 |
| ဗိုလ်ချုပ်ညာဘက်မှ မောင်မြင့်ထူး |
သပြေတခက် ကြွေရက်ကယ်စော- အခန်း (၁၁)
စာဖတ်သူများခင်ဗျား
မတ်လ (၈) ရက်နေ့ဟာ မြန်မာနိုင်ငံမှာ အကြိုဖက်ဆစ်တော်လှန်ရေး ကြီးစတင်ခဲ့တဲ့ နေ့ထူးနေ့မြတ် ဖြစ်ပါတယ်။ ဖက်ဆစ်တော်လှန်ရေးကြီးမှာ အမျိုးသားဖခင်ဗိုလ်ချုပ် အောင်ဆန်းရဲ့လက်ရုံးတစ်ဆူဖြစ်ခဲ့သူ ဗိုလ်မှူးကြီးဗထူးကို ကြားဖူးနားဝရှိခဲ့ကြပါတယ်။ စစ်အာဏာရှင်တွေက သူ့ရဲ့သား ဗိုလ်ကြီးမြင့်ထူးအကြောင်းကိုတော့ တိမ်မြှပ်ဖျောက်ဖျက်ထားကြပါတယ်။ ဒီမိုကရေစီတောင်းဆို တိုက်ပွဲဝင်ရင်း အသက်ပေးသွားတဲ့သူရဲကောင်းတွေထဲမှာ ထိပ်ဆုံးကပါဝင်တဲ့ တပ်မတော်အရာရှိ ဗိုလ်ကြီးမြင့်ထူးရဲ့အကြောင်းကို ဆက်လက်တင်ပြလိုက်ပါတယ်။ တဆက်ထဲမှာ ဒီဖြစ်ရပ်မှန်ကို ဖေါ်ထုတ်ရေး သားခဲ့တဲ့ တပ်မတော်အရာရှိရဲ့ဆန္ဒမွန်ဖြင့် တင်ပြထားချက်အားဖတ်ရူကာ ဖက်ဆစ်ထက်ဆိုးတဲ့ စစ်အာဏာ ရှင်တွေကို လက်တွဲပြီးစည်းလုံးညီညွတ်စွာဖြင့်ဖယ်ရှားကြပါရန် တိုက်တွန်းတင်ပြလိုက်ရပါတယ်ခင်ဗျား။
ဗိုလ်ကြီးမြင့်ထူးရဲ့အသံတိုးတိမ်သွားသလို ကျနော့်ခန္ဓာကိုယ်တခုလုံး နွမ်းချိဆို့နင့်မျက်ရည်ဝဲလျက် ရှိနေ ပါတယ် “ဗိုလ်ကြီးမှာတာတွေ ကျနော်ဘယ်တော့မှ မမေ့ပါ။ ဗိုလ်ကြီးရည်ရွယ်ချက်တွေလည်းထမြောက်အောင် ကျနော်အစွမ်း ကုန်ကြိုးစားပါ့မယ်”
“သာဓု သာဓု သာဓု ကဲ ကိုအောင်သူရေ Goodbye and good luck နော်- သွားပြီဗျာ”
“ဟုတ်ကဲ့ ဗိုလ်ကြီးခင်ဗျာ Goodbye and all the best”
ကျနော်သည် အပေါက်လေးအကြားမှ ချောင်းကြည့်နေမိပါသည်။ ဗိုလ်ကြီးမြင့်ထူးသည် တဖြည်းဖြည်းချင်းအားယူပြီး သူ့ကုတင်ဆီသို့ တွားသွားနေပါသည်။ အတန်ကြာမှ ကုတင်နားရောက်ပြီး ခက်ခဲစွာနဲ့ ကုတင်ပေါ်သို့ပက်လက်လှန်လဲလျောင်းရင်း သူ့တကိုယ်လုံးကို စောင်ဖြင့်လွှမ်းခြုံ လိုက်ပါတော့ သည်။
