လေထီးဗိုလ်အုန်းမောင်
လေထီးဗိုလ်အုန်းမောင်မှာ ထောင်သက်ရှည်ရုံမက ကျွန်းလည်း နှစ်ကျွန်း သုံးကျွန်းပြန်ဖြစ်ကာ နောက်ဆုံးမှ ထောင်ကလွတ်လာသူ ဖြစ်ပါသည်။ သူထောင်ကလွတ်လာတော့ ကျွန်တော်တို့တတွေ ဘာနိုင်ငံရေးလှုပ်ရှားမှုမှ လုပ်၍မရတော့ပါ။ တခါတခါ ကျွန်တော့်အိမ်တွင် ဆုံတတ်ကြပြီး ရှေးဟောင်းနှောင်းဖြစ်များသာ ပြောဖြစ်ကြပါသည်။
သူ့ဇနီးလည်း အတော် တော်သည့်အမျိုးသမီး ဖြစ်သည်။ ကိုအုန်းမောင်မှာ ထောင်ကလွတ်လာပြီးလည်း ဘာမှမလုပ်ဘဲ ဇနီးက ဈေးရောင်း ကျွေးတာပဲရှိသည်။ သူတို့တွင် သမီးလေးတယောက်လည်း ရှိပါသည်။
ကိုအုန်းမောင်မှာ အလွန်သဘောသကာယကောင်းပြီး၊ စိတ်နှလုံးနှိမ့်ချသူဖြစ်ကာ စကားလည်း များများမပြောတတ်ပါ။ ကျွန်တော်သည် ၁၉၇၃-၇၄ ခုနှစ်လောက်က သူ့အား ကျွန်တော့်အတွက် ကွန်မြူနစ်ပါတီနှင့်ဆက်ပေးရန်ပြောဆိုရာ သူက ကြိုးစားပေးမည်ဆိုပြီး အထက်ဗမာပြည် တက်သွားပါတော့သည်။ တလကျော်ကျော်အကြာတွင်မှပြန်ရောက်လာပြီး ဘယ်လိုမှ အဆက်မရဟုဆိုလာသဖြင့် ကျွန်တော်လက်လျှော့လိုက်ရပါသည်။
ကျွန်တော် ပါတီထဲရောက်မှသိရသည်မှာ ထိုကာလက ပဲခူးရိုးမ ပြုတ်သွားပြီဖြစ်သဖြင့် ပါတီ၏မြေအောက်လုပ်ငန်းကို အရှေ့မြောက်ဒေသက စုစည်းလိုက်ပြီး အသစ်ပြန်ဖွဲ့စည်းပြုပြင်နေရာ လူဟောင်းများကို ဘယ်သူ့ကိုမှ မဆက်သွယ်တော့ဘဲ လူသစ်များနှင့်သာ စတင်လှုပ်ရှား နေသဖြင့် ကိုအုန်းမောင်အနေနှင့် ဘယ်လိုမှအဆက်ရှာမရဖြစ်ဟန် ရှိပါသည်။
ကျွန်တော် သူ့အကြောင်းရေးနေစဉ်မှာပင် သူရေးခဲ့သည့် “အနှစ် ၅ဝ ကြာပြီးသောအခါ”ဆောင်းပါးများကိုစုစည်း၍ စာအုပ်ထုတ်မည့် သူများက ကျွန်တော့်အားအမှာစာရေးခိုင်းရာ ကျွန်တော်ရေးပေးရသဖြင့် ဤနေရာတွင် ကိုအုန်းမောင်ကိုဂုဏ်ပြုသောအားဖြင့် ထိုအမှာစာကို ထည့်သွင်း ဖော်ပြလိုက်ပါသည်။
ဗိုလ်မှူးချုပ်ဟောင်းကျော်ဇော၏ အမှာစာ
