ဒေါ်အောင်ဆန်းစုကြည်ရဲ့ သြဇာ

ဒေါ်အောင်ဆန်းစုကြည်ရဲ့ သြဇာ (ငြိမ်းချမ်းအေး)မတ် ၂၁၊ ၂ဝ၁၅

‘နာမ်သြဇာ’လို့ အတိုဆိုနိုင်တဲ့ ‘Moral Authority’ ကို ခြုံငုံမိအောင် ဘာသာပြန်ရရင် ‘ကျင့်ဝတ်ပိုင်းဆိုင်ရာစံနမူနာပြု ဦးဆောင်လမ်းပြ၊ လွှမ်းမိုးချုပ်ကိုင်၊ သြဇာညောင်းမှု’လို့ ဆိုရမယ်ထင်ပါတယ်။  အဓိပ္ပာယ်ကိုအကျယ်ဖွင့်ရင် ဝိဇ္ဇာ(ပညာ)နဲ့ စာရဏ(အကျင့်)ကို ထပ်တူပြုသိမြင် ကျင့်ကြံ စံပြလုပ်ဆောင်နိုင်မှုကနေ သီလ၊ သမာဓိ၊ စာရိတ္တ၊ ကျင့်ဝတ်ပိုင်းဆိုင်ရာ အတွေးအခေါ်တွေဖော်ထုတ်နိုင်၊ လူသားတွေအပေါ် ရှေ့ဆောင်လမ်းညွှန် သင်ပြနိုင်၊ စိတ္တအာဟာရခွန်အားကို ဖြည့်စွမ်းနိုင်တယ်၊ ဒါကြောင့် လူသားတွေက ပြန်လည်စံနမူနာပြု လိုက်လံအတုယူ၊ ရိုသေ၊ မြတ်နိုး၊ ကိုးစားမှုခံယူရခြင်းနဲ့အတူ လွှမ်းမိုးနိုင်မှုသြဇာဖြစ်ပေါ်လာတဲ့ သဘောပါပဲ။  ဒါတွေအားလုံးဟာ ကျင့်ဝတ်ပိုင်းဆိုင်ရာ စံနှုန်း၊ သတ်မှတ်ချက်(Norm) တွေ၊ မူဝါဒ(Principle) တွေနဲ့ တန်ဖိုး(Value) တွေကိုအခြေခံပြီး စံနမူပြု ရေရှည် ကျင့်ကြံလုပ်ဆောင်ပြနိုင်မှုရလဒ် ဖြစ်ပါတယ်။ 

ဆိုခဲ့တဲ့ ကျင့်ဝတ်၊ စံနှုန်း၊ မူတွေဟာ လူလုပ်ဥပဒေဆိုတာတွေထက် ပိုလေးနက်ပြီးအခြေခံကျသလို လူသားတွေရဲ့အတွင်းအဇ္ဈတ္တသန္တာန်ကို လွှမ်းမိုးနိုင်၊ ကာလကြာရှည်စွဲမြဲနိုင်စွမ်းလည်း ရှိပါတယ်။

ဆိုခဲ့တဲ့ ဖွင့်ဆိုချက်အရ လူသားတွေအပေါ် ‘Moral Authority’ အရှိဆုံးကတော့ ကမ္ဘာမှာ ပွင့်တော်မူခဲ့တဲ့ဘုရားတွေ၊ တမန်တော်တွေ ဖြစ်ပါတယ်။ ထေရ်ကြီးဝါကြီး ရဟန်းသံဃာတော်တွေ၊ ဘာသာရေးခေါင်းဆောင်တွေဟာလည်း လူသားတွေအပေါ် ‘Moral Authority’ သြဇာကြီးပါတယ်။  ဒါ့အပြင် ကိုးကွယ်ယုံကြည်မှုနဲ့မသက်ဆိုင်တဲ့ အခြားလူသားအကျိုးပြု စွမ်းဆောင်နိုင်စွမ်းရှိတဲ့ သာမန်လူသား ပုဂ္ဂိုလ်တွေမှာလည်း “Moral Authority” သြဇာရှိနိုင်ပါတယ်။  အကြောင်းက ကမ္ဘာ့လူသားအကျိုးပြုနဲ့ လောကီရေးရာလွတ်မြောက်၊ ငြိမ်းချမ်းရာလုပ်ငန်းတွေ စွမ်းဆောင်ပေးနိုင်စွမ်းတဲ့လူပုဂ္ဂိုလ်တွေမှာလည်း သူမတူ ထူးခြားရှားပါးတဲ့ ‘သီလ၊ သမာဓိ၊ ပညာ’ရှိနေလို့ ဖြစ်ပါတယ်။  ဥပမာ – မဟတ္တမဂန္ဒီ (၁၈၆၉-၁၉၄၈)။

