အရင်းရှင်စနစ် အသက်ဆက်နိုင်ဖို့ ကုထုံးသစ်ရှာဖွေရေး (မင်းရွှေမောင်)

(အရင်းရှင်စနစ်အသက်ဆက်နိုင်ဖို့ ကုထုံးသစ်ရှာဖွေရေး) ဂလိုဘယ် စီးပွားရေးပြဿနာရဲ့ ကြီးမားပြင်းထန်လှတဲ့ဒဏ်ရာဒဏ်ချက်တွေကို ညည်းတွားခံစားရင်းနဲ့အခုတော့ လေးနှစ်ကာလထဲရောက်လာခဲ့ကြပါပြီ။

          ဒီလို စီးပွားရေးကျဆင်းခဲ့ရတဲ့အတွက် ဟိုလူကိုအပြစ်တင်၊ ဒီလူကို အပြစ်တင်နဲ့လုပ်လာခဲ့ကြတာလဲ လူစုံသလောက်ရှိသွားပြီ။ တာဝန်မဲ့တဲ့ ဘဏ်လုပ်ငန်းရှင်တွေ၊ လောဘဇောတိုက်ခဲ့ကြတဲ့ ကော်ပိုရိတ် အမှုဆောင်အရာရှိကြီးတွေ၊ ကျွမ်းကျင်မှုမရှိကြတဲ့စည်းကမ်းထိန်းသိမ်းရေးပုဂ္ဂိုလ်တွေ၊ အငြင်းအခုံဝါသနာပါကြတဲ့နိုင်ငံရေးသမားတွေ...။

          ပြီးတော့ အမေရိကန်သမ္မတဟောင်း George W.Bush, အမေရိကန်ဗဟိုဘဏ်ဥက္ကဋ္ဌ Ben Bernanke, ဂျာမနီဝန်ကြီးချုပ် Angela Merkel, ဘဏ္ဍာရေးအကဲဖြတ်အေဂျင်စီတွေ၊ လုပ်ခလစာနည်းတဲ့ တရုတ်အလုပ် သမားတွေ၊ မတန်တဆလုပ်ခလစာရခဲ့ကြတဲ့ ဂရိလုပ်သားတွေ၊ ယူရိုငွေ၊ နောက်ပြီး အရမ်းကာရော ဝယ်ယူစားသုံးခဲ့ကြတဲ့ အမေရိကန်စားသုံးသူတွေ။

          ၁၉၃ဝ နှစ်များအတွင်း ကမ္ဘာ့စီးပွားပျက်ကပ်- Great Depression ဆိုက်ခဲ့ချိန်မှစပြီး ကြုံတွေ့ခဲ့ရတဲ့ အဆိုးရွားဆုံး ဘဏ္ဍာရေးကပ်ဘေးနောက်ပိုင်းကာလမှာ ဟိုလူ့လက်ညှိုးထိုး ဒီလူ့လက်ညှိုးထိုးနဲ့အပြစ်တင်လို့ အမနာပပြောလို့ကုန်နိုင်ဖွယ်တောင်ရှိမှာမဟုတ်ပါဘူး။ ဒီနှစ်လွန်လို့နောက်နှစ်ရောက်ရင်လည်း စီးပွားရေးကကောင်းလာမယ့်ပုံ မပေါ်သေးဘူး။ ပိုဆိုးတာက ဒီပြဿနာကို ဘယ်လိုဖြေရှင်းရကောင်းမှန်း လည်းမသိကြသေးဘူး။ ဒီတော့ လက်ညှိုးငေါက်ငေါက်ထိုးပြီး အပြစ်ပုံချစရာဆိုလို့ တစ်ခုပဲကျန်တော့တယ်။ ဒါက အရင်းရှင်ဝါဒ။ ဘာကြောင့် အရင်းရှင်ဝါဒကို အပြစ်တင်ရမလဲ။ ဒါကလွယ်ပါတယ်။ အလုပ်အကိုင် ရှားပါးနေဆဲဖြစ်တယ်။ လူလတ်တန်းစားအမေရိကန်နဲ့ဥရောပမိသားစုတွေရဲ့ လူမူဖူလုံရေးအခြေအနေ ဆိုးရွားလာတယ်။ ဒီကနေ့ခေတ် အရင်းရှင်ဝါဒဟာ ဒါတွေကို မဖြေရှင်းနိုင်ဖြစ်နေတယ်။ တစ်ချိန်က အရင်းရှင်ဝါဒဟာ ဒီလိုပြဿနာတွေကို ဖြေရှင်းပေးနိုင်ခဲ့တယ်။ ဒါဟာ အရင်းရှင်ဝါဒရဲ့အလုပ်ပဲလို့ယူဆ ထားခဲ့ကြတယ်။

