၂ဝ၁၄ နိုဝင်ဘာအလည်မှာ ရေးဖြစ်တဲ့တိုနန့်နန့်လေးတွေ(မျိုးမြင့်ချို)

၂ဝ၁၄ နိုဝင်ဘာအလည်မှာ ရေးဖြစ်တဲ့တိုနန့်နန့်လေးတွေ(မျိုးမြင့်ချို)

(အမေ့ အမေရဲ့အမေ)

ကျနော် အရှင်လတ်လတ် လူအကောင်လိုက်ကြီးမမြင်ဖူးတဲ့

အမေ့ အမေရဲ့အမေ။ ကျနော့် ဘေးမကြီးဓါတ်ပုံပါ။ ဒေါ်ဘုတ်ဆုံတဲ့။ (နံမည်ရင်းက လှလှရီ။ ငယ်ငယ်ကဝတုတ်တုတ်လေးမို့ ဘုတ်ဆုံဘုတ်ဆုံနဲ့ ခေါ်ရင်းက ဘုတ်ဆုံလို့တွင်သွားတာ) ခုဒီပုံမှာကြည့်တော့ ပိန်တာရိုး။ ရှေးမြန်မာမကြီး။ ကိုးကွယ်တာက အစ္စလာမ်။ ယုံကြည်တာက အလ္လာဟ်အရှင်မြတ်။ ဖတ်တာရွတ်တာက ကိုရ်အန်၊ ကျင့်သုံးဆောက်တည် နေထိုင်ကွယ်လွန်သွားတာက မွတ်စလင်မ်အဖြစ်။ ဘိုလိုတော့ Great Grand Mother ပေါ့လေ။

အမေ ခဏခဏပြောတယ် သူ့အဖွားအကြောင်း။ ပြောတိုင်းလည်း

အင်္ဂလိပ်ခေတ်တွေရော

ဂျပန်ခေတ်တွေရော၊ ဦးနုခေတ်တွေရော၊

သမဝါယမခေတ်တွေရော၊ ဝေလခေါင်းရွှေဒင်္ဂါး (တကျပ်သားအချိန်စီးတဲ့) ၃၆ ကျပ်ရော၊ နှစ်လုံးပြူးနဲ့စလွယ်ရသူကြီးရော၊ ဘိုမချောချောကြီးတွေ ဒေါက်ကပ်ကြီးစီးတာရော၊ လယ်သမားတွေသူပုန်ထတဲ့အကြောင်း တဆင့်ကြားတွေရော၊ လန်ချားဆွဲတဲ့လူတွေရော၊ ကုလားဗမာရိုက်ပွဲရော၊ ထောင်မလဲသဲကော်ဂျပန်ငွေစက္ကူရော၊ ဂျပန်စစ်သုံးကားအမိုးပတ္တူဖျဉ်တွေကို တိုင်ကီထဲထည့်ရေနွေးနဲ့ပြုတ် ရေမစိမ့်အောင်

အထဲကသုတ်ထားတဲ့ကတ္တရာစေးအလွှာကို ဂုံးခွံနဲ့ခြစ် အင်္ကျီချုပ်ဝတ်တာရော၊၊ တောပုန်းဓါးမြတွေသောင်းကျန်းတာရော၊ တူမတယောက်ကို အိမ်မှာတည်းတဲ့တပ်စုမှူးဂျပန်စစ်ဗိုလ်ကချစ်လို့ ဟာဒီးမားလိုခေါ်တာရော၊

စစ်ရှူံးတော့ စုတ်ပြတ်သတ်နေတဲ့ဂျပန်စစ်သားတွေ လမ်းပေါ်မှာပိုးလိုးပက်လက်လန် ငတ်ပြတ်နေတာရော၊ ထောပတ်ပုံးတွေဖေါက် ထောပတ်တွေသွန်ချပြီး ပုံးခွံတွေ ပန်းကန်ပြားနဲ့ဒယ်အိုးရိုက်တာရော၊ လွတ်လပ်ရေးရတော့ ဟေးဟေးနဲ့ အော်တာရော၊ သူပုန်တွေထတာရော၊ ဒါးမြတွေသောင်းကျန်းတာရော၊ သူ့နွားတွေအုပ်လိုက်ကြီး ဓါးမြတွေမောင်းသွားလို့ သူ့မောင်အငယ်ဆုံးငိုတာရော၊ ပြည်သူပိုင်သိမ်းတဲ့အထဲ အမျိုးတွေရဲ့လုပ်ငန်းတွေပါကုန်တာရော၊ လယ်တွေပါကုန်တာရောအကုန်ပါတယ် စုံမှစုံပဲ။

