ကလေးတွေ အမေပျောက်စဉ်က ဗားတော့ဗရက်
(ဘာသာပြန်သူ) တင်မောင်အေး
၁၉၃၉ ခုနှစ်က ပိုလန်ပြည်ကို
နာဇီဖက်ဆစ်တပ်တွေ ကျူးကျော်တော့
တပြည်လုံးပဲ သွေးချောင်းစီးကာ စစ်ဖြစ်ခဲ့တယ်
မြို့တွေရွာတွေ အများကြီးပဲ
တစပြင်အတိ ဖြစ်ခဲ့တယ်။
မောင်ပျောက်တဲ့ ညီမသည်တွေ
စစ်ဒဏ်ကြောင့် မုဆိုးမဖြစ်ရရှာတဲ့ဇနီးသည်တွေ
လောင်မီးတွေအနှံ့ကျပြီး အကွဲကွဲအပြားပြားနဲ့
ကလေးတွေ အမေနဲ့ကွဲပြီး ကစဥ့်ကရဲဖြစ်ခဲ့ပါတယ်။
ပိုလန်သတင်းတွေ မှောင်ကျသွားခဲ့တယ်
ပေးစာတွေလည်း မရ၊ သတင်းစာတွေလည်း ဖတ်ခွင့်မကြုံတော့ဘူး
သို့ပေမဲ့
ဥရောပ အရှေကဖျားနိုင်ငံတခုကလူတွေဟာ
ပိုလန်ပြည်နဲ့ပတ်သက်တဲ့
မကြုံဘူးတဲ့ဖြစ်ရပ်ဆန်းတခုအကြောင်း
သတင်းစကားတခု ကြားကြရတယ်။
နှင်းသည်းထန်တဲ့ ဆောင်းလယ်မှာပဲ
ပိုလန်ပြည်အရှေ့ပိုင်းက မြိ့လေးတမြို့မှာ
ကြုံခဲ့ရပုံလေးလေ
ကလေးတွေအမေပျောက်တော့ ကလေးချင်းစုကာ
အမေ သို့မဟုတ် ခိုကိုးရာ လိုက်လို့ရှာကြပါတယ်။
တာလမ်းမကြီးတွေ တလျှောက်မှာ
ငတ်ပြတ်နေတဲ့ကလေးတွေဟာ အစုအဝေးနဲ့
ခိုကိုးရာ ရှာတယ်
အိမ်ပျက်တွေနားရောက်တော့
အိမ်ထဲက ကလေးတချို့ထွက်လာပြီး
အဲဒီ အစုအဝေးထဲကို လိုက်လာ
ဖေဖေ မေမေတို့ကိုရှာဖို့ လိုက်ခဲ့တယ်။
လူသတ်ကွင်းဖြစ်တဲ့ မြို့ပျက်နဲ့တော့ ဝေးချင်ကြပါတယ်တဲ့
ညဆို တစ္ဆေတွေကလည်း ချောက်ပါဘိသနဲ့
ဒီကနေ ထွက်သွားပြီး
စိတ်အေးချမ်းသာရာ ရမယ့်
တိုင်းပြည်သစ်တခုတော့ တွေ့ကောင်းပါရဲ့ ထင်မိတယ်။
ကလေးတယောက်က ခေါင်းဆောင်ပါတယ်
ခေါင်းဆောင်နောက်ကို ကလေးတွေလိုက်ကြမယ်
ခက်တယ် ... အဲဒီခေါင်းဆောင်ကလည်း လမ်းမသိဘူး
ဦးနှောက် သိပ်ရှုပ်တာပဲ။
ဆယ်နှစ်သမီးလေး တယောက်ဟာ
လေးနှစ်သားအရွယ် မောင်ငယ်ကလေးကို ပွေ့ချီလိုက်ပါလာတယ်
သူ့မောင်လေးကို သူ့သားလေးလို
ဂရုတစိုက်မွေးကျွေးခွင့် ရချင်ရှာမှာပဲ။
ဟောဟိုမှာ ... ကတ္တီပါအင်္ကျီနဲ့ ကလေးလေး တယောက်
ကတ္တီပါကော်လာမှာလဲ နှင်းစက်လေးတွေ