          အရင်းရှင်ဝါဒဟာ လူတိုင်းအတွက် အခွင့်အလမ်းတွေကိုဖန်တီးပေးတယ်။ လူတိုင်းအတွက်
အနာဂတ်ဟာလင်းလက်နေရမယ်လို့ဖော်ညွှန်းတယ်။ အရင်းရှင်ဝါဒဟာ အလုပ်ကြိုးစားသူတွေနဲ့ အရည်အသွေးထက်မြက်သူတွေကို မြှောက်စားတယ်လို့ဆိုခဲ့ကြတယ်။ အင်္ဂလိပ်လိုပြောရင်တော့ Capitalism is a meritocracy လို့ဆိုတယ်။

          ဒါပေမယ့် ၂ဝဝ၈ ခုနှစ် ဘဏ္ဍာရေးပြဿနာတက်ခဲ့ပြီးနောက်ပိုင်းမှာ အရင်းရှင်ဝါဒဟာ အချိတ်အဆက်ရှိသူတွေနဲ့ အခွင့်ထူးခံတွေအတွက်ပဲအကျိုးရှိလာတယ်။ လူအများရဲ့အမြင်မှာ ဝေါစထရိက ငွေရှင်ကြေးရှင်တွေဟာ သူတို့ရဲ့လွန်ကျွံမှုတွေ အမှားတွေကိုမပြုပြင်ကြသေးတဲ့အပြင် နောင်တတရားလည်း မရကြသေးဘူး။ သူတို့တစ်တွေဟာ ဈေးကစားတဲ့ပဉ္စလက်အတတ်ပညာတွေနဲ့ အမြတ်အစွန်းတွေ မြိုးမြိုးမြက်မြက်ရရှိနေကြဆဲဖြစ်တယ်။ ချမ်းသာမြဲချမ်းသာနေကြဆဲဖြစ်တယ်။

          ဘဏ်လုပ်ငန်းရှင်တွေဟာ ကြွေးပြန်မဆပ်နိုင်တဲ့အကြောင်းပြချက်နဲ့ မိသားစုတွေကိုအိမ်ပေါ်ကဆွဲချ နှင် ထုတ်ပစ်ကြပြီး သူတို့ရဲ့ကိုယ်ပိုင်အိမ်ဂေဟာတွေကို ဖြိုဖျက်ပစ်ခဲ့ကြတယ်။ အရင်းရှင်ဝါဒရဲ့
အသနားမဖက်တဲ့ဘီလူးဇာတ်ပဲလား။ အစိုးရရဲ့ငွေချေးစာချုပ်တွေကို ဝယ်ယူကိုင်ဆောင်ထားကြသူတွေ Bondholders နဲ့ ဘဏ်ကြွေးရှင်တွေကိုချွေးသိပ်ဖို့အတွက် ဂရိ၊ စပိန်၊ ပေါ်တူဂီနိုင်ငံသားတွေဟာ ဘတ်ဂျက် ဖြတ်တောက်မှုနဲ့အခွန်ကောက်မှုဒဏ်ကို ခါးစည်းခံနေကြရရှာတယ်။ စီအီးအိုဆိုသူတွေဟာ အမေရိကန်ဒေါ်လာသန်းပေါင်းများစွာကို အပိုဆုကြေး Bonus အဖြစ် မိမိတို့ရဲ့အိတ်ကပ်ထဲထည့်ပြီး အလုပ်သမားထောင်ပေါင်း မြောက်မြားစွာကိုအလုပ်ဖြုတ်ပစ်ခဲ့ကြတယ်။

          တကယ်တော့ အရင်းရှင်ဝါဒအပေါ် မကျေမနပ်ဖြစ်မှုတွေဟာ အခုထက် နက်ရှိုင်းပါသေးတယ်။ လွန်ခဲ့တဲ့ ဆယ်စုနှစ်သုံးခုလောက်က အရင်းရှင်စနစ်ဟာ ပိုပြီးလွတ်လပ်ခဲ့တယ်။ ပိုပြီး ဂလိုဘယ်ဆန်ခဲ့တယ်။ ချမ်းသာသူတွေ ပိုပြီးချမ်းသာသွားကြတယ်။ ကျန်လူတွေကတော့ အရိုးအရင်းကိုက်ခဲ့ကြရတယ်။