ခုတော့ အမေ့မှတ်ဉာဏ်တွေ မှေးစပြုပြီ အမေ့နားတွေ လေးစပြုပြီ အမေ့ခါးတွေ ကိုင်းစပြုပြီ။ သူ့မြေးလေး မရင်နှစ်ကိုထိန်းရင်း ကလေးလုပ်တာပြောတာတခုခုများ သူသဘောကြတဲ့အခါ ပါးရည်နားရည်တွန့်တွေ တွန့်သထက်တွန့်တွန့်သွားအောင် ရယ်လိုက်ပြုံးလိုက်တိုင်း အမေ လူအိုလို လှနေဆဲပဲ။ အမေ လူအိုလိုလန်းဆန်းနေဆဲပဲ ဒါပေမယ့် အရွယ်လွန်ပြီ အရွယ်ထောက်ရှာပြီ။

ပြောရရင် အဖေ့ဘက်အမေ့ဘက် နှစ်ဘက်လုံးက အမျိုးအဆွေတွေထဲမှာ အမေက အသက်အကြီးဆုံးဖြစ်နေပြီ။ ခု ၈၃ ထဲ ဝင်ပြီ။ ဝမ်းသာစရာက ဆီးချို သွေးတိုး နှလုံး ဘာညာစတဲ့ ရောဂါကြီးကြီးမားမားတခုမှ မရှိတာပဲ။ ခုချိန်ထိ ပဲကြော်လေး မြေပဲဆန်လှော်လေး ဖြိုးဖြိုးဖြောက်ဖြောက်ဝါးနိုင်တုန်း။ ထမင်းကို လက်နဲ့နယ်ဖတ်ပြီး မတုန်မရင်စားနိုင်တုန်း။ တုတ်ကောက်မလို လမ်းလျှောက်နိုင်တုန်း။ သူ့အပင်လေးတွေ ကိုယ်တိုင်စိုက်ပျိုး ရေလောင်းပေါင်းသင် ခူးတုန်းဆိတ်တုန်း၊ သားသမီးတွေနဲ့ လာသမျှဧည့်သည်တွေကို ချက်ပြုတ်ခူးခပ်ကျွေးတုန်း။ ၁၄ ထစ်လှေကားကို တနေ့ ၆ ကြိမ်အနည်းဆုံး အတက်အဆင်းလုပ်နေတုန်း။ ကျနော်လုပ်ပုံကိုင်ပုံ ဟန်မကျရင် နားဝင်အောင်ပြောတုန်း။ တနေ့နေ့တော့ သားတွေသမီးတွေအားလုံးနဲ့ တစုတရုံးနေရမှာဆိုတဲ့အတွေးနဲ့ စိတ်ဆောင်တုန်း။

(နိုင်ငံရေး အသရေ)

သူခိုး ခိုးတယ်ပြော ထောင်မဆန့်ဘူးတို့ ဘာဘူးတို့ ဘာမှမပြောပါ။ ဗမာပြည် ထောင် ၃ ထောင်မှာ ၁၅ နှစ်နေခဲ့ဖူးပါတယ်။ တိုက်ထဲမှာ သီးသန့်အကျဉ်းသားအဖြစ်အနေများပေမယ့် တောင်ငူထောင်မှတော့ ကံကောင်းခြင်းကြီးစွာ အဆောင်မှာနေရပါတယ် ၅ နှစ်နီးပါးလောက် နေဖူးပါတယ်။ အဆောင်မှာ ရာဇဝတ်သားစုံပါတယ်။ အမှုစုံပါတယ်။ အဖြစ်အပျက်နဲ့ အတွေ့အကြုံအစုံရပါတယ်။