စွတ်စွတ်စိုလို့ပဲ
ခြေမွေးမီးမလောင် အကျသားနေခဲ့ထိုင်ခဲ့ရတဲ့ ဒီကလေးခမျာလဲ
တခြားကလေးတွေလို ဒုက္ခရောက်နေတာပါပဲ။
စစ်တိုက်တမ်းကစားလေ့ရှိတဲ့ ညီအကို နှစ်ဦးဟာ
စားစရာတွေ့မလားလို့ လယ်တဲတခုကို
ချဉ်းကပ် ဖေါက်ထွင်းတယ်
တဲထဲမှာ ဘာစားစရာမှ မတွေ့တော့
သူရဲကောင်းလေး နှစ်ဦးဟာ
တဲကနေ ပြန်ဆုတ်ခွာလာရပါတယ်။
ပိန်ချုံးပြီး စိတ်ညစ် ချောင်ကပ်နေတဲ့
ဟို ကလေးလေးက ငြိမ်လှချည့်လား
သူက အရင်တုန်းက
နာဇီအဖွဲ့ထဲ ၀င်ခဲ့ဖူးတယ်လေ
ဒီလိုဝင်မိခဲ့တာကိုပဲ
သူ့ကိုယ်သူ အကြိမ်ကြိမ် ဆဲရေးပြစ်တင်နေမိတယ်။
ဂီတသမားလေး တယောက်လည်းပါတယ်
ဂိုဒေါင်ပျက်ကြီးတခုထဲက ဘင်ကလေးတလုံး ကောက်ရထားတယ်
ဒါပေမဲ့
ရန်သူစစ်တပ်တွေ ကြားမှာစိုးလို့
ဘင်ကလေးကို တီးချင်ရက်နဲ့မတီးရဲရှာပါဘူး။
ခွေးတကောင်လည်းပါသေး
သတ်ပြီး ဟင်းချက်စားဖို့ ခေါ်လာတာလေ
လက်တွေ့တော့ ခွေးကိုမသတ်ရက်ဘူး ... သနားတယ်
ခွေးကလည်း တန်းလန်းတန်းလန်းနဲ့ လိုက်လာတာပဲ။
စာပြတမ်း သိပ်ကစားချင်တဲ့
ကလေးတယောက်လည်း ပါတယ်
ကကြီး ခကွေး သင်ပေးမယ်တဲ့
တင့်ကားပျက်ကြီးတခုရဲ့ နံရံမှာ
စာလုံးပေါင်းတွေရေးကာ စာသင်ပေးပါတယ်။
ရေတံခွန်ကြီးတခုရဲ့ဘေးကိုရောက်တော့
ရေသံ ဆူညံတာကို အကာအကွယ်ယူကာ
အပျော်တမ်း ပြဇာတ်လေးကပြီး
ဘင်သမားလေးက ဘင်တီးတယ်
ဘယ်သူမှ ဒီကအသံတွေကို မကြားနိုင်တော့ဘူးလေ။
ဆယ့်နှစ်နှစ်သမီးလေး တယောက်နဲ့
ဆယ့်ငါးနှစ်သားလေး တယောက်
ရီးစားဖြစ်သွားကြသေးတယ်
လယ်တဲပျက်ကလေး ဘေးမှာ
နှစ်ယောက်သား ထိုင်ကာ
ကောင်လေးကို ကောင်မလေးက ခေါင်းဖီးပေးတယ်။
စစ်ပြေးခရီးစဉ်ရဲ့ထန်ပြင်းတဲ့ အတိဒုက္ခတွေကြားမှာ
အချစ်စိတ်ကို ဘယ်လိုရှင်သန်အောင်လုပ်နိုင်ကြမှာလဲ
နှင်းတွေ သိပ်သိပ်သည်းသည်း ထူထူထပ်ထပ်ကျနေရင်
ပဲကလေးတွေ အညှောင့်မပေါက်နိုင်ဘူးလေ။
တနေရာမှာ တခြားနေရာက ကလေးတစုနဲ့တွေ့တယ်
တဖွဲ့နဲ့ တဖွဲ့ စကားများ ရန်ဖြစ် ရိုက်နှက်ကြတယ်