နိုဗယ်လ်ဆုရှင်တွေကို လေ့လာကြည့်ရင်လည်း နှစ်တချို့မှာ အငြင်းပွားဖွယ် ဆုရွေးချယ်မှုသမိုင်းဖြစ်စဉ်ရှိခဲ့ပြီး အင်အားကြီးအနောက်အုပ်စုရဲ့ နိုင်ငံရေးရည်မှန်းချက်တွေ ပါဝင်ပတ်သက်လွှမ်းမိုးမှုရှိခဲ့ပေမယ့် ယေဘုယျအနေနဲ့တော့ သူတို့ဟာ ကမ္ဘာမှာ အထိုက်အလျောက် ‘Moral Authority’ သြဇာကြီးသူတွေလို့ ဆိုနိုင်ပါတယ်။ သူတို့ဟာ ကမ္ဘာ့ငြိမ်းချမ်းရေးကို ဖော်ဆောင်ပေးနိုင်ခြင်း၊ တရားမျှတမှုကို ကိုယ်စားပြုခြင်း၊ လူသား(ကျား/မ/လူမျိုး/ဘာသာ/ အသားအရောင်မခွဲ တန်းတူ)အခွင့်အရေး အပြည့်အဝရရှိအောင် ကြိုးစားဆောင်ရွက်ခြင်း၊ လူသားတန်ဖိုး ကို မြှင့်တင်ပေးနိုင်ခြင်း၊ လူသားတွေရဲ့လူမှုစီးပွားဘဝ တိုးတက်အောင်ကြံဆောင်ခြင်း၊ သတ္တ၊ ရုက္ခလောက၊ ကမ္ဘာ့ပထဝီမြေကြီးနဲ့ သဘာဝ ပတ်ဝန်းကျင်ကို စည်ပင်ဝပြောရှင်သန်အောင် လုပ်ဆောင်ခြင်းတို့ကြောင့် လူသားနဲ့ကမ္ဘာမြေအပေါ် ကျေးဇူးပြုနိုင်ခြင်းနဲ့အတူ သူတို့ရဲ့ ‘Moral Authority’ ဟာလည်း ကမ္ဘာ့လူသားများအကြားမှာ ကြီးမားလှပါတယ်။

ဆိုခဲ့တဲ့သဘောမှာ ငြိမ်းချမ်းရေးဆုရှင်တယောက်ဖြစ်တဲ့ ဒေါ်အောင်ဆန်းစုကြည်ဟာလည်း နိုင်ငံရေးခေါင်းဆောင်ဆိုတာထက်ပိုတဲ့ လူထုကိုယ်စားပြုခေါင်းဆောင်အနေအထားအပြင် လူ့အခွင့်အရေးတက်ကြွလှုပ်ရှားသူ၊ ဒီမိုကရေစီရဲ့သင်္ကေတ ရှေ့ဆောင်လမ်းပြပုဂ္ဂိုလ်၊ အမှန်တရားနဲ့တရားမျှတမှုရဲ့ပုံရိပ်အနေနဲ့ ကမ္ဘာ့လူသားတွေအပေါ်မှာ ‘Moral Authority’ ရှိပါတယ်။  သူရေးတဲ့စာတွေ၊ သူပြောတဲ့ မိန့်ခွန်းတွေကို ထင်ရှားတဲ့ အရှေ့အနောက်ကမ္ဘာ့ခေါင်းဆောင်တွေအပါအဝင် ကမ္ဘာအနှံ့က လူသားအတော်များများဟာ ဂရုတစိုက်ဖတ်ရှု၊ ကြားနာကြသလို သူ့ရဲ့လုပ်ရပ်နဲ့ခံယူချက်သဘာထားတွေကိုလည်း လေးစားအသိအမှတ်ပြု၊ စံနမူနာယူမှုတွေ ရှိပါတယ်။

