နန်းပြာသာဒ်...၊ စိန်ပန်းနီ...၊ ပင်မဆောင်...၊ ရေနီမြောင်း (ဆူးငှက်)

နန်းပြာသာဒ်...၊ စိန်ပန်းနီ...၊ ပင်မဆောင်...၊ ရေနီမြောင်း (ဆူးငှက်) တက်ခေတ်မြန်မာလူငယ်များရဲ့ နယ်ချဲ့အစိုးရကို စုစည်းတွန်းလှန်အာခံကြရာမှာ ၁၉၂၀ ခုနှစ် ဒီဇင်ဘာလ ၇ ရက်နေ့က ရန်ကုန်တက္ကသိုလ်မှာပေါ်ပေါက်ခဲ့တဲ့ ပထမကျောင်းသားသပိတ်ကြီးက အထင်အရှားဖြစ်ပါတယ်။ မြန်မာပြည်ဘုရင်ခံ ဆာရယ်ဂျီနယ်ကရက်ဒေါက်က ၁၉၂၀ပြည့်နှစ် ဒီဇင်ဘာ ၁ ရက်နေ့မှာပြဌာန်းလိုက်တဲ့ The University Act (တက္ကသိုလ်အက်ဥပဒေ)ကိုမကျေနပ်လို့ တက္ကသိုလ်ကျောင်းသား ကိုဘဦးအပါအ၀င် ကျောင်းသား ၁၁ ဦး ခေါင်းဆောင်တဲ့ ပထမကျောင်းသားသပိတ်ကြီး ပေါ်ပေါက်ခဲ့ခြင်းဖြစ်ပါတယ်။ ဒီသပိတ်ကြီးကြောင့် တစ်တိုင်းပြည်လုံး အသိပညာတွေတိုးတက်မြင့်မားလာခဲ့တယ်။ ပညာရေးနဲ့ပတ်သက်တဲ့အမြင်တွေလည်း ကျယ်ပြန့်လာခဲ့တယ်။ ကျောင်းသား၊ ပြည်သူ၊ ရဟန်းရှင်လူတို့ရဲ့ ပူးပေါင်းညီညွတ်မှု လူထုတိုက်ပွဲတန်ဖိုးတွေနားလည်လာကြတယ်။ တိုးတက်တဲ့ သခင်ကျင့်၊ သခင်စိတ်ဓာတ်၊ သခင်အတွေးအခေါ်အတွက် စစ်မှန်တဲ့ပညာရေးလိုအပ်မှုတွေသဘောပေါက်လာကြတယ်။ ကောလိပ်၊ တက္ကသိုလ်ကျောင်းတွေ တိုးချဲ့ဖွင့်လှစ်ပေးဖို့ လိုလားလာကြတယ်။ အထက်မြန်မာပြည် မန္တလေးမြို့တော်မှာ ဥပစာကောလိပ်ကျောင်းတစ်ကျောင်းဖွင့်လှစ်ပေးဖို့ မန္တလေးသား ဗဟိုစည်ဦးဘဦး၊ ရသေ့ကြီးဦးခန္တီ၊ ကျောက်စာဝန်တော်စိန်ခိုတို့ဦးဆောင်ပြီး မန္တလေးမြို့လူထုက တောင်းဆိုကြတယ်။ အကယ်၍ အင်္ဂလိပ် အစိုးရကမလိုက်လျောရင်... မြို့လူထုက ကိုယ့်အလှူငွေနဲ့ကိုယ်... ကိုယ့်မြို့မှာ ကောလိပ်ကျောင်းတွေ ဖွင့်မယ်လို့လည်း တင်းမာလာကြတယ်။ နိုင်ငံရေးမျက်နှာစာဖက်ကလည်း ဂျီစီဘီအေဦးချစ်လှိုင်က ဦးဆောင်ပြီးတောင်းဆိုမှုတွေဖြစ်လာပါတယ်။

ဒါကြောင့်လည်း ၁၉၂၃ခု နိုဝင်ဘာလမှာ ၀ံသာနုခေါင်းဆောင် ဦးဘဘေက ဥပဒေပြုကောင်စီမှာ ၁၉၂၀ ပြည့်နှစ်တက္ကသိုလ်အက်ဥပဒေကိုပြင်ဆင်ဖို့ ဥပဒေကြမ်းတင်သွင်းခဲ့ပါတယ်။ ပထမအဆင့်အနေနဲ့ ၁၉၂၄ ခု ဧပြီလမှာ အစိုးရက ဒီဥပဒေကိုပြင်ဆင်ဖို့အတည်ပြုပေးခဲ့ရတယ်။ ၁၉၂၄ခု ပြင်ဆင်ချက်ဥပဒေအရ အထက်မြန်မာပြည်မှာ ဥပစာကောလိပ်တစ်ကျောင်း ဖွင့်လှစ်နိုင်ရေးအတွက် ဇွန်လမှာပဲ ကော်မတီတစ်ရပ် ဖွဲ့စည်းပေးခဲ့ပါတော့တယ်။ ဒီကော်မတီက အထက်ဗမာပြည်အတွက် ဥပစာကောလိပ်ကို မန္တလေးမှာပဲ ဖွင့်လှစ်ဖို့ဆုံးဖြတ်ပြီး ၁၉၂၅ခု ဇူလိုင်လ ၄ ရက်နေ့မှာ မန္တလေးတောင်ပြင်ဗောဓိကုန်းရပ်မှာရှိတဲ့ စိုက်ပျိုးရေး သိပ္ပံကျောင်းထဲက တစ်ထပ်တိုက်လေးမှာပဲ မန္တလေးဥပစာကောလိပ်ကို စတင်ဖွင့်လှစ် လိုက်ပါတော့တယ်။ ဒီတစ်ထပ်တိုက်လေးဟာ... မန္တလေးတက္ကသိုလ်သက်တမ်းတစ်လျှောက် နယ်မြေအင်ဂျင်နီယာရုံးအဖြစ် ဖွင့်လှစ်ခဲ့တဲ့ တက္ကသိုလ်ဝင်ပေါက်အရှေ့ဘက်က တစ်ထပ်အုတ်တိုက်အနီလေးပဲဖြစ်ပါတယ်။

