အင်း ဟုတ်တော့လည်း ဟုတ်သား။ ဓနရှင်ဒီမိုကရေစီမှာ ဓနရှင်လူတန်းစား အကျိုးစီးပွားအတွက်အလုပ်လုပ်ရမယ့် နိုင်ငံရေးပါတီဆိုတာ ဓနရှင်အထောက်အပံ့မယူလို့ ဘယ်သူ့ဆီက ယူရမလဲ။ ပြည်သူတွေကလည်း ဆင်းရဲမွဲတေပါသဘိနဲ့။ ဒီကြားထဲ ပါတီဝင်တွေကလည်း ပါတီဝင်လစဉ်ကြေး မှန်မှန်မပေး၊ စာစောင်ထုတ် ရန်ပုံငွေလေးဘာလေးရှာမလားမှတ်တယ်၊ အချင်းချင်းပြန် ဖျံကျ လက်တလုံးခြားလုပ်ရတာနဲ့။ ဒေါ်စုခမျာတော့ သူ့နံမည်နဲ့ ဆုနဲ့တွဲပြီးရတဲ့ငွေမှန်သမျှ ပါတီအတွက် ဖေါင်ဒေးရှင်းအတွက် ပညာရေးအတွက် ကျန်းမာရေးအတွက် ပါတီစည်းရုံးရေးတွေအတွက် အကုန်ထုတ်သုံးနေတယ်ကြားတာပါပဲ။ တပြားမှ သူ့ကိုယ်ကျိုးအတွက် သုံးပလိုက်တယ်လို့တော့ မကြားမိသေးဘူး။
နောက်ပြီး စဉ်းစားရမှာက ဒေါ်စုကိုယ်တိုင် ခင်ရွှေ့မဲဝယ်တာနဲ့ပတ်သက်ပြီး ဗြောင်ကျကျပြောထားတာလည်းရှိတယ် “ပေးရင် ပေးသမျှ အကုန် ယူသာယူ၊ မဲထည့်ရင်သာ ကျမတို့ကိုထည့်”ဆိုပြီး။ ခေတ်စကားနဲ့ဆို သဘောကတော့ “စားပြီး နားမလည်”လုပ်ကြဆိုတဲ့အနက်ပဲ။ ပြဿနာက ခရိုနီပြောပြော ခေတ်ပျက်သူဌေးဆိုဆို ကော်ဇောအိပ်သမားယိုးယိုး အမြီးစားဘက်ခေါင်းစားဘက် စွပ်စွဲစွပ်စွဲ အဲ့သလို လူလည်လူနပ်တွေကို စားပြီးနားမလည်လုပ်လို့ရ/မရပဲ။ သာမန်မဲဆန္ဒရှင်အနေနဲ့ကတော့ ဟုတ်တာပေါ့။ ပေးတာယူပြီး မဲကြ ကိုယ်ထည့်ချင်သူ ထည့်လို့ရတာပဲ။ ဗြောင်လုပ်ရတာမှ မဟုတ်တာ။ နောက်ပြီး ပေးတဲ့လူကလည်း စီးပွားပျက်လောက်အောင် ဒါမှမဟုတ် စီးပွားကြီးတက်လောက်အောင်တော့လည်း မပေးမကျွေးပါဘူး။ အာဏာနဲ့တွဲပြီး စီးပွားဥစ္စာရှာတယ်ဆိုတာ သူတော်ကောင်းတရားပွားများပြီး နိဗ္ဗာန်ရောက်ကြောင်း ကျင့်နေတာမှ မဟုတ်တာ။
