ကျွန်မဆက်၍ရေးချင်သော ဖေဖေ့အကြောင်းများ လှကျော်ဇော ဆောင်းပါးအမှတ် (၃၃)
သူတည်းတယောက် ကောင်းဖို့ရောက်မူ
အခု ‘လွမ်းခန်း’လာပါပြီ။
“သူတည်းတယောက် ကောင်းဖို့ရောက်မူ၊ သူတယောက်မှာ ပျက်လင့်ကာသာ ဓမ္မတာတည်း” ဆိုတဲ့ အနန္တသူရိယအမတ်ကြီးရဲ့ ‘ရေပွက်ပမာ’ ကဗျာကို ကျွန်မ တတိယတန်းဗမာဖတ်စာမှာ သင်ခဲ့ရဖူးပါတယ်။ ကဗျာကို အလွတ်ကျက်ခဲ့ရပေမယ့်၊ အဓိပ္ပာယ် သေသေချာချာမသိပါဘူး။ ဒါပေမယ့် တနေ့ ဓာတ်ပုံတပုံကို သတင်းစာတစောင်မှာတွေ့လိုက်ရတဲ့အခါမှာတော့၊ ဒီကဗျာ တပုဒ်လုံးကို ကောင်းကောင်း သဘောပေါက် သွားပါတော့တယ်။ အဲဒီပုံကတော့၊ ဗိုလ်မှူးချုပ် အောင်ရွှေ (NLD ဦးအောင်ရွှေ)ပုံဖြစ်ပြီး၊ အောက်ကစာကတော့ -အကျယ်ချုပ်ချထားခြင်း ခံရသည့် ဗိုလ်မှူးချုပ်ကျော်ဇောနေရာတွင် မြောက်ပိုင်းတိုင်းမှူးအဖြစ် အစားထိုးခန့်အပ်ခြင်းခံရသည့် ဗိုလ်မှူးချုပ်အောင်ရွှေ -လို့ ရေးထားပါတယ်။
အဲဒီကာလက ကျွန်မတို့မိသားစု မုန်တိုင်းထန်နေချိန်ပါ။
တနေ့ ကျွန်မတို့ကျောင်းဆင်းလာချိန်မှာ၊ မေမေဟာ အိမ်အပေါ်ထပ်ဧည့်ခန်းမှာ ကျွန်မတို့ အဘွား ၂ ယောက်လုံးနဲ့ထိုင်နေပါတယ်။ အားလုံး မျက်နှာတွေမကောင်းကြဘဲ၊ ကျွန်မတို့ကိုမြင်တာနဲ့ ပြောလက်စစကားတွေကို ရပ်ပစ်လိုက်ကြပါတယ်။ ကျွန်မတို့နဲ့အတူ အဲဒီတုန်းက အဘွား ၂ ယောက်လုံး(ဖေဖေ့မေမေရော၊ မေမေ့အမေပါ)ရှိနေပါတယ်။ ဖေဖေကလည်း အမြဲလောက်နီးနီး အိမ်မှာမရှိ၊ မေမေကလည်း မိခင်နှင့် ကလေးစောင့်ရှောက်ရေးအသင်းတို့၊ တပ်မတော်အမျိုးသမီးများအသင်းတို့လုပ်ငန်းများနဲ့ အလုပ်များနေကြတာကြောင့် ကျွန်မတို့မောင်နှမ တတွေကိုစောင့်ရှောက်ဖို့ အဘွားများကလိုက်နေတာပါ။ အထိန်းတွေရှိပေမယ့် အဘွားများက စိတ်မချပါဘူး။ ဒီကြားထဲ မေမြို့ရာသီဥတု ဒဏ်ကိုလည်း ကျွန်မတို့ကသိပ်မခံနိုင်ပါဘူး။ အထူးသဖြင့် လသားအရွယ်ကလေးနဲ့ပြောင်းလာရတဲ့ အငယ်ဆုံးမောင်လေးက အတော်ချူချာ ပါတယ်။