ယခုထက်တိုင် ခံ့ညားထယ်ဝါစွာမြင်တွေ့နေရဆဲဖြစ်တဲ့ ပင်မအဆောက်အဦကြီးဟာ မန္တလေး ဥပစာကောလိပ်စတင်ဖွင့်လှစ်ခဲ့စဉ်က စိုက်ပျိုးရေးသိပ္ပံရုံးအဆောက်အဦးကြီးအနေနဲ့ တည်ရှိခဲ့တာပါ။ ဒီအဆောက်အဦကြီးဟာ ၁၉၂၁ခု သြဂုတ်လ ၂၉ ရက်နေ့မှာ အုတ်မြစ်ချပြီး ၁၉၂၄ခု ဒီဇင်ဘာ ၂၂ ရက်နေ့ မှာ စိုက်ပျိုးရေးသိပ္ပံရုံးအဖြစ် ဖွင့်လှစ်ခဲ့တာပါ။ ဒုတိယကမ္ဘာစစ်ကြီးဖြစ်အပြီး ၁၉၄၇  ခုနှစ်မှာ မန္တလေး ယူနီဗာစီတီကောလိပ်အဖြစ် ပြန်လည်ဖွင့်လှစ်တော့ ဒီစိုက်ပျိုးရေးသိပ္ပံရုံး အဆောက်အဦကြီးမှာ ဗဟိုစာသင်ခန်းမဆောင်ကြီးအဖြစ် ဖွင့်လှစ်သင်ကြားခဲ့ပြီးနောက် မန္တလေးတက္ကသိုလ်ရဲ့ ပင်မကျောင်းဆောင်ကြီးအဖြစ် ယနေ့ထက်တိုင် ထည်ဝါခံ့ညားစွာ တည်ရှိနေခြင်းပဲဖြစ်ပါတယ်။

မန္တလေးဥပစာကောလိပ်စတင်ဖွင့်လှစ်တော့ ကောလိပ်အုပ်ချုပ်ရေးအဖွဲ့မှာက ကပ္ပတိန်ကျော်ညွန့် (M.D) က သဘာပတိအဖြစ် ဆောင်ရွက်ပါတယ်။ ဆရာဆရာမတွေကတော့ မစ္စတာထင်စီ(M.A) ကျောင်းအုပ်ကြီးနဲ့အင်္ဂလိပ်ဘာသာကထိက၊ ဦးဖိုးသာ(M.Sc) ရူပဗေဒနှင့်ဓာတုဗေဒ ကထိက၊ ဦးလှပေါ်ဦး(M.A)သင်္ချာကထိက၊ မစ္စတာဒက်စ်ဂူပကား ရာဇ၀င်ကထိက၊ ဦးဘကျား(B.A) ပါဠိနှင့်မြန်မာစာ၊ မစ္စတာအက်စ်ဒါမိုဒါရမ် သိပ္ပံပညာနည်းပြတို့ ဖြစ်ပါတယ်။

မန္တလေးဥပစာကောလိပ်ကို အခက်အခဲအမျိုးမျိုးကြားက ကြိုးစားဖွင့်လှစ်ပြီး ရှေ့ခရီးဆက်နိုင်ဖို့ကြိုးပမ်းဆဲမှာပဲ လှေလှော်ရင်း တက်ကျိုးမယ့်ကိန်းဆိုက်မယ့်ဖြစ်ရပ်တစ်ခု ပေါ်ပေါက်လာပါတယ်။ ဒီဖြစ်ရပ်ကတော့ ၁၉၂၆ ခု သြဂုတ်လမှာပဲ ဥပဒေပြုကောင်စီ မှာ ရွှေတောင်းကြားပါတီက မန္တလေးဥပစာကောလိပ်ဟာ ကျောင်းသားဦးရေနည်းလို့ပိတ်ပစ်ဖို့ အဆိုတင်သွင်းခဲ့ပါတယ်။ ဒါပေမယ့် မအောင်မြင်ပါဘူး။ ပကတိစစ်မှန်တဲ့အခြေအနေကြောင့်မဟုတ်ဘဲ၊ ပုဂ္ဂိုလ်စွဲ၊ ဒေသစွဲ၊ ဂိုဏ်ဂဏစွဲနှင့် ကိုယ့်လူမျိုး၊ ကိုယ့်ဘာသာ၊ ကိုယ့်အမျိုးသားရေးကိစ္စဘက်ကိုသစ္စာဖောက်တာမို့ ဒီအဆို မအောင်မြင်တာပဲဖြစ်ပါတယ်။ ဒါနှင့် မကျေနပ်နိုင်ကြ သေးပါဘူး။ မန္တလေးဥပစာကောလိပ်ပိတ်ရေးကိစ္စကို နည်းအမျိုးမျိုးနှင့် ဆက်လက်ကြံစည်နေကြဆဲဖြစ်ပါတယ်။

တကယ်တော့ မန္တလေးဥပစာကောလိပ်ကို ကျောင်းသူ ၂ ယောက် အပါအ၀င် ကျောင်းသား ၃၁ ယောက်နဲ့ပဲ စတင်ဖွင့်လှစ်ခဲ့ပေမယ့်၊ ကျောင်းဘောလုံးသင်းလည်း ထူထောင်နိုင်ခဲ့တယ်။ နောင်နှစ်တွေ နောင်နှစ်တွေမှာ ကျောင်းသူ၊ ကျောင်းသား ၆၆ ယောက်အထိတိုးလာတယ်။ အဆောင်နေကျောင်းသူ ကျောင်းသားလည်း ၁၆ ယောက်အထိထိုးလာတယ်။ ၁၉၂၈ ခုနှစ် ရောက်တော့ မန်းကောလိပ်မဂ္ဂဇင်းကို ပထမထုတ်ဝေလာနိုင် တယ်။ ထူးခြားတာက အဲဒီနှစ်မှာ မန္တလေး ဥပစာကောလိပ်ကျောင်းသား ကိုဘရှိန်းက ဧရာဝတီမြစ်ရိုး တစ်လျှောက် တစ်ကိုယ်တော်စက်ဘီးခရီးစဉ်ကို အောင်မြင်စွာဆင်နွဲနိုင်ခဲ့ခြင်း ဖြစ်ပါတယ်။

ဥပစာကောလိပ်မှာ ပညာရေးသာမက ဘာသာရေး၊ လူမှုရေးပိုင်းလည်းမလစ်ဟင်းတာမို့ ကျောင်းကထိန် ပွဲတော်တွေဟာ စည်ကားလှပါတယ်။ ဒီပွဲတော်တွေမှာ ကျောင်းသူ၊ ကျောင်းသားတွေရဲ့ အနုပညာစွမ်း ရည်တွေလည်း ပြသနိုင်ပါသေးတယ်။ မိုးဒေ၀ါမလှရွှေအဖြစ်ကျော်ကြားလာမယ့် ကျောင်းသူမလှရွှေ၊ မသိန်းညွန့်၊ မသန်းမြင့်တို့ညီအစ်မတွေသာမက၊ မကြည်ကြည်၊ မအုန်းခင်၊ လူထုဒေါ်အမာဖြစ်လာမယ့် မအမာ၊ အမ်အေဒေါ်အုန်းဖြစ်လာမယ့် မအုန်းတို့ကလည်း မန္တလေးသူတွေပီပီ ကျောင်းကပွဲတွေမှာ အစွမ်းပြခဲ့ကြတယ်။