ကျနော်ဒီမှာလုပ်တဲ့အလုပ်တွေထဲမှာ လူကြီးထောင်မှာ ဗမာပြည်စကားပြန်လုပ်တာလည်း ပါပါတယ်။ တချို့က ထောင်နဲ့ရေစက်မကုန်သေးလို့ လို့ပြောပါတယ်။ အလုပ်သဘောက ကိစ္စရှိမှခေါ် ပြီးတာနဲ့ပြန်။ တစ်စက္ကန့်တောင် အပိုမနေရပါ။ ဘယ်အကျဉ်းသား အချုပ်သားနဲ့မှ အလုပ် ကိစ္စမှတပါး စကားမပြောရဆိုပေမယ့် စကားပြန်ဖြစ်လို့ ခြွင်းချက်နည်းနည်းပါးတော့ရပါတယ်။ ချုပ်သစ်တွေ ပထမဆုံးရုံးထုတ်ရက် အိမ်ပြောပေးဖို့မှာတာ၊ ကျန်နေတဲ့မိသားစုကိုအကြောင်းကြားဖို့ လိပ်စာ ဖုန်းနံပတ်တောင်းတာ ယူတာ။ ကျနော်လုပ်တာက ထောင် တနှစ်နဲ့တနှစ်အောက်သမားတွေပဲထားတဲ့ Jail ပါ။ နှစ်ကြီးသမားတွေကိုတော့ Prisons တွေကိုပို့ပါတယ်။

သွားဖန်များတော့ ထောင်ဝန်ထမ်းတချို့နဲ့မျက်မှန်းတန်းမိနေပါပြီ။ ကျနော့်အကြောင်း တစေ့တစောင်းသိသူလည်း သိပါတယ်။ တနေ့တော့ ကျသစ်တယောက်ရောက်တယ်။ မှတ်ပုံတင်မယ် ဆေးမှတ်တမ်းယူမယ်လို့လှမ်းပြောတာနဲ့ ထောင်ရောက်သွားပါတယ်။ ဟိုရောက်တော့ အသိဖြစ်နေတယ်။ ဟိုတလောကပဲ အရှိန်လွန်မူးမောင်းမှုကြောင့် ရုံးချိန်ပျက်အာမခံငွေဆုံး ပြန်အဖမ်းခံဒဏ်ထိထားသူ။ အရက်နဲ့ပတ်သက်တဲ့ သင်တန်းလည်းတက်နေရ ကုထုံးဆရာနဲ့လည်း ကောင်စလင်န်းလုပ်နေရသူ။ နေ့တိုင်း အရက်ဖြတ်ဌာနမှာ ဆေးသောက်ဆီးစစ်သွေးစစ် နေရသူ။ ခု သူ့ကြည့်တော့ ညက ချထားတဲ့အရှိန်လည်း ကောင်းကောင်းမပြယ်သေး အနံ့လည်းတထောင်းထောင်းထွတ်တုန်း။ ကိုယ်လည်း ပုလင်းဖက်သောက်လာတဲ့သူဆိုတော့ အနေအထားမြင်တာနဲ့မှန်းမိတယ်။ စာရင်းသွင်း မှတ်တမ်းယူပြီးတော့ သူ့အိမ်ကိုအကြောင်းကြား ပေးဖို့၊ ပိုက်ဆံလာထည့်ပေးဖို့မှာရင်း သူ့ကို “ဘာလို့ဖမ်းပြီး ထောင်ထဲပြန်ပို့သလဲ သူနားမလည်ကြောင်း၊ သူ အရက်တကယ်ပြန်မသောက် တော့ကြောင်း၊ ညက သူငယ်ချင်းတွေ သောက်နေတဲ့ဝိုင်းမှာ သူက ဘေးထိုင်ပြီး အမြည်းပဲစားနေကြောင်း၊ အဲ့ဒီအချိန်မှာ ဝိုင်းထဲကလူနဲ့ ဘေးအခန်းကလူ စကားများပြီး ရဲရောက်လာကြောင်း၊ ဟိုလူတွေကိ ဖမ်းရင်း သူ့ပါခေါ်လာကြောင်း၊ သူ့မှာ ဘာပြဿနာမှမရှိကြောင်း၊ ဘာအပြစ်မှမရှိကြောင်း၊ ဘာအပြစ်မှမကျူးလွန်ကြောင်း”တွေကို ကျနော့်ပခုံးပုတ်လိုက်လက်ပုတ်လိုက် လက်ဟန်ခြေဟန်တွေနဲ့ ကရားရေလွှတ် လွှတ်တော့တာပါပဲ။ ကျနော်လည်း အင်း..အင်းနဲ့သာ လုပ်နေရတယ် စိတ်တော့မသက်သာလှပါ။

