ငြိမ်းချမ်းရေးပဲ့တင်သံ အပိုင်း -၁၁ (မျိုးမြင့်ချို) ဇူလိုင် ၁၉ ရက် ၂၀၁၂ နေ့က အာရ်အက်ဖ်အေမှ ထုတ်လွှင့်ပြီးဖြစ်ပါတယ်။
သောတရှင်များခင်ဗျား…
အရင်တပတ်ကတင်ပြခဲ့တာမှာ တတိုင်းပြည်လုံးအပစ်အခတ်ရပ်စဲထားရေးကိစ္စကို (၃)ပါတီဗဟိုအဆင့်ကိုယ်စားလှယ်တွေနဲ့ တော်လှန်ရေးကောင်စီကိုယ်စားလှယ်တွေ ပြောဆိုနေကြရင်း (၃)ပါတီနဲ့တင်မက မဒညတအနေနဲ့ပါ ဆက်လက်ဆောင်ရွက်မယ်ဆိုတဲ့ သဘောတူညီချက်ကို ဗမာပြည်ကွန်မြူနစ်ပါတီ(ဗကပ)ထံ အကြောင်းကြားဖို့ နှစ်ဘက်သဘောတူခဲ့တယ်ဆိုတာအထိတင်ပြခဲ့ပါတယ်။ (၃)ပါတီနဲ့ တော်လှန်ရေးကောင်စီတို့ဆွေးနွေးနေရာကနေ ဗကပတို့ မဒညတတို့ပါ ပါလာပြီဆိုတော့ အဲဒီအကြောင်းတွေပါ အဆက်အစပ်နဲ့တင်ပြမှ ဖြစ်စဉ်တခုလုံးကို အကျဉ်းချုပ်ခြုံငုံမိဖို့ပိုလွယ်ကူလိမ့်မယ်လို့ ယူဆပါတယ်။ ဒါ့ကြောင့် (၃)ပါတီနဲ့အစိုးရဆွေးနွေးတာနဲ့တဆက်တစပ်ထည်းဖြစ်နေတဲ့ ဗကပနဲ့ တော်လှန်ရေးကောင်စီကြားက ဖြစ်ပေါ်တိုးတက်မှုတွေကိုလည်း အကျဉ်းချုပ်တင်ပြချင်ပါတယ်။
၁၉၆၃ ခုနှစ် ဧပြီလ (၁ဝ) ရက်နေ့မှာ ဗကပကနေတော်လှန်ရေးကောင်စီကို (အစိုးရနဲ့လက်နက်ကိုင်တော်လှန်ရေးအင်အားစုများတွေ့ဆုံဆွေးနွေးပြီး ပြည်တွင်းစစ်ရပ်စဲ၍ပြည်တွင်းငြိမ်းချမ်းရေးပြည်လည်တည်ဆောက်ရန်)ဆိုတဲ့ခေါင်းစဉ်နဲ့စာတစောင်ပေးပို့ ကမ်းလှမ်းခဲ့ဖူးတာရှိပါတယ်။
ဒီလိုနဲ့ ၆၃ ခုနှစ် ဇွန်လ (၁၁)ရက်မှာ အစိုးရဘက်က ငြိမ်းချမ်းရေးဖိတ်ခေါ်ချက် ထွက်လာပါတယ်။ ဒီ့နောက်တော့ ဗကပက အစိုးရရဲ့ဖိတ်ခေါ်ကမ်းလှမ်းချက်နဲ့ပတ်သက်လို့ အချက် (၆)ချက်ပါဝင်တဲ့ သဘောထားကို ပြန်ကြားခဲ့ပါတယ်။ စာက ၁၉၆၃ ခုနှစ် ဇွန်လ (၂၂)ရက်နေ့၊ ဗကပ ဗဟိုကော်မတီဥက္ကဋ္ဌ သခင်သန်းထွန်းအမည်နဲ့ဖြစ်ပြီး ပြည်ထောင်စုမြန်မာနိုင်ငံတော်လှန်ရေးကောင်စီဥက္ကဋ္ဌ ဗိုလ်ချုပ်ကြီးနေဝင်းသို့… လို့ လိပ်မူထားတာတွေ့ရပါတယ်။