နောက်တနေ့ ကျောင်းရောက်တဲ့အခါ၊ ကျွန်မသူငယ်ချင်းတယောက်က သတင်းစာတစောင် ယူလာပြပါတယ်။ မျက်နှာဖုံးမှာက ဖေဖေ့ ဓာတ်ပုံနဲ့ မေးမြန်းစစ်ဆေးရန် အကျယ်ချုပ်ချထားလိုက်ခြင်းဆိုတဲ့သတင်းပါ။ အိမ်ပြန်ရောက်တော့၊ ကျွန်မမေမေကို ဖေဖေဘာဖြစ်လို့လဲ။ အခု ဘယ်မှာလဲ။ သတင်းစာထဲမှာပါတာဟုတ်သလား စသဖြင့် ငိုလည်းငို၊ မေးလည်းမေးလုပ်ပါတယ်။ မေမေက ကျွန်မကို လူကြီးသူမတဦးလို သူ့ရှေ့ ကုလားထိုင်မှာထိုင်ခိုင်းပြီး ဖေဖေဘာမှမဖြစ်ကြောင်း ကိစ္စလေးတွေရှိလို့ အခုပြန်မလာသေးပေမယ့်၊ မကြာခင် ပြန်လာမှာဖြစ်ကြောင်း အေးအေးဆေးဆေး ရှင်းပြပါတယ်။ မေမေ့ကြည့်ရတာလည်း ဘာမှမဖြစ်သလိုပဲ။ အဲဒါကြောင့် ကျမလည်းစိတ်အေးသွားပြီး ဘာမှ ဆက်မမေး တော့ပါဘူး။ အဲဒီတုန်းက ကျွန်မကလည်း အသက်(၁ဝ) နှစ်ဝန်းကျင်လောက်ပဲမို့ သိပ်လဲ သိတတ်သေးတာတော့ မဟုတ်ပါဘူး။
တကယ်တော့ အဲဒီတုန်းက ကျွန်မတို့မောင်နှစ်မတတွေက ဖေဖေမေမေတို့နဲ့လည်း သိပ်မရင်းနှီးသေးပါဘူး။ ဖေဖေက အိမ်မရှိတာ များပါတယ်။ အိမ်ရှိလည်း ဖေဖေရုံးတက်ရုံးဆင်း ဖြိုးကနဲဖျတ်ခနဲလောက်သာ တွေ့ရတာပါ။ ဖေဖေကလည်း တခါမှ ကျွန်မတို့ကို ဂရုတစိုက် မေးတာမြန်းတာမရှိပါဘူး။ ဖေဖေက ကျွန်မတို့ဘယ်ကျောင်းတွေနေတယ်၊ ဘယ်နှစ်တန်းတွေ ရောက်နေပြီဆိုတာတွေလည်းမသိဘူးလို့ မေမေက ပြောပြဖူးပါတယ်။ (၁၉၅၅ ခုနှစ်က ဖေဖေတို့ တပ်မှူးကြီးများကိုယ်စားလှယ်အဖွဲ့ တရုတ်ပြည်သွားလည်ပါတယ်။ တနေ့ အထည် စက်ရုံတရုံ သွားလှည့်လည်ကြည့်ရှုအပြီး ပြန်ဖို့လုပ်တော့ ဖေဖေတို့ကိုလက်ဆောင်ပေးဖို့ သားသမီးဘယ်နှစ်ယောက်ရှိသလဲမေးတော့၊ ဖေဖေက လေးယောက်လို့ဖြေမိလို့ ကလေးခြေစွပ် ၄ ဒါဇင်ပဲ ရလာပါတယ်။ ကျွန်မတို့က မောင်နှမ ၅ ယောက်ပါ။ မေမေက သူ တော်တော် စိတ်ဆိုးမိတယ်လို့ ပြန်ပြောပြဖူးပါတယ်)