ကိစ္စပြီးလို့ အမှုထမ်းက ဗူးဝအထိပြန်ပို့ရင် ဟိုငနဲ မင်းကိုဘာတွေပြောနေတာလဲလို့မေးတာနဲ့ သူပြောတာတွေ ပြန်ပြောပြရတယ်။ စကားဆုံးတော့ ပြုံးစစမျက်နှာပေးနဲ့ “နေပါဦး မင်းတို့ အဖမ်းခံရ ရုံးတင်ခံရ ထောင်ကျရတုန်းကရော”တဲ့။ “အဲ့ဒါနဲ့ ပြောင်းပြန်ပဲကွ။ ငါဒို့က မလုပ်ဖူးလို့ မပြောဘူး။ လုပ်တယ် လုပ်တာဘာဖြစ်လဲ။ နိုင်ငံရေး လူတိုင်းမှာလုပ်ခွင့်ရှိတယ်။ အစိုးရကို စနစ်ကို မကျေနပ်ရင်မကြိုက်ရင် ဆန့်ကျင်ခွင့် ဖြုတ်ချခွင့် လူတိုင်းမှာရှိတယ်။ အဲ့ဒါ အပြစ်မဟုတ်ဘူး။ အပြစ်ကျူးလွန်တာ မဟုတ်ဘူး။ အပြစ်မရှိဘူး။ အပြစ်ရှိတာက မင်းတို့။ တရားခံက မင်းတို့၊ ခု မင်ူးတို့လက်ထဲမှာကြိုက်သလိုလုပ် ဆိုတာမျိုးပဲပြောတာ”ဆိုတော့ သူက “မင်းတို့က လုပ်တယ်၊ အပြစ်မရှိဘူး ကြိုက်သလိုလုပ်၊ သူတို့က မလုပ်ဘူး၊ အပြစ်မရှိဘူး၊ ဘာမှမလုပ်ပါနဲ့ပေါ့ကွ”လို့ပြောပြီး အသံထွက်တဲ့အထိရယ်တယ်။ ကျနော်လည်း လိုက်ရယ်မိတယ်။

ထောင်အပြင်ရောက်တော့ တောင်ငူထောင်ကရာဇဝတ်သားတွေကိုသတိမရပဲ ဗိုလ်သိန်းစိန်၊ ဗိုလ်ရွှေမန်း၊ ဗိုလ်မင်းအောင်လှိုင်တို့အကြောင်း သွားတွေးမိတယ်။ ပြီးတော့ သေနတ်နဲ့တေ့ပြီး ကိုယ့်ဘာသာလွတ်ငြိမ်းချမ်းသာခွင့်ယူထားပြီးသားလူတွေကို တဘက်သတ်ခွင့်လွှတ်ပါရစေ လုပ်နေတဲ့၊ တောင်းပန်ဖို့တောင်းပန်ပါတယ်ဆိုကာ ခြေသလုံးလိုက်ဖက်နေတဲ့ အမျိုးသားပြန်လည်သင့်မြတ်ရေးဆိုင်းဘုတ်အောက်က နိုင်ငံရေးအသရေပျက်တွေကိုလည်း စိတ်ထဲမြင်မိတယ်။