          ချမ်းသာဆင်းရဲကွာဟမှုဟာ ဘယ်နိုင်ငံမှာမဆို ကြီးကြီးမားမားကွာဟလာတယ်။ တစ်နည်းပြောရရင် ဝင်ငွေမညီမျှမှု- income inequality တိုးပွားလာတယ်။ လွတ်လပ်တဲ့ကုန်သွယ်ရေးဦးစီးတဲ့ ဂလိုဘယ်လိုက်ဇေးရှင်းဟာ အပြည်ပြည်ဆိုင်ရာ လုပ်သားဈေးကွက်ထဲမှာ အိန္ဒိယလုပ်သားနဲ့အမေရိကန် လုပ်သားတွေကို ထိပ်တိုက်တွေ့စေတယ်။ ယှဉ်ပြိုင်နိုင်စွမ်းမရှိသူဟာ လမ်းဘေးရောက်သွားတယ်။ 

အမေရိကန်ပြည်ထောင်စုနဲ့ဥရောပကစက်ရုံအလုပ်ရုံတွေကို ပိတ်သိမ်းပြီး တရုတ်ပြည်မှာသွားရောက်ဖွင့် လှစ်ကြတယ်။ အနောက်နိုင်ငံတွေက ကုန်ထုတ်လုပ်သား သန်းနဲ့ချီပြီးအလုပ်လက်မဲ့ဖြစ်ကုန်ကြတယ်။

          လောလောဆယ် အလုပ်အကိုင်ရရှိနေကြတဲ့ အမေရိကန်အလုပ်သမားတွေဟာ ဒီကနေ့ အရင်းရှင်စနစ်ထဲမှာ သူတို့အတွက် သိပ်ပြီးအကျိုးအမြတ်မရှိကြဘူး။ ဝါရှင်တန်အခြေစိုက် နိုင်ငံရေး၊ လူမှုရေး၊ စီးပွားရေးအကြံပေးအဖွဲ့Think-tank တစ်ခုဖြစ်တဲ့ institute for Policy studies ရဲ့ မကြာသေးမီက ထုတ်ပြန်ခဲ့တဲ့အစီရင်ခံစာအရ အမေရိကန်ကုမ္ပဏီကြီးတွေကစီအီးအိုတွေဟာ ပျမ်းမျှအားဖြင့် ၂ဝ၁ဝ ပြည့်နှစ်မှာ အမေရိကန်ဒေါ်လာ ၁ဝ.၈ သန်းရရှိခဲ့ကြတယ်။ မနှစ်ကထက် ၂၈ ရာခိုင်နှုန်းပိုတယ်။

          တစ်ချိန်တည်းမှာ အလုပ်သမားတစ်ဦးရဲ့ပျမ်းမျှရငွေဟာ အမေရိကန်ဒေါ်လာ ၃၃.၁၂၁ ပဲရှိတယ်။ မနှစ်ကထက် သုံးရာခိုင်နှုန်းပဲပိုတယ်။ ဒီလိုအဆင့်မှာ လစာဝင်ငွေနဲ့လုပ်ခရငွေကိုယှဉ်ကြည့်ရင် 

စီအီးအိုတွေရဲ့ဝင်ငွေက အလုပ်သမားတွေရဲ့ရငွေထက် ၃၂၅ ဆ ပိုများတယ်။ ၁၉၇ဝ ပြည့်လွန်နှစ်များက ဆိုရင် စီအီးအိုရဲ့လစာဟာ အလုပ်သမားတစ်ဦးလုပ်ခထက် အဆ ၃ဝ ပဲရှိတယ်။

          ဒါကြောင့် ဝေါစထရိသိမ်းပိုက်ကြ- Occupy Wall Street ဆန္ဒပြသူတစ်ဦးက အခုအခါ
အရင်းရှင်စနစ်ဟာ အလုပ်မဖြစ်တော့ဘူးလို့ဟစ်ကြွေးခဲ့တယ်။ အရင်းရှင်စနစ်ဟာ တိုင်းသူပြည်သားအားလုံး ကောင်းစားရေးထက် လက်တစ်ဆုပ်စာလူတစ်စုကောင်းစားရေးသို့ ဦးတည်ခုတ်မောင်းလျှက်ရှိတယ်။ ဝေါစထရိသိမ်းပိုက်ကြလူစုက ဘယ်မှာလဲတို့အတွက်ဝေစုလို့ မေးခွန်းထုတ်ခဲ့ကြတယ်။