နိုင်ငံရေးကြတော့ လူတန်းစားရှိတယ်။ လူတန်းစားအကျိုးစီးပွားရှိတယ်။ ချည်နှောင်မှုရှိတယ်။ ပါတီတခုရဲ့ မူဆိုတာ ဘယ်လူတန်းစားအကျိုးစီးပွားအတွက်လုပ်မှာလဲဆိုတဲ့အထိုင်ပေါ်ကနေမှ ချရတာ။ သမန်မဲဆန္ဒရှင်လို ဒန်ပေါက်ထုတ်နဲ့ရေသန့်ပုလင်းယူပြီး မဲရုံထဲရောက်မှ လုပ်ချင်ရာလုပ်လို့မရဘူး။ ပေးသူက ပေးကတည်းက ချည်ပြီးတုတ်ပြီးပေးတာပဲ။ ကိုယ်ပေးထားရက်နဲ့ ကိုယ့်အတွက်ကျန်အောင်လုပ်မပေးရင် ဂွင်ချမပေးရင် ပြန်ကိုင်လို့ရမယ့်ဇယား တခါတည်း အပြီးဆွဲပြီးသားပါ။ နှောင်ကြိုး ဘယ်သောအခါမှ မမဲ့ပါ။ ဓနရှင်နိုင်ငံတွေက အဝယ်ခံထားတဲ့ အရောင်းအဝယ်ဖြစ်ပြီးသား နိုင်ငံရေးပါတီနဲ့နိုင်ငံရေးသမားရဲ့ နိုင်ငံရေးဘဝတွေကို ရစရာမရှိအောင် ဖျက်ဆီးနိုင်စွမ်းဟာ တကယ်တော့ ပြည်သူတွေလက်ထဲမှာ မဟုတ်ပါ။ ဓနရှင်တွေက ကိုင်ထားတာပါ။
အင်န်အယ်လ်ဒီနဲ့ ခရိုနီတချို့ ပလဲနံပသင့်နေတာတော့ ကြာပါပြီ။ ဒါပေမယ့် ခုချိန်ထိတော့ အင်န်အယ်လ်ဒီနဲ့ ဒေါ်စုမှာ ရန်ပုံငွေလိုအပ်မှုအတွက်၊ စစ်အုပ်စုမျက်နှာသာပေးနိုးနိုးအတွက် ခရိုနီတွေကို ဝင်ပလူးရတာထက်ပိုတဲ့ ပြောစရာဆိုစရာ ဘာမှတော့မရှိသေးပါ။ ဟိုလူတွေဘက်ကလည်း ရင်းစားဘာမှတော့ ပြန်မရကြသေးပါဘူး။ ဒါကလည်း အာဏာရပါတီ အစိုးဖြစ်နေတဲ့ပါတီ မဟုတ်သေးလို့လည်း ဖြစ်နိုင်ပါတယ်။ သဘောကတော့ လုပ်ပိုင်ခွင့်မရှိသေးသလို လုပ်စားပိုင်ခွင့်လည်း ဘယ်သူ့မှ ပေးမရသေးတဲ့အနေအထားမို့လို့ လို့ တွေးလည်းဖြစ်တာပါပဲ။
အင်းကြည့်တော့ကြည့်ရမှာပါပဲ။ ဒေါ်စုကလည်း ပြောထားတယ် “သန့်ရှင်းသောအစိုးရ လဘ်ပေးလဘ်ယူ နည်းနိုင်သမျှနည်းတဲ့အစိုးရ”မျိုး ဖြစ်ရမယ်ဆိုပြီး။
ပြောမယ့်သာပြောတာပါ။ သိန်းစိန်က စကားလုံးပိုတောင်ပြောင်သေး။ သူ့နဖူးလိုပဲ ”သန့်ရှင်းသောအစိုးရ၊ ပွင့်လင်းမြင်သာသော အစိုးရ၊ လဘ်ပေးလဘ်ယူတိုက်ဖျက်ရေး၊ ဆင်းရဲသားပပျောက်ရေး”တွေဘာတွေရော စုံနေတာပဲ။ လက်တွေ့မှာကြတော့ ဘာတွေဖြစ်နေမှန်း လူတိုင်းအသိပဲဟာ။
မျိုးမြင့်ချို ဒီဇင်ဘာ ၁၆၊ ၂ဝ၁၅
0 comments:
Post a Comment