အဲဒီည ၈ နာရီခန့်လောက်မှာ ဗိုလ်ကြီးမြင့်ထူးရဲ့ရေတောင်းသံကိုကြားရပါတယ်။ သူ့ရဲ့အသံဟာ တုန်ရီပြီး ပုံမှန်အသံမဟုတ်ဘူးဆိုတာ သတိပြုမိပါတယ်။ ကျနော်ကလည်း ဒီဖက်အခန်းက အသံပြန်ပေးရင်း ရေပေးနေကျအပေါက်ဆီသို့လာရန် အချက်ပေးပေမဲ့လည်း ဗိုလ်ကြီးမြင့်ထူး မလာနိုင်တော့ပါ။
သူ့မှာ အသံလာရာ Direction ကို မှန်းဆတတ်သည့်အသိ မရှိတော့။ အသံကို သူ့နားသောတက လုံးဝလက်မ ခံတော့ဆိုသည်ကို သဘောပေါက်မိပါတယ်။
မကြာမီမှာပဲ ဗိုလ်ကြီးမြင့်ထူးရဲ့ကယောင်ကတမ်း ပြောသံ၊ တချက်ချက် စူးရှတဲ့အော်သံ၊ ငြီးတွားသံတွေ ထွက်ပေါ်လာပါတော့တယ်။ အဲဒီအချိန်မှာမှ အချုပ်ခန်းစောင့် ရဲဘော် ၂ ဦး ဘယ်က ပေါက်လာသလဲမသိ၊ ပြေးလွှားပြီး ဗိုလ်ကြီးမြင့်ထူးရဲ့တံခါးသော့ကို ဖွင့်ပါတော့တယ်။
အခြေအနေကိုကြည့်ပြီး အစောင့်တယောက်ဟာ ချက်ခြင်းပြန်ထွက်သွားပါတယ်။ ဒီနောက်မှာတော့ ဗိုလ်ကြီးမြင့်ထူးရဲ့ကယောင်ကတမ်း ငြီးတွားသံတွေဟာလဲ တဖြည်းဖြည်းငြိမ်သက် သွားပါတော့တယ်။ မိနစ်၂၀ ခန့်အကြာမှာမှ အစောင့် ၄/၅ ဦး ထပ်မံရောက်လာပြီး ဗိုလ်ကြီးမြင့်ထူးကို ထမ်းစင်ပေါ်တင်ပြီး ထုတ်သွားတော့တာပါပဲ အကိုရယ်”
ကိုအောင်သူရဲ့ဆို့နင့်ကြေကွဲ မျက်ရည်လွှမ်းသံတို့က ပတ်ဝန်းကျင်ကို တဒင်္ဂကြီး စိုးနေပါသည်။ ကျနော့်ပါးပြင်ပေါ်တွင်လဲ သူငယ်ချင်းဗိုလ်ကြီးမြင့်ထူးအတွက် ယူကျုံးမရဖြစ်မှု၊ မချိတင်ကဲဖြစ်မှု၊ စစ်အာဏာရှင်စနစ်အပေါ် နာကျည်းစက်ဆုပ်မှု၊ ပေါင်းစုစီးမှုကြောင့် ပူနွေးသော မျက်ရည် များက အဆီးအတားမရှိဖြာဆင်းနေပါတော့သည်။
ကျနော်တို့ရှေ့တည့်တည့်ရှိ မီးလင်းဖိုမီးသည်လည်း အားကုန်အရှိန် လျော့စပြုနေပါပြီ။ ဈေးကုန်းရွာမှ ကြက်တွန်သံ၊ ရွာဦးဘုန်းကြီးကျောင်းမှ အုန်းမောင်းခေါက် သံများကလည်း မကြာမှီ ရောင်ခြည်ဦးသန်းတော့မည်ကို ထုတ်ဖေါ်နေပါသည်။
စည်သာချောင်း၏ရေစီးသံ သည် ညင်သာငြိမ့်ညောင်းလှသဖြင့် လွမ်းဆွတ်ဖွယ်အတိ ဖြစ်နေပါသည်။