          ဟုတ်ပါတယ်။ အရင်းရှင်ဝါဒဟာ အရင်ကလည်းဝေဖန်မှုတွေနဲ့အကြိမ်ပေါင်းများစွာ 

ရင်ဆိုင်ရဖူးတယ်။ Karl Marx က အရင်းရှင်စနစ် လုပ်ကိုင်ဆောင်ရွက်နေတဲ့ လုပ်ငန်းစဉ်ထဲမှာကိုယ်နှိုက်က ဖိနှိပ်ချုပ်ချယ်မှုပါဝင်နေပြီးဖြစ်တယ်လို့ မြွက်ဟခဲ့ဖူးတယ်။ ကိုယ်ကျင့်သိက္ခာထိန်းသိမ်းမှုမရှိကြတဲ့ ဘဏ်လုပ်ငန်းရှင်တွေဟာ စည်းနဲ့ကမ်းနဲ့ချုပ်ကိုင်ထားခြင်းမရှိတဲ့ ဘဏ္ဍာရေးဈေးကွက်တွေမှာ  ထင်ရာစိုင်း လုပ်ကိုင်ခဲ့ကြလို့ အခုလို ဘဏ္ဍာရေးဘေးကျပ်နံကျပ်ဖြစ်မှုနဲ့ ကြုံကြိုက်ခဲ့ရခြင်းဖြစ်တယ်လို့ အချို့က ထောက်ပြခဲ့ကြတယ်။

          ဒါပေမယ့် အရင်းရှင်ဝါဒဟာ သူ့ရဲ့အဓိကပြိုင်ဘက်ကွန်မြူနစ်ဝါဒကို အောင်နိုင်ခဲ့တယ်။ ကမ္ဘာကြီးရဲ့ အစိတ်အပိုင်းအတော်များများကို  အရင်းရှင်ဝါဒအဝိုင်းအဝန်းထဲသို့ သိမ်းသွင်းနိုင်ခဲ့တယ်။ ဘာကြောင့်လဲ ဆိုတော့ လူ့သမိုင်းတစ်လျှောက်မှာ အခြားဘယ်စီးပွားရေးစနစ်ကမှ အရင်းရှင်ဝါဒလောက် ဥစ္စာဓနနဲ့ဖွံ့ဖြိုး တိုးတက်မှုကို ဖော်ဆောင်ပေးနိုင်ခြင်းမရှိခဲ့ဘူး။

          စက်မှုတော်လှန်ရေး- Industrial Revolution ခေတ်ရဲ့ မိုးသောက်ချိန်က အထည်အလိပ်ရက်လုပ်တဲ့ စက်ရက်ကန်းစင်တွေ ထွက်ပေါ်လာခဲ့ပြီးနောက်ပိုင်းမှာ တစ်စတစ်စ လူသားမျိုးနွယ်တစ်ရပ်လုံးဟာ ကမ္ဘာဦးလူသားအဖြစ်မှ ခေတ်မီလူသားအဖြစ်  ပြောင်းလဲတိုးတက်လာခဲ့တယ်။ စာရင်းအင်းဝိဇ္ဇာဓိုရ်- Angus Maddison ရဲ့အဆိုအရ ဂလိုဘယ်ဂျီဒီပီဟာ ပထမနှစ်ပေါင်း ၁၈၂ဝ အတွင်းမှာ  ခုနစ်ရာခိုင်နှုန်းတိုးတက်ခဲ့ပေမယ့်  အရင်းရှင်စနစ်လွှမ်းမိုးထားတဲ့ရာစုနှစ် နှစ်ခုအတွင်းမှာ အဆပေါင်း ၇ဝ ကျော်တိုးတက်ခဲ့တယ်လို့ ထောက်ပြခဲ့တယ်။