သူဟာ ရုပ်ရည်ပြေပြစ်ခြင်း၊ ဘာသာစကားကျွမ်းကျင်ခြင်း၊ သိက္ခာ၊ သမာဓိ၊ ပညာပြည့်စုံခြင်း၊ တကိုယ်ရေအားဖြင့် အရည်အချင်းကြွယ်ဝခြင်း၊ ပုဂ္ဂလိကမိသားစုဘဝစွန့်လွှတ်အနစ်နာခံမှုတို့အပြင် လူအများကို သြဇာစူး၊ စွဲဆောင်နိုင်စွမ်းတဲ့ အထုံပါရမီအရည်အသွေးများဖြစ်တဲ့ အလိုအလျောက် မျက်နှာပွင့်လန်း၊ ကျော်စောထင်ရှား အကြီးအမှူးခေါင်းဆောင်နေရာရယူနိုင်ခြင်းဖြစ်စေမှု မွေးရာပါ “Charisma” နဲ့လည်း ပြည့်စုံနေပြန်ပါတယ်။ ဒါ့အပြင် ဒေါ်အောင်ဆန်းစုကြည်ဟာ လူထု အကြွင်းမဲ့အလုံးစုံလေးစားချစ်ခင်မြတ်နိုးရတဲ့ လွတ်လပ်ရေးဖခင်ကြီး ဗိုလ်ချုပ်အောင်ဆန်းရဲ့မျိုးဆက် ဖြစ်နေခြင်းဟာလည်း သူ့ရဲ့သြဇာသက်ရောက်မှုကို အထွဋ်အထိပ် ဖြစ်စေပါတယ်။

ဒီလို နောက်ခံကားချပ်မှာ လူအများအနေနဲ့ သူ့ကို ပုဂ္ဂိုလ်ရေးကိုးကွယ်မှု၊ မဟာလူသားဆန်ဆန် သာမန်ထက်ပိုတဲ့ အလေးထား၊ ဂုဏ်ပြု ဆက်ဆံမှုတွေနဲ့အတူ ဘုရားတဆူ ဂူတလုံးသဖွယ် ပူဇော်ဆည်းကပ်၊ အမြတ်တနိုးထားကာ နတ်ဘုရားဆန်ဆန်ကိုးကွယ်မှု (Divine Worship) တွေလည်းရှိလာပါတယ်။ ဒီလို ပုဂ္ဂိုလ်စွဲကိုးကွယ်မှုချဉ်းကပ်မှုနဲ့ ဝိုင်းဝန်းမှုမှာ အစစ်အမှန်ချစ်ခင်မြတ်နိုး၊ လေးစား တန်ဖိုးထား မှုကြောင့် ကိုးကွယ်နေသူ နောက်လိုက်တွေရှိသလို နိုင်ငံရေးအပြောင်းအလဲနဲ့အတူ ဒေါ်အောင်ဆန်းစုကြည်ရဲ့နဂိုသြဇာအပြင် အာဏာပါ အထိုက်အလျောက်တက်လာမှုကြောင့် သာပေါင်းညာစား ဖော်လံဖားအခွင့်အရေးသမား (Sycophants)တွေလည်း များပြားလာတာ သဘာဝပဲ ဖြစ်ပါတယ်။

လူအများရဲ့ရေချိန်ဟာလည်း ရာစုဝက်ကြာ အာဏာရှင်စနစ်ဆိုးဒဏ်ခံခဲ့ရခြင်းကြောင့် ပညာရည်နိမ့်ကျ၊ လွတ်လပ်စွာ ကိုယ်ပိုင်တွေးခေါ် စဉ်းစားဆင်ခြင်နိုင်မှု အမြော်အမြင်နည်းပါး၊ လွတ်လွတ်လပ်လပ်မေးခွန်းထုတ် ပြန်လည်ဆွေးနွေးမှုနိုင်မှု၊ အမြင်သစ်အတွေးသစ်၊ အလုပ်သစ်ကို ကိုယ်ပိုင်စူးစမ်းရှာဖွေလိုမှုဓလေ့ဆိတ်သုဉ်းခြင်းနဲ့အတူ အလုံးစုံအမိန့်နာခံတတ်မှုဟာ နေရာနဲ့ ကိစ္စတိုင်းလိုလိုမှာ အရည်အသွေး၊ လိုအပ်မှုတခုလိုဖြစ်လာကာ သာမန်ထက် ထူးကဲတဲ့စွမ်းရည်ရှိတဲ့၊ သြဇာရှိတဲ့၊ အာဏာရှိတဲ့ခေါင်းဆောင်ရဲ့စကားကိုသာ တသွေမတိမ်းနာခံလိုစိတ်ဟာ လူအများကြားမှာ ဓလေ့ထုံးတမ်းယဉ်ကျေးမှုတခုလိုအမြစ်တွယ်လို့လာခဲ့ပါတယ်။ မြန်မာဓလေ့ကို ကြည့်ပြန်ရင်လည်း အထက်လူကြီးကို မိဘဆရာနည်းတူ ရိုသေ ကိုးကွယ်ဆည်းကပ်ရလေ့ရှိတာကြောင့် ခေါင်းဆောင်ရဲ့ဆုံးဖြတ်ချက်၊ ရပ်တည်ချက်နဲ့သဘောထားတွေကို ပြန်လည်ဝေဖန်ဆန်းစစ်လိုမှု အင်မတန်နည်းပါးလှပါတယ်။