ကျနော်တွင် ဤမှတ်တမ်းကို ပြည်သူသို့တင်ပြရခြင်း၏ အဓိကအကြောင်းရင်းများ ရှိနေပါသည်။
ပထမအချက်မှာ ဗိုလ်ကြီးမြင့်ထူး၏ ၀ိညာဉ်သည် ရေကြည်အိုင်ငရဲအချုပ်ခန်းလေး သို့မဟုတ် စစ်ဆေးရုံ ဘယ်နေရာမှာ ကြွေလွင့်ခဲ့ရသည်ကို တော့ မျက်မှန်တင်ဦးကြီးနှင့် စစ်ဆေးရုံမှ သက်ဆိုင်ရာဆရာဝန်များသာ အမှန်ကိုသိကြပါမည်။
မည်သို့ ပင်ဖြစ်စေ ဗိုလ်ကြီးမြင့်ထူးသည် မျက်မှန်တင်ဦးကြီး ဦးစီးသော ရေကြည်အိုင်ထောက်လှမ်းရေးငရဲခန်းတွင် တိရစ္ဆာန်အဆင့်ထက်နိမ့်ကျစွာ ညှဉ်းဆဲနှိပ်စက်မှု ဒဏ်ရာဒဏ်ချက်တို့ကြောင့် သေဆုံးခဲ့ရပါပြီ။ ခပ်ရှင်းရှင်း ရေးရလျှင် မျက်မှန်တင်ဦးကြီးနှင့် ထောက်လှမ်းရေးတို့က ဗိုလ်ကြီးမြင့်ထူးကို အသေသတ်လိုက်ခြင်း ဖြစ်သည်မှာ လွန်စွာမှထင်ရှားလှပါသည်။
ဒုတိယအချက်မှာ ဖက်ဆစ်စစ်အာဏာရှင်တို့မည်သည် မိမိအာဏာတည်တံ့ခိုင်မြဲရေးအတွက် စစ်ထောက်လှမ်းရေးကို ပင်မဒေါက်တိုင်အဖြစ် ဖွဲ့စည်းတည်ဆောက် ကာ ဒီမိုကရေစီအင်အားစုတို့အပေါ် ဖမ်းဆီးနှိပ်စက် ညှဉ်းပန်းသတ်ဖြတ်မှုများကို တရားမရှိတံခါးမရှိ စော်ကားကျူးလွန်လျက် ရှိနေပါသည်။
အမျိုးသားအားလုံး ပါဝင်ဆင်နွှဲခဲ့ရသည့် ဖက်ဆစ်ဂျပန်တော်လှန်ရေး ကြီးတွင် တမျိုးသားလုံး၏တာဝန်ကို ရွပ်ရွပ်ချွံချွံ တာဝန်ကျေပွန်အောင် ထမ်းနေခိုက် ကျဆုံးသွားရရှာသော အထက်မြန်မာပြည်တိုင်းမှူး အာဇာနည်ဗိုလ်မှူးကြီးဗထူး၏မျက်နှာကိုပင် မထောက်ညှာ မငဲ့ကွက်ပဲ၊ သားဖြစ် သူ ဒီမိုကရေစီရေးကိုချစ်မြတ်နိုးသူ ဗိုလ်ကြီးမြင့်ထူးကိုလည်း စစ်အာဏာရှင်စနစ် ဆက်လက်တည်တံ့ ခိုင်မြဲနိုင်ရေးအတွက် ရေကြည်အိုင်ငရဲခန်းတွင် မျက်မှန်တင်ဦးကြီး ဦးစီးသော စစ်ထောက်လှမ်းရေးတို့က ရက်ရက်စက်စက် သတ်ခဲ့ပြန်ပါပြီ။
သပြေတခက် ကြွေရက်ကယ်စော- အခန်း (၁၂) ဇာတ်သိမ်းပိုင်း