          တကယ်တော့ အရင်းရှင်စနစ်ဟာ ဆင်းရဲမွဲတေမှုကို အကြီးအကျယ်တိုက်ဖျက်ခဲ့တယ်။ ဆေးဝါးသစ်တွေ၊ သတင်းအချက်အလက်တွေနဲ့ သယ်ယူပို့ဆောင်ရေးစနစ်သစ်တွေကို တီထွင်ဖန်ဆင်းနိုင် ခဲ့တယ်။ ဂလိုဘယ်လူ့ဘောင်အဖွဲ့အစည်းကို  ကုန်သွယ်ရေးနဲ့ဘဏ္ဍာရေးစနစ်သစ်တွေမှတစ်ဆင့် စပ်ဟပ်ပေါင်းစည်းပေးခဲ့တယ်။

တက်ကြွပြောင်းလဲအရင်းရှင်စနစ်

          အရင်းရှင်စနစ်ဟာ ဘာကြောင့်ဒီလောက်တောင် အောင်မြင်မှုရရှိခဲ့တာလဲ။ ဒီမေးခွန်းရဲ့အဖြေက ရိုးရှင်းပါတယ်။ အရင်းရှင်စနစ်ဟာ သဘောတရားတစ်စုံတစ်ရာမှာ ကျောက်ဆူးချရပ်တည်မနေဘဲ အမြဲလိုလိုတက်ကြွ ပြောင်းလဲရွေ့လျားနေတဲ့အတွက်ဖြစ်တယ်။

          ထွက်ပေါ်လာတဲ့ ပြဿနာတွေကိုတုံ့ပြန်တဲ့အနေနဲ့ အရင်းရှင်စနစ်ဟာ အကြိမ်ကြိမ်အခါခါပြောင်းလဲ ခဲ့တယ်။ ဒါကြောင့်လဲ ရှင်သန်တိုးတက်နေတယ်။ ၁၉၃ဝ ကမ္ဘာ့စီးပွားပျက်ကပ်ကြီးဆိုက်တော့ လူတွေ အတိဒုက္ခရောက်ခဲ့ကြတယ်။ ဒီတော့ အမေရိကန်အစိုးရက စီးပွားရေးမူဝါဒသစ်- New Deal တွေ ချမှတ်ပြီး အရင်းရှင်စနစ်တည်ငြိမ်ရေးအတွက်လုပ်ဆောင်ခဲ့တယ်။

          ၁၉၇ဝ နှစ်များအတွင်း အမေရိကန်နိုင်ငံမှာ စီးပွားရေးတိုးတက်မှုဆိတ်သုဉ်း Stagnation ပြီးတစ်ချိန် တည်းမှာ ငွေဖောင်းပွမှု- Inflation လည်း အကြီးအကျယ်မြင့်တက်လာတော့ နှစ်ရပ်ပေါင်းပြီး Stagflation လို့ခေါ်တဲ့ အခြေအနေတစ်ရပ်ပေါ်ထွက်လာခဲ့တယ်။ ဒါကို ကုန်ပစ္စည်းပိုမိုထုတ်လုပ်မှုအပြင် ဆန်းသစ်တီထွင် မှုတွေနဲ့တုံ့ပြန်ခဲ့ကြတယ်။

          အဲဒီနောက်ပိုင်း အမေရိကန်သမ္မတ Ronald Reagan နဲ့ ဗြိတိသျှဝန်ကြီးချုပ် Margaret Thatcher တို့ လက်ထက်မှာ စည်းကမ်းကလနားတွေကို လျှော့ချ၊ လွတ်လပ်တဲ့ကုန်သွယ်ရေးတွေဖော်ဆောင်ပြီး 

အချုပ်အချယ်မရှိတဲ့ အရင်းစီးကြောင်းတွေနဲ့ အရင်းရှင်စနစ်ကို တစ်ခေတ်ပြောင်းပစ်ခဲ့တယ်။ ဂလိုဘယ် စီးပွားရေးလည်း လေဟုန်စီးပြီး မိုးထိုးအောင်မြင့်တက်သွားတယ်။

