အခြေခံရမယ့်မူ (၁ဝ၄)ချက်ဆိုတာ ၂ဝဝ၈ ဖွဲ့စည်းပုံရဲ့ ဝိဉာဉ်ကိုချုပ်ထားတဲ့ ပင်စည်ပင်မ အသက်သွေးကြောတွေဖြစ်တယ်။ ဒါတွေကိုပြင်မယ်ဆိုရင် ၄၃၆ မှာပြောထားတဲ့အတိုင်း
(တစ်)လွှတ်တော်တွင်း အဆိုတင်သွင်းရင် အမတ် ၂ဝ ရာခိုင်နှုန်းက သဘောတူမှ လွှတ်တော်က အဲ့ဒီဆိုကို စဉ်းစားမယ်။
(နှစ်) အဲ့ဒီလက်ခံပြီးသားအဆိုကို မဲခွဲဆုံးဖြတ်ရင် လွှတ်တော်အမတ် စုစုပေါင်းရဲ့ ၇၅ ရာခိုင်နှုန်းအထက် ထောက်ခံရမယ်။ ဥပဒေမဖြစ်သေးဘူး။
(သုံး) အဲ့ဒီ ထောက်ခံပြီးသားကို ဥပဒေဖြစ်အောင် ပြည်လုံးကျွတ်လူထုဆန္ဒခံယူပွဲလုပ်ရမယ်။
(လေး) အဲ့ ဆန္ဒခံယူပွဲမှာ မဲပေးနိုင်သူစုစုပေါင်းရဲ့ ၅ဝ ရာခိုင်နှုန်းကျော်ကထောက်ခံရမယ်လို့ ဆိုတယ်။ အဲ့နောက်မှ သမ္မတလက်မှတ်ထိုးတာတို့ဘာတို့လာမှာ။ သမ္မတလက်မှတ်ထိုးပြီးမှ ဥပဒေအတည်ဖြစ် အသက်ဝင်မှာ။
ဒါ ကျနော်လို ဥပဒေသမားမဟုတ် လူသာမန်တဦးရဲ့နားလည်ချက်ပါ။
ဒီတော့ အဆိုတင်တာလည်း ၂ဝ ရာခိုင်နှုန်းသဘောတူတယ်ပဲထား။ လွှတ်တော်တွင်းမဲခွဲတော့လည်း ကြံ့ဖွံ့အပါအဝင် ရှိသမျှပါတီတွေက အမတ်မင်းပေါင်းစုံထောက်ခံတဲ့အပြင် စစ်ဗိုလ်တယောက်က ယောင်ယက်ပြီး ထောက်ခံခလုပ် နှိပ်မိလိုက်တယ်ပဲထား။ လူထုဆန္ဒခံယူပွဲကြ ပွဲကပြတ်ပြီ။
ဗမာပြည်မှာ လူဦးရေ တစ်ရာရှိတယ်ထား။ အဲ့ဒီတရာလုံး ဗမာပြည်ထဲမှာပဲနေကြတယ်ပဲထား။ အဲ့ဒီတရာထဲမှာ မဲပေးပိုင်သူက သုံးဆယ်ရှိတယ်ပဲထား၊ အဲ့ဒီ သုံးဆယ်လုံး မဖြစ်မနေ မဲလာပေးရမယ်။
နှစ်ဆယ့်ကိုးယောက်လာပေးရုံနဲ့ ဆန္ဒခံယူပွဲအထမမြောက်ဘူး။ ဘာလို့ဆိုတော့ မဲပေးပိုင်သူစုစုပေါင်းရဲ့ ထက်ဝက်ကျော်ထောက်ခံမဲ လိုတာကိုး။ ၂၉ ယောက်ဆိုကတည်းက တယောက်လျော့ပြီ။ ပဲပေးပိုင်သူအားလုံးဆိုတဲ့သဘော မဟုတ်တော့ဘူး။
ကဲပါ ထားပါ။ လူ သုံးဆယ်လုံးတော့ မဲလာပေးပါရဲ့ ထောက်ခံ ၁၅ ကန့်ကွက် ၁၅ ဆိုလည်း ကွိုင်ကရှိပြီ။ ထောက်ခံက ၅ဝ ရာခိုင်နှုန်းပဲရှိတာကိုး။
ဟိုးအပေါ်ကနေ ပြန်ကောက်ရရင် လွှတ်တော်တွင်းအဆိုတင်ရာ အမတ် ၂ဝ ရာခိုင်းကတော့ ရနိုင်တယ်။ လွှတ်တော်တွင်း ထောက်ခံကန့်ကွက်မှာ ဘယ်နည်းနဲ့မှ ၇၅ ရာခိုင်နှုန်းအထက် မရနိုင်၊ စစ်ဗိုလ် ၂၅ ရာခိုင်နှုန်းအပြင် မတူတဲ့ပါတီတွေနဲ့ အသားထဲက လောက်ထွက်တွေလည်း ရှိဦးမယ်။
တခါ ဆန္ဒခံယူပွဲလုပ်တော့လည်း ဗမာပြည် လူဦးရေ တစ်ရာလုံးက ပြည်တွင်းမှာချည်း မဟုတ်။ အတိုင်းတိုင်းအပြည်အပြည်မှာ ကွဲလို့ကြဲလို့။ အဲ့ဒီမှာ မဲပေးပိုင်သူ စုစုပေါင်းရဲ့ ၅ဝ ရာခိုင်နှုန်း မဲလာပေးဖို့ မဖြစ်နိုင်။