ဆွေးနွေးခဲ့တဲ့ အခြေအနေအားလုံးဟာ ဒေါ်အောင်ဆန်းစုကြည်အတွက် အကြွင်းမဲ့ နာခံတော်နောက်လိုက် အများအပြားကို မွေးဖွားစေခဲ့ ပါတယ်။ ဒီလို လူပုဂ္ဂိုလ်စွဲကိုးကွယ်ယုံကြည်ထောက်ခံမှုနဲ့ အလုံးစုံအမိန့်နာခံမှုရဲ့သဘောဟာ အကိုးကွယ်ခံပုဂ္ဂိုလ်ရဲ့ ‘Moral Authority’ သြဇာ အားပြည့်နေသမျှ၊ ကျင့်ဝတ်ပိုင်းဆိုင်ရာရပ်တည်ချက်သဘောထား မပြောင်းလဲသမျှ ပြဿနာမ မရှိပါဘူး။  ဒါပေမယ့် (၂ဝ၁၁) နောက်ပိုင်းက စလို့ ပြောင်းလဲလာတဲ့နိုင်ငံရေးလမ်းကြောင်းအရ ပါတီနိုင်ငံရေး၊ ရွေးကောက်ပွဲနဲ့ တိုင်းပြည်မှအရေးပါအရာရောက်တဲ့လူတန်းစားတစု ထောက်ခံမှုကိုပိုမိုအရေးပေးဖို့ အခြေအနေတွေကတောင်းဆိုလို့ လိုအပ်လာတဲ့ ဒေါ်အောင်ဆန်းစုကြည်ဟာ လက်ရှိအချိန်မှာ ‘Moral Authority’ ရှိသူ၊ ဒီမိုကရေစီ၊ လူ့အခွင့်အရေးနဲ့ငြိမ်းချမ်းရေးရဲ့သင်္ကေတပြယုဂ်အနေအထားကနေ ယုတ်လျော့လို့ လာနေပါပြီ။  ဒီသဘောကို စံနှုန်း၊ မူတွေ အလေးပေးလာရာကနေ မူဝါဒ၊ အတွေးအခေါ်၊ စံသတ်မှတ်ချက်တွေထက် လက်တွေ့အလုပ်ဖြစ်ရေးကို ဦးစားပေး စဉ်းစား လုပ်ဆောင်ပြောင်းရတဲ့ပါတီနဲ့အာဏာ နိုင်ငံရေးလမ်းကြောင်းကို စတင်ခဲ့တဲ့ (၂ဝ၁၂)ကတည်းက နိုင်ငံတကာခေါင်းဆောင်တချို့ (ဥပမာ – ဟီလာရီကလင်တန်)၊ ပညာရှင်နဲ့လေ့လာသူတွေ သတိပေးပြောဆိုသုံးသပ်မှုတွေ ရှိခဲ့ပါတယ်။