        ဒီကနေ့ခေတ်ရောက်တော့ အရင်းရှင်စနစ်ဟာ အပြောင်းလဲကြီးတစ်ခုနဲ့ ပက်ပင်းရင်ဆိုင်တိုးနေတယ်။ ကမ္ဘာ့ဘဏ္ဍာရေးစနစ်ကြီး စိတ်မချရဖြစ်လာတယ်။ ခနော်နီခနော်နဲ့ဖြစ်လာတယ်။ ဒါကြောင့်
အရင်းရှင်စနစ်ကို ပြန်လည်တည့်မတ်ပေးဖို့လိုလာတယ်။ နောက်တစ်ကြိမ် ဘဏ္ဍာရေးစနစ်ကြီး အရည်ပျော် မကျအောင် ဆောင်ကြဉ်းဖို့လိုလာတယ်။ အရင်းရှင်စနစ်ကြီးကို ပြန်လည်ပြုပြင်ပြောင်းလဲဖို့
လိုအပ်လာပြီဆိုတာ လူတိုင်းလိုလိုနားလည်သဘောပေါက်ကြတယ်။ ပြဿနာက ဘယ်လိုပြောင်းလဲကြမလဲ ဆိုတာပါပဲ။

          ဒါနဲ့ပတ်သက်ပြီး သဘောတူညီမှု တစ်စုံတစ်ရာမရရှိသေးပါဘူး။  ဒါပေမယ့် ဒါရဲ့အဖြေကတော့ အရင်းရှင်ဝါဒရဲ့ သမိုင်းအလှည့်အပြောင်းများစွာကိုပြဋ္ဌာန်းပေးခဲ့တဲ့ အစိုးရနဲ့ဈေးကွက် နှစ်ပါးသွားအက အပေါ်မှာမူတည်နိုင်ပါတယ်။ ဒီကနေ့ ဘဏ္ဍာရေးပြဿနာဟာ အရင်းရှင်ဝါဒရဲ့စည်းလွတ်ဘောင်လွတ် ပရမ်းပတာလုပ်ဆောင်မှုကြောင့် ပေါ်ပေါက်လာခဲ့ရတယ်လို့ လူအတော်များများ ယုံကြည်ကြတယ်။

          ဘဏ်လုပ်ငန်းရှင်တွေနဲ့ အမှုဆောင်အရာရှိကြီးတွေကို အကွပ်အညှပ်မရှိဘဲလွှတ်ထားလိုက်ရင်  သူတို့လုပ်ချင်သလို ထင်ရာစိုင်းကြတော့မယ်ဆိုတာ ဗေဒင်မေးစရာတောင်လိုမယ်မထင်ဘူး။ ဘောဂဗေဒ ပညာရှင်ကြီး Adam Smith ရဲ့မမြင်ရတဲ့လက် - Invisible Hand က လည်း ဘာမှမတတ်နိုင်ဘူး။ ဒါကြောင့် ဘဏ်လုပ်ငန်းရှင်တွေနဲ့ အမှုဆောင်အရာရှိကြီးတွေကို တာဝန်သိသိနဲ့လုပ်ဆောင်ကြလိမ့်မယ်လို့ယုံစားလို့ မဖြစ်ဘူး။ သူတို့တစ်တွေက ငွေနောက် ကောက်ကောက်ပါအောင် လိုက်နေကြသူတွေ။

          ဒီတော့ အရင်းရှင်ဝါဒရဲ့ ဆိုးရွားတဲ့လွန်ကျွံမှုတွေကို ချုပ်ကိုင်ဖို့အတွက် အစိုးရရဲ့အခန်းကဏ္ဍသစ်တစ်ခု အမှန်တကယ်လိုအပ်လာတယ်လို့ အချို့က ထောက်ပြကြတယ်။ ဘဏ်လုပ်ငန်းရှင်တွေကို တင်းကျပ်တဲ့ စည်းကမ်းစည်းမျဉ်းတွေနဲ့ချုပ်ကိုင်ရေးဟာ ဦးစားပေးလုပ်ရမယ့်ကိစ္စဖြစ်တယ်လို့ ဝေါစထရိသိမ်းပိုက်ကြ လှုပ်ရှားမှုရဲ့စည်းရုံးရေးမှူးတစ်ဦးဖြစ်တဲ့ Mark Bray က ဆိုတယ်။ သူက ဘဏ္ဍာရေးကဏ္ဍဟာ အခုအခါ သိပ်ပြီးလွတ်လပ်တယ်။ အစိုးရက ဘဏ်လုပ်ငန်းရှင်တွေကို တစ်လက်မလောက် အခွင့်အရေးပေးလိုက်ရင် တစ်မိုင်လောက်အခွင့်အရေးယူကြသူတွေဖြစ်တယ်လို့ ဖော်ညွှန်းခဲ့တယ်။