စာပါသဘောတွေကို ချုပ်ပြီးတင်ပြရမယ်ဆိုရင်တော့…အချက် (၁) ကနေ (၃) အထိမှာ.. ဒီဖိတ်ခေါ်ချက်ဟာ ၆၃ ဧပြီ (၁ဝ)ရက်နေ့ ဗကပရဲ့ငြိမ်းချမ်းရေးကမ်းလှမ်းချက်ကို ပြန်ကြားတာလို့ယူဆတဲ့အကြောင်း၊ ဗမာပြည်ရဲ့ပြဿနာအရပ်ရပ်ကိုဖြေရှင်းဖို့ အဓိကသော့ချက်ဟာ တွေ့ဆုံဆွေးနွေးတဲ့နည်းနဲ့စစ်ကိုရပ်ပြီး ငြိမ်းချမ်းရေးကိုတည်ဆောက်ဖို့သာဖြစ်တဲ့အကြောင်း၊ ဒါကိုလည်း ဗကပက အကြိမ်ကြိမ်တင်ပြနေတာ ဖြစ်တဲ့အကြောင်း၊ လွတ်ငြိမ်းခွင့်နဲ့မှမလုံလောက်ရင်ဆိုတာဟာ မသင့်တော်တဲ့အကြောင်း၊ ဒီလိုလက်နက်ချခိုင်းတဲ့နည်းနဲ့ စစ်ကိုရပ်လို့မရ၊ ငြိမ်းချမ်းရေးတည်ဆောက်လို့မရဆိုတာကို အစိုးရဘက်ကအသိအမှတ်ပြုလာတာလို့မြင်တဲ့အကြောင်း၊ ဖိတ်ခေါ်ချက်မှာပါတဲ့ ကြိုတင်စည်းကမ်း သတ်မှတ်ချက်မထားရဆိုတာကိုလည်း လွတ်ငြိမ်းခွင့်အပေါ်အခြေခံပြီးဆွေးနွေးမယ်လို့ ကြိုတင်သတ်မှတ်တာမျိုးမဟုတ်ဘူးလို့ ယူဆသလို၊ စစ်ရပ်စဲပြီးငြိမ်းချမ်းရေးအတွက် တန်းတူရည်တူလွတ်လွတ်လပ်လပ်ဆွေးနွေးကြဖို့ အစိုးရဘက်ကဆန္ဒပြုတာလို့ ယူဆတဲ့အကြောင်း ဖော်ပြထားပါတယ်။
တဆက်ထဲမှာပဲ ကြေညာချက်မှာပါတဲ့ (ကြိုတင်စည်းကမ်းသတ်မှတ်ချက်ဆိုတာ ဆွေးနွေးပွဲနယ်နမိတ်ဘောင်ကို အသေတုတ်ချည် ကျဉ်းမြောင်းရာရောက်စေသည်) လို့ဆိုထားတာဟာလည်း အမျိုးသားလွတ်လပ်မှုထိန်းသိမ်းရေး၊ နိုင်ငံတော်လည်းဒီမိုကရေစီကျ၊ လူထုရဲ့ဒီမိုကရေစီအခွင့်အရေးတွေကိုလည်းပေး၊ ဒီမိုကရေစီပါတီတွေရဲ့ တရားဝင်တည်ရှိခွင့်နှင့် လုပ်ပိုင်ခွင့်လည်းရရှိ၊ လူမျိုးစုအားလုံးတန်းတူရည်တူ စည်းလုံးညီညွတ်ရေးဆိုတဲ့အခြေခံမူတွေကိုသာမကပဲ အခြားဆွေးနွေးဘက်တွေကတင်ပြတဲ့ အရေးကြီးတဲ့အချက်တွေကိုပါ ကျယ်ကျယ်ပြန့်ပြန့်ဆွေးနွေးနိုင်ဖို့ အစိုးရဘက်ကဆန္ဒပြုတာလို့ယူဆတဲ့အကြောင်း၊ ဖိတ်ခေါ်ချက်မှာပါသလို (အမြတ်ထွက်မှဟုသဘောမထားပဲ လယ်သမားအလုပ်သမား လုပ်သားပြည်သူတို့၏အကျိုးကို အာရုံစိုက်လုပ်ကိုင်သွားဖို့) ဆိုတာကိုလည်း အစိုးရက်ဘက်က ဆွေးနွေးပြီးနောက်လက်နက်ချခိုင်းတဲ့ အမြတ်ထုတ်တဲ့နည်းပရိယာယ်ကိုမကျင့်သုံးဟု ဆိုလိုရာရောက်တဲ့အပြင် တစ်ပြည်လုံးအတွက် တကယ်အကျိုးရှိစေမယ့်နိုင်ငံရေးကိစ္စတွေကိုပဲ လေးလေးနက်နက်ညှိုနှိုင်းဆွေးနွေးပြီး ဖြေရှင်းဖို့ဆန္ဒပြုတာလို့ယူဆတဲ့အကြောင်း၊ ခုလိုဖိတ်ခေါ်မှုဟာ ဆရာကြီးသခင်ကိုယ်တော်မှိုင်းနဲ့တကွပြည်သူတရပ်လုံးရဲ့ ငြိမ်းချမ်းရေးတောင်းဆိုချက်တွေကို အတိုင်းအတာတခုအထိ တစုံတရာလိုက်လျောလာတာလို့မြင်တဲ့အကြောင်းတွေ ဖော်ပြထားပါတယ်။