မန္တလေးဥပစာကောလိပ်က မွေးဖွားပေးလိုက်တဲ့ သားကောင်းသမီးကောင်းရတနာတွေလည်း မနည်းလှ ပါဘူး။ ကျောင်းသူ၊ ကျောင်းသားနည်းခဲ့ပေမယ့် အဖိုးတန်ရတနာချည်းမို့ သမိုင်းစာမျက်နှာမှာ ကမ္ပည်းတင် ဂုဏ်မြောက်ခဲ့သူချည်းပါပဲ။ ၀န်ကြီး ဦးကျော်ငြိမ်း၊ စာရေးဆရာသိန်းဖေမြင့်၊ သံအမတ်ကိုလှမောင်၊ ဆိုရှယ်နီ သခင်လေးမောင်၊ ၀န်ကြီး ဗိုလ်ခင်မောင်ကလေး၊ ကိုခင်မောင်မောင်၊ တိုင်းချစ်သခင်သိန်းဖေ၊ စာရေးဆရာဇေယျာမောင်(ကျောင်းအုပ်ကြီး ဦးကိုလေး)၊ သခင်ဗဟိန်း၊ လူထုဒေါ်အမာ၊ အမ်အေဒေါ်အုန်း၊ မိုးဒေ၀ါမလှရွှေ၊ မသိန်းလှ၊ မသန်းမြင့်၊ ဒေါက်တာမောင်ဒီ၊ ပွဲကုန်းကိုလှဖေ၊ ဆရာဝန်စာရေးဆရာ ဒေါက်တာထွန်းရွှေ စသူတို့ဟာ မန္တလေးဥပစာကောလိပ်ကျောင်းထွက်တွေပါပဲ။

ဒီလိုနဲ့ မန္တလေးဥပစာကောလိပ်ဟာ မန္တလေးရွှေမြို့တ်ာကြီးရဲ့သားသမီးရတနာဖြစ်ရုံမက၊ အထက်မြန်မာပြည် ရဲ့ မြေးရတနာလည်းဖြစ်ပါတယ်။ အနှောက်အယှက်အဖျက်အဆီးကြားက ခက်ခက်ခဲခဲမွေးဖွားကြီးပြင်းလာပြီး လူလားမြောက် မတ်တတ်ပြေးတဲ့အရွယ်မို့ ဘိုးဘွားမိဘတွေ ၀မ်းသာပီတိဖြစ်ရပါပြီ။ ၁၉၂၅ ခုနှစ်က မွေးဖွားပြီး အခု ၁၉၃၀ ခုနှစ်ဆိုတော့  ၅နှစ် သားသမီးအရွယ် ဘိုးဘွားမိဘတွေအတွက် စိတ်ကူးယဉ်မှုတွေ၊ မျှော်လင့်ချက်တွေအများကြီး ထားရမယ့်အရွယ်ပါပဲ။ ဒီအချိန်မှာ မြန်မာပြည်ရဲ့ နိုင်ငံရေးမျက်နှာစာမှာ တိုးတက်ပြောင်းလဲမှုတွေ ဖြစ်ပေါ်လာပါပြီ။ မြန်မာပညာတတ်လူငယ်များရဲ့ သခင်အကျင့်၊ သခင်စိတ်ဓာတ် ပိုမိုခိုင်မာစုစည်းအားကောင်းလာပြီး လွတ်လပ်ရေးအတွက် မဆုတ်မနစ်ဦးဆောင်ကြဖို့ သန္နိဋ္ဌာန်ချကြတဲ့ အချိန်လည်းဖြစ်ပါတယ်။ ဒါကြောင့် သခင်ဘွဲ့ခံလူငယ်တွေက ‘တို့ဗမာ အစည်းအရုံးကြီး’ဖွဲ့စည်းခဲ့ပါတယ်။ ဒီအခြေအနေတွေဟာ လူမမယ်မန္တလေးဥပစာကောလိပ်အတွက်လည်း ရှေ့ဆောင်လမ်းပြ မျှော်လင့်ချက်တွေပဲမဟုတ်ပါလား။

၁၉၃၀ခုနှစ်ဟာ တို့ဗမာအစည်းအရုံးကြီး ဖွဲ့စည်းနိုင်ခဲ့တယ်။ ဒါ့အပြင် အင်္ဂလိပ်အပါအ၀င် မဟာမိတ်နိုင်ငံကြီးများ အကျပ်အတည်းကျရောက်တဲ့နှစ်လည်း ဖြစ်ပါတယ်။ မြန်မာပြည်တွင်းမှာ သဿမေဓအခွန်နဲ့ပတ်သက်ပြီး ဆရာစံဦးဆောင်တဲ့လယ်သမားသူပုန်လည်း ပေါ်ပေါက်လာခြင်းနှင့်အတူ ကမ္ဘာ့စီးပွားပျက်ကပ်ကြောင့်လည်း အင်္ဂလိပ်အစိုးရမှာဘေးကျပ်နံကျပ် ဖြစ်တဲ့နှစ်ပါပဲ။ ဒါကြောင့် ‘အင်္ဂလိပ် အခက်၊ ဗမာ့အချက်’ဆိုပြီး မျိုးချစ်လူငယ်တွေရဲ့ လွတ်လပ်ရေးကြိုးပမ်းမှုအရှိန်အဟုန်မြှင့်တင်ကြပါတယ်။ အင်္ဂလိပ်အစိုးရက ဘတ်ဂျက်အသုံးတစ်နှစ်မှာရှစ်သောင်းကျသင့်နေတဲ့ မန္တလေးဥပစာကောလိပ်ကို ပိတ်ပစ်ဖို့အသံတွေ အလိုတော်ရိတွေကြား ဆူဆူညံညံကြားလာရပြန်ပါပြီ။