          အမေရိကန်အစိုးရကတော့ ဘဏ်လုပ်ငန်းရှင်တွေကို နဖားကြိုးတပ်နိုင်ဖို့အတွက် ဥပဒေတွေ ပြဋ္ဌာန်းပေးလျက်ရှိကြောင်း ထောက်ပြခဲ့တယ်။ ပမာအားဖြင့် Dodd Frank ဥပဒေလိုပေါ့လေ။ ပြီးတော့ မကြသေးမီက သမ္မတဘာရက်အိုဘားမားက US Consumer Financial Protection Bureau သစ်တစ်ခု တည်ထောင်ဖွင့်လှစ်ပေးခဲ့တယ်။ ဒါပေမယ့်  အချို့ရဲ့အမြင်မှာ ဒါက အစပဲရှိသေးတယ်။ ဒီလောက်နဲ့ မလုံလောက်ဘူးလို့ ဆိုကြတယ်။

          Institute for Policy Studies မှ ဝင်ငွေမညီမျှမှုကို အထူးပြုလေ့လာသူ Chuck Collins က အချမ်း သာဆုံးပုဂ္ဂိုလ်တွေအပေါ် အခွန်ပိုကောက်နိုင်ဖို့အတွက် အခွန်ဥပဒေတွေကိုပြန်လည်ပြင်ဆင်သင့်ကြောင်း  ဆိုတယ်။ ကမ်းလွန်ဘဏ်တွေ Off shore havens ကို အလွဲအသုံးချမှုကိုလည်း ပိတ်ပင်သင့်ကြောင်း သူက ဖော်ညွှန်းတယ်။ ဒါပေမယ့် အစိုးရတွေအနေနဲ့ ဒါတွေကို လက်တွေ့အကောင်အထည်ဖော်ဆောင်နိုင်ပါ့မလား။

          ဘာကြောင့်လဲဆိုတော့ အစိုးရတွေဟာ ရက်စေ့လစေ့ကိုယ်ဝန်ဆောင်လို ကြွေမြီတွေ၊ လိုငွေပြမှုတွေနဲ့ ဖောင်းကားနေပြီး မလှုပ်နိုင်မရှားနိုင်ဖြစ်နေကြတယ်။ ကြွေးမြီတွေက  အရင်းရှင်ဝါဒကို အခုထက်ပိုပြီး လွတ်လပ်ခွင့်ပေးဖို့ ဖိအားပေးတောင်းဆိုလျက်ရှိတယ်။ စီးပွားရေးလုပ်ငန်းရှင်တွေ 

ပိုပြီးလွတ်လွတ်လပ်လပ် လုပ်ကိုင်နိုင်အောင် အတားအဆီးတွေကို ရိုက်ချိုးပစ်ရမယ့်အချိန်။
အလုပ်သမားဈေးကွက်များကို ကာကွယ်ပေးထားမှုတွေကို လျှော့ပေါ့ပေးရမယ့်ကာလ။ ဒါမှပဲ စီးပွားရေးတွေဟာ ပိုမိုယှဉ်ပြိုင်နိုင်စွမ်းရှိလာနိုင်မယ်လို့ အချို့ကအခိုင်အမာဆိုကြတယ်။

          သူတို့ရဲ့အမြင်မှာ ဂလိုဘယ်စီးပွားရေး ဒုက္ခလှလှတွေ့ရတာက  အရင်းရှင်ဝါဒကျရှုံးမှုကြောင့်မဟုတ်ဘဲ အစိုးရရဲ့လွဲမှားနေတဲ့လုပ်ရပ်တွေကြောင့်လို့ မြင်တယ်။ ဘဏ်စည်းကမ်းထိန်းသိမ်းဖို့တာဝန်ရှိကြသူတွေဟာ ဘဏ်တွေရဲ့အန္တရာယ်ကို မသိကျိုးကျွန်ပြုခဲ့ကြတယ်။ ဘဏ်တွေရဲ့အပြုအမူကြောင့် စီးပွားရေးတည်ငြိမ်မှု ခြိမ်းခြောက်ခံလာရတဲ့အခါ အစိုးရကဘဏ်တွေကို ငွေကြေးစိုက်ထုတ် အကူအညီအထောက်အပံ့ ပေးခဲ့ကြတယ်။ ဘဏ်ပြုပြင်ပြောင်းလဲရေး ဒါမှမဟုတ် ဝေါစထရိ ပြုပြင်ပြောင်းလဲရေးအစီအမံတွေကို
ရှောင်ရှားနိုင်အောင် အမေရိကန်ဗဟိုဘဏ် Federal Reserve က အထောက်အကူပေးလျက်ရှိတယ်။ ဒါကြောင့် ဘဏ်လုပ်ငန်းရှင်တွေဟာ စရိတ်စကသက်သက်သာသာနဲ့ အမြတ်အစွန်းမြိုးမြိုးမြက်မြက် ရရှိနေကြတယ်။ တစ်နည်းပြောရရင် အစိုးရကိုယ်တိုင်က အရင်းရှင်ဝါဒရဲ့ သူ့ဘာသာသူပြုပြင်နိုင်စွမ်းရှိတာကို ကဖျက်ယဖျက်လုပ်နေတယ်လို့ သူတို့က ထောက်ပြကြတယ်။