မေမေကလည်း သိပ်တော့မထူးလှပါဘူး။ အဲဒီတုန်းက တရုတ်ဖြူစစ်ဆင်ရေးကြီးတွေ လုပ်နေရတဲ့ကာလဖြစ်လေတော့ ရှေ့တန်း ကူညီရေး လုပ်ငန်းတွေ အကြီးအကျယ်လုပ်နေရတာပါ။ နောက်တန်းကကျန်ခဲ့တဲ့မေမေတို့ တပ်မှူးကတော်အုပ်ဟာ အစည်းအဝေးတွေထိုင်ကြ၊ အလှူခံထွက်ကြ၊ လက်ဆောင်ပစ္စည်းတွေဝယ်ဖို့ မန္တလေးဆင်းကြနဲ့ တရုန်းရုန်းပါ။ ဒီကြားထဲ ရန်ကုန်ကပို့လာတဲ့ဓာတ်ပြားတွေ၊ ဓာတ်စက်တွေကလည်း အများအပြားပါ။ အဲဒါတွေလည်း ဝေရငှရပါသေးတယ်။ တပ်အလိုက်တပ်တိုင်းကို ဝေရတာပါ။ အဲဒီတုန်းက အကျော်ကြားဆုံးသီချင်းများကတော့၊ အဆိုတော်တင်တင်မြရဲ့ ‘ပေဖူးလွှာ’ နဲ့ မေလှမြိုင်ရဲ့ ‘ဆောင်းအမီ’သီချင်းများပါ။ မေမြို့တမြို့လုံး အဲဒီသ်ီချင်းသံတွေလွှမ်းနေပါတယ်။ တင်တင်မြလည်း အဲဒီသီချင်းနဲ့ နာမည်ကျော်သွားပါတော့တယ်။ မေလှမြိုင်ကတော့ အတော်စောစော ကတည်းက ဖဆပလအစိုးရရဲ့ပေါ်လစီသီချင်းတွေဆိုပြီး၊ နာမည်ကြီးနှင့်ပြီးပါပြီ။ ဒါကြောင့် မေမေနဲ့လည်းသိပ်တွေ့ရတာမဟုတ်ပါဘူး။
ကျွန်မတို့မောင်နှစ်မတတွေက အထိန်းတွေနဲ့အတူ အဘွားတွေနဲ့နေရတာပါ။ ဖေဖေက ၁၉၅၆ နှစ် ကုန်ခါနီးရန်ကုန်မှာကျင်းပတဲ့ တပ်မှူးများညီလာခံသွားတက်ရင်းက ‘ဗမာပြည်ကွန်မြူနစ်ပါတီ’နဲ့ ဆက်သွယ်တယ်ဆိုတဲ့စွပ်စွဲချက်နဲ့ အကျယ်ချုပ်ချအဖမ်းခံလိုက်ရတာပါ။ အဲဒီကိစ္စအပြည့်အစုံကိုတော့ ဖေဖေက သူ့ရဲ့ ‘ကိုယ်တိုင်ရေးအထုတ္တပ္ပတိ’မှာ ရေးပြီးပါပြီ။
ဖေဖေက မင်္ဂလာဒုံမှာ အကျယ်ချုပ်နဲ့နေစဉ်အတွင်း၊ ကျွန်မတို့တတွေဆီ မရေးစဖူး စာတွေရေးလာပါတယ်။ တယောက်ချင်းဆီရေးတာပါ။ ချစ်သမီးလှသို့လို့ခေါင်းစီးတပ်ထားပြီး၊ ဖေဖေက ကျန်းကျန်းမာမာရှိကြောင်း မကြာခင်ပြန်လာမှာဖြစ်ကြောင်း၊ စာကောင်းကောင်းကြိုးစားဖို့နဲ့ မောင်လေး၊ ညီမလေးများကိုလည်းဂရုစိုက်ဖို့ စတဲ့ဆုံးမစကားတွေရေးထားပြီး အောက်ဆုံးမှာတော့ ‘ဖေဖေ’လို့ လက်မှတ်ထိုးထားပါတယ်။ ကြည့်ရတာတော့ မေမေက ကျွန်မငိုငိုယိုယိုဖြစ်တဲ့အကြောင်း ဖေဖေ့ကို စာရေးပြောပြပုံရပါတယ်။ ဖေဖေက ကျွန်မတို့ကို အားပေးတဲ့ သဘောလည်း ပါပုံရပါတယ်။
