဝင်လာတာပါ။ ဘယ်အကောင် ဂျိုထောင်မလဲမှန်းပြီး "ကိုင်"ပြတတ်ပါတယ်။ ဒီနမူနာကြည့်ပြီး နောက်လူတွေထဲက ဟင့်အင်းမပြောရဲကြပါ။ မဟုတ်ကဲ့လောက်လုပ်မိရင်တောင် ထွက်စာတင်၊ ရာထူးချ၊ နယ်ပြောင်းလောက်တော့ ထိပါတယ်။ သဘောက လူကြီးသစ်မို့ အောက်လက်ငယ်သားက ပညာပေးဖို့ ပညာပြဖို့မပြောနဲ့ မော်တောင်မကြည့်ဝံ့အောင်လုပ်ထားတာပါ။ ပြန်လှန်တဲ့သူဆို အဆုံးစွန်မှာ ထမင်းအိုးခွဲခံရပါတယ်။ လူ ထောင်ကျပါတယ်။ မိသားစုဘဝပျက်ပါတယ်။ ဒီအခြေအနေကို တွန်းလှန်အာခံရဲသူ (ပညာရှင်တွေအပါအဝင်)ဟာ ရှိတော့ ရှိပါတယ်။ ရှားတော့အင်မတန်ရှားပါတယ်။

ခု ဘာပြောပြော နေရာတကာ စစ်လွှမ်းမိုးမှုကိုလျှော့ချဖို့ အရပ်သားတော်တည့်မှန်ကန်သူတွေနဲ့အစားထိုးဖို့ အားထုတ်မှုတွေရှိလာပါပြီ။ ကိုယ့်လက်ကိုယ့်ခြေ ပိုင်ပိုင်နိုင်နိုင်မလုပ်နိုင်သေးလို့ မြေစမ်းခရမ်းပျိုးနေရမှန်းလည်း သဘောပေါက်ပါတယ်။

ကျနော့်မှာ စိတ် "အထင့်" တချက်ရှိပါတယ်။ ဘာထင့်တာလဲဆိုတော့ အုပ်ချုပ်ရေးနဲ့ဆိုင်တဲ့ ဌာနတခုရဲ့ထိပ်ဆုံးအကြီးအမှူးကတော့ ပြည်သူ့လူ တိုင်းပြည်လူဖြစ်ပါရဲ့။ သူ့အောက်တဆင့်နိမ့် နှစ်ဆင့်နိမ့်တွေက စစ်ဗျူရိုကရက်ဟောင်းတွေ ဆက်ဖြစ်နေသေးတယ်ဆို ဒီလူတွေက အရပ်သားဖြစ်တဲ့ပြည်သူ့လူကို ပညာပေးမှာ ပညာပြမှာကိုပါပဲ။

ကျနော်တို့ဟာ နိုင်ငံရေး အထိုက်အလျောက်နားလည်တယ်၊ အုပ်ချုပ်ရေးသဘော တီးမိခေါက်မိရှိတယ်၊ လူရည်လူသွေးလည်း တန်သလောက်ရှိတယ်၊ လူကဲခတ်လည်း မဆိုးဘူး၊ ဆက်ဆံရေးလည်း ကောင်းမွန်ပြေပြစ်တယ်ဆိုစေဦး နှစ်ပေါင်းများစွာ ဗျူရိုကရေစီယန္တယားကြီးနဲ့ ကြီးနိုင်ငယ်ညှဉ်းလုပ်လာခဲ့တဲ့ အအုံအဖွဲ့ကြီးထဲမှာ ကာလတခုတော့ ချာချာလည်ကြရမယ်ထင်ပါတယ်။ ခေါင်းစား၊ ဦးနှောက်ခြောက် နားပူဒဏ်တွေလည်း ခံရမှာပါ။ ပညာပေးပညာပြတွေလည်း ခံရမယ်ထင်ပါတယ်။

ဒါတွေပြောလို့ စိုးရွံ့နောက်တွန့်သွားဖို့မဟုတ်ပါ။ ဘယ်မျှအထိ ပြင်ဆင်ထားဖို့ ဖြည့်ဆည်းထားဖို့ လေ့လာထားဖို့လိုမယ်ဆိုတာ ချင့်ချိန်နိုင်အောင်ပါ။

နောက်တချက်ကလည်း လုပ်ပိုင်ခွင့်နဲ့အာဏာကို ဘယ်နေရာမှာ ဘယ်လိုလူအတွက် ဘယ်ပုံဘယ်နည်း ဘယ်လောက်အချိန်အဆနဲ့ သုံးမလဲဆိုတာပါပဲ။

တကယ့်အုပ်ချုပ်ရေးဆိုတာ မေတ္တာတရားအရင်းခံတယ်ဆိုပေမယ့် အာဏာသုံးမှရပါတယ်။ အာဏာပြလို့မရပါ။

တိုင်းပြည်ကို လူထုကို တော်တည့်မှန်ကန် ကောင်းမွန်တဲ့အုပ်ချုပ်ရေးထူထောင်မယ်ဆို အစိုးရယန္တယားရဲ့အစိပ်အပိုင်းတိုင်း ခွေးသွားစိတ်တိုင်း အံဝင်ဂွင်ကျဖြစ်နေမှ ရမှာပါ။ ကလန့်နေတဲ့ ညပ်နေတဲ့အစိတ်အပိုင်းဆို ဖလှယ်ပစ်ရပါတယ်။

ဗိုလ်သိန်းစိန်အစိုးရကြွေးကြော်သံကိုတော့ တိုင်းပြည်က အကာပြဲ့ပြဲ့အနှစ်မဲ့အဖြစ် အမှိုက်ခြင်းထဲပစ်ခဲ့ကြပါပြီ။
ဧပြီ ၁ဝ၊ ၂ဝ၁၆

0 comments:

Post a Comment