ဒီတစ်ခါ မန္တလေးမြို့ခံများဖြစ်တဲ့ ဦးစိန်ရိုး၊ ဗဟိုအမျိုးသားကျောင်းအုပ်ကြီးဦးရာဇာတ်၊ အမရပူရ ဦးဘသီ၊ စမစ်ဂန်ဂျာဆင်း၊ ဒေါက်တာဘနှစ်၊ ဒေါ်မြ အစရှိတဲ့ပုဂ္ဂိုလ်များက မန္တလေးဥပစာကောလိပ်ပိတ်ရေး အစီအစဉ်ကို ရှေ့တန်းကကန့်ကွက်ကြတယ်။ ဆရာကြီးဦးရာဇာတ်ဆိုတာ ဗဟိုအမျိုးသားကျောင်း ကျောင်းအုပ်ကြီးဖြစ်ရုံမက၊ မန္တလေးမြို့ခံ ကျောင်းသူကျောင်းသားများ၊ ကျောင်းသားမိဘများက လေးစားမြတ်နိုးအားကိုးသူ မျိုးချစ်တစ်ဦးဖြစ်လေတော့ ဆရာကြီးနောက်မှာလည်း မြို့လူထုက အားပေး ထောက်ခံကြတယ်။ မြို့ခံသတင်းစာတွေကလည်း မန္တလေးဥပစာကောလိပ်ပိတ်မယ့်အရေးကို ဆန့်ကျင် ကန့်ကွက်ကြတယ်။ ဒီအချိန်မှာပဲ မန္တလေးဥပစာကောလိပ်ကျောင်းအုပ်ကြီး အေဒီမာရှယ်က မန္တလေး ဥပစာကောလိပ်ပိတ်ရေးကိစ္စမှာ ကျောင်းသားတွေရဲ့မေးမြန်းမှုအပေါ် မချေမငံဖြေကြားမှုမီပွားကစပြီး အိမ်တော်ရာဘုရား ၁၄ ခန်းဇရပ်ကြီးမှာ ကျောင်းသားတွေကသပိတ်မှောက်ဆန္ဒပြမှု ဖြစ်ပွားခဲ့ပါတယ်။ ဒီဆန္ဒပြမှုအောင်မြင်ရေးအတွက် ဥပစာကောလိပ်ကျောင်းသားတွေက ဗဟိုအမျိုးသားကျောင်းအုပ် ဆရာကြီးဦးရာဇာတ်ဆီက အကြံဥာဏ်များရယူခဲ့ပါတယ်။ အိမ်တော်ရာ ၁၄ ခန်းဇရပ်က ကျောင်းသားတွေရဲ့ သပိတ်မှောက်ဆန္ဒပြမှုက ရဟန်းပျိုသမဂ္ဂ၊ ဈေးချိုတော်နဲ့မန္တလေးမြို့လူထုက အားပေးထောက်ခံခဲ့ပါတယ်။ ဒါကြောင့်လည်း မန္တလေးဥပစာကောလိပ် ပိတ်ပစ်ရေးအစီအစဉ်တွေ မအောင်မြင်ခဲ့ပါဘူး။ ဒီလိုနဲ့ မန္တလေးဥပစာကောလိပ်ဟာ အောင်ပန်း ပန်ဆင်ပြီး ကြွားကြွားဝံ့ဝံ့ ဆက်လက်တည်ရှိခဲ့ပါတယ်။ မန္တလေးဥပစာကောလိပ်ကျောင်းသားများဟာလည်း မန္တလေးဈေးချိုတော်အပါအ၀င် မန္တလေးမြို့လူထုရဲ့ ရင်နှစ်သည်းချာတွေဖြစ်ခဲ့လေတော့ အားလုံးကလည်းအရေးပေးကြပါတယ်။

၁၉၄၂ခုနှစ် ဖေဖေါ်ဝါရီလ ၁၅ ရက်နေ့မှာတော့ အင်္ဂလိပ်တို့အားအကိုးဆုံး စင်္ကာပူခံတပ်ကြီး ဂျပန့် လက်အောက်ကျရောက်ခဲ့ပြီး အဲဒီနှစ်မတ်လ ၈ရက်နေ့မှာတော့ ရန်ကုန်မြို့မှာဂျပန့်အန္တရာယ် စစ်ရိပ်သန်း လာတာမို့ ရန်ကုန်မြို့ကမီးသတ်စက်အပါအ၀င် အုပ်ချုပ်ရေးရုံးတွေ မန္တလေးမြို့ကိုပြောင်းရွှေ့ဆုတ်ခွာ လာကြပါပြီ။ ၁၉၄၂ ခု ဧပြီလ ၃ ရက်(၁၃၀၃ ခုနှစ်၊ နှောင်းတံခူးလဆုတ် ၄ရက် သောကြာ) နေ့၊ နံနက် ၁၀နာရီလောက်မှာ အစင်း ၈၀ လောက်ပါတဲ့ ဂျပန်လေတပ်က မန္တလေးတစ်မြို့လုံးကို စိစိညက်ညက်ကျေအောင် ဗုံးကြဲတိုက်ခိုက်ပါတော့တယ်။ ဒီလိုနဲ့ နောက် ၁ လမျှအကြာ ၁၉၄၂ ခု၊ မေလ ၁ ရက်နေ့မှာတော့ ဂျပန်က မန္တလေးကိုသိမ်းပိုက်လိုက်ပါတော့တယ်။ မန္တလေးဆေးရုံကြီး၊ ဝေလမင်းသမီးမျက်စိနာကုဆေးရုံ၊ ၃ မှတ်၊ ၁၈ မှတ်၊ ၁၁ မှတ်၊ ၁၇ မှတ် ဂတ်တဲတွေ၊ ကြေးနန်းရုံး၊ ဓာတ်စက်ရုံ၊ ကုန်ရုံ၊ ဘူတာကြီး၊ မီးသတ်စက်၊ ရိုးကုမ္ပဏီ၊ အင်ပီရီယယ်လ်ဘဏ်၊ ဗဟိုအမျိုးသား အထက်တန်းကျောင်းအပါအ၀င် လူနေရပ်ကွက်တွေ ဈေးတွေကျောင်းတွေ ဘုရားကျောင်းဇရပ်တွေ စစ်ဒဏ်ကြောင့်ပျက်စီးဆုံးရှုံးခဲ့ပါပြီ။ လမ်းပန်းဆက်သွယ်ရေးတွေပြတ်တောက်၊ တံတားတွေဖျက်ဆီး ခံရတာနှင့်အတူ အင်းဝတံတားကြီးကိုလည်း ၁၉၄၂ ခု ဧပြီ ၃၀ ရက်နေ့မှာပဲ ဂျပန်အ၀င်မှာ အင်္ဂလိပ်ကဗုံးခွဲလို့ ပေါင်းကူးကုန်းမှတ် ၇ နဲ့ ၈ လည်း ကျိုးပြတ်ပျက်စီးကာ အဆက်အသွယ်ပြတ်တောက် ကုန်ပါပြီ။

ဒီအချိန်မှာ မန္တလေးစိုက်ပျိုးရေးကောလိပ် ဓာတုဗေဒဌာနတာဝန်ခံ ဒေါက်တာအာယားနေရာမှာ စစ်မဖြစ်မီ သီသီရုန်းပြီး လန်ဒန်က ရန်ကုန်ကိုပြန်ရောက်လာတဲ့ မန္တလေးဥပစာကောလိပ်ကျောင်းသားဟောင်း ဆရာဦးကိုလေးဟာ မန္တလေးစိုက်ပျိုးရေးကောလိပ်ကိုသာမက မန္တလေးဥပစာကောလိပ်ကိုပါ ထိန်းရသိမ်းရ စောင့်ရှောက်ရပါသေးတယ်။ မန္တလေးမှာ စစ်ကြီးဝင်ရောက်လာတာနဲ့ မန္တလေးဥပစာကောလိပ်လည်း ပိတ်လိုက်ရပါတော့တယ်။