ကျွန်တော်တို့ ဗမာပြည်လွတ်လပ်ရေး ကြိုးပမ်းမှုတိုက်ပွဲစဉ်အတွင်း နိုင်ငံခြားသို့ထွက်၍ အကူအညီရှာဖွေသည့်လူငယ်အုပ်စု နှစ်စု ရှိခဲ့ပါ သည်။ တစုကတော့ အရှေ့ဘက်ထွက်ပြီး၊ တစုကတော့ အနောက်ဘက် ထွက်ခဲ့ကြပါသည်။ အမိဗမာပြည်ကြီး လွတ်လပ်ရေးရရန်ဆိုသော တခုတည်းသောရည်မှန်းချက်အောက်တွင် လှုပ်ရှားခဲ့ကြခြင်း ဖြစ်ပါသည်။
အရှေ့ဘက် ထွက်ကြသူများသည် ဂျပန်သို့ရောက်ရှိပြီး ဗိုလ်ချုပ်အောင်ဆန်းဦးဆောင်သော ရဲဘော်သုံးကျိပ်ဝင်များဖြစ်လာကာ၊ အနောက်ဘက်ထွက်ကြသူများကတော့ အိန္ဒိယသို့ရောက်ပြီး ဦးသိန်းဖေမြင့်ဦးစီးသည့် လေထီးဆင်းရဲဘော်များ ဖြစ်လာကြပါတော့သည်။
ဤနည်းဖြင့် ကျွန်တော်သည် ရဲဘော်သုံးကျိပ်ဝင်ဗိုလ်ကျော်ဇောဖြစ်လာပြီး၊ သူကတော့ လေထီးဗိုလ်အုန်းမောင် ဖြစ်လာပါတော့သည်။
ကျွန်တော်တို့သည် ခေတ်ပြိုင်နိုင်ငံရေးသမား၊ တော်လှန်ရေးသမားများဖြစ်ခဲ့ကြပြီး ၂ဝ ရာစု နောက်ဆုံးပိုင်းကာလများ၏ မျိုးဆက်ရဲဘော် ရဲဘက်၊ တိုက်ဖော်တိုက်ဖက်များအဖြစ် တာဝန်အသီးသီးထမ်းဆောင်ခဲ့ကြပြီး ထိုမျိုးဆက်များ၏ သမိုင်းပေးတာဝန်ဖြစ်သော ကိုလိုနီ ဗမာနိုင်ငံကို လွတ်လပ်သည့်ဗမာနိုင်ငံအဖြစ် ပြောင်းလဲပေးနိုင်ခဲ့ကြပေသည်။ ကျွန်တော်သည် ကျွန်တော့်ဘဝအတွက် ဤသမိုင်းပေး တာဝန်ကြီးကို ထမ်းဆောင်ခွင့်ရခဲ့ခြင်းအပေါ် အကျေနပ်ဆုံးဖြစ်ရသလို၊ ရဲဘော်ကြီးဗိုလ်အုန်းမောင်အတွက်လည်း အလားတူ ကျေနပ်စရာ နှစ်သိမ့်စရာ ဖြစ်ပေလိမ့်မည်ဟုထင်ပါသည်။ ထို့ကြောင့်ပင် သူက “ကျွန်တော် ဖြတ်သန်းခဲ့ရတဲ့ဘဝအတွက် ကျွန်တော်ဂုဏ်ယူပါတယ်” ဟူသောစကားကို ပြောခဲ့ခြင်းဖြစ်ဟန်တူပါသည်။
ကျွန်တော်တို့သည် အမိနိုင်ငံကြီးကို နိုင်ငံရေးအရလွတ်လပ်သည့်နိုင်ငံအဖြစ် ပြောင်းလဲနိုင်ခဲ့သော်လည်း ခေတ်မီတိုးတက်ဖွံ့ဖြိုးသော ခေတ်သစ်ဗမာပြည် ထူထောင်ရေးလုပ်ငန်းများကိုတော့ အောင်မြင်အောင် မလုပ်နိုင်ခဲ့ပါ။
ကျွန်တော်တို့ မျိုးဆက်ဟောင်းများ၏ ဤမပြီးဆုံးသေးသောသမိုင်းတာဝန်များကို ၂၁ ရာစုသစ်မှ မျိုးဆက်သစ်လူငယ်များက ပြီးစီးအောင် ဆက်လက်ထမ်းဆောင် လုပ်ကိုင်ပေလိမ့်မည်။
