ငြိမ်းချမ်းရေးပဲ့တင်သံ အပိုင်း(၉) (မျိုးမြင့်ချို)ဇူလိုင် ၅ ရက် ၂၀၁၂ နေ့က အာရ်အက်ဖ်အေမှထုတ်လွှင့်ပြီးဖြစ်ပါတယ်။
သောတရှင်များခင်ဗျား..
၆၃ ဇူလိုင် (၃၁) ရက်နေ့မှာ(၃) ပါတီငြိမ်းချမ်းရေးပဏာမကိုယ်စားလှယ်အဖွဲ့ရဲ့ တင်ပြတောင်းဆိုချက်တွေ ထွက်လာပြီး သြဂုတ်လ (၇) ရက်နေ့ မှာတော့ တော်လှန်ရေးကောင်စီက ပြန်ကြားခဲ့ရာမှာ - နံပတ်တစ်တောင်းဆိုချက်ဖြစ်တဲ့ “ပဏာမဆွေးနွေးပွဲပြီးချိန်မှ ထပ်မံ၍တွေ့ဆုံဆွေးနွေးရေးပြီးဆုံးချိန်အထိ တပြည်လုံးအပစ်အခတ်ရပ်စဲ ထားရန်” ဆိုတဲ့အပေါ် မှာ “တော်လှန်ရေးကောင်စီနဲ့တွေ့ဆုံဆွေးနွေးချိန်အတွင်း (၃) ပါတီအနေနဲ့ ပိုင်ပိုင်နိုင်နိုင်တာဝန်ယူနိုင်တဲ့ဒေသတွေမှာပဲ အပစ်အခတ်ရပ်ထားရင်လုံလောက်ပြီလို့ယူဆကြောင်းပြောပြီး တစ်ပြည်လုံး အပစ်အခတ်ရပ်စဲရေးတောင်းဆိုချက်ကို ပယ်ချခဲ့ပါတယ်။
နံပတ်နှစ်တောင်းဆိုချက်ဖြစ်တဲ့ “အဖွဲ့အစည်းတစ်ခုချင်းအတွင်းမှာရော (၃) ပါတီကြားမှာရော၊ အခြားပါတီများနှင့်ရော၊ တော်လှန်ရေးကောင်စီနဲ့ရောညှိနှိုင်းရေးအတွက် လုံလောက်သည့်အချိန်ရရှိရေးနှင့် သွားလာဆက်သွယ်ခေါ်ယူရေးများအတွက် တော်လှန်ရေးကောင်စီက လိုအပ်သောလုံခြုံမှု၊ ကူညီမှုပေးရန်” ဆိုတာကိုတော့ “တောတွင်းလက်နက်ကိုင်အဖွဲ့အစည်းတွေ အမျိုးမျိုးအဖုံဖုံကွဲပြားနေပြီး သီးခြားစီဖြစ်နေကြ ကြောင်း၊ အသွင်အပြင်၊ ရည်ရွယ်ချက်မတူတဲ့အဖွဲ့အစည်းတွေကြားမှာ ညှိုနှိုင်းဖို့မလွယ်ကူတဲ့အကြောင်း၊ တွေ့ဆုံဆွေးနွေးရေးကိုကြန့်ကြာစေပြီး အချိန်ကုန်ရုံပဲရှိမယ့်အကြောင်း၊ ဒါ့ကြောင့် အခုလာဆက်သွယ်တဲ့ ဒီ(၃)ပါတီနဲ့ပဲ တိုက်ရိုက်ဆွေးနွေးမယ့်အကြောင်းပြောပြီး ဒုတိယအချက်ကိုလည်း အစိုးရကပယ်ချခဲ့ပါတယ်။
နံပတ်သုံးတောင်းဆိုချက်ဖြစ်တဲ့ “တော်လှန်ရေးကောင်စီနဲ့ တောတွင်းလက်နက်ကိုင်ပါတီအဖွဲ့အစည်းများ တွေ့ဆုံဆွေးနွေးရာတွင် နှစ်ဦးနှစ်ဘက်မှ အပြန်အလှန်တင်ပြချက်များအပြည့်အစုံကိုအသံလွှင့်ပေးရန်နှင့် သတင်းစာကွန်ဖရင့်ပြုလုပ်ရှင်းလင်းခွင့်၊ စာနယ်ဇင်းများတွင် အပြည့်အစုံရေးသားခွင့်များရရှိစေရန်” ဆိုတာကိုတော့ “တွေ့ဆုံဆွေးနွေးပွဲ ပြီးဆုံးအောင်မြင်သောအခါ နှစ်ဦးနှစ်ဘက် သဘောတူညီကြသည့်အတိုင်း တိုင်းပြည်သို့ကြေညာချက်များထုတ်ပြန်သွားရန်နဲ့ အကယ်၍ တွေ့ဆုံဆွေးနွေးရေးမအောင်မြင်၍ ဆွေးနွေးပွဲရပ်စဲရသည့်အခါ တောတွင်းကိုယ်စားလှယ်များ ကိုယ့်နေရာကိုယ်မပြန်ခင် ၎င်းတို့၏ ဆွေးနွေးပွဲအပေါ်သဘောထားကြေညာချက်ကို ထုတ်ပြန်ခွင့်ပြုမည်” ဆိုပြီး တောင်းဆိုတင်ပြချက် ၃ ခုစလုံးကိုအပြီးသတ်ပယ်ချလိုက်ပါတယ်။ အဲဒီ ပြန်ကြားချက်ကို ၆၃ ခုနှစ် သြဂုတ်လ (၇)ရက်နေ့စွဲနဲ့ ဗိုလ်မှူးကြီး စောမြင့်က လက်မှတ်ထိုးထုတ်ပြန်ခဲ့တာဖြစ်ပါတယ်။
သောတရှင်များခင်ဗျား…
ဗဟိုဗဟိုချင်းအဆင့်တူငြိမ်းချမ်းရေးဆွေးနွေးပွဲမတိုင်မီ ကြိုတင်ပြင်ဆင်ဖို့ရာ (၃) ပါတီပဏာမကိုယ်စားလှယ်တွေနဲ့ တော်လှန်ရေးကောင်စီတို့ရဲ့ အပြန်အလှန်တောင်းဆိုညှိုနှိုင်းကြတာတွေကိုခြုံပြီးကြည့်မယ်ဆိုရင်တော့ (၃) ပါတီဘက်က တောင်းဆိုတင်ပြချက်တွေကို တချို့နေရာတွေမှာ လိုက်လျောသယောင်ထင်ရပေမယ့် သေသေချာချာပြန်ဆန်းစစ်ကြည့်တော့ အားလုံးကိုတစ်ဘက်သတ် အပြတ်ပယ်ချခဲ့တယ်ဆိုတာ မြင်သာတဲ့ကိစ္စဖြစ်နေပါတယ်။
ဒီ့နောက်တော့ ၆၃ ခု သြဂုတ် (၂၈) ရက်နေ့စွဲနဲ့ “တော်လှန်ရေးကောင်စီရဲ့ပြန်ကြားချက်အပေါ် ဗဟိုကော်မတီမှလေ့လာဆွေးနွေးနေကြာင်း” ခေါင်းစည်းစာနဲ့ အချက်သုံးချက်ပါပြန်ကြားချက်တစ်စောင်ကို ကေအင်န်ယူပါတီက မန်းဘဇန်၊ မွန်ပြည်သစ်ပါတီကနိုင်ဘလွင်နဲ့ ကရင်နီအမျိုးသားတိုးတက်ရေးပါတီက မော်ရယ်တို့ လက်မှတ်ထိုးပြီးထုတ်ပြန်ခဲ့ပါတယ်။
အဲဒီမှာပါတဲ့အချက် (၃)ချက်အနက် တစ်အချက်က..(၃)ပါတီပဏာမကိုယ်စားလှယ်အဖွဲ့ဝင်တွေဟာ သက်ဆိုင်ရာပါတီဋ္ဌာနချုပ်တွေဆီ ချောချောမောမော ပြန်ရောက်လာပြီဖြစ်ကြောင်း
နှစ်တချက်က… ပြည်တွင်းငြိမ်းချမ်းရေးကိစ္စဟာ အထူးအရေးကြီးတဲ့ပြဿနာလို့ ရှူမြင်တဲ့အတွက်
(၃)ပါတီက ဗဟိုကော်မတီတွေ အလေးအနက ညှိနှိုင်းဆွေးနွေးနေကြတဲ့အကြောင်း၊ အချိန်အနည်းငယ်ကြာမှာဖြစ်လို့ တော်လှန်ရေးကောင်စီဘက်က သံသယကင်းကင်းနဲ့သည်းခံစောင့်ဆိုင်း ပေးရန် မေတ္တာရပ်ခံတဲ့အကြောင်း၊ အခု ဆွေးနွေးညှိုနှိုင်းနေတာတွေနဲ့ (၃) ပါတီ ဗဟိုကိုယ်စားလှယ်အဖွဲ့က တော်လှန်ရေးကောင်စီနဲ့ဆွေးနွေးဖို့ အမြန်ဆုံးကြိုးစားလာရောက်မှာဖြစ်ကြောင်း