တကယ်လည်း ကျွန်မတို့တတွေ အတော် ယောင်ချာချာဖြစ်လိုက်ပါတယ်။ အိမ်ကြီးတအိမ်လုံးတိတ်ဆိတ်သွားပြီးလူအဝင်အထွက်လည်း မရှိသလောက်ဖြစ်သွားပါတယ်။ တကယ့်ကို ခြောက်ကပ်သွားတာပါ။ ချောက်ချားစရာကြီးပါ။
တလောကပဲ စာရေးဆရာမ မြနှောင်းညိုက ပိတောက်ပွင့်သစ်မှာ သူ့ဖခင်အဖမ်းခံသွားရစဉ်(မဆလခေတ်)က သူတို့မိသားစုအဖြစ် အပျက်တွေ ပြန်ရေးသားထားတာတွေ့ရပါတယ်။ သြော်"""အချိန်ကာလ အဖြစ်အပျက်အကြောင်းခြင်းရာတွေသာကွဲပြားတာ စိတ်ခံစားမှုတွေကတော့ အတူတူပါပဲလားလို့ စာနာစိတ်ပွားမိပါတယ်။
ဒီနေရာမှာ အကြောင်းတိုက်ဆိုင်လာလို့ ၂ဝဝ၇ ခုနှစ်က ဖေဖေတွေ့ဆုံမေးမြန်းခန်းတခုမှာပြောခဲ့တာတွေကို ပြန်တင်ပြချင်ပါတယ်။
“တကယ်တော့ ဒီနေ့ကျွန်တော်တို့တိုင်းပြည်ရင်ဆိုင်နေရတဲ့ ဒုက္ခဆင်းရဲအဖုံဖုံဟာ စစ်အာဏာရှင်စနစ်က မြစ်ဖျားခံတာပါ။ တပ်မတော် သားများ သိရှိနားလည်ဖို့ကတော့ စစ်အာဏာရှင်စနစ်ဟာ ပြည်သူလူထုအတွက် ဒုက္ခတွေသယ်လာရုံမက တပ်မတော်သားအများစု အပေါ်လည်း ဒုက္ခတွေကျရောက်စေတယ်ဆိုတာပါပဲ။ တကယ့်လက်တဆုပ်စာလူတစုလေးသာ ချမ်းသာနေတာပါ။ ဒါတောင် တသက်လုံး စံစားသွားရတာ မဟုတ်ပါဘူး။ ရှေ့ကသွားကြပြီဖြစ်တဲ့စစ်အာဏာရှင်ကြီးများရဲ့ ဘဝဇာတ်သိမ်းကိုပဲကြည့်ပါ” တဲ့။
မေမြို့ကဇာတ်လမ်းပြန်ကောက်ရအောင်ပါ။
၁၉၅၇ ခုနှစ်နှစ်ဆန်းပိုင်းမှာ ဖေဖေမေမြို့ကို ခဏပြန်လာပါတယ်။ ကျွန်မတို့အားလုံး မင်္ဂလာဒုံပြန်ပြောင်းရမယ်။ ဒီအတွက် ပြန်လာစီစဉ်တာ လို့၊ မေမေက ပြောပါတယ်။ ဒီတခေါက် ဖေဖေပြန်လာတာ ထူးခြားပါတယ်။ ဘယ်တုန်းကမှ သားသမီးများနဲ့ရင်းရင်းနှီးနှီးမနေဖူးတဲ့ ဖေဖေဟာ ကျွန်မတို့တတွေကို တယုတယပြောကာဆိုကာ ချီကာပိုးကာ နေခဲ့ပါတယ်။