(အမူးအမော် ကောင်းတယ်)

ကျနော် အရက်သောက်တာ ကြိုက်လို့ပါ။ အဝသောက်ခဲ့ အမုန်းသောက်ခဲ့ပါတယ်။ ချဉ်ချဉ်တူးတူး မူးပြီးရောမဟုတ်ပေမယ့် အဲ့ဒီသဘောနီးပါးပါ။ အဲ့သလိုကြောင့်လည်း မဲဆောက်နေတုန်းက ဟာသမှတ်ချက်လေးတခုနဲ့ အပြောင်ခံရဖူးပါတယ်။ တနေ့ အရက်ဖိုးပြတ်သလောက်ဖြစ်တော့ ထိုင်းတောအရက်လိုဟာကို ဝယ်သောက်ကြတယ်။ အနံ့ကလည်းဆိုး အဝင်ကလည်းမီးတွေမြိုချရသလိုပြင်း ဆိုတော့ မော့တိုင်းမျက်နှာမရှုံ့မဲ့သူမရှိပါ။ အမြည်းကလည်း မက်မန်းသီးအစိမ်းတွေနဲ့။ ဒါပေမယ့် ပင်ကိုယ်ကအမူးအမော်ကြိုက်သူ ဒါမှမသောက်လည်း သောက်စရာမရှိဆိုတော့ ကြိတ်မှိတ်မြိုချပေါ့။ အဲ့ဒီအရက်ကြမ်းကြီးသောက်တဲ့ဝိုင်းမှာ အခု ကွယ်လွန်ပြီဖြစ်တဲ့ အေဘီအက်စ်ဒီအက်ဖ်က မောင်မြင့်အောင်ခေါ် မောင်နေလခေါ် ဂုရုလည်းပါပါတယ်။ တချက် ကျနော်မော့ရင်း ရှုံ့မဲ့သွားတော့ သူက “ဘယ့်နယ်လဲ ကိုကြီးမျိုး“ လို့ ပြောင်စပ်စပ်လုပ်ပါတယ်။ ကျနော်က “အင်း..မဆိုးပါဘုး။ ကျနော်တော့ ကြိုက်ပါတယ်” လို့ ပြန်ဖြေလိုက်တယ်။ ဒီတော့ သူက ချက်ချင်းပဲ “အင်း..ဆိုးတာလေး မကြိုက်တာလေးများရှိလည်း ပြောပါဦး” ဆိုပြီး ရှုံ့ရှုံ့မဲ့မဲ့နဲ့ သူ့ခွက်ကိုမော့ချလိုက်တယ်။

ကြားဖြတ်ရွေးကောက်ပွဲမလုပ်ပေးတော့ဘူးလို့ တင်အေးကော်မရှင်ကပြောတဲ့အခါ၊ အမျိုးသားပညာရေးဥပဒေကို လွှတ်တော်ထဲမှာထောက်ခံကြတဲ့အခါ၊

၂ဝဝ၈ ဖွဲ့စည်းပုံကို ၂ဝ၁၅ ပြီးမှပြင်မယ်လို့ ရွှေမန်းကပြောတဲ့အခါမျိုးတွေမှာ အင်န်အလ်ယ်ဒီခေါင်းဆောင်ရဲ့ တုန့်ပြန်ချက်တွေကြားတိုင်း ဂုရုကိုပဲသတိရတယ်။

(ဘယ်သူ့လူ ဘယ်သူ့ဘက်သား)

ဗကသနဲ့တကသကျောင်းသားတွေဦးဆောင်ပြီး

အမျိုးသားပညာရေးဥပဒေဆန့်ကျင်ကန့်ကွက်ဆန္ဒပြပွဲနဲ့

အဲ့ဒီပွဲကို သဏ္ဍန်ပေါင်းစုံနဲ့ ကူညီဖေးမအားပေးထောက်ခံပါဝင်ခဲ့ကြသူတွေကို

သရော်မော်ကားပြက်ရယ်ပြုတဲ့အထဲ ၈၈ လူထုတိုက်ပွဲကြီးရဲ့ အောင်သီးအောင်ပွင့်အဖွဲ့အစည်းတခုက