ဂျပန်လက်အောက်ကျရောက်ခဲ့တဲ့ မန္တလေးဟာ ၁၉၄၅ ခု၊ မတ်လ ၂၀ ရက်နေ့မှာတော့ ရဲဘော် ၃ ကျိပ်နှင့် အတူ ပြည်တွင်းကမျိုးချစ်ပါတီများက မဟာမိတ်တပ်တွေနဲ့ပြန်လည်ပူးပေါင်းပြီး ဂျပန့်လက်အောက်က လွတ်မြောက်စေခဲ့ပါတယ်။ တစ်ပြည်လုံးအတိုင်းအတာအနေနဲ့ ၁၉၄၅ ခု မတ်လ ၂၇ ရက်နေ့မှ ဂျပန်ကိုတော်လှန်ခဲ့ပေမယ့် အထက်ဗမာပြည်အနေနဲ့ အခြေအနေနဲ့ အချိန်အခါအရ မတ်လ(၈)ရက်နေ့မှာပဲ ဂျပန်ကို စတင်စစ်ကြေညာခဲ့ပါတယ်။ ဘုရားကြီးအနောက် ၄၅ တာမှာရှိတဲ့ အဆောက်အဦတစ်ခုမှာ အထက်ဗမာပြည်စစ်ရုံးချုပ်ဖွင့်လှစ်ပြီး ဗိုလ်မှူးဗထူးကိုယ်တိုင် ဒီရုံးကနေဂျပန်ကို စစ်ကြေညာလက်မှတ်ရေးထိုးခဲ့တာပါ။ အခုဗိုလ်ဗထူးလမ်းမှာ ဗုဒ္ဓပြတိုက်အဖြစ်ဖွင့်လှစ်ထားတဲ့ အဆောက်အဦးပဲဖြစ်ပါတယ်။ ၁၉၄၅ခု မတ်လ ၂၀ ရက်နေ့ မှာပဲ မန္တလေးမြို့တွင်းမှာ ရန်သူဂျပန်တွေမရှိတော့ကြောင်း ကြေညာလိုက်တာမို့ စစ်ကိုင်းမင်းဝံတောင်ရိုးမှာ တိမ်းရှောင်စစ်ခိုနေတဲ့ မန္တလေးသူ၊ မန္တလေးသားတွေဟာ မတ်လ ၂၃ ရက်ရောက်တော့ ကူးတို့သင်္ဘောကြီးနဲ့ စစ်ကိုင်းဆိပ်ကမ်းက မန္တလေးဘက် အမရပူရစံရွေးဆိပ်ဆီကူးကာ မိမိဇာတိရပ်ဆီ ‘ပြည်တော်ဝင်’နိုင်ခဲ့ကြပါပြီ။

ဂျပန့်လက်အောက်က မန္တလေးလွတ်မြောက်ပြီး ၁၉၄၅ခု ဧပြီလဆန်း ၁၀ ရက်ဝန်းကျင်မှာပဲ မန္တလေး ၈၄ လမ်း ကျောက်သွေးတန်းရပ်က ရန်ကုန်ကိတ်မုန့်တိုက်အဆောက်အဦအပေါ်ထပ်မှာ ဆရာကြီးဦးရာဇာတ်၊ လူထုဦးလှ စသူတို့ဦးဆောင်ကာ အထက်ဗမာပြည် ဖ.ဆ.ပ.လအဖွဲ့ချုပ်ရုံး ဖွင့်လှစ်ပါတယ်။ ဒီရုံးကို ဆရာဦးကိုလေး(စာရေးဆရာ ဇေယျာမောင်) မကြာမကြာရောက်လာပြီး ဆရာကြီးဦးရာဇတ်နဲ့ မန္တလေးဥပစာကောလိပ် ပြန်လည်ဖွင့်လှစ်နိုင်ရေး၊ တက္ကသိုလ်အဆင့်သို့မြှင့်တင်နိုင်ရေးများကို ဆွေးနွေးလေ့ရှိပါတယ်။ ဒီလိုဆွေးနွေးမျှော်လင့်မှုတွေဟာ မကြာခင်မှာ ပြောင်းလဲလာတဲ့ မြန်မာပြည်နိုင်ငံရေးအခြေအနေများနှင့် အကောင်အထည်ပေါ်လာတော့မှာ ဖြစ်ပါတယ်။

ဗိုလ်ချုပ်အောင်ဆန်းဦးဆောင်တဲ့ ဖဆပလအစိုးရအဖွဲ့မှာ ၀န်ကြီးအဖြစ်ဆရာကြီးဦးရာဇတ် ရန်ကုန်ကိုရောက်ရှိပြီးတဲ့နောက် ဆရာဦးကိုလေးကိုလည်း ပြန်ကြားရေးဌာနမှသည် ပညာရေးဌာနသို့ ပြောင်းရွှေ့အမှုထမ်းစေခဲ့ပါတယ်။ ဒါကြောင့် ၁၉၄၆ ခုနှစ် အောက်တိုဘာလမှာပဲ ဆရာဦးကိုလေး တစ်ယောက် ရန်ကုန်တက္ကသိုလ်မှာရောက်ရှိအမှုထမ်းခဲ့ပါပြီ။ ၁၉၄၇ခု ဧပြီလရောက်တော့ ဆရာကြီးဦးရာဇတ်က ဆရာဦးကိုလေးကို ကင်းဘဲလမ်းအိမ်အမှတ် ၁၀ ပေါ်မှာ ခေါ်တွေ့ပြီး မန္တလေးဥပစာကောလိပ်ပြန်ဖွင့်ဖို့ ဥပစာကောလိပ်က ဒီကရီကောလိပ်၊ ဒီကတစ်ဆင့် အထက်ဗမာပြည်အတွက် သီးခြားတက္ကသိုလ်အဖြစ်အဆင့်မြှင့်တင်ဖို့ ဆက်လက်ရွက်ဆောင်ကြိုးပမ်းရန် ကိစ္စတွေမှာကြားပါတော့တယ်။