ကျွန်မတို့မေမြို့အိမ်ကြီးဟာ မင်္ဂလာဒုံအိမ်လောက်မကြီးပေမယ့်၊ အဲ့သလောက်နီးပါးပဲ။ အင်္ဂလိပ်ခေတ်၊ အင်္ဂလိပ်တပ်မှူးကြီးများနေသွားတဲ့ အိမ်တွေပါပဲ။ တခုကွာခြားတာက အိပ်ခန်းတွေမှာရော ဧည့်ခန်းကြီးတွေမှာရော မီးလင်းဖိုတွေရှိတာပါပဲ။ ဆောင်းတွင်းမေမြို့က မီးလှုံ ရပါတယ်။ ကျွန်မတို့ မောင်နှမတတွေနဲ့ အဘွားများအိပ်တဲ့အခန်းမှာ ဆောင်းတွင်းဆို မီးဖိုထားရတာပါ။ အဲဒီမီးလင်းဖိုကြီးဘေးမှာလည်း ကော်ဇောကြီးတချပ် ခင်းထားပါတယ်။ ညနေ နေနည်းနည်းစောင်းတာနဲ့ ကျွန်မတို့ အဲဒီမီးလင်းဖိုကြီးဘေးမှာပဲ နေကြပြီး၊ ဆော့ကြ၊ ကစားကြနဲ့၊ မောလာရင် အဲဒီကော်ဇောကြီးပေါ်မှာ အိပ်ပျော်သွားတတ်ကြပါတယ်။ နောက်မှ ကျွန်မတို့ကို ကုတင်ပေါ် အထိန်းတွေက ရွှေ့ပေး ကြတာပါ။ တခါတလေလည်း အဲဒီမီးဖိုမှာ၊ အာလူးတွေ၊ ပြောင်းဖူးတွေမီးဖုတ်စားကြပါတယ်။ အဘွားတွေအလစ်မှာ၊ ပုရစ်တွေဖမ်းပြီး မီးဖုတ် စားတတ်ကြပါသေးတယ်။ အဲဒီအချိန်ဆို ကျွန်မတို့က သိပ်ပျော်တာပါ။ အပျော်ဆုံးနှစ်ကတော့၊ ဖေဖေအဲဒီအခေါက်ပြန်လာချိန်မှာ၊ ညတိုင်း ဖေဖေရောမေမေပါ ကျွန်မတို့အခန်းကူးလာပြီး၊ ပြောကာဆိုကာ ရယ်ကာမောကာနဲ့ ကျွန်မတို့မိသားစု အဘွားများအပါ ပျော်ပျော်ရွှင်ရွှင်ကြီး နေခဲ့ရတဲ့ကာလပါပဲ။
ကျွန်မတို့ မောင်နှမတတွေဟာ နဂိုကတည်းက အလွန်အဆော့သန်သူတွေပါ။ မောင်နှမတတွေကလည်းများတော့ တခြားအဖော်ရှာစရာ မလိုဘဲ အမျိုးမျိုးကြံကြံဖန်ဖန်ကို ကစားတတ်ကြတာပါ။ မေမေက အင်မတန်စည်းကမ်းကြီးသူဖြစ်တော့ မေမေရှေ့ဆို ဆင်ခြင်ရပါတယ်။ ဖေဖေကလည်း မျက်နှာထားကြီးနဲ့နေတတ်တာပါ။ ဒါပေမယ့် အခုလို ဖေဖေရောမေမေပါ ကျွန်မတို့ကို ပြုံးပြုံးရွှင်ရွှင်နဲ့ အလိုလိုက်ဆက်ဆံ တဲ့အခါ ကျွန်မတို့တတွေ ဘယ်လောက်သောင်းကျန်းမယ်ဆိုတာ စဉ်းစားသာကြည့်ပါတော့။