ဗိုလ်ကြီးမြင့်ထူးကဲ့သို့ ဒီမိုကရေစီရေး၊ လူမှုလွတ်လပ်ခွင့်၊ အမျိုးသားရေးတို့အတွက်တိုက်ပွဲဝင်ရင်း စစ်ထောက်လှမ်းရေးတို့၏ငရဲခန်းများတွင် ရေတိမ်နစ်ခဲ့ရသော ရဟန်းရှင်လူ ကျောင်းသားကျောင်းသူ အလုပ်သမား လယ်သမား လူမျိုးစုများ၏အရေအတွက်ကလည်း မြန်မာပြည်တွင် ဒု နှင့် ဒေး ရှိနေပါသည်။ ဤအဖြစ်ဆိုးစနစ်ဆိုးတို့အား ကြုံတွေ့သိရှိ ခံစားတွေ့ထိခဲ့ရသောပုဂ္ဂိုလ်တိုင်းအနေနှင့် အခွင့်အလမ်းရလျှင် ရသလို တနည်းမဟုတ်တနည်းဖြင့် အဖြစ်အပျက်အနိဋ္ဌာရုံများကို ပြည်သူသို့တင်ပြဖြန့်ဖြူးပေးရန် တာဝန် ရှိနေသည်ကို သဘောပေါက်ဖို့လိုပါသည်။ မျက်မှန်တင်ဦးကြီးတို့၏ခေတ်ကအသုံးပြုခဲ့သော ရက်စက်ယုတ် မာ လူမဆန်အောင်ညှဉ်းပမ်းနှိပ်စက်နည်း မျိုးစုံရှိသလို၊ ဗိုလ်ခင်ညွန့်၏ MI ခေတ်၊ ယခု ဗိုလ်မြင့်ဆွေတို့၏ MI ခေတ်တို့တွင် ၄င်း ရက်စက်မှု မျိုးစုံသည် သူ့နည်းသူ့ဟန်နဲ့ရှိနေမည်ဖြစ်ပါသည်။ တာဝန်ရှိ မှတ်တမ်းတင် သူများရှိနေသရွေ့ မည်သည့်ခေတ်က ရက်စက်မှုအပေါင်းတွင် သရဖူဆောင်းမည်ဆိုတာကိုတော့ စာရှုသူ ပြည်သူများကပင် ဆုံးဖြတ်ကြရမည်ဖြစ်ပါသည်။
တတိယအချက်မှာ စစ်ထောက်လှမ်းရေးတို့ ဤမျှလောက် တန်ခိုးအာဏာ အရှိန်အ၀ါကြီးရခြင်းမှာလည်း စစ်အာဏာရှင်စနစ်ကြောင့်ပင် ဖြစ်ပါသည်။
ဒီမိုကရေစီစနစ် ကျင့်သုံးသည့်နိုင်ငံတနိုင်ငံတွင် စစ်တပ်၏အစိပ်အပိုင်းတခုသာဖြစ်သည့် စစ်ထောက်လှမ်းရေးတို့၏ အဓိကတာဝန်မှာ စစ်မြေပြင်၌တကယ်ယှဉ်ပြိုင်တိုက်ခိုက်ရမည့် တဖက်ရန်သူ၏ နည်းပရိယာယ်၊ လူသူ လက်နက်၊ ရိက္ခာ၊ ဆက်သွယ်ရေးလမ်းကြောင်းစသည့် စစ်နှင့်ပတ်သက်သည့်သတင်းများကိုသာ ထောက် လှမ်းစုဆောင်းကြရပါသည်။ တိုင်းပြည်၏ နိုင်ငံရေး၊ စီးပွားရေး၊ ပညာရေး၊ ကျန်းမာရေးတို့တွင်စစ်ထောက် လှမ်းရေးတို့ လုံးဝ မပါဝင် မစွက်ဖက်ရပါ။ သို့သော် ကျနော်တို့နိုင်ငံတွင်ကား စစ်အာဏာရှင်စနစ်ဆိုးကြီး သက်ဆိုးရှည်ဖို့အတွက် စစ်ဗိုလ်ချုပ်ကြီးတို့သည် စစ်ထောက်လှမ်းရေးတို့ကို အဓိကဒေါက်တိုင်အဖြစ် ဆက်လက်သုံးစွဲနေဦးမည်သာ ဖြစ်ပါသည်။
