 |
| ဗိုလ်ချုပ်ညာဘက်မှာ မောင်မြင့်ထူး |
မောင်စည်သာဆိုတဲ့ တပ်မတော်အရာရှိဟောင်းတဦး စည်းလုံးခြင်းရဲ့အင်အားဘလော့ဂ်မှာ ရေးသားခဲ့တဲ့အခန်းဆက်ဆောင်းပါး ၁၂ ပုဒ် ဖြစ်ပါတယ်။ (ဒီနေရာကယူပါတယ်) http://www.irrawaddyblog.com/2012/01/blog-post_3803.html
သပြေတခက် ကြွေရက်ကယ်စော- အခန်း (၉)
“မျှော်မှန်းထားတဲ့အတိုင်း၊ (၆) ရက်မြောက်ည၊ နံနက် (၁) နာရီလောက်မှာတော့၊ ကျနော့်မျက်နှာကို အ၀တ်စည်းပြီး၊ အစောင့် (၂) ဦးက ခေါ်ထုတ်သွားကြပါတယ်။ ၃ မိနစ်ခန့်ကြာတဲ့အခါမှာတော့ အခန်းတံခါးဆွဲဖွင့်ပြီး အခန်းတခုထဲသွင်းလိုက်ပါတယ်။ မျက်စေ့စည်းထားတဲ့အ၀တ်စကို ဖြေလိုက်တဲ့အခါမှာတော့၊ ကျနော်ဟာ မျက်မှန်တင်ဦးကြီးရဲ့ရုံးခန်း - သူ့စားပွဲရှေ့တည့်တည့်မှာ ရောက်နေတာသိလိုက်ပါတယ်။ မျက်မှန်ကြီးက ဒေါသအခိုးအလျှံတွေဝေနေတဲ့မျက်လုံးအစုံနဲ့ ကျနော့်ကို ကြောက်စရာကောင်းလောက်တဲ့ မျက်နှာနဲ့လှမ်းကြည့်ပြီး”
“မင်းဟာခုအထိ တော်တော်ခေါင်းမာတဲ့အကောင်ပဲ။ ဗိုလ်ချုပ်က မရ ရတဲ့နည်းနဲ့စစ်လို့ အမိန့်ပေးထားပြီးပြီ။ ခုလောက်အနာခံရတာကိုမှ သင်ခန်းစာမယူတတ်သေးရင် သေသည်အထိမင်းကို ဆက်စစ်ရလိမ့်မယ်။ ဒီတော့ ဘာမှခြွင်းချန်မထားပဲ ဖြောင့်ချက်ပေးလိုက်။ ငါမင်းကိုခေါ်ပြီး နောက်ဆုံးအခွင့်အရေးပေးလိုက်ခြင်းပဲ”
ကျနော်က ပြန်ပြောမလို့လုပ်နေစဉ်မှာပဲ မျက်မှန်ကြီးက အစောင့်(၂) ဦးကို အချုပ်သားကိုခေါ်သွားကြလို့ အမိန့်ပေးလိုက်ပါတယ်။ အစောင့်(၂) ဦးဟာလည်း အမိန့်အတိုင်း ကျနော့မျက်နှာကိုစည်းပြီး မျက်မှန်ကြီးအခန်းကခေါ်ထုတ်သွားကြပါတယ်။
(၅) မိနစ်လောက်ကြာတဲ့အခါ အခန်းတခုနှင့် တံခါးဖွင့်သံကြားရပြီး၊ ကျနော့်ကို ဆွဲသွင်းကြပါတယ်။ မျက်စေ့ကိုစည်းထားတဲ့အ၀တ်ကို ဆွဲဖြည်လိုက်တဲ့အခါမှာတော့ - ယခင် စစ်ဆေးနေကျပုဂ္ဂိုလ်၂ ဦးရှိနေတဲ့ စစ်ဆေးရေးအခန်းထဲရောက်နေတာ တွေ့လိုက်ပါတယ်။ ခတ်ပိန်ပိန်၊ အသားညိုညိုပုဂ္ဂိုလ်ရဲ့မျက်နှာကတော့၊ စိတ်မကောင်းပုံပေါ်နေသလောက်၊ ဂင်တိုတိုပုဂ္ဂိုလ်ရဲ့မျက်နှာကတော့ အောင်သေအောင်သား၊ မကြာမီ စားရတော့မယ့်အလား ဖြစ်နေပါတယ်။ ခပ်ပိန်ပိန်ပုဂ္ဂိုလ်ကစပြီး၊ တပ်တွင်းက ပြန်လည်ပုန်ကန်မယ့် အစီအစဉ်တွေနဲ့ပတ်သက်ပြီး၊ ဖြောင့်ချက် ပေးမပေး၊ အဖြေပေးဖို့(၃) မိနစ်အချိန်ပေးမယ်လို့ဆိုပါတယ်။ ကျနော်က သူ့စကားဆုံးဆုံးချင်းပဲ၊ ကျနော့်မှာ ဘာမှ ထပ်ဖြောင့်ချက်ပေးဖို့မရှိကြောင်း အဖြေပေးလိုက်ပါ တယ်။ ကျနော့် စကားဆုံးတာနဲ့တပြိုင်နက် ဒေါသမာန်ဟုန်ပြင်းထန်နေတဲ့ ဂင်တိုတိုပုဂ္ဂိုလ်က ဒေါသသံပြည့် လျှမ်းနေတဲ့အသံကြီးနဲ့ အစောင့်(၂) ဦးကို “ရဲဘော် ဆက်လုပ်” လို့အမိန့်ပေးလိုက်ပါတယ်။ အစောင့်(၂) ဦးလည်း အလေးပြုထွက်ခွာသွားပြီးတဲ့နောက်၊ ပါးကွက်အာဏာသား(၃) ဦး၊ ကြိုးများနဲ့ဝင်လာကြပါတယ်။ ပါးကွက်အာဏာသား ၃ ဦးဟာ ကျနော့်ကို ထိုင်နေရာကအတင်းဆွဲထစေပြီး မတ်တပ်ရပ်အနေအထား၊ လက်နှစ်ဖက်ကို ခန္ဓာကိုယ်ရဲ့ဘေးတဖက်တချက်စီမှာကပ်စေပါတယ်။ နောက်ပြီးမှ တကိုယ်လုံးကို လက်သန်းလုံးလောက်ရှိတဲ့ကြိုးနဲ့ ရင်ဘတ်အောက်ပိုင်း၊ တင်ပုဆုံ၊ ခြေချင်းဝတ်၊ သုံးနေရာမှာ တင်းတင်းကြပ်ကြပ် တုတ်နှောင်လိုက်ကြပါတယ်။ ပြီးတာနဲ့ - အခန်းမျက်နှာကျက်အလယ်လောက်မှာရှိတဲ့ သံမဏိချိတ်စက်သီးပေါ် လက်မလောက်ရှိတဲ့ကြိုးတချောင်းကို ပစ်တင်လိုက်ပြီး၊ ကြိုးစတဖက်အား ကျနော်ရဲ့ ခြေချင်းဝတ်မှာ တုတ်စည်းချည်နှောင်ထားတဲ့ကြိုးမှာ ၂ ပတ် ၃ ပတ်လောက်ရစ်ပြီး တုတ်နှောင်လိုက် ပြန်ပါတယ်။ နောက်ပြီး ကျနော့်ကို သံမံတလင်းပေါ်ကိုလှဲချလိုက်ပါတယ်။ ပါးကွက်အာဏာသားတဦးက “အသင့်”လို့ အော်လိုက်ပါတယ်။ အဲဒီအခါမှာ စစ်ဆေးသူ ၂ ဦးဟာ ထိုင်ရာမှရပ်လိုက်ပြီး ဂင်တိုတိုပုဂ္ဂိုလ်က ဆက်လုပ်လို့ အမိန့်ပေးလိုက်တဲ့အခါမှာတော့ ပါးကွက်အာဏာသား ၂ ဦးဟာ တဖက်ကြိုးစကနေပြီး တဖြည်းဖြည်းနဲ့ ဆွဲပါတော့တယ်။ မကြာခင်မှာပဲ ကျနော့်ခန္ဓာကိုယ်ဟာ ဇောက်ထိုးမိုးမျှော် ဖြစ်သွားပါတယ်။ စက်သီးနဲ့ခြေထောက် တစ်ပေသာသာအကွာလောက်ရောက်တဲ့အခါမှာ အဆွဲရပ်ပြီး ကြိုးစကိုနံရံဘေးမှာ ရှိတဲ့ချိတ်မှာ ရစ်ပတ်လိုက်ပါတယ်။ ပထမတော့ ကျနော့်ခန္ဓာကိုယ်ဟာ အနည်းငယ်လည်ရမ်းနေပါတယ်။ အဲဒီအချိန်မှာပဲ ဂင်တိုတိုလူက ပါးကွက်အာဏာသားမှူးကို “ဆရာကြီး ဒီလူဖြောင့်ချက်ပေးမယ်ဆိုမှ ကျနော်တို့ကို လာခေါ်” လို့ အမိန့်ပေးပြီး ဆရာကြီးဆိုသူပုဂ္ဂိုလ်ကလွဲပြီးအားလုံး အပြင်ကိုထွက်ခွာသွားကြ ပါတယ်။ ကျနော်လည်း ဆရာကြီးဆိုသူကို ဇောက်ထိုးမိုးမျှော်ဖြစ်နေရာက စူးစိုက်ကြည့်လိုက်မိပါတယ်။ ပုပု ၀၀ဖိုင့်ဖိုင့်၊ အသားမည်းမည်းကြုတ်ကြုတ်၊ မျက်နှာဆိုးဆိုးနဲ့ ဒါမျိုးတွေသူ့အဖို့ရိုးနေပြီ၊ သူ့မှာ ဘာခံစားချက်မှ မရှိဘူးဆိုတာ သူ့မျက်နှာမှာပေါ်လွင်နေပါတယ်။ ကျနော့် ဦးခေါင်းကတော့ သံမံတလင်းရဲ့အထက် ၃ ပေ အမြင့်လောက်မှာရှိနေပါတယ်။ မကြာခင်မှာပဲ ခန္ဓာကိုယ်တခုလုံးရဲ့အောက်ကိုဆွဲနေတဲ့ အလေးချိန်ဒဏ်ကို ခြေချင်းဝတ်တွေမှာ အင်မတန်အခံရခက်တဲ့နာကျင်ကိုက်ခဲမှုကြီးကို နဖူးတွေ့ဒူးတွေ့ ခံစားရပါတော့တယ်။ နာရီဝက်လောက်ကြာတဲ့အခါမှာတော့ တကိုယ်လုံးမှာရှိတဲ့သွေးတွေဟာ ဦးခေါင်းဆီကိုဦးတည်စုပြုံ စီးဆင်းနေကြတာမို့၊ ပထမဦးခေါင်းတခုလုံး ပြည့်တင်းရောင်ရမ်းတဲ့အသိမျိုး ခံစားရပါတယ်။ ဒီထက် ကြာလာတဲ့အခါမှာတော့ မျက်လုံးတွေမှုန်ဝါးလာပြီး ပတ်ဝန်းကျင်တခုလုံးဟာ မသဲမကွဲဖြစ်လာပါတော့ တယ်။ ခြေချင်းဝတ်နေရာဟာ အင်မတန်နာကျင်ကိုက်ခဲရာက တဖြည်းဖြည်းထုံကျင်လာပါတော့တယ်။ လက်နှစ်ဘက်ကလည်း ဒီအတိုင်းပဲ တဖြည်းဖြည်းထုံလာပါပြီ။ ကိုယ်ခန္ဓာကို ပုံမှန်မဟုတ်ပဲဇောက်ထိုးမိုးမျှော် အနေအထားနဲ့ ကြာရှည်ထားတဲ့အတွက်၊ အစာအိမ်နဲ့ အခြားအတွင်းခန္ဓာကိုယ်အစိတ်အပိုင်းအချို့က အရည်အချို့ဟာလည်း ပါးစပ်ပေါက်ကတဆင့် ဖြည်းဖြည်းချင်းစီးလာပါတော့တယ်။ ကျနော့်မျက်လုံးတွေက တဖြည်းဖြည်း ပြာလာပါပြီ။ အသက်ရှုရတာမြန်လာသလို ရင်ထဲမှာလည်း မောပန်းတင်းကြပ်လာပါပြီ။ အသက်ရှု မ၀တော့ပါ။ ကျနော့်ကိုယ်ကျနော်လည်း ငါရဲ့နောက်ဆုံးအချိန်တော့ရောက်လာပြီလို့ ယူဆမိပါတယ်။ ဒါကြောင့် ဗုဒ္ဓဘာသာဝင်တဦးပီပီ ဘုရား၊ တရား၊ သံဃာကို ကြိုးစားအာရုံပြုလိုက်ပါတယ်။ များမကြာခင်မှာပဲ ကျနော့်မျက်လုံးအစုံမှုန်ဝါးရီဝေနေရာမှ တချက်တချက်မဲမှောင်သွားပါတယ်။ မျက်ခွံတွေဟာလည်း တဖြည်းဖြည်းလေးလံလာပြီး ကျနော်ဘာမှသတိမရတော့ပါ။ ကျနော် သတိရလာတဲ့အချိန်မှာတော့ ကျနော့်ခန္ဓာကိုယ်ဟာ သံမံတလင်းပေါ်ရောက်နေပြီး၊ ပါးကွက်အာဏာသားတစ်ဦးက ကျနော့်မျက်နှာကို ရေခဲရေစိမ်ထားတဲ့အ၀တ်တခုနဲ့ ပွတ်တိုက်ပေးနေပါတယ်။ အဲဒီနေ့ညကိုတော့ ကျနော် ဘယ်တော့မှ မေ့နိုင်မယ်မဟုတ်ပါ။ ဘာပြုလို့လဲဆိုတော့ သတိလည်လာတာနဲ့တပြိုင်နက် ပါးကွက်အာဏာသားတွေဟာ ကျနော့်ကို ဇောက်ထိုးမိုးမျှော်ဆွဲထားကြပြန်ပါတယ်။ ဒီလို လုပ်ကြတာဟာ(၄) ကြိမ်ထက် မနည်းပါဘူး။ နောက်ဆုံးအကြိမ် ကျနော်သတိပြန်လည်လာတဲ့အခါမှာတော့ ကျနော်ဟာ ကျနော့်ရဲ့အချုပ်ခန်း ကုတင်ပေါ်ကို ပြန်ရောက်နေပါပြီ။ ကိုယ်ပေါ်မှာချည်နှောင်ထားတဲ့ကြိုးတွေလည်း မရှိတော့ပါဘူး။ တကိုယ်လုံးမောပန်းနွမ်းလျနေသလို၊ ခြေချင်းဝတ်နေရာတွေကတော့ အင်မတန်နာကျင်ကိုက်ခဲနေပါတယ်။ နောက်ပြီးအဲဒီနေရာမှာ ကြိုးဒဏ်ကြောင့် အချိုနေရာတွေမှာညိုမဲနေသလို အချို့နေရာတွေမှာလည်း အသားတွေလန်နေတာကို သတိပြုမိပါတယ်။ နောက် ၂ ရက်ခန့် ကျနော့်ကိုအချုပ်ခန်းထဲမှာပဲ ထားပါတယ်။ နေ့တိုင်း ဆေးရဲဘော်တယောက်လာပြီး ခြေချင်းဝတ်မှာရှိတဲ့ဒဏ်ရာတွေကို ဆေးကြော၊ ဆေးလိမ်းပေးပါ တယ်။ အစားအသောက်တွေကလည်း ပုံမှန်အတိုင်းရပါတယ်။ (၃) ရက်မြောက်နေ့မှာ ကျနော် လမ်းလျောက် လို့ရပါပြီ။ ဒါကြောင့်မို့ ငါဘယ်လိုငရဲခန်းမျိုး မကြာခင်တွေ့ရဦးမယ်ဆိုတာတွေးတော နေမိပါတယ်။ အဲဒီနေ့ ည (၈) နာရီသာသာခန့်မှာပဲ ကျနော့်မျက်နှာကိုအ၀တ်စည်းပြီး အစောင့်နှစ်ယောက်က ကျနော့်ကိုခေါ် ထုတ်သွားကြပါတယ်။ (၂) မိနစ်လောက်အကြာမှာ လေနုအေးရဲ့တိုးဝှေ့တိုက်ခတ်လိုက်တာကို တွေ့ထိရ တာမို့ အဆောက်အဦးအပြင်ဘက်ရောက်နေပြီဆိုတာ သိရပါတယ်။ ၁၀ မိနစ်လောက် လမ်းလျှောက်ပြီးနောက် သော့ခလောက်ဖွင့်သံကြားရပြီး ကျနော့်ကို အထဲဆွဲခေါ်သွားပါတယ်။ နောက်ပြီးမှ ကျနော့်မျက်နှာကိုစည်းထားတဲ့အ၀တ်စကို ဖြည်လိုက်ကြပါတယ်။ ပထမတော့ စစ်ဆေးတဲ့နေရာ၊ စစ်ဆေးတဲ့ ပုဂ္ဂိုလ်တွေ ပြောင်းတာပဲဖြစ်မယ်လို့ ကျနော်ထင်မိပါတယ်။ နောက်မှ မဟုတ်မှန်းသိလာရပါတယ်။ ကျနော့်ကို ထပ်မံ မစစ်ဆေးတော့ပဲ၊ နေရာပြောင်းချုပ်ထားခြင်းပဲ ဖြစ်ပါတယ်။ သူတို့ စိတ်ကြိုက်စစ်ဆေးပြီး နောက်ထပ် ဘာမှ ထပ်ရစရာမရှိတော့ပြီလို့ ယူဆထားတဲ့ပုဂ္ဂိုလ်တွေကို ချုပ်ထားတဲ့နေရာပါပဲ။ အိပ်ယာ၊ စောင်၊ ခြင်ထောင်က စပေးပါတယ်။ ကျနော့်ကိုချုပ်ထားတဲ့နေရာကတော့ ရေကြည်အိုင် အတွင်းထောင်ရဲ့အပြင် ဖက်က အဆောင်ကိုယ်စီနဲ့ထားတဲ့အချုပ်ခန်းတွေပါပဲ။ ကျနော်သိရသလောက် ကျနော်တို့အတန်းမှာဆိုရင် စစ်ဆေးမေးမြန်းပြီးဖြစ်တဲ့ အမျိုးသမီးအချုပ်သ္မားများ များပါတယ်။ သိရသလောက် ဂျာနယ်ကျော် ဒေါ်မမလေး၊ တပ်မတော်လေတပ်မှ ဗိုလ်ကြီးဒေါ်လှသန်း၊ ဗိုလ်မှူးကြီးတင်မောင်ဇနီးနဲ့  အခြားပုဂ္ဂိုလ်တွေ ပဲဖြစ်ပါတယ်။ “နေပါဦး၊ ဗိုလ်ကြီးကို သူတို့စိတ်ကြိုက်စစ်ဆေးမေးမြန်းပြီး၊ နောက် ကောင်းကောင်းမွန်မွန် ထားရာက၊ ခုလို cell အချုပ်ခန်းထဲ ဘယ်လိုပြန်ရောက်လာရတာလဲလို့” ကိုအောင်သူက မေးမြန်းလိုက်တဲ့ အခါမှာတော့…. အဲဒီအကြောင်း ကျနော် ပြောပြမလို့ပါပဲ၊ အတိုချုံးပြောရရင် လွန်ခဲ့တဲ့တစ်ပတ်လောက်မှာ ကျနော့်ကို ဘေးပတ်ဝန်းကျင်အချုပ်သားများနဲ့ လျှို့ဝှက်ဆက်သွယ်မှုတွေလုပ်ပြီး၊ အချုပ်စခန်းရဲ့ စည်းကမ်းတွေကိုချိုးဖေါက်တယ်ရယ်လို့ အစောင့်တစ်ဦးကတိုင်တန်းသတင်းပို့တာကြောင့် - မျက်မှန်ကြီးက ခေါ်ယူ၊ ဆဲဆို၊ ကြိမ်းမောင်း၊ ထိုးကြိတ်ပြီး အပြစ်ပေးတဲ့သဘောနဲ့ Cell အချုပ်ခန်းကို ပြောင်းလိုက်ခြင်းပဲ ဖြစ်ပါတယ်။ ဒီမှာအနေအထိုင်၊ အစားအသောက်က အစ၊ ကျဉ်းကျပ် ရုတ်လျော့သွားပြီး၊ ကျနော့်ကို သူတို့စိတ်ကြိုက် လူမဆန်အောင် ညှဉ်းပန်းနှိပ်စက်လိုက်ကြတဲ့အတွက်၊ ခန္ဓာကိုယ်ချိနဲ့ပြီး ခုလို ကျန်းမာရေး အခြေအနေမကောင်းတဲ့ အခြေရောက်ပေမယ့်လည်း ကျနော့်စိတ်ဓါတ်ကတော့ ဘယ်တော့မှ ပျော့ညံ့မသွားပါဘူး။ အထူးသဖြင့်၊ မျက်မှန်ကြီးနဲ့အပေါင်းပါ ပါးကွက်အာဏာသားအားလုံးကို ဇာတ်သိမ်း ကောင်းနိုင်ကြပါစေလို့ အမြဲ မေတ္တာပို့သလျက်ရှိနေပါတယ်” လို့ ဆို့နင့်သံအပြည့်နဲ့ ဗိုလ်ကြီးမြင့်ထူးက သူ့အဖြစ်အပျက်တွေ ပြန်ပြောင်းပြောဆိုမှုကို နိဂုံးချုပ်လိုက်ပါတယ်။ ကျနော်နဲ့ ကိုအောင်သူကြားတွင်ရှိသည့်မီးဖိုမှ မီးအရှိန်သည်လည်း အတော်အားလျော့မှေးမှိန်နေပြီဖြစ်သော်လည်း၊ ကိုအောင်သူ၏ မျက်လုံးအစုံတွင် မျက်ရည်များလဲ့နေသည်ကို ကျနော်သတိထားမိပါသည်။ ကျနော်ကိုယ်တိုင်လည်း ခံစားမှုများက ရင်ထဲတွင်တင်းကြပ်ဆို့နင့်နေပါသည်။ ကျနော်မှ ထင်းတုံး ၃/၄ တုံးကိုယူပြီး မီးဖိုထဲသို့ တစ်တုံးပေါ်တစ်တုံးဆင့် ထည့်သွင်းလိုက်ပါသည်။ ကိုအောင်သူကလည်း သူ့ရှေ့တွင်ချထားပေးသော ရေနွေးကြမ်းအိုးမှ လက်ကျန်ရေနွေးကြမ်းကို သူ့ပုဂံထဲထည့်လိုက်ပြီး - အ၀ မော့သောက်လိုက်ပါသည်။ မနီးမလှမ်းအရပ်ဆီမှ ကြက်တွန်သံများပင်ကြားရပါပြီ။
သို့သော် ကျနော်တို့တွင် အိပ်ချင်စိတ်လုံးဝမရှိတော့ပါ။ ခံစားချက်တွေက ကျနော်တို့ခန္ဓာကိုယ်နှင့်စိတ်တို့ကို အပြည့်အ၀လွှမ်းခြုံထားလိုက်ခြင်းကြောင့်ဖြစ်ပါသည်။ အချိန်အတော်ကြာထိုင်ခဲ့ကြသည့်အတွက် အပေါ့အပါးသွားရန်နှင့် ကိုယ်လက်လှုပ်ရှားမှုလုပ်ရန် အိမ်အပြင်သို့ ကျနော်တို့နှစ်ဦး ထွက်လာကြပါသည်။
သပြေတခက် ကြွေရက်ကယ်စော- အခန်း (၁၀) ပြင်ပတွင်ကား ငွေစန္ဒာလရောင်က လွန်စွာမှ တင့်ရွှန်းလှပနေပေသည်။ သစ်ပင်၊ သစ်ရွက်၊ သစ်ခက် ကြီးကြီးငယ်ငယ်တို့သည် လရောင်နှင့်နှင်းရည်တို့ကို အတားအဆီးမရှိ လွတ်လပ်စွာသောက်သုံးနေကြလေသည်။ အားလုံးသည် လရောင်အောက်တွင် စိမ်းရည် ရွှမ်းပြီး၊ အစွမ်းကုန်လန်းဆန်းနေကြသည်။ စည်သာချောင်း၏ ညင်သာသောရေစီးသံက သဘာဝအလှကို ဂီတဖြင့်တန်ဆာဆင်ထားပြန်သည်။ ကျနော်တို့နှစ်ဦးသည် ခြံထဲတွင် (၅) မိနစ်ခန့်သာ ကိုယ်လက်လှုပ်ရှား အညောင်းပြေစေရန် လမ်းသလားကြသော်လည်း သဘာဝအလှတွင် ကြာရှည်စွာငေးမောနိုင်စွမ်းမရှိကြပါ။ ကျနော်တို့အိမ်ပေါ်သို့ပြန်တက်လာကြသည့်အခါတွင်ကား မီးဖိုတွင်ဖြည့်ခဲ့သောထင်းကြောင့် မီးအရှိန် အတော်ရနေပေပြီ။ ကျနော်သည် ရေနွေးကြမ်းအိုးအား ရေအနည်းငယ်ထည့်ဖြည့်ပြီး မီးဖိုခနောက်ပေါ်သို့ တင်လိုက်ပါသည်။ နှမ်းပြစ်၊ မြေပဲဆားလှော်များကို ပုဂံများအတွင်းသို့ ထပ်ဖြည့်လိုက်ပါသည်။ “ကဲ အကိုရေ၊ အခု ကျနော်ပြောပြမှာကတော့ ဗိုလ်ကြီးမြင့်ထူးရဲ့ နေ၀င်ချိန် (၀ါ) ခရီးဆုံးအပိုင်းပဲ ဖြစ်ပါတယ်” ဆိုပြီး ကိုအောင်သူက သူတွေ့ရှိ၊ သိရှိရသည့် ဗိုလ်ကြီးမြင့်ထူး၏နိဂုံးပိုင်းကို အောက်ပါအတိုင်းပြောပြပါတော့သည်။ “ဆောင်းနှောင်းနေ့တနေ့ရဲ့ နံနက်အာရုံဦး။ ဗိုလ်ကြီးမြင့်ထူး အခန်းမှအချက်ပေးသံကြောင့် ကျနော်လန့်နိုး ခဲ့ရပါတယ်။ သူက တညလုံးကိုက်ခဲ ညောင်းညာနေပြီး ဆီးသွား၍သိပ်မရကြောင်း- ဆီးအနည်းငယ်ထွက်ဖို့ ညှစ်လျှင် ဆီးအိမ်နဲ့ဆီးစပ်တ၀ိုက် အင်မတန်နာကျင်ကိုက်ခဲနေကြောင်း - ရှိသည့်သောက်ရေလည်းကုန် သွားပြီဖြစ်လို့ ရေအနည်းငယ်ပေးဖို့ ပြောပါတယ်။ ကျနော်လည်း ချက်ခြင်း ရေတံဂေါင်းထဲမှာရှိသမျှရေကို အပေါက်ကြားမှ ဇွန်းမြီးဖျားထိုးပြီး တဖြည်းဖြည်းလောင်းချပေးလိုက်ပါတယ်။ ရေအ၀သောက်ဖို့နဲ့ စိတ်အေးအေးထားဖို့- မနက်မိုးလင်းလို့ တာဝန်ကျအစောင့်တွေလာရင် နေမကောင်းကြောင်း သတင်းပို့ဖို့ အားပေးစကား ပြောလိုက်ပါတယ်။ အဲဒီနေ့မနက်ပိုင်း အချုပ်သားတွေကို ချေးအိုးသေးအိုးသွန်ဖို့နဲ့ မျက်နှာသစ်ကြဖို့ထုတ်တဲ့အခါ သူရဲ့မျက်နှာအထူးနွမ်းလျနေပြီး ခြေထောက်အစုံဟာလည်း အထူးအားယူပြီး လျှောက်နေရတာကို သတိပြုမိပါတယ်။ နေ့ခင်း ကျနော်နဲ့သူနဲ့ စကားပြောကြစဉ်ကလည်း သူ့အသံတွေဟာ တုန်ရီနေပြီး အားအင်ချိနဲ့နေတာက အထင်းသားပေါ်လွင်နေပါတယ်။ သူက အစောင့်တာဝန်ကျတွေကို နေမကောင်းကြောင်း၊ ရေပိုပေးဖို့ ပြောပြပြီးဖြစ်ကြောင်း၊ အစောင့်များက ဆရာဝန်လာရင် သတင်းပို့ပေး မယ်လို့ပြောကြောင်း၊ သူ့ကိုသနားတဲ့ အစောင့်တဦးကတော့ ရေတံခေါင်းအပိုတခုလာပေးကြောင်း၊ ယနေ့ နေ့လည်စာ စားမ၀င်ကြောင်း၊ ရင်ပြည့်ပြီးစားချင်သည့်စိတ်မရှိကြောင်း၊ ရေကိုသာ ကြိုးစား သောက်နေကြောင်း၊ ကိုက်ခဲနာကျင်သည့်ဒဏ်ကတော့ ပျောက်မသွားသေးကြောင်း၊ ဆီးသွားရမှာကိုပင် နာကျင်လွန်းလို့ ကြောက်နေမိကြောင်း၊ ဦးနှောက်တွေလည်း မူးဝေထိုင်းမှိုင်းနေပြီး မျက်စိများလည်းကြည့်ရ သည်မှာ မှုန်ဝါးဝါးဖြစ်နေကြောင်း၊ တခါတရံ မိုက်ကနဲမိုက်ကနဲဖြစ်တတ်ကြောင်း တတ်နိုင်သမျှလဲလျောင်း အိပ်စက်နေလိုကြောင်း စသည်များကိုပြောပါတယ်။ ညနေပိုင်း ထမင်းစားပြီးချိန်တွင် ကိုအောင်သူသည် ဗိုလ်ကြီးမြင့်ထူးနှင့် ဆက်သွယ်ပေမဲ့လည်း ၂ မိနစ်ခန့်ကြာမှသာ ဗိုလ်ကြီးမြင့်ထူးမှ ပြန်လည်ဆက်သွယ် နိုင်ပါတယ်။ အစာစားလိုစိတ်မရှိလို့ ညနေစာ မစားကြောင်း၊ ဆီးသွားရတာလည်း