ဒီလိုနဲ့... ၁၉၄၇ ခုနှစ် မေလ ၂၉ ရက်နေ့မှာ ဆရာဦးကိုလေး(၀ါ)စာရေးဆရာဇေယျာမောင်ဟာ စစ်ကြီးကြောင့်ပိတ်ခဲ့ရတဲ့ မန္တလေးဥပစာကောလိပ်မှာ ကျောင်းအုပ်ကြီးအဖြစ်တာဝန်ယူကာ စစ်ကြီးကြောင့်ပိတ်ခဲ့ရတဲ့ မန္တလေးဥပစာကောလိပ်ကိုပြန်လည်ဖွင့်လှစ်ဖို့ ပြင်ဆင်ရပါတော့တယ်။ ဆရာဦးကိုလေးဟာ စစ်ကြီးကြောင့်ပျက်စီးယိုယွင်းပြီး နေရာပျောက်ခဲ့ရတဲ့ မန္တလေးဥပစာကောလိပ်အတွက် အဖက်ဖက်ကလိုအပ်ချက်တွေ ပြန်လည်စုဆောင်းရှာဖွေတည်ထောင်ပြီး စာသင်ခန်း၊ စာသင်ဆောင်၊ ကျောင်းဆောင်နေရာများပြန်လည်ရယူကာ ကြိုးပမ်းခဲ့တာကြောင့် ဆရာကြီးဦးရာဇတ် မျှော်မှန်းအကောင်အထည်ဖော်စေချင်တဲ့ မန္တလေးယူနီဗာစီတီကောလိပ်အဖြစ် ၁၉၄၈ ခု ဇွန်လမှာပဲ အောင်မြင်စွာဖွင့်လှစ်နိုင်ခဲ့ပါပြီ။ ဒါပေမယ့်... ဆရာကြီးဦးရာဇတ်မှာတော့ သူမျှော်လင့်ခဲ့တဲ့ မန္တလေးယူနီဗာစီတီကောလိပ်ကျောင်းကြီးကိုဖြင့် မြင်တွေ့ခွင့်မရခဲ့တော့ပါဘူး။ မန္တလေးယူနီဗာစီတီကောလိပ်ကြီးမဖွင့်လှစ်မီ ၁ နှစ်ခန့်အလို ကြိုးစားပမ်းစားပြင်ဆင်နေဆဲ ၁၉၄၇ ခုနှစ် ဇူလိုင်လ ၁၉ ရက်နေ့ မှာပဲ အမျိုးသားခေါင်းဆောင်ကြီး ဗိုလ်ချုပ်အောင်ဆန်းနှင့်တကွ အာဇာနည်ခေါင်းဆောင်ကြီး ၉ ဦး ကျဆုံးသွေးမြေကျမှုမှာ ပါဝင်သွားခဲ့ပါပြီ...။  ဒါကြောင့် ၁၉၄၈ ခုနှစ် ဇွန်လမှာ အခက်အခဲကြားကဖွင့်လှစ်လိုက်တဲ့ ‘မန္တလေးယူနီဗာစီတီကောလိပ်’ ကျောင်းတော်ကြီးကို ဆရာကြီးဦးရာဇတ်က ဟို... တမလွန် ကောင်းကင်ဘုံကနေ မဲ့ပြုံးအကြည့်နဲ့ ကျေနပ်ပီတိဖြစ်နေမှာ ကတော့ မလွဲဧကန်ဖြစ်ပါတယ်။

၁၉၄၈ ခုနှစ် ဇွန်လမှာ မန္တလေးယူနီဗာစီတီကောလိပ်ကို ဆရာကြီးဦးရာဇတ်နေရာတာဝန်ယူခဲ့တဲ့ ပညာရေးဝန်ကြီးစောစံဖိုးသင် က လာရောက်ဖွင့်လှစ်ပေးခဲ့ပါတယ်။ မန္တလေးယူနီဗာစီတီကောလိပ်ဖွင့်ပွဲဟာ အဲဒီခေတ် အဲဒီအချိန်ကဖြင့် ကြီးကျယ်ခမ်းနားခဲ့ပါတယ်။ ပညာရေးဝန်ကြီးရောက်ရှိခြင်း၊ မန္တလေးမြို့ဝန်ရဲ့ နှုတ်ဆက်မိန့်ခွန်း၊ ကျောင်းတိုက်အုပ်ချုပ်ရေးသဘာပတိနှုတ်ဆက် မိန့်ခွန်း၊ တက္ကသိုလ်ကျောင်းတိုက်ကျောင်းအုပ်ကြီးအစီရင်ခံစာ၊ ပညာရေးဝန်ကြီးပြန်ကြားမိန့်ဆိုချက်၊ ကျောင်းတိုက်ဝန်း၊ ကျောင်းဆောင်များသို့ပညာရေးဝန်ကြီးလှည်လည်ကြည့်ရှူခြင်း အစီအစဉ်များ ပါရှိခဲ့တယ်။

မန္တလေးဥပစာကောလိပ်ဖွင့်ပွဲအခမ်းအနားမှာဖတ်ကြားခဲ့တဲ့ ကျောင်းအုပ်ကြီးရဲ့အစီရင်ခံစာအစီအစဉ်မှာ ဆရာဦးကိုလေးက အခုလိုရေးသားတင်ပြအစီရင်ခံထားပါတယ်။

ဒီအစီရင်ခံစာမှာပဲ ပစ္စည်းပစ္စယ၊ ပရိဘောဂသာမက၊ ကျောင်းဆောင်၊ စာသင်ခန်းရရှိမှု၊ ဆရာဆရာမ စုဆောင်းရှာဖွေရမှု၊ ပထမဆုံး အမျိုးသမီးအဆောင်ဖွင့်လှစ်ရမှု၊ တက္ကသိုလ်နှင့်ပတ်သက်တဲ့ အရေးတကြီးစီမံဆောင်ရွက်ရမှုတွေကိုလည်း အခုလို ဆက်လက်အစီရင်ခံဖော်ပြခဲ့ပါတယ်။

ယခုစစ်ကြီးအပြီးဖွင့်လှစ်တဲ့ မန္တလေးယူနီဗာစီတီကောလိပ်ရဲ့ကနဦးအစ ၁၉၂၅ ခုနှစ်ကစပြီးဖွင့်လှစ်ခဲ့တဲ့ မန္တလေးဥပစာ ကောလိပ်ကပေါ်ထွက်ခဲ့တဲ့ ထင်ရှားကျော်ကြား တိုင်းပြည်ဂုဏ်ဆောင်ပုဂ္ဂိုလ်များကိုလည်း ဆရာဦးကိုလေးက အစီရင်ခံစာမှာ အခုလို အမှတ်တရဖော်ပြဂုဏ်ပြုလိုက်ပါသေးတယ်။

တကယ်တော့ တက္ကသိုလ်ဆိုတာ စာမေးပွဲအောင်ရုံ၊ ဘွဲ့လက်မှတ်ရရုံပဲလား။ ဒီထက်မက ကျယ်ဝန်းနက်ရှိုင်းတဲ့အဓိပ္ပါယ်ရှိသလားဆိုတာကိုလည်း ဆရာဦးကိုလေးက အစီရင်ခံစာမှာ ရှင်းလင်းပြတ်သားစွာ ဖွင့်ပြခဲ့ပါတယ်။

မန္တလေးယူနီဗာစီတီကောလိပ်ဖွင့်ပွဲအခမ်းအနားမှာ နောက်ထပ်ထူးခြားမှုတစ်ခုကတော့ အနုပညာထွန်းကားတဲ့ရွှေမြို့တော်ကြီးပီပီ ဖွင့်ပွဲအထိမ်းအမှတ် မင်္ဂလာပိုဒ်စုံရတုကို မြန်မာစာနည်းပြဦးလှတင်ကရေးစပ်သီကုံးပြီး မြန်မာစာနည်းပြဆရာမ ဒေါ်သန်းမေက ဂုဏ်ပြုသီဆိုခဲ့ခြင်းပဲဖြစ်ပါတယ်။