ဒီအခြေအနေမှာ ဒေါ်အောင်ဆန်းစုကြည်ဟာ နိုင်ငံရေးကစားမှုတွေ၊ နိုင်ငံရေးသဘောအရ အပေးအယူ၊ အလျှော့အတင်းပြုလုပ် ဈေးဆစ်ရ မှုတွေ၊ ဈေးဆစ်ခံရမှုတွေ၊ ငဲ့ကွက်ရမှုတွေ မဖြစ်မနေကြုံလာ၊ လုပ်လာခဲ့ရပါတော့တယ်။  ဒီအနေအထားမှာ နိုင်ငံရေးသမားတယောက်ကို လူပုဂ္ဂိုလ်ဗဟိုပြုထောက်ခံမှုနဲ့ နတ်ဘုရားဆန်ဆန် ချီးပကိုးကွယ်မှုတွေဟာ ကောင်းမွန်ပြည့်စုံတော်တည့်မှန်ကန်တဲ့ အနာဂတ်တိုင်းပြည်နဲ့ နိုင်ငံရေးဓလေ့ဖြစ်ဖို့အတွက် ကြီးမားတဲ့ဟန့်တားမှုအနှောင့်အယှက် ဖြစ်စေပါတယ်။ ဒေါ်အောင်ဆန်းစုကြည်ဟာ တန်ခိုးရှင်မဟုတ်တဲ့ ပုထုဇဉ် လူသားသာဖြစ်တဲ့အတွက် အားသာချက်ရှိသလို အားနည်ချက်လည်း ရှိမှာဖြစ်ပါတယ်။ ဆုံးဖြတ်ချက် မှားအယွင်းနဲ့ မူဝါဒအလွဲတွေလည်း ချမှတ်နိုင်ပါတယ်။ ဒါကြောင့် လူကိုမူတည်ပြီး နိုင်ငံရေးနဲ့ပုဂ္ဂိုလ်ရေးရောထွေးယှက်တင်ဖြစ်ကာ လူနဲ့နိုင်ငံရေးမကွဲရင် နိုင်ငံမှာ အကောင်းထက် အဆိုးဖြစ်ဖို့က ပိုများပါတယ်။

ဖြစ်ပေါ်နေတဲ့နိုင်ငံရေးလားရာကို သုံးသပ်ကြည့်ပြန်ရင်လည်း စစ်အုပ်စုအသိုက်အမြုံတခုလုံးရဲ့အကျိုးစီးပွားကို အကာအကွယ်ပေးရင်းနဲ့ လက်နက်ကိုင် စစ်တပ်နဲ့ရဲကို ကျောထောက်နောက်ခံပြုထားတဲ့လက်ရှိအစိုးရမှာ လုပ်ပိုင်ခွင့်နဲ့အာဏာအပြည့်ရှိပါတယ်။  ဒါပေမယ့် ဒေါ်အောင်ဆန်းစုကြည်လို လူထုနဲ့နိုင်ငံတကာအပေါ်လွှမ်းမိုးနိုင်တဲ့ သြဇာမျိုးတော့မရှိပါဘူး။ ဒါကြောင့် စစ်အုပ်စုအနေနဲ့ သူတို့စိတ်ကြိုက် ဖန်တီးထားတဲ့ နိုင်ငံရေးအရွေ့ကို လူအများနဲ့နိုင်ငံတကာက ပိုမိုထောက်ခံအသိအမှတ်ပြုလာဖို့ရာအတွက် လူထုနဲ့ကမ္ဘာအပေါ် သြဇာ ညောင်းတဲ့ ဒေါ်အောင်ဆန်းစုကြည်ရဲ့ပူးပေါင်းမှုကို အလိုရှိပါတယ်။ ဒေါ်အောင်ဆန်းစုကြည်ဘက်ကလည်း ရွေးချယ်လိုက်တဲ့ နိုင်ငံရေး လမ်းကြောင်းအပေါ်မူတည်ပြီး အစိုးရနဲ့ပူးပေါင်းဆောင်ရွက်မှု လုပ်ခဲ့ရပါတယ်။

ဒီအနေအထားမှာ ဒေါ်အောင်ဆန်းစုကြည်ဟာ သြဇာပိုင်အဖြစ်ကနေ အာဏာရှိသူနဲ့ အခြေအနေအရပူးပေါင်းနေရတဲ့အတွက် အာဏာပိုင်အဖြစ်ကို ကူးပြောင်းသွားခဲ့ပါတယ်။ လက်ရှိ အာဏာရအစိုးရရဲ့လွှတ်တော်မှာလည်း လွှတ်တော်အမတ်နေရာအပြင် အခြား ရာထူးနဲ့တာဝန်တွေကိုပါ ပူးတွဲတာဝန်ယူလုပ်ဆောင်နေရတဲ့အတွက် သူဟာ အတိုက်အခံပါတီရဲ့ခေါင်းဆောင်၊ လူထုခေါင်းဆောင် အနေအထားထက် အာဏာရအစိုးရရဲ့တစိတ်တပိုင်းအဖြစ် ပိုမိုရှုမြင်နိုင်စရာ ဖြစ်လာခဲ့ပါတယ်။ ဒါဟာ ဒေါ်အောင်ဆန်းစုကြည်ကို ဟိုအရင် အစဉ်တစိုက်ထောက်ခံလာခဲ့တဲ့နောက်လိုက်တွေထဲက လူပုဂ္ဂိုလ်စွဲကိုးကွယ်သူတွေကလွဲလို့ မူဝါဒလုပ်ရပ်ကိုသာသုံးသပ်လေ့လာပြီး ထောက်ခံခဲ့တဲ့ ကျန်လူအများကြားမှာ သူ့ရဲ့ရပ်တည်မှုအပေါ် ပြန်လည်မေးခွန်းထုတ်မှုနဲ့ ဝေဖန်ပိုင်းခြားမှုတွေတိုးလာခဲ့ပါတယ်။