ခေါင်းဆောင်လို့ဆိုရမယ်ထင်တဲ့လူတယောက်လည်း

ပါနေတာမြင်တော့ “သြော်..တို့ထဲမလည်း ဘူးလက်လှဆွေရှိပါရောလား“လို့ထင်ပြီး စစခြင်းတော့ စက်ဆုပ်မိလိုက်သေးတယ်။ နောက် စေ့စေ့ပြန်တွေးမှ “ဘူးလက်လှဆွေက သူ့လူသူ့ဘက်သားကိုး“လို့ ဘွင်းဘွင်းပေါ်ပြီး ရှင်းရှင်းမြင်တော့မှ စိတ်သက်သာရာရတော့တာ။

(စာနာ နားလည်းလေးစားတာ)

(ဒီမိုကရေစီပညာရေးဦးဆောင်လှုပ်ရှားမှုကော်မတီရဲ့ဆုံးဖြတ်ချက်နဲ့ပတ်သက်လို့)

ဗကသ/တကသကျောင်းသားများ ခုလို ညီညီညွတ်ညွတ်စုစုစည်းဖြစ်တာ အားတက်ဝမ်းမြောက်မိပါတယ်။ ဒီမိုကရေစီပညာရေးလှုပ်ရှားမှုဦးဆောင်ကော်မတီဖွဲ့ပြီး စနစ်တကျလုပ်သွားတာကို ချီးကျူးဂုဏ်ယူမိပါတယ်။ ကျောင်းသားတွေရဲ့လှုပ်ရှားမှုကို စာနာထောက်ခံအားပေးပါတယ်။ ဒီမိုကရေစီပညာရေး ဦးဆောင်လှုပ်ရှားမှုကော်မတီရဲ့ လက်တလောဆုံးဖြတ်ချက်ကို စာနာစိတ်နဲ့ထောက်ခံအားပေးနေပါတယ်။ တတ်နိုင်သမျှလည်း ဝန်းရံကူပံ့မယ်လို့ ဆုံးဖြတ်ထားပါတယ်။

ခုကိစ္စကို စစ်ပမ်းလို့နားတယ်လို့ မမြင်မိပါ။ အစပျိုးလှုပ်ရှားမှုတခုလုပ်ပြီး ကျယ်ကျယ်ပြန့်ပြန့်ပါဝင်နိုင်အောင် အင်အားစုတဲ့သဘော ပြန်တည်ယူတဲ့သဘောလို့မြင်ပါတယ်။

အားစုဆောင်းရာမှာ နည်းနာပေါင်းများစွာရှိမှာပါ။ ကျနော့်အမြင်မှာ

ဆက်သွယ်ရေးနည်းပညာလည်း အားစုဆောင်းဖို့ အခရာကျတဲ့နည်းနာထဲပါတယ်လို့ တွေးပါတယ်။ လှုပ်ရှားမှုလေးတွေ အဆက်မပြတ်ဖြစ်နေမှလည်း ရမယ်ထင်ပါတယ်။ တစ်ဦးချင်းလုပ်တာနဲ့ အစုအသေးလေးတွေနဲ့လုပ်နိုင်တာမျိုးလည်း ထည့်သွင်းတွေးပေးစေချင်ပါတယ်။