ကျွန်မ နောင်မှ စဉ်းစားမိတာကတော့၊ ဖေဖေက အဲဒီအချိန် အမှုကတန်းလန်းဖြစ်နေသေးတော့၊ သူ့အနာဂတ်ကိုသူ သိပ်စိတ်ချပုံမပေါ်ပါဘူး။ ဒါကြောင့် မိသားစုနဲ့စုံစုံလင်လင်နေရသခိုက်ကလေးမှာ ပျော်ပျော်ရွှင်ရွှင်နဲ့အမှတ်တရနေပုံရပါတယ်။ ဖေဖေက ၁ဝ ရက်လောက်ပဲနေပြီး မင်္ဂလာဒုံ ပြန်သွားပါတယ်။ ကျွန်မတို့ကတော့ အတန်းတင်စာမေးပွဲတွေအပြီး မတ်လကုန်လောက်မှ ဖေဖေနောက်လိုက်ရပါတယ်။
ကျွန်မတို့ မေမြို့ကထွက်ရတဲ့နေ့ကို အခုထိ မှတ်မိနေပါတယ်။
အဲဒီနေ့က ကျွန်မတို့မောင်နှမ ၅ ယောက်၊ မေမေ၊ အဘွား၂ ယောက်နဲ့ အငယ်ဆုံးမောင်လေးကိုထိန်းတဲ့ အထိန်းမျိုးသမီးတယောက်တို့ မေမြို့အနီးစခန်းလေယာဉ်ကွင်းကို မနက်စောစောမှာပဲ သွားခဲ့ရပါတယ်။ ပြီးတော့ တပ်မတော်လေတပ်ရဲ့ လေယာဉ်ငယ်လေးတစီးပေါ် တက်ရပါတယ်။ လေယဉ်ပေါ်ရောက်ပြီး ပြတင်းပေါက်ကအပြင်ကို ကြည့်လိုက်တဲ့အခါမှာတော့ လေယာဉ်တကွင်းလုံးခြောက်ကပ်ပြီး၊ တိတ်ဆိတ်နေပါတယ်။ ကျမတို့နဲ့အတူနေခဲ့တဲ့ ကားမောင်းသူဦးလေးကိုကြည်၊ သူ့ဇနီး ဒေါ်ဒေါ်မရင်မြ၊ သူတို့သမီးလေး ကြည်ကြည်သန်း (ကျွန်မတို့နဲ့ ကစားဖော်) ၃ ယောက်သာ လိုက်ပို့ နှုတ်ဆက်သူရှိပါတယ်။ လေယာဉ်ထွက်တော့ ကြည်ကြည်သန်းလေးက လက်ပြနှုတ်ဆက် နေတာ မြင်လိုက်ရပါတယ်။ လွန်ခဲ့တဲ့တနှစ်ကျော်လေးကပဲ ဒီလေယာဉ်ကွင်းထဲမှာ လူထုပရိတ်သတ်ကြက်ပျံမကျစည်ကားစွာနဲ့ တရုတ်ဖြူများကိုတိုက်ထုတ်ပေးပြီး အောင်ပွဲရသူရဲကောင်းကြီးအဖြစ်ပြန်လာတဲ့ဖေဖေ့ကို မေမြို့တမြို့လုံးထွက်ပြီး သောင်းသောင်းဖျဖျ ကြိုဆိုခဲ့တဲ့အဖြစ်ဟာ၊ တကယ့်ကိုမယုံနိုင်စရာ ပုံပြင်သဖွယ်၊ အိမ်မက်သဖွယ် ပျောက်ကွယ်သွားရသလိုပါပဲလား။
သြော် လောကဓံတရားဟာ အလွန်မြန်ပါလား။
၁၃-၄- ၂ဝ၁၄။
0 comments:
Post a Comment