စတုတ္တအချက်မှာ ကျနော်တို့ပြည်သူတရပ်လုံး စွဲစွဲမြဲမြဲယုံကြည် ထားရမည့်အချက်ပင် ဖြစ်ပါသည်။ ထိုအချက်မှာ စစ်အာဏာရှင်တို့၏လက်ကိုင်တုတ် ထောက်လှမ်းရေး အကြီးအကဲနှင့် ထောက်လှမ်းရေးတို့သည် နောက်ဆုံးတွင် မည်သူမှ ဇာတ်သိမ်းမကောင်းခြင်းပင် ဖြစ်ပါ သည်။
စစ်ထောက်လှမ်းရေးကိုအသက်သွင်းပြီး လက်ကိုင်တုတ်အဖြစ်အသုံးပြုခဲ့သူ ဦးနေ၀င်းကိုယ်တိုင် သိမ်ငယ်စွာနှင့် ဇာတ်သိမ်းသွားခဲ့ပါပြီ။ ထို့အတူ လက်ရှိထောက်လှမ်းရေးချုပ် ဗိုလ်မြင့်ဆွေသည်လည်း ဇာတ်သိမ်းကောင်းမည်မဟုတ်ပါ။ စစ်ထောက်လှမ်းရေးတို့ သွားရာလမ်းက မြန်မာ့သမိုင်းတွင် လယ်ပြင်၌ ဆင်သွားသကဲ့သို့ ထင်ရှားနေပါပြီ။
ပဉ္စမအချက် တင်ပြလိုသည်မှာ ပြည်သူတိုင်းက လိုလားတောင့်တ နေသော လူမှုလွတ်လပ်မှု အခွင့်အရေးများကိုအာမခံသည့်ဒီမိုကရေစီစနစ် ပြန်လည်ရှင်သန် ထွန်းကားလာ မှသာ တိုင်းပြည်၏အနိဋ္ဌာရုံ စစ်အာဏာရှင်စနစ်ကျဆုံးမည်သာ ဖြစ်ပါသည်။ သို့အတွက် ပြည်သူအပေါင်း အနေနှင့် ဒီမိုကရေစီအင်အားစုများနှင့်အတူ အုတ်တချပ်သဲတပွင့်ဖြစ်စေ မိမိတို့ကျရာအခန်းကဏ္ဍမှ ပါဝင် လှုပ်ရှားပြီး ဒီမိုကရေစီဗိမာန်ကြီးကို ခိုင်ခိုင်ခံ့ခံ့တည်ဆောက်ကြဖို့ အဓိဌာန်ပြုကြပါစို့လို့ လေးစားစွာ မေတ္တာ ရပ်ခံလိုပါသည်။
နောက်ဆုံးတင်ပြလိုသည့်အချက်မှာ ကျနော်၏ ခံစားချက်ပင် ဖြစ်ပါသည်။
“သပြေတခက် ကြွေရက်ကယ်စောတဲ့ သူငယ်ချင်း ဗိုလ်မြင့်ထူးရေ- သူငယ်ချင်းမှာတဲ့အတိုင်း ဒီမိုကရေစီရတဲ့အချိန်မှာ ဒို့တတွေ ပြည်သူတွေနဲ့အတူ သပြေခက်နဲ့ရေစင်ခွက်ကိုကိုင်စွဲပြီး သူငယ်ချင်းနဲ့အတူ ကြွေလွင့်သွားကြတဲ့ ဒီမိုကရေစီသူရဲကောင်း အာဇာနည်အပေါင်းကို အမျှပေးဝေပါမယ်လို့”
ကိုယ်စိတ်နှစ်ဖြာကျန်းမာချမ်းသာကြပါစေလို့ ။
မောင်စည်သာ
(ဒီနေရာကယူပါတယ်)http://www.irrawaddyblog.com/2012/01/blog-post_3803.html
0 comments:
Post a Comment