သုံးအချက်ကတော့..(၃) ပါတီဗဟိုကော်မတီတွေဆွေးနွေးနေကြစဉ်အတွင်း သြဂုတ်လ (၂ဝ) ရက်နေ့မှာ တော်လှန်ရေးကောင်စီက အလံနီကွန်မြူနစ်ပါတီနဲ့တွေ့ဆုံဆွေးနွေးနေတာကို အပြီးအပိုင်ဖျက်သိမ်းလိုက်တဲ့အကြောင်း ရေဒီယိုကနေကြေညာသွားတာကိုကြားရပေမယ့် အကျိုးအကြောင်းမသိရသေးတဲ့အတွက် ဘာမှ ဆွေးနွေးဝေဘန်တာမလုပ်လိုသေးတဲ့အကြောင်း၊ ဆွေးနွေးပွဲပျက်ရတာနဲ့ပတ်သက်လို့ တော်လှန်ရေးကောင်စီက ပြောထားသလို “အလံနီကွန်မြူနစ်ပါတီနှင့် တွေ့ဆုံဆွေးနွေးရေးရပ်စဲလိုက်ရစေကာမူ ကျန် တောတွင်းလက်နက်ကိုင်အဖွဲ့အစည်းများက ပြည်တွင်းငြိမ်းချမ်းရေးတည်ဆောက်ရန် ရိုးသားစွာကမ်းလှမ်းဆောင်ရွက်ပါက ဆက်လက်ဆောင်ရွက်သွားမည်ဖြစ်သည်” လို့ဆိုထားတာဟာ ကျန်ရှိသေးတဲ့ တောတွင်းလက်နက်ကိုင်အဖွဲ့အစည်းအားလုံးနဲ့အကျုံးဝင်ပြီး လေ့လာစဉ်းစားစရာလို့ထင်မြင်တဲ့အကြောင်း၊ ဒါ့နဲ့စပ်လျဉ်းပြီး တော်လှန်ရေးကောင်စီရဲ့သဘောထားအပြည့်အစုံကို (၃) ပါတီထံသို့ တနည်းနည်းနဲ့ အကြောင်းပြန်ပေးဖို့ မေတ္တာရပ်ခံထားတာတွေ့ရပါတယ်။
ချက်ချင်းဆိုသလိုပဲ တော်လှန်ရေးကောင်စီဘက်ကလည်း အကြောင်းပြန်ပေးခဲ့တာရှိပါတယ်။ အလံနီကွန်မြူနစ်ပါတီနဲ့ ဆွေးနွေးပွဲပျက်ခဲ့ရပေမဲ့ လက်ရှိပြောလက်စ (၃) ပါတီနဲ့မသက်ဆိုင်တဲ့အကြောင်း၊ ဒါ့ကြောင့် ဆွေးနွေးလက်စကို ဆက်လုပ်သွားမှာဖြစ်ကြောင်း ၆၃ ခု စက်တင်ဘာ (၇) ရက်နေ့မှာ ထုတ်ပြန်ဖြေကြားခဲ့ပါတယ်။ ဒီ အပြန်အလှန်ထုတ်ပြန်ချက်တွေကြည့်ရင် အလံနီကွန်မြူနစ်ပါတီနဲ့ဆွေးနွေးပွဲပျက်ခဲ့တာအပေါ်မှာ (၃) ပါတီအတွင်း စိုးရိမ်မှုတစ်ချို့ရှိနေပေမဲ့ ဆွေးနွေးရေးဆက်လုပ်သွားလိုတဲ့ဆန္ဒကိုမြင်ရမှာဖြစ်သလို အစိုးရဘက်ကလည်း ဆက်လုပ်မယ်ဆိုတဲ့သဘောထားနဲ့ ပြန်ကြားခဲ့တာကိုလည်း မြင်ကြရမှာဖြစ်ပါတယ်။
သောတရှင်များခင်များ… အဲဒီအချိန်က ကရင့်တော်လှန်ရေးအင်အားစုများအတွင်းမှာလည်း စောဟန်တာသာမွှေးဦးဆောင်တဲ့(ကရင့်တော်လှန်ရေးကောင်စီလို့ခေါ်တဲ့ KRC ဆိုတာရှိနေခဲ့သလို မန်းဘဇန်ဦးဆောင်တဲ့ ကေအင်န်ယူပါတီလည်းရှိနေခဲ့တာဖြစ်ပါတယ်။ အခု (၃)ပါတီ ကိုယ်စားလှယ်တွေပြောတဲ့ (မဒညတ) လို့ဆိုတဲ့ အမျိုးသားဒီမိုကရေစီညီညွတ်ရေးတပ်ပေါင်းစုမှာတော့ KRC မပါပဲ၊ ကေအင်န်ယူပါတီ၊ ဗမာပြည်ကွန်မြူနစ်ပါတီ၊ ချင်းဦးစီးအဖွဲ့၊ မွန်ပြည်သစ်ပါတီနဲ့ ကရင်နီ အမျိုးသားတိုးတက်ရေးပါတီတို့သာ ပါဝင်တာဖြစ်ပါတယ်။
နောက်တပတ်ဆက်ပါဦးမယ်။
ကျနော် မျိုးမြင့်ပါခင်ဗျား။
မျိုးမြင့်
0 comments:
Post a Comment