လူသားများသည် မိမိရှေ့မျိုးဆက်ဟောင်း၏ပခုံးထက်မှနေ၍ လူသားတာဝန်များကိုထမ်းဆောင်ရသဖြင့် ထိုရှေ့မျိုးဆက်ဟောင်းများထက် သာအောင် လုပ်ကိုင်ဆောင်ရွက်နိုင်ရမည်။ ထို့ပြင် နောင်လာနောက်သား မျိုးဆက်သစ်များ မိမိတို့ထက်သာအောင်လည်း အတတ်နိုင်ဆုံး ကူညီထောက်ပံ့ပေးခဲ့ရပေမည်။ သို့မှသာ လူသားတယောက်၏တာဝန် ကျေပွန်သည်ဟု ဆိုနိုင်ပေမည်။
ရဲဘော်ကြီး ဗိုလ်အုန်းမောင်၏ “အနှစ် ၅ဝ ကြာပြီးသောအခါ”သည်၊ နောင်မျိုးဆက်သစ်လူငယ်များအား စိတ်ဓာတ်ခွန်အားဖြည့်တင်းပေးရာ သင်ခန်းစာများယူစရာ သမိုင်းအတွေ့အကြုံ၊ အဖြစ်အပျက်များကို သူပါဝင်ခဲ့သည့်အခန်းက ပြည့်စုံစွာရေးသားဖော်ပြထားသဖြင့် သူ မကွယ်လွန်မီပြောခဲ့သည်ဆိုသည့် “ခင်ဗျားတို့နှင့်အတူ ကျွန်တော်ရှိနေဦးမှာပါ”ဆိုသည့်စကား၏အဓိပ္ပာယ်ကို အပြည့်အဝဆုံး အလေးနက်ဆုံး ဖော်ထုတ်ပြသနေပေသည်ဟု ကျွန်တော်ထင်မြင်နေမိပါသည်။ ထိုစကားစုသည် သူ၏စိတ်ဓာတ်ကြံ့ခိုင်မှု၊ ဇွဲနပဲကြီးမှု၊ ဗမာပြည်ကြီး ခေတ်မီ တိုးတက်သောနိုင်ငံ မဖြစ်နိုင်သေးခြင်းအပေါ် တာဝန်မကျေလေခြင်းဟု အားမလိုအားမရဖြစ်နေမှုတို့ကို ဖော်ပြနေပြီး၊ နောင်မျိုးဆက်သစ် အတွက်တော့ အလွန်ထိရောက်သည့် အားပေးဝိုင်းရံထောက်ခံသွားသည့်စကားစုလည်း ဖြစ်ပေတော့သည်။
ရဲဘော်ကြီးဗိုလ်အုန်းမောင်ကား တမျိုးသားလုံးအတွက် သူ့တာဝန်သူ့အခန်းကို ဘဝတလျှောက်လုံး ကျေပွန်စွာထမ်းဆောင်သွားသည့် ဗမာပြည်ကြီး၏ ဂုဏ်ယူဖွယ်သားကောင်းတယောက် ဖြစ်ပါသည်။
ရဲဘော်ကြီး ဗိုလ်အုန်းမောင်၏ “ကိုယ်ကျိုးမဖက်၊ ရိုးရိုးကုပ်ကုပ်နေထိုင်၊ သတ္တိရှိရှိလုပ်ကိုင်သည့် စိတ်ဓာတ်”ထာဝစဉ် အဓွန့်ရှည်ပါစေ။
သွားနှင့်ပြီဖြစ်ကြသော ရဲဘော်ကြီးတို့အားလုံးကို သတိရလွမ်းဆွတ်လျှက်။
ကျော်ဇော
(ဗိုလ်ကျော်ဇော)
၁၆-၃-ဝ၇
0 comments:
Post a Comment