(၂ဝ၁၁)အစိုးရသစ်နောက်ပိုင်း အလုပ်သမား၊ လယ်သမား၊ တိုင်းရင်းသား၊ ပြည်တွင်းစစ်ကနေ အခုနောက်ဆုံး ကျောင်းသားအရေးထိမှာ တရားမဲ့မှုအစုစုအတွက် ဒေါ်အောင်ဆန်းစုကြည်ဟာ တည်ရှိပြီး သူ့ရဲ့သြဇာ အသံကို အပြည့်အဝအသုံးမချခဲ့တာဟာ ဘာပယောဂအစွဲ တိမ်သလ္လာမဖုံးရင် ထင်ထင်ရှားရှားမြင်နိုင်တဲ့အချက်ဖြစ်ပါတယ်။ အခုနောက်ဆုံး ကျောင်းသားအရေးမှာဆိုရင် အကြမ်းဖက်မခံရဖို့ ဒေါ်အောင်ဆန်းစုကြည် တင်ကြိုကာကွယ် ကြားကဝင်ရပ်ခွင့်အခြေအနေ၊ အချိန် အများကြီးရခဲ့ပါတယ်။ ဒါပေမယ့် လိုအပ်တဲ့ကာကွယ်မှု မပေးခဲ့ပါဘူး။ အခု ‘စုံစမ်းရေးကော်မရှင်တွေက အလုပ်မဖြစ်ဘူး၊ လွှတ်တော်က ဘာအာဏာမှရှိတာမဟုတ်ဘူး’ဆိုပြီး ခေါင်းလွှဲစကားဆိုနေ ပေမယ့် လက်ပံတောင်းကိစ္စမှာဆိုရင် ကိုယ်တိုင်ကော်မရှင်ထဲမှာပါခဲ့သလို စစ်အုပ်စုရဲ့အကျိုးစီးပွားဘက်က ရပ်ခဲ့ပါတယ်။ လွှတ်တော်က အာဏာမရှိဘူး အခု ဆိုပေမယ့် ဒီလမ်းကို ကိုယ်တိုင်တာဝန်ခံလျှောက်ခဲ့တာပါပဲ။ လွှတ်တော်အတွင်းမှာ လုပ်ပိုင်ခွင့်မရရင်၊ လူထုထောက်ခံမှု သြဇာကိုအသုံးချ လွှတ်တော်ပြင်ပမှာ လုပ်ပိုင်ခွင့်ကိုဘောင်ချဲ့ယူရမှာ ခေါင်းဆောင်ရဲ့တာဝန်သာဖြစ်ပါတယ်။ ဒါတွေ ပျက်ကွက်ခဲ့ခြင်းဟာ ဒေါ်အောင်ဆန်းစုကြည်ရဲ့ ‘Moral Authority’ ကိုကျဆင်းညှိုးနွမ်းစေတဲ့ပုံရိပ်တွေပါပဲ။