အဓိပ္ပါယ်မဲ့စွာရန်ဖြစ်နေမှန်း စဉ်းစားမိကြတော့
ဆက်ပြီး ရန်မဖြစ်ကြတော့ဘူး။
လမ်းဗိုလ်တယောက်ရဲ့အိမ်ကို ဗဟိုပြုပြီး
တဦးနဲ့ တဦးရိုက်နှက်
တဖွဲ့နဲ့ တဖွဲ့ ရန်ပြုနေကြတုန်းမှာ
အဖွဲ့တဖွဲ့ဟာ ပါလာတဲ့စားစရာတွေ ကုန်သွားတယ်
သိပ်ကို စိတ်ဒုက္ခရောက်တာပဲ၊ ခက်တယ်။
တခြားအဖွဲ့က ဒီသတင်းကိုကြားတယ်
ငတ်တယ်ဆိုတာ မဖြစ်သင့်ဘူးလို့ တွေးတယ်
ရန်သူ ကလေးတွေဆီကို
အားလူးအိတ် တအိတ် ပို့ပေးတယ်
စားစရာမရှိဘဲ စစ်တိုက်လို့ မဖြစ်ပါဘူး။
အငြင်းအခုံဖြစ်ပြီး ဆူညံသွားသေးတယ်
ရန်ဖြစ်တဲ့ ကလေးနှစ်ယောက်ဟာ
ဒေါသမီး ဟုန်းဟုန်းတောက်နေကြတယ်
ကလေးတယောက်က ၀င်ပြီးဖြန်ဖြေဖို့ ကြိုးစားပါသေးတယ်
ဖြန်ဖြေသူကို ၀ိုင်းဆဲလိုက်တာနဲ့
တရားသူကြီးလဲ ခွေသွားတာပဲ။
တယေက်နဲ့တယောက် အကူအညီပေးကြတာလဲ ရှိပါတယ်
ကူညီတယ်ဆိုတာ တကွက်မှအပြစ်တင်စရာမရှိပါဘူးတဲ့
အိမ်စေမလေးတဦးဟာ ချာတိတ်လေးတယောက်ကို ရေချိုးပေးခြင်းဖြင့်
အကူအညီဆိုတာ အကျိုးပြုလုပ်ငန်းဖြစ်ကြောင်း လက်တွေ့ပြတယ်။
ဒါပေမဲ့ အဲဒီ အိမ်စေမလေးဟာ သူများကိုကူညီဖို့
တနေ့ နှစ်နာရီပဲ အချိန်ရရှာပါတယ်
သူ့သခင်မလေးအတွက်
အ၀တ်လျှော်ပေးရသေးတာမို့
တာဝန်ကိုလည်း အပျက်မခံဝံ့ရှာဘူးလေ။
ကတ္တီပါအင်္ကျီနဲ့ သဌေးသားကလေး
လမ်းမှာ သေသွားတယ်
ဂျာမန်ကလေး နှစ်ယောက်က
သူ့အလောင်းကို သယ်ပေးပြီး မသာချကြရတယ်၊
အလောင်းကို တနေရာမှာပဲ မြေမြုပ်ခဲ့ရပါတယ်။
ရေဖြန်းခရစ်ယာန်ရော ရေနှစ်ခရစ်ယာန်ရော
နာဇီအဖွဲ့ဝင်ဟောင်းတွေရော ကျင်းနားမှာရှိကြတယ်၊
မြေမြှုပ်ပြီးတဲ့အခါ ဆိုရှယ်လစ်ဝါဒစိတ်ဝင်စားတဲ့ ကလေးတယောက်က
ခု မသေဘဲ ကျန်သူတွေရဲ့
နောင်တခေတ် အလားအလာကို တရားဟောတယ်။
ဆိုရှယ်လစ်လူ့ဘောင်အတွက်
မျှော်လင့်ယုံကြည်ကြပါတယ်
လောလောဆယ်တော့ ထမင်းမရှိ ဟင်းမရှိ၊
စားစရာ ရှိရက်နဲ့ခေါ်မကျွေးရင်တော့
ခိုးစားကြရမှာပဲ
ထမင်းမကျွေးလို့
ရှိတဲ့ဆီက ခိုးတာ တရားတယ်။
ဆင်းရဲလို့ မကျွေးမမွေးနိုင်တဲ့လူကိုတော့