ထိုမျှမကသေးပါဘူး ဖွင့်ပွဲအထိမ်းအမှတ် ကျောင်းကပွဲအစီအစဉ်မှာ သီချင်း၊ တေးဂီတ၊ ယိမ်းအကများနှင့်အတူ ဆရာမြို့မငြိမ်းရဲ့တက္ကသိုလ်ကျောင်းတိုက်ဂုဏ်ပြု ပဏာမသီချင်းကို ကျောင်းသူများကသီဆိုကြပြီး ကျောင်းသူမတင်တင်မြင့်နဲ့မစီစီဝင်းတို့က ကပြဖျော်ဖြေခဲ့ကြပြန်ပါတယ်။ ဒီလိုနဲ့ မန္တလေးယူနီဗာစီတီကောလိပ်ကြီးဟာ တစ်နှစ်ပြီးတစ်နှစ် သင်ကြားပို့ချတဲ့ပညာရပ်တွေလည်း တိုးချဲ့လာ...။ ကျောင်းသူ၊ ကျောင်းသားတွေလည်းများပြားလာ ကျောင်းဆောင် အဆောက်အဦးတွေလည်း အသစ်အသစ် ပေါ်ထွန်းလာပါတော့တယ်။ စစ်ကြီးမတိုင်မီက စိုက်ပျိုးရေးသိပ္ပံရုံးအဆောက်အဦးကြီးကိုလည်း ပင်မဗဟိုစာသင်ဆောင်အဖြစ် ဖွင့်လှစ်ခဲ့ပါတယ်။ ၁၉၅၂ ခုနှစ်မှာတော့ မန္တလေးယူနီဗာစီတီကောလိပ်ရဲ့ ရှေ့ဆောင်လမ်းပြ ဆရာကြီးဦးရာဇတ်ကိုဂုဏ်ပြုတဲ့ ရာဇတ်ခန်းမကြီးကိုဆောက်လုပ်ကာ အပေါ်ထပ်မှာ စာကြည့်တိုက်ဖွင့်လှစ်နိုင်ခဲ့ပါပြီ။

ဒီလိုနဲ့ ရွက်ကြွေ... မြေသက်...၊ မိုးစက်သွန်းချ...၊ နှင်းခ ဆောင်းပန်းချီ... ရာသီအလီလီပြောင်းခဲ့ပါပြီ။ ရာသီအလီလီပြောင်း ပေမင့် အညာဒေသရဲ့အမှတ်လက္ခဏာ တမာတန်းရဲ့ အေးမြတဲ့အရိပ်၊ လေအသင့်မှာ နင့်ကနဲသင်းတဲ့တမာပွင့်ရနံ့...၊ ဆည်တော်မြောင်းမကြီးက ဖောက်သွယ်စီးဆင်းစေတဲ့ အေးမြရေနီမြောင်း ရေအယဉ်တွေနဲ့ မန္တလေးတက္ကသိုလ်ရဲ့သဘာဝရှုခင်းတွေဟာ တက္ကသိုလ်မြေကိုရောက်ရှိထိတွေ့၊ ပတ်သက်၊ ခံစားသူတိုင်းမှာ လွမ်းဆွတ်ဖွယ်နှလုံးခိုက်ကြရပါတယ်။

ဒါကြောင့် မန္တလေးတက္ကသိုလ်က ကဗျာစာဆိုတွေကလည်း သူတို့ရေးဖွဲ့တဲ့ကဗျာတွေက မန္တလေးတက္ကသိုလ် အလွမ်းတွေဟာဖြင့် ရသမြောက်ခဲ့ကြတာမို့ ယနေ့အထိ မြန်မာစာပေသမိုင်းမှာ အထင်ကရရှိနေခဲ့ကြတာ ဂုဏ်ယူစရာပါပဲလေ...၊ ဒီကဗျာ...၊ ဒီအလင်္ကာ...၊ ဒီစာပေတွေနဲ့ ရေးစပ်ဆိုသူကျောင်းတော်သားကဗျာဆရာ စာရေးဆရာတို့ရဲ့ဂုဏ်ပုဒ်တွေကလည်း မန္တလေးတက္ကသိုလ်ကျောင်းတော်ကြီးနဲ့အတူ ထွန်းလင်း၊ တောက်ပ၊ ၀င်းလက်လာပါတော့တယ်။ ရေမြင့်တော့ကြာတင့်၊ ကြာတင့်တော့ကန်သာသာတဲ့ သဘောပါပဲလေ။

စာပေအနုပညာ၊ ရိုးရာယဉ်ကျေးမှုမျှသာမက... နိုင်ငံရေးမျက်နှာစာမှာလည်း မန္တလေးယူနီဗာစီတီကော လိပ်မှသည် မန္တလေးတက္ကသိုလ်အထိ ရပ်တည်လှုပ်ရှားမှုများ အထင်အရှားခဲ့ပါတယ်။ မန္တလေးတက္ကသိုလ်ကျောင်းသားများ သမဂ္ဂဥက္ကဌများအဖြစ် ၁၉၄၇-၄၈ မှာ ကိုလှမောင်၊ ၁၉၄၈-၄၉ မှာ ကိုလှမျိုးသန့်၊ ၁၉၅၁-၅၂ မှာ ကိုမျိုးညွန့်၊  ၁၉၅၆-၅၇ မှာ ကိုကျော်စိုး၊ ၁၉၅၇-၅၈မှာ ကိုစောလွင်တို့ တာဝန်ယူခဲ့ကြပြီး မန္တလေးတက္ကသိုလ်သီးခြားဖြစ်တည်နိုင်ရေးအတွက် ၁၉၅၅ ခုနှစ် နိုဝင်ဘာလမှာ တစ်ကြိမ်၊ ၁၉၅၆ ခု သြဂုတ်လ ၂၅ ရက်မှာတစ်ကြိမ်၊ မန္တလေးတက္ကသိုလ်ကျောင်းသားများသမဂ္ဂမှ ဦးဆောင် တောင်းဆိုခဲ့ကြပါတယ်။ ၁၉၅၇ ဇွန်လ ၅ ရက် သတင်းစာရှင်းလင်းပွဲမှာတော့ ၀န်ကြီးချုပ်ဦးနုက ဒီအဆိုတွေကို ထောက်ခံခဲ့ပါတယ်။ ဒီနောက် ၁၉၅၇ ခု သြဂုတ်လ ၅ ရက်နေ့၊ မန္တလေးတက္ကသိုလ်အတွင်း ရာဇာတ်ခန်းမဆောင်မှာကျင်းပတဲ့အစည်းအဝေးကနေ မန္တလေးတက္ကသိုလ်သီးခြားဖြစ်ရေးအဆိုကို ကျောင်းသားများသမဂ္ဂကပဲ ထပ်မံပြီးတောင်းဆိုလိုက်ပါတော့တယ်။