ဒေါ်အောင်ဆန်းစုကြည်ကို အကြွင်းမဲ့ချစ်ခင်လေးစားယုံကြည်သူများပြန်ဆိုလေ့ရှိတဲ့ ဘုံရန်သူစစ်အုပ်စုကို အရင်တိုက်ပါ၊ ဒေါ်အောင်ဆန်း စုကြည်ရဲ့ ခေါင်းဆောင်မှုအောက်မှာညီညွတ်ကြပါဆိုတဲ့သဘောတွေဟာ တကယ်တော့ ပြဿနာရင်းမြစ်ကိုမဖြေရှင်းနိုင်ပါ။ လူထုရဲ့ ဘုံရန်သူထဲ ကိုယ့်ခေါင်းဆောင် ဝင်မရပ်မိအောင် နောက်လိုက်ကဝေဖန်မှ ဒီမိုကရေစီနည်းကျ ခေါင်းဆောင်-နောက်လိုက်ပုံစံဖြစ်မှာပါ။  ဘုံရန်သူဆိုတာ လက်ရှိစစ်တပ်၊ ဗိုလ်မင်းအောင်လှိုင်၊ ကြံ့ခိုင်ရေးအစိုးရ၊ ဦးသိန်းစိန်၊ လွှတ်တော်၊ ဦးရွှေမန်း၊ နောက်ကွယ်က ဗိုလ်သန်ရွှေ၊ သူတို့အားလုံးကိုအကာအကွယ်ပေးနေတဲ့(၂ဝဝ၈)စစ်ဖွဲ့စည်းပုံဆိုပြီး သီးသန့်ခွဲခြားမြင်လို့မရသလို၊ ပုဂ္ဂကသဘောလည်း မဆောင်ပါ။ စစ်အုပ်စု နှစ်ငါးဆယ်ကျော်တည်ဆောက်ယူ အသားကျစေခဲ့တဲ့ လူနဲ့လူချင်း ချနင်းအသုံးချ၊ ဖိနှိပ်သွေးစုပ်မင်းမူတဲ့ ပဒေသရာဇ်နဲ့အရင်းရှင်စနစ်ဆိုး (၂) ခုပေါင်း အကျင့်လုပ်ထုံးကိုမှ စစ်တပ်ဆိုတဲ့အာဏာဒေါက်တိုင်ယူ လက်နက်အားကိုးဘုရင်လုပ်ချင်တဲ့အုပ်စိုးသူ၊ အုပ်စိုးခံ၊ ဖိနှိပ်သူ၊ အဖိနှိပ်ခံ စနစ်ကြီးတခုလုံးကို မျက်မှောက်ရှုနိုင်ရပါမယ်။ ဒီလိုမြင်နိုင်ရင် ဓမ္မနဲ့အဓမ္မ၊ တရားမှုနဲ့တရားမဲ့မှုတိုက်ပွဲတွေမှာ မူဝါဒကိုအခြေခံခိုင်ခိုင်မာမာရပ်၊ အသံကျယ်ကျယ်လောင်လောင်ထွက်ဖို့ ဘယ်လောက်အရေးကြီးတယ်ဆိုတာ သိလာပါမယ်။

အခု ဒေါ်အောင်ဆန်းစုကြည်ရဲ့အနေအထား “စံနှုန်း၊ သတ်မှတ်ချက်နဲ့ မူ” အပေါ် အလျှော့အတင်း၊ အပေးအယူလုပ်ရတဲ့ နိုင်ငံရေးသမားဘဝ ကို အခြေအနေအတိုင်းအတာတခုအထိ နားလည်လက်ခံပေးနိုင်စရာလည်း ရှိပါတယ်။ ဒါပေမယ့် မူဝါဒနဲ့ စံနှုန်းသတ်မှတ်ချက် ခိုင်ခိုင် မာမာမရှိတဲ့နိုင်ငံရေးလမ်းစဉ်ဟာ အကျိုးကျေးဇူးမများနိုင်ပါ။ ဂန္ဒီကြီးရဲ့ လှုမှုအပြစ်(၇)ပါးအရ ဆိုရင်လည်း ဒါဟာ လူ့အဖွဲ့အစည်းအတွက် ကြီးမားတဲ့အန္တရာယ်ဖြစ်စေတဲ့အပြစ် ဖြစ်ပါတယ်။ စစ်အုပ်စုရဲ့အကျိုးစီးပွားအတွက် အာဏာရေရှည်တည်တံ့ခိုင်မြဲရေးကိုရှေးရှုကာ စိတ်ကြိုက် ဖန်တီးထားတဲ့ မျက်မှောက်နဲ့အနာဂတ်နိုင်ငံရေးလမ်းခရီးမှာ အမျိုးမျိုးသောလှည့်ကွက်တွေ၊ ထောင်ခြောက်တွေ၊ ခါးအောက်ပိုင်းလက်သီးပုန်း ထိုးကွက်တွေနဲ့ ပြည့်နှက်နေပါတယ်။ ခေါင်းဆောင်ရဲ့သဘော၊ ဆန္ဒ၊ ဆုံးဖြတ်ချက်တခုတည်းနဲ့ အနာဂတ်ဒီမိုကရေစီအရေးဟာ ပြည့်စုံ ကောင်းမွန်သန်စွမ်းတဲ့အနေအထားမျိုး ဘယ်လိုမှ ဖြစ်မလာနိုင်ပါ။  ဒါကြောင့် ခေါင်းဆောင်ရဲ့ဆုံးဖြတ်ချက်ကို ပြန်လည်မေးခွန်းထုတ်တတ်၊ ဝေဖန်သုံးသပ်တတ်တဲ့နိုင်ငံရေးဓလေ့ လိုနေပါတယ်။