တစ်ယောက်ချင်းတွေ အစုသေးလေးတွေနဲ့ အထက်တန်းကျောင်းတွေအထိဆင်းပြီး ပြောတာဟောတာ စာဝေစာဖြန့်တာတွေလည်း အားစုရာမှာ တွင်တွင်ကျယ်ကျယ်သုံးလို့ရမယ် ထင်ပါတယ်။ တစ်ယောက်ချင်းမို့ အစုသေးလေးတွေမို့ သူတို့ဘက်က ကိုင်ရတွယ်ရပိုလွယ်ကူပြီး ကောက်သင်းကောက်ချေမှုန်းခံရမယ့်အရေးလည်း တွေးပါတယ်။အဲ့ဒီ တစ်ယောက်ချင်းလေးတွေ အစုသေးလေးတွေက အပြန့်ပြန့်အကျဲကျဲ ဖြစ်နေပေမယ့် အစိတ်စိတ်အမွှာမွှာဖြစ်မနေဖို့ အချိတ်အဆက်မိမိရှိနေတယ်ဆို ကောက်ဆွဲသွားတောင် လက်လွန်ခြေလွန်လုပ်မရပါ။ တိုက်ပွဲအဆုံးအဖြတ်က နည်းပညာမဟုတ်ပေမယ့် လက်ငင်းရည်မှန်းချက်ပေါက်ဖို့ ဆက်သွယ်ရေးနည်းပညာကို မိမိရရသုံးဖို့နဲ့ မိမိဘက်စာနာတဲ့မီဒီယာများနဲ့လည်း အချိတ်အဆက် မပြတ်ကြဖို့တိုက်တွန်းပါရစေ။ အခြေခံကတော့ လူထုပါ။ လူထုထဲရှိသရွေ့ လူထုဘက်ရှိသရွေ့ လုံခြုံပါတယ်။ လူထုက “ကာ“လည်းပေးသလို “ကွယ်“လည်းပေးပါတယ်။

တိုက်ပွဲရဲ့အန္တိမရည်မှန်းချက်က စစ်အာဏာရှင်စနစ်အကုန်အစင်ဖျက်သိမ်းရေးပေမယ့်

လက်ရှိလှုပ်ရှားမှုက စစ်လွှတ်တော်ပူးပေါင်းလုပ်ကြံပြဌာန်းပေးတဲ့ “အမျိုးသားပညာရေးဥပဒေ“ကို ဖြစ်နိုင်ရင်တစုံလုံးဖျက်သိမ်းပြီး အသစ်ပြန်ဆွဲဖို့မဟုတ်ပါလား။ အဲ့ဒီအထိမဖြစ်နိုင်သေးခင်မှာ ကျောင်းသားထု၊ ပညာရှင်၊ ဆရာ/ဆရာမ စတဲ့အဖွဲ့အစည်းတွေ/သမဂ္ဂတွေရဲ့ ကိုယ်စားလှယ်တွေရဲ့ သဘောထားအမြင်နဲ့ ကိုယ်စားပြုမှုပါတဲ့ ဒီမိုကရေစီပညာရေးလက္ခဏာဆောင် ပညာရေးဥပဒေတရပ်ကို လွှတ်တော်မှာရေးဆွဲအတည်ပြုပြဌာန်းလာအောင်လုပ်ဖို့ပဲဖြစ်ပါတယ်။ အကန့်အသတ်ရှိပါတယ်။

ခု လှုပ်ရှားမှုဦးဆောင်ကော်မတီရဲ့ ခု လက်ငင်းဆုံးဖြတ်ချက်ဟာ အန္တိမရည်မှန်းချက်ဆီသွားရင်း တထောက်နား အားဖြည့်စုဆောင်းတာမို့ အဆုံးစွန် စွန့်လွှတ်ဖို့ထိ ပိုင်းဖြတ်ချက်ရှိတောင် ချိန်ချိန်ဆဆရှိရှိတဲ့ဆုံးဖြတ်ချက်လို့ မြင်ပါတယ်။

ဒါ ကျနော့်တစ်ဦးချင်းအမြင်ကိုတင်ပြပြီး ကျနော့်သဘောထားကို ဝိုင်းထဲဆွဲသွင်းပြီး ဆွေးနွေးကြည့်တာဖြစ်ပါတယ်။ စကားလုံးတွေ အသုံးအနှုန်းတွေမပြေပြစ်ရင် တင်ပြပုံမချောမွေ့ရင် သည်းခံစိတ်ရှည်မှုနဲ့ ပြုပြင်ပေးကြစေလိုပါတယ်။ မတူကွဲပြားတဲ့အမြင်တွေတွေလည်း သိပါရစေချင်ဗျား

ခင်မင်လေးစားစွာ

မျိုးမြင့်ချို