(ဥပမာ) မဲပေးပိုင်သူ သန်း ၂၀ ရှိတယ်ဆိုပါတော့။ အဲ့ဒီသန်းနှစ်ဆယ်အနက် တယောက်က နိုင်ငံခြားကနေ ဗမာပြည်ကို မဲပေးဖို့ပြန်လာရင်း ပင်လယ်ထဲမှာ သင်္ဘောပျက်လို့ အရောက် နောက်ကျသွားတယ် ဆိုပါတော့။ သွားပြီ။ အဲ့ဒီ သင်္ဘေပျက်လို့နောက်ကျသူကြောင့် လူထုဆန္ဒခံယူပွဲကြီး အထကို မမြောက်တော့ဘူး။ မြောက်တယ်ဆိုဦးတောင် ရလဒ်က ရေစုံမျောပြီ။
ဆိုတော့ ဒီဖွဲ့စည်းပုံဟာ သူတို့ပေးထားတဲ့နည်းနဲ့ ဘယ်လိုမှ ပြင်ဖို့မဖြစ်နိုင်တဲ့ ဖွဲ့စည်းပုံပဲ။ ဒီတော့ ဖျက်ရင် ဖျက်၊ မဖျက်ရင် အခြားဖွဲ့စည်းပုံတခုခုနဲ့ အစားထိုးရမယ်။ လောလောဆယ် ဖျက်မရသေးခင်စပ်ကြား လွှတ်တော်တွင်းနည်းအရလုပ်လို့ရတာက “အခြားဖွဲ့စည်းပုံတခုနဲ့ အစားထိုးဖို့”ပဲ။ ၂ဝဝ၈ ထဲမှာ အခြားဖွဲ့စည်းပုံတခုခုနဲ့ အစားထိုးလို့ရ/မရတွေမပါသလို ရရင် ဘယ်ပုံအစားထိုးရမယ်ဆိုတာလည်း မပါထားဘူးလို့ မှတ်မိဖူးတယ်။
သူရအောင်ကိုက ၅၉(စ)ကို ယာယီဆိုင်းငံ့ထားဖို့ပြောတယ်။ အဲ့ဒီ ၅၉(စ)က ခုနပြောတဲ့ ၁ဝ၄ ချက်ထဲမှာ ပါတယ်။ သူတို့ဖွဲ့စည်းပုံမှာ အဲ့ဒီ ၁ဝ၄ ချက်ကို သူပြောသလို ဆိုင်းငံ့ထားလို့ရတယ် မရဘူးပြောထားတာ
ပါ/မပါ ကျနော်တော့မသိပါ။ ပါတယ်ဆို လုပ်ပါ။ မပါလည်း တို့ဟာ စစ်အုပ်စုဖြစ်တယ်။ ငါတို့လက်နဲ့ စိတ်ကြိုက်ရေးထားတဲ့ဖွဲ့စည်းပုံမှာမပါလည်း အာဏာက တို့ဆီမှာ၊ လုပ်ချင်တာလုပ်လို့ရတယ်ဆိုပြီး ခြေနဲ့ပြန်ဖျက်လည်း ဖျက်ပါ။
တွေးမိတာက သူရအောင်ကိုဟာ ရွှေမန်းလိုပဲ ဘယ်အချိန်မှာ ဘယ်လိုလေမျိုး လည်ပေးရင် ဘယ်သူတွေဝမ်းသာမယ်ဆိုတာ ကောင်းကောင်းသိသလို ဘယ်နတ်မျိုးကို ဘယ်အချိုးနဲ့ကရင် ဘယ်သူတွေ ကြည့်မောမိမယ်ဆိုတာလည်း သိတယ်။ လက်မှတ် ၅ သန်း လွှတ်တော်ထဲရောက်လာအောင် အချိုသပ်သွင်းခိုင်းပြီးမှ ဖွဲ့စည်းပုံအတိုင်းလုပ်ကြတာပေါ့နဲ့ ပွဲဖြတ်လိုက်တာမှာ ကျနော်တို့လုတွေ ကော့ထွက် သွားဖူးတယ်မဟုတ်လား။
သူရအောင်ကို တကယ်ပဲ ဒေါ်စုသမ္မတဖြစ်ဖို့ လိုလားသူဆိုရင် တကယ်ပဲ ဒီဖွဲ့စည်းပုံနဲ့ အလုပ်မဖြစ်နိုင်တာကို ယုံသူဆိုရင် ၅၉(စ) ဆိုင်းငံ့ထားရေးပြောမယ့်အစား အနိမ့်ဆုံးအနေနဲ့ “အခြားဖွဲ့စည်းပုံသစ်တခုခုနဲ့ အစားထိုးရေး”ပြောဖို့လိုလိမ့်မယ်။
မျိုးမြင့်ချို ၁၂/၁၂/၂ဝ၁၅
0 comments:
Post a Comment