နိဂုံးချုပ်ရရင် စိတ်ကူးယဉ်၊ လက်တွေ့မကျဘူးပဲဆိုဆို ပြစ်မျိုးမထင်၊ မူဝါဒ၊ ကျင့်ဝတ်ခိုင်မာ၊ “Moral Authority”အပြည့်ရှိတဲ့ လူထု ခေါင်းဆောင် ဒေါ်အောင်ဆန်းစုကြည်ကိုပဲ မြင်ချင်ပါတယ်။ တည်ရှိပြီးသြဇာကိုအသုံးချ မတရားမှုတွေကို အခုထက်ပို အကာအကွယ်ပေးဖို့ မျှော်လင့်ပါတယ်။ နိုင်ငံရေးအခင်းအကျင်းဟာ ဆိုခဲ့သလို အလုံးစုံမဖြစ်နိုင်ဘူးဆိုရင်တောင် အနည်းဆုံး နိုင်ငံရေးမှာ လူစွဲကင်း၊ ပုဂ္ဂိုလ်ရေး ကိုးကွယ်မှုကင်း၊ ဘက်ပေါင်းစုံကအမြင်ပေါင်းစုံနဲ့ လူတိုင်းအသံကျယ်ကျယ်ထွက်၊ ခေါင်းဆောင်အပေါ် အကျိုး/အကြောင်းထောက်ပြ၊ ခေါင်းဆောင်ကလည်းလက်ခံစဉ်းစားသုံးသပ်တဲ့ နိုင်ငံရေးအလေ့အကျင့်ကောင်း၊ ဓလေ့ကောင်းတွေ ရှင်သန်ထွန်းကား၊ အမြစ်တွယ် စေချင်ပါတယ်။ ဝေဖန်ပိုင်းခြား၊ ကျိုးကြောင်းဆင်ခြင်သုံးသပ်မှု “ဝိဘဇ္ဇ”သဘောဟာ ဘာသာတရားရဲ့အဆုံးအမနဲ့လည်း ညီပါတယ်။ 

(၂ဝ၁၅) ‘ပြီး’ လည်း တိုင်းပြည်ရဲ့ဒီမိုကရေစီအရေးက ‘ပြီး’မှာ မဟုတ်သေးတဲ့အတွက် အားလုံး မြော်မြင်ချင့်ချိန် အသံတွေ ထွက်စေချင် ကြောင်းပါ ခင်ဗျား။

ငြိမ်းချမ်းအေး
မတ် ၁၉၊ ၂ဝ၁၅ (အသစ် တည်းဖြတ်ရေးသားခဲ့သည့်ရက်စွဲ)

(၂ဝ၁၃) ခုနှစ် မတ်လ(၂၁)ရက် မိုးမခတွင် ရေးခဲ့သည့် “‘Moral Authority’၊ ဒေါ်အောင်ဆန်းစုကြည်နှင့်ဗမာ့နိုင်ငံရေး” ဆောင်းပါးဟောင်းကို အခြေခံ၍ အသစ်ပြင်ဆင်တည်းဖြတ်ရေးထားခြင်း ဖြစ်သည်။ သည်လေဒီးစ်သတင်းဂျာနယ်၊ အတွဲ(၂)၊ အမှတ်စဉ်(၅၆)၊ (၂ဝ၁၅) ခုနှစ် မတ်လ(၂ဝ) ရက်နေ့ သောကြာနေ့ထုတ်၌ ပုံနှိပ်ခဲ့သည်။ ယခု မိုးမခတွင်လည်း အွန်လိုင်း ထပ်မံဖြန့်ချိသည်။ ဆောင်းပါးပါ အာဘော်ကို ဝေဖန်ရန် လွတ်လပ်စွာမှတ်ချက်ပြုနိုင်ပါသည်၊ nyeinchanaye81@gmail.com သို့လည်း စာရေးနိုင်ပါသည်။