ဒီလို... ဒီလို... အခြေအနေတွေကြောင့် ကျောင်းအုပ်ကြီးဦးကိုလေးက မကြာမီသီးခြားတက္ကသိုလ် ဖြစ်တော့မယ်။ မကြာမီ သေချာပေါက်ပေါ်လာတော့မယ့် မန္တလေးတက္ကသိုလ်အတွက် ကျောင်းသူကျောင်းသားများ၊ ဆရာ ဆရာမများပူပေါင်းပြီး တက္ကသိုလ်ဂုဏ်ရောင်ထွန်းပြောင်ရေး ကြိုးပမ်းကြဖို့ဆော်သြခဲ့ပါတယ်။

၁၉၂၅ ခုနှစ်က ဥပစာကောလိပ်ငယ်အဖြစ် အလူးလူးအလိမ့်လိမ့် ဖွင့်လှစ်ရပ်တည်ခဲ့ရတဲ့နောက် ၁၉၄၇  ခုနှစ်မှာ ယူနီဗာစီတီကောလိပ်အဖြစ် တစ်ဆင့်မြှင့်တင်ပြီးနောက် အခု... ၁၉၅၇-၅၈ ခုနှစ်မှာဖြင့် မန္တလေးတက္ကသိုလ်အဖြစ် သီးခြားရပ်တည်ဖွင့်လှစ်နိုင်ခဲ့ပါပြီ။ ၁၉၅၇ ခုနှစ် အောက်တိုဘာလ ၄ ရက်နေ့ ဗမာပြည်ပါလီမန်အထက်အောက်လွတ်တော်၂ ရပ်လုံးက မန္တလေးတက္ကသိုလ်ကို သီးခြားတက္ကသိုလ် အဖြစ်ပြဋ္ဌာန်းအတည်ပြုလိုက်ပါပြီ။ ဒါကြောင့် ၁၉၅၈ ခု ဇွန်လမှာ‘မန္တလေးတက္ကသိုလ်’ ရယ်လို့ ငွားငွားစွင့်စွင့် ကြွားကြွားဝံ့ဝံ့ဖွင့်လှစ်နိုင်ခဲ့ပါပြီ။ မန္တလေးတက္ကသိုလ်ကို ဂုဏ်ယူဝင့်ကြွားစွာဖွင့်လှစ်ခဲ့တာဖြင့် အခု ၂၀၁၁ ဇွန်လမှာဖြင့် ၅၃ နှစ်တင်းတင်း ပြည့်ခဲ့ပါပြီ။ တကယ်တော့ မန္တလေးဥပစာကောလိပ်အဖြစ် ဒီနှစ်မှာ သက်တမ်း ၈၆ နှစ်ပြည့်ခဲ့ပြီး၊ မန္တလေးယူနီဗာစီတီကောလိပ်အနေနဲ့က ဒီနှစ်မှာ ၆၃ နှစ်ပြည့်ခဲ့ပါပြီ။ မန္တလေးတက္ကသိုလ်အနေနဲ့ကတော့ ဒီနှစ်မှာ(၅၃) နှစ် တင်းတင်းပြည့်ခဲ့ပါပြီ။ ဘာပဲပြောပြော... ၈၆ နှစ်၊ ၆၃ နှစ်၊ ၅၃ နှစ်ဆိုတဲ့ သက်တမ်းကာလများအတွင်း လောကဓံရဲ့လှိုင်းတွေ ဘယ်လောက်ထန်ခဲ့ပေမယ့် အမိတက္ကသိုလ်ကြီးက ဂုဏ်ယူဝင့်ကြွားဖွယ်သားသမီးတွေကို မမောမပန်းမွေးဖွားပေးခဲ့တာဟာ မမေ့အပ်တဲ့ကျေးဇူးတရားတွေပဲ ဖြစ်ပါတယ်။

တကယ်တော့ ကျွန်တော်တို့ဟာ မန္တလေးတက္ကသိုလ်ရဲ့ အတိတ်ကရွှေထီးဆောင်းကာလတွေကိုပဲ သမင်လည်ပြန်ငဲ့စောင်းကြည့်ပြီး ဂုဏ်ယူလွမ်းဆွတ်နေခဲ့ကြတာပါ။ ဒီနေ့ပစ္စုပန်ဟာ အနာဂတ်မှာ အတိတ်ဖြစ်သွားမှာကလည်း မြေကြီးလတ်ခတ်မလွဲပါပဲ...။ လာမယ့်အနာဂတ်မှာ အတိတ်ဖြစ်သွားမယ့် ဒီနေ့ပစ္စုပ္ပန်ကိုလည်း အခုလိုဂုဏ်ယူလွမ်းဆွတ် တသကြဖို့ကတော့ ဒီနေ့ပစ္စက္ခ မန္တလေးတက္ကသိုလ်နှင့် ပတ်သက်သူတိုင်းရဲ့တာဝန်ပဲဖြစ်ပါတယ်။ အနာဂတ်မှာ မန္တလေးတက္ကသိုလ်ရဲ့ပစ္စုပ္ပန်ကို လွမ်းဆွတ်ကြခြင်းဟာ ဂုဏ်ယူဖွယ်၊ ၀ံ့ကြွားဖွယ်၊ အလွမ်းပဲဖြစ်ကြရမှာပါ...။ နှမျောတသစုပ်သပ်ခဲ့ကြရတဲ့ နောင်တအလွမ်း၊ စိတ္တရအလွမ်းတွေတော့ မဖြစ်ကြစေချင်တာ... အားလုံးရဲ့ဆန္ဒတွေပါ... ဒါကြောင့်... မန္တလေးတက္ကသိုလ်ကြီးနဲ့ဖြတ်သန်းခဲ့မှု ကမ္ပည်းမော်ကွန်းတွေကိုပြန်လည် ဖော်ထုတ်၊ တသ၊ သတိရကြရင်း မန္တလေးတက္ကသိုလ်ကြီးရဲ့ဂုဏ်ရောင်ပြောင်မှုအစဉ်အလာတွေ အဓွန့်ရှည်ရေး၊ ကြိုးပမ်းကြမှုအတွက် အားသစ်အင်သစ်၊ အသိအမြင်သစ်များရရှိနိုင်ပါစေလို့ ဆုတောင်းတင်ပြပါတယ်။

ဆူးငှက်

(ယူတာကဒီကပါ) http://www.facebook.com/notes/cjmyanmar/နန်းပြာသာဒ်-စိန်ပန်းနီ-ပင်မဆောင်-ရေနီမြောင်း-ဆူးငှက်/269336969836785