အင်မတန်ခက်ပြီး ဆီးစပ် တပြင်လုံး ပြင်းပြင်းထန်ထန် ကိုက်ခဲနာကျင်နေကြောင်း၊ ဒါ့အပြင်အဖျားသွေးလည်း ရှိနေကြောင်း၊ အခုအထိလည်း ဆရာဝန်လာမကြည့်ကြောင်း၊ ဖက်ဆစ်စစ်အာဏာရှင်တို့ရဲ့ ငရဲခန်းတွေမှာ နေထိုင်မကောင်းတဲ့ ဒီမိုကရေစီဘက်တော်သားတွေကို လူချင်းမစာနာ သေရင်လည်းပြီးရောဆိုပြီး ဂရုမစိုက်ပဲပစ်ထားတဲ့ ပုဂ္ဂိုလ်တွေအများအပြားရှိမှာမလွဲကြောင်း၊ သူကတော့ ဘာမဆိုရင်ဆိုင်ဖို့အသင့် ရှိနေပြီ ဖြစ်ကြောင်းများကို တလုံးချင်းအားယူပြီး ပြောပြပါတယ်။ နောက်ပြီးမှ- ကိုအောင်သူရေ အခြေအနေ ပေးသေးရင်လည်း နက်ဖြန်မှ ပြန်ဆုံကြတာပေါ့ - လို့ပြောပါတယ်။ ကျနော်ကလည်း ညမှာ နွေးနွေးထွေးထွေးအိပ်ဖို့ အရေးပေါ် အခြေအနေဖြစ်ရင် လျှို့ဝှက်ဆက်သွယ်ဖို့ပြောပြီး လူချင်းခွဲလိုက်ကြပါ တယ်။ အဲဒီ ညဦးပိုင်းမှာတော့ အခြေအနေဟာ ငြိမ်သက်နေပေမယ့်လည်း နံနက် ၁ နာရီကျော်ကျော်ပိုင်း မှာတော့ ကျနော် အိပ်ယာကလန့်နိုးလာခဲ့ပါတယ်။ လန့်နိုးတဲ့အကြောင်းရင်းက ဗိုလ်ကြီးမြင့်ထူးအခန်းမှ ငြီးသံကို တချက်တချက်ရလို့ပါပဲ။ ကျနော်က အချက်ပေးပြီးခေါ်ယူပေမယ့်လည်း ဗိုလ်ကြီးမြင့်ထူး မလာပါ။ သစ်သားနံရံအက်ကြောင်း လျှို့ဝှက်ပေါက်လေးကြားမှ သူ့အခန်းကိုချောင်းကြည့်လိုက်တော့ မီးရောင် မှုန်ဝါးဝါးအောက်ကုတင်ပေါ်မှာ ဗိုလ်ကြီးမြင့်ထူးဟာ ဘယ်ဖက်ကိုစောင်းအိပ်ရင်း တကိုယ်လုံး တုန်ရီနေ တာကိုသတိပြုမိပါတယ်။ ဒါကြောင့် ဗိုလ်ကြီးမြင့်ထူး အဖျားတက်နေပြီဆိုတာ ကျနော် ကောက်ချက် ချလိုက်ပါတော့တယ်။ ကျနော်လည်း အခန်းချင်းကပ်ရက်ဖြစ်နေပေမဲ့လည်း ဘ၀တူကိုယ့်ရဲဘော်ရဲဘက် တယောက်ကို ဘယ်လိုမှအကူအညီမပေးနိုင်တဲ့စစ်အာဏာရှင်တို့ရဲ့အချုပ်သားဘ၀ကို နာကျည်းနေမိပါ တယ်။ အဲဒီညကတော့ ဗိုလ်ကြီးမြင့်ထူး ပြန်လည်ကျန်းမာလာပါစေလို့ ဆုတောင်းပေးရုံကလွဲပြီး ကျနော် ဘာမှမတတ်နိုင်ခဲ့ပါ။ နောက်တနေ့နံနက် အချုပ်သားတွေအပြင်ထုတ်ချိန်မှာတော့ ဗိုလ်ကြီးမြင့်ထူး ထွက်တာ မတွေ့ရပါ။ နံနက်၁၀ နာရီသာသာခန့်မှာတော့ ဗိုလ်ကြီးမြင့်ထူးအခန်း သော့ဖွင့်သံကြားပြီး ၃မိနစ်ခန့် အကြာမှာ အခန်းသော့ပြန်ပိတ်သွားပြီး လူ၂ဦး ၃ဦး လမ်းလျှောက်ထွက်ခွာသွားသံကို ကြားမိပါတယ်။ အခြေအနေ ခေတ္တငြိမ်သက်သွားအောင်စောင့်ဆိုင်းပြီးမှ ကျနော်လည်း ဗိုလ်ကြီးမြင့်ထူးအခန်းကို လျှို့ဝှက် ပေါက်ကလေးမှ လှမ်းကြည့်မိပါတယ်။ ဗိုလ်ကြီးမြင့်ထူးကတော့ အိပ်ယာပေါ်မှာပဲ ပက်လက်လှန်ပြီး အိပ်ပျော်နေပုံရပါတယ်။ သို့ပေမယ့် ကိုယ်ပေါ်မှာခြုံထားတဲ့စောင် တုန်ခါနေတာမြင်ရလို့ အဖျားတက်နေတုံးပဲ ဆိုတာသတိပြုမိပါတယ်။ ကျနော်လည်း အခြေအနေပေးရင်ပေးသလို ဗိုလ်ကြီးမြင့်ထူးကို ချောင်းကြည့်ပေမယ့် ပက်လက်အိပ်နေတာရယ် တကိုယ်လုံးတုန်ရီနေတာကလွဲပြီး ဘာမှမမြင်ရပါဘူး။ အဲ ည ၇ နာရီထိုးခါနီးမှာတော့ ဗိုလ်ကြီးမြင့်ထူးရဲ့အချက်ပေးသံကို ကြားလိုက်ရပါတယ်။ ကျနော် အတော် ၀မ်းသာသွားမိပါတယ်။ ဘာကြောင့်လဲဆိုတော့ သူ့အခြေအနေကောင်းလာတာဖြစ်မှာပဲလို့ မျှော်လင့်တဲ့အ တွက်ပါပဲ။ ဒါပေမယ့် သူနဲ့စကားစပြောရင်ပဲ ကျနော့်မျှော်လင့်ချက်ဟာ အင်မတန်မှားယွင်းသွားပြီဆိုတာ သိလိုက်ပါတော့တယ်။ ဘာပြုလို့လဲဆိုတော့ သူ့အသံဟာ တုန်ရီမောဟိုက်နေတဲ့အပြင် စကားတလုံး တလုံးကို အားယူပြီးပြောနေရလို့ပါပဲ။ “ကိုအောင်သူ၊ ကျနော် ခင်ဗျားနဲ့နောက်ဆုံးစကားပြောချင်လို့ ကျနော့် ကုတင်ကနေ ဒီနေရာကို အထူးကျိုးစားပြီးလာခဲ့ရတယ်။ မနက်ပိုင်းက ဆေးတပ်ကြပ်ကြီး ခဏလာမေးမြန်း ပြီး အကိုက်အခဲပျောက်ဆေး၊ ငှက်ဖျားဆေး စတာတွေပေးသွားတယ်။ ဆေးမှူးကိုတင်ပြပြီး ဆေးမှူး လာရောက်စစ်ဆေးပြီးမှ လိုအပ်ရင်ဆေးရုံတင်ဖို့ အထက်ကိုတင်ပြပြီး ဆောင်ရွက်ပေးမယ်လို့ ပြောသွား တယ် ” “ဒါပေမယ့်လည်း ကျနော့်အခြေအနေကျနော်သိပါတယ် ကိုအောင်သူရယ်။ ဖက်ဆစ်တွေရဲ့ လူမဆန် ရက်စက်ယုတ်မာတဲ့ ညှဉ်းဆဲမှုဒဏ်တွေအပြင် အမျှင်မပြတ်တဲ့ငှက်ဖျားကလည်း ပြန်ဝင်လာပြီဆိုတော့ ကျနော့်အတွက် မျှော်လင့်ချက်မရှိတော့ပါဘူး။ ကျနော့်မျက်စေ့တွေလည်းဝါးကုန်ပြီ၊ ဘာကိုမှ ထင်ထင်ရှားရှား မမြင်ရတော့ဘူးဗျာ” “ဒီတော့ အချိန်ရတုန်းလေး ကျနော်မှာချင်တာလေးတွေ မှာခဲ့ပါရစေ။ ပထမဆုံး အချက်ကတော့- သင့်တော်တဲ့အချိန်အခါရောက်ရင် ကျနော်တယောက် ဖက်ဆစ်စစ်အာဏာရှင်တွေရဲ့ ရေကြည်အိုင်ငရဲစခန်းမှာ ဘယ်လိုဇာတ်သိမ်းသွားတယ်ဆိုတာ - ပြည်သူတွေကို တင်ပြအသိပေး ပေးပါ။ ဒုတိယအချက်ကတော့ ပြည်သူတွေနဲ့အဖွဲ့အစည်းအားလုံးကို ယုံယုံကြည်ကြည် တက်တက်ကြွကြွ စည်းလုံးညီညွတ်စွာနဲ့ ဒီမိုကရေစီရေးအတွက် ဆက်လက်တိုက်ပွဲဝင်သွားကြပါလို့။ နောက်ဆုံးမှာချင်တဲ့အချက်ကတော့- ကျနော်တို့နိုင်ငံ ဒီမိုကရေစီရမှ သပြေတခက်ရေချမ်းခွက်နဲ့ ရောက်ရာဘ၀ကကျနော့်ကို အမျှဝေပေးပါလို့” အာဇာနည် ဗိုလ်ကြီးမြင့်ထူးဟာ တိုင်းပြည်ကို ဒီမိုကရေစီနိုင်ငံအနေနဲ့ မြင်သွားချင်ပေမယ့် သူ့ဆန္ဒမပြည့်ဝခဲ့ပါဘူး။ ဖြစ်ရပ်မှန် သူ့ရဲ့ကြေကွဲဖွယ်ဇာတ်လမ်းကို ဆက်လက်တင်ပြသွားပါမယ် ခင်ဗျား။
0 comments:
Post a Comment