          အစိုးရက ဘဏ်ကြီးတွေကို ငွေကြေးစိုက်ထုတ်ကယ်တင်ခြင်းဟာ  ဈေးကွက်တွေရဲ့အဆုံးအဖြတ်ပေါ် အစိုးရကိုယ်နှိုက်က လက်လွှတ်စပယ် ပစ်ပယ်ခဲ့ခြင်းဖြစ်တယ်။ တကယ်လို့ အရင်းရှင်ဝါဒကို သူ့ဘာသာသူ လွှတ်ထားခဲ့မယ်ဆိုရင်  ဒီဘဏ်ကြီးတွေဟာ ဒီကနေ့ မြင်ကွင်းထဲမှာ အကောင်အထည်နဲ့ရှိမှာမဟုတ်တော့ ဘူး။ အရှုံးသမားတွေဟာ အောင်နိုင်သူမဖြစ်သင့်ဘူး။ သူတို့ပြဿနာ သူတို့ တာဝန်ခံသင့်တယ်။ "Exile on wall Street: one Analyst's Fight to save the big banks form themselves" စာအုပ်ရေးသားခဲ့တဲ့ Mike Mayo က ဒီကနေ့ အရင်းရှင်တွေဟာ အရင်းရှင်ဝါဒရဲ့အဆိုးရွားဆုံးရန်သူတွေဖြစ်နေကြပါပြီလို့ ညည်းတွားခဲ့တယ်။ ဘဏ်ကြီးတွေရဲ့စီအီးအိုတွေဟာ  ဝေါစထရိကိုသိမ်းပိုက်ကြဆန္ဒပြသမားတွေထက်တောင် အရင်းရှင်စနစ်ကို ခြိမ်းခြောက်လျက်ရှိတယ်လို့ Mayo က ထောက်ပြတယ်။

          ဒီကနေ့ ကျွန်ုပ်တို့ရဲ့စီးပွားရေး စနစ်ပြဿနာဟာ အရင်းရှင်ဝါဒရဲ့ပြဿနာမဟုတ်ဘူး။ အရင်းရှင်စနစ်  ကို တိတိပပမကျင့်သုံးတဲ့အတွက် ဖြစ်ပေါ်လာရတဲ့ပြဿနာဖြစ်တယ်လို့ Mayo က သုံးသပ်တယ်။

          အခုလို အမျိုးမျိုးအဖုံဖုံ ဆွေးနွေးငြင်းခုံမှုတွေကတစ်ဆင့် နောက်ဆုံးထွက်ပေါ်လာမယ့် 

အရင်းရှင်ဝါဒဟာ အရင့်အရင်အရင်းရှင်ဝါဒတွေနဲ့မတူဘဲ တစ်မူထူးတဲ့အရင်းရှင်ဝါဒဖြစ်လာလိမ့်မယ်လို့ မျှော်လင့်ထားကြတယ်။ ရုပ်လုံးပေါ်လာမယ့် အရင်းရှင်ဝါဒဟာ အရင်းရှင်တွေကိုသာအကျိုးပြုတာမဟုတ်ဘဲ ကမ္ဘာသူ၊ ကမ္ဘာသားအားလုံးအတွက်အကျိုးရှိစေမယ့် ဝါဒဖြစ်ပါလာစေလို့...။

မင်းရွှေမောင်

http://www.zaygwet.com/eco_opinion.php?id=168

(ယူတာကဒီနေရာကပါ) 

Ref: Michael Schuman: " How to save Capitalism" Time, Jan 30, 2012.