အချက်(၂)အောက်မှာပဲ တဆက်တည်းဖော်ပြထားတာကတော့..အစိုးရရဲ့ ကမ်းလှမ်းချက်မှာ မရှင်းလင်းတဲ့အချက်တချိုနဲ့ ဗကပနဲ့အမြင်ကွဲပြားနေတဲ့အချက်တချို့ပါနေပေမယ့် အခုကမ်းလှမ်းချက်ဟာ စေ့စပ်ဆွေးနွေးရေးနည်းလမ်းကို သုံးလာတာဖြစ်တဲ့အတွက် ဗကပက ကြိုဆိုပါတယ်လို့ ဖော်ပြထားပါတယ်။
အချက်(၃)မှာတော့.. ဆွေးနွေးဖို့သဘောတူတာမှန်ပေမယ့် ဖိတ်ခေါ်ချက်ထဲမှာရှိနေတဲ့ မရှင်းမလင်းဖြစ်နေတဲ့အချက်အလက်တွေကို အရင်ဆုံးရှင်းလင်းပေးစေလိုတဲ့အကြောင်း ပြောထားပါတယ်။ ဒါမှလည်း အစည်းအဝေးတွင်စဉ်းစားရမည့်အခြေခံများ ကြိုတင်ညှိနှိုင်းသတ်မှတ်ပေးရေးအတွက် လွယ်ကူပါလိမ့်မယ်လို့ဆိုထားပါတယ်။ အဲသလို အခြေခံများညှိနှိုင်းသတ်မှတ်ပြီးဆွေးနွေးမှသာ ဆွေးနွေးပွဲထမြောက်အောင်မြင်ပါလိမ့်မယ်လို့ဖော်ပြထားပြီးမှ အစိုးရဘက်က ရှင်းလင်းပေးရမယ့်အချက်တွေနဲ့ သူတို့ဘက်ကမြင်တဲ့ အစည်းအဝေးအခြေခံများသတ်မှတ်ရေးအတွက် အကြံပေးချက်တွေကို ဆက်လက်ဖော်ပြထားတာတွေ့ရပါတယ်။
သောတရှင်များခင်ဗျား....
အခုချိန်ထိကျနော်တို့မြင်ခဲ့ရတာမှာ အစိုးရနဲ့တောတွင်းလက်နက်ကိုင်အင်အားစုတွေကြားမှာ သံသယတွေအထိုက်အလျှောက်ရှိနေကြတာ တွေ့ရမှာဖြစ်ပါတယ်။ ဒါ့ကြောင့်မို့လည်း မဆွေးနွေးခင်၊ ဆွေးနွေးနေစဉ်နဲ့ဆွေးနွေးအပြီးမှာ ရှိနေရမယ့်အခင်းအကျင်းစတာတွေကို အလေးအနက်ထောက်ပြပြောဆို ပြင်ဆင်နေကြတာလည်းဖြစ်ပါတယ်။ အစိုးရဘက်ကလည်း ဆိုရှယ်လစ်တို့၊ ပြည်သူ့ဒီမိုကရေစီတို့၊ ပြည်တွင်းငြိမ်းချမ်းရေးတို့ဆိုတဲ့စကားလုံးတွေလှိုင်လှိုင်ပြောပြီး စစ်အာဏာကိုစတင်တည်ဆောက် ချိန်ဖြစ်နေသလို ပြည်တွင်းငြိမ်းချမ်းရေးလူထုလှုပ်ရှားမှုကြီးရဲ့ရေချိန်ကလည်း အဆမတန် မြင့်တက်နေပါတယ်။ လူထုလှုပ်ရှားမှုအရှိန်အဟုန်ကိုလျှော့ချပစ်ဖို့ဆိုတဲ့ အစိုးရရဲ့နိုင်ငံရေးလှည့်ကွက်ထဲမှာ လူထုရော ဆန့်ကျင်ဘက်အင်အားစုတွေပါ လည်ထွက်မသွားရေးအတွက် တတိယအင်အားစုလို့ဆိုရမယ့် အဖွဲ့အစည်းတွေကလည်း အပြင်းအထန်ကြိုးပမ်းနေချိန်လည်း ဖြစ်နေပါတယ်။
နောက်တပတ်ဆက်ပါဦးမယ်။
ကျနော်မျိုးမြင့်ပါခင်ဗျား။
0 comments:
Post a Comment