ခေါ်မကျွေးနိုင်ရင်လဲ အပြစ်မတင်ပါဘူး
ကျွေးချင် မွေးချင် ဒါနပြုချင်ပေမယ့်
ကျီထဲမှာစပါးမရှိရင် ဘယ်သူ ထမင်းခေါ်ကျွေးနိုင်မှာလဲ။
လူနှစ်ယောက် သုံးယောက်လောက်တော့
ကျွေးမွေးပြုစုနိုင်ပါတယ်
လူသိပ်များရင် မတတ်နိုင်ဘူးလေ
အိမ်တံခါး ပိတ်လိုက်ရတာပဲ။
လယ်တဲပျက်တခုကို ရောက်တော့
စပါးအိတ် တအိတ် တွေ့ပါတယ်
ဆန်ဖွပ်မယ် ထမင်းချက်မယ်
ဆယ့်နှစ်နှစ်အရွယ် ကောင်မလေးတယောက်
ကြိုးစားရှာပါတယ်။
ထောင်းလိုက် ထုလိုက်
ထင်းတွေရှာကာ အသင့်ချထားလိုက်ကြသေး
ဆန်ကမကောင်းဘူး၊ ကြေနေတယ်
ဆန်မှ မဖွပ်တတ်ဘဲကိုး။
တောင်ဘက်အရပ်ဒေသဆီ သွားကြမယ်တဲ့
တောင်ဘက်ဆိုတာ
မွန်းတည့်ချိန်မှာ နေမင်းကြီးက
ခေါင်းပေါ်မှာ တည့်တည့်ကြီးထွန်းလင်းတဲ့ ဒေသတဲ့လေ။
တနေ့ ထင်းရှူးတောတခုထဲ ရောက်တော့
ဒဏ်ရာနဲ့လဲနေတဲ့ စစ်သားတယောက်ကို တွေ့တယ်
ဒီလူ နေကောင်းအောင် ခုနှစ်ရက်လောက် ပြုစုကုသကြတယ်
ဒီလူကြီးကတော့ ဒို့ကို လမ်းပြနိုင်မှာပဲလို့ ထင်ပြီး
ပျော်လည်း ပျော်ကြတယ်။
`ဘစ်ဂိုရေး´လို့ ခေါ်တဲ့ မြို့ကိုရောက်အောင်သွားကြလို့ ... ပဲ
စစ်သားကြီးက ပြောနိုင်ရှာတော့တယ်
အဖျားက လွန်နေပြီမို့
ရှစ်ရက်မြောက်နေ့မှာ သေတော့တယ်
ကလေးတွေဟာ စစ်သားအလောင်းကို မြေမြုပ်ပေးခဲ့ကြတယ်။
နှင်းတောထဲမှာမြုပ်နေတဲ့ ဘစ်ဂိုရေးဆီ ညွှန်ပြတဲ့
လမ်းပြဆိုင်းဘုတ်တခုကို ကလေးတွေ တွေ့ကြတယ်
ဆိုင်းဘုတ်ဟာ နေရာမှန်မှာ မရှိတော့ဘဲ
လမ်းလွှဲပြဖို့ ရွှေ့ထားတာကို
ကလေးတွေ မသိကြပါဘူး။
စစ်ကာလ စစ်ရေးစစ်ရာမို့
ရီစရာ ပြောင်တာမဟုတ်ဘူး
တမင်လမ်းလွှဲဖို့ ဆိုင်းဘုတ်ရွှေ့ကာ
လမ်းမှားဆီ ပြထားတာ ဖြစ်တယ်
ကလေးတွေဟာ
သူတို့ လိုက်ရှာလို့တွေ့နိုင်မှာမဟုတ်တော့တဲ့
ဘစ်ဂိုရေး မြို့ကို
လိုက်ရှာဖို့ ခရီးဆက်ကြတယ်။
ကလေးခေါင်းဆောင်နားမှာ
အားလုံးစုပြီး ခဏရပ်လိုက်တယ်
နှင်းဝေနေတဲ့ ကောင်းကင်ပြင်ကို စိုက်ကြည့်ကြတယ်
`ဟောဟိုမှာ ....
ဘစ်ဂိုရေးမြို့ ရှိလိမ့်မယ်´
ခေါင်းဆောင်က စိတ်မှန်းနဲ့လက်ညှိုးထိုးပြနေတယ်။
ခရီးဆက်တော့ ညမှာ မီးရောင်တစုကို တွေ့တယ်
အနားကို မကပ်ရဲပါဘူး
တင့်ကားကြီး သုံးစီးနဲ့
စစ်သားတွေအများကြီးကို မြင်ရပါတယ်။
တခါတော့
မြို့တော်ကြီးတခုကို ရောက်ကြသေးတယ်
မြို့ကို ကွေ့ပတ်ရှောင်ကွင်းကြပါတယ်
နေ့ခင်းဆို ခရီးမသွားရဲဘူး
မြို့ကို ကွင်းပြီး ရှောင်ခဲ့ရပါတယ်။
နှင်း သိပ်ကျတဲ့
ပိုလန်ပြည် အရှေ့တောင်ပိုင်းကို
ကလေးငါးဆယ့်ငါးဦး ရောက်လာကြတာပဲ
နောက်ဆုံးအဆင့် စုံစမ်းလို့ရခဲ့ပါတယ်။
သူတို့အကြောင်း မျက်စိစုံမှိတ်ကာ တွေးကြည့်မိတယ်
စပါးကျီပျက် တခုက တခု
ဟိုသွား ဒီသွားနဲ့
ခရီးသည် ကလေးတွေကို မြင်ယောင်နေမိပါတော့တယ်။
နောက်တော့ တနေရာရာကပဲ
နှင်းအေးထဲမှာ မဆုံးတမ်းခရီးဆက်နေရတဲ့
အိုးပစ် အိမ်ပစ် စစ်ပြေးဒုက္ခသည်တွေ
အသစ် အသစ် ထပ်ပေါ်ပေါက်လာကြပါတော့တယ်။
ငြိမ်းချမ်းသော ကမ္ဘာမြေကို
တောင့်တ ရှာမောကြတယ်
စစ်မီးဟာ ဒီလူတွေရဲ့တိုင်းပြည်တွေကို
ပြာကျ ပျက်စီးစေခဲ့ပါတယ်၊
ဒီလိုလူတွေ ဒီလိုပြည်တွေ ပိုများလာပါတယ်။
ကျနော့်ရဲ့ မြင်ကွင်းထဲမှာ
စစ်ပြေးဒုက္ခသည်တွေ ပိုများလာတာ တွေ့ရတယ်
စပိန်ပြည် ပြင်သစ်ပြည် စသည် စသည်
အစုလိုက် အပြုံလိုက် ဒုက္ခရောက်ကြတယ်။
အဲဒီနှစ် ဇန်န၀ါရီလမှာ
ပိုလန်လူမျိုးတချို့ဟာ အစာငတ်ပြတ်နေတဲ့
ခွေးတကောင်ကို ဖမ်းမိတယ်
ခွေးရဲ့လည်ပင်းမှာ စာတမ်းကပ်ကလေးတခု
ကြိုးနဲ့ချီပြီး တန်းလန်းဆွဲထားတာ တွေ့တယ်။
စာကတော့
`ကျေးဇူးပြု၍ ကူညီပါခင်ဗျား
ကျနော်တို့ ဘယ်ရောက်နေလဲ မသိတော့ပါဘူး
ကျနော်တို့ ကလေးငါးဆယ့်ငါးဦးရှိရာသို့
ဤခွေးက ခင်ဗျားကို လမ်းပြပေးပါလိမ့်မယ်။
တကယ်လို့ ခင်ဗျား ကျနော်တို့ကို
လာမကယ်အားပါက
ဒီခွေးကို လွှတ်လိုက်ပါ
ခွေးကို မပစ်သတ်ကြပါနဲ့၊ ကျနော်တို့ရှိရာကို
ဒီခွေးကလွဲလို့ ဘယ်သူမှ လမ်းရှာလာတတ်မှာ မဟုတ်ပါဘူး´
ကလေးလက်ရေးလေးနဲ့ပဲ
လယ်သမားတွေက ဒါကို ဖတ်မိကြပါတယ် ...။
အဲဒီနောက် ... နှစ်နှစ်လောက်ကြာတော့
အစာငတ်နေတဲ့ အဲဒီခွေးဟာ
လှဲ့လည်သွားလာရင်း
သေသွားတယ်။ ။
ဗားတော့ဗရက်
(ဘာသာပြန်= တင်မောင်အေး)
စာအုပ်ထုတ်ဝေခုနှစ် = ၁၉၇၀၊ ဇူလိုင်လ
(ယူတာကဒီနေရာကပါ) http://www.facebook.com/notes/ko-pouk/ကလေးတွေ-အမေပျောက်စဉ်က-ဗားတော့ဗရက်-ဘာသာပြန်သူ-တင်မောင်အေး/312341635527